Rikors ippreżentat fit-3 ta’ Diċembru 2020 – OL vs Il-Kunsill

(Kawża T-714/20)

(2021/C 44/73)

Lingwa tal-kawża: l-Ispanjol

Partijiet

Rikorrent: OL (rappreżentanti: J. Viñals Camallonga, J. Iriarte Ángel u E. Delage González, avukati)

Konvenut: Il-Kunsill tal-Unjoni Ewropea

Talbiet

Ir-rikorrent jitlob li l-Qorti Ġenerali jogħġobha:

—

tannulla d-Deċiżjoni tal-Kunsill 2014/145/PESK tas-17 ta’ Marzu 2014 dwar miżuri restrittivi fir-rigward ta’ azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukraina, fil-verżjoni attwali tagħha, sa fejn din tagħmel riferiment għar-rikorrent jew tista’ taffettwah.

—

tannulla r-Regolament tal-Kunsill (UE) Nru 269/2014 tas-17 ta’ Marzu 2014 dwar miżuri restrittivi fir-rigward ta’ azzjonijiet li jdgħajfu jew jheddu l-integrità territorjali, is-sovranità u l-indipendenza tal-Ukraina, fil-verżjoni attwali tiegħu, sa fejn dan jagħmel riferiment għar-rikorrent jew jista’ jaffettwah.

Motivi u argumenti prinċipali

Insostenn tar-rikors tiegħu, ir-rikorrent jinvoka seba’ motivi.

1.	L-ewwel motiv, ibbażat fuq żball manifest ta’ evalwazzjoni tal-fatti li fuqhom huma bbażati r-restrizzjonijiet ikkontestati fil-mument tal-estensjoni tagħhom, peress li, sa fejn huwa kkonċernat ir-rikorrent, dawn ġew estiżi mingħajr bażi fattwali u probatorja reali.

2.	It-tieni motiv, ibbażat fuq nuqqas tat-twettiq tal-obbligu ta’ motivazzjoni, peress li r-regoli kkontestati huma nieqsa, fir-rigward tar-rikorrent, minn motivazzjoni korretta, fatt li jimpedixxi l-artikulazzjoni adatta tad-difiża tiegħu.

3.	It-tielet motiv, ibbażat fuq il-ksur tad-dritt tal-bniedem għal-libertà ta’ espressjoni, peress li l-allegati dikjarazzjonijiet, talbiet u manifestazzjonijiet attribwiti lilu huma koperti mill-imsemmi dritt tal-bniedem.

Ir-raba’ motiv, ibbażat fuq il-ksur tad-dritt għal protezzjoni ġudizzjarja effettiva fir-rigward tal-motivazzjoni tal-atti, tan-nuqqas ta’ sostenn fattwali effettiv tal-motivi allegati mill-Kunsill u tad-drittijiet għal-libertà ta’ espressjoni, tad-difiża u għall-proprjetà, peress li ma ġewx osservati l-ħtieġa li jiġu prodotti provi effettivi u r-rekwiżit ta’ motivazzjoni fil-mument tal-estensjoni tar-regoli, fatt li jaffettwa d-drittijiet l-oħra.

5.	Il-ħames motiv, ibbażat fuq il-ksur tad-dritt għall-proprjetà b’rabta mal-prinċipju ta’ proporzjonalità, sa fejn dan id-dritt ġie limitat u barra minn hekk b’mod sproporzjonat.

6.	Is-sitt motiv, ibbażat fuq il-ksur tal-prinċipju ta’ ugwaljanza fit-trattament, peress li ġiet ippreġudikata l-pożizzjoni komparattiva tar-rikorrent mingħajr ebda raġuni għal dan.

7.	Is-seba’ motiv, ibbażat fuq l-użu ħażin ta’ poter, peress li jeżistu indizji oġġettivi, preċiżi u konkordanti li jippermettu li jiġi sostnut li, billi ġew imposti u estiżi l-miżuri ta’ sanzjoni, kienu intiżi għanijiet distinti minn dawk allegati mill-Kunsill.