—

Id-deċiżjoni li tiċħad it-talba tikkawża preġudizzju lir-rikorrenti fis-sens tal-ġurisprudenza li toħroġ mis-sentenza tal-1 ta’ Frar 1979, Deshormes vs Il-Kummissjoni (1), sa fejn fiha dikjarazzjoni li r-rikorrenti hija suġġetta għall-mobbiltà minkejja li din id-dikjarazzjoni jkollha effett biss permezz ta’ deċiżjoni ta’ implimentazzjoni li, fid-dawl tad-data li fiha ngħatat id-deċiżjoni li tiċħad it-talba, hija deċiżjoni li ser tingħata fil-futur, u għalhekk dan l-effett huwa wkoll fil-futur.

—

Ir-rikorrenti għad għandha interess f’dikjarazzjoni li t-trasferiment tagħha ma jistax jiġi ordnat fuq il-bażi tal-iskema ta’ mobbiltà.

—

Ser ikun hemm ksur tad-dritt għall-ħajja privata u tal-familja u tad-dritt ta’ bint ir-rikorrenti, li hija minuri, li żżomm relazzjoni personali u kuntatt dirett fuq bażi regolari maż-żewġ ġenituri tagħha, sa fejn il-familja tar-rikorrenti ser ikollha tgħix b’mod separat, fejn il-bint ser tibqa’ Berlin ma’ missierha u r-rikorrenti ser ikollha tmur tgħix il-Lussemburgu waħedha.

—

Ser ikun hemm ksur tad-dritt għall-ugwaljanza quddiem il-liġi u tal-prinċipju ta’ nondiskriminazzjoni. Ir-rikorrenti, bħala uffiċjal tal-EPLO (l-Uffiċċju ta’ Kollegament tal-Parlament Ewropew) miżżewġa u bħala omm bint minuri, li tagħha għandha l-kustodja konġunta ma’ żewġha, hija suġġetta għall-mobbiltà, li minħabba fiha ser tiġi ttrasferita lejn il-Lussemburgu. Uffiċjali tal-EPLO sseparati u ddivorzjati li jkollhom kustodja konġunta ta’ wild minuri jibqgħu eżentati mill-mobbiltà sakemm il-wild isir maġġorenni, u dan mingħajr ma hemm raġuni oġġettiva għal din l-inugwaljanza fit-trattament.

—

L-interessi tar-rikorrenti ma ġewx ibbilanċjati ma’ dawk tal-konvenut, u dan minkejja li dan tal-aħħar kien obbligat jagħmel dan l-ibbilanċjar fil-kuntest tad-dmir ta’ amministrazzjoni tajba tiegħu (Artikolu 41 tal-Karta tad-Drittijiet Fundamentali tal-Unjoni Ewropea).

—

L-interessi protetti tar-rikorrenti għandhom, b’mod ċar, jieħdu prijorità fuq l-interess tal-konvenut fit-trasferiment.

—

It-trasferiment mill-EPLO f’Berlin lejn l-EPLO fil-Lussemburgu ma huwiex fl-interessi tas-servizz.

—

Il-konvenut ma jirrikonoxxix id-diskrezzjoni tiegħu u għalhekk ma eżerċitahiex.

—

Mill-ħatra tar-rikorrenti fl-2001 sal-adozzjoni, fl-2018, tad-deċiżjoni dwar il-mobbiltà mill-Bureau tal-Parlament Ewropew, kien japplika l-prinċipju li uffiċjali fil-grad AST, bħalma hija r-rikorrenti, ma kinux suġġetti għall-mobbiltà. Dan il-prinċipju kien daħal fis-seħħ fl-1998 permezz ta’ deċiżjoni dwar il-mobbiltà u kien ġie kkonfermat fid-deċiżjonijiet dwar il-mobbiltà tal-2002 u tal-2004 meħuda mill-Bureau tal-Parlament Ewropew.

—

L-aspettattivi leġittimi tar-rikorrenti li ser tibqa’ eżentata mill-mobbiltà huma protetti. Għaldaqstant, bidla fir-regola teħtieġ arranġamenti tranżitorji adegwati u eċċezzjonijiet adegwati. Il-perijodu tranżitorju ta’ tliet snin previst ma huwiex adegwat peress li ma jirrimedjax il-fatt li l-familja tar-rikorrenti ser tinfired. Ma hijiex prevista eċċezzjoni fir-rigward tar-rikorrenti.

—

Il-konvenut irrinunzja għall-possibbiltà li jordna l-mobbiltà tar-rikorrenti li twassal għal bidla fil-post ta’ impjieg peress li, billi eżenta b’mod repetut lill-uffiċjali fil-grad AST mill-mobbiltà, huwa ħoloq l-impressjoni li r-rikorrenti ma kellhiex tistenna bidla fil-post ta’ impjieg tagħha.