—

Il-konvenut naqas milli jisma’ lir-rikorrenti qabel l-adozzjoni tad-deċiżjoni kkontestata u b’hekk kiser l-Artikolu 41(1) u (2)(a) tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”).

—

Id-deċiżjoni kkontestata ġiet adottata bi ksur tar-rekwiżiti proċedurali ġenerali li joħorġu mill-Artikolu 41 tal-Karta, mill-Artikolu 298 TFUE, mill-prinċipji ġenerali tad-dritt u mir-regoli proċedurali tal-konvenut.

—

Id-deċiżjoni kkontestata ma hijiex motivata b’mod suffiċjenti; b’mod partikolari, la hemm motivazzjoni li tindirizza l-każ partikolari inkwistjoni u lanqas ma hemm espożizzjoni tal-kunsiderazzjonijiet ewlenin fil-kuntest tal-proporzjonalità u tas-setgħa diskrezzjonali.

—

Barra minn hekk, ma huwiex possibbli li jinftiehem kif sar il-kalkolu tal-kontribuzzjoni annwali.

—

Minħabba l-motivazzjoni insuffiċjenti tad-deċiżjoni kkontestata, huwa ferm iktar diffiċli għar-rikorrenti li tikseb stħarriġ ġudizzjarju tagħha.

—

B’dan il-mod, il-konvenut jikser b’mod partikolari l-prinċipju ta’ proċedura kontradittorja li jipprovdi li l-parteċipanti fil-proċedura għandhom ikunu jistgħu jiddiskutu b’mod kontradittorju kemm il-fatti kif ukoll l-aspetti legali li jkunu deċiżivi għall-eżitu tal-proċedura.

—

Fil-kuntest tal-adozzjoni tar-Regolament ta’ Delega 2015/63 bħala att iddelegat fis-sens tal-Artikolu 290 TFUE, il-Kummissjoni ma għandha ebda marġni diskrezzjonali, u dan jimplika stħarriġ ġudizzjarju limitat. Dan jgħodd ukoll għall-applikazzjoni tar-Regolament ta’ Delega 2015/63 min-naħa tal-konvenut.

—

Fil-kuntest tal-applikazzjoni tal-indikatur IPS, is-sinjifikat tal-fatt li r-rikorrenti kienet imsieħba f’sistema ta’ protezzjoni istituzzjonali għal gruppi finanzjarji ta’ tfaddil kien magħruf.

—

Skont it-tieni sentenza tal-Artikolu 6(5) tar-Regolament ta’ Delega 2015/63 il-konvenut kien imissu ħa inkunsiderazzjoni l-probabbiltà baxxa ta’ riżoluzzjoni tal-istituzzjoni inkwistjoni u, għalhekk, tal-użu tal-fondi ta’ riżoluzzjoni, u kien imissu osserva l-prinċipju ta’ proporzjonalità.

—

Inkonformità mar-rekwiżit ta’ orjentament fuq il-bażi tal-profil ta’ riskju li jieħu inkunsiderazzjoni l-pożizzjoni ta’ riskju ta’ derivattivi b’mod ġenerali, fil-kuntest tal-punt (a) tal-ewwel sentenza tal-Artikolu 6(5) u tal-punt (a) tal-ewwel sentenza tal-Artikolu 7(4) tar-Regolament ta’ Delega 2015/63, il-konvenut kien imissu ħa inkunsiderazzjoni, fil-każ tar-rikorrenti, id-derivattivi kollha attribwiti lill-portafoll li ma huwiex innegozjat u li huma intiżi esklużivament għal finijiet ta’ hedging.

—

Fil-kuntest tad-determinazzjoni tal-multiplikatur ta’ aġġustament fuq il-bażi tal-profil ta’ riskju, il-konvenut kien imissu ħa inkunsiderazzjoni l-fatt li l-mudell tan-negozju tar-rikorrenti huwa intiż li jevita r-riskji sa fejn hija bank li tinnegozja f’obbligi (“Pfandbrief”) kif ukoll il-probabbiltà baxxa ta’ falliment tagħha, inkonformità mar-rekwiżit ta’ orjentament fuq il-bażi tal-profil ta’ riskju u mal-libertà fundamentali ta’ intrapriża previst fl-Artikolu 16 tal-Karta.

—

Sa fejn tipprevedi relativizzazzjoni tal-indikatur tal-IPS, it-tieni sentenza tal-Artikolu 7(4) tar-Regolament ta’ Delega 2015/63 tikkostitwixxi ksur tal-prinċipju ġenerali ta’ ugwaljanza fis-sens tal-Artikolu 20 tal-Karta u tal-prinċipju ta’ proporzjonalità sa fejn istituzzjonijiet li jagħmlu parti mill-istess protezzjoni istituzzjonali u li għalhekk huma suġġetti għall-istess probabbiltà ta’ falliment, jistgħu jiġu ttrattati b’mod differenti.

—

Id-definizzjoni ta’ “depożiti interbankarji” prevista fil-Pass 1 tal-Anness I tar-Regolament ta’ Delega 2015/63 hija illegali sa fejn tinkludi wkoll titoli li ma jimplikaw ebda riskju bħalma huma obbligi rreġistrati fuq isem partikolari, b’tali mod li tkabbar ir-riskju fil-kuntest tal-kalkolu tal-indikatur tar-riskju “krediti u depożiti interbankarji”.

—

Il-klassifikazzjoni tal-klassijiet prevista fil-Pass 2 tal-Anness I tar-Regolament 2015/63 hija illegali sa fejn in-numru żgħir ta’ klassijiet u n-numru identiku ta’ istituzzjonijiet f’kull klassi ma jippermettux li l-profil tar-riskju tal-istituzzjoni individwali, bħalma hija r-rikorrenti, jittieħed inkunsiderazzjoni b’mod suffiċjentement iddifferenzjat.