1.

It-talba għal deċiżjoni preliminari tirrigwarda l-interpretazzjoni tal-Artikolu 63(1) u tal-Artikolu 65 TFUE.

2.

Din it-talba tressqet mill-Finanzgericht Düsseldorf (il-Qorti tal-Finanzi ta’ Düsseldorf, il-Ġermanja) fil-kuntest ta’ tilwima bejn XY u l-Finanzamt V (l-Uffiċċju tat-Taxxa V, il-Ġermanja) ( 2 ) dwar il-kalkolu tat-taxxa tas-suċċessjoni fuq proprjetajiet immobbli li jinsabu fil-Ġermanja.

3.

Id-domandi magħmula lill-Qorti tal-Ġustizzja jkomplu fuq deċiżjonijiet preċedenti tal-Qorti tal-Ġustizzja fil-qasam tat-taxxa fuq is-suċċessjoni, dwar il-moviment liberu tal-kapital iggarantit mit-Trattat. Dawn jagħtu l-okkażjoni lill-Qorti tal-Ġustizzja teżamina, fid-dawl tal-prinċipji li hija diġà żviluppat, leġiżlazzjoni nazzjonali li ġiet parzjalment emendata sabiex tieħu dawn inkunsiderazzjoni. Il-qorti tar-rinviju tixtieq tkun taf jekk u, jekk ikun il-każ, sa fejn jista’ jiġi aċċettat, abbażi tal-portata tal-kompetenza fiskali tal-Istat Membru kkonċernat, trattament differenti tal-għoti ta’ vantaġġi fiskali, li ġejjin mill-allowances personali jew mit-tnaqqis ta’ ċerti elementi marbuta mas-suċċessjoni bħala passiv tas-suċċessjoni, li permezz tiegħu l-issuġġettar għat-taxxa huwa bbażat fuq il-patrimonju kollu tad-deċedut jew huwa limitat għall-patrimonju intern f’dan l-Istat Membru.

4.

Għalhekk, din il-kawża ġdida tenfasizza l-fatt li, minkejja l-iżvilupp tal-ġurisprudenza tal-Qorti tal-Ġustizzja, għadha teżisti l-importanza tal-interessi u tat-tensjonijiet mal-prinċipji li jirriżultaw mit-Trattat, fl-assenza ta’ koordinazzjoni tar-regoli tat-taxxa nazzjonali, u dan, b’mod iktar partikolari, fil-każ fejn Stat Membru jagħżel li jintaxxa l-patrimonju dinji ta’ persuna residenti fiskali fit-territorju tiegħu, filwaqt li l-qsim tar-residenzi u tal-beni li jifformaw is-suċċessjonijiet huwa promoss mill-moviment liberu taċ-ċittadini tal-Unjoni.

5.

Ser nesponi r-raġunijiet li jwassluni biex nikkunsidra li:

6.

L-Erbschaftsteuer‑ und Schenkungsteuergesetz (il-Liġi dwar it-Taxxa tas-Suċċessjoni u tad-Donazzjoni), fil-verżjoni tagħha ppubblikata fis‑27 ta’ Frar 1997 ( 3 ), kif emendata l-iktar reċentement mill-Artikolu 4 tal-Gesetz zur Bekämpfung der Steuerumgehung und zur Änderung weiterer steuerlicher Vorschriften (il-Liġi dwar il-Ġlieda kontra l-Frodi Fiskali u li Temenda Dispożizzjonijiet Fiskali Oħra), tat‑23 ta’ Ġunju 2017 ( 4 ), tipprevedi, fl-Artikolu 1 tagħha, intitolat “Tranżazzjonijiet taxxabbli”:

“(1)   It-tranżazzjonijiet segwenti huma suġġetti għal taxxa ta’ trasferiment fuq is-suċċessjoni (jew donazzjoni):

[…]”.

7.

L-Artikolu 2 tal-ErbStG, intitolat “Obbligu fiskali personali”, jipprovdi:

“(1)   L-obbligu fiskali japplika

[…]

[…]”.

8.

L-Artikolu 3 tal-ErbStG, intitolat “Trasferiment causa mortis”, jistabbilixxi, fil-paragrafu 1 tiegħu:

“It-trasferiment causa mortis ikopri

[…]”.

9.

L-Artikolu 10 tal-ErbStG, intitolat “Trasferiment taxxabbli”, jipprovdi:

“(1)   It-trasferiment taxxabbli jikkorrispondi, ħlief għall-eżenzjoni applikabbli, għall-arrikkiment tal-benefiċjarju […]. Fil-każijiet tal-Artikolu 3, l-arrikkiment jikkorrispondi għall-ammont miksub meta jitnaqqas mill-valur […] tat-trasferiment patrimonjali kollu, sa fejn dan huwa taxxabbli skont din il-liġi, il-passiv tas-suċċessjoni li jista’ jitnaqqas skont il-paragrafi 3 sa 9 […]

[…]

(5)   Ħlief għad-dispożizzjoni kuntrarja tal-paragrafi 6 sa 9, jistgħu jitnaqqsu mit-trasferiment bħala passiv tas-suċċessjoni:

[…]

(6)   Ma jistgħux jitnaqqsu d-djun u l-oneri, sa fejn dawn huma ekonomikament marbuta ma’ elementi tal-patrimonju li ma humiex suġġetti għat-tassazzjoni skont din il-liġi. Jekk it-tassazzjoni hija limitata għal ċerti elementi tal-patrimonju (Artikolu 2(1)(3) […]), jistgħu jitnaqqsu biss id-djun u l-oneri li huma ekonomikament marbuta magħhom […]”.

10.

L-Artikolu 15 tal-ErbStG, intitolat “Klassijiet ta’ tassazzjoni”, jipprevedi, fil-paragrafu 1 tiegħu:

“Skont ir-relazzjoni personali li kienet teżisti bejn il-benefiċjarju u d-deċedut jew id-donatur, hemm lok li ssir distinzjoni bejn it-tliet klassijiet ta’ tassazzjoni segwenti:

Klassi ta’ tassazzjoni I:

[…]”.

11.

L-Artikolu 16 tal-ErbStG, intitolat “Allowances”, jipprovdi:

“(1)   Huwa eżentat, fil-każ ta’ ssuġġettar sħiħ għat-taxxa (Artikolu 2(1)(1) u Artikolu 2(3)), it-trasferiment ta’ beni:

[…]

(2)   Fil-każ ta’ ssuġġettar parzjali għat-taxxa (Artikolu 2(1)(3)), l-allowance prevista fil-paragrafu 1 iktar ’il fuq titnaqqas b’ammont parzjali. Dan l-ammont parzjali jikkorrispondi għall-parti li tirrappreżenta s-somma tal-valuri tal-patrimonju, mhux suġġetti għall-issuġġettar parzjali għat-taxxa, miksuba fl-istess mument, u vantaġġi patrimonjali, mhux suġġetti għall-issuġġettar parzjali għat-taxxa, li kienu ġew ittrasferiti matul perijodu ta’ għaxar snin mill-istess persuna, meta mqabbla mal-valur tal-patrimonju li b’kollox kien ġie ttrasferit mill-istess persuna matul perijodu ta’ għaxar snin. Il-valur tal-beni huwa dak li kellhom fid-data tat-trasferiment rispettiv tagħhom.”

12.

L-Artikolu 121 tal-Liġi dwar l-Evalwazzjoni, fil-verżjoni tiegħu applikabbli għat-tilwima fil-kawża prinċipali, intitolat “Patrimonju intern”, jipprovdi:

“Il-patrimonju intern jinkludi:

[…]”.

13.

L-Artikolu 2303 tal-BGB, intitolat “Eredi rriżervati; ammont tal-porzjon irriżervata”, jipprevedi, fil-paragrafu 1 tiegħu:

“Jekk dixxendent tad-deċedut ġie eskluż mis-suċċessjoni b’dispożizzjoni causa mortis, huwa jista’ jitlob lill-eredi l-porzjon irriżervata tiegħu. Il-porzjon irriżervata tikkorrispondi għal nofs il-valur tal-parti legali.”

14.

L-Artikolu 2311 tal-BGB, intitolat “Valur tas-suċċessjoni”, jistabbilixxi:

“(1) Il-kalkolu tal-porzjon irriżervata jitwettaq fuq il-bażi tal-beni li jikkostitwixxu s-suċċessjoni fid-data tal-mewt, u tal-valur tagħhom f’din id-data […]

(2) Il-valur għandu, jekk neċessarju, jiġi stabbilit permezz ta’ stima. Evalwazzjoni tal-valur magħmula mid-deċedut ma għandhiex awtorità.”

15.

L-Artikolu 756 tal-Allgemeines bürgerliches Gesetzbuch (il-Kodiċi Ċivili, iktar ’il quddiem l-“ABGB”), fil-verżjoni tiegħu applikabbli għat-tilwima fil-kawża prinċipali, jipprovdi:

“Il-porzjon irriżervata hija l-parti mill-valur tal-patrimonju tad-deċedut li tingħadda lill-eredi intitolati għal porzjon irriżervata.”

16.

L-Artikolu 759 tal-ABGB jistabbilixxi:

“Il-porzjon irriżervata li għaliha għandu dritt kull eredi intitolat għal porzjon irriżervata tikkorrispondi għal nofs dak li kien jingħadda lilu fil-kuntest ta’ suċċessjoni ab intestato.”

17.

Skont l-Artikolu 761(1) tal-ABGB:

“Il-porzjon irriżervata titħallas fi flus […]”.

18.

Il-Gvern Ġermaniż speċifika fl-osservazzjonijiet bil-miktub tiegħu li ma jeżistix ftehim bilaterali bejn ir-Repubblika Federali tal-Ġermanja u r-Repubblika tal-Awstrija fil-qasam tal-prevenzjoni tat-tassazzjoni doppja tat-taxxa tas-suċċessjoni ( 6 ).

19.

Ir-rikorrenti fil-kawża prinċipali, ċittadina Awstrijaka li tirrisjedi fl-Awstrija, hija t-tifla ta’ ċittadin bl-istess nazzjonalità, li miet fit‑12 ta’ Awwissu 2018 f’dan l-Istat Membru li kien jirrisjedi fih.

20.

Id-deċedut kien proprjetarju ta’ tliet proprjetajiet immobbli mibnija u proprjetà immobbli mhux mibnija fil-Ġermanja. Huwa kien għamel testment li fih ir-rikorrenti kienet indikata bħala l-unika legatarja tiegħu, fejn il-mara u t-tifel tad-deċedut kellhom biss dritt għall-porzjonijiet irriżervati.

21.

Bħala l-unika legatarja, ir-rikorrenti ħadet l-impenn, permezz ta’ ftehim, li tħallas lil dawn l-eredi s-somom ta’ EUR 1700000 u EUR 2850000, bħala korrettiv tad-drittijiet irriżervati tagħhom. Hija talbet, fid-dikjarazzjoni li ppreżentat lill-Finanzamt fir-rigward tat-taxxa tas-suċċessjoni, li mill-valur tas-suċċessjoni jitnaqqas dak tal-obbligi marbuta ma’ dawn il-porzjonijiet irriżervati, bħala passiv tas-suċċessjoni, sa 43 % tal-ammont tagħhom, jiġifieri EUR 1956500. Hija waslet għal dan il-kalkolu billi vvalutat il-parti tal-patrimonju immobbli suġġett għat-taxxa fuq is-suċċessjonijiet fil-Ġermanja għal EUR 4970000, li tikkorrispondi għal 43 % tal-valur tal-assi totali tas-suċċessjoni ta’ ammont ta’ EUR 11 592 598.10 li jinkludi l-patrimonju mhux suġġett għat-taxxa fuq is-suċċessjonijiet fil-Ġermanja, magħmul minn kapital mobbli u proprjetà immobbli fi Spanja, li hija vvalutat għal EUR 6 622 598.10.

22.

Il-Finanzamt stabbilixxa għal EUR 642333 it-taxxa tas-suċċessjoni dovuta mir-rikorrenti fir-rigward tal-proprjetajiet immobbli li jinsabu fil-Ġermanja. Huwa rrifjuta li jnaqqas il-porzjonijiet irriżervati bħala passiv tas-suċċessjoni minħabba li mit-tieni sentenza tal-Artikolu 10(6) tal-ErbStG jirriżulta li dawn il-porzjonijiet ma għandhomx rabta ekonomika mad-diversi elementi tal-patrimonju inklużi fl-assi tas-suċċessjoni. Barra minn hekk, fil-kalkolu ta’ din it-taxxa tas-suċċessjoni, huwa ħa inkunsiderazzjoni, minflok l-allowance ta’ EUR 400000 prevista, fil-prinċipju, għat-tfal tad-deċedut, skont l-Artikolu 16(1)(2) tal-l’ErbStG, allowance ta’ ammont ta’ EUR 171489, wara t-tnaqqis ta’ ammont parzjali ta’ EUR 228511, b’applikazzjoni tal-Artikolu 16(2) tal-ErbStG.

23.

Permezz tar-rikors tagħha quddiem il-qorti tar-rinviju, ir-rikorrenti titlob it-tnaqqis għal EUR 227181 tat-taxxa tas-suċċessjoni li hija għandha tħallas. Hija ssostni li hija għandha dritt għall-allowance kollha ta’ EUR 400000 prevista fl-Artikolu 16(1)(2) tal-ErbStG, minħabba li l-paragrafu 2 ta’ din id-dispożizzjoni jmur kontra d-dritt tal-Unjoni. Hija tqis, barra minn hekk, li l-istess jgħodd għar-rifjut li jiġi aċċettat it-tnaqqis, bħala passiv tas-suċċessjoni, ta’ mill-inqas parti mis-somom li hija għandha tħallas bħala porzjonijiet irriżervati li hija kkalkolat l-ammont tagħhom.

24.

Il-qorti tar-rinviju tirrileva li, peress li, fil-mument tal-mewt tad-deċedut, dan tal-aħħar u r-rikorrenti ma kellhomx id-domiċilju tagħhom jew ir-residenza abitwali tagħhom fil-Ġermanja, il-patrimonju immobbli intern biss huwa suġġett għat-taxxa.

25.

F’dan il-każ ta’ ssuġġettar parzjali għat-taxxa, il-qorti tar-rinviju għandha dubju dwar il-konformità tal-Artikolu 16(2) kif ukoll tat-tieni sentenza tal-Artikolu 10(6) tal-ErbStG mal-Artikolu 63(1) TFUE u mal-Artikolu 65 TFUE, kif interpretati mill-Qorti tal-Ġustizzja.

26.

Fl-ewwel lok, dik il-qorti tispeċifika li dan l-Artikolu 16(2) kien ġie introdott mil-leġiżlatur Ġermaniż bħala segwitu għas-sentenza tat‑8 ta’ Ġunju 2016, Hünnebeck ( 7 ). Hija tfakkar li, fis-sentenzi tas‑17 ta’ Ottubru 2013, Welte ( 8 ), u tal‑4 ta’ Settembru 2014, Il‑Kummissjoni vs Il‑Ġermanja ( 9 ), il-Qorti tal-Ġustizzja ddeċidiet, fir-rigward ta’ verżjonijiet preċedenti tal-imsemmi Artikolu 16(2), minn naħa, li t-trattament inqas favorevoli tal-benefiċjarju tas-suċċessjoni minħabba l-allowance ta’ ammont limitat għal EUR 2000 fil-każ ta’ ssuġġettar parzjali għat-taxxa ma jistax jiġi ġġustifikat min-neċessità tal-ħarsien tal-koerenza tas-sistema fiskali Ġermaniża. Min-naħa l-oħra, il-Qorti tal-Ġustizzja qieset li ma teżisti l-ebda raġuni li tiġġustifika li l-benefiċjarji tas-suċċessjoni jiġu ttrattati b’mod differenti skont l-issuġġettar sħiħ jew parzjali għat-taxxa marbut mar-residenza tagħhom.

27.

Fit-tieni lok, il-qorti tar-rinviju tistaqsi dwar id-differenza fit-trattament bejn ir-residenti fil-Ġermanja u dawk li ma jirrisjedux fiha li tirriżulta mit-tieni sentenza tal-Artikolu 10(6) tal-ErbStG. Hija tispeċifika li, bl-effett ta’ din id-dispożizzjoni, ir-rikorrenti ma tistax tnaqqas mit-trasferiment causa mortis, bħala passiv tas-suċċessjoni, il-valur tal-obbligi tagħha marbuta mal-porzjonijiet irriżervati tal-mara u tat-tifel tad-deċedut.

28.

Barra minn hekk, skont il-ġurisprudenza tal-Bundesfinanzhof (il-Qorti Federali tal-Finanzi, il-Ġermanja) ( 10 ), il-kundizzjoni tal-eżistenza ta’ rabta ekonomika prevista fl-Artikolu 10(6) tal-ErbStG għall-finijiet tal-possibbiltà ta’ tnaqqis tad-djun u tal-oneri ma hijiex issodisfatta fir-rigward tal-porzjon irriżervat. Din is-soluzzjoni tista’ tiġi trasposta fir-rigward tal-porzjonijiet irriżervati dovuti, f’dan il-każ, b’applikazzjoni tad-dritt Awstrijak. F’dan ir-rigward, il-qorti tar-rinviju tfakkar il-ġurisprudenza tal-Qorti tal-Ġustizzja dwar b’mod partikolari l-projbizzjoni, fir-rigward tas-suċċessjonijiet, li ssir distinzjoni bejn il-persuni residenti u l-persuni mhux residenti fid-dispożizzjonijiet dwar il-possibbiltà limitata ta’ tnaqqis tad-dejn ( 11 ).

29.

F’dawn iċ-ċirkustanzi, il-Finanzgericht Düsseldorf (il-Qorti tal-Finanzi ta’ Düsseldorf) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

30.

Ġew ippreżentati osservazzjonijiet bil-miktub mill-Gvern tal-Ġermanja u minn dak ta’ Spanja kif ukoll mill-Kummissjoni Ewropea. Huma ppreżentaw ukoll osservazzjonijiet orali, kif għamlet ir-rikorrenti, matul is-seduta li nżammet fid‑9 ta’ Ġunju 2021.

31.

Il-Qorti tal-Ġustizzja ġiet mistoqsija dwar il-kompatibbiltà fid-dawl tal-Artikolu 63(1) u tal-Artikolu 65 TFUE ta’ ċerti dispożizzjonijiet tal-liġi fiskali tas-suċċessjoni Ġermaniża dwar l-effetti tal-assenza ta’ residenza fil-Ġermanja tad-deċedut u tal-eredi tiegħu ( 12 ) fir-rigward tal-ammont tal-allowance personali li dan jista’ jinvoka u tal-possibbiltà ta’ tnaqqis tal-passiv tas-suċċessjoni dovut bħala porzjonijiet irriżervati.

32.

Mill-elementi ta’ informazzjoni kkomunikati lill-Qorti tal-Ġustizzja jirriżulta li, fid-dritt fiskali Ġermaniż, fil-każ ta’ trasferiment causa mortis ( 13 ), l-obbligu fiskali japplika fuq il-beni ttrasferiti kollha, irrispettivament mill-Istat fejn dawn jinsabu, meta mill-inqas id-deċedut jew l-eredi jkollu domiċilju jew residenza fil-Ġermanja ( 14 ). Dan huwa l-każ tal-issuġġettar sħiħ għat-taxxa ( 15 ).

33.

Meta la d-deċedut u lanqas l-eredi ma jkollhom domiċilju jew residenza fil-Ġermanja ( 16 ), l-obbligu fiskali japplika fuq il-beni li jaqgħu taħt il-patrimonju intern, jiġifieri b’mod partikolari l-patrimonju immobbli. Dan huwa l-każ tal-issuġġettar parzjali għat-taxxa ( 17 ).

34.

L-arrikkiment taxxabbli (jew il-bażi taxxabbli) jinkludi t-trasferiment kollu tas-suċċessjoni ( 18 ) li minnu jitnaqqas il-passiv tas-suċċessjoni li jista’ jitnaqqas ( 19 ), wara l-allowances ( 20 ). Is-sistema ta’ dawn l-eżenzjonijiet jew it-tnaqqis hija differenti skont jekk il-kundizzjoni ta’ residenza fil-Ġermanja hijiex issodisfatta mill-inqas mid-deċedut jew mill-eredi jew le.

35.

Dan ma huwiex il-każ tal-oneru fiskali. Dan jiġi ddeterminat skont ir-rabtiet familjali bejn id-deċedut u l-eredi li jiddeterminaw il-klassi ta’ tassazzjoni ( 21 ) li minnha tiddependi r-rata ta’ tassazzjoni applikata skont l-ammont tal-bażi taxxabbli ( 22 ).

36.

Peress li l-qorti tar-rinviju tistaqsi dwar id-differenzi fit-trattament bejn il-persuni residenti u dawk mhux residenti fil-qasam tat-taxxa ta’ trasferiment sa fejn dawn jistgħu jikkostitwixxu restrizzjonijiet għall-moviment tal-kapital, hemm lok li jitfakkar li, skont ġurisprudenza stabbilita tal-Qorti tal-Ġustizzja, is-suċċessjonijiet, li jikkonsisti fit-trasferiment lil persuna waħda jew iktar tal-patrimonju li jitħalla minn persuna deċeduta, jikkostitwixxu moviment tal-kapital fis-sens tal-Artikolu 63 TFUE, bl-eċċezzjoni tal-każijiet fejn l-elementi kostituttivi tagħhom ikunu limitati għal Stat Membru wieħed biss ( 23 ).

37.

F’dan il-każ, huwa stabbilit li s-sitwazzjoni inkwistjoni fil-kawża prinċipali taqa’ taħt l-Artikolu 63(1) TFUE.

38.

Permezz tal-ewwel domanda tagħha, il-qorti tar-rinviju tistaqsi, essenzjalment, jekk l-Artikolu 63(1) u l-Artikolu 65 TFUE għandhomx jiġu interpretati fis-sens li jipprekludu leġiżlazzjoni ta’ Stat Membru fil-qasam tat-taxxa tas-suċċessjoni li tipprevedi, fil-każ ta’ ssuġġettar parzjali għat-taxxa, allowance personali kkalkolata b’mod proporzjonali għall-parti tal-patrimonju suġġetta għat-taxxa tas-suċċessjoni ta’ dan l-Istat Membru meta mqabbla mal-beni ttrasferiti kollha, filwaqt li din l-allowance ma hijiex limitata fil-każ ta’ ssuġġettar sħiħ għat-taxxa ta’ dan il-patrimonju, applikabbli kieku mill-inqas id-deċedut jew l-eredi kienu residenti fl-Istat Membru kkonċernat fil-mument tal-mewt.

39.

Kif tfakkar ġustament il-qorti tar-rinviju, il-Qorti tal-Ġustizzja diġà ddeċidiet dwar il-kompatibbiltà fir-rigward tal-libertà ta’ moviment tal-kapital tal-leġiżlazzjoni fiskali Ġermaniża li kienet tipprevedi għall-persuni mhux residenti, li jkunu taxxabbli parzjalment, allowance ta’ ammont inqas minn dak li seta’ jibbenefika minnu eredi fil-każ ta’ ssuġġettar totali għat-taxxa ( 24 ).

40.

Il-karattru mingħajr preċedent tat-talba għal deċiżjoni preliminari jirriżulta mill-fatt li din għandha bħala għan il-leġiżlazzjoni, applikabbli għas-suċċessjonijiet li għalihom il-fatt taxxabbli jseħħ wara l-24 ta’ Ġunju 2017 ( 25 ), li tgħid li, fil-każ ta’ ssuġġettar parzjali għat-taxxa, l-ammont tal-allowance huwa proporzjonali għall-parti tal-patrimonju immobbli li jinsab fil-Ġermanja li jinkludi l-patrimonju tas-suċċessjoni ( 26 ).

41.

Infakkar li, f’dan il-każ, it-tilwima tirrigwarda l-għoti ta’ allowance ta’ ammont ekwivalenti għal madwar 43 % tal-ammont previst mill-Artikolu 16 tal-ErbStG, jiġifieri EUR 171489, minflok EUR 400000, li jikkorrispondi għall-parti li tirrappreżenta l-patrimonju immobbli li jinsab fil-Ġermanja ttrasferit lill-eredi, residenti fl-Awstrija, wara l-mewt ta’ missierha li kien jirrisjedi huwa wkoll f’dan l-Istat Membru ( 27 ).

42.

Għaldaqstant għandu jiġi eżaminat jekk, kif issostni l-Kummissjoni, għall-kuntrarju tal-Gvern Ġermaniż, il-leġiżlazzjoni nazzjonali inkwistjoni, li tipprevedi allowance mhux iktar fissa bħal fil-kawżi preċedenti, iżda kkalkolata skont il-bażi taxxabbli, tikkostitwixxix restrizzjoni għall-moviment liberu tal-kapital, ipprojbita mill-Artikolu 63(1) TFUE ( 28 ).

43.

Fis-sentenza Welte, il-Qorti tal-Ġustizzja kkunsidrat li l-leġiżlazzjoni nazzjonali inkwistjoni kienet tikkostitwixxi restrizzjoni għall-moviment liberu tal-kapital ( 29 ) minħabba l-fatt li, meta l-applikazzjoni ta’ allowance tkun tiddependi mill-bażi taxxabbli tal-proprjetà immobbli kkonċernata fil-post ta’ residenza tad-deċedut u tal-benefiċjarju fil-mument tal-mewt, din il-leġiżlazzjoni kienet twassal biex is-suċċessjonijiet bejn il-persuni mhux residenti li jinkludu tali proprjetà jkunu suġġetti għal piż fiskali iktar oneruż minn dawk li jinvolvu mill-inqas persuna residenti waħda u, għaldaqstant, kellha l-konsegwenza li tnaqqas il-valur tas-suċċessjoni inkwistjoni ( 30 ).

44.

B’mod konkret, fil-każ ta’ Yvon Welte, eredi tal-mara deċeduta tiegħu, huwa kien jibbenefika biss, fil-kwalità tiegħu bħala persuna taxxabbli parzjali, minn allowance ta’ ammont fiss ta’ EUR 2000 fuq is-suċċessjoni. Issa, kieku d-deċeduta jew huwa stess kienu jirrisjedu fil-Ġermanja fil-mument tal-mewt, Y. Welte kien jibbenefika mill-allowance ta’ ammont ta’ EUR 500000. Għalhekk ma kien iħallas l-ebda taxxa tas-suċċessjoni ( 31 ).

45.

Il-Qorti tal-Ġustizzja qieset li din il-leġiżlazzjoni nazzjonali kienet tipprevedi li l-allowance fuq il-bażi taxxabbli kienet inqas minn dik li kieku kienet tapplika kieku d-deċeduta jew l-eredi kienu residenti fit-territorju Ġermaniż fil-mument tal-mewt ( 32 ).

46.

Il-Qorti tal-Ġustizzja ddeċidiet billi rreferiet għal tliet sentenzi, li hija tat bejn is-snin 2008 u 2011, dwar każijiet li fihom il-persuni mhux residenti kienu suġġetti għal oneru fiskali ikbar minn dak tal-persuni residenti, b’tali mod li l-valur ta’ suċċessjoni li kienet tinkludi l-beni li kien jikkostitwixxi l-bażi taxxabbli kien tnaqqas meta mqabbel ma’ dak tal-persuni residenti ( 33 ).

47.

Fl-ewwel waħda mit-tliet sentenzi ċċitati, jiġifieri s-sentenza Eckelkamp et, it-talba għal deċiżjoni preliminari kellha bħala suġġett dispożizzjonijiet nazzjonali li kienu jipprevedu li suċċessjoni li tinkludi proprjetà immobbli li tinsab fil-Belġju kienet suġġetta għal taxxa fuq it-trasferiment ogħla mit-taxxa tas-suċċessjoni li kienet tkun dovuta li kieku l-persuna li nfetħet is-suċċessjoni tagħha kienet, fil-mument tal-mewt tagħha, residenti f’dan l-Istat Membru ( 34 ). Fil-każ inkwistjoni, it-taxxa fuq it-trasferiment causa mortis kienet dovuta fuq il-beni kollha tad-deċeduta li kienu jinsabu fil-Belġju mingħajr ma jkun jista’ jitnaqqas id-dejn tagħha fil-konfront ta’ wieħed mill-eredi marbut mal-beni inkwistjoni minħabba li hija ma kinitx residenti fil-Belġju fil-mument tal-mewt tagħha ( 35 ).

48.

Fit-tieni sentenza msemmija fis-sentenza Welte, jiġifieri s-sentenza Mattner, it-tilwima kellha bħala suġġett il-leġiżlazzjoni Ġermaniża preċedenti għal dik inkwistjoni fil-kawża prinċipali. Din kienet tipprevedi li l-allowance fuq il-bażi taxxabbli kienet inqas għolja – meta d-donatur u l-persuna li tirċievi d-donazzjoni kienu residenti fi Stat Membru ieħor – minn dik li kienet tapplika kieku wieħed minnhom kellu r-residenza tiegħu fit-territorju Ġermaniż ( 36 ).

49.

It-tielet sentenza li tirreferi għaliha l-Qorti tal-Ġustizzja fis-sentenza Welte hija s-sentenza tal‑10 ta’ Frar 2011, Missionswerk Werner Heukelbach ( 37 ). Din id-deċiżjoni tirrigwarda leġiżlazzjoni nazzjonali li kienet tirriżerva l-possibbiltà ta’ benefiċċju mir-rata mnaqqsa tat-taxxa tas-suċċessjoni lill-entitajiet mingħajr skop ta’ lukru li kellhom l-uffiċċju rreġistrat tagħhom fil-Belġju jew fl-Istat Membru li fih id-deċedut effettivament kien residenti jew kellu l-post tax-xogħol tiegħu, fil-mument tal-mewt tiegħu, jew li fih huwa effettivament kien preċedentement residenti jew kellu l-post tax-xogħol tiegħu ( 38 ).

50.

F’dawn id-deċiżjonijiet preċedenti, l-eżistenza jew it-tnaqqis tal-vantaġġ fiskali mislut mill-possibbiltà ta’ tnaqqis tad-dejn, ta’ allowance jew tar-rata mnaqqsa tat-taxxa kienu jiddependu direttament minn kundizzjoni ta’ residenza fl-Istat Membru li jistabbilixxi t-taxxa tas-suċċessjoni. Konsegwentement, fl-ipoteżi li l-valur tas-suċċessjoni kien identiku għall-persuni residenti u għal dawk mhux residenti, il-bażi taxxabbli kienet evidentement differenti, u dan kien inaqqas b’mod korrelattiv l-arrikkiment tal-persuni mhux residenti u kien ta’ natura li jiskoraġġixxi l-investimenti fl-Istat Membru kkonċernat, skont il-ġurisprudenza tal-Qorti tal-Ġustizzja ( 39 ).

51.

Barra minn hekk, nirrileva li s-sentenzi Hünnebeck u Feilen, mogħtija fl‑2016 wara s-sentenza Welte, huma bbażati fuq l-istess loġika. Fl-ewwel waħda minn dawn is-sentenzi, il-Qorti tal-Ġustizzja ddeċidiet li “l-fatt li jinżamm perijodu ta’ totalizzazzjoni itwal għad-donazzjonijiet bejn persuni mhux residenti, milli għad-donazzjonijiet li jkollhom tal-inqas parti waħda residenti jista’ jwassal, jekk ikun il-każ, għall-konsegwenza li t-tnaqqis [l-allowance] jinvolvi, għall-ewwel kategorija ta’ donazzjonijiet, bażi taxxabbli ikbar minn dik għat-tieni kategorija u li, għalhekk, din l-ewwel kategorija ta’ donazzjonijiet tkun suġġetta għal taxxa tad-donazzjonijiet ogħla minn dik imposta għat-tieni kategorija ta’ donazzjonijiet. Tali mekkaniżmu għandu l-effett li jirrestrinġi l-moviment tal-kapital, peress li dan jista’ jnaqqas il-valur tad-donazzjoni li tinkludi tali beni” ( 40 ).

52.

Fis-sentenza Feilen, il-Qorti tal-Ġustizzja rrilevat li l-“leġiżlazzjoni tirrendi l-benefiċċju tat-tnaqqis tat-taxxa tas-suċċessjoni dipendenti fuq il-post fejn il-beni inklużi fis-suċċessjoni kienu jinsabu fil-mument tas-suċċessjoni preċedenti u fuq il-post ta’ residenza tal-mejjet jew tal-benefiċjarju fil-mument ta’ din is-suċċessjoni preċedenti. Hija twassal għall-konsegwenza li suċċessjoni li tinkludi beni li kienu jinsabu fi Stat Membru ieħor fil-mument ta’ suċċessjoni preċedenti li matulha l-ebda waħda mill-partijiet ma kienet tirrisjedi fil-Ġermanja hija suġġetta għal taxxa tas-suċċessjoni iktar għolja minn dik miġbura fil-każ ta’ suċċessjoni li tinkludi biss beni li kienu jinsabu fil-Ġermanja fil-mument ta’ suċċessjoni preċedenti jew li tinkludi beni li kienu jinsabu fi Stat Membru ieħor fil-mument ta’ suċċessjoni preċedenti li matulha mill-inqas waħda mill-partijiet kienet tirrisjedi fil-Ġermanja” ( 41 ).

53.

Peress li l-leġiżlazzjoni inkwistjoni fis-sentenzi Mattner u Welte kienet ġiet emendata u li din tipprevedi, fil-każ ta’ ssuġġettar parzjali għat-taxxa, li l-ammont tal-allowance jiddependi mill-valur tal-patrimonju intern suġġett għat-taxxa tas-suċċessjoni, tista’ tiġi trasposta l-analiżi tal-Qorti tal-Ġustizzja f’dawk id-deċiżjonijiet?

54.

Ma naħsibx. L-ewwel, nosserva li, b’mod differenti mill-kawżi li wasslu b’mod partikolari għas-sentenzi Welte u Feilen ( 42 ), il-qorti tar-rinviju ma pprovdietx lill-Qorti tal-Ġustizzja b’elementi li jippermettu li jiġi kkunsidrat li l-valur tas-suċċessjoni inkwistjoni tnaqqas meta mqabbel ma’ dak ta’ suċċessjoni li tikkonċerna deċedut jew eredi li jirrisjedi fil-Ġermanja.

55.

It-tieni, fil-fehma tiegħi, għandu jittieħed inkunsiderazzjoni l-fatt li l-leġiżlazzjoni inkwistjoni ma għadhiex tipprevedi allowance fissa ta’ ammont ferm inqas għoli għall-persuni mhux residenti minn dak previst għall-persuni residenti, li minnha kienet tirriżulta b’mod ċar differenza fl-oneru fiskali fil-parti l-kbira tat-trasferimenti tas-suċċessjoni ( 43 ). Konsegwentement, biss mill-formulazzjoni tal-Artikolu 16 tal-ErbStG ma għadhiex tista’ tiġi dedotta l-eżistenza ta’ differenza fit-trattament bejn il-persuni residenti u dawk mhux residenti, ħlief sempliċement biex jiġi kkonstatat li l-ammont tal-allowance mogħti skont ir-rabta familjali huwa, fil-każ ta’ ssuġġettar totali għat-taxxa, invarjabbli u ma huwiex stabbilit b’kunsiderazzjoni ta’ patrimonju li jinsab esklużivament fil-Ġermanja jew li eredi mhux residenti ta’ deċedut mhux residenti qatt ma jista’ jitlob allowance ta’ ammont identiku għal dak mogħti meta mill-inqas l-eredi jew id-deċedut ikun residenti, irrispettivament mill-post fejn jinsabu l-elementi l-oħra tat-trasferiment tas-suċċessjoni.

56.

L-emenda tal-Artikolu 16 tal-ErbStG tiġġustifika, fil-fehma tiegħi, it-tfittxija ta’ x’inhi d-differenza finali fit-tassazzjoni li tista’ tirriżulta mil-leġiżlazzjoni inkwistjoni meħuda fl-elementi kollha tagħha, billi tadotta approċċ ekonomiku ( 44 ) b’mod konformi mal-għan li għandu jintlaħaq mil-leġiżlatur nazzjonali, jiġifieri l-eżenzjoni sħiħa jew parzjali mit-taxxa tas-suċċessjoni fir-rigward tal-patrimonju tas-suċċessjoni suġġett għall-ġurisdizzjoni fiskali Ġermaniża, skont il-valur ta’ dan il-patrimonju ( 45 ).

57.

Fi kliem ieħor, fid-dawl tal-kriterji adottati fis-sentenza Welte li jiena fakkart ( 46 ), għandu jiġi vverifikat, f’dan il-każ, b’mod konkret jekk, bil-metodu ta’ kalkolu tal-ammont tal-allowance personali fil-każ ta’ ssuġġettar parzjali għat-taxxa, l-oneru fiskali huwiex ekwivalenti għal dak sostnut f’sitwazzjonijiet simili ( 47 ).

58.

F’dan ir-rigward, il-perspettivi tal-partijiet huma differenti. Il-Kummissjoni, li fl-osservazzjonijiet bil-miktub ġenerali ħafna tagħha kienet qieset li, “[p]rima facie, l-għoti ta’ allowance kkalkolata b’mod proporzjonali lill-eredi mhux residenti jikkostitwixxi […] restrizzjoni għall-moviment liberu tal-kapital, bħala prinċipju pprojbit mill-Artikolu 63 TFUE”, qablet, matul is-seduta, mal-konklużjonijiet misluta minn eżempji li r-rikorrenti ppreżentat oralment.

59.

Ir-rikorrenti esponiet ix-xenarju li ġej: persuna taxxabbli b’mod sħiħ peress li d-domiċilju tagħha jinsab fil-Ġermanja tħalli proprjetà immobbli tal-kiri li tinsab fil-Ġermanja b’valur ta’ EUR 400000 u dar għall-użu personali, li tinsab fil-Ġermanja, b’valur ta’ EUR 500000, lit-tifla tagħha li tkompli tgħix fiha. It-trasferiment tas-suċċessjoni huwa ta’ EUR 900000. Skont id-dritt Ġermaniż dwar is-suċċessjonijiet, id-dar tal-familja hija eżentata sa EUR 500000. Fuq il-bażi taxxabbli, li jifdal, ta’ ammont ta’ EUR 400000 tapplika l-allowance ta’ EUR 400000 mogħtija lit-tifla. Għalhekk din it-tifla ma tiġix intaxxata. Ir-rikorrenti qabblet din is-sitwazzjoni ma’ dik ta’ persuna taxxabbli parzjalment li tirrisjedi fil-Pajjiżi l-Baxxi. Hija tħalli lit-tifla tagħha li tirrisjedi wkoll fil-Pajjiżi l-Baxxi proprjetà immobbli tal-kiri, b’valur ta’ EUR 400000, li tinsab fil-Ġermanja, u dar tal-familja li hija tuża, li tinsab fil-Pajjiżi l-Baxxi, b’valur ta’ EUR 500000. L-ammont tas-suċċessjoni jammonta għal total ta’ EUR 900000. Peress li l-patrimonju barrani ma huwiex taxxabbli, il-bażi taxxabbli hija ta’ EUR 400000, jiġifieri l-valur tal-proprjetà immobbli tal-kiri li tinsab fil-Ġermanja. F’dan il-każ ta’ ssuġġettar parzjali għat-taxxa, l-allowance personali ta’ ammont ta’ EUR 400000 huwa kkalkolat b’mod proporzjonali mal-valur tal-patrimonju. Wara jifdal allowance ta’ EUR 222223. It-taxxa tas-suċċessjoni tammonta għal 11 % ( 48 ), u dan iwassal għal taxxa li tammonta għal EUR 24444 fil-Ġermanja.

60.

Għandi dubju dwar ir-rilevanza tal-konklużjoni misluta minn dan il-paragun li huwa, fi kliem ir-rikorrenti, dan li ġej: għal patrimonju ta’ importanza identika u għall-istess grad ta’ parentela, jiġifieri fiċ-ċirkustanzi fejn ma hemmx differenza oġġettiva, dan iwassal sabiex fl-eżempji esposti, fil-Ġermanja, l-Istat jiġbor fil-każ ta’ ssuġġettar parzjali EUR 24444 ta’ taxxa tas-suċċessjoni iktar milli fil-każ ta’ ssuġġettar sħiħ.

61.

Fil-fatt, għandhom jiġu rrilevati d-differenzi fis-sitwazzjoni tat-tieni proprjetà immobbli li tagħmel parti mis-suċċessjoni u fit-taxxa minħabba l-eżenzjoni għall-eredi ntaxxat b’mod sħiħ ( 49 ).

62.

Min-naħa l-oħra, ikkonvinċietni d-dimostrazzjoni aritmetika tal-Gvern Ġermaniż, li ma ġietx kontradetta matul is-seduta, esposta fil-punti 54 sa 59 tal-osservazzjonijiet bil-miktub tiegħu b’dan il-kliem:

63.

Nirrileva, iktar minn hekk, li l-portata tal-emendi tal-leġiżlazzjoni nazzjonali, fis-seħħ sa mill‑24 ta’ Ġunju 2017 ( 53 ), għandha tiġi eżaminata fid-dawl tal-motivazzjoni tad-deċiżjoni tal-Qorti tal-Ġustizzja dwar il-komparabbiltà tas-sitwazzjonijiet li tinsab fil-punti 50 sa 53 tas-sentenza Welte ( 54 ). Il-Qorti tal-Ġustizzja rrilevat li l-fatt li l-bażi taxxabbli tas-suċċessjoni ta’ eredi mhux residenti, meta huwa parzjalment suġġett għat-taxxa tas-suċċessjoni fil-Ġermanja, hija bħala prinċipju inqas minn dik ta’ eredi, residenti jew mhux residenti, li huwa suġġett b’mod sħiħ għall-ħlas ta’ din it-taxxa f’dan l-Istat Membru, ma jistax iqajjem dubju dwar il-konstatazzjoni tal-assenza ta’ effett tar-residenza fir-rigward tal-klassi u tar-rata ta’ tassazzjoni, peress li l-ammont tal-allowance fuq il-bażi taxxabbli previst mil-leġiżlazzjoni inkwistjoni bl-ebda mod ma jvarja skont l-ammont tal-bażi taxxabbli tas-suċċessjoni, iżda jibqa’ l-istess irrispettivament mill-aħħar ammont.

64.

Il-Qorti tal-Ġustizzja qieset fil-punt 55 tas-sentenza Welte li l-ammont tal-allowance ma huwiex ibbażat fuq l-ammont tal-bażi taxxabbli, iżda jingħata lill-eredi fil-kapaċità tiegħu bħala persuna taxxabbli sabiex jiddeċiedi dwar l-assenza ta’ differenza, fir-rigward ta’ din l-allowance, fis-sitwazzjonijiet tal-eredi residenti jew mhux residenti.

65.

Din il-motivazzjoni għandha titqabbel, kif issuġġeriet il-qorti tar-rinviju, mal-analiżi mill-Avukat Ġenerali Mengozzi fil-konklużjonijiet tiegħu fil-kawża Welte ( 55 ) tal-ipoteżi li fiha Y. Welte seta’ jibbenefika mid-dritt għall-allowance sħiħa, minkejja li l-parti mis-suċċessjoni ntaxxata fil-Ġermanja li kien wiret ma kinitx tirrappreżenta, b’mod differenti, bħala regola ġenerali, mis-sitwazzjonijiet purament interni tal-persuni taxxabbli fuq bażi sħiħa, l-ammont totali tas-suċċessjoni. Huwa jittrattaha f’dan il-kliem: “[f]il-fehma tiegħi, din id-domanda għandha tingħata risposta pożittiva. Effettivament, […] is-sitwazzjoni ta’ Y. Welte ma jidhirlix li hija sostanzjalment differenti minn dik ta’ persuna residenti fil-Ġermanja li tkun tibbenefika mis-suċċessjoni miftuħa fil-Ġermanja tal-konjuġi residenti wkoll fil-Ġermanja fil-mument tal-mewt tagħha, meta din is-suċċessjoni tkun komposta biss minn beni immobbiljari wieħed [ ( 56 )]. Issa, ceteris paribus, l-allowance sħiħa kellha tingħata lil dan ir-resident u huwa ma kellux ikun obbligat iħallas it-taxxi tas-suċċessjoni fuq it-trasferiment ta’ dan il-beni.”

66.

F’dan il-każ, sa mill-emenda tal-leġiżlazzjoni Ġermaniża li kienet is-suġġett tad-deċiżjoni tal-Qorti tal-Ġustizzja fis-sentenza Welte, ma jistax oġġettivament jiġi miċħud il-fatt li, kieku s-suċċessjoni tinkludi biss patrimonju immobbli li jinsab fil-Ġermanja, l-oneru fiskali ta’ suċċessjoni li jinvolvi persuni mhux residenti jew mill-inqas persuna residenti waħda jkun ekwivalenti. F’sitwazzjoni li fiha s-suċċessjoni tinkludi wkoll beni li jinsabu barra mill-Ġermanja, l-oneru fiskali tal-eredi jkun l-istess irrispettivament minn jekk huwiex residenti jew le fil-Ġermanja ( 57 ). Barra minn hekk, kieku l-ebda proprjetà immobbli inkluża fis-suċċessjoni ma kienet tinsab fil-Ġermanja, ma tqumx il-kwistjoni tal-allowance mogħtija lill-eredi mhux residenti. Minbarra dan, irrispettivament mill-istadju tal-analiżi, ma hemmx lok li wieħed jistaqsi dwar l-oneru fiskali previst f’tali sitwazzjoni mill-Istat l-ieħor ikkonċernat ( 58 ).

67.

Madankollu, jidher, mill-qari ta’ ċerti awturi Ġermaniżi li jesprimu opinjoni rriżervata dwar il-kompatibbiltà tal-leġiżlazzjoni inkwistjoni mal-Artikolu 63(1) u mal-Artikolu 65 TFUE, li għandhom jittieħdu inkunsiderazzjoni argumenti oħra minbarra dawk imressqa għall-evalwazzjoni tal-Qorti tal-Ġustizzja ( 59 ).

68.

Fil-fatt, dawn jikkonfermaw, fil-fehma tiegħi, li l-konstatazzjoni tad-differenza fit-trattament fil-qasam tat-taxxa fuq is-suċċessjoni ( 60 ) għandha tkun ibbażata fuq analiżi globali tas-sistema fiskali u tal-elementi kollha meħtieġa għall-kalkolu tar-rata effettiva tat-tassazzjoni ( 61 )tal-arrikkiment tal-eredi b’teħid inkunsiderazzjoni tan-natura ta’ darba tiegħu u tal-assenza ta’ rabta mal-attività ta’ dan tal-aħħar.

69.

F’dawn iċ-ċirkustanzi, bla ħsara għall-verifiki li għandhom isiru mill-qorti tar-rinviju, jiena tal-opinjoni li l-leġiżlazzjoni nazzjonali inkwistjoni, sa fejn tintroduċi regola ta’ proporzjonalità għall-kalkolu tal-ammont tal-allowance mogħtija lill-eredi mhux residenti, ma tikkostitwixxix restrizzjoni għall-moviment liberu tal-kapital fis-sens tal-Artikolu 63 TFUE.

70.

Jekk, madankollu, fuq il-bażi tas-sempliċi konstatazzjoni ( 62 ) li l-allowance hija vantaġġ fiskali marbut mar-rabta familjali li teżisti bejn id-deċedut u l-eredi taxxabbli, li l-ammont tagħha huwa stabbilit mingħajr ma jittieħed inkunsiderazzjoni, fil-każ ta’ ssuġġettar sħiħ għat-taxxa, il-valur tas-suċċessjoni, il-Qorti tal-Ġustizzja kellha tqis li l-leġiżlazzjoni inkwistjoni fil-kawża prinċipali twassal għal trattament inqas vantaġġuż tal-eredi fil-każ ta’ ssuġġettar parzjali għat-taxxa, li jista’ jiskoraġġixxi lill-persuni mhux residenti fil-Ġermanja milli jinvestu f’dan l-Istat Membru, u, għaldaqstant, li jirrestrinġi l-moviment liberu tal-kapital, għalhekk għandu jiġi vverifikat jekk din id-differenza fit-trattament tikkonċernax sitwazzjonijiet li ma humiex oġġettivament komparabbli jew jekk hijiex iġġustifikata minn raġuni imperattiva ta’ interess ġenerali ( 63 ).

71.

Fis-sentenza Welte, il-Qorti tal-Ġustizzja rrilevat li l-leġiżlazzjoni nazzjonali inkwistjoni kienet tittratta b’mod identiku, ħlief fir-rigward tal-ammont tal-allowance li jista’ jibbenefika minnu l-eredi, is-suċċessjonijiet, irrispettivament minn jekk l-eredi jew id-deċedut kinux residenti jew le ( 64 ).

72.

Il-Qorti tal-Ġustizzja ċaħdet l-argument mislut mill-bażi taxxabbli li jgħid li din tinkludi s-suċċessjoni kollha jew biss il-patrimonju immobbli fil-Ġermanja b’kunsiderazzjoni tal-fatt li l-ammont tal-allowance kien fiss fiż-żewġ każijiet ( 65 ). Hija bbażat ruħha wkoll fuq il-fatt li l-kwalità ta’ persuna taxxabbli ma tiddependix mill-post ta’ residenza ( 66 ), li l-allowance hija intiża sabiex tnaqqas l-ammont totali tat-taxxa tas-suċċessjoni ( 67 ) u li din tingħata lill-eredi fil-kwalità tiegħu ta’ persuna taxxabbli ( 68 ).

73.

Minn dan il-Qorti tal-Ġustizzja ddeduċiet li “l-issuġġettar parzjali għat-taxxa tal-werriet mhux residenti ta’ persuna mejta mhux residenti ma jikkostitwixxix ċirkustanza tali li tagħmel oġġettivament differenti, fid-dawl ta’ din l-allowance, is-sitwazzjoni ta’ dan il-werriet imqabbla ma’ dik tal-werriet mhux residenti ta’ persuna mejta residenti jew ta’ dik tal-werriet residenti […] ta’ persuna mejta residenti jew mhux residenti” ( 69 ) u li, konsegwentement, “is-sitwazzjoni ta’ Y. Welte hija komparabbli għal dik ta’ kull werriet li, b’suċċessjoni, jakkwista beni immobbli li jinsab fil-Ġermanja ta’ persuna mejta li kienet residenti f’dan l-Istat Membru u li magħha kien hemm rabta ta’ konjuġi, kif ukoll dik ta’ werriet residenti fil-Ġermanja li jwettaq dan l-akkwist mingħand konjuġi mejjet li ma kienx jirrisjedi f’dan l-Istat Membru” ( 70 ).

74.

Fil-fatt, fl-ipoteżi li fiha l-patrimonju tas-suċċessjoni jkun jinkludi biss patrimonju intern li jinsab fil-Ġermanja, l-unika differenza li tirriżulta mil-leġiżlazzjoni inkwistjoni fis-sentenza Welte bejn l-eredi skont ir-residenza tagħhom jew dik tad-deċedut tkun tirrigwarda l-ammont tal-allowance, jiġifieri EUR 2000 għall-persuni mhux residenti u EUR 500000 għall-persuni residenti ( 71 ).

75.

Għaldaqstant, id-deċiżjoni tal-Qorti tal-Ġustizzja fis-sentenza Welte ma jidhirlix li tista’ tiġi trasposta għas-sitwazzjoni li hija s-suġġett tat-tilwima fil-kawża prinċipali, ħlief jekk ma jitteħidx inkunsiderazzjoni l-aġġustament tal-vantaġġ fiskali għall-oneru reali sostnut mill-persuna taxxabbli li huwa differenti skont il-post ta’ residenza tagħha jew dak tad-deċedut. Fil-fatt, il-proporzjonalità tal-allowance tikkorrispondi għal-livell ta’ arrikkiment finali tal-persuni residenti u ta’ dawk mhux residenti li jikkostitwixxi s-suġġett tat-taxxa tas-suċċessjonijiet ( 72 ) fil-limiti tal-kompetenza fiskali tal-Ġermanja ( 73 ), jiġifieri fuq il-patrimonju dinji għall-persuni residenti u parti tal-patrimonju ttrasferit għall-persuni mhux residenti. F’dan ir-rigward, nirreferi għall-argumenti tiegħi esposti preċedentement ( 74 ).

76.

Konsegwentement, sussidjarjament, nipproponi li l-Qorti tal-Ġustizzja tqis li, f’sistema fiskali li fiha l-ammont tal-allowance jkun iddeterminat skont il-kamp tal-issuġġettar għat-taxxa, is-sitwazzjonijiet ma humiex oġġettivament komparabbli ( 75 ).

77.

Soluzzjoni differenti, li ssegwi l-loġika tas-sentenza Welte, tippreżupponi għalhekk li jiġi kkunsidrat li s-sitwazzjoni tal-eredi mhux residenti ta’ deċedut mhux residenti hija komparabbli għal dik ta’ eredi jew deċedut residenti, bħala prinċipju, minħabba s-sistema ta’ tassazzjoni li fiha l-kwalità tal-persuna taxxabbli ma tiddependix mill-post ta’ residenza, u l-klassi ta’ tassazzjoni kif ukoll l-allowance huma ddeterminati skont ir-rabta familjali biss.

78.

F’tali każ, għalhekk il-Qorti tal-Ġustizzja jkollha teżamina jekk leġiżlazzjoni bħal dik inkwistjoni fil-kawża prinċipali tistax tkun oġġettivament iġġustifikata minn raġuni imperattiva ta’ interess ġenerali, kif isostni l-Gvern Ġermaniż sussidjarjament.

79.

Il-Gvern Ġermaniż isostni li l-leġiżlazzjonijiet inkwistjoni huma ġġustifikati minħabba raġunijiet imperattivi ta’ interess ġenerali, jiġifieri li tiġi mħarsa l-koerenza tal-leġiżlazzjonijiet Ġermaniżi dwar it-taxxa tas-suċċessjoni u jiġi żgurat tqassim ibbilanċjat tas-setgħat ta’ tassazzjoni bejn l-Istati Membri.

80.

Fir-rigward tal-ġustifikazzjoni bbażata fuq il-prinċipju ta’ koerenza fiskali ( 76 ), diġà eżaminata mill-Qorti tal-Ġustizzja fir-rigward tal-leġiżlazzjoni preċedenti għal dik li hija inkwistjoni fil-kawża prinċipali, il-Qorti tal-Ġustizzja qieset li din ma kinitx iġġustifikata minħabba li “huwa biżżejjed li jiġi kkonstatat li l-vantaġġ fiskali li jirriżulta, fl-Istat Membru li fit-territorju tiegħu jinsab il-beni immobbli suġġett għas-suċċessjoni, mill-applikazzjoni ta’ allowance b’rata sħiħa fuq il-bażi taxxabbli meta din is-suċċessjoni tinvolvi tal-inqas resident wieħed minn dan l-Istat, ma huwiex ikkumpensat f’dan l-Istat minn l-ebda ġbir fiskali ddeterminat skont it-taxxa fuq is-suċċessjoni” ( 77 ).

81.

F’dan il-każ, il-Gvern Ġermaniż jinvoka, essenzjalment, id-deċiżjoni meħuda mill-Qorti tal-Ġustizzja fis-sentenza Feilen ( 78 ). Huwa jsostni, b’analoġija, li l-eżistenza ta’ rabta diretta bejn l-ammont imnaqqas tal-allowance u r-rata li biha l-beni ttrasferiti jiġu suġġetti għat-taxxa tas-suċċessjoni Ġermaniża ssegwi loġika riflettiva.

82.

Madankollu, f’dik is-sentenza, id-deċiżjoni tal-Qorti tal-Ġustizzja tirrigwarda sitwazzjoni, differenti ħafna minn dik inkwistjoni fil-kawża prinċipali, li fiha huwa biss għat-tnaqqis tat-taxxa tas-suċċessjoni li tista’ tiġi akkumulata li l-leġiżlazzjoni inkwistjoni tittratta b’mod differenti lill-benefiċjarji tas-suċċessjoni skont jekk il-beni inkwistjoni kinux jinsabu jew le fit-territorju nazzjonali fil-mument tas-suċċessjoni preċedenti u skont jekk il-partijiet għal din is-suċċessjoni kinux jirrisjedu jew le f’dan it-territorju ( 79 ).

83.

F’tali każ, it-tpaċija tal-vantaġġ fiskali bi ġbir fiskali ddeterminat tidher b’mod ċar. Dan ma huwiex il-każ fir-rigward tal-mekkaniżmu tal-allowance li huwa intiż sabiex jeħles lill-eredi minn kwalunkwe taxxa fil-maġġoranza tal-każijiet, mingħajr quid pro quo. Fil-fatt, il-Qorti tal-Ġustizzja rrilevat li l-loġika fiskali kienet ibbażata fuq il-ġbir tat-taxxa tas-suċċessjoni fil-mument tas-suċċessjoni preċedenti fl-istess Stat Membru ( 80 ). Konsegwentement, fl-assenza ta’ argumenti ddettaljati tal-Gvern Ġermaniż dwar x’iwasslu sabiex jikkunsidra li s-sitwazzjoni inkwistjoni fil-kawża prinċipali għandha karatteristiċi li jippermettu li tiġi miċħuda l-analiżi tal-Qorti tal-Ġustizzja adottata fis-sentenza Welte, nipproponi li l-Qorti tal-Ġustizzja tikkunsidra li l-leġiżlazzjoni inkwistjoni fil-kawża prinċipali ma tistax tiġi ġġustifikata min-neċessità li tiġi mħarsa l-koerenza tas-sistema fiskali Ġermaniża.

84.

Fir-rigward tal-ġustifikazzjoni bbażata fuq il-prinċipju ta’ territorjalità u tal-allegata neċessità li jiġi żgurat tqassim ibbilanċjat tas-setgħat ta’ tassazzjoni bejn l-Istati Membri, il-Qorti tal-Ġustizzja qieset li dan huwa għan leġittimu ( 81 ), iżda li tali ġustifikazzjoni ma tkunx fondata meta d-differenza fit-trattament tirriżulta biss mill-applikazzjoni tal-leġiżlazzjoni nazzjonali inkwistjoni jew meta ma jintweriex li din id-differenza fit-trattament hija neċessarja sabiex tiġi ggarantita s-setgħa ta’ tassazzjoni tal-Istat Membru kkonċernat ( 82 ).

85.

F’dan il-każ, il-Gvern Ġermaniż isostni li, fl-assenza ta’ miżuri ta’ unifikazzjoni jew ta’ armonizzazzjoni adottati mill-Unjoni fil-qasam tat-taxxa tas-suċċessjoni, huwa eżerċita l-kompetenza tiegħu li tawtorizzah jiddefinixxi, b’mod unilaterali, il-kriterji tat-tqassim tas-setgħa ta’ tassazzjoni fil-każ ta’ suċċessjonijiet li jinkludu elementi transkonfinali. Dan il-gvern iżid li huwa ispira ruħu minn prinċipji ta’ tassazzjoni magħrufa ( 83 ) u jagħmel distinzjoni bejn il-każijiet ta’ ssuġġettar sħiħ li jiġbru l-beni ttrasferiti fil-livell globali u l-każijiet ta’ ssuġġettar parzjali li jikkonċernaw biss it-trasferimenti ta’ patrimonju intern ikkwalifikat. Permezz ta’ dan it-tqassim, dan isegwi kemm l-għan ta’ prevenzjoni ( 84 ) jew ta’ tneħħija ( 85 ) ta’ taxxa doppja kif ukoll dak tal-evitar ta’ nuqqas ta’ tassazzjoni doppja parzjali tal-beni ttrasferiti.

86.

Fil-fehma tiegħi, il-Gvern Ġermaniż juri li d-differenza fit-trattament hija neċessarja sabiex jiggarantixxi s-setgħa ta’ tassazzjoni tiegħu u hija proporzjonali għall-għan li għandu jintlaħaq, peress li hija tieħu inkunsiderazzjoni d-differenza fil-valur taxxabbli.

87.

Fil-fatt, hemm lok li jittieħed inkunsiderazzjoni l-fatt li l-allowances personali jingħataw abbażi tal-proporzjon sa liema l-patrimonju huwa suġġett għat-taxxa tas-suċċessjoni Ġermaniża u li hija tirrifletti, konsegwentement, il-kompetenza fiskali tal-Ġermanja dwar il-persuni mhux residenti meta mqabbla ma’ dik fir-rigward tar-residenti.

88.

Minn dan isegwi li, sussidjarjament fil-fehma tiegħi, ir-restrizzjoni għall-moviment tal-kapital li tirriżulta minn leġiżlazzjoni nazzjonali bħal dik inkwistjoni fil-kawża prinċipali hija ġġustifikata mill-prinċipju ta’ territorjalità.

89.

Permezz tat-tieni domanda tagħha, il-qorti tar-rinviju tistaqsi, essenzjalment, jekk l-Artikolu 63(1) u l-Artikolu 65 TFUE għandhomx jiġu interpretati fis-sens li jipprekludu leġiżlazzjoni ta’ Stat Membru dwar il-kalkolu tat-taxxa tas-suċċessjoni, li tipprevedi, fil-każ ta’ ssuġġettar parzjali għat-taxxa limitat għall-patrimonju immobbli intern, applikabbli meta la d-deċedut u lanqas l-eredi ma kienu jirrisjedu fit-territorju ta’ dan l-Istat Membru fil-mument tal-mewt, li l-valur tal-obbligi marbuta mal-porzjonijiet irriżervati ma jistax jitnaqqas, anki b’mod proporzjonali, mill-valur tat-trasferiment causa mortis, filwaqt li l-valur ta’ dawn l-obbligi jista’ jitnaqqas b’mod sħiħ fil-każ ta’ ssuġġettar sħiħ għat-taxxa tal-patrimonju tas-suċċessjoni, applikabbli kieku mill-inqas id-deċedut jew l-eredi kienu residenti fl-imsemmi Stat Membru fil-mument tal-mewt.

90.

Il-Gvern Ġermaniż jammetti li l-leġiżlazzjoni inkwistjoni tikkostitwixxi restrizzjoni għall-moviment liberu tal-kapital fis-sens tal-Artikolu 63(1) TFUE.

91.

Fil-fatt, kif esponiet il-qorti tar-rinviju, ir-rikorrenti ma tistax, konformement mat-tieni sentenza tal-Artikolu 10(6) tal-ErbStG, titlob it-tnaqqis, bħala passiv tas-suċċessjoni tat-trasferiment causa mortis, tal-valur tal-obbligi marbuta mal-porzjonijiet irriżervati ta’ ommha u ħuha li hija għandha tissodisfa. Għalhekk, skont din id-dispożizzjoni, fil-każ ta’ ssuġġettar parzjali għat-taxxa, jistgħu jitnaqqsu biss id-djun u l-oneri li huma ekonomikament marbuta mal-elementi tal-patrimonju ntaxxat ( 86 ).

92.

Barra minn hekk, il-qorti tar-rinviju tindika li, skont il-ġurisprudenza tal-Bundesfinanzhof (il-Qorti Federali tal-Finanzi), ir-rabta ekonomika meħtieġa mill-ewwel u t-tieni sentenza tal-Artikolu 10(6) tal-ErbStG ma hijiex stabbilita bejn l-elementi tal-patrimonju speċifiċi inklużi fis-suċċessjoni u l-porzjon irriżervat, għalkemm din hija kkalkolata skont il-valur tas-suċċessjoni ( 87 ).

93.

F’dawn iċ-ċirkustanzi, kif diġà tfakkar, sabiex leġiżlazzjoni fiskali nazzjonali tkun tista’ tiġi kkunsidrata bħala kompatibbli mad-dispożizzjonijiet tat-Trattat dwar il-moviment liberu tal-kapital, għandu jiġi vverifikat jekk din id-differenza fit-trattament tikkonċernax sitwazzjonijiet li ma humiex oġġettivament komparabbli jew jekk hijiex iġġustifikata minn raġuni imperattiva ta’ interess ġenerali ( 88 ).

94.

Kif sostnew il-Gvern Ġermaniż u l-Kummissjoni, il-leġiżlazzjoni inkwistjoni tista’ titqabbel ma’ dik li kienet suġġetta għall-eżami tal-Qorti tal-Ġustizzja fis-sentenza Arens‑Sikken. Fil-fatt, fil-kawża li wasslet għal dik is-sentenza, il-leġiżlazzjoni nazzjonali kienet tipprevedi li, meta l-persuna li tinfetaħ is-suċċessjoni tagħha tkun tirrisjedi, fil-mument tal-mewt tagħha, fi Stat Membru differenti mill-Istat Membru kkonċernat, id-dejn marbut ma’ għotja żejda minħabba diviżjoni testamentarja parentali ma setax jitnaqqas waqt il-kalkolu tat-taxxa fuq it-trasferiment marbuta mal-proprjetà immobbli li tħalliet fil-wirt ( 89 ).

95.

Il-Qorti tal-Ġustizzja eżaminat b’mod partikolari l-argumenti li jgħidu li, qabel kollox, id-dejn marbut ma’ għotja żejda ma għandux jitqies bħala direttament marbut mal-proprjetà immobbli fis-sens tas-sentenzi tat‑12 ta’ Ġunju 2003, Gerritse ( 90 ), u tal‑11 ta’ Diċembru 2003, Barbier ( 91 ), sussegwentement, li dan id-dejn ma huwiex dejn li jifforma parti mis-suċċessjoni, iżda dejn assunt mill-konjuġi superstiti, li nħoloq wara l-mewt tal-persuna kkonċernata b’effett tat-testment li tkun ħalliet din tal-aħħar u, finalment, li d-dejn imsemmi ma kienx marbut mal-proprjetà immobbli u li l-kredituri tal-konjuġi superstiti, li jassumi d-dejn marbut mal-għotja żejda, ma jistgħu jinvokaw ebda dritt in rem fuq din il-proprjetà immobbli ( 92 ).

96.

Madankollu, għalkemm, fil-kawża li wasslet għas-sentenza Arens‑Sikken, il-Qorti tal-Ġustizzja rrilevat li d-dejn marbut mal-għotja żejda kien relatat mal-proprjetà immobbli inkwistjoni, hija ma ddeċidietx dwar il-kwistjoni jekk kinitx teżisti rabta diretta bejn id-dejn marbut mal-għotja żejda u l-proprjetà immobbli li kienet is-suġġett tas-suċċessjoni. Hija qieset li kien biżżejjed għaliha li teżamina d-differenza fit-trattament li tirriżulta mil-leġiżlazzjoni inkwistjoni li għandha l-effett li tqassam l-oneru fiskali bejn id-diversi eredi b’mod differenti skont jekk id-deċedut kienx, fil-mument tal-mewt tiegħu, persuna residenti jew mhux residenti tal-Istat Membru kkonċernat ( 93 ).

97.

Minn dan niddeduċi li, bil-kontra ta’ dak li jsostni l-Gvern Ġermaniż, fir-rigward tal-porzjonijiet irriżervati, il-Qorti tal-Ġustizzja ma qisitx, bħal fis-sentenza Eckelkamp et ( 94 ), li kienet il-qorti tar-rinviju li kellha tistabbilixxi jekk teżistix rabta diretta bejn il-passiv invokat u l-elementi tal-patrimonju ntaxxat.

98.

Il-Gvern Ġermaniż isostni li, skont il-ġurisprudenza nazzjonali ( 95 ), id-dritt għal porzjonijiet irriżervati jolqot is-suċċessjoni kollha kemm hi u li, konsegwentement, ma hemmx rabta bejn l-elementi tal-patrimonju intern u dan il-passiv. Huwa jżid li l-assenza ta’ possibbiltà ta’ tnaqqis tal-passiv li ma għandux rabta ekonomika mal-elementi tal-patrimonju ntaxxati fil-każ tal-issuġġettar parzjali għat-taxxa hija intiża sabiex jintlaħaq l-għan imfittex fl-Artikolu 10 tal-ErbStG skont liema hija biss iż-żieda patrimonjali netta li tirriżulta mit-trasferiment tal-beni li tista’ tintuża bħala bażi taxxabbli tat-taxxa tas-suċċessjoni.

99.

Dawn l-argumenti insostenn tat-teżi tan-nuqqas ta’ komparabbiltà tas-sitwazzjonijiet, li, essenzjalment, huma identiċi għal dawk imressqa mill-Gvern Spanjol sa fejn huma bbażati fuq id-differenza fil-bażi taxxabbli, ma humiex konvinċenti. Fil-fatt, bħall-Kummissjoni, nosserva li, f’sitwazzjoni li fiha s-suċċessjoni tinkludi biss proprjetà immobbli waħda fil-Ġermanja, il-passiv marbut mal-porzjonijiet irriżervati ser ikun jista’ jitnaqqas jekk l-eredi jew id-deċedut ikun residenti u ma huwiex ser ikun jista’ jitnaqqas jekk l-ebda wieħed minnhom ma jkun residenti. Għalhekk, bl-adozzjoni tal-istess loġika bħal dik proposta fir-rigward tal-applikazzjoni tal-allowance għall-attiv tas-suċċessjoni ( 96 ), jidher li għandha tinżamm rabta bejn l-arrikkiment tal-eredi, it-tassazzjoni tiegħu u l-vantaġġ fiskali mogħti. Fin-nuqqas ta’ dan, it-tassazzjoni tal-eredi tirrigwarda proporzjon tal-valur ta’ patrimonju li ma huwiex ittrasferit jew, fi kliem ieħor, parti mill-arrikkiment li ma teżistix b’mod konkret.

100.

Konsegwentement, nipproponi li l-Qorti tal-Ġustizzja tikkunsidra, b’analoġija mal-interpretazzjoni adottata fis-sentenza Arens‑Sikken ( 97 ), li leġiżlazzjoni nazzjonali li tqiegħed fuq l-istess livell, għall-finijiet tat-tassazzjoni ta’ proprjetà immobbli akkwistata b’suċċessjoni u li tinsab fl-Istat Membru kkonċernat, l-eredi ta’ persuna li, fil-mument tal-mewt tagħha, kellha l-kwalità ta’ persuna residenti u dawk ta’ persuna li, f’dan l-istess mument, kellha l-kwalità ta’ persuna mhux residenti, ma tistax, mingħajr ma toħloq diskriminazzjoni, tittratta lil dawn l-eredi b’mod differenti, fil-kuntest ta’ din l-istess tassazzjoni, fir-rigward tal-possibbiltà ta’ tnaqqis tal-oneri fuq is-suċċessjoni.

101.

Sussidjarjament, il-Gvern Ġermaniż isostni li l-leġiżlazzjoni nazzjonali inkwistjoni hija ġġustifikata mill-istess raġunijiet imperattivi ta’ interess ġenerali bħal dawk imressqa minnu fir-rigward tal-allowance ( 98 ). Dan il-gvern iqis prinċipalment li l-applikazzjoni ta’ sistema differenti ta’ tnaqqas tad-djun tas-suċċessjoni hija koerenti mal-bażi taxxabbli fil-Ġermanja.

102.

Bl-istess mod bħal fir-rigward tal-kwistjoni dwar l-allowance, fir-rigward tal-ħarsien tal-koerenza fiskali, il-Gvern Ġermaniż jirreferi għas-sentenza Feilen u sempliċement isostni li t-tnaqqis jista’ jingħata biss fil-każijiet fejn il-patrimonju kkonċernat huwa ntaxxat fil-Ġermanja.

103.

Minn naħa, nirreferi għall-analiżi tiegħi dwar it-traspożizzjoni ta’ dik is-sentenza fis-sitwazzjoni inkwistjoni fil-kawża prinċipali li tgħodd ukoll għall-possibbiltà ta’ tnaqqis tal-porzjonijiet irriżervati ( 99 ). Min-naħa l-oħra, fir-rigward tat-tpaċija, li hija kriterju adottat mill-Qorti tal-Ġustizzja meta tiġi invokata l-koerenza tas-sistema fiskali ( 100 ), nikkonstata li l-Gvern Ġermaniż ma jipprovdi l-ebda element ta’ evalwazzjoni lill-Qorti tal-Ġustizzja.

104.

Issa, b’analoġija ma’ dak li l-Qorti tal-Ġustizzja qieset fis-sentenza Eckelkamp et ( 101 ), hemm lok li jiġi kkonstatat li l-leġiżlazzjoni inkwistjoni fil-kawża prinċipali teskludi t-tnaqqis tal-passiv marbut mal-porzjonijiet irriżervati, b’mod pur u sempliċi ( 102 ), anki meta s-suċċessjoni taxxabbli kollha tkun tinsab fil-Ġermanja, mingħajr ma jittieħed inkunsiderazzjoni element ieħor għajr ir-residenza tad-deċedut jew dik tal-eredi meta din tkun tinsab barra mill-Ġermanja.

105.

Fir-rigward tal-prinċipju ta’ territorjalità u tan-neċessità li jiġi ggarantit tqassim ibbilanċjat tas-setgħa ta’ tassazzjoni bejn l-Istati Membri invokati mill-Gvern Ġermaniż, dan isostni li t-tnaqqis ta’ tali passiv ikun jaqbeż il-limiti tal-kompetenza fiskali tiegħu u li l-eventwali tnaqqis doppju tal-passiv għandu jittieħed inkunsiderazzjoni.

106.

Madankollu, fil-kuntest tal-ġurisprudenza tagħha dwar il-moviment liberu tal-kapital u dwar it-taxxa tas-suċċessjoni, il-Qorti tal-Ġustizzja rrilevat li ċittadin ma jistax jiġi mċaħħad mill-possibbiltà li jinvoka d-dispożizzjonijiet tat-Trattat minħabba li jibbenefika minn vantaġġi fiskali mogħtija legalment mir-regoli fis-seħħ fi Stat Membru ieħor li ma jkunx dak fejn ikun residenti ( 103 ), fl-assenza ta’ ftehim li jipprevjeni t-taxxa doppja ( 104 ).

107.

F’dan il-każ, hemm lok li jitfakkar li ma jeżistix ftehim bilaterali bejn ir-Repubblika Federali tal-Ġermanja u r-Repubblika tal-Awstrija fil-qasam tat-tassazzjoni tat-taxxa tas-suċċessjoni ( 105 ).

108.

F’dawn iċ-ċirkustanzi, jiena tal-opinjoni li l-Istat Membru li fih tinsab proprjetà immobbli li hija s-suġġett tas-suċċessjoni ma jistax, sabiex jiġġustifika restrizzjoni għall-moviment liberu tal-kapital li tirriżulta mil-leġiżlazzjoni tiegħu, jinvoka l-possibbiltà indipendenti mir-rieda tiegħu, offruta lill-eredi, li jibbenefika minn vantaġġ fiskali mogħti minn Stat Membru ieħor, bħal dak li fih il-persuna li nfetħet is-suċċessjoni tagħha kienet tirrisjedi fil-mument tal-mewt tagħha, li jista’ jikkumpensa, kompletament jew parzjalment, id-dannu mġarrab mill-eredi ta’ din tal-aħħar minħabba n-nuqqas ta’ possibbiltà ta’ tnaqqis tal-passiv marbut mal-porzjonijiet irriżervati fl-Istat Membru fejn tinsab il-proprjetà immobbli li tħalliet b’wirt, meta jsir il-kalkolu tat-taxxa tas-suċċessjoni ( 106 ).

109.

Konsegwentement, nikkunsidra li l-esklużjoni sistematika għall-persuni mhux residenti fit-territorju nazzjonali tat-tnaqqis tal-passiv marbut mal-porzjonijiet irriżervati tal-valur tat-trasferiment causa mortis fil-każ ta’ ssuġġettar parzjali għat-taxxa, mingħajr ma tittieħed inkunsiderazzjoni, anki b’mod proporzjonali, il-bażi taxxabbli, meta din hija ddefinita bl-għan li jiġi ddeterminat l-arrikkiment tal-eredi, skont l-Artikolu 10(1) tal-ErbStG, tikkostitwixxi restrizzjoni għall-moviment liberu tal-kapital fis-sens tal-Artikolu 63 TFUE li ma hijiex iġġustifikata minn raġuni imperattiva ta’ interess ġenerali.

110.

Fid-dawl tal-kunsiderazzjonijiet preċedenti, nipproponi li l-Qorti tal-Ġustizzja tirrispondi għad-domandi preliminari magħmula mill-Finanzgericht Düsseldorf (il-Qorti tal-Finanzi ta’ Düsseldorf, il-Ġermanja) kif ġej: