1.

Din it-talba għal deċiżjoni preliminari tirrigwarda l‑interpretazzjoni ta’ dispożizzjonijiet tar-Regolament (UE) Nru 1169/2011 dwar l-għoti ta’ informazzjoni dwar l-ikel lill‑konsumaturi ( 2 ). B’mod iktar preċiż, il-qorti tar-rinivju tixtieq tkun taf jekk, u taħt liema kundizzjonijiet, tista’ tingħata, fuq in-naħa ta’ quddiem tal‑pakkett ta’ ikel, informazzjoni volontarja dwar in-nutrizzjoni li ma hijiex relatata mal-ikel kif jinbiegħ, iżda ma’ porzjonijiet tiegħu wara l-preparazzjoni flimkien ma’ ingredjenti addizzjonali.

2.

Din it-talba tressqet fil-kuntest ta’ tilwima bejn il-Bundesverband der Verbraucherzentralen und Verbraucherverbände – Verbraucherzentrale Bundesverband e.V. (l-Unjoni Federali taċ-Ċentri u tal-Assoċjazzjonijiet tal-Konsumaturi, il-Ġermanja, iktar ’il quddiem il‑“BVV”) u produttur ta’ prodotti tal-ikel, Dr. August Oetker Nahrungsmittel KG (iktar ’il quddiem “Dr. Oetker”), dwar il-konformità tal-ittikkettjar dwar in-nutrizzjoni li jinsab fuq in-naħa ta’ quddiem ta’ pakkett ta’ muesli (iktar ’il quddiem il-“prodott inkwistjoni”) mar-rekwiżiti relatati mal-informazzjoni dwar in-nutrizzjoni mogħtija b’mod volontarju u, b’mod partikolari, mat-tieni subparagrafu tal-Artikolu 31(3) u mat-tieni subparagrafu tal-Artikolu 33(2) tar-Regolament Nru 1169/2011.

3.

Minkejja li l-Qorti tal-Ġustizzja diġà kellha l-okkażjoni li tinterpreta r-Regolament Nru 1169/2011, u, b’mod partikolari, id‑Direttivi 2000/13/KE ( 3 ) u 90/496/KEE ( 4 ) li tħassru minn dan ir‑regolament, din hija l-ewwel darba li ser tittratta l-interpretazzjoni ta’ dispożizzjonijiet relatati mal-ittikkettjar volontarju dwar in-nutrizzjoni ta’ prodotti tal-ikel ( 5 ).

4.

Permezz ta’ dawn il-konklużjonijiet, ser insostni li l-ittikkettjar volontarju dwar in-nutrizzjoni ta’ ikel ippakkjat bil-lest, bħal dak tal‑prodott inkwistjoni, li huwa kkonsmat skont modi differenti ta’ preparazzjoni, ma huwiex konformi mar-rekwiżiti previsti mir‑Regolament Nru 1169/2011 jekk l-informazzjoni relatata mal-valur enerġetiku u mal-ammonti ta’ nutrijenti hija pprovduta biss għal forma waħda ta’ preparazzjoni minflok ma tiġi rrapportata wkoll, għal kull 100 g, fil-forma tal-prodott tal-ikel kif jinbiegħ.

5.

Il-premessi 10, 17, 35, 37 u 41 tar-Regolament Nru 1169/2011 jistipulaw:

[…]

[…]

[…]

[…]

6.

L-Artikolu 9 ta’ dan ir-regolament, intitolat “Lista ta’ dettalji obbligatorji”, jinkludi l-paragrafu 1 li huwa fformulat kif ġej:

“Konformement mal-Artikoli 10 sa 35 u skont l-eċċezzjonijiet li hemm f’dan il-Kapitolu, hija obbligatorja l-indikazzjoni tad-dettalji li ġejjin:

[…]

l) dikjarazzjoni ta’ nutrizzjoni.”

7.

L-Artikolu 30 ta’ dan ir-regolament, intitolat “Kontenut”, jipprevedi:

“1.   Id-dikjarazzjoni obbligatorja dwar in-nutrizzjoni għandha tinkludi dan li ġej:

[…]

3.   Fejn it-tikkettar ta’ ikel ippakkjat bil-lest jipprevedi d‑dikjarazzjoni obbligatorja dwar in-nutrizzjoni msemmija fil-paragrafu 1, l-informazzjoni li ġejja tista’ tiġi ripetuta fiha:

4.   B’deroga mill-Artikolu 36(1), fejn it-tikkettar tal-prodotti msemmija fl-Artikolu 16(4) jipprevedi dikjarazzjoni dwar in‑nutrizzjoni, il-kontenut ta’ dik id-dikjarazzjoni jista’ jkun limitat biss għall-valur enerġetiku.

5.   Mingħajr preġudizzju għall-Artikolu 44 u b’deroga mill-Artikolu 36(1), fejn it-tikkettar tal-prodotti msemmija fl-Artikolu 44(1) jipprovdi dikjarazzjoni dwar in-nutrizzjoni, il-kontenut ta’ dik id‑dikjarazzjoni jista’ jkun limitat biss għal:

[…]”

8.

L-Artikolu 31 tal-istess regolament, intitolat “Kalkolu”, fil‑paragrafu 3 tiegħu jipprevedi:

“Il-valur enerġetiku u l-ammonti ta’ nutrijenti msemmijin fl‑Artikolu 30(1) sa (5) għandhom ikunu dawk tal-ikel kif jinbiegħ.

Fejn adegwat, l-informazzjoni tista’ tkun marbuta mal-ikel wara l‑preparazzjoni, dejjem jekk jingħataw istruzzjonijiet dettaljati biżżejjed dwar il-preparazzjoni u l-informazzjoni tkun marbuta mal-ikel kif jiġi mħejji għall-konsum.”

9.

L-Artikolu 32 tar-Regolament Nru 1169/2011, intitolat “Espressjoni għal kull 100 g jew għal kull 100 ml”, fil-paragrafu 2 tiegħu jistipula:

“Il-valur enerġetiku u l-ammont ta’ nutrijenti msemmija fl‑Artikolu 30(1) sa (5) għandhom ikunu espressi għal kull 100 g jew għal kull 100 ml.”

10.

L-Artikolu 33 ta’ dan ir-regolament, intitolat “Espressjoni abbażi ta’ kull porzjon jew kull unità ta’ konsum”, fil-paragrafi 1 u 2 tiegħu jipprevedi:

“1.   Fil-każijiet li ġejjin, il-valur enerġetiku u l-ammont ta’ nutrijenti msemmija fl-Artikolu 30(1) sa (5) jistgħu jkunu espressi għal kull porzjon u/jew għal kull unità ta’ konsum, faċilment rikonoxxibbli mill‑konsumaturi, sakemm il-porzjon jew l-unità tkun kwantifikata fit‑tikketta u li l-għadd ta’ porzjonijiet jew unitajiet li jinsabu fil-pakkett ikun imsemmi:

2.   B’deroga mill-Artikolu 32(2), fil-każijiet imsemmijin fil-punt (b) tal-Artikolu 30(3) l-ammont ta’ nutrijenti u/jew il-perċentwal tal‑konsum referenzjali stabbilit fil-Parti B tal-Anness XIII jistgħu jkunu espressi abbażi ta’ unità għal kull porzjon jew għal kull unità tal‑konsum biss.

Meta l-ammonti tan-nutrijenti jkunu espressi fuq il-bażi ta’ kull porzjon jew ta’ kull unità ta’ konsum biss skont l-ewwel subparagrafu, il-valur enerġetiku għandu jiġi espress għal kull 100 g jew għal kull 100 ml u fuq il-bażi ta’ kull porzjon jew ta’ kull unità tal-konsum.”

11.

Dr. Oetker hija impriża tal-ikel Ġermaniża li tipproduċi u tikkummerċjalizza muesli bl-isem ta’ “Dr. Oetker Vitalis Knuspermüsli Schoko+Keks” (muesli krokkanti biċ-ċikkulata u gallettini). Il-pakkett ta’ dan il-prodott huwa magħmul minn kaxxa tal-kartun fil-forma ta’ kubu.

12.

Dan il-pakkett fih id-dikjarazzjonijiet dwar in-nutrizzjoni segwenti:

13.

Il-BVV tqis li l-ittikkettjar dwar in-nutrizzjoni tal-prodott inkwistjoni jikser id-dispożizzjonijiet dwar id-dikjarazzjoni dwar in‑nutrizzjoni previsti mir-Regolament Nru 1169/2011. Dr. Oetker allegatament kisret l-Artikolu 33 ta’ dan ir-regolament, moqri flimkien mal-Artikoli 30 u 32 tiegħu, minħabba li, fuq il-faċċata tal-pakkett tal‑prodott inkwistjoni, il-valur enerġetiku huwa indikat mhux skont il‑porzjon tal-prodott kif jinbiegħ (jiġifieri 1880 kJ), iżda biss skont il‑porzjon tal-prodott wara l-preparazzjoni (jiġifieri 872 kJ). Minħabba f’hekk, il-BVV intimat lil Dr. Oetker u talbet, essenzjalment, li din tal‑aħħar tintrabat li tastjeni, suġġett għal klawżola penali.

14.

Peress li din l-intimazzjoni baqgħet mingħajr effett, il-BVV ippreżentat rikors quddiem il-Landgericht Bielefeld (il-Qorti Reġjonali ta’ Bielefeld, il-Ġermanja) li, wara li laqgħet dan ir-rikors, permezz ta’ sentenza tat‑8 ta’ Awwissu 2018, iddeċidiet, minn naħa waħda, li l-ittikkettajr fuq il-faċċata tal-pakkett tal-prodott inkwistjoni, li ma kienx jindika l-valur enerġetiku għal kull porzjon tal-prodott kif jinbiegħ, ma kienx konformi mat-tieni subparagrafu tal-Artikolu 33(2) tar‑Regolament Nru 1169/2011 u, min-naħa l-oħra, li t-tieni subparagrafu tal-Artikolu 31(3) ta’ dan ir-regolament ma kienx japplika peress li “fażijiet ta’ trasformazzjoni sinjifikattivi ferm” kienu nieqsa f’dan il-każ.

15.

Wara li Dr. Oetker ippreżentat appell, l-Oberlandesgericht Hamm (il-Qorti Reġjonali Superjuri ta’ Hamm, il-Ġermanja), permezz ta’ sentenza tat‑13 ta’ Ġunju 2019, annullat din is-sentenza u ċaħdet l-appell tal-BVV.

16.

Skont din il-qorti, id-dikjarazzjoni dwar il-valur enerġetiku għal kull porzjon tal-prodott inkwistjoni wara l-preparazzjoni kienet suffiċjenti. Minn naħa, it-tieni subparagrafu tal-Artikolu 33(2) tar-Regolament Nru 1169/2011 ma kienx jirrikjedi li għandu jiġi indikat fuq il-faċċata tal-pakkett ta’ prodott tal-ikel, apparti l-informazzjoni dwar in-nutrizzjoni li kienet diġà tinstab hemm, il-valur enerġetiku tal‑prodott kif jinbiegħ. Fil-fatt, id-dikjarazzjoni obbligatorja dwar in‑nutrizzjoni, irregolata fl-Artikolu 30(1) ta’ dan ir-regolament, saret permezz ta’ indikazzjonijiet – mhux ikkontestati f’dan il-każ – li jinsabu fuq il-ġenb tal-pakkett tal-prodott inkwistjoni. Għalhekk, l-indikazzjonijiet li jinsabu fuq il-faċċata tal-pakkett kienu jikkostitwixxu, min-naħa tagħhom, informazzjoni rrepetuta fis-sens tal-Artikolu 30(3)(b) ta’ dan ir‑regolament. F’tali kuntest, fejn il-valur enerġetiku u l-ammonti ta’ nutrijenti huma espressi biss skont il-porzjon f’din l-informazzjoni rrepetuta, il-valur enerġetiku għandu, skont it-tieni subparagrafu tal‑Artikolu 33(2) tal-istess regolament ikun espress għal kull 100 g tal‑prodott tal-ikel wara l-preparazzjoni. Min-naħa l-oħra, mit-tieni subparagrafu tal-Artikolu 31(3) tar-Regolament Nru 1169/2011 jirriżulta li l-indikazzjoni tal-valur enerġetiku tista’ tingħata wkoll għall‑prodott tal-ikel wara l-preparazzjoni, bil-kundizzjoni li – bħal f’dan il-każ – il-mod ta’ preparazzjoni huwa deskritt b’mod suffiċjentement iddettaljat u li l-informazzjoni tirrigwarda l-prodott tal-ikel lest għall‑konsum. Barra minn hekk, dan ir-regolament ma jinkludix elementi insostenn tal-argument tal-Landgericht Bielefeld (il‑Qorti Reġjonali ta’ Bielefeld) li t-terminu “preparazzjoni”, fis-sens ta’ din id‑dispożizzjoni, għandu jinftiehem bħala li jinvolvi “fażijiet ta’ trasformazzjoni sinjifikattivi ferm”, bħat-tisjir jew it-tisħin.

17.

Il-BVV ippreżentat appell għal reviżjoni quddiem il‑Bundesgerichtshof (il-Qorti Federali tal-Ġustizzja, il-Ġermanja), il‑qorti tar-rinviju, mis-sentenza tal-Oberlandesgericht Hamm (il‑Qorti Reġjonali Superjuri ta’ Hamm).

18.

Skont il-qorti tar-rinviju, l-eżitu ta’ dan l-appell għal reviżjoni jiddependi b’mod partikolari fuq jekk l-Artikolu 31(3) u l‑Artikolu 33(2) tar-Regolament Nru 1169/2011 għandhomx jiġu interpretati fis-sens li huwa pprojbit, f’każ bħal dak inkwistjoni fil‑kawża prinċipali, li fuq il-faċċata tal-pakkett tissemma, għal finijiet promozzjonali, informazzjoni dwar in-nutrizzjoni għal kull porzjon tal‑prodott tal-ikel wara l-preparazzjoni, mingħajr ma jiġi indikat il-valur enerġetiku għal kull 100 g ta’ dan il-prodott tal-ikel kif jinbiegħ.

19.

Kien f’dawn iċ-ċirkustanzi li l-Bundesgerichtshof (il-Qorti Federali tal-Ġustizzja) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

20.

Il-partijiet fil-kawża prinċipali u l-Kummissjoni Ewropea ppreżentaw osservazzjonijiet bil-miktub. Il-Qorti tal-Ġustizzja ddeċidiet li tgħaddi għas-sentenza mingħajr ma tinżamm seduta għas-sottomissjonijiet orali, skont l‑Artikolu 76(2) tar-Regoli tal-Proċedura tagħha.

21.

Dawn id-domandi preliminari jirrigwardaw ir-rekwiżiti dwar l-ittikkettjar dwar in-nutrizzjoni tal-prodotti tal-ikel stabbiliti bir‑Regolament Nru 1169/2011. Fid-dawl tal-teknikalità tal‑leġiżlazzjoni inkwistjoni, inqis utili li qabel xejn tingħata ħarsa ġenerali lejn il-qafas regolatorju rilevanti (1.), sabiex jinftiehem aħjar l-ittikkettjar dwar in-nutrizzjoni tal-prodott inkwistjoni u d-domandi magħmula (2.).

22.

Il-kuntest ġuridiku li jirregola l-ittikkettjar tal-prodotti tal-ikel kien żviluppat mid-Direttiva 79/112/KEE ( 6 ), li kienet intiża sabiex tistipula regoli komuni “sabiex ikun mgħejjun il-funzjonament tas-suq komuni” [traduzzjoni mhux uffiċjali], peress li d-differenzi bejn ir-regoli nazzjonali kienu tqisu bħala ostakolu għall-moviment liberu tal-prodotti tal-ikel bejn l-Istati Membri ( 7 ). Minkejja li din id-direttiva kienet intiża prinċipalment sabiex telimina tali ostakoli, il-leġiżlatur irrikonoxxa wkoll li tali regoli għandhom ikunu bbażati “qabelxejn, fuq il-ħtieġa li konsumaturi jiġu informati u protetti” ( 8 ) [traduzzjoni mhux uffiċjali]. Din il-kunsiderazzjoni ġiet rrepetuta ( 9 ) u msaħħa ( 10 ) mid-Direttiva 2000/13, li kkodifikat u ssostitwixxiet id‑Direttiva 79/112, fejn din tal-aħħar ġiet emendata diversi drabi u b’mod sostanzjali ( 11 ).

23.

Kien biss meta l-leġiżlazzjoni dwar l-ittikkettjar ta’ prodotti tal‑ikel ġiet issimplifikata u kkodifikata f’test wieħed, jiġifieri r‑Regolament Nru 1169/2011 ( 12 ), li l-leġiżlatur tal-Unjoni ddikjara li dan ir-regolament “minbarra li jaqdi l-interessi tas-suq intern billi jissimplifika l-liġi, jiżgura ċ-ċertezza legali u jnaqqas il-piż amministrattiv, ikun ukoll ta’ benefiċċju għaċ-ċittadini billi jirrikjedi t‑tikkettar ċar, komprensibbli u leġġibbli ta’ prodotti tal-ikel” ( 13 ). Fil-fatt, l-għan ta’ dan ir-regolament ġie ddefinit bħala, b’mod partikolari, li jipprovdi “l-bażi biex jiġi assigurat livell għoli ta’ protezzjoni għall‑konsumatur b’rabta mal-informazzjoni dwar l-ikel” u li jistipula “l-mezzi biex ikun garantit id-dritt tal-konsumaturi għal informazzjoni u proċeduri għall-għoti ta’ informazzjoni dwar l-ikel” ( 14 ). F’dan il-kuntest, l-Artikolu 3(1) ta’ dan ir-regolament jistipula li wieħed mill-“għanijiet ġenerali” ta’ din il-leġiżlazzjoni huwa li “l-forniment tal‑informazzjoni dwar l-ikel għandu jsegwi livell għoli ta’ protezzjoni ta’ saħħet il-konsumaturi u tal-interessi tagħhom billi jipprovdi bażi għall-konsumaturi finali biex ikunu jistgħu jagħmlu għażliet infurmati u biex jużaw l-ikel b’mod sigur, b’mod partikolari fir-rigward ta’ konsiderazzjonijiet sanitarji, ekonomiċi, ambjentali, soċjali u etiċi” ( 15 ).

24.

Huwa għalhekk fid-dawl tal-għan oriġinali tal-funzjonament tajjeb tas-suq intern, iżda, fuq kollox, f’dan il-każ, dak tal-protezzjoni tas-saħħa tal-konsumaturi, li għandhom jiġu evalwati r-regoli dwar l‑informazzjoni dwar il-prodotti tal-ikel.

25.

Qabelxejn, għandu jiġi rrilevat li r-Regolament Nru 1169/2011 jagħmel distinzjoni bejn żewġ tipi ta’ informazzjoni: minn naħa waħda, “informazzjoni obbligatorja”, iddefinita bħala “id-dettalji rekwiżiti li għandhom jiġu provduti lill-konsumatur finali mid-dispożizzjonijiet tal‑Unjoni” ( 16 ), u, min-naħa l-oħra, l-“informazzjoni volontarja”, li, kif jindika t-terminu stess, hija mogħtija fuq bażi volontarja ( 17 ).

26.

L-informazzjoni obbligatorja sservi biex il-konsumaturi jkunu jistgħu jidentifikaw u jagħmlu użu adattat tal-ikel u biex jagħmlu għażliet li jaqblu mal-bżonnijiet tad-dieta tagħhom individwali ( 18 ). Id‑dispożizzjonijiet iddettaljati li jirregolaw din l-informazzjoni obbligatorja jinsabu fil-Kapitolu IV tar-Regolament Nru 1169/2011 ( 19 ). Il-lista tal-informazzjoni li għandha tidher b’mod obbligatorju fuq il‑prodotti tal-ikel hija stabbilita fl-Artikolu 9(1) ta’ dan ir-regolament u fiha, fost it-tipi differenti ta’ informazzjoni, taħt il-punt l), “dikjarazzjoni ta’ nutrizzjoni”. Din għandha tkun konformi mad‑dispożizzjonijiet speċjali tat-Taqsima 3 tal-Kapitolu IV u, b’mod partikolari, mal-Artikoli 29 sa 35 tal-imsemmi regolament ( 20 ).

27.

L-informazzjoni volontarja sservi b’mod partikolari sabiex tippermetti lill-produtturi li jixtiequ jiġbdu l-attenzjoni tal-konsumaturi għall-kwalitajiet tal-prodott tagħhom ( 21 ) jew jgħinu lill-konsumaturi jaraw faċilment, meta jixtru l-prodotti tal-ikel, l-informazzjoni essenzjali dwar in-nutrizzjoni, billi jirrepetu fil-linja viżiva ewlenija, l‑elementi l-iktar importanti tal-informazzjoni obbligatorja dwar in‑nutrizzjoni ( 22 ). Minkejja din in-natura fakultattiva, il-leġiżlatur tal‑Unjoni qies li tali indikazzjonijiet għandhom josservaw ukoll kriterji armonizzati ( 23 ). Ir-raġunijiet ta’ tali armonizzazzjoni jvarjaw skont it-tip ta’ informazzjoni volontarja. Pereżempju, fir-rigward tar-repetizzjoni tal-informazzjoni dwar in-nutrizzjoni, jekk tingħata l-għażla libera dwar l-informazzjoni li tista’ tiġi rrepetuta, il-konsumaturi jistgħu jiġu konfużi ( 24 ), jew żgwidati ( 25 ).

28.

Għal dawn ir-raġunijiet, il-preżentazzjoni ta’ informazzjoni volontarja ġiet ukoll armonizzata. Għalkemm dan l-aspett tal-ittikkettjar huwa prinċipalment irregolat mid-dispożizzjonijiet tal-Kapitolu V tar‑Regolament Nru 1169/2011, intitolat “Informazzjoni volontarja dwar l-ikel”, dawn jirreferu għad-dispożizzjonijiet tal-Kapitolu IV, kif ukoll għall-Kapitolu III, u b’mod partikolari għall-Artikolu 7 ta’ dan ir‑regolament, li jsemmi l-“prassi ġusta dwar l-informazzjoni”. Fil-fatt, l-informazzjoni dwar il-prodotti tal-ikel li tingħata fuq bażi volontarja, minn naħa waħda, għandha tissodisfa r-rekwiżiti stabbiliti għall‑informazzjoni obbligatorja tat-taqsimiet 2 u 3 tal-Kapitolu IV, jiġifieri d-“dispożizzjonijiet dettaljati” u d-dispożizzjonijiet relatati mad-“dikjarazzjoni ta’ nutrizzjoni” ( 26 ) u, min-naħa l-oħra, ma għandhiex tqarraq bil-konsumaturi, ma għandhiex tkun ambigwa jew li toħloq konfużjoni għall-konsumatur u għandha, fejn ikun il-każ, tkun ibbażata fuq id-data xjentifika rilevanti ( 27 ).

29.

Fost id-dettalji obbligatorji msemmija fl-Artikolu 9(1) tar‑Regolament Nru 1169/2011 hemm id-“dikjarazzjoni ta’ nutrizzjoni” ( 28 ). It-teknikalità tar-regoli relatati mad-“dikjarazzjonijiet dwar in-nutrizzjoni”, li huma magħrufa wkoll taħt l-isem “tikkettar dwar in‑nutrizzjoni” ( 29 ), hija enfasizzata mill-fatt li hija l-unika waħda li għandha ddedikata għaliha taqsima sħiħa tal-Kapitolu IV ta’ dan ir-regolament, jiġifieri t‑taqsima 3 ( 30 ), li tikkodifika, essenzjalment, id-dispożizzjonijiet tad‑Direttiva 90/496.

30.

Dawn id-dispożizzjonijiet iddettaljati tat-taqsima 3 jirregolaw il‑kontenut ta’ dawn id-dikjarazzjonijiet, il-preżentazzjoni tagħhom, u l‑kalkolu tal-valur enerġetiku. Huma preċiżament dawn ir-regoli li huma inkwistjoni fil-kawża prinċipali.

31.

Fl-ewwel lok, fir-rigward tar-regoli relatati mal-kontenut tal-ittikkettjar dwar in-nutrizzjoni, ir-Regolament Nru 1169/2011 jagħmel distinzjoni bejn id-dikjarazzjonijiet dwar in-nutrizzjoni “obbligatorji” u “repetuti”, peress li dawn tal-aħħar jikkostitwixxu kategorija speċifika ta’ dettalji volontarji ( 31 ).

32.

Minn naħa waħda, skont l-Artikolu 30(1) ta’ dan ir-regolament, id-dikjarazzjoni obbligatorja dwar in-nutrizzjoni għandha tinkludi l‑valur enerġetiku u l-ammont ta’ xaħam, saturati, karboidrati, zokkor, proteini u melħ.

33.

Min-naħa l-oħra, skont l-Artikolu 30(3) tal-imsemmi regolament, minbarra d-dikjarazzjoni obbligatorja dwar in-nutrizzjoni u meta l-ittikkettjar jirrigwarda prodott tal-ikel ippakkjat bil-lest, l-operatur tas‑settur tal-ikel jista’ jagħżel li jirrepeti kemm il-valur enerġetiku tal‑prodott tal-ikel [taħt a)], kif ukoll l-elementi l-oħra kollha l-iktar importanti inklużi fid-dikjarazzjoni obbligatorja dwar in-nutrizzjoni ( 32 ), jiġifieri l-elementi kollha ta’ din id-dikjarazzjoni bl-eċċezzjoni tal‑karobidrati u tal-proteini [taħt b)]. L-għan ta’ din il-possibbiltà li jiġu rrepetuti dawn id-dettalji huwa sabiex il-konsumaturi jiġu mgħejjuna jivviżwalizzaw b’mod faċli, waqt ix-xiri tal-prodotti tal-ikel, l‑informazzjoni essenzjali dwar in-nutrizzjoni ( 33 ).

34.

Fit-tieni lok, fir-rigward tar-regoli relatati mal-preżentazzjoni tal-ittikkettjar dwar in-nutrizzjoni, mid-dispożizzjonijiet tar-Regolament Nru 1169/2011 jirriżulta li d-dikjarazzjonijiet obbligatorji għandhom jidhru, bħal wara kollox id-dettalji l-oħra obbligatorji, f’post li jidher, b’tali mod li jkunu jidhru faċilment u jinqraw sew ( 34 ). Barra minn hekk, dikjarazzjoni obbligatorja dwar in-nutrizzjoni għandha tkun fl-istess linji viżivi – li huma ddefiniti bħala “l-uċuh kollha ta’ pakkett li jistgħu jinqraw minn naħa waħda” ( 35 ) – f’format ċar u, jekk l-ispazju jippermetti, f’format tabulari bin-numri allinjati ( 36 ).

35.

Min-naħa tagħhom, id-dikjarazzjonijiet volontarji rrepetuti, bħad‑dettalji l-oħra volontarji, ma għandhomx jintwerew għad‑detriment tal-ispazju disponibbli għall-informazzjoni obbligatorja ( 37 ). Fil-prattika, bħal f’dan il-każ, huma normalment ikunu ppreżentati fil-linji viżivi prinċipali (in-naħa ta’ quddiem tal-pakkett) ( 38 ), bl-użu ta’ daqs tat-tipa previst f’dan ir-rigward ( 39 ).

36.

Fit-tielet lok, fir-rigward tal-metodu ta’ kalkolu tal-valur enerġetiku u tal-ammonti ta’ nutrijenti tad-dikjarazzjonijiet dwar in‑nutrizzjoni, skont l-Artikolu 32(2) tar-Regolament Nru 1169/2011, din l-informazzjoni għandha, bħala regola, tkun espressa għal kull 100 g jew 100 ml. Ir-raġuni wara din ir-regola hija għaliex il-konsumatur għandu jkun f’pożizzjoni li jqabbel l-informazzjoni dwar in-nutrizzjoni ta’ prodotti simili ppreżentati f’pakketti ta’ daqsijiet differenti ( 40 ) u din tapplika irrispettivament min-natura obbligatorja jew fakultattiva tad‑dikjarazzjoni dwar in-nutrizzjoni, peress li din id-dispożizzjoni tkopri, b’mod partikolari, id-dikjarazzjonijiet dwar in-nutrizzjoni magħmula skont l-Artikolu 30(1) u (3) ta’ dan ir-regolament. Barra minn hekk, id-dikjarazzjonijiet dwar in-nutrizzjoni huma relatati, bħala regola, mal-ikel “kif jinbiegħ” ( 41 ), jew, “fejn adegwat”, mal-ikel “wara l‑preparazzjoni”, bil-kundizzjoni li tingħata informazzjoni ddettaljata biżżejjed dwar il-preparazzjoni u l-informazzjoni tkun marbuta mal-ikel kif imħejji għall-konsum ( 42 ).

37.

Fid-dawl tal-kunsiderazzjonijiet preċedenti, inqis li għandhom jingħataw il-kjarifiki segwenti relatati mal-ittikkettjar dwar in-nutrizzjoni tal-prodott inkwistjoni.

38.

Qabel xejn, għandu jiġi kkonstatat li d-domandi preliminari ma jirrigwardawx id-dikjarazzjoni obbligatorja dwar in-nutrizzjoni. Il‑partijiet fil-kawża prinċipali jaqblu li din hija kompletament konformi mad-dispożizzjonijiet tar-Regolament Nru 1169/2011. Fil-fatt, l-ittikkettjar obbligatorju dwar in-nutrizzjoni li jinsab fuq il-pakkett tal‑prodott inkwistjoni, minn naħa waħda, jinkludi l-valur enerġetiku ( 43 ) u l-ammont ta’ xaħam, saturati, karboidrati, zokkor, proteini u melħ ( 44 ) u min-naħa l-oħra, jippreżenta din l-informazzjoni fl-istess linji viżivi ( 45 ), jiġifieri fil-ġenb tal-pakkett, f’format tabulari ( 46 ).

39.

Sussegwentement, fir-rigward tad-dikjarazzjoni rrepetuta dwar in‑nutrizzjoni, nirrileva li l-partijiet fil-kawża prinċipali jaqblu li, fir‑rigward ta’ prodott tal-ikel ippakkjat bil-lest li l-pakkett tiegħu jinkludi dikjarazzjoni obbligatorja ta’ nutrizzjoni, il-valur enerġetiku u l‑ammonti ta’ xaħam, saturati, zokkor u melħ, jistgħu jiġu rrepetuti, fuq bażi volontarja, fuq in-naħa ta’ quddiem tal-pakkett ( 47 ), f’format differenti minn dak tad-dikjarazzjoni obbligatorja dwar in-nutrizzjoni ( 48 ). Il-konformità mad-dispożizzjonijiet tar-Regolament Nru 1169/2011 hija kkontestata biss fir-rigward tal-kalkolu u tal-espressjoni tal-valur enerġetiku kif ukoll tal‑ammonti ta’ nutrijenti li jinsabu fid-dikjarazzjoni rrepetuta dwar in‑nutrizzjoni fuq in-naħa ta’ quddiem tal-pakkett u l-kawża tirrigwarda b’mod partikolari l-punt dwar jekk din id-dikjarazzjoni rrepetuta tistax tirreferi biss għall-prodott tal-ikel wara l-preparazzjoni.

40.

Permezz tal-ewwel domanda tagħha, il-qorti tar-rinviju tistaqsi, essenzjalment, jekk it-tieni subparagrafu tal-Artikolu 31(3) tar‑Regolament Nru 1169/2011 għandux jiġi interpretat fis-sens li din id-dispożizzjoni tapplika biss għall-ikel li, sabiex jiġi kkonsmat, hija meħtieġa preparazzjoni u li għalih huwa preskritt metodu wieħed ta’ preparazzjoni.

41.

Din id-domanda hija rilevanti għad-deċiżjoni ta’ din il-kawża għaliex, kif tosserva l-qorti tar-rinviju, il-prodott inkwistjoni jista’ jiġi ppreparat b’modi differenti, jiġifieri, biż-żieda ta’ ħalib, ta’ jogurt jew ta’ ġobon abjad, ta’ meraq tal-frott, kif ukoll ta’ frott, ġamm jew għasel.

42.

Fi kliem ieħor, il-Qorti tal-Ġustizzja hija mitluba tiddeċiedi jekk, meta jkun hemm diversi modi ta’ preparazzjoni ta’ prodott tal-ikel, jekk ikun il-każ permezz ta’ ingredjenti differenti, id-dikjarazzjonijiet dwar in-nutrizzjoni li huma rrepetuti fuq bażi volontarja fuq in-naħa ta’ quddiem tal‑pakkett jistgħux jirrelataw biss ma’ wieħed minn dawn il-modi ta’ preparazzjoni.

43.

Skont it-tieni subparagrafu tal-Artikolu 31(3) tar-Regolament Nru 1169/2011, huwa possibbli, “[f]ejn adegwat”, li tingħata l‑informazzjoni dwar in-nutrizzjoni għall-“ikel wara l-preparazzjoni”, minflok li tingħata għall-ikel “kif jinbiegħ” ( 49 ), “dejjem jekk jingħataw istruzzjonijiet dettaljati biżżejjed dwar il-preparazzjoni u l‑informazzjoni tkun marbuta mal-ikel kif jiġi mħejji għall-konsum”. Din id-dispożizzjoni tirriproduċi testwalment il-kliem tal-Artikolu 6(4) tad-Direttiva 90/496.

44.

Qabel xejn, nirrileva li l-interpretazzjoni ta’ din id-dispożizzjoni għandha tinstab billi jittieħdu inkunsiderazzjoni mhux biss il-kliem tagħha iżda wkoll il-kuntest tagħha u l-għan li għandu jintlaħaq mil-leġiżlazzjoni inkwistjoni ( 50 ).

45.

Fl-ewwel lok, fir-rigward tat-termini tat-tieni subparagrafu tal‑Artikolu 31(3) tar-Regolament Nru 1169/2011, nikkonstata, bħall‑qorti tar-rinviju, li l-kliem ta’ din id-dispożizzjoni ma jipprovdu l-ebda element li jista’ jagħti risposta ċara u inekwivoka. Fil-fatt, l-uniċi konstatazzjonijiet li jistgħu jsiru minn interpretazzjoni letterali huma s‑segwenti.

46.

L-ewwel nett, l-espressjoni “l-ikel wara l-preparazzjoni” tippresupponi li l-prodott tal-ikel imsemmi fit-tieni subparagrafu tal‑Artikolu 31(3) tar-Regolament Nru 1169/2011 jista’ jkun ippreparat. Għalhekk, din id-dispożizzjoni ma tirrigwardax prodotti tal-ikel li ma għandhom bżonn l-ebda preparazzjoni biex jiġu kkonsmati (per eżempju, blokka taċ-ċikkulata). F’dan il-każ, il-muesli jista’ wkoll jiġi kkonsmat mingħajr ebda preparazzjoni. B’hekk, jista’ jiġi sostnut li l‑muesli ma huwiex prodott tal-ikel li jaqa’ taħt din id-dispożizzjoni, inkwantu din tal-aħħar tkopri biss il-prodotti tal-ikel li, sabiex jiġu kkonsmati, jeħtieġu neċessarjament li jiġu ppreparati. Madankollu, tali approċċ ristrett ma jirriżultax b’mod evidenti mill-kliem tal-istess dispożizzjoni. Fil-fatt, la l-metodu ta’ preparazzjoni u lanqas l‑importanza ta’ dan tal-aħħar ma huma determinanti għall-applikabbiltà ta’ din id-dispożizzjoni.

47.

It-tieni nett, nosserva li l-użu tal-espressjoni “fejn adegwat”, li biha jibda t-tieni subparagrafu tal-Artikolu 31(3) tar-Regolament Nru 1169/2011 turi li din id-dispożizzjoni ma tkoprix il-prodotti tal-ikel kollha li, sabiex jiġu kkonsmati, jistgħu jiġu ppreparati, b’tali mod li l‑informazzjoni dwar in-nutrizzjoni preskritta bis-saħħa ta’ din id‑dispożizzjoni ma għandhiex tingħata b’mod obbligatorju.

48.

It-tielet nett, il-kundizzjoni li “jingħataw istruzzjonijiet dettaljati biżżejjed dwar il-preparazzjoni” tista’ tiffavorixxi l-applikazzjoni tat‑tieni subparagrafu tal-imsemmi Artikolu 31(3) irrispettivament min-numru ta’ metodi ta’ preparazzjoni ta’ prodott tal‑ikel, peress li din il-kundizzjoni tagħmel inqas sens jekk din id‑dispożizzjoni tapplika biss għall-prodotti tal-ikel li għalihom jeżisti biss metodu wieħed ta’ preparazzjoni. Anki jekk din id-deskrizzjoni hija inqas essenzjali meta jkun hemm biss metodu wieħed ta’ preparazzjoni ta’ prodott tal-ikel, fid-dawl tal-għan ta’ informazzjoni tal-konsumatur, inqis li tali deskrizzjoni hija madankollu ġġustifikata, sa fejn hija neċessarja għal użu tajjeb tal-prodott.

49.

Fit-tieni lok, mill-kuntest tat-tieni subparagrafu tal-Artikolu 31(3) tar-Regolament Nru 1169/2011 jirriżulta li l-kunċett ta’ “ikel wara l‑preparazzjoni” jinkludi, bħala regola, l-“ikel kollu intiż għall‑konsumatur finali” ( 51 ). Minkejja li dan ir-regolament għandu japplika mingħajr preġudizzju għar-rekwiżiti ta’ ttikkettjar previsti minn dispożizzjonijiet speċifiċi tal-Unjoni applikabbli għal ikel partikolari ( 52 ), ma kienet adottata l-ebda dispożizzjoni partikolari fir-rigward tal‑informazzjoni relatata mal-kalkolu u mal-preżentazzjoni tad‑dikjarazzjonijiet dwar in-nutrizzjoni li jinsabu fuq in-naħa ta’ quddiem tal‑pakkett ( 53 ). Barra minn hekk, ninnota li r-Regolament Nru 1169/2011 ma jinkludix element insostenn tal-argument li t-terminu“preparazzjoni” fis-sens ta’ dan ir-regolament, għandu jinftiehem biss fis-sens ta’ “fażijiet ta’ trasformazzjoni sinjifikattivi ferm”, bħas-sajrien u t-tisħin, peress li dan it-terminu la huwa ddefinit u lanqas deskritt f’dan ir‑regolament.

50.

Minn dan jirriżulta li l-interpretazzjonijiet letterali u kuntestwali ma humiex konklużivi fir-rigward tal-kwistjoni dwar jekk it-tieni subparagrafu tal-Artikolu 31(3) tar-Regolament Nru 1169/2011 ikoprix biss il-prodotti tal-ikel li għalihom huwa ddeterminat minn qabel mod wieħed ta’ preparazzjoni jew ikoprix ukoll il-prodotti tal-ikel – bħall‑muesli – li jistgħu jiġu ppreparati b’modi differenti, b’mod partikolari permezz ta’ ingredjenti addizzjonali. Għalhekk huwa biss permezz ta’ interpretazzjoni teleoloġika li jistgħu jinstabu elementi ta’ risposta, u b’mod partikolari s-sens li għandha tingħata lill-espressjoni “fejn adegwat”, li mingħajr dubju tagħti marġni ta’ diskrezzjoni ġuridiku.

51.

Għalhekk, fit-tielet lok, fir-rigward tal-għan li għandu jintħalaq mit-tieni subparagrafu tal-Artikolu 31(3) tar-Regolament Nru 1169/2011, nirrileva qabel xejn li dan għandu jiġi evalwat fir‑rigward kemm tal-għan ta’ din id-dispożizzjoni kif ukoll tal-għanijiet tal-leġiżlazzjoni inkwistjoni, u b’mod partikolari dak li jippermetti lill‑konsumaturi jagħmlu għażliet informati u jużaw l-ikel b’mod sigur, b’mod partikolari fir-rigward ta’ kunsiderazjzonijiet sanitarji ( 54 ).

52.

Nosserva li l-għan tal-Artikolu 31 joħroġ mill-premessi 35 u 41 tar-Regolament Nru 1169/2011. Il-premessa 35 tistabbilixxi li d-dispożizzjonijiet relatati mad-dikjarazzjoni dwar in-nutrizzjoni għal kull 100 g jew 100 ml għandhom bħala għan li “jiġi ffaċilitat it-tqabbil ta’ prodotti f’daqsijiet ta’ pakkett differenti”. Din il-premessa tispjega, barra minn hekk, li d-“dikjarazzjonijiet addizzjonali skont il-porzjon” huma permissibbli, “minbarra [d-dikjarazzjoni espressa] […] għal kull 100 g jew 100 ml”, “jekk ikun xieraq”, “[meta] l-ikel ikun ippakkjat bil-lest u jiġu identifikati porzjonijiet jew unitajiet ta’ konsum individwali”.

53.

Il-premessa 41 ta’ dan ir-regolament tipprevedi li informazzjoni dwar in-nutrizzjoni mogħtija għandha “tkun sempliċi u faċilment komprensibbli […] [s]abiex tattira lill-konsumatur medju u sabiex isservi l-għan informattiv li għalih iddaħħlet” u li “fuq bażi volontarja, l-elementi l-iktar importanti tal-informazzjoni dwar in‑nutrizzjoni jistgħu jkunu ripetuti fil-linja viżiva ewlenija, sabiex il‑konsumaturi jiġu megħjuna jaraw faċilment l-informazzjoni essenzjali dwar in-nutrizzjoni meta jixtru l-ikel”.

54.

Huwa preċiżament fir-rigward ta’ dawn iż-żewġ għanijiet, li huma marbuta mill-qrib – jiġifieri li jiġi ffaċilitat il-paragun tal-prodotti tal-ikel u li tingħata informazzjoni lill-konsumaturi – li jistgħu jiġu applikati (u tiġi spjegata r-relazzjoni bejn) iż-żewġ subparagrafi tal‑Artikolu 31(3) tar-Regolament Nru 1169/2011.

55.

L-ewwel nett, sabiex jiġi ffaċilitat il-paragun tal-valur enerġetiċi u tal-ammonti ta’ nutrijenti, bħala regola dawn għandhom ikunu relatati mal-istat tal-prodott tal-ikel kif jinbiegħ (l-ewwel subparagrafu). Meta prodott tal-ikel ikun lest għall-konsum biss wara preparazzjoni li timplika ż-żieda ta’ ingredjenti oħra, sabiex tiffaċilita l-paragun ma’ prodott korrispondenti ta’ produttur ieħor, id-dikjarazzjoni dwar in‑nutrizzjoni tista’ tagħmel riferiment għall-prodott tal-ikel wara l‑preparazzjoni (it-tieni subparagrafu).

56.

Madankollu, f’dan it-tieni każ, jekk prodott tal-ikel jista’ jiġi ppreparat b’modi differenti, l-informazzjoni relatata mal-valur enerġetiku u mal-ammonti ta’ nutrijenti tal-prodott tal-ikel wara l-preparazzjoni, li hija relatata mal-preparazzjoni ssuġġerita mill-produttur, ġeneralment ma tippermettix il-paragun ma’ prodotti korrispondenti ta’ produtturi oħra, li għalihom id-dikjarazzjoni dwar in-nutrizzjoni tista’ tkun ibbażata fuq mod ta’ preparazzjoni differenti.

57.

Bħala eżempju, f’dan il-każ, huwa stabbilit li l-muesli jista’ jiġi ppreparat b’modi differenti, billi jintużaw ingredjenti addizzjonali li l‑kontenut ta’ zokkor jew ta’ xaħam tagħhom jista’ jkun differenti. Dikjarazzjoni dwar in-nutrizzjoni bbażata fuq proposta ta’ preparazzjoni partikolari – bħal, f’dan il-każ, iż-żieda ta’ 60 ml ta’ ħalib li fih 1.5 % ta’ xaħam – għalhekk tikkostitwixxi biss waħda mill-varjanti possibbli, li ma tagħtix indikazzjoni ġenerali fuq il-valuri nutrizzjonali tal-prodott lest għall-konsum u ma tippermettix, f’dak li jirrigwarda l-valuri nutrizzjonali, li jsir paragun mal-prodotti ekwivalenti ta’ produtturi oħra, b’mod partikolari għaliex ir-rapport bejn il-kwantità tal‑prodott tal-ikel u dik tal-ingredjent addizzjonali, fir-realtà, ikun stabbilit b’mod liberu skont il-gosti tal-konsumatur.

58.

Minn dan isegwi, minn naħa waħda, li kalkolu eventwali tal‑valur enerġetiku u tal-ammonti ta’ nutrijenti ta’ prodott li jista’ jiġi ppreparat b’mod differenti, bħala definizzjoni, ikun arbitrarju u jvarja skont il-mod ta’ preparazzjoni u, min-naħa l-oħra, għall-kuntrarju, il‑komparabbiltà tal-valur enerġetiku u tal-ammonti ta’ nutrijenti ta’ tali prodott tista’ tiġi żgurata biss skont l-informazzjoni relatata mal-prodott tal-ikel kif jinbiegħ, skont l-ewwel subparagrafu taArtikolu 31(3) tar‑Regolament Nru 1169/2011.

59.

Jekk jiġi konkluż, abbażi tal-għan tal-komparabbiltà, li l-prodotti tal-ikel li jistgħu jiġu ppreparati b’mod differenti għandhom jiġu esklużi mill-kamp ta’ applikazzjoni tat-tieni subparagrafu tal-Artikolu 33(2) tar‑Regolament Nru 1169/2011, għad irid jiġi stabbilit liema huma l‑prodotti li jeħtieġu preparazzjoni li għalihom tapplika din id‑dispożizzjoni.

60.

F’dan ir-rigward, abbażi ta’ interpretazzjoni a contrario, il‑prodotti tal-ikel eżaminati hawn fuq jiddistingwu ruħhom minn dawk li ma jistgħux jingħataw lesti għall-konsum ħlief permezz ta’ mod wieħed ta’ preparazzjoni ddeterminat minn qabel, bħal dak tas-soppa tat-trab, li għaliha l-volum ta’ ilma li għandu jiżdied u t-tul tas-sajrien huma ddeterminati minn qabel fil-kuntest ta’ mod wieħed ta’ preparazzjoni, tat-trab għal pudina, jew inkella tal-prodotti lesti (pereżempju r-ravjul). Dak li jikkaratterizza dawn il-prodotti tal-ikel huwa li dawn ma jistgħux raġonevolment jiġu ppreparati għall-konsum ħlief bl-uniku mod indikat, li jippermetti paragun dirett mal-prodotti tal-ikel simili. Ċertament, tali paragun mhux dejjem ikun abbażi ta’ ekwivalenza perfetta, b’mod partikolari, għaliex il-valuri nutrizzjonali tal-ingredjenti addizzonali jistgħu jvarjaw. Madankollu, l-element arbitrarju ta’ tali paragun jidhirli li huwa ċertament limitat.

61.

It-tieni nett, mill-perspettiva tal-għan informattiv tad‑dikjarazzjonijiet dwar in-nutrizzjoni, mill-Artikolu 7(1) tar‑Regolament Nru 1169/2011 jirriżulta li l-informazzjoni relatata mal‑prodotti tal-ikel ma għandhiex tiżgwida lill-konsumatur, b’mod partikolari dwar il-karatteristiċi tal-prodott tal-ikel u, b’mod partikolari, dwar in-natura u l-kwalitajiet tiegħu ( 55 ). Il-paragrafu 2 ta’ din id‑dispożizzjoni jipprevedi li l-“informazzjoni dwar l-ikel għandha tkun preċiża, ċara u faċilment komprensibbli għall-konsumatur” ( 56 ).

62.

F’dan ir-rigward, minn naħa waħda, nikkonstata li, mill‑perspettiva tal-għan informattiv, fid-dawl tan-natura arbitrarja u varjabbli tal-kalkolu tal-valuri nutrizzjonali hawn fuq imsemmija, ma huwiex faċli li jiġi stabbilit kif, f’dan il-każ, il-preżentazzjoni ta’ informazzjoni rrepetuta dwar in-nutrizzjoni tirrelata mal-prodott tal-ikel wara l-preparazzjoni hija utli għall-konsumatur, iktar u iktar peress li, id-dikjarazzjoni obbligatorja dwar in-nutrizzjoni tiġi relegata viżwalment f’livell inqas. Barra minn hekk, sabiex jiġi żgurat livell għoli ta’ protezzjoni tal-konsumaturi fil-qasam tal-informazzjoni, skont differenzi fil-perċezzjoni tal-konsumaturi ( 57 ), kif il-Qorti tal-Ġustizzja rrilevat, l-informazzjoni relatata mal-prodotti tal-ikel għandha tkun korretta, newtrali u oġġettiva ( 58 ). Dan ma jkunx il-każ jekk il-produtturi tal-ikel li jista’ jiġi ppreparat b’mod differenti jagħżlu l-forma li l-iktar li jaqblilhom, b’mod partikolari dik li turi l-valur enerġetiku l-iktar baxx. Din hija proċedura li la hija newtrali u lanqas oġġettiva.

63.

Min-naħa l-oħra, dikjarazzjoni fakultattiva dwar in-nutrizzjoni li ma tindikax, fid-dikjarazzjoni rrepetuta dwar in-nutrizzjoni, il-valur enerġetiku għal kull 100 g tal-ikel kif jinbiegħ tista’ tiżgwida lill‑konsumaturi, minkejja l-fatt li dan jidher fid-dikjarazzjoni obbligatorja dwar in-nutrizzjoni, b’mod partikolari meta l-produtturi l‑oħra jippreżentaw b’mod sistematiku, fid-dikjarazzjoni rrepetuta dwar in‑nutrizzjoni, il-valur enerġetiku għal kull 100 g tal-prodott kif jinbiegħ. Fil-fatt, f’każ bħal dan, jistgħu jiġu pperċepiti diverġenzi sinjifikattivi bejn il-valuri. B’mod indikattiv, ninnota li l-valur enerġetiku tal-prodott inkwistjoni għall-porzjon tal-prodott kif jinbiegħ huwa ta’ 1880 kJ filwaqt li dak tal-porzjon tal-prodott wara l‑preparazzjoni huwa ta’ 872 kJ.

64.

Bħala regola, ma hijiex il-Qorti tal-Ġustizzja, fil-kuntest tat‑tqassim tal-ġurisdizzjoni bejn il-qrati nazzjonali u l-Unjoni, li għandha tiddeċiedi fuq il-kwistjoni dwar jekk l-ittikkettjar ta’ ċerti prodotti huwiex ta’ natura li jiżgwida lill-konsumatur jew li tiddeċiedi dwar in-natura eventalment qarrieqa ta’ dikjarazzjoni dwar in‑nutrizzjoni. Hija l-qorti tar-rinviju li għandha tipproċedi b’eżami tal‑elementi differenti li jiffurmaw l-ittikkettjar sabiex jiġi stabbilit jekk tali konsumatur jistax jiġi żgwidat fir-rigward tal-valuri nutrizzjonali tal-prodott inkwistjoni. Madankollu, il-Qorti tal‑Ġustizzja, meta tiddeċiedi dwar rinviju għal deċiżjoni preliminari, tista’, jekk ikun il‑każ, tagħmel preċiżazzjonijiet intiżi sabiex jiggwidaw lill-qorti nazzjonali fid-deċiżjoni tagħha ( 59 ).

65.

F’dan ir-rigward, qabel xejn, sabiex tiġi evalwata l-kapaċità tal-ittikkettjar li tqarraq lix-xerrej, il-qorti nazzjonali għandha essenzjalment tibbaża ruħha fuq il-preżunti aspettattivi, fir-rigward ta’ dan l-ittikkettjar, ta’ konsumatur medju, normalment informat, u raġonevolment attent u avżat fir-rigward, b’mod partikolari tal-kwalità marbuta mal-prodott, fejn l-essenzjali huwa li l-konsumatur ma jiġix imqarraq u li ma jitwassalx li jikkunsidra, b’mod żbaljat, li l-prodott għandu, fost l-oħrajn, kwalità differenti minn dik li fil-fatt hija fir‑realtà ( 60 ).

66.

Sussegwentement, peress li l-għan li jiġu rrepetuti d‑dikjarazzjonijiet dwar in-nutrizzjoni fuq in-naħa ta’ quddiem tal-pakkett huwa preċiżament sabiex il-konsumaturi jiġu mgħejjuna jaraw faċilment, fil‑mument tax-xiri, l-informazzjoni dwar in-nutrizzjoni essenzjali, għandu jiġi preżunt li konsumatur medju l-ewwel jaqra l-informazzjoni rrepetuta dwar in-nutrizzjoni fuq in-naħa ta’ quddiem tal-pakkett iktar milli l‑informazzjoni obbligatorja fil-ġenb ( 61 ).

67.

Finalment, għandu jiġi kkunsidrat il-fatt li l-produtturi tal-ikel għandhom interess juru kemm jista’ jkun il-prodotti tagħhom bħala li huma tajbin għas-saħħa fid-dikjarazzjoni dwar in-nutrizzjoni u għalhekk għandhom interess jistabilixxu valuri nutrizzjonali bħall-kontenut taz-zokkor u l-valur kalorifiku f’livell kemm jista’ jkun baxx. Fil-fatt, fil-kuntest ta’ dikjarazzjoni rrepetuta dwar in-nutrizzjoni, il-valuri nutrizzjonali tal-enerġija ta’ 100 g ta’ prodott wara l‑preparazzjoni jistgħu jkunu inqas minn dawk ta’ 100 g tal-istess prodott kif jinbiegħ, meta il-valuri nutrizzjonali tal-ingredjenti użati għall-preparazzjoni jkunu inqas minn dawk tal-prodott tal-ikel inkwistjoni. Għaldaqstant, jekk jiġi aċċettat li prodott tal-ikel bħall-prodott inkwistjoni jista’ jaqa’ fit-tieni subparagrafu tal-Artikolu 31(3) tar-Regolament Nru 1169/201 ikun hemm ir-riskju li l-kategorija tal-prodotti tal-ikel li jistgħu jkunu koperti b’din id-dispożizzjoni jikber. Tali tkabbir ma jkunx opportun, sa fejn din id-dispożizzjoni, li normalment tikkostitwixxi eċċezzjoni, tkun tista’ ssir ir-regola, meta prodott tal-ikel jista’ jiġi ppreparat b’mod jew ieħor.

68.

Fid-dawl tal-kunsiderazzjonijet preċedenti, nipproponi li r‑risposta għall-ewwel domanda preliminari tkun illi t-tieni subparagrafu tal-Artikolu 31(3) tar-Regolament Nru 1169/2011 għandu jiġi interpretat fis-sens li din id-dispożizzjoni għandha tapplika biss għall‑prodotti tal-ikel li għalihom hija neċessarja preparazzjoni u li għalihom mod wieħed ta’ preparazzjoni huwa ddeterminat minn qabel.

69.

Fil-każ li l-ewwel domanda preliminari titlob risposta negattiva, il-qorti tar-rinviju tistaqsi, permezz tat-tieni domanda tagħha, essenzjalment, jekk l-espressjoni “kull 100 g”, li tinsab fit-tieni subparagrafu tal-Artikolu 33(2) tar-Regolament Nru 1169/2011 tirreferix biss għal kull 100 g tal-prodott kif jinbiegħ jew inkella, tirreferix ukoll għal kull 100 g tal-ikel wara l-preparazzjoni.

70.

Fid-dawl tar-risposta proposta għall-ewwel domanda preliminari, ma jidhirlix neċessarju li tingħata risposta għal din it-tieni domanda. L‑analiżi segwenti ser issir għalhekk b’mod sussidjarju, f’każ li l-Qorti tal-Ġustizzja tikkunsidra li huwa neċessarju li tingħata risposta.

71.

Qabel xejn, infakkar li l-ewwel subparagrafu tal-Artikolu 33(2) tar-Regolament Nru 1169/2011 jipprevedi deroga mir-regola li l‑ammonti ta’ nutrijenti għandhom jiġu espressi għal kull 100 g jew 100 ml. Skont din id-dispożizzjoni, fil-kuntest ta’ informazzjoni volontarja li tirrepeti, fil-linji viżivi prinċipali, il-valur enerġetiku, u l‑ammonti ta’ xaħam, saturati, zokkor u melħ ( 62 ), huwa possibbli li l‑ammonti ta’ dawn in-nutrijenti jiġu espressi “abbażi ta’ unità għal kull porzjoni jew għal kull unità tal-konsum biss”. Madankollu, f’tali każ, bis-saħħa tat-tieni subparagrafu ta’ din l-istess dispożizzjoni, il‑valur enerġetiku għandu, madankollu, jiġi espress kemm bħal kull 100 g jew għal kull 100 ml u għal kull porzjoni jew għal kull unità tal-konsum. Sabiex tiġi applikata din id-deroga, il-kundizzjonijiet li għalihom l-Artikolu 33(1) ta’ dan ir-regolament jissuġġetta d-dritt li l‑valuri nutrizzjonali jiġu espressi għal kull porzjoni jew għal kull unità ta’ konsum għandhom jiġu ssodisfatti, jiġifieri li “il-porzjon jew l-unità tkun kwantifikata fit-tikketta u li l-għadd ta’ porzjonijiet jew unitajiet li jinsabu fil-pakkett ikun imsemmi” ( 63 ).

72.

F’dan il-każ, jekk il-Qorti tal-Ġustizzja kellha tagħti risposta negattiva għall-ewwel domanda, dan ifisser li d-dikjarazzjonijiet irrepetuti dwar in-nutrizzjoni tal-prodott inkwistjoni jkunu permissibbli bis-saħħa tat-tieni subparagrafu tal-Artikolu 31(3) tar-Regolament Nru 1169/2011 u li Dr. Oetker tkun obbligata biss li tagħti l-informazzjoni dwar in‑nutrizzjoni msemmija fl-Artikolu 30(1) sa (5) ta’ dan ir-regolament għall-prodott tal-ikel wara l-preparazzjoni. Skont l-Artikolu 32(2) tal‑imsemmi regolament, din l-informazzjoni rrepetuta dwar in‑nutrizzjoni għandha tkun espressa għal kull 100 g jew 100 ml tal‑prodott wara l-preparazzjoni. Barra minn hekk, bis-saħħa tal‑Artikolu 33(1)(a) tal-istess regolament, Dr. Oetker tista’ tespimi wkoll il-valur enerġetiku u l-ammonti ta’ nutrijenti għal kull porzjon, skont il-kundizzjonijiet stipulati f’din id-dispożizzjoni ( 64 ) u, bis-saħħa tat-tieni subparagrafu tal-Artikolu 33(2) tar-Regolament Nru 1169/2011, tista’ tesprimi l-informazzjoni rrepetuta volontarja fuq in-naħa ta’ quddiem tal‑pakkett biss għal kull porzjon f’dak li jirrigwarda l-ammonti ta’ nutrijenti u kemm għal kull 100 g u għal kull porzjoni, f’dak li jirrigwarda l-valur enerġetiku. Finalment, għandu jitfakkar li Dr. Oetker indikat wkoll, fil-ġenb tal-pakkett, l-informazzjoni dwar in-nutrizzjoni irrapportati għal kull 100 g tal-prodott kif jinbiegħ.

73.

Irrispettivament mill-kuntest fattwali tal-kawża prinċipali, il‑kwistjoni dwar jekk l-użu tal-kliem “għal kull 100 g”, fis-sens tat‑tieni subparagrafu tal-Artikolu 33(2) tar-Regolament Nru 1169/2011, li jirreferi għall-valur enerġetiku, jirreferi biss għal kull 100 g tal‑prodott kif jinbiegħ jew inkella għal kull 100 g tal-ikel wara l‑preparazzjoni tista’ tqum fil-każ fejn id-dikjarazzjoni dwar in‑nutrizzjoni tikkonċerna l-ikel wara l-preparazzjoni, skont it-tieni subparagrafu tal‑Artikolu 31(3) ta’ dan ir-regolament.

74.

Kif tosserva l-qorti tar-rinviju, ir-risposta għal din id-domanda ma tirriżultax la mill-kliem u lanqas mill-kuntest tad-dispożizzjoni inkwistjoni. Fil-fatt, l-ebda spjegazzjoni ma tingħata fir-rigward tal-istat ta’ 100 g tal-ikel li għalih l-indikazzjoni tal-valur enerġetiku għandu jkun relatat meta l-informazzjoni dwar in-nutrizzjoni tingħata, bis-saħħa tat-tieni subparagrafu tal-Artikolu 31(3) tar-Regolament Nru 1169/2011, għall-ikel wara l-preparazzjoni. Huwa biss jekk jiġi kkunsidrat l-għan tad-dikjarazzjoni rrepetuta dwar in-nutrizzjoni li tista’ tinstab ir-risposta.

75.

B’hekk, fid-dawl tal-għan li jiġi ffaċilitat il-paragun, li huwa stipulat fil-premessa 35 tar-Regolament Nru 1169/2011 ( 65 ), nirrileva li t‑tieni subparagrafu tal-Artikolu 31(3) ta’ dan ir-regolament huwa intiż prinċiparjament sabiex jiżgura l-applikazzjoni korretta tal‑preskrizzjonijiet relatati mal-ammont ta’ riferiment ta’ 100 g jew ta’ 100 ml prevista fl-Artikolu 32(2) ta’ dan ir-regolament. L-idea li hija l-bażi ta’ din id-dispożizzjoni hija li, bħala regola ġenerali, il‑porzjonijiet la ma jiżnux 100 g u li, konsegwentement, għal paragun aħjar, jeħtieġ li tallinqas l-informazzjoni l-iktar essenzjali, dik tal-valur enerġetiku, tkun indikata għall-ammont ta’ riferiment ta’ 100 g, filwaqt li l-valuri nutrizzjonali l-oħra jistgħu jiġu rrapportati skont il-piż tal‑porzjon jekk ikunu rrepetuti, fuq il-pakkett, apparti t-tabella obbligatorja dwar in-nutrizzjoni.

76.

Fid-dawl ta’ dan l-għan, nikkunsidra li, meta l-valuri nutrizzjonali jidhru fuq in-naħa ta’ quddiem tal-pakkett għal ammont ta’ riferiment magħżul mill-produttur għall-prodott tal-ikel wara l-preparazzjoni, jista’ jitqies, sabiex tiġi żgurata ċerta kompatibbiltà, li t-tieni subparagrafu tal-Artikolu 33(2) tar-Regolament Nru 1169/2011 għandu jiġi interpretat fis-sens li hemm obbligu li jiġi indikat, fuq in-naħa ta’ quddiem tal‑pakkett, il-valur enerġetiku għal kull 100 g tal-prodott kif jinbiegħ, minbarra l-informazzjoni dwar in-nutrizzjoni relatata ma’ porzjon. Tali soluzzjoni jidhirli wkoll, fid-dawl tal-premessa 41 ta’ dan ir-regolament, l-iktar waħda “sempliċi u faċilment komprensibbli” sabiex tiġbed l-attenzjoni tal‑konsumatur medju u tissodisfa l-għan ta’ informazzjoni tad‑dikjarazzjonijiet dwar in-nutrizzjoni.

77.

Fid-dawl tal-kunsiderazzjonijiet preċedenti, nipproponi li r‑risposta għat-tieni domanda preliminari għandha tkun li t-tieni subparagrafu tal‑Artikolu 33(2) tar-Regolament Nru 1169/2011 għandu jiġi intepretat fis-sens li meta l-valur enerġetiku huwa indikat fuq il-pakkett kemm “għal kull 100 g” u “fuq il-bażi ta’ kull porzjon jew ta’ kull unità tal-konsum”, għall-ikel kif jinbiegħ u għall-ikel wara l‑preparazzjoni, għandu jiġi rrepetut il-valur enerġetiku għal kull 100 g jew għal kull 100 ml tal-ikel kif jinbiegħ.

78.

Fid-dawl tal-kunsiderazzjonijiet preċedenti, nipproponi lill-Qorti tal-Ġustizzja li tirrispondi bil-mod segwenti għad-domandi preliminari magħmula mill-Bundesgerichtshof (il-Qorti Federali tal-Ġustizzja, il‑Ġermanja):