Rikors ippreżentat fit-30 ta’ Settembru 2019 – Hasbro vs EUIPO – Kreativni Dogadaji (MONOPOLY)

(Kawża T-663/19)

(2019/C 413/70)

Lingwa tar-rikors: l-Ingliż

Partijiet

Rikorrenti: Hasbro, Inc. (Pawtucket, Rhode Island, l-Istati Uniti) (rappreżentant: J. Moss, Barrister)

Konvenut: L-Uffiċċju tal-Proprjetà Intellettwali tal-Unjoni Ewropea (EUIPO)

Parti oħra quddiem il-Bord tal-Appell: Kreativni Dogadaji d.o.o. (Żagreb, il-Kroazja)

Informazzjoni dwar il-proċedimenti quddiem l-EUIPO

Proprjetarju tat-trade mark kontenzjuża: ir-rikorrenti quddiem il-Qorti Ġenerali

Trade mark kontenzjuża kkonċernata: it-trade mark verbali tal-Unjoni “MONOPOLY” – Trade mark tal-Unjoni Ewropea Nru 9 071 961

Proċedimenti quddiem l-EUIPO: proċedimenti għal dikjarazzjoni ta’ invalidità

Deċiżjoni kkontestata: id-deċiżjoni tat-Tieni Bord tal-Appell tal-EUIPO tat-22 ta’ Lulju 2019 fil-Każ R 1849/2017-2

Talbiet

Ir-rikorrenti titlob li l-Qorti Ġenerali jogħġobha:

—	tannulla d-deċiżjoni kkontestata;

—	tikkundanna lill-EUIPO għall-ispejjeż.

Motivi invokati

—	Applikazzjoni żbaljata tal-Artikolu 59(1)(b) tar-Regolament (UE) 2017/1001 tal-Parlament u tal-Kunsill;

—	Ksur tad-dritt tar-rikorrenti għal smigħ xieraq.