Rikors ippreżentat fit-8 ta’ Lulju 2019 — Ir-Rumanija vs Il-Kummissjoni

(Kawża T-495/19)

(2019/C 288/79)

Lingwa tal-kawża: ir-Rumen

Partijiet

Rikorrenti: Ir-Rumanija (rappreżentanti: C. Canțăr, E. Gane u R. Hațieganu, aġenti)

Konvenuta: Il-Kummissjoni Ewropea

Talbiet

Ir-rikorrenti titlob li l-Qorti Ġenerali jogħġobha:

—	tannulla d-Deċiżjoni tal-Kummissjoni (UE) 2019/721 tat-30 ta’ April 2019 dwar l-inizjattiva proposta taċ-ċittadini bit-titolu “Politika ta’ koeżjoni għall-ugwaljanza bejn ir-reġjuni u għas-sostenibbiltà tal-kulturi reġjonali”;

—	tikkundanna lill-Kummissjoni għall-ispejjeż.

Motivi u argumenti prinċipali

Insostenn tar-rikors tagħha, ir-rikorrenti tinvoka żewġ motivi.

L-ewwel motiv huwa bbażat fuq ksur tal-Artikolu 4(2)(b) tar-Regolament (UE) Nru 211/2011 tal-Parlament Ewropew u tal-Kunsill tas-16 ta’ Frar 2011 dwar l-inizjattiva taċ-ċittadini, inkonnessjoni mal-kompetenzi tal-Unjoni stabbiliti mit-Trattati

—

Ir-Rumanija tqis li ma hemmx bażi legali fit-Trattati li tippermetti lill-Kummissjoni tippreżenta proposta għal att ġuridiku tal-Unjoni fis-sens previst mill-organizzaturi tal-proposta intitolata “Politika ta’ koeżjoni għall-ugwaljanza tar-reġjuni u ż-żamma ta’ kulturi reġjonali”. L-imsemmija proposta hija manifestament barra mill-isfera ta’ kompetenza tal-Kummissjoni sabiex tippreżenta proposta għal att ġuridiku tal-Unjoni bil-ħsieb li jiġu implementatai t-Trattati u ma tissodisfax il-kundizzjonijiet previsti fl-Artikolu 4(2)(b) tar-Regolament Nru 211/2011.

It-tieni motiv huwa bbażat fuq ksur tal-obbligu ta’ motivazzjoni previst fit-tieni paragrafu tal-Artikolu 296 TFUE

—

Ir-Rumanija tqis li l-obbligu ta’ motivazzjoni previst fit-tielet paragrafu tal-Artikolu 296 TFUE ma jistax ikun limitat għal informazzjoni mill-organizzaturi dwar l-elementi previsti fl-Artikolu 4(3) tar-Regolament Nru 211/2011, jiġifieri l-motivi ta’ rifjut tar-reġistrazzjoni u r-rimedji kollha miftuħa għall-imsemmija organizzaturi.

—

F’dan il-kuntest, ir-Rumanija tqis li l-motivazzjoni tad-Deċiżjoni 2019/721 hija manifestement insuffiċjenti. Motivazzjoni manifestament insuffiċjenti hija ta’ natura li tipprekludi lill-persuni kkonċernati milli jsiru jafu l-ġustifikazzjonijiet għar-reġistrazzjoni tal-proposta ta’ inizjattiva u li konsegwentement jirreaġixxu, kif ukoll li tipprekludi lill-Qorti Ġenerali tistħarreġ il-legalità ta’ din id-deċiżjoni.