Rikors ippreżentat fl-4 ta’ Lulju 2019 — Pearson Loan Finance et vs Il-Kummissjoni

(Kawża T-484/19)

(2019/C 312/23)

Lingwa tal-kawża: l-Ingliż

Partijiet

Rikorrenti: Pearson Loan Finance Unlimited (Londra, ir-Renju Unit), Pearson Overseas Holdings Ltd (Londra) u Pearson International Finance Ltd (Londra) (rappreżentanti: A. von Bonin u O. Brouwer, avukati)

Konvenuta: Il-Kummissjoni Ewropea

Talbiet

Ir-rikorrenti jitolbu li l-Qorti Ġenerali jogħġobha:

—

tannulla d-deċiżjoni tal-Kummissjoni Ewropea C(2019) 2526, tat-2 ta’ April 2019, dwar l-għajnuna mill-Istat SA.44896 implimentata mir-Renju Unit sa fejn tikkonċerna ċ-CFC Group Financing Exemption (l-eżenzjoni fuq il-finanzjament tal-gruppi fil-kuntest tar-regoli relatati mal-kumpanniji barranin ikkontrollati);

—	tikkundanna lill-konvenuta għall-ispejjeż.

Motivi u argumenti prinċipali

Insostenn tar-rikors, ir-rikorrenti jinvokaw erba’ motivi.

1.	L-ewwel motiv, ibbażat fuq żbalji ta’ liġi, fuq żbalji manifesti ta’ evalwazzjoni u fuq nuqqas ta’ motivazzjoni li jikkonċernaw id-determinazzjoni tal-qafas ta’ referenza fid-deċiżjoni kkontestata;

2.	It-tieni motiv, ibbażat fuq żbalji ta’ liġi, fuq żbalji manifesti ta’ evalwazzjoni u fuq nuqqas ta’ motivazzjoni li jikkonċernaw il-klassifikazzjoni żbaljata, fid-deċiżjoni kkontestata, tal-eżenzjoni dwar il-finanzjament tal-gruppi bħala deroga għall-funzjonament normali tal-qafas ta’ referenza.

3.	It-tielet motiv, ibbażat fuq żbalji ta’ liġi u fuq żbalji manifesti ta’ evalwazzjoni li jikkonċernaw il-konstatazzjoni, fid-deċiżjoni kkontestata, li l-eżenzjoni fuq il-finanzjament tal-gruppi tiddiskrimina ċerti operaturi ekonomiċi.

4.	Ir-raba’ motiv, ibbażat fuq żbalji ta’ liġi u fuq żbalji manifesti ta’ evalwazzjoni li jikkonċernaw il-konklużjoni tad-deċiżjoni kkontestata li l-eżenzjoni fuq il-finanzjament tal-gruppi ma hijiex iġġustifikata min-natura jew mill-istruttura tal-qafas ta’ referenza.