Rikors ippreżentat fl-4 ta’ Marzu 2019 — ZU vs Il-Kummissjoni

(Kawża T-140/19)

(2019/C 155/56)

Lingwa tal-kawża: l-Ingliż

Partijiet

Rikorrent: ZU (rappreżentant: C. Bernard-Glanz, avukat)

Konvenuta: Il-Kummissjoni Ewropea

Talbiet

Ir-rikorrent jitlob li l-Qorti Ġenerali jogħġobha:

—	tannulla, l-ewwel nett, ir-rapport ta’ evalwazzjoni tar-rikorrent tal-25 ta’ April 2018;

—	tannulla, it-tieni nett, id-deċiżjoni ta’ nuqqas ta’ promozzjoni tat-18 ta’ Ġunju 2018;

—	tannulla, it-tielet nett, id-deċiżjoni tat-28 ta’ Mejju 2018, li tiċħad it-talba għal assistenza tar-rikorrent;

—	tannulla, ir-raba’ nett, sa fejn ikun hemm bżonn, id-deċiżjoni Nru R/400/18 tal-21 ta’ Novembru 2018, li tiċħad l-ilment tar-rikorrent kontra r-rapport ta’ evalwazzjoni tiegħu u kontra d-deċiżjoni ta’ nuqqas ta’ promozzjoni;

—	tannulla, il-ħames nett, sa fejn ikun hemm bżonn, id-deċiżjoni Nru R/461/18 tal-21 ta’ Novembru 2018, li tiċħad l-ilment tar-rikorrent kontra d-deċiżjoni li tiċħad it-talba għal assistenza tiegħu.

Motivi u argumenti prinċipali

Insostenn tar-rikors tiegħu, ir-rikorrent jinvoka żewġ motivi.

1.	L-ewwel motiv, insostenn tat-talba tar-rikorrent għall-annullament tad-deċiżjoni li tiċħad it-talba għal assistenza tiegħu, ibbażat fuq żball manifest ta’ evalwazzjoni, ksur tad-dmir ta’ premura, ksur tal-prinċipju ta’ amministrazzjoni tajba, u użu ħażin ta’ poter.

2.	It-tieni motiv, insostenn tat-talba tar-rikorrent għall-annullament tar-rapport ta’ evalwazzjoni tiegħu u tad-deċiżjoni ta’ nuqqas ta’ promozzjoni, ibbażat fuq żball manifest ta’ evalwazzjoni, ommissjoni ta’ fatti rilevanti u użu ħażin ta’ poter.