1

Fil‑11 ta’ Awwissu u fl‑14 ta’ Ottubru 2017, wara żewġ ilmenti mressqa mill-koalizzjoni kontra l-importazzjonijiet mhux ekwui ta’ tajers pnewmatiċi, il-Kummissjoni Ewropea fetħet, rispettivament, proċedura antidumping u proċedura antisussidji li jikkonċernaw, kull waħda minnhom, l-importazzjonijiet fl-Unjoni Ewropea ta’ ċerti tajers ġodda jew b’wiċċ ġdid, tal-lastiku, tat-tip użat għall-karozzi tal-linja jew trakkijiet, b’indiċi ta’ piż ogħla minn 121 (iktar ’il quddiem il-“prodott ikkonċernat”) u li joriġinaw mir-Repubblika Popolari taċ-Ċina. Dawn il-proċeduri kienu nfetħu abbażi rispettivament, tal-Artikolu 5 tar-Regolament tal-Kunsill (KE) 2016/1036 tal-Parlament Ewropew u tal-Kunsill tat‑8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ĠU 2016, L 176, p. 21, iktar ’il quddiem ir-“Regolament bażiku antidumping”) u l-Artikolu 10 tar-Regolament (UE) 2016/1037 tal-Parlament Ewropew u tal-Kunsill tat‑8 ta’ Ġunju 2016 dwar il-protezzjoni kontra importazzjonijiet sussidjati minn pajjiżi li mhumiex membri tal-Unjoni Ewropea tat‑8 ta’ Ġunju 2016 dwar il-protezzjoni kontra importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ĠU 2016, L 176, p. 55)), (iktar ’il quddiem ir-“ir-Regolament bażika anitsussidji”.

2

L-investigazzjoni dwar id-dumping, is-sussidji u d-dannu kopriet il-perjodu bejn l‑1 ta’ Lulju 2016 u t‑30 ta’ Ġunju 2017 (iktar ’il quddiem il-“perijodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu mill‑1 ta’ Jannar 2014 sa tmiem il-perjodu ta’ investigazzjoni (iktar ’il quddiem “il-perijodu kkunsidrat”).

3

Il-partijiet ikkonċernati, fosthom il-produtturi-esportaturi Ċiniżi kkonċernati mill-proċeduri antidumping u antisussidji kif ukoll l-assoċjazzjonijiet rappreżentattivi tagħhom, ġew mistiedna jipparteċipaw f’dawn l-investigazzjonijiet. Diversi partijiet ikkonċernati, fosthom ir-rikorrenti, China Rubber Industry Association (CRIA) u China Chamber of Commerce of Metals, Minerals & Chemicals Importers & Exporters (CCCMC), ippreżentaw osservazzjonijiet bil-miktub fl-istadji differenti tal-proċeduri antidumping u antisussidji. Ċerti partijiet ikkonċernati, fosthom ir-rikorrenti, ipparteċipaw ukoll f’seduti organizzati mill-Kummissjoni.

4

Fl‑1 ta’ Frar 2018, il-Kummissjoni adottat ir-Regolament ta’ Implimentazzjoni (UE) 2018/163 li jagħmel importazzjonijiet ta’ tajers ġodda u miksijin mill-ġdid għal tal-linja jew trakkijiet li joriġinaw fir-Repubblika tal-Poplu taċ-Ċina soġġetti għal reġistrazzjoni (ĠU 2018, L 30, p. 12), li daħal fis-seħħ fit‑3 ta’ Frar 2018. Dan ir-regolament jissuġġetta għal reġistrazzjoni l-importazzjonijiet tal-prodott ikkonċernat li joriġinaw miċ-Ċina.

5

Fl‑4 ta’ Mejju 2018 il-Kummissjoni adottat ir-Regolament tal-Kummissjoni (UE) 2018/683 tal‑1 ta’ Frar 2018 li jagħmel importazzjonijiet ta’ tajers ġodda u miksijin mill-ġdid għal tal-linja jew trakkijiet li joriġinaw fir-Repubblika tal-Poplu taċ-Ċina soġġetti għal reġistrazzjoni u li jemenda r-Regolament ta’ Implimentazzjoni (UE) 2018/163 (ĠU 2018, L 116, p. 8, iktar ’il quddiem ir-“Regolament antidumping provviżorju”). Dan ir-regolament jistabbilixxi dazju antidumping provviżorju fuq l-importazzjonijiet tal-prodott ikkonċernat li joriġinaw miċ-Ċina.

6

Min-naħa l-oħra, il-Kummissjoni ddeċidiet li ma timponix miżuri provviżorji fil-proċedura antisussidji.

7

Fit‑18 ta’ Ottubru 2018, il-Kummissjoni adottat ir-Regolament ta’ Implimentazzjoni (UE) 2018/1579 li jimponi dazju antidumping definittiv u li jiġbor b’mod definittiv id-dazju proviżorju impost fuq l-importazzjonijiet ta’ ċerti tajers pnewmatiċi, ġodda jew b’wiċċ ġdid, tal-lastiku, tat-tip użat għall-karozzi tal-linja jew għat-trakkijiet, b’indiċi tat-tagħbija li jaqbeż il-121, li joriġinaw mir-Repubblika tal-Poplu taċ-Ċina u li jħassar ir-Regolament ta’ Implimentazzjoni (UE) 2018/163 (ĠU 2008, L 263, p. 3, iktar ’il quddiem ir-“Regolament antidumping definittiv”).

8

L-Artikolu 1(1) tar-Regolament antidumping definittiv jistabbilixxi dazju antidumping definittiv fuq l-importazzjonijiet tal-prodott ikkonċernat li joriġinaw miċ-Ċina. Skont l-Artikolu 1(2) tal-istess regolament, fil-verżjoni inizjali tiegħu, l-ammont ta’ dan id-dazju antidumping kien ġie ffissat għal valuri inklużi, skont il-kumpanniji li jimmanifatturaw dan il-prodott, bejn EUR 42.73 u EUR 61.76 għal kull unità tal-prodott ikkonċernat.

9

Fid‑9 ta’ Novembru 2018, il-Kummissjoni adottat ir-Regolament tal-Kummissjoni (UE) 2018/1690 li jimponi dazji kumpensatorji definittivi fuq l-importazzjonijiet ta’ ċerti tajers pnewmatiċi ġodda jew b’wiċċ ġdid, ta’ tip użat għall-karozzi tal-linja jew għat-trakkijiet u b’indiċi tat-tagħbija li jaqbeż il-121 li joriġinaw mir-Repubblika tal-Poplu taċ-Ċina u li jemenda r-Regolament ta’ Implimentazzjoni tal-Kummissjoni (UE) 2018/1579 (ĠU 2018, L 283, p. 1, iktar ’il quddiem ir-“Regolament antisussidji”).

10

L-Artikolu 1(1) tar-Regolament antisussidji jistabbilixxi dazju kumpensatorju definittiv fuq l-importazzjonijiet tal-prodott ikkonċernat. Skont l-Artikolu 1(2) tal-istess regolament, l-ammont ta’ dan id-dazju kumpensatorju ġie stabbilit f’valuri inklużi, skont il-kumpanniji li jimmanifatturaw dan il-prodott, bejn EUR 3.75 u EUR 57.28 għal kull unità tal-prodott ikkonċernat.

11

Il-punt 1 tal-Artikolu 2 tar-Regolament antisussidji jemenda l-Artikolu 1(2) u (3) tar-Regolament antidumping definittiv. Wara din il-bidla, l-ammont tad-dazju antidumping definittiv tnaqqas u nġieb għal valuri inklużi, skont il-kumpanniji li jimmanifatturaw il-prodott ikkonċernat, bejn EUR 0 u EUR 38.98 għal kull unità ta’ dan il-prodott.

12

Fil-qosor, fir-Regolament antidumping definittiv, kif emendat, u fir-Regolament antisussidji (iktar ’il quddiem, meħuda flimkien, ir-“regolamenti kkontestati”), id-dazji antidumping u kumpensatorji definittivi applikabbli, espressi f’euros għal kull unità tal-prodott ikkonċernat immanifatturat mill-produtturi-esportaturi Ċiniżi, ġew, fl-aħħar lok, stabbiliti kif ġej:

23

Fil-Kawża T‑30/19, ir-rikorrenti jitolbu, fl-aħħar lok, li l-Qorti Ġenerali jogħġobha:

24

Fil-Kawża T‑72/19, ir-rikorrenti jitolbu, fl-aħħar lok, li l-Qorti Ġenerali jogħġobha:

25

F’kull waħda minn dawn iż-żewġ kawżi, Il-Kummissjoni, sostnuta, essenzjalment, mill-intervenjenti, titlob li l-Qorti Ġenerali jogħġobha:

52

Il-Kummissjoni tqis, essenzjalment, li Weifang Yuelong Rubber u Hefei Wanli Tire ma għandhomx locus standi abbażi tat-tieni u tat-tielet parti tas-sentenza tar-raba’ paragrafu tal-Artikolu 263 TFUE sa fejn, minn naħa, huma ma humiex ikkonċernati individwalment mir-regolamenti kkontestati u fejn, min-naħa l-oħra, dawn ir-regolamenti jinvolvu miżuri ta’ implementazzjoni fir-rigward tagħhom.

53

Ir-rikorrenti jikkontestaw l-argumenti tal-Kummissjoni.

54

Fiċ-ċirkustanzi ta’ dan il-każ, hemm lok li jiġi eżaminat qabel kollox jekk ir-rikorrenti għandhomx locus standi abbażi tat-tielet parti tas-sentenza tar-raba’ paragrafu tal-Artikolu 263 TFUE.

55

F’dan ir-rigward, għandu jitfakkar li, sabiex rikors ikun ammissibbli skont it-tielet parti tas-sentenza tar-raba’ paragrafu tal-Artikolu 263 TFUE, għandhom jiġu ssodisfatti tliet kundizzjonijiet kumulattivi. Fil-fatt, l-att ikkontestat għandu, l-ewwel, ikollu natura regolatorja, it-tieni, jaffettwa direttament lir-rikorrent u, it-tielet, ma jinvolvix miżuri ta’ implimentazzjoni.

56

Fl-ewwel lok, fir-rigward tal-kunċett ta’ atti regolatorji fis-sens tat-tielet parti tas-sentenza tar-raba’ paragrafu tal-Artikolu 263 TFUE, għandu jitfakkar li dan ikopri, bħala prinċipju, l-atti kollha ta’ portata ġenerali bl-esklużjoni tal-atti leġiżlattivi (ara, f’dan is-sens, is-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci, C‑622/16 P sa C‑624/16 P, EU:C:2018:873, punti 23 u 28 u l-ġurisprudenza ċċitata). Id-distinzjoni bejn att leġiżlattiv u att mhux leġiżlattiv tistrieħ, skont it-Trattat FUE, fuq il-kriterju tal-proċedura, leġiżlattiva jew le, li wasslet għall-adozzjoni tiegħu (ara, f’dan is-sens, is-sentenza tas‑6 ta’ Settembru 2017, Is‑Slovakkja u L‑Ungerija vs Il‑Kunsill, C‑643/15 u C‑647/15, EU:C:2017:631, punt 58, u d-digriet tas‑6 ta’ Settembru 2011, Inuit Tapiriit Kanatami et vs Il‑Parlament u Il‑Kunsill, T‑18/10, EU:T:2011:419, punt 65).

57

F’dan il-każ, minn naħa, ir-regolamenti kkontestati, sa fejn jistabbilixxu dazji antidumping u kumpensatorji definittivi fuq l-importazzjonijiet tal-prodotti mmanifatturati mill-kumpanniji kollha minbarra dawk li jidentifikaw b’isimhom, għandhom portata ġenerali. Min-naħa l-oħra, dawn ir-regolamenti ma humiex atti leġiżlattivi, peress li ma ġewx adottati skont proċedura leġiżlattiva ordinarja jew speċjali. Għaldaqstant, l-imsemmija regolamenti, sa fejn jikkonċernaw lil Weifang Yuelong Rubber u Hefei Wanli Tire, huma atti regolatorji fis-sens tat-tielet frażi tar-raba’ paragrafu tal-Artikolu 263 TFUE.

58

Fit-tieni lok, fir-rigward tal-interess dirett, għandu jiġi rrilevat li din il-kundizzjoni tirrikjedi li l-miżura kkontestata tipproduċi direttament effetti fuq is-sitwazzjoni legali tal-individwu u ma tħalli ebda setgħa diskrezzjonali lid-destinatarji li għandhom jimplimentawha, peress li din hija ta’ natura purament awtomatika u tirriżulta biss mil-leġiżlazzjoni tal-Unjoni, mingħajr applikazzjoni ta’ regoli intermedjarji oħra (ara s-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci, C‑622/16 P sa C‑624/16 P, EU:C:2018:873, punt 42 u l-ġurisprudenza ċċitata).

59

Mill-ġurisprudenza jirriżulta wkoll li l-atti li jimponu dazji antidumping jew kumpensatorji huma tali li jikkonċernaw direttament l-impriżi li huma kemm produttriċi kif ukoll esportatriċi tal-prodott inkwistjoni li lilhom huma attribwiti l-prattiki ta’ dumping jew ta’ sussidji, peress li l-kwalità ta’ esportatriċi hija essenzjali f’dan ir-rigward (ara, f’dan is-sens, is-sentenzi tat‑28 ta’ Frar 2019, Il‑Kunsill vs Growth Energy u Renewable Fuels Association, C‑465/16 P, EU:C:2019:155, punti 73 u 74 u l-ġurisprudenza ċċitata, u tat‑28 ta’ Frar 2019, Il‑Kunsill vs Marquis Energy, C‑466/16 P, EU:C:2019:156, punti 48 u 49 u l-ġurisprudenza ċċitata).

60

F’dan il-każ, minn naħa, ir-regolamenti kkontestati jistabbilixxu dazji antidumping u kumpensatorji definittivi fuq l-importazzjonijiet tal-prodotti mmanifatturati mill-“kumpaniji l-oħra kollha” mhux identifikati b’isimhom fi ħdanhom, bħal Weifang Yuelong Rubber u Hefei Wanli Tire.

61

Min-naħa l-oħra, ir-rikorrenti jindikaw li Weifang Yuelong Rubber u Hefei Wanli Tire huma produtturi-esportaturi. Il-Kummissjoni ma tikkontestax il-kwalità tagħhom ta’ esportaturi. Fil-fatt, hija tikklassifikahom bħala produtturi-esportaturi fir-risposti tagħha għall-miżuri ta’ organizzazzjoni tal-proċedura.

62

Minn dan isegwi li r-regolamenti kkontestati jipproduċu direttament effetti fuq is-sitwazzjoni legali ta’ Weifang Yuelong Rubber u ta’ Hefei Wanli Tire billi jemendaw ir-regoli kummerċjali applikabbli għall-importazzjonijiet fl-Unjoni tal-prodotti tagħhom.

63

Barra minn hekk, ir-regolamenti kkontestati jobbligaw lill-awtoritajiet doganali tal-Istati Membri jiġbru d-dazji stabbiliti mingħajr ma jħallulhom ebda marġni ta’ diskrezzjoni (ara, f’dan is-sens, is-sentenza tal‑25 ta’ Settembru 1997, Shanghai Bicycle vs Il‑Kunsill, T‑170/94, EU:T:1997:134, punt 41 u l-ġurisprudenza ċċitata).

64

F’dawn iċ-ċirkustanzi, ir-regolamenti kkontestati jaffettwaw direttament lil Weifang Yuelong Rubber u Hefei Wanli Tire.

65

Fit-tielet lok, fir-rigward tal-assenza ta’ miżuri ta’ implimentazzjoni, għandu jitfakkar li, sabiex jiġi evalwat jekk att regolatorju jinvolvix miżuri ta’ implimentazzjoni, għandha titqies il-pożizzjoni tal-persuna li tkun qiegħda tinvoka d-dritt ta’ rimedju taħt it-tielet parti tal-frażi tar-raba’ paragrafu tal-Artikolu 263 TFUE. Għaldaqstant, il-kwistjoni ta’ jekk l-att inkwistjoni jinvolvix miżuri ta’ implimentazzjoni fir-rigward ta’ individwi oħra hija irrilevanti (ara s-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci, C‑622/16 P sa C‑624/16 P, EU:C:2018:873, punt 61 u l-ġurisprudenza ċċitata).

66

F’dan ir-rigward, huwa minnu li s-sistema doganali, kif stabbilita bir-Regolament (UE) Nru 952/2013 tal-Parlament Ewropew u tal-Kunsill tad‑9 ta’ Ottubru 2013 li jistabbilixxi l-Kodiċi Doganali tal-Unjoni (ĠU 2013, L 269, p. 1, rettifiki fil-ĠU 2013, L 287, p. 90 u fil-ĠU 2016, L 267, p. 2 (iktar ’il quddiem il-“Kodiċi Doganali”), u li jaqgħu taħtu r-regolamenti kkontestati, tipprevedi li l-ġbir tad-dazji stabbiliti minn dawn tal-aħħar isir, fil-każijiet kollha, abbażi ta’ miżuri adottati mill-awtoritajiet nazzjonali (sentenza tal‑10 ta’ Diċembru 2015, Kyocera Mita Europe vs Il‑Kummissjoni, C‑553/14, mhux ippubblikata, punt 49). Fil-fatt, in-notifika tal-imsemmi dejn doganali lid-debitur, prevista fl-Artikolu 102 tal-Kodiċi Doganali, tikkostitwixxi, fir-rigward tad-debitur, miżura ta’ implimentazzjoni tar-regolamenti kkontestati adottati mill-awtoritajiet nazzjonali (ara, f’dan is-sens, id-digrieti tal‑21 ta’ Jannar 2014, Bricmate vs Il‑Kunsill, T‑596/11, mhux ippubblikat, EU:T:2014:53, punt 71, u tal‑14 ta’ Settembru 2021, Far Polymers et vs Il‑Kummissjoni, T‑722/20, mhux ippubblikat, EU:T:2021:598, punt 66 u l-ġurisprudenza ċċitata).

67

Madankollu, huwa paċifiku li d-dazji antidumping u kumpensatorji jitħallsu mill-importaturi tal-prodott ikkonċernat fl-Unjoni, u mhux mill-produtturi-esportaturi (ara, f’dan is-sens, is-sentenza tat‑3 ta’ Mejju 2018, Distillerie Bonollo et vs Il‑Kunsill, T‑431/12, EU:T:2018:251, punt 62, u l-konklużjonijiet tal-Avukat Ġenerali Tanchev fil-Kawża Changmao Biochemical Engineering vs Distillerie Bonollo et, C‑461/18 P, EU:C:2020:298, punt 88).

68

Għaldaqstant, peress li ma humiex debituri tad-dejn doganali u b’hekk ikunu destinatarji tan-notifika ta’ dan id-dejn, il-produtturi-esportaturi ma humiex normalment informati bl-imsemmi dejn. Konsegwentement, bil-kontra tal-importaturi, huma ma jistgħux effettivament jeżerċitaw ir-rimedji ġudizzjarji previsti fl-Artikolu 44 tal-Kodiċi Doganali kontra d-deċiżjonijiet meħuda mill-awtoritajiet doganali nazzjonali. Konsegwentement, il-produtturi-esportaturi jirriskjaw li jiċċaħħdu minn protezzjoni ġudizzjarja effettiva jekk ma jkollhomx rimedju ġudizzjarju quddiem il-qorti tal-Unjoni sabiex jikkontestaw il-legalità tar-regolamenti kkontestati.

69

Minn dan isegwi li, għalkemm jeżistu miżuri ta’ implimentazzjoni fir-rigward tal-importaturi, fil-forma ta’ atti tal-awtoritajiet nazzjonali li jistabbilixxu l-ammont tad-dazji antidumping u kumpensatorji għall-irkupru tagħhom (sentenzi tat‑18 ta’ Ottubru 2018, Rotho Blaas, C‑207/17, EU:C:2018:840, punti 16, 17, 38 u 39, u tad‑19 ta’ Settembru 2019, Trace Sport, C‑251/18, EU:C:2019:766, punti 18 u 31), min-naħa l-oħra, ma jeżistux miżuri ta’ implimentazzjoni fir-rigward tal-produtturi-esportaturi.

70

F’dawn iċ-ċirkustanzi, għandu jiġi kkunsidrat li r-regolamenti kkontestati ma jinkludux miżuri ta’ implimentazzjoni kontra Weifang Yuelong Rubber u Hefei Wanli Tire.

71

Għaldaqstant, ir-rikorrenti, meħuda bħala assoċjazzjonijiet rappreżentattivi, għandhom locus standi, abbażi tat-tielet parti tas-sentenza tar-raba’ paragrafu tal-Artikolu 263 TFUE, kontra d-dazji antidumping u kumpensatorji definittivi stabbiliti fuq il-prodotti mmanifatturati minn Weifang Yuelong Rubber u Hefei Wanli Tire.

[omissis]

98

Insostenn tar-rikorsi, ir-rikorrenti jqajmu, f’kull kawża, sitt motivi.

99

L-ewwel ħames motivi huma bbażati, l-ewwel, fuq analiżi żbaljata tal-indikaturi tad-dannu, it-tieni, fuq differenzi eżistenti bejn it-tajers ġodda u t-tajers b’wiċċ ġdid, it-tielet, fuq żbalji fid-determinazzjoni tal-effetti fuq il-prezzijiet u tal-livell ta’ eliminazzjoni ħija tad-dannu subit mill-industrija tal-Unjoni, ir-raba’, fuq analiżi żbaljata tar-rabta kawżali bejn l-importazzjonijiet tal-prodott ikkonċernat u dan id-dannu u, il-ħames, fuq il-ksur tad-drittijiet tad-difiża.

100

Is-sitt motiv huwa bbażat, fil-Kawża T‑30/19, fuq l-illegalità ta’ aġġustament fir-rigward tat-taxxi indiretti magħmul waqt id-determinazzjoni tal-marġni ta’ dumping u, fil-Kawża T72/19, fuq il-ksur tar-Regolament bażiku antidumping.

[omissis]

104

Permezz tat-tielet motivi, ir-rikorrenti jsostnu li, fid-determinazzjoni tal-effetti tal-importazzjonijiet li huma s-suġġett ta’ dumping jew ta’ sussidji fuq il-prezzijiet kif ukoll tal-livell ta’ eliminazzjoni tad-dannu, il-Kummissjoni kisret, fil-Kawża T‑30/19, l-Artikolu 3(2)(a) u (3) u l-Artikolu 9(4) tar-Regolament bażiku kontra d-dumping u, fil-Kawża T‑72/19, l-Artikolu 8(1)(a) u (2) u l-Artikolu 15(1) tar-Regolament bażiku antisussidji.

105

B’mod partikolari, fil-kuntest tat-tieni parti tat-tielet motivi, ir-rikorrenti jqisu, essenzjalment, li l-Kummissjoni bbażat ruħha b’mod żbaljat fuq il-prezzijiet tal-importazzjoni kkostruwiti sabiex tikkalkola t-twaqqigħ tal-prezzijiet.

106

Permezz tal-ewwel ilment, ir-rikorrenti jsostnu li, għall-finijiet tal-kalkolu tat-twaqqigħ tal-prezzijiet, l-użu ta’ prezzijiet tal-importazzjoni kkostruwiti, jiġifieri ta’ prezzijiet ta’ esportazzjoni kkostruwiti skont id-dispożizzjonijiet tal-Artikolu 2(9) tar-Regolament bażiku antidumping, huwa, bħala prinċipju, ipprojbit, għaliex huwa bbażat fuq prezzijiet teoretiċi, u mhux fuq prezzijiet reali osservati u miġbura mill-konsumatur fl-Unjoni.

107

Permezz tat-tieni lment, ir-rikorrenti jsostnu li, f’dan il-każ, l-użu tal-prezz tal-importazzjoni mibni ma ppermettiex lill-Kummissjoni twettaq paragun ekwu, jiġifieri fl-istess stadju kummerċjali, bejn il-prezz tal-importazzjonijiet tal-prodott ikkonċernat, minn naħa, u l-prezz tal-prodott simili tal-industrija tal-Unjoni, min-naħa l-oħra.

108

Skont ir-rikorrenti, fir-rigward tal-bejgħ tal-produtturi tal-Unjoni mwettqa fl-Unjoni permezz ta’ entitajiet ta’ bejgħ relatati, il-Kummissjoni ħadet inkunsiderazzjoni l-prezzijiet iffatturati minn dawn l-entitajiet lill-ewwel xerrejja indipendenti billi inkludiet l-ispejjeż ta’ bejgħ, u dawk amministrattivi u ġenerali oħra (iktar ’il quddiem l-“ispejjeż BAĠ”) kif ukoll il-profitti tal-imsemmija entitajiet. Min-naħa l-oħra, fir-rigward tal-bejgħ tal-produtturi-esportaturi Ċiniżi mwettaq fl-Unjoni permezz ta’ entitajiet ta’ bejgħ relatati, il-Kummissjoni rrifjutat li tieħu inkunsiderazzjoni l-prezzijiet iffatturati minn dawn l-entitajiet lill-ewwel xerrejja indipendenti u bbażat ruħha fuq prezzijiet tal-importazzjoni kkostruwiti billi naqqset, u għalhekk billi eskludiet, l-ispejjeż BAĠ u l-profitti tal-imsemmija entitajiet. Għaldaqstant, fil-preżenza tal-istess mudell ta’ kummerċjalizzazzjoni, il-Kummissjoni kkalkolat b’mod differenti l-prezz tal-importazzjonijiet tal-prodott ikkonċernat u l-prezz tal-prodott simili tal-industrija tal-Unjoni u, konsegwentement, ma wettqitx paragun ekwu ta’ dawn il-prezzijiet. Billi għamlet hekk, il-Kummissjoni indebitament żiedet il-marġni ta’ dannu u vvizzjat l-analiżi tad-dannu u tar-rabta kawżali.

109

Il-Kummissjoni tikkontesta l-argumenti tar-rikorrenti. L-intervenjenti, min-naħa tagħha, ma tippreżenta ebda osservazzjoni f’dak li jirrigwarda dawn l-argumenti.

110

Qabel kollox, għandu jiġi eżaminat it-tieni lment tat-tieni parti tat-tielet motivi.

111

Għandu jitfakkar li, skont l-Artikolu 3(2) tar-Regolament bażiku antidumping u l-Artikolu 8(1) tar-Regolament bażiku antisussidji, id-determinazzjoni tal-eżistenza ta’ dannu lill-industrija tal-Unjoni għandha tkun ibbażata fuq provi pożittivi u għandha tinvolvi eżami oġġettiv, minn naħa, tal-volum tal-importazzjonijiet li huma s-suġġett ta’ dumping jew ta’ sussidji u tal-effett ta’ dawn l-importazzjonijiet fuq il-prezzijiet ta’ prodotti simili fis-suq tal-Unjoni u, min-naħa l-oħra, tal-effett ta’ dawn l-importazzjonijiet fuq l-imsemmija industrija.

112

F’dak li jirrigwarda b’mod iktar partikolari l-effett fuq il-prezzijiet tal-importazzjonijiet li huma s-suġġett ta’ dumping jew ta’ sussidji fuq il-prezzijiet, l-Artikolu 3(3) tar-Regolament bażiku antidumping u l-Artikolu 8(2) tar-Regolament bażiku antisussidji jipprevedu l-obbligu li jiġi eżaminat jekk kienx hemm, fir-rigward ta’ dawn l-importazzjonijiet, twaqqigħ sinjifikattiv tal-prezz meta mqabbel mal-prezz ta’ prodott simili tal-industrija tal-Unjoni jew jekk dawn l-importazzjonijiet għandhomx, b’xi mod ieħor, l-effett li jwaqqgħu l-prezzijiet b’mod sinjifikattiv il-prezzijiet jew li jostakolaw b’mod sinjifikattiv żidiet fil-prezzijiet li kienu b’mod ieħor kienu jseħħu.

113

Ir-Regolament bażiku antidumping u r-Regolament bażiku antisussidji ma fihomx definizzjoni tal-kunċett ta’ twaqqigħ tal-prezz u ma jipprevedux metodu għall-kalkolu ta’ dan tal-aħħar (sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 175, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 238).

114

Il-kalkolu tat-twaqqigħ tal-prezz tal-importazzjonijiet inkwistjoni jitwettaq, skont l-Artikolu 3(2) u (3) tar-Regolament bażiku antidumping u l-Artikolu 8(1) u (2) tar-Regolament bażiku antisussidji, għall-finijiet tad-determinazzjoni tal-eżistenza ta’ dannu mġarrab mill-industrija tal-Unjoni minħabba dawn l-importazzjonijiet u jintuża, b’mod iktar wiesa’, bil-għan li jiġi vvalutat dan id-dannu u li jiġi ddeterminat il-marġni ta’ dannu, jiġifieri l-livell ta’ eliminazzjoni tal-imsemmi dannu. L-obbligu li jitwettaq eżami oġġettiv tal-effett tal-importazzjonijiet li huma s-suġġett ta’ dumping jew ta’ sussidji, stabbilit Artikolu 3(2) u (3) tar-Regolament bażiku antidumping u l-Artikolu 8(1) u (2) tar-Regolament bażiku antisussidji, jeżiġi li jitwettaq paragun ekwu bejn il-prezz tal-prodott ikkonċernat u l-prezz tal-prodott simili tal-imsemmija industrija meta dawn jinbiegħu fit-territorju tal-Unjoni. Sabiex tiġi ggarantita n-natura ekwa ta’ dan il-paragun, il-prezzijiet għandhom jiġu pparagunati fl-istess stadju kummerċjali. Fil-fatt, paragun imwettaq bejn prezzijiet miksuba fi stadji kummerċjali differenti, jiġifieri mingħajr ma jiġu inklużi l-ispejjeż kollha relatati mal-istadju kummerċjali li għandu jittieħed inkunsiderazzjoni, ser jagħti neċessarjament lok għal riżultati artifiċjali li ma jippermettux li ssir evalwazzjoni korretta tad-dannu lill-industrija tal-Unjoni (sentenzi tas‑17 ta’ Frar 2011, Zhejiang Xinshiji Foods u Hubei Xinshiji Foods vs Il‑Kunsill, T‑122/09, mhux ippubblikata, EU:T:2011:46, punti 79 u 85; tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 176, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 239).

115

Barra minn hekk, għandu jitfakkar li d-determinazzjoni tal-eżistenza u tal-ammont ta’ dannu kkawżat lill-industrija tal-Unjoni kif ukoll tal-eżistenza ta’ rabta kawżali tippresupponi l-evalwazzjoni ta’ sitwazzjonijiet ekonomiċi kumplessi li fil-kuntest tagħhom l-istituzzjonijiet tal-Unjoni għandhom setgħa diskrezzjonali wiesgħa (ara, f’dan is-sens, is-sentenza tal‑10 ta’ Settembru 2015, Bricmate, C‑569/13, EU:C:2015:572, punt 46 u l-ġurisprudenza ċċitata), b’tali mod li, konformement mal-ġurisprudenza mfakkra fil-punti 102 u 103 iktar ’il fuq, l-istħarriġ ġudizzjarju ta’ tali evalwazzjoni għandu jiġi limitat. Din is-setgħa diskrezzjonali wiesgħa u dan l-istħarriġ ġudizzjarju limitat jirrigwardaw, bħala prinċipju, ukoll l-għażla tal-metodu ta’ kalkolu tal-marġni ta’ twaqqigħ tal-prezz (ara, f’dan is-sens u b’analoġija, is-sentenza tas‑16 ta’ Diċembru 2011, Dashiqiao Sanqiang Refractory Materials vs Il‑Kunsill, T‑423/09, EU:T:2011:764, punt 41).

116

Fil-premessa 149 tar-Regolament antidumping provviżorju u fil-premessa 658 tar-Regolament antisussidji, il-Kummissjoni indikat li ddeterminat it-twaqqigħ tal-prezzijiet matul il-perijodu ta’ investigazzjoni billi qabblet:

117

Fir-rigward tal-ewwel terminu tal-paragun, jiġifieri l-prezzijiet tal-produtturi tal-Unjoni, il-Kummissjoni ppreċiżat, fil-premessa 178 tar-Regolament antidumping definittiv u fil-premessa 685 tar-Regolament antisussidji, in-natura tal-ispejjeż imnaqqsa mill-prezzijiet iffatturati lill-ewwel xerrejja indipendenti sabiex taġġustahom fil-livell ta’ tluq tal-fabbrika. Hija spjegat li hija kienet naqqset l-ispejjeż li jikkorrispondu għall-elementi li ġejjin: “it-trasport, l-ispejjeż tal-assigurazzjoni, l-immaniġġjar, it-tagħbija u anċillari, l-ippakkjar, il-kreditu, l-iskontijiet u l-kummissjonijiet”. Hija indikat ukoll li, għall-kuntrarju, hija ma kinitx naqset “il-prezzijiet indiretti tal-bejgħ, ir-R&Ż, finanzi, il-kummerċjalizzazzjoni u lanqas il-profitt”.

118

Barra minn hekk, fir-risposta bil-miktub tagħha għall-miżuri ta’ organizzazzjoni tal-proċedura, il-Kummissjoni kkonfermat li, fil-każ ta’ kummerċjalizzazzjoni tal-prodott simili permezz ta’ entitajiet ta’ bejgħ relatati mal-produtturi tal-Unjoni, hija kienet ħadet inkunsiderazzjoni l-prezzijiet ta’ bejgħ mill-ġdid lill-ewwel xerrejja indipendenti pprattikati minn dawn l-entitajiet ta’ bejgħ konnessi u li hija ma kinitx naqqset l-ispejjeż BAĠ u l-profitti tal-imsemmija entitajiet.

119

Fir-rigward tat-tieni terminu tal-paragun, jiġifieri l-prezzijiet tal-produtturi-esportaturi Ċiniżi, il-Kummissjoni ġġustifikat, fil-premessi 166 sa 171 tar-Regolament antidumping definittiv u fil-premessi 673 sa 678 tar-Regolament antisussidji, l-użu tal-prezzijiet tal-importazzjoni kkostruwiti fil-każijiet fejn il-produttur-esportatur Ċiniż u l-importatur huma relatati. Għaldaqstant, hija bniet il-prezzijiet tal-importazzjoni billi ħadet bħala punt ta’ tluq il-prezzijiet ta’ bejgħ mill-ġdid lill-ewwel xerrejja indipendenti pprattikati mill-importaturi relatati.

120

B’mod partikolari, fil-premessa 171 tar-Regolament antidumping definittiv u fil-premessa 678 tar-Regolament antisussidji, il-Kummissjoni spjegat li, “sabiex ikun hemm tqabbil ġust, tnaqqis tal-SG&A [ispejjeż BAĠ] u l-profitt mill-prezz tal-bejgħ mill-ġdid lil klijenti mhux relatati [xerrejja indipendenti] magħmula mill-importatur relatat huwa ġġustifikat sabiex jaslu għal CIF affidabbli [prezz fil-fruntiera tal-Unjoni]”.

121

Fil-qosor, mill-elementi kollha mfakkra fil-punti 116 sa 120 iktar ’il fuq jirriżulta, minn naħa, li, fir-rigward tal-prezzijiet tal-produtturi tal-Unjoni, il-Kummissjoni bbażat ruħha fuq il-prezzijiet ta’ bejgħ jew ta’ bejgħ mill-ġdid lill-ewwel xerrejja indipendenti pprattikati kemm direttament mill-produtturi tal-Unjoni, kif ukoll permezz ta’ entitajiet ta’ bejgħ relatati ma’ dawn tal-aħħar. F’din l-aħħar ipoteżi, il-prezzijiet tal-prodott simili kkunsidrati fil-kalkolu tat-twaqqigħ tal-prezz jinkludu l-ispejjeż BAĠ kif ukoll il-profitti tal-entitajiet ta’ bejgħ relatati mal-produtturi tal-Unjoni.

122

Min-naħa l-oħra, fir-rigward tal-prezzijiet tal-produtturi-esportaturi Ċiniżi, il-Kummissjoni bbażat ruħha fuq prezzijiet tal-importazzjoni, reali jew ikkostruwiti, fil-livell tal-fruntiera l-ġdida tal-Unjoni. Dawn il-prezzijiet jistgħu jkunu kemm prezzijiet reali ffatturati mill-produtturi-esportaturi Ċiniżi lill-ewwel xerrejja indipendenti, kif ukoll prezzijiet ta’ bejgħ teoretiċi lil importaturi relatati kkostruwiti mill-Kummissjoni. F’din l-aħħar ipoteżi, il-prezzijiet tal-prodott ikkonċernat meħuda inkunsiderazzjoni fil-kalkolu tat-twaqqigħ tal-prezzijiet la jinkludu l-ispejjeż BAĠ u lanqas il-profitti tal-entitajiet ta’ bejgħ relatati mal-produtturi-esportaturi Ċiniżi.

123

Abbażi tal-metodu ta’ kalkolu deskritt fil-punti 116 sa 122 iktar ’il fuq u kif jirriżulta mill-premessi 160 u 162 tar-Regolament antidumping definittiv u mill-premessi 659 u 667 tar-Regolament antisussidji, il-Kummissjoni kkonstatat livell ta’ twaqqigħ globali tal-prezzijiet ta’ madwar 21 %. Hija kkonstatat ukoll li l-marġni medju ponderat ta’ twaqqigħ tal-prezz kien ivarja bejn 18 u 24 % skont it-tliet kategoriji ta’ tajers iddefiniti mir-regolamenti kkontestati skont il-livell ta’ kwalità tagħhom (18 sa 20 % għall-kategorija 1 u 22 sa 24 % għall-kategorija 2 u 3).

124

Barra minn hekk, fir-rigward tal-produtturi-esportaturi Ċiniżi magħżula fil-kampjun, il-Kummissjoni ppreċiżat, għall-ewwel darba quddiem il-Qorti Ġenerali, li l-marġnijiet ta’ twaqqigħ fil-prezzijiet kien jammonta rispettivament għal 30.0 % għall-prodotti mmanifatturati mill-grupp Xingyuan, għal 19.3 % għal dawk immanifatturati mill-grupp Giti, għal 22.2 % għal dawk immanifatturati mill-grupp Aeolus u għal 17.6 % għal dawk immanifatturati mill-grupp Hankook.

125

F’dan il-każ, u fid-dawl ta’ dak li ġie rrilevat fil-punti 116 sa 122 iktar ’il fuq, għandu jiġi kkonstatat li, fil-kalkolu tat-twaqqigħ tal-prezzijiet, il-Kummissjoni sistematikament ħadet inkunsiderazzjoni l-prezzijiet ta’ bejgħ iffatturati lill-ewwel xerrejja indipendenti, indipendentement mill-mezzi ta’ distribuzzjoni użati, f’dak li jirrigwarda l-industrija tal-Unjoni, iżda mhux f’dak li jirrigwarda l-produtturi-esportaturi Ċiniżi.

126

Fil-fatt, meta l-produtturi tal-Unjoni jew il-produtturi esportaturi Ċiniżi jbigħu l-prodotti tagħhom permezz ta’ entitajiet ta’ bejgħ relatati, il-Kummissjoni bbażat ruħha fuq il-prezzijiet ipprattikati mill-entitajiet ta’ bejgħ relatati mal-produtturi tal-Unjoni u, min-naħa l-oħra, eskludiet il-prezzijiet ipprattikati mill-entitajiet ta’ bejgħ relatati mal-produtturi-esportaturi Ċiniżi għall-benefiċċju tal-prezzijiet tal-importazzjoni fil-livell tal-fruntiera tal-Unjoni.

127

Għalhekk, u kif jirrilevaw ir-rikorrenti, fil-preżenza tal-istess mudell ta’ kummerċjalizzazzjoni kkaratterizzat mill-użu ta’ entitajiet ta’ bejgħ relatati, il-Kummissjoni ttrattat b’mod differenti l-bejgħ tal-produtturi tal-Unjoni u dak tal-produtturi esportaturi Ċiniżi billi kkunsidrat, fir-rigward tal-ewwel, prezzijiet ta’ bejgħ mill-ġdid lill-ewwel xerrejja indipendenti u, għat-tieni, prezzijiet ta’ bejgħ ikkostruwiti fil-livell tal-fruntiera tal-Unjoni.

128

Issa, fil-preżenza ta’ tali mudell ta’ tqassim, ġie deċiż li, meta l-Kummissjoni kienet tuża l-prezzijiet ta’ bejgħ lill-ewwel xerrejja indipendenti għall-prodott simili tal-industrija tal-Unjoni, ir-rekwiżit ta’ paragun tal-prezzijiet fl-istess stadju kummerċjali kien jobbligaha tikkompara dawn il-prezzijiet mal-prezzijiet tal-bejgħ tal-prodott ikkonċernat lill-ewwel xerrejja indipendenti (ara, f’dan is-sens, is-sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 183, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 247).

129

Fil-fatt, għandu jiġi osservat li l-kummerċjalizzazzjoni ta’ prodotti li ma titwettaqx direttament mill-produttur, iżda permezz ta’ entitajiet ta’ bejgħ, timplika l-eżistenza ta’ spejjeż u ta’ marġni ta’ profitti speċifiċi għal dawn l-entitajiet, b’mod li l-prezzijiet ipprattikati minn dawn tal-aħħar fil-konfront tax-xerrejja indipendenti huma ġeneralment ogħla mill-prezzijiet ipprattikati mill-produtturi fil-bejgħ dirett tagħhom lil tali xerrejja u għaldaqstant hekk ma jistgħux jiġu assimilati ma’ dawn il-prezzijiet tal-aħħar (sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 184, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 248).

130

Issa, f’dan il-każ, il-Kummissjoni inkludiet fil-prezz tal-prodott simili l-ispejjeż BAĠ u l-profitti tal-entitajiet ta’ bejgħ relatati mal-produtturi tal-Unjoni, filwaqt li eskludiet mill-prezz tal-prodott ikkonċernat l-ispejjeż u l-profitti korrispondenti tal-entitajiet ta’ bejgħ relatati mal-produtturi-esportaturi Ċiniżi. Minn dan isegwi li l-Kummissjoni ħadet inkunsiderazzjoni għall-prodott simili prezz miżjud meta mqabbel ma’ dak tal-prodott ikkonċernat u, konsegwentement, sfavorevoli għall-produtturi esportaturi Ċiniżi li jwettqu l-bejgħ kollu tagħhom fl-Unjoni jew parti minnu fl-Unjoni permezz ta’ entitajiet ta’ bejgħ (ara, b’analoġija, is-sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 185, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 249).

131

F’dawn iċ-ċirkustanzi, għandu jiġi konkluż li, fil-preżenza ta’ bejgħ imwettaq permezz ta’ entitajiet ta’ bejgħ konnessi, il-kalkolu tat-twaqqigħ tal-prezzijiet manifestament ma twettaqx billi jsir paragun ekwu bejn prezzijiet li jinsabu fl-istess stadju kummerċjali (ara, b’analoġija, is-sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 188, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 252).

132

Din il-konklużjoni ma hijiex ikkontestata mill-oġġezzjonijiet ifformulati mill-Kummissjoni.

133

Fl-ewwel lok, il-Kummissjoni ssostni, essenzjalment, li l-mod li bih il-produtturi esportaturi jorganizzaw il-bejgħ tal-prodotti tagħhom fl-Unjoni, jiġifieri jew direttament lil xerrejja indipendenti, jew permezz ta’ entitajiet ta’ bejgħ relatati, u t-tip ta’ konsumaturi li lilhom ibigħu l-prodotti tagħhom, jiġifieri jew importaturi jew utenti finali, ma għandhomx effett fuq il-mod kif il-kompetizzjoni permezz tal-prezzijiet hija eżerċitata fis-suq. Hija tispjega li, ikun xi jkun il-mezz ta’ tqassim użat mill-produtturi-esportaturi u t-tip ta’ konsumaturi, il-prodott ikkonċernat jidħol f’kompetizzjoni mal-prodott simili tal-industrija tal-Unjoni mill-qsim tal-fruntiera. Konsegwentement, il-prezzijiet tal-importazzjoni fil-livell tal-fruntiera tal-Unjoni jkunu dejjem rilevanti u jistgħu jitqabblu mal-prezzijiet tal-bejgħ tal-industrija tal-Unjoni mwettaq, fl-istess stadju kummerċjali, jew direttament (prezzijiet “tluq mill-fabbrika”), jew inkella permezz ta’ entitajiet ta’ bejgħ relatati (prezzijiet “tluq mill-fergħa”). Skont il-Kummissjoni, dan l-approċċ jippermetti li jiġi ttrattat b’mod identiku l-bejgħ dirett (lil xerrejja indipendenti) u indirett (lil entitajiet ta’ bejgħ relatati) tal-istess produttur-esportatur jew ta’ produtturi-esportaturi differenti li organizzaw b’mod differenti l-mezzi ta’ tqassim tagħhom.

134

F’dan ir-rigward, preliminarjament, għandu jitfakkar li dan l-ilment jirrigwarda biss il-kwistjoni dwar jekk, f’dan il-każ, il-Kummissjoni wettqitx paragun ekwu bejn il-prezzijiet li jinsabu fl-istess stadju kummerċjali. Għall-finijiet tal-eżami ta’ dan l-ilment, ma hemmx neċessarjament lok li jiġi ddeterminat l-istadju kummerċjali li fih seta’ jew kellu jitwettaq il-paragun tal-prezzijiet, u lanqas li tiġi evalwata, b’mod ġenerali, ir-rilevanza tal-prezzijiet tal-importazzjoni fil-livell tal-fruntiera tal-Unjoni u l-legalità, b’mod assolut, ta’ bini ta’ ċerti prezzijiet għall-finijiet tal-kalkolu tat-twaqqigħ tal-prezzijiet. Fil-fatt, minn naħa, dawn il-kwistjonijiet jirrigwardaw ilment distint, jiġifieri l-ewwel ilment tat-tieni parti tat-tielet motivi (ara l-punt 106 iktar ’il fuq). Min-naħa l-oħra, indipendentement mil-legalità u mir-rilevanza tal-istadju kummerċjali magħżul mill-Kummissjoni min-naħa tal-produtturi-esportaturi jew min-naħa tal-produtturi tal-Unjoni, il-paragun tal-prezzijiet imwettaq minn din l-istituzzjoni għandu dejjem ikun ta’ natura ġusta, u, għal dan il-għan, jirrigwarda prezzijiet li jinsabu kollha fl-istess stadju kummerċjali.

135

Madankollu, il-Kummissjoni ssostni, essenzjalment, li, fir-rigward tal-prezzijiet tal-produtturi-esportaturi Ċiniżi, il-prezzijiet tal-importazzjoni fil-livell tal-fruntiera tal-Unjoni għadhom rilevanti, kemm jekk huma prezzijiet reali ffatturati lil xerrejja indipendenti jew prezzijiet ikkostruwiti meqjusa ffatturati lil entitajiet ta’ bejgħ relatati.

136

F’dan ir-rigward, l-approċċ meħud u difiż mill-Kummissjoni jimplika li l-prezzijiet iffatturati mill-produtturi-esportaturi Ċiniżi lil xerrejja indipendenti, minn naħa, u l-prezzijiet iffatturati mill-istess produtturi-esportaturi Ċiniżi lill-entitajiet ta’ bejgħ relatati, min-naħa l-oħra, jinsabu fl-istess stadju kummerċjali. Barra minn hekk, b’mod iktar ġenerali, dan l-approċċ għandu impliċitament iżda neċessarjament il-konsegwenza li l-prezzijiet ta’ bejgħ iffatturati minn dawn il-produtturi-esportaturi lil xerrejja indipendenti, minn naħa, u l-prezzijiet ta’ bejgħ mill-ġdid iffatturati lil tali xerrejja minn entitajiet ta’ bejgħ relatati mal-imsemmija produtturi-esportaturi, min-naħa l-oħra, ma jinsabux fl-istess stadju kummerċjali.

137

Filwaqt li jammetti li l-approċċ inkwistjoni jkun xieraq, huwa ċertament jippermetti li jiġi ġġustifikat l-użu ta’ prezzijiet tal-importazzjoni kkostruwiti meta dawn il-produtturi-esportaturi jikkummerċjalizzaw il-prodotti kollha tagħhom jew parti minnhom permezz ta’ entitajiet ta’ bejgħ relatati.

138

Min-naħa l-oħra, l-approċċ inkwistjoni ma jippermettix, bħala prinċipju, li jiġi ġġustifikat li l-prezzijiet tal-importazzjoni tal-produtturi-esportaturi Ċiniżi, li kultant ikunu prezzijiet reali fil-każ ta’ bejgħ lil xerrejja indipendenti u kultant prezzijiet kkostruwiti fil-każ ta’ bejgħ lil entitajiet ta’ bejgħ relatati ma’ dawn il-produtturi-esportaturi (prezzijiet li jeskludu l-ispejjeż BAĠ u l-profitti ta’ dawn l-entitajiet), ikunu, bħal f’dan il-każ, b’mod partikolari pparagunati ma’ prezzijiet ta’ bejgħ iffatturati lil xerrejja indipendenti minn entitajiet ta’ bejgħ relatati mal-produtturi tal-Unjoni (prezzijiet inklużi l-ispejjeż BAĠ u l-profitti ta’ dawn l-aħħar entitajiet). Fil-fatt, dawn il-prezzijiet tal-aħħar normalment ikunu fi stadju kummerċjali sussegwenti għall-istadju kummerċjali komuni għall-prezzijiet l-oħra meħuda inkunsiderazzjoni kemm min-naħa tal-produtturi-esportaturi Ċiniżi kif ukoll min-naħa tal-produtturi tal-Unjoni.

139

Fl-aħħar mill-aħħar, l-approċċ inkwistjoni kellu loġikament iwassal lill-Kummissjoni sabiex tieħu inkunsiderazzjoni wkoll, bħala l-uniku stadju kummerċjali min-naħa tal-produtturi tal-Unjoni, dak tal-bejgħ tal-produtturi tal-Unjoni lill-konsumaturi kollha tagħhom, kemm jekk huma xerrejja indipendenti jew entitajiet ta’ bejgħ relatati ma’ dawn il-produtturi tal-aħħar. Dan kien jimplika li l-Kummissjoni tikkostruwixxi l-prezzijiet ta’ bejgħ tal-produtturi tal-Unjoni meta dawn ibigħu l-prodotti tagħhom lil entitajiet ta’ bejgħ relatati u, konsegwentement, li hija tnaqqas u għalhekk teskludi l-ispejjeż BAĠ u l-profitti tal-entitajiet ta’ bejgħ assoċjati mal-produtturi tal-Unjoni.

140

Is-sitwazzjoni tkun differenti biss jekk jintwera li l-entitajiet ta’ bejgħ relatati rispettivament mal-produtturi-esportaturi Ċiniżi u mal-produtturi tal-Unjoni għandhom irwoli ekonomiċi differenti.

141

Issa, f’dan il-każ, il-Kummissjoni sempliċement tissuġġerixxi li l-prezzijiet ta’ bejgħ iffatturati direttament lill-ewwel xerrejja indipendenti mill-produtturi tal-Unjoni (prezzijiet “tluq mill-fabbrika”), minn naħa, u l-prezzijiet ta’ bejgħ mill-ġdid iffatturati lil tali xerrejja mill-entitajiet ta’ bejgħ relatati ma’ dawn il-produtturi (prezzijiet “mill-fergħa”), min-naħa l-oħra, jinsabu fl-istess stadju kummerċjali. Hija ma tispjegax kif jista’ jkun hekk, filwaqt li, fl-istess ħin, hija tqis, impliċitament iżda neċessarjament, li l-prezzijiet ta’ bejgħ direttament iffatturati lill-ewwel xerrejja indipendenti mill-produtturi-esportaturi Ċiniżi, minn naħa, u l-prezzijiet ta’ bejgħ mill-ġdid iffatturati lil tali xerrejja mill-entitajiet ta’ bejgħ relatati ma’ dawn il-produtturi-esportaturi, min-naħa l-oħra, ma jinsabux fl-istess stadju kummerċjali (ara l-punt 136 iktar ’il fuq).

142

Mistoqsija waqt is-seduta, il-Kummissjoni indikat li l-produtturi tal-Unjoni u l-entitajiet ta’ bejgħ relatati magħhom jistgħu jiġu assimilati ma’ entitajiet ekonomiċi uniċi, peress li dawn l-entitajiet ta’ bejgħ relatati jeżerċitaw kompiti li normalment jaqgħu taħt dipartiment intern tal-bejgħ.

143

Madankollu, għandu jiġi osservat li, fil-premessa 105 tar-Regolament antidumping definittiv u fis-sottomissjonijiet bil-miktub tagħha, il-Kummissjoni indikat ukoll, minn naħa, li l-produtturi-esportaturi Ċiniżi u l-entitajiet ta’ bejgħ tagħhom relatati, b’mod partikolari fil-każ tal-grupp Hankook, kienu jikkostitwixxu entitajiet ekonomiċi uniċi u, min-naħa l-oħra, li l-eżistenza ta’ tali entitajiet ekonomiċi uniċi ma kinitx tipprekludiha milli tikkostruwixxi l-prezzijiet tal-importazzjoni.

144

F’dawn iċ-ċirkustanzi, il-Kummissjoni la tistabbilixxi, u lanqas tallega, li l-entitajiet ta’ bejgħ relatati, rispettivament, mal-produtturi tal-Unjoni u mal-produtturi-esportaturi Ċiniżi għandhom irwoli ekonomiċi differenti, b’tali mod li l-ispejjeż BAĠ u l-profitti ta’ dawn l-entitajiet ta’ bejgħ relatati għandhom jiġu inklużi fil-prezz tal-prodott simili, iżda mhux fil-prezz tal-prodott ikkonċernat.

145

Minn dan isegwi li, anki kieku jitqies li huwa xieraq, l-approċċ tal-Kummissjoni li jikkonsisti fit-teħid inkunsiderazzjoni biss tal-prezzijiet ta’ importazzjoni, reali jew ikkostruwiti, fil-livell tal-fruntiera tal-Unjoni ma jippermettix li tiġi stabbilita, f’dan il-każ, in-natura ekwa tal-paragun ta’ dawn il-prezzijiet mal-prezzijiet ta’ bejgħ mill-ġdid iffatturati lill-ewwel xerrejja indipendenti minn entitajiet ta’ bejgħ relatati mal-produtturi tal-Unjoni.

146

Fit-tieni lok, sabiex tiġġustifika l-użu ta’ prezzijiet tal-importazzjoni kkostruwiti fil-fruntiera tal-Unjoni, il-Kummissjoni tinvoka, minn naħa, ir-Regolament ta’ Implimentazzjoni tal-Kunsill (UE) Nru 217/2013 tal‑11 ta’ Marzu 2013 li jimponi dazju antidumping definittiv u jiġbor b’mod definittiv id-dazju provviżorju impost fuq l-importazzjonijiet ta’ ċerti folji tal-aluminju f’rombli li joriġinaw mir-Repubblika Popolari taċ-Ċina (ĠU 2013, L 69, p. 11) (premessi 51 sa 59 tal-imsemmi regolament ta’ implimentazzjoni), u, min-naħa l-oħra, ir-rapport ta’ grupp speċjali tal-Organizzazzjoni Dinjija tal-Kummerċ (WTO) dwar it-tilwima “Iċ-Ċina – Miżuri Antidumping u Kumpensatorji għall-Prodotti tat-Tiġieġ tal-Brojlers li Ġejjin mill-Istati Uniti”, adottat fil‑25 ta’ Settembru 2013 (WT/DS 427/R) (punti 7.485 sa 7.489 tal-imsemmi rapport).

147

F’dan ir-rigward, huwa biżżejjed li jiġi kkonstatat li, kemm fir-Regolament ta’ Implimentazzjoni kif ukoll fir-rapport imsemmi fil-punt 146 iktar ’il fuq, il-prezzijiet tal-importazzjonijiet ikkostruwiti fil-fruntiera tal-Unjoni kienu pparagunati ma’ prezzijiet ta’ bejgħ iffatturati mill-produtturi tal-Unjoni, u mhux ma’ prezzijiet ta’ bejgħ mill-ġdid iffatturati minn entitajiet ta’ bejgħ relatati ma’ dawn tal-aħħar. B’hekk, l-eżempji ċċitati mill-Kummissjoni huma irrilevanti għas-soluzzjoni ta’ dawn it-tilwimiet.

148

Fit-tielet lok, il-Kummissjoni ssostni li s-sitwazzjoni fil-kawżi li taw lok għas-sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni (T‑301/16, EU:T:2019:234), u tal‑10 ta’ April 2019, Jindal Saw u Jindal Saw Italia vs Il‑Kummissjoni (T‑300/16, EU:T:2019:235), kienet speċifika ħafna, sa fejn żewġ produtturi-esportaturi biss kienu kkooperaw fl-investigazzjoni u sa fejn il-“maġġoranza kbira” tal-bejgħ tal-produttur-esportatur inkwistjoni kien twettaq permezz ta’ entitajiet ta’ bejgħ relatati. Għaldaqstant, din is-soluzzjoni ma tistax tiġi applikata awtomatikament f’dawn il-kawżi, li fihom il-parti tal-bejgħ imwettqa permezz ta’ entitajiet ta’ bejgħ relatati mal-produtturi-esportaturi Ċiniżi hija ħafna inqas.

149

F’dan ir-rigward, għandu jiġi rrilevat, minn naħa, li l-obbligu li jiġu pparagunati l-prezzijiet fl-istess stadju kummerċjali huwa impost indipendentement min-numru ta’ produtturi-esportaturi li kkooperaw u, min-naħa l-oħra, li dan ma japplikax biss meta l-produtturi-esportaturi jwettqu l-“maġġoranza kbira” tal-bejgħ tagħhom permezz ta’ entitajiet ta’ bejgħ relatati. Minn dan isegwi li l-prinċipji stabbiliti fis-sentenzi ċċitati fil-punti 114 u 148 iktar ’il fuq jibqgħu kompletament applikabbli f’dan il-każ.

150

Barra minn hekk, għandu jiġi osservat li, skont id-data tal-Kummissjoni, il-proporzjon tal-bejgħ tal-produtturi-esportaturi Ċiniżi magħżula fil-kampjun imwettaq permezz ta’ entitajiet ta’ bejgħ relatati jammonta għal 0 % għall-grupp Xingyuan, għal 34 % għall-grupp Giti, għal 19 % għall-grupp Aeolus u għal 98.6 % għall-grupp Hankook. Barra minn hekk, bi tweġiba għal miżura ta’ organizzazzjoni tal-proċedura, il-Kummissjoni ppreċiżat li l-proporzjon tal-bejgħ imwettaq permezz ta’ entitajiet ta’ bejgħ relatati huwa ta’ 46.9 % għall-kampjun tal-produtturi-esportaturi Ċiniżi meħud kollu kemm hu u għal 87 % għall-kampjun tal-produtturi tal-Unjoni meħud kollu kemm hu. Minn dan isegwi li l-proporzjon tal-bejgħ imwettaq permezz ta’ entitajiet ta’ bejgħ relatati huwa għoli jew saħansitra għoli ħafna, fir-rigward ta’ kull wieħed miż-żewġ kampjuni meħuda kollha kemm huma.

151

Din is-sitwazzjoni ma tidhirx fundamentalment differenti minn dik ikkonstatata fil-kawżi msemmija fil-punt 148 iktar ’il fuq. Fil-fatt, f’dawn il-kawżi, il-Qorti Ġenerali rrilevat, minn naħa, li l-produttur-esportatur inkwistjoni kien iwettaq “il-maġġoranza” tal-bejgħ tiegħu fl-Unjoni permezz ta’ entitajiet ta’ bejgħ relatati u, min-naħa l-oħra, li “l-parti l-kbira” tal-bejgħ fl-Unjoni tal-industrija tal-Unjoni kien twettaq mill-entitajiet ta’ bejgħ relatati maż-żewġ produtturi tal-Unjoni li kkooperaw fl-investigazzjoni (sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punti 184 u 185, u tal‑10 ta’ April 2019, Jindal Saw vs Il‑Kummissjoni, T‑300/16, EU:T:2019:235, punti 249).

152

F’dawn iċ-ċirkustanzi, l-oġġezzjoni tal-Kummissjoni miġbura fil-qosor fil-punt 148 iktar ’il fuq għandha tiġi miċħuda.

153

Konsegwentement, hemm lok li tiġi kkonfermata l-konklużjoni li l-Kummissjoni manifestament ma wettqitx paragun ekwu bejn il-prezzijiet li jinsabu fl-istess stadju kummerċjali, u dan, tal-inqas, meta l-prodott ikkonċernat u l-prodott simili huma t-tnejn mibjugħa permezz ta’ entitajiet ta’ bejgħ relatati (ara l-punt 131 iktar ’il fuq).

154

Għaldaqstant, hemm lok li jiġi kkunsidrat li l-kalkolu tat-twaqqigħ tal-prezz tal-prodott ikkonċernat imwettaq mill-Kummissjoni fil-kuntest tar-regolamenti kkontestati huwa vvizzjat minn żball ta’ liġi kif ukoll minn żball manifest ta’ evalwazzjoni u li, konsegwentement, dan il-kalkolu jikser l-Artikolu 3(2) u (3) tar-Regolament bażiku antidumping u l-Artikolu 8(1) u (2) tar-Regolament bażiku antisussidji.

155

Ma huwiex biżżejjed, sabiex iwassal għall-annullament tar-regolamenti kkontestati, li l-Kummissjoni wettqet żball fir-rigward tal-metodu ta’ kalkolu tal-marġni tat-twaqqigħ tal-prezzijiet, jeħtieġ ukoll li dan l-iżball kellu effett fuq id-determinazzjoni tal-eżistenza u tal-ammont tad-dannu jew fuq l-analiżi tar-rabta kawżali u li b’hekk affettwa l-kontenut tar-regolamenti kkontestati stess (ara, f’dan is-sens u b’analoġija, is-sentenzi tat‑28 ta’ Ottubru 2004, Shanghai Teraoka Electronic vs Il‑Kunsill, T‑35/01, EU:T:2004:317, punt 167, u tal‑25 ta’ Ottubru 2011, Transnational CompanyKazchrome u ENRC Marketing vs Il‑Kunsill, T‑192/08, EU:T:2011:619, punt 119).

156

Għaldaqstant, hemm lok li jiġi eżaminat, f’dan il-każ, jekk l-iżball imwettaq mill-Kummissjoni kellux effett fuq il-kontenut tar-regolamenti kkontestati. Għall-finijiet ta’ dan l-eżami, għandha ssir distinzjoni bejn l-effett eventwali ta’ dan l-iżball, l-ewwel, fuq il-livell tat-twaqqigħ tal-prezzijiet kif ukoll fuq l-analiżi tad-dannu u tar-rabta kawżali u, it-tieni, fuq il-marġni ta’ dannu kif ukoll fuq l-ammont tad-dazji antidumping u kumpensatorji definittivi kontenzjużi.

157

Fl-osservazzjonijiet bil-miktub tagħha u waqt is-seduta, il-Kummissjoni sostniet li, anki jekk jiġi stabbilit, l-iżball li hija akkużata bih ma kellux effett sinjifikattiv fil-livell tat-twaqqigħ tal-prezzijiet. Dan it-twaqqigħ tal-prezz jibqa’ sinjifikattiv għal maġġoranza kbira tal-importazzjonijiet.

158

Fl-ewwel lok, fl-istadju tal-kontroreplika, il-Kummissjoni pproduċiet kalkoli alternattivi tat-twaqqigħ tal-prezzijiet għal kull wieħed mill-erba’ gruppi ta’ produtturi-esportaturi Ċiniżi magħżula fil-kampjun. Fil-kuntest ta’ dawn il-kalkoli alternattivi, hija żiedet l-ispejjeż BAĠ u l-profitti tal-entitajiet ta’ bejgħ relatati ma’ dawn il-produtturi esportaturi. Sussegwentement hija pparagunat kull tranżazzjoni ma’ kodiċi ta’ numru ta’ kontroll tal-prodotti (NKP) iktar iddettaljat li issa jiddistingwi bejn erba’ tipi ta’ konsumaturi, jiġifieri, l-ewwel, il-bejjiegħa bl-ingrossa, distributuri jew negozjanti, it-tieni, il-bejjiegħa bl-imnut, it-tielet, l-utenti u, ir-raba’, il-konsumaturi l-oħra (bħal, pereżempju, il-manifatturi tat-tagħmir oriġinali, il-korpi tat-trasport pubbliku u l-armata). Skont il-kalkoli alternattivi tal-Kummissjoni, it-twaqqigħ tal-prezzijiet huwa fil-verità ftit ogħla minn dak ikkonstatat fir-regolamenti kkontestati għal kull wieħed mill-erba’ gruppi ta’ produtturi-esportaturi Ċiniżi magħżula fil-kampjun. Fil-fatt, it-twaqqigħ tal-prezzijiet tela’ minn 30.0 għal 32.4 % għall-grupp Xingyuan, minn 19.3 għal 23.1 % għall-grupp Giti, minn 22. għal 22.4 % għall-grupp Aeolus u minn 17. għal 19.2 % għall-grupp Hankook.

159

F’dan ir-rigward, għandu jiġi rrilevat li, fil-kuntest tal-kalkoli alternattivi tagħha, il-Kummissjoni ma llimitatx ruħha li tnaqqas l-ispejjeż BAĠ u l-profitti tal-entitajiet ta’ bejgħ relatati mal-produtturi-esportaturi Ċiniżi. Fil-fatt, hija bidlet ukoll parametru ieħor bl-użu ta’ kodiċi NKP iktar dettaljat minn issa’l quddiem jinkludi wkoll it-tip ta’ klijent. Minn dan isegwi li l-Kummissjoni mmodifikat il-metodu ta’ kalkolu tat-twaqqigħ tal-prezzijiet li huwa l-bażi tar-regolamenti kkontestati. Għaldaqstant, jekk tieħu inkunsiderazzjoni l-kalkoli alternattivi tal-Kummissjoni, il-Qorti Ġenerali tkun qed tagħmel sostituzzjoni tal-motivi.

160

Issa, għandu jitfakkar li, skont ġurisprudenza stabbilita, fil-kuntest ta’ rikors għal annullament, il-Qorti Ġenerali ma tistax tissostitwixxi l-motivazzjoni tagħha għal dik tal-awtur tal-att ikkontestat (ara s-sentenza tas‑26 ta’ Ottubru 2016, PT Musim Mas vs Il‑Kunsill, C‑468/15 P, EU:C:2016:803, punt 64 u l-ġurisprudenza ċċitata). Minn dan isegwi li l-Kummissjoni ma tistax tinvoka b’mod validu insostenn tar-regolamenti kkontestati motivi li ma jinsabux fihom u li hija semmiet biss wara l-preżentata tar-rikors (ara, f’dan is-sens, is-sentenza tal‑21 ta’ Marzu 1996, Farrugia vs Il‑Kummissjoni, T‑230/94, EU:T:1996:40, punt 36 u l-ġurisprudenza ċċitata).

161

Għaldaqstant, il-kalkoli alternattivi relatati mat-twaqqigħ tal-prezzijiet prodotti mill-Kummissjoni fl-istadju tal-kontroreplika ma jistgħux jittieħdu inkunsiderazzjoni mill-Qorti Ġenerali sabiex tevalwa l-effett tal-iżball imwettaq fuq il-livell tat-twaqqigħ tal-prezzijiet.

162

Fit-tieni lok, wara miżura ta’ organizzazzjoni tal-proċedura, il-Kummissjoni pproduċiet kalkoli alternattivi ġodda relatati mat-twaqqigħ tal-prezzijiet li jillimitaw ruħhom li jnaqqsu l-ispejjeż BAĠ u l-profitti tal-entitajiet ta’ bejgħ relatati mal-produtturi-esportaturi Ċiniżi u li ma jibdlux il-kodiċi NKP użat fir-regolamenti kkontestati. Fil-fehma tagħha, wara dawn il-kalkoli ġodda alternattivi, it-twaqqigħ tal-prezzijiet jibqa’ stabbli għal 30.0 % għall-grupp Xingyuan u jgħaddi minn 19.3 għal 18.5 % għall-grupp Giti, minn 22.2 għal 16.8 % għall-grupp Aeolus u minn 17.6 għal 7.3 % għall-grupp Hankook.

163

Anki jekk jitqies li huma eżatti (ħaġa li l-Kummissjoni għandha tiżgura ruħha fil-każ li r-rikorsi jintlaqgħu), il-kalkoli alternattivi ġodda inkwistjoni jippermettu li jiġu evalwati l-livelli ta’ twaqqigħ tal-prezzijiet ikkunsidrati li kienu jirriżultaw mill-metodu ssuġġerit mir-rikorrenti u li jikkonsisti fl-inklużjoni tal-ispejjeż BAĠ u l-profitti tal-entitajiet ta’ bejgħ relatati kemm min-naħa tal-produttur-importaturi Ċiniżi kif ukoll min-naħa tal-produtturi tal-Unjoni. Tali metodu kien jippermetti li jsir paragun ekwu tal-prezzijiet fil-każijiet fejn il-prodott ikkonċernat u l-prodott simili huma t-tnejn mibjugħa permezz ta’ entitajiet ta’ bejgħ relatati.

164

Mill-kalkoli alternattivi ġodda inkwistjoni jirriżulta li, kieku l-Kummissjoni kienet segwiet il-metodu rrakkomandat mir-rikorrenti, it-twaqqigħ tal-prezzijiet kien ikun inqas għal tlieta mill-erba’ gruppi ta’ produtturi-esportaturi Ċiniżi inklużi fil-kampjun, jiġifieri l-gruppi Giti, Aeolus u Hankook. Issa, skont iċ-ċifri pprovduti mill-Kummissjoni fir-rigward tal-piż relattiv ta’ kull wieħed mill-gruppi ta’ produtturi esportaturi Ċiniżi magħżula fil-kampjun fil-bejgħ totali tal-esportazzjoni mwettaq minn dawn tal-aħħar (17 % għall-grupp Xingyuan, 30 % għall-grupp Giti, 17 % għall-grupp Aeolus u 36 % għall-grupp Hankook), il-gruppi Giti, Aeolus u Hankook jirrappreżentaw flimkien 83 % tal-bejgħ totali għall-esportazzjoni fid-dawl tal-kampjun. Barra minn hekk, id-differenza kkonstatata hija sinjifikattiva għal minn tal-inqas tnejn minn dawn il-gruppi, jiġifieri l-gruppi Aeolus u Hankook, li jirrappreżentaw għalihom 53 % tal-imsemmi bejgħ.

165

F’dawn iċ-ċirkustanzi, u fid-dawl b’mod partikolari tal-piż relattiv tad-diversi gruppi ta’ produtturi-esportaturi Ċiniżi magħżula fil-kampjun, jidher li l-livell globali tat-twaqqigħ tal-prezzijiet fid-dawl tal-kampjun meħud kollu kemm hu kien, huwa wkoll, sinjifikattivament inqas kieku l-Kummissjoni kienet segwiet il-metodu rrakkomandat mir-rikorrenti. Sussegwentement, il-marġni medju ponderat ta’ twaqqigħ tal-prezz kien ħafna inqas minn dik ta’ 21 % stabbilit fir-regolamenti kkontestati (punt 123 iktar ’il fuq).

166

Għaldaqstant, il-kalkoli l-ġodda alternattivi inkwistjoni juru li l-iżball imwettaq mill-Kummissjoni seta’ kellu effett fuq il-livell tat-twaqqigħ tal-prezzijiet u wassal, f’dan il-każ, għal stima eċċessiva sinjifikattiva ta’ dan it-twaqqigħ tal-prezz.

167

Ċertament, jidher li, kif tirrileva l-Kummissjoni, anki wara l-kalkoli alternattivi l-ġodda inkwistjoni, il-marġni tat-twaqqigħ tal-prezzijiet jibqa’ l-istess għall-grupp Xingyuan u jibqa’ sinjifikattiv għall-erba’ gruppi ta’ produtturi-esportaturi Ċiniżi.

168

Madankollu, għandu jiġi osservat li l-Kummissjoni kkonkludiet li kien hemm dannu kbir għall-industrija tal-Unjoni u rabta kawżali billi bbażat ruħha biss fuq il-livell globali ta’ twaqqigħ tal-prezz ta’ 21 %, u mhux fuq il-livelli ta’ twaqqigħ tal-prezz individwali tal-erba’ produtturi-esportaturi Ċiniżi inklużi fil-kampjun (ara l-punt 123 iktar ’il fuq). Issa, dan il-livell globali ta’ twaqqigħ tal-prezz kien ikun sinjifikattivament inqas li kieku l-Kummissjoni ma wettqitx l-iżball li bih ġiet akkużata (ara l-punt 165 iktar ’il fuq).

169

Fit-tielet lok, il-Kummissjoni tinvoka statistika dwar l-importazzjonijiet, jiġifieri l-istatistika tal-Eurostat (l-Uffiċċju tal-Istatistika tal-Unjoni Ewropea) u tal-istatistika Ċiniża, kif ukoll il-produzzjoni tal-Unjoni, jiġifieri data pprovduta mill-produtturi tal-Unjoni li tagħhom sar kampjun. Minn din l-istatistika jirriżulta li d-differenzi bejn il-prezzijiet tal-importazzjonijiet u l-prezzijiet tal-industrija tal-Unjoni huma sinjifikattivi ħafna, peress li, matul il-perijodu kkunsidrat, il-prezz medju għall-unità tal-importazzjonijiet Ċiniżi kien jirrappreżenta biss bejn 59.08 u 64.13 % tal-prezz tal-prodotti tal-Unjoni.

170

Madankollu, għandu jiġi kkonstatat li, fir-rigward tal-importazzjonijiet miċ-Ċina, il-Kummissjoni issa tinvoka statistika makroekonomika u mhux statistika li tirriżulta mill-produtturi-esportaturi Ċiniżi magħżula fil-kampjun. Barra minn hekk, hija tinvoka, kemm min-naħa tal-importazzjonijiet kif ukoll tal-produzzjoni tal-Unjoni, statistika mhux ipproċessata, globali u mhux ponderata, li ma tiħux inkunsiderazzjoni t-tipi ta’ prodotti u s-segmentazzjoni tal-prodott ikkonċernat fi tliet kategoriji. Għaldaqstant, l-istatistika differenti invokata mill-Kummissjoni ma tippermettix li jiġi ġġustifikat l-ammont tal-marġni ta’ twaqqigħ tal-prezzijiet, ikkalkolat abbażi tal-prezzijiet ta’ bejgħ medji ponderati, għal kull segment u tip ta’ prodott, skont il-metodu deskritt fil-punti 116 sa 122 iktar ’il fuq.

171

Mill-kunsiderazzjonijiet preċedenti jirriżulta li l-ksur mill-Kummissjoni tal-obbligu tagħha li twettaq paragun ekwu tal-prezzijiet kellu impatt, barra minn hekk sinjifikattiv, fuq id-determinazzjoni tal-livell tat-twaqqigħ tal-prezzijiet.

172

Il-Kummissjoni ssostni li ma ntweriex li l-konklużjoni dwar l-eżistenza ta’ dumping dannuż jew ta’ sussidji dannużi kienet tkun differenti fl-assenza tal-iżball allegat mir-rikorrenti fil-kalkolu tat-twaqqigħ tal-prezzijiet.

173

F’dan ir-rigward, mill-premessi 150, 217, 219 u 230 tar-Regolament antidumping provviżorju u mill-premessi 258 u 265 tar-Regolament antidumping definittiv jirriżulta, minn naħa, u mill-premessi 659, 830, 837, 839, 842 u 868 tar-Regolament antisussidji, min-naħa l-oħra, li, sabiex tistabbilixxi l-eżistenza ta’ dannu sostnut mill-industrija tal-Unjoni u ta’ rabta kawżali bejn l-importazzjonijiet li huma s-suġġett ta’ dumping jew ta’ sussidji u dan id-dannu, il-Kummissjoni bbażat ruħha b’mod partikolari fuq it-twaqqigħ tal-prezzijiet. F’diversi okkażjonijiet, hija rrilevat il-livell “sinjifikattiv” jew “sostanzjali” ta’ dan it-twaqqigħ tal-prezzijiet. B’mod partikolari, fil-premessa 219 tar-Regolament antidumping provviżorju u fil-premessa 839 tar-Regolament antisussidji, hija indikat li dan it-twaqqigħ eċċessiv fil-prezzijiet kien, biż-żieda qawwija tal-importazzjonijiet, wieħed miż-żewġ fatturi prinċipali li għandhom jittieħdu inkunsiderazzjoni sabiex jiġu evalwati l-effetti tal-importazzjonijiet li huma s-suġġett ta’ dumping jew ta’ sussidji.

174

Minn dan isegwi li l-Kummissjoni tat importanza determinanti għat-twaqqigħ tal-prezzijiet kif ikkalkolat fir-regolamenti kkontestati u li dan it-twaqqigħ tal-prezz jagħti lok għall-konklużjoni li l-importazzjonijiet tal-prodott ikkonċernat huma l-kawża tad-dannu lill-industrija tal-Unjoni. Din il-konstatazzjoni ma hijiex ikkontestata mill-fatt, allegat mill-Kummissjoni, li din tal-aħħar ħadet inkunsiderazzjoni wkoll fatturi oħra.

175

Għandu jingħad ukoll li, fil-kuntest tal-istħarriġ tal-legalità previst fl-Artikolu 263 TFUE, ma hijiex il-Qorti Ġenerali li għandha tevalwa jekk il-Kummissjoni setgħetx ukoll tikkonkludi li jeżisti dumping dannuż jew sussidji dannużi billi tibbaża ruħha fuq livell ta’ twaqqigħ tal-prezzijiet inferjuri għal dak, stmat b’mod għoli wisq, adottat fir-regolamenti kkontestati.

176

F’dawn iċ-ċirkustanzi, għandu jiġi konkluż li l-iżball imwettaq mill-Kummissjoni fil-kalkolu tat-twaqqigħ tal-prezzijiet kellu effett fuq il-konstatazzjoni, mill-Kummissjoni, tal-eżistenza ta’ dannu u ta’ rabta kawżali.

177

Fl-osservazzjonijiet bil-miktub tagħha u waqt is-seduta, il-Kummissjoni sostniet, essenzjalment, li ma ntweriex li l-marġnijiet ta’ dannu kienu inqas li kieku l-prezzijiet tal-importazzjoni kienu jinkludu l-ispejjeż BAĠ u l-profitti tal-entitajiet ta’ bejgħ relatati.

178

Fl-ewwel lok, il-Kummissjoni tinsisti fuq id-differenza bejn it-twaqqigħ tal-prezzijiet (undercutting) u t-twaqqigħ tal-prezzijiet indikattivi jew marġni ta’ dannu (underselling), li ma ġietx ittrattata fis-sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni (T‑301/16, EU:T:2019:234), u tal‑10 ta’ April 2019, Jindal Saw u Jindal Saw Italia vs Il‑Kummissjoni (T‑300/16, EU:T:2019:235).

179

F’dan ir-rigward, għandu jiġi rrilevat li l-għażla tal-istadju kummerċjali u l-inklużjoni jew le tal-ispejjeż BAĠ u tal-profitti tal-entitajiet ta’ bejgħ relatati mal-produtturi-esportaturi Ċiniżi u mal-produtturi tal-Unjoni taffettwa l-livell tal-prezzijiet tal-importazzjonijiet kif ukoll il-livell tal-prezzijiet tal-industrija tal-Unjoni. Issa, kif jirriżulta b’mod partikolari mill-premessi 254 sa 256 tar-Regolament antidumping provviżorju, il-kalkolu tal-marġni ta’ dannu jikkonsisti fil-paragun tal-prezzijiet tal-importazzjoni użati fil-kalkolu tat-twaqqigħ tal-prezzijiet, minn naħa, mal-prezzijiet mhux dannużi tal-prodott simili li jinkludi mira ta’ profitt li tirrifletti l-kundizzjonijiet normali tas-suq, min-naħa l-oħra. Għaldaqstant, żball dwar l-istadju kummerċjali li fih isir il-paragun tal-prezzijiet jista’ jkollu effett kemm fuq il-kalkolu tat-twaqqigħ tal-prezzijiet kif ukoll fuq il-kalkolu tal-marġni ta’ dannu.

180

Barra minn hekk, kuntrarjament għal dak li tallega l-Kummissjoni, il-Qorti Ġenerali ttrattat sew il-kwistjoni tal-marġnijiet ta’ dannu fis-sentenzi ċċitati fil-punt 178 iktar ’il fuq billi indikat li ma jistax jiġi eskluż li, kieku t-twaqqigħ tal-prezz kien ġie kkalkolat korrettament, il-marġni ta’ dannu lill-industrija tal-Unjoni kien jiġi stabbilit f’livell inqas minn dak tal-marġni ta’ dumping (sentenzi tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑301/16, EU:T:2019:234, punt 194, u tal‑10 ta’ April 2019, Jindal Saw u Jindal Saw Italia vs Il‑Kummissjoni, T‑300/16, EU:T:2019:235, punt 258).

181

Fit-tieni lok, fl-istadju tal-kontroreplika, il-Kummissjoni kkalkolat mill-ġdid il-marġniijiet tad-dannu skont l-istess modalitajiet bħal dawk użati sabiex jiġi kkalkolat mill-ġdid it-twaqqigħ tal-prezzijiet (punt 158 iktar ’il fuq). Skont dawn il-kalkoli alternattivi, il-marġnijiet ta’ dannu huma fir-realtà anki għola minn dak użat fir-regolamenti kkontestati għal kull wieħed mill-gruppi ta’ produtturi-esportaturi Ċiniżi magħżula fil-kampjun. Fil-fatt, wara l-imsemmija kalkoli alternattivi, il-marġni ta’ dannu kien ta’ 55.1 għal 60.8 % għall-grupp Xingyuan, minn 29.6 għal 36.8 % għall-grupp Giti, minn 37.3 għal 40.2 % għall-grupp Aeolus u minn 23.4 għal 29.6 % għall-grupp Hankook.

182

F’dan ir-rigward, huwa biżżejjed li jiġi rrilevat li, għall-istess raġunijiet bħal dawk imsemmija fil-punti 159 sa 161 iktar ’il fuq fir-rigward tal-kalkoli alternattivi relatati mat-twaqqigħ tal-prezzijiet, il-kalkoli alternattivi relatati mal-marġni ta’ dannu prodott mill-Kummissjoni fl-istadju tal-kontroreplika ma jistgħux jittieħdu inkunsiderazzjoni mill-Qorti Ġenerali mingħajr ma ssir sostituzzjoni tal-motivi.

183

Fit-tielet lok, wara miżura ta’ organizzazzjoni tal-proċedura, il-Kummissjoni wettqet kalkoli alternattivi ġodda relatati mal-marġni ta’ dannu skont l-istess modalitajiet bħal dawk użati għall-kalkoli alternattivi ġodda relatati mat-twaqqigħ tal-prezzijiet, jiġifieri mingħajr ma biddlet il-kodiċi NKP użat fir-regolamenti kkontestati (punt 162 iktar ’il fuq). Wara dawn il-kalkoli l-ġodda alternattivi, il-marġni ta’ dannu jibqa’ stabbli għal 55.1 % għall-grupp Xingyuan u jonqos minn 29.6 għal 28.5 % għall-grupp Giti, minn 37.3 għal 29.8 % għall-grupp Aeolus u minn 23.4 għal 10.3 % għall-grupp Hankook.

184

Anki jekk jitqies li huma eżatti (li l-Kummissjoni għandha tiżgura ruħha minn dan fil-każ li r-rikorsi jintlaqgħu), il-kalkoli alternattivi ġodda inkwistjoni jippermettu li jiġu evalwati l-marġnijiet ta’ dannu li kienu jiġu kkunsidrati mill-Kummissjoni kieku hija segwiet il-metodu rrakkomandat mir-rikorrenti u ħadet inkunsiderazzjoni l-ispejjeż BAĠ u l-profitti tal-entitajiet ta’ bejgħ relatati mal-produtturi-esportaturi Ċiniżi.

185

F’dan ir-rigward, għandha ssir distinzjoni bejn tliet sitwazzjonijiet.

186

L-ewwel, il-marġni ta’ dannu kien ikun inqas għal tlieta mill-erba’ gruppi ta’ produtturi-esportaturi Ċiniżi magħżula fil-kampjun, jiġifieri l-gruppi Giti, Aeolus u Hankook. Barra minn hekk, id-differenza kkonstatata kienet tkun sinjifikattiva għal minn tal-inqas tnejn minn dawn il-gruppi, jiġifieri l-gruppi Aeolus u Hankook.

187

It-tieni, fid-dawl b’mod partikolari tal-piż relattiv tad-diversi gruppi ta’ produtturi-esportaturi Ċiniżi magħżula fil-kampjun, jidher li l-marġni ta’ dannu fir-rigward tal-kampjun meħud kollu kemm hu kien ikun, huwa wkoll, sinjifikattivament inqas kieku l-Kummissjoni kienet segwiet il-metodu rrakkomandat mir-rikorrenti. Sussegwentement, il-marġni ta’ dannu medju ponderat kien sinjifikattivament inqas minn dak ta’ 32.39 % adottat fir-regolamenti kkontestati. Issa, kif jirriżulta mit-Tabella 11 tar-Regolament antidumping definittiv u mit-tabella li tinsab fil-premessa 933 tar-Regolament antisussidji, hija din l-aħħar marġni ta’ dannu li ntużat għall-produtturi-esportaturi Ċiniżi elenkati fl-Annessi I u II tar-regolamenti kkontestati u li kienu kkooperaw, skont il-każ, fl-investigazzjoni antidumping jew fl-investigazzjoni antisussidji.

188

F’dawn iċ-ċirkustanzi, il-kalkoli alternattivi ġodda inkwistjoni juru li l-iżball imwettaq mill-Kummissjoni wassalha sabiex stmat b’mod għoli wisq il-marġni ta’ dannu kkunsidrat għall-produtturi-esportaturi kollha elenkati fil-punt 28 iktar ’il fuq li jew jappartjenu għall-gruppi Giti, Aeolus u Hankook, jew huma elenkati fl-Annessi I u II tar-regolamenti kkontestati. Din il-konstatazzjoni ma hijiex ikkontestata mill-fatt, irrilevat mill-Kummissjoni, li, anki wara dawn il-kalkoli alternattivi l-ġodda, il-marġni ta’ dannu jibqa’ sinjifikattiv fir-rigward ta’ kull wieħed mill-gruppi ta’ produtturi-esportaturi Ċiniżi.

189

It-tielet, skont il-kalkoli l-ġodda alternattivi inkwistjoni, il-marġni ta’ dannu jibqa’ l-istess għal 55.1 % għall-grupp Xingyuan. Issa, kif jirriżulta mit-Tabella 11 tar-Regolament antidumping definittiv u mit-tabella li tinsab fil-premessa 933 tar-Regolament antisussidji, huwa dan il-marġni ta’ dannu, l-ogħla kkonstatat fost il-produtturi-esportaturi Ċiniżi magħżula fil-kampjun, li ġie applikat għall-produtturi-esportaturi Ċiniżi li ma kkooperawx, skont il-każ, fl-investigazzjoni antidumping jew fl-investigazzjoni antisussidji. Fil-prattika, dan il-marġni ta’ dannu residwu ta’ 55.07 % huwa eżattament applikabbli għall-“kumpaniji l-oħra kollha” mhux identifikati b’isimhom fir-regolamenti kkontestati u, b’mod partikolari, għal Weifang Yuelong Rubber u għal Hefei Wanli Tire. Din hija wkoll applikabbli għal Zhongce Rubber Group biss fil-proċedura antisussidji, peress li din il-kumpannija hija msemmija fl-Anness II tar-Regolament antisussidji.

190

Madankollu, għandu jiġi osservat li l-kalkoli alternattivi ġodda inkwistjoni jippermettu biss li jiġu nnewtralizzati l-effetti tal-iżball li jikkonsisti fil-paragun tal-prezzijiet ta’ bejgħ fuq l-importazzjoni kkostruwiti fil-livell tal-fruntiera tal-Unjoni, minn naħa, ma’ prezzijiet ta’ bejgħ mill-ġdid iffatturati minn entitajiet ta’ bejgħ relatati mal-produtturi tal-Unjoni, min-naħa l-oħra. Għall-kuntrarju, dawn ma jippermettux li jiġu nnewtralizzati l-effetti eventwali tal-iżball li jikkonsisti fil-paragun tal-prezzijiet ta’ bejgħ reali ffatturati direttament lil konsumaturi tal-Unjoni mill-produtturi-esportaturi Ċiniżi, minn naħa, u tal-prezzijiet ta’ bejgħ mill-ġdid ipprattikati minn entitajiet ta’ bejgħ relatati mal-produtturi tal-Unjoni, min-naħa l-oħra. Issa, dan l-aħħar paragun huwa wkoll wieħed mill-elementi li jikkostitwixxu l-assenza ta’ paragun ekwu bejn il-prezzijiet li jinsabu fl-istess stadju kummerċjali (ara l-punti 138 u 145 iktar ’il fuq).

191

F’dawn iċ-ċirkustanzi, ma jistax jiġi kompletament eskluż li, kieku l-Kummissjoni wettqet paragun ekwu bejn il-prezzijiet fl-istess stadju kummerċjali, hija kienet tikkunsidra, għall-grupp Xingyuan u, sussegwentement, għat-tliet kumpanniji msemmija fil-punt 189 iktar ’il fuq, marġni ta’ dannu inferjuri għal dak ta’ 55.07 % stabbilit fir-regolamenti kkontestati.

192

Għaldaqstant, għandu jiġi kkunsidrat li l-ksur mill-Kummissjoni tal-obbligu tagħha li twettaq paragun ekwu tal-prezzijiet kellu, jew seta’ kellu, effett fuq id-determinazzjoni tal-marġnijiet ta’ dannu għall-produtturi-esportaturi Ċiniżi kollha, identifikati jew le fir-regolamenti kkontestati.

193

Fl-osservazzjonijiet bil-miktub tagħha, il-Kummissjoni ssemmi r-“regola tal-inqas dazju”. B’mod partikolari, fil-Kawża T‑72/19, hija ssostni li l-argumenti tar-rikorrenti huma kompletament ineffettivi sa fejn, skont din ir-regola, il-livell tad-dazji kumpensatorji definittivi ġie stabbilit b’riferiment għall-ammont tas-sussidji kkonstatati, u mhux b’riferiment għall-marġni ta’ dannu.

194

F’dan ir-rigward, għandu jitfakkar li, skont it-tieni subparagrafu tal-Artikolu 9(4) tar-Regolament bażiku antidumping, l-ammont ta’ dazju antidumping definittiv ma jeċċedix il-marġni ta’ dumping stabbilit imma għandu jkun inqas minn dan il-marġni, jekk dan id-dazju inqas ikun suffiċjenti sabiex jelimina d-dannu kkawżat lill-industrija tal-Unjoni. Bl-istess mod, skont it-tielet subparagrafu tal-Artikolu 15(1) tar-Regolament bażiku antisussidji, l-ammont tad-dazju kumpensatorju definittiv ma għandux jeċċedi l-ammont totali tas-sussidju suġġett għall-miżuri kumpensatorji iżda għandu jkun inqas minn dan l-inqas ammont, jekk dan id-dazju inqas ikun adegwat għall-eliminazzjoni tad-dannu kkawżat lill-industrija tal-Unjoni.

195

Minn dan jirriżulta li, meta l-Kummissjoni tistabbilixxi kemm dazju antidumping kif ukoll dazju kumpensatorju, dawn iż-żewġ dazji ma jistgħux, alternattivament jew kumulattivament, jaqbżu l-livell tal-marġni ta’ dannu (ara, f’dan is-sens, is-sentenza tal‑11 ta’ Settembru 2014, Gold East Paper u Gold Huasheng Paper vs Il‑Kunsill, T‑444/11, EU:T:2014:773, punt 217).

196

F’dan il-każ, mit-Tabella 11 tar-Regolament antidumping definittiv u mit-tabella li tinsab fil-premessa 933 tar-Regolament antisussidji jirriżulta li, għall-produtturi-esportaturi Ċiniżi kollha, il-marġni ta’ dannu (li jvarja bejn 23.41 u 55.07 %) ġie stabbilit f’livell inqas mill-marġni ta’ dumping (li jvarja bejn 56.8 u 106.7 %), iżda ogħla mill-marġni ta’ sussidju (li jvarja bejn 2.06 u 51.08 %). F’dawn iċ-ċirkustanzi, u kif jirriżulta mill-premessa 929 tar-Regolament antisussidji, il-Kummissjoni ddeċidiet li tistabbilixxi, minn naħa, dazju kumpensatorju definittiv stabbilit iffissat fil-livell tal-ammonti definittivi ta’ sussidji suġġetti għal miżuri kumpensatorji u, min-naħa l-oħra, dazju antidumping definittiv li jippermetti li jintlaħaq il-livell ta’ eliminazzjoni tad-dannu mingħajr ma jinqabeż dan il-livell. Madankollu, ebda dazju antidumping definittiv ma ġie stabbilit fir-rigward tal-produtturi-esportaturi elenkati fl-Annessi II tar-regolamenti kkontestati, bħal Zhongce Rubber Group (punt 78 iktar ’il fuq), li għalihom il-marġni ta’ dannu magħżul huwa inqas fil-proċedura antidumping (32.39 %) milli fil-proċedura antisussidji (55.07 %).

197

L-ewwel, minn dan isegwi li, għall-produtturi-esportaturi Ċiniżi, identifikati jew le fir-regolamenti kkontestati, bl-eċċezzjoni ta’ dawk elenkati fl-Annessi II ta’ dawn ir-regolamenti, ir-rata kumulattiva tad-dazju antidumping definittiv u tad-dazju kumpensatorju definittiv hija ugwali għall-marġni ta’ dannu. Konsegwentement, skont ir-“regola tal-inqas dazju” stabbilita fid-dispożizzjonijiet imfakkra fil-punt 194 iktar ’il fuq u l-ġurisprudenza mfakkra fil-punt 195 iktar ’il fuq, kwalunkwe żball li jaffettwa l-kalkolu tal-marġni ta’ dannu għandu effett fuq il-legalità tal-ammont totali akkumulat tad-dazji antidumping u kumpensatorji definittivi stabbiliti fuq il-prodotti mmanifatturati mill-imsemmija produtturi-esportaturi. Issa, kif ġie rrilevat fil-punt 192 iktar ’il fuq, il-metodu ta’ paragun tal-prezzijiet użat mill-Kummissjoni ħoloq distorsjoni fil-kalkolu tal-marġni ta’ dannu għall-produtturi-esportaturi Ċiniżi kollha, identifikati jew le fl-imsemmija regolamenti.

198

It-tieni, fir-rigward tal-produtturi-esportaturi elenkati fl-Annessi II tar-regolamenti kkontestati, bħal Zhongce Rubber Group, huwa minnu li dawn kienu suġġetti biss għal dazju kumpensatorju definittiv li r-rata tiegħu (51.08 %) hija inqas mill-marġni ta’ dannu tagħhom fil-proċedura antisussidji (55.07 %). Madankollu, fid-dawl b’mod partikolari tad-differenza żgħira li teżisti bejn ir-rata ta’ dan id-dazju kumpensatorju definittiv u dan il-marġni ta’ dannu, ma jistax jiġi eskluż li, kieku l-imsemmi marġni ta’ dannu kien ġie kkalkolat b’mod korrett, dan kien jiġi stabbilit f’livell inqas għal dak tal-marġni ta’ sussidju.

199

Għaldaqstant, għandu jiġi konkluż li l-ksur mill-Kummissjoni tal-obbligu tagħha li twettaq paragun ekwu tal-prezzijiet kellu effett fuq l-ammont totali akkumulat tad-dazji antidumping u kumpensatorji definittivi għall-produtturi-esportaturi Ċiniżi kollha, identifikati jew le fir-regolamenti kkontestati.

200

Mill-kunsiderazzjonijiet preċedenti jirriżulta li l-iżball ikkonstatat fil-kalkolu tat-twaqqigħ tal-prezzijiet kellu effett, minn naħa, fuq l-analiżi tal-Kummissjoni dwar l-eżistenza ta’ dannu u ta’ rabta kawżali u, min-naħa l-oħra, fuq il-kalkoli tagħha relatati mal-ammont tad-dazji antidumping u kumpensatorji definittivi. Minn dan isegwi li dan l-iżball huwa tali li jaffettwa l-legalità tar-regolamenti kkontestati.

201

Konsegwentement, it-tieni lment tat-tieni parti tat-tielet motivi huwa fondat u għandu jintlaqa’.

202

Il-fatt li ntlaqa’ t-tieni lment tat-tieni parti tat-tielet motivi huwa, fih innifsu, tali li jservi ta’ bażi għall-annullament tar-regolamenti kkontestati sa fejn dawn jistabbilixxu dazji antidumping u kumpensatorji definittivi fuq l-importazzjonijiet tal-prodotti mmanifatturati mill-produtturi-esportaturi elenkati fil-punt 28 iktar ’il fuq, bla ħsara għall-inammissibbiltà kkonstatata fil-punt 82 iktar ’il fuq.

203

Madankollu, il-Kummissjoni titlob lill-Qorti Ġenerali, fil-każ li tilqa’ dan l-ilment, tannulla r-regolamenti kkontestati biss sa fejn id-dazji antidumping u kumpensatorji definittivi kontenzjużi ġew stabbiliti f’livell ogħla mill-marġni ta’ dannu li jirriżulta mill-kalkoli alternattivi l-ġodda li hija wettqet.

204

F’dan ir-rigward, l-ewwel, għandu jiġi rrilevat li l-iżball imwettaq mill-Kummissjoni fil-kalkolu tat-twaqqigħ tal-prezzijiet kellu effett fuq l-analiżi tagħha dwar l-eżistenza stess tad-dannu kif ukoll tar-rabta kawżali (ara l-punti 176 u 200 iktar ’il fuq), b’tali mod li hija għandha tiġi ssanzjonata bl-annullament totali tad-dazji antidumping u kumpensatorji definittivi kontenzjużi.

205

It-tieni, ma huwiex stabbilit mill-provi fil-proċess, li l-kalkoli alternattivi l-ġodda mwettqa mill-Kummissjoni huma suffiċjenti sabiex jinnewtralizzaw kompletament l-iżball imwettaq (ara l-punti 190 u 191 iktar ’il fuq). Minn dan isegwi li dawn il-kalkoli ma jippermettux li jiġi ddeterminat bi preċiżjoni sa fejn id-dazji antidumping u kumpensatorji definittivi kontenzjużi jibqgħu parzjalment fondati.

206

It-tielet, l-għażla tal-istadju kummerċjali rilevanti sabiex isir paragun ekwu tal-prezzijiet tikkostitwixxi stadju preliminari indispensabbli għall-kalkolu tat-twaqqigħ tal-prezzijiet, il-marġni ta’ dannu kif ukoll ir-rata tad-dazju antidumping jew kumpensatorju applikabbli. Minn dan isegwi li l-modifika tal-istadju kummerċjali li fuqu bbażat ruħha l-Kummissjoni sabiex twettaq paragun ekwu tal-prezzijiet tfisser sostituzzjoni tal-motivi u taffettwa s-sustanza stess tar-regolamenti kkontestati. Konsegwentement, id-dazji antidumping u kumpensatorji definittivi kontenzjużi ma jistgħux jinżammu, lanqas parzjalment, minħabba li huma fondati fuq parti mill-ammont tagħhom (ara, f’dan is-sens u b’analoġija, is-sentenza tal‑15 ta’ Settembru 2016, Unitec Bio vs Il‑Kunsill, T‑111/14, EU:T:2016:505, punt 76).

207

Għaldaqstant, l-aċċettazzjoni tat-tieni lment tat-tieni parti tat-tielet motivi hija tali li twassal għall-annullament tad-dazji antidumping u kumpensatorji definittivi kontenzjużi fl-intier tagħhom, sa fejn dawn id-dazji huma kkontestati permezz ta’ talbiet ammissibbli (ara l-punt 202 iktar ’il fuq).

[omissis]

278

Mill-kunsiderazzjonijiet preċedenti jirriżulta li:

[omissis]

Għal dawn il-motivi,

IL-QORTI ĠENERALI (L-Għaxar Awla Estiża)

taqta’ u tiddeċiedi: