–

għall-Gvern Ċek, minn M. Smolek, O. Serdula, J. Vláčil u minn T. Machovičová, bħala aġenti,

–

għall-Gvern Ungeriż, minn M. Z. Fehér, G. Koós u minn Zs. Wagner, bħala aġenti,

–

għall-Gvern Olandiż, minn J. M. Hoogveld u M. K. Bulterman, bħala aġenti,

–

għall-Kummissjoni Ewropea, minn L. Armati, P. Němečková u K. Walkerová, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 56 TFUE.

2

Din it-talba tressqet fil-kuntest ta’ kawża bejn BONVER WIN a.s., u l-Ministerstvo financí ČR (il-Ministeru għall-Finanzi tar-Repubblika Ċeka) dwar il-legalità ta’ deċiżjoni li tirtira lil din il-kumpannija l-awtorizzazzjoni li topera logħob ta’ mħatri li hija kellha fit-territorju tal-belt ta’ Děčín (ir-Repubblika Ċeka).

3

L-Artikolu 50(4) taz-zákon č. 202/1990 Sb., o loteriích a jiných podobných hrách (il-Liġi Nru 202/1990 dwar il-Lotteriji u Logħob ieħor Simili), tas-17 ta’ Mejju 1990 (202/1990 Sb.), jipprovdi:

“Permezz ta’ digriet ta’ applikazzjoni ġenerali, komun jista’ jirrestrinġi l-operat tal-logħob ta’ mħatri […], ta’ lotteriji u ta’ logħob ieħor simili […] biss għall-perijodi u għall-postijiet elenkati f’dan id-digriet, jiddetermina l-perijodi u l-postijiet fejn l-operat tal-lotteriji u logħob ieħor simili huwa pprojbit jew jipprojbixxi kompletament l-operat tagħhom fit-territorju kollu tal-komun.”

4

L-Artikolu 1(1) tal-obecně závazná vyhláška města Děčín č. 3/2013, o regulaci provozování sázkových her, loterií a jiných podobných her (id-Digriet ta’ Applikazzjoni Ġenerali Nru 3/2013 tal-belt ta’ Děčín, li jirregola l-Operat tal-Logħob ta’ Mħatri, Lotteriji u Logħob ieħor Simili, iktar ’il quddiem id-“Digriet ta’ Applikazzjoni Ġenerali), adottat mill-Kunsill tal-Belt ta’ Děčín fuq il-bażi tal-Artikolu 50(4) tal-Liġi Nru 202/1990 dwar il-Lotteriji u Logħob ieħor Simili, huwa fformulat kif ġej:

“Fit-territorju kollu tal-belt ta’ Děčín, bl-esklużjoni tal-każinos li jinsabu fil-postijiet elenkati fl-Anness 1 ta’ dan id-digriet, huwa pprojbit l-operat:

5

BONVER WIN hija kumpannija kummerċjali stabbilita fir-Repubblika Ċeka li topera logħob ta’ mħatri.

6

Permezz ta’ deċiżjoni tat-22 ta’ Ottubru 2013, il-Ministeru għall-Finanzi rtira, konformement mad-Digriet ta’ Applikazzjoni Ġenerali Nru 3/2013, l-awtorizzazzjoni li BONVER WIN kellha sa dak iż-żmien għall-operat ta’ logħob ta’ mħatri fi stabbiliment li jinsab fit-territorju tal-belt ta’ Děčín, minħabba li l-post tal-operat ma kienx inkluż fost dawk elenkati fl-Anness 1 ta’ dan id-digriet.

7

BONVER WIN ressqet ilment kontra din id-deċiżjoni li ġie miċħud mill-Ministru għall-Finanzi fit-22 ta’ Lulju 2014.

8

Għaldaqstant, BONVER WIN ippreżentat rikors quddiem il-Městský soud v Praze (il-Qorti Muniċipali ta’ Praga, ir-Repubblika Ċeka), li ċaħdet ir-rikors. Din il-qorti rrilevat, għal dak li jikkonċerna l-argument dwar l-inkompatibbiltà tal-leġiżlazzjoni nazzjonali mad-dritt tal-Unjoni, li din tal-aħħar ma tapplikax għas-sitwazzjoni ta’ BONVER WIN, sa fejn din il-kumpannija ma għamlitx użu mid-dritt tagħha għal-libertà li jiġu pprovduti servizzi.

9

BONVER WIN ippreżentat appell ta’ kassazzjoni quddiem il-qorti tar-rinviju fejn sostniet li l-Městský soud v Praze (il-Qorti Muniċipali ta’ Praga) kienet wettqet żball meta kkonkludiet li d-dritt tal-Unjoni ma kienx applikabbli għall-kawża prinċipali. Hija ssostni li l-fatt, ikkorroborat minn ċertifikat stabbilit minn xhud, li parti mill-klijentela tal-istabbiliment tagħha f’Děčín, belt li tinsab madwar 25 km mill-fruntiera Ġermaniża, kienet komposta minn ċittadini ta’ Stati Membri oħra, jirrendi applikabbli l-Artikolu 56 TFUE.

10

Il-qorti tar-rinviju, li tindika l-eżistenza ta’ diverġenza fil-ġurisprudenza tagħha dwar l-applikabbiltà tad-dispożizzjonijiet tat-Trattat FUE dwar il-libertà li jiġu pprovduti servizzi għal sitwazzjonijiet paragunabbli ma’ dik inkwistjoni fil-kawża prinċipali, tenfasizza li leġiżlazzjoni bħal dik inkwistjoni fil-kawża prinċipali tista’ twassal għal restrizzjoni tal-libertà tad-destinatarji tas-servizzi. Din il-qorti tosserva, minn naħa, hekk kif jirriżulta mill-ġurisprudenza tal-Qorti tal-Ġustizzja, li s-servizzi li fornitur stabbilit fi Stat Membru jipprovdi, mingħajr ma jiċċaqlaq, lil destinatarju stabbilit fi Stat Membru ieħor jikkostitwixxu provvista ta’ servizzi transkonfinali u li tali destinatarji jistgħu wkoll ikunu turisti jew persuni li jiċċaqalqu fil-kuntest ta’ vjaġġ ta’ studju.

11

Min-naħa l-oħra, hija tqis li tali leġiżlazzjoni, li tapplika mingħajr distinzjoni għaċ-ċittadini nazzjonali u għaċ-ċittadini ta’ Stati Membri oħra, ma tistax, bħala regola ġenerali, taqa’ taħt id-dispożizzjonijiet dwar il-libertajiet fundamentali ggarantiti mit-Trattat FUE ħlief sa fejn din tapplika għal sitwazzjonijiet li għandhom rabta mal-kummerċ bejn l-Istati Membri.

12

Il-qorti tar-rinviju tqis madankollu li, għalkemm il-Qorti tal-Ġustizzja ċċarat l-applikabbiltà tal-Artikolu 56 TFUE għal sitwazzjonijiet li fihom fornitur joffri s-servizzi tiegħu bit-telefon jew bl-internet kif ukoll għal dawk li jirrigwardaw gruppi ta’ turisti li jikkostitwixxu destinatarji ta’ servizzi, hija ma stabbilixxietx b’mod ċar jekk dan l-artikolu huwiex applikabbli minħabba s-sempliċi fatt li grupp ta’ ċittadini ta’ Stat Membru ieħor tal-Unjoni Ewropea jista’ juża jew juża fi Stat partikolari servizz ipprovdut prinċipalment liċ-ċittadini nazzjonali. F’dan ir-rigward, il-qorti tar-rinviju tiddubita li żjara okkażjonali ta’ ċittadin wieħed ta’ Stat Membru ieħor tal-Unjoni fi stabbiliment li jipprovdi ċerti servizzi twassal awtomatikament għall-applikabbiltà tal-Artikolu 56 TFUE għal kull leġiżlazzjoni nazzjonali li tirregola b’mod ġenerali dan is-settur nazzjonali ta’ servizzi.

13

Barra minn hekk, il-qorti tar-rinviju tistaqsi, minn naħa, jekk għandhiex tiġi stabbilita fil-qasam tal-libertà li jiġu pprovduti servizzi, bħalma jeżisti fil-qasam tal-moviment liberu tal-merkanzija, regola de minimis, ibbażata fuq l-eżistenza ta’ rabta suffiċjenti tal-leġiżlazzjoni inkwistjoni mal-libertà li jiġu pprovduti servizzi. Jekk tali regola tiġi stabbilita, leġiżlazzjoni, li tapplika mingħajr distinzjoni għall-fornituri kollha li jeżerċitaw l-attività tagħhom fit-territorju tal-Istat Membru kkonċernat, li għandha effett marġinali fuq il-kummerċ bejn l-Istati Membri, ma taqax fil-kamp ta’ applikazzjoni tal-Artikolu 56 TFUE. Min-naħa l-oħra, din il-qorti tistaqsi jekk għandux jiġi traspost, fil-kuntest tal-libertà li jiġu pprovduti servizzi, it-tagħlim tas-sentenza tal-24 ta’ Novembru 1993, Keck u Mithouard (C‑267/91 u C‑268/91, EU:C:1993:905), u li jiġu esklużi mill-kamp ta’ applikazzjoni tal-Artikolu 56 TFUE l-miżuri applikabbli mingħajr distinzjoni, li jaffettwaw bl-istess mod, fid-dritt u fil-fatt, lill-fornituri kollha ta’ servizzi li jeżerċitaw l-attività tagħhom fit-territorju nazzjonali.

14

F’dawn iċ-ċirkustanzi, in-Nejvyšší správní soud (il-Qorti Amministrattiva Suprema) iddeċidiet li tissospendi l-proċedura quddiemha u li tagħmel lill-Qorti tal-Ġustizzja d-domandi preliminari li ġejjin:

15

Permezz tad-domandi preliminari tagħha, li għandhom jiġu eżaminati flimkien, il-qorti tar-rinviju essenzjalment tistaqsi jekk u, jekk ikun il-każ, taħt liema kundizzjonijiet, l-Artikolu 56 TFUE għandu jiġi interpretat fis-sens li japplika għas-sitwazzjoni ta’ kumpannija stabbilita fi Stat Membru li tkun tilfet l-awtorizzazzjoni tagħha sabiex topera logħob tal-ażżard, wara d-dħul fis-seħħ, f’dan l-Istat Membru, ta’ leġiżlazzjoni li tiddetermina l-postijiet li fihom huwa permess li jiġi organizzat tali logħob, li tapplika mingħajr distinzjoni għall-fornituri kollha li jeżerċitaw l-attività tagħhom fit-territorju ta’ dan l-Istat Membru, kemm jekk dawn il-fornituri jipprovdu servizzi liċ-ċittadini nazzjonali u kif ukoll jekk liċ-ċittadini ta’ Stati Membri oħra, meta din il-kumpanija ssostni li parti mill-klijentela tagħha toriġina minn Stat Membru differenti minn dak li fih hija stabbilita.

16

Sabiex tingħata risposta għal dawn id-domandi, għandu jitfakkar li leġiżlazzjonijiet nazzjonali bħal dawk inkwistjoni fil-kawża prinċipali, li japplikaw mingħajr distinzjoni għaċ-ċittadini ta’ Stati Membri differenti, ma jistgħux, bħala regola ġenerali, jaqgħu taħt id-dispożizzjonijiet dwar il-libertajiet fundamentali ggarantiti mit-Trattat FUE ħlief sa fejn dawn japplikaw għal sitwazzjonijiet li għandhom rabta mal-kummerċ bejn l-Istati Membri (sentenza tal-11 ta’ Ġunju 2015, Berlington Hungary et, C‑98/14, EU:C:2015:386, punt 24, u d-digriet tal-4 ta’ Ġunju 2019, Pólus Vegas, C‑665/18, mhux ippubblikat, EU:C:2019:477, punt 17).

17

Fil-fatt, id-dispożizzjonijiet tat-Trattat FUE fil-qasam tal-libertà li jiġu pprovduti servizzi ma japplikawx għal sitwazzjoni fejn l-elementi kollha jkunu limitati ġewwa Stat Membru wieħed (ara, f’dan is-sens, is-sentenza tal-15 ta’ Novembru 2016, Ullens de Schooten, C‑268/15, EU:C:2016:874, punt 47 u l-ġurisprudenza ċċitata).

18

Fid-dawl ta’ dan, għandu jitfakkar li l-Artikolu 56 TFUE jeżiġi l-eliminazzjoni ta’ kwalunkwe restrizzjoni għal-libertà li jiġu pprovduti servizzi, anki jekk din ir-restrizzjoni tapplika mingħajr distinzjoni għall-fornituri nazzjonali u għal dawk ta’ Stati Membri oħra, meta din tkun ta’ natura li tipprojbixxi, tfixkel jew tagħmel inqas attraenti l-attivitajiet tal-fornitur stabbilit fi Stat Membru ieħor, fejn huwa jkun jipprovdi legalment servizzi analogi. Barra minn hekk, il-libertà li jiġu pprovduti servizzi hija ta’ benefiċċju kemm għall-fornitur kif ukoll għad-destinatarju tas-servizzi (sentenza tat-8 ta’ Settembru 2009, Liga Portuguesa de Futebol Profissional u Bwin International, C‑42/07, EU:C:2009:519, punt 51 kif ukoll il-ġurisprudenza ċċitata). Din tinkludi l-libertà tad-destinatarji ta’ servizzi li jmorru fi Stat Membru ieħor sabiex jibbenefikaw minn servizz hemmhekk, mingħajr ma jiġu mfixkla minn restrizzjonijiet, u t-turisti għandhom jitqiesu li huma destinatarji ta’ servizzi (ara, f’dan is-sens, is-sentenzi tal-31 ta’ Jannar 1984, Luisi u Carbone, 286/82 u 26/83, EU:C:1984:35, punt 16; tat-2 ta’ Frar 1989, Cowan, 186/87, EU:C:1989:47, punt 15, kif ukoll tat-2 ta’ April 2020, Ruska Federacija, C‑897/19 PPU, EU:C:2020:262, punt 52).

19

F’dan ir-rigward, minn naħa, il-Qorti tal-Ġustizzja diġà ddeċidiet li s-servizzi li fornitur stabbilit fi Stat Membru jipprovdi, mingħajr ma jiċċaqlaq, lil destinatarju stabbilit fi Stat Membru ieħor jikkostitwixxu provvista ta’ servizzi transkonfinali, fis-sens tal-Artikolu 56 TFUE (sentenza tal-11 ta’ Ġunju 2015, Berlington Hungary et., C‑98/14, EU:C:2015:386, punt 26 kif ukoll il-ġurisprudenza ċċitata).

20

Min-naħa l-oħra, huwa irrilevanti li r-restrizzjoni fir-rigward ta’ fornitur ta’ servizzi hija imposta mill-Istat Membru tal-oriġini tiegħu. Fil-fatt, mill-ġurisprudenza tal-Qorti tal-Ġustizzja jirriżulta li l-libertà li jiġu pprovduti servizzi tikkonċerna mhux biss ir-restrizzjonijiet stabbiliti mill-Istat ospitanti iżda wkoll dawk stabbiliti mill-Istat ta’ oriġini (ara, f’dan is-sens, is-sentenza tal-10 ta’ Mejju 1995, Alpine Investments, C‑384/93, EU:C:1995:126, punt 30).

21

Għandu jiġi rrilevat li, kif ġie enfasizzat mill-Avukat Ġenerali fil-punt 50 tal-konklużjonijiet tiegħu, it-Trattat jindirizza r-restrizzjonijiet imposti fir-rigward tal-fornituri ta’ servizzi u dawk imposti fir-rigward tad-destinatarji ta’ servizzi b’mod identiku. Għaldaqstant, ladarba s-sitwazzjoni tkun taqa’ fil-kamp ta’ applikazzjoni tal-Artikolu 56 TFUE, kemm id-destinatarju kif ukoll il-fornitur ta’ servizz ikunu jistgħu jinvokaw l-imsemmi artikolu.

22

Għaldaqstant, il-Qorti tal-Ġustizzja diġà ddeċidiet li d-dritt għal-libertà li jiġu pprovduti servizzi jista’ jiġi invokat minn impriża fir-rigward tal-Istat li fih tkun stabbilita, meta s-servizzi jkunu pprovduti lil destinatarji stabbiliti fi Stat Membu ieħor (ara, f’dan is-sens, is-sentenza tal-10 ta’ Mejju 1995, Alpine Investments, C‑384/93, EU:C:1995:126, punt 30 u l-ġurisprudenza ċċitata).

23

Għandu, madankollu, jitfakkar li, adita minn qorti nazzjonali fil-kuntest ta’ sitwazzjoni li fiha l-elementi kollha huma limitati ġewwa Stat Membru wieħed, il-Qorti tal-Ġustizzja ma tistax, mingħajr indikazzjoni ta’ din il-qorti minbarra l-fatt li l-leġiżlazzjoni inkwistjoni tapplika mingħajr distinzjoni għaċ-ċittadini tal-Istat Membru kkonċernat u għaċ-ċittadini ta’ Stati Membri oħrajn, tqis li t-talba għall-interpretazzjoni preliminari li tirrigwarda d-dispożizzjonijiet tat-Trattat FUE dwar il-libertajiet fundamentali hija neċessarja għaliha għas-soluzzjoni tat-tilwima pendenti quddiemha. Fil-fatt, l-elementi konkreti li jippermettu li tiġi stabbilita rabta bejn is-suġġett jew iċ-ċirkustanzi ta’ tilwima, li l-elementi kollha tagħha huma limitati ġewwa l-Istat Membru kkonċernat, u l-Artikolu 56 TFUE għandhom jirriżultaw mid-deċiżjoni tar-rinviju (sentenza tal-15 ta’ Novembru 2016, Ullens de Schooten, C‑268/15, EU:C:2016:874, punt 54 u d-digriet tal-4 ta’ Ġunju 2019, Pólus Vegas, C‑665/18, mhux ippubblikat, EU:C:2019:477, punt 21).

24

Mill-ġurisprudenza tal-Qorti tal-Ġustizzja jirriżulta wkoll li l-eżistenza ta’ sitwazzjoni transkonfinali ma tistax tiġi preżunta minħabba s-sempliċi raġuni li ċittadini tal-Unjoni minn Stati Membri oħra jistgħu jagħmlu użu mill-possibbiltajiet ta’ servizzi offruti b’dan il-mod (ara, f’dan is-sens, id-digriet tal-4 ta’ Ġunju 2019, Pólus Vegas, C‑665/18, mhux ippubblikat, EU:C:2019:477, punt 24).

25

Fil-każ ineżami jsegwi li sempliċi allegazzjoni ta’ fornitur ta’ servizzi, li parti mill-klijentela tiegħu hija minn Stat Membru differenti minn dak fejn huwa stabbilit, ma hijiex biżżejjed sabiex tiġi stabbilita l-eżistenza ta’ sitwazzjoni transkonfinali, li tista’ taqa’ fil-kamp ta’ applikazzjoni tal-Artikolu 56 TFUE. Sabiex tagħmel lill-Qorti tal-Ġustizzja talba għal deċiżjoni preliminari dwar is-sitwazzjoni ta’ dan il-fornitur, il-qorti nazzjonali għandha turi l-fondatezza ta’ din l-allegazzjoni fid-deċiżjoni tar-rinviju.

26

Għal dak li jirrigwarda l-eventwali rilevanza tan-numru ta’ klijenti minn Stat Membru ieħor, hemm lok li tiġi miċħuda, kif ippropona l-Avukat Ġenerali fil-punt 82 tal-konklużjonijiet tiegħu, l-idea li għandha tiġi introdotta regola de minimis fil-qasam tal-libertà li jiġu pprovduti servizzi.

27

Għaldaqstant, għandu jiġi rrilevat li ċirkustanzi bħan-numru ta’ klijenti barranin li użaw is-servizzi, il-volum ta’ servizzi pprovduti jew il-portata limitata tar-restrizzjoni potenzjali għall-libertà li jiġu pprovduti servizzi, fuq il-livell ġeografiku jew fuq il-livell materjali, ma jaffettwawx l-applikabbiltà tal-Artikolu 56 TFUE.

28

B’mod partikolari, minn ġurisprudenza stabbilita jirriżulta li l-libertà msemmija f’dan l-artikolu tista’ tiġi invokata kemm fis-sitwazzjonijiet ikkaratterizzati mill-eżistenza ta’ destinatarju wieħed tas-servizzi (ara, f’dan is-sens, is-sentenza tat-2 ta’ Frar 1989, Cowan, 186/87, EU:C:1989:47, punti 15 u 20) kif ukoll f’dawk fejn ikun hemm numru indefinit ta’ destinatarji ta’ servizzi li jużaw numru indefinit ta’ servizzi pprovduti minn fornitur stabbilit fi Stat Membru ieħor (ara, f’dan is-sens, is-sentenzi tal-10 ta’ Mejju 1995, Alpine Investments, C‑384/93, EU:C:1995:126, punt 22, kif ukoll tas-6 ta’ Novembru 2003, Gambelli et., C‑243/01, EU:C:2003:597, punti 54 u 55).

29

Kif irrileva, essenzjalment, l-Avukat Ġenerali fil-punt 80 tal-konklużjonijiet tiegħu, jekk l-applikabbiltà tal-Artikolu 56 TFUE tkun tiddependi fuq kriterju kwantitattiv dan jipperikola l-applikazzjoni uniformi ta’ dan l-artikolu fi ħdan l-Unjoni, b’tali mod li tali kriterju ma jistax jiġi aċċettat.

30

Barra minn hekk, il-perspettiva tal-qorti tar-rinviju li miżura ta’ applikazzjoni ġenerali li tipprojbixxi, ħlief għall-eċċezzjonijiet li hija tiddetermina, l-operat tal-logħob tal-ażżard fit-territorju ta’ komun ta’ Stat Membru, li taffettwa, fid-dritt jew fil-fatt, bl-istess mod lill-fornituri kollha stabbiliti fit-territorju ta’ dan l-Istat Membru, kemm jekk dawn il-fornituri jipprovdu servizzi liċ-ċittadini nazzjonali u kemm jekk liċ-ċittadini ta’ Stati Membri oħra, ma taqax taħt il-kamp ta’ applikazzjoni ratione materiae tal-Artikolu 56 TFUE, ma tistax tintlaqa’.

31

Fil-fatt, il-Qorti tal-Ġustizzja diġà ddeċidiet li leġiżlazzjoni nazzjonali li tillimita d-dritt li jiġi operat logħob tal-azzard jew ta’ flus għal ċerti postijiet tista’ tikkostitwixxi ostakolu għal-libertà li jiġu pprovduti servizzi li jaqa’ taħt l-Artikolu 56 TFUE (ara, f’dan is-sens, is-sentenza tal-11 ta’ Settembru 2003, Anomar et., C‑6/01, EU:C:2003:446, punti 65 u 66).

32

Fil-każ ineżami, mit-talba għal deċiżjoni preliminari jirriżulta li l-belt ta’ Děčín, li tinsab madwar 25 km mill-fruntiera Ġermaniża, hija post magħżul miċ-ċittadini Ġermaniżi u li BONVER WIN ipproduċiet provi, fil-kuntest tal-proċedura nazzjonali, intiżi sabiex jistabbilixxu li parti mill-klijentela tagħha kienet komposta minn persuni minn Stati Membri oħra, b’tali mod li ma jistax jiġi sostnut li l-eżistenza ta’ klijentela barranija hija purament ipotetika.

33

Għaldaqstant, bla ħsara għall-verifika, mill-qorti tar-rinviju, tal-provi prodotti minn BONVER WIN, mill-kunsiderazzjonijiet preċedenti kollha jirriżulta li l-Artikolu 56 TFUE japplika f’sitwazzjoni bħal dik inkwistjoni fil-kawża prinċipali.

34

Madankollu, din il-konstatazzjoni hija bla ħsara għall-kompatibbiltà eventwali tal-leġiżlazzjoni nazzjonali inkwistjoni fil-kawża prinċipali mal-imsemmi artikolu. Il-Qorti tal-Ġustizzja ma ġietx adita bil-kwistjoni dwar jekk dan l-artikolu jipprekludix tali leġiżlazzjoni u lanqas ma għandha informazzjoni rilevanti li tippermetti li l-qorti tar-rinviju tingħata indikazzjonijiet utli f’dan ir-rigward.

35

Fid-dawl ta’ dawn il-kunsiderazzjonijiet, ir-risposta għad-domandi magħmula mill-qorti tar-rinviju għandha tkun li l-Artikolu 56 TFUE għandu jiġi interpretat fis-sens li japplika għas-sitwazzjoni ta’ kumpannija stabbilita fi Stat Membru, li tkun tilfet l-awtorizzazzjoni tagħha sabiex topera logħob tal-ażżard wara d-dħul fis-seħħ, f’dan l-Istat Membru, ta’ leġiżlazzjoni li tiddetermina l-postijiet li fihom huwa permess li jiġi organizzat tali logħob, li tapplika mingħajr distinzjoni għall-fornituri kollha li jeżerċitaw l-attività tagħhom fit-territorju ta’ dan l-Istat Membru, kemm jekk dawn il-fornituri jipprovdu servizzi liċ-ċittadini nazzjonali u kemm jekk liċ-ċittadini ta’ Stati Membri oħrajn, meta parti mill-klijentela tagħha tkun minn Stat Membru differenti minn dak li fih tkun stabbilita.

36

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Ir-Raba’ Awla) taqta’ u tiddeċiedi:

L-Artikolu 56 TFUE għandu jiġi interpretat fis-sens li japplika għas-sitwazzjoni ta’ kumpannija stabbilita fi Stat Membru, li tkun tilfet l-awtorizzazzjoni tagħha sabiex topera logħob tal-ażżard wara d-dħul fis-seħħ, f’dan l-Istat Membru, ta’ leġiżlazzjoni li tiddetermina l-postijiet li fihom huwa permess li jiġi organizzat tali logħob, li tapplika mingħajr distinzjoni għall-fornituri kollha li jeżerċitaw l-attività tagħhom fit-territorju ta’ dan l-Istat Membru, kemm jekk dawn il-fornituri jipprodu servizzi liċ-ċittadini nazzjonali u kemm jekk liċ-ċittadini ta’ Stati Membri oħrajn, meta parti mill-klijentela tagħha tkun minn Stat Membru differenti minn dak li fih tkun stabbilita.