1)

Is-sentenza tal-Qorti Ġenerali tal-Unjoni Ewropea tat-12 ta’ Marzu 2019, Franza vs Il-Kummissjoni (T-26/18, mhux ippubblikata, EU:T:2019:153), hija annullata sa fejn, minn naħa, il-Qorti Ġenerali ċaħdet l-azzjoni tar-Repubblika Franċiża dwar id-Deċiżjoni ta’ Implimentazzjoni tal-Kummissjoni (UE) 2017/2014 tat-8 ta’ Novembru 2017 li teskludi mill-finanzjament tal-Unjoni Ewropea ċertu nfiq li ġarrbu l-Istati Membri fil-kuntest tal-Fond Agrikolu Ewropew ta’ Garanzija (l-FAEG) u fil-kuntest tal-Fond Agrikolu Ewropew għall-Iżvilupp Rurali (l-FAEŻR) sa fejn, taħt il-motiv intitolat “Sistema ta’ kontroll defiċjenti b’mod gravi, Corse”, hija imponiet fuq dan l-Istat Membru korrezzjonijiet b’rata fissa ta’ 100 % applikati għal għajnuna diretta għas-superfiċji f’Haute-Corse għas-snin tat-talba 2013 u 2014, minħabba defiċjenzi fis-sistema ta’ kontroll għall-għajnuna għas-superfiċji f’Haute-Corse, u, min-naħa l-oħra, li ddeċidiet fuq l-ispejjeż.

2)

Id-Deċiżjoni ta’ Implimentazzjoni 2017/2014 hija annullata sa fejn, taħt il-motiv intitolat “Sistema ta’ kontroll defiċjenti b’mod gravi”, timponi fuq ir-Repubblika Franċiża korrezzjonijiet b’rata fissa ta’ 100 % applikati għall-għajnuna diretta skont is-superfiċji mogħtija f’Haute-Corse għas-snin tat-talba 2013 u 2014, minħabba defiċjenzi fis-sistema ta’ kontroll għall-għajnuna skont is-superfiċji f’Haute-Corse.

3)

Il-Kummissjoni Ewropea għandha tbati, minbarra l-ispejjeż tagħha relatati mal-proċeduri tal-appell u kwart ta’ dawk li hija sostniet fl-ewwel istanza, dawk sostnuti mir-Repubblika Franċiża relatati mal-proċeduri ta’ appell u kwart tal-ispejjeż sostnuti minn dan l-Istat Membru fl-ewwel istanza.

4)

Ir-Repubblika Franċiża għandha tbati, minbarra tliet kwarti tal-ispejjeż tagħha marbuta mal-proċeduri fl-ewwel istanza, tliet kwarti tal-ispejjeż sostnuti mill-Kummissjoni fl-istess proċeduri.