25.2.2019 |
MT |
Il-Ġurnal Uffiċjali tal-Unjoni Ewropea |
C 72/31 |
Rikors ippreżentat fis-6 ta’ Diċembru 2018 – Phrenos et vs Il-Kummissjoni
(Kawża T-715/18)
(2019/C 72/40)
Lingwa tal-kawża: l-Ingliż
Partijiet
Rikorrenti: Phrenos SPRL (Mont-sur-Marchienne, il-Belġju), Akkanto (Watermael-Boitsfort, il-Belġju) u Operational Management Solutions (Chaumont-Gistoux, il-Belġju) (rappreżentanti: R. Jafferali u R. van Melsen, avukati)
Konvenuta: Il-Kummissjoni Ewropea
Talbiet
Ir-rikorrenti jitolbu li l-Qorti Ġenerali jogħġobha:
— |
tannulla d-deċiżjoni tal-Kummissjoni Ewropea, innotifikata lir-rikorrenti permezz ta’ ittra tas-27 ta’ Novembru 2018, li tagħti l-kuntratt għal servizzi relatati mal-ippjanar, it-tħejjija, il-promozzjoni u l-implimentazjoni tal-avveniment “European Development Days” [Jiem Ewropej tal-Iżvilupp] għad-Driettorat Ġenerali tagħha għall-Kooperazzjoni u l-Iżvilupp Internazzjonali (EuropeAid/139729/DH/SER/BE) (2018/S144-328417) għas-snin 2019 sa 2022 inklużi, lil terz; |
— |
tikkundanna lill-Kummissjoni għall-ispejjeż tal-kawża prinċipali u tal-proċedura għal miżuri provviżorji. |
Motivi u argumenti prinċipali
Insostenn tar-rikors tagħhom, ir-rikorrenti jinvokaw erba’ motivi.
1. |
L-ewwel motiv ibbażat fuq li l-konvenuta naqset milli timmotiva d-deċiżjoni tagħha ta’ għoti ta’ kuntratt. |
2. |
It-tieni motiv ibbażat fuq li l-konvenuta naqset milli tevalwa b’mod xieraq il-prezzijiet (apparentement) anormalement baxxi tal-offerta magħżula. |
3. |
It-tielet motiv ibbażat fuq il-ksur tal-prinċipju ta’ ugwaljanza fit-trattament fir-rigward tal-evalwazzjoni tal-offerti mitfugħa. |
4. |
Ir-raba’ motiv ibbażat fuq l-illegalità tal-kriterju ta’ għoti applikat mill-konvenuta għall-evalwazzjoni tal-offerti. |