–

għall-Gvern Slovakk, minn B. Ricziová, bħala aġent,

–

għall-Kummissjoni Ewropea, inizjalment minn A. Tokár u A. Caeiros, sussegwentement minn A. Tokár, bħala aġenti,

1

It-talba għal deċiżjoni preliminari tirrigwarda l-interpretazzjoni tas-subintestatura tariffarja 85258091 tan-Nomenklatura Magħquda (iktar ’il quddiem in-“NM”) li tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), fil-verżjonijiet tiegħu li jirriżultaw suċċessivament bir-Regolament tal-Kummissjoni (KE) Nru 1031/2008 tad-19 ta’ Settembru 2008 (ĠU 2008, L 291, p. 1), bir-Regolament tal-Kummissjoni (KE) Nru 948/2009 tat-30 ta’ Settembru 2009 (ĠU 2009, L 287, p. 1, u rettifika fil-ĠU 2010, L 149, p. 27), bir-Regolament tal-Kummissjoni (UE) Nru 861/2010 tal-5 ta’ Ottubru 2010 (ĠU 2010, L 284, p. 1), bir-Regolament tal-Kummissjoni (UE) Nru 1006/2011 tas-27 ta’ Settembru 2011 (ĠU 2011, L 282, p. 1, u rettifiki fil-ĠU 2011, L 290, p. 6, fil-ĠU 2012, L 52, p. 32 u fil-ĠU 2012, L 226, p. 8), u bir-Regolament ta’ Implimentazzjoni tal-Kummissjoni (UE) Nru 927/2012 tad-9 ta’ Ottubru 2012 (ĠU 2012, L 304, p. 1).

2

Din it-talba tressqet fil-kuntest ta’ kawża bejn DHL Logistics (Slovakia) spol. s r. o. (iktar ’il quddiem “DHL”) u Finančné riaditeľstvo Slovenskej republiky (id-Direttorat għall-Finanzi tar-Repubblika Slovakka, iktar ’il quddiem id-“Direttorat għall-Finanzi”) dwar il-klassifikazzjoni tariffarja ta’ vidjo kameras diġitali.

3

Mill-proċess sottomess lill-Qorti tal-Ġustizzja jirriżulta li l-verżjonijiet tan-NM applikabbli għall-fatti fil-kawża prinċipali huma dawk relatati mas-snin 2009 sa 2012, li jirriżultaw mir-Regolamenti Nri 1031/2008, 948/2009, 861/2010, 1006/2011 kif ukoll mir-Regolament ta’ Implementazzjoni Nru 927/2012, rispettivament. Id-dispożizzjonijiet tan-NM applikabbli għall-kawża prinċipali baqgħu, madankollu, identiċi minn verżjoni għall-oħra tan-NM.

4

Ir-regoli ġenerali għall-interpretazzjoni tan-NM, li jinsabu fil-punt A tat-Taqsima 1 tal-Ewwel Parti tagħha, jipprovdu:

“Il-klassifikazzjoni ta’ oġġetti fin-[NM] għandha tkun irregolata mill-prinċipji li ġejjin:

[…]

5

It-Tieni Parti tan-NM, intitolata “Skeda ta’ Dazji tad-Dwana”, tinkludi t-Taqsima XVI, intitolata “Makkinarju u għodod mekkaniċi; apparat elettriku; partijiet tagħhom; strumenti li jirrekordjaw u strumenti li jirriproduċu l-ħoss; strumenti li jirrekordjaw u strumenti li jirriproduċu stampa u ħoss televiżivi u partijiet u aċċessorji ta’ dawn l-oġġetti”.

6

In-nota 3, li tinsab taħt it-titolu ta’ din it-taqsima tan-NM, hija fformulata kif ġej:

“Sakemm il-kuntest ma jesiġix mod ieħor, magni komposti magħmulin minn żewġ magni jew aktar mwaħħlin flimkien biex jagħmlu waħda u magni oħrajn maħsubin bil-għan li jagħmlu żewġ funzjonijiet kumplimentari jew alternattivi jew aktar għandhom jiġu kklassifikati daqslikieku magħmulin biss minn dak il-komponent jew huma dik il-magna li tagħmel il-funzjoni prinċipali.”

7

Il-Kapitolu 85 tan-NM, li jinsab taħt l-imsemmija taqsima ta’ din in-nomenklatura, huwa intitolat “Makkinarju u Tagħmir Elettriku u Partijiet tagħhom, Srumenti li jirrekordjaw u jirriproduċu l-Ħoss, Srumenti li jirrekordjaw u jirriproduċu Stampa u Ħoss tat-Televiżjoni u Partijiet u Aċċessorji ta’ dawn l-Oġġetti”. Dan il-kapitolu jinkludi l-intestaturi u s-subintestaturi li ġejjin:

8

Skont l-ewwel inċiż tal-Artikolu 9(1)(a) u l-Artikolu 10 tar-Regolament Nru 2658/87, kif emendat bir-Regolament tal-Kunsill (KE) Nru 254/2000 tal-31 ta’ Jannar 2000 (ĠU Edizzjoni Speċjali bil-Malti, Kapitolu 2, Vol. 9, p. 3572000), il-Kummissjoni Ewropea mgħejjuna mill-Kumitat tal-Kodiċi tad-Dwana għandha tadotta l-miżuri li jikkonċernaw l-applikazzjoni tan-NM għal dak li jirrigwarda l-klassifikazzjoni tal-oġġetti. Huwa abbażi tal-ewwel waħda minn dawn id-dispożizzjonijiet li ġie adottat ir-Regolament tal-Kummissjoni (KE) Nru 1231/2007 tad-19 ta’ Ottubru 2007 dwar il-klassifikazzjoni ta’ ċerti merkanziji fin-Nomenklatura Magħquda (ĠU 2007, L 279, p. 3).

9

L-Anness tar-Regolament Nru 1231/2007 jikklassifika fin-NM l-oġġetti indikati fl-ewwel kolonna tat-tabella li jinsabu taħt il-kodiċi korrispondenti indikat fit-tieni kolonna ta’ din it-tabella u dan skont il-motivazzjoni indikata fit-tielet kolonna tal-imsemmija tabella. Għal dak li jirrigwarda s-subintestaturi 85258030 u 85258091, din it-tabella tinsab kif ġej:

10

In-Noti ta’ Spjega għan-Nomenklatura Magħquda tal-Unjoni Ewropea (ĠU 2011, C 137, p. 1) jirrigwardaw in-NM fil-verżjoni tagħha li tirriżulta mir-Regolament Nru 861/2010 (iktar ’il quddiem in-“Noti ta’ Spjega tan-NM”). Dawn huma, madankollu, rilevanti għal dak li jikkonċerna l-kawża prinċipali peress li, hekk kif jirriżulta mill-punt 3 ta’ din is-sentenza, il-kliem tal-intestatura 8525 kif ukoll tas-subintestaturi 85258030 u 85258091 tan-NM baqa’ identiku wara l-emendi li saru għal din in-nomenklatura bir-Regolament Nru 1006/2011 kif ukoll bir-Regolament ta’ Implimentazzjoni Nru 927/2012. In-Noti ta’ Spjega tan-NM relatati ma’ dawn l-intestaturi u subintestaturi jinqraw kif ġej:

11

Mill-proċess li għandha l-Qorti tal-Ġustizzja jirriżulta li bejn is‑sena 2009 u 2012 DHL importat oġġetti identifikati fid-dikjarazzjoni doganali bil-miktub bħala “vidjo kameras diġitali” (iktar ’il quddiem l-“oġġetti inkwistjoni”), li jaqgħu taħt is-subintestatura 85258091 tan-NM, li tikkonċerna l-“Vidjowkameras li jirrekordjaw [u li j]istgħu jirreġistraw biss ħoss u immaġni meħudin b’telekamera [kameras tat-televiżjoni]” u li għaliha tapplika rata ta’ dazju ta’ 4.9 %.

12

Fit-13 ta’ Novembru 2012, DHL ressqet quddiem iċ-Colný úrad Trnava (l-Uffiċċju Doganali ta’ Trnava, is-Slovakkja) (iktar ’il quddiem l-“Uffiċċju Doganali”) 35 talba għar-rimbors tad-dazji fuq l-importazzjoni imposti fuqha minn deċiżjonijiet meħuda fil-kuntest tal-proċedura doganali, billi sostniet li l-oġġetti inkwistjoni kien messhom ġew ikklassifikati fis-subintestatura 85258030 tan-NM, li tirrigwarda l-“Kameras diġitali” u li għaliha tapplika rata ta’ żero ta’ dazji fuq l-importazzjoni.

13

Peress li l-Uffiċċju Doganali ċaħad dawn it-talbiet, DHL appellat quddiem id-Direttorat għall-Finanzi.

14

Permezz ta’ deċiżjoni tal-5 ta’ Ġunju 2017, din l-awtorità nazzjonali ċaħdet l-appell u, konsegwentement, ikkonfermat id-deċiżjonijiet tal-Uffiċċju Doganali. DHL għaldaqstant ippreżentat appell intiż għall-annullament ta’ din id-deċiżjoni tad-Direttorat għall-Finanzi quddiem il-qorti tar-rinviju, il-Krajský súd v Trnave (il-Qorti Reġjonali ta’ Trnava, is-Slovakkja).

15

Din il-qorti rrilevat li l-oġġetti inkwistjoni huma apparati li għandhom diversi funzjonijiet. Fil-fatt huma jistgħu, minn naħa, jirrekordjaw vidjos ta’ iktar minn 30 minuta mingħajr interruzzjoni, b’riżoluzzjoni ta’ immaġni ta’ 720 x 576 pixels b’50 immaġni fis-sekonda u matul l-irrekordjar tista’ tiġi attivata l-funzjoni “zoom” mill-utent. Min-naħa l-oħra, dawn l-apparati jippermettu wkoll li jittieħdu u jiġu rrekordjati immaġni fissi bi kwalità ta’ 800 × 600 pixels, u saħansitra ta’ 1600 x 1200 pixels għal ċerti serje ta’ mudelli. Il-qorti tar-rinviju tindika wkoll li l-irrekordjar tal-vidjo u l-immaġni fissi jinħażnu fuq kard tal-memorja.

16

Sabiex tiġi ddeterminata l-klassifikazzjoni tariffarja tal-oġġetti inkwistjoni, hemm bżonn, skont il-qorti tar-rinviju, ta’ konformità mar-regoli ġenerali għall-interpretazzjoni tan-NM, moqrija flimkien man-noti tat-Taqsima XVI ta’ din tal-aħħar u, b’mod partikolari, in-Nota 3, hekk kif imsemmija fil-punti 4, 5 u 6 ta’ din is-sentenza rispettivament. Għaldaqstant, għandha tiġi ddeterminata l-funzjoni prinċipali li tikkaratterizza dawn l-oġġetti, filwaqt li jittieħed inkunsiderazzjoni l-kliem tas-subintestaturi u tan-noti kkonċernati tan-NM.

17

Issa, in-nuqqas ta’ qbil bejn il-partijiet fil-kawża prinċipali jirrigwarda preċiżament il-kwistjoni dwar liema hija l-funzjoni prinċipali tal-oġġetti inkwistjoni.

18

DHL essenzjalment tqis li dawn l-oġġetti, li jippermettu li jittieħdu u jiġu rrekordjati vidjos bi kwalità ta’ riżoluzzjoni tal-immaġni massima ta’ 720 x 576 pixels – jiġifieri kwalità ta’ riżoluzzjoni ta’ immaġni inferjuri għal dik meħtieġa mill-Anness tar-Regolament Nru 1231/2007 sabiex jiġu kklassifikati fis-subintestatura 85258091 tan-NM – huma “Kameras diġitali” li jaqgħu taħt is-subintestatura 85258030 ta’ din in-nomenklatura, peress li l-funzjoni prinċipali tagħhom hija li jieħdu u jirrekordjaw immaġni fissi.

19

Insostenn tal-pożizzjoni tagħha, DHL tirrileva, b’mod partikolari, li fid-dawl tal-“informazzjoni tariffarja vinkolanti” mogħtija għall-istess oġġetti f’diversi Stati Membri, jiġifieri, fost oħrajn, fil-Pajjiżi l-Baxxi, fir-Renju Unit u fi Franza, l-oġġetti inkwistjoni kien messhom ġew ikklassifikati fis-subintestatura 85258030 tan-NM bħala “Kameras diġitali”.

20

Skont id-Direttorat għall-Finanzi, l-oġġetti inkwistjoni jiġġeneraw immaġni fissa b’riżoluzzjoni baxxa, jiġifieri ta’ 1600 x 1200 pixels biss, u saħansitra ta’ 800 x 600 pixels fil-każ ta’ ċerti serje ta’ mudelli. Għaldaqstant, ma jistax jiġi affermat li l-funzjoni prinċipali tagħhom hija li jieħdu u jirrekordjaw immaġni fissi. Dawn l-oġġetti għandhom għaldaqstant jiġu kklassifikati bħala “vidjowkameras li jirrekordjaw” li jaqgħu taħt is-subintestatura 85258091 tan-NM. Barra minn hekk l-uniku kriterju ssodisfat mill-imsemmija oġġetti sabiex jiġu kklassifikati fis-subintestatura 85258030 tagħha bħala “kameras diġitali” huwa l-kwalità tar-riżoluzzjoni tal-immaġni inferjuri għal 800 x 600 pixels meta l-apparat jintuża sabiex jittieħdu jew jiġu rrekordjati vidjos.

21

Skont il-qorti tar-rinviju, l-oġġetti inkwistjoni jissodisfaw, bl-eċċezzjoni ta’ kriterju wieħed, jiġifieri dak li jikkonċerna l-kwalità tar-riżoluzzjoni tal-immaġni meta l-apparat jintuża sabiex jittieħdu u jiġu rreġistrati vidjos, il-kriterji l-oħrajn kollha li jippermettu li dawn jiġu kklassifikati fis-subintestatura 85258091 tan-NM bħala “vidjowkameras li jirrekordjaw”. Fid-dawl ta’ dan, dan il-kriterju jitqies bħala fundamentali min-Noti ta’ Spjega tan-NM sabiex l-imsemmija oġġetti jiġu kkassifikati fis-subintestatura 85258030 ta’ din in-nomenklatura bħala “kameras diġitali”.

22

Huwa f’dawn iċ-ċirkustanzi li l-Krajský súd v Trnave (il-Qorti Reġjonali ta’ Trnava) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja:

“Is-subintestatura tan-[NM] 85258091 […] għandha tiġi interpretata fis-sens li merkanzija bħal vidjo kameras diġitali (inkwistjoni fil-kawża prinċipali) jistgħu jiġu kklassifikati f’din is-subintestatura minkejja li dawn jippermettu biss li tittieħed u li tiġi rreġistrata sekwenza ta’ vidjo ta’ kwalità inferjuri għal 800 x 600 pixel, f’dan il-każ ta’ 720 x 576 pixel, u li funzjoni oħra ta’ din il-merkanzija, jiġifieri t-teħid u r-reġistrazzjoni ta’ stampi fissi, hija limitata bir-riżoluzzjoni tal-imsemmija stampi li hija ta’ 1600 x 1200 pixel (1,92 megapixel)?”

23

Permezz tad-domanda tagħha, il-qorti tar-rinviju essenzjalment tistaqsi jekk in-NM għandhiex tiġi interpretata fis-sens li vidjo kameras diġitali li għandhom funzjoni doppja, jiġifieri jieħdu u jirrekordjaw kemm immaġni fissi kif ukoll sekwenzi ta’ vidjo, minkejja li, għal dak li jirrigwarda s-sekwenzi tal-vidjo dawn il-kameras jippermettu biss li tali sekwenzi jittieħdu u jiġu rrekordjati permezz ta’ kwalità ta’ riżoluzzjoni tal-immaġni inferjuri għal 800 x 600 pixels, jaqgħu taħt is-subintestatura 85258091 tan-NM bħala “vidjowkameras li jirrekordjaw”.

24

Għandu l-ewwel nett jiġi enfasizzat li meta quddiem il-Qorti tal-Ġustizzja jitressaq rinviju għal deċiżjoni preliminari dwar il-klassifikazzjoni tariffarja, ir-rwol tagħha huwa iktar li tagħti kjarifika lill-qorti nazzjonali dwar il-kriterji li bl-implementazzjoni tagħhom il-qorti nazzjonali tkun tista’ tikklassifika b’mod korrett il-prodotti inkwistjoni fin-NM, milli li tikklassifikahom hija stess, u dan peress li l-Qorti tal-Ġustizzja mhux neċessarjament tiddisponi mill-elementi indispensabbli kollha f’dan ir-rigward. Għaldaqstant, jidher li, fi kwalunkwe każ, il-qorti nazzjonali tkun tinsab f’pożizzjoni aħjar sabiex tagħmel il-klassifikazzjoni inkwistjoni (sentenzi tas-16 ta’ Frar 2006, Proxxon, C‑500/04, EU:C:2006:111, punt 23; tat-22 ta’ Novembru 2012, Digitalnet et, C‑320/11, C‑330/11, C‑382/11 u C‑383/11, EU:C:2012:745, punt 61, kif ukoll id-digriet tat-22 ta’ Ottubru 2014, Mineralquelle Zurzach, C‑139/14, EU:C:2014:2313, punt 28).

25

Fl-ewwel lok, għandu jitfakkar li mill-ġurisprudenza stabbilita tal-Qorti tal-Ġustizzja jirriżulta li, fl-interess taċ-ċertezza legali u tal-faċilità tal-kontrolli, il-kriterju deċiżiv għall-klassifikazzjoni tariffarja tal-oġġetti għandu jitfittex, b’mod ġenerali, fil-karatteristiċi u fil-kwalitajiet oġġettivi tagħhom, hekk kif iddefiniti fil-formulazzjoni tal-intestatura tan-NM u tan-noti tat-taqsimiet jew tal-kapitoli tagħha (sentenzi tas-26 ta’ Settembru 2000, Eru Portuguesa, C‑42/99, EU:C:2000:501, punt 13, kif ukoll tal-5 ta’ Marzu 2015, Vario Tek, C‑178/14, mhux ippubblikata, EU:C:2015:152, punt 21 u l-ġurisprudenza ċċitata).

26

Fit-tieni lok, il-Qorti tal-Ġustizzja ddeċidiet ukoll li d-destinazzjoni tal-prodott tista’ tikkostitwixxi kriterju oġġettiv ta’ klassifikazzjoni sa fejn tkun inerenti għall-imsemmi prodott u dan għandu jkun jista jiġi evalwat skont il-karatteristiċi u kwalitajiet oġġettivi tiegħu (sentenza tal-15 ta’ Mejju 2019, Korado, C‑306/18, EU:C:2019:414, punt 37 u l-ġurisprudenza ċċitata). Fost l-elementi rilevanti f’dan ir-rigward, għandhom jiġu evalwati kemm l-użu li għalih il-prodott huwa intiż mill-manifattur kif ukoll il-modalitajiet u l-post tal-użu tiegħu (sentenza tat‑2 ta’ Mejju 2019, Onlineshop, C‑268/18, EU:C:2019:353, punt 29 u l-ġurisprudenza ċċitata).

27

Fit-tielet lok, il-klassifikazzjoni tariffarja ta’ prodott għandha sseħħ b’teħid inkunsiderazzjoni tal-funzjoni prinċipali tiegħu. Għaldaqstant, in-Nota 3 tat-Taqsima XVI tat-Tieni Parti tan-NM tipprevedi li makkinarju li għandu diversi funzjonijiet għandu jiġi kklassifikat skont il-funzjoni prinċipali li tikkaratterizzah (sentenza tal-11 ta’ Ġunju 2015, Amazon EU, C‑58/14, EU:C:2015:385, punt 23). Il-Qorti tal-Ġustizzja ppreċiżat, f’dan ir-rigward, li huwa neċessarju li jittieħed inkunsiderazzjoni dak li l-konsumatur iqis bħala funzjoni prinċipali jew aċċessorja (sentenza tat-2 ta’ Mejju 2019, Onlineshop, C‑268/18, EU:C:2019:353, punt 31 u l-ġurisprudenza ċċitata).

28

Għal dak li jirrigwarda l-oġġetti inkwistjoni, mit-talba għal deċiżjoni preliminari jirriżulta li dawn għandhom funzjoni doppja, jiġifieri li jieħdu u jirrekordjaw kemm immaġni fissi kif ukoll sekwenzi ta’ vidjo.

29

Għandu jiġi rrilevat, bħalma għamlu l-Gvern Slovakk u l-Kummissjoni fl-osservazzjonijiet tagħhom bil-miktub, li fid-dawl tal-proprjetajiet tekniċi ta’ dawn l-oġġetti, jidher li l-funzjoni prinċipali tagħhom tikkonsisti f’li jieħdu u jirrekordjaw sekwenzi ta’ vidjo, b’tali mod li għandhom jiġu kklassifikati fis-subintestatura 85258091 tan-NM bħala “vidjowkameras li jirrekordjaw”, u dan għandu jiġi vverifikat mill-qorti tar-rinviju.

30

Fil-fatt, mill-proċess li għandha l-Qorti tal-Ġustizzja jirriżulta li, l-ewwel nett, għalkemm il-kwalità tar-riżoluzzjoni tal-immaġni fissi meħuda u rrekordjati hija relattivament baxxa, jiġifieri 1600 x 1200 pixels, u saħansitra ta’ 800 x 600 pixels għal ċerti serje ta’ mudelli, il-kwalità tar-riżoluzzjoni tas-sekwenzi tal-vidjo meħuda u rrekordjati, jiġifieri 720 x 576 pixels, kif ukoll il-veloċità li biha jittieħdu u jiġu rrekordjati, jiġifieri 50 immaġni fis-sekonda, jikkorrispondu għall-kwalità ta’ DVD standard. It-tieni nett, il-proprjetajiet tekniċi tal-imsemmija oġġetti, b’mod partikolari l-forma tagħhom u l-viewfinder, jagħtuhom l-apparenza ta’ vidjo kameras li jirrekordjaw iktar milli dik ta’ kameras diġitali. It-tielet nett, l-oġġetti kollha inkwistjoni ġew offruti għall-bejgħ bħala vidjo kameras diġitali li jirrekordjaw bil-funzjoni prinċipali li jieħdu u jirrekordjaw sekwenzi tal-vidjo. Ir-raba’ nett, jidher li l-manifattur innifsu ppreżenta dawn l-oġġetti fil-fuljetti tal-istruzzjonijiet bħala vidjo kameras diġitali li jirrekordjaw intiżi għall-grupp ta’ persuni li jirrekordjaw vidjos bl-għan li jippubblikawhom fuq YouTube.

31

Barra minn hekk, il-Gvern Slovakk u l-Kummissjoni ġustament jenfasizzaw, fl-osservazzjonijiet bil-miktub tagħhom, li l-fatt li l-oġġetti inkwistjoni ma jissodisfawx il-parametru marbut mal-kwalità tal-irrekordjar, li jinsab fin-Noti ta’ Spjega tan-NM, sabiex ikunu jistgħu jiġu kklassifikati fis-subintestatura 85258091 ta’ din in-nomenklatura bħala “vidjowkameras li jirrekordjaw”, jiġifieri li huma ma jistgħux jirrekordjaw sekwenzi ta’ vidjo li għandhom tal-inqas kwalità ta’ riżoluzzjoni ta’ immaġni ta’ 800 x 600 pixels, ma jfissirx madankollu li dawn l-oġġetti għandhom awtomatikament jiġu kklassifikati fis-subintestatura 85258030 tan-NM bħala “kameras diġitali”.

32

F’dan ir-rigward, għandu jitfakkar, minn naħa, li n-Noti ta’ Spjega tan-NM, filwaqt li jikkontribwixxu b’mod importanti għall-interpretazzjoni tal-portata tad-diversi intestaturi tariffarji, ma għandhomx saħħa vinkolanti (ara, f’dan is-sens, b’mod partikolari, is-sentenzi tas‑6 ta’ Settembru 2018, Kreyenhop & Kluge, C‑471/17, EU:C:2018:681, punt 38 u l-ġurisprudenza ċċitata, kif ukoll tas-16 ta’ Mejju 2019, Estron, C‑138/18, EU:C:2019:419, punt 57 u l-ġurisprudenza ċċitata).

33

Min-naħa l-oħra, dan il-fatt ma jaffettwax il-funzjoni prinċipali tal-oġġetti inkwistjoni, hekk kif iddeterminati mill-karatteristiċi oġġettivi tagħhom.

34

F-aħħar nett, sa fejn il-qorti tar-rinviju ssostni li n-nuqqas ta’ qbil bejn il-partijiet fil-kawża prinċipali jirrigwarda l-punt dwar jekk l-oġġetti inkwistjoni jikkorrispondux għal kameras diġitali jew għal vidjo kameras diġitali (vidjo kameras li jirrekordjaw), fis-sens tal-Anness tar-Regolament Nru 1231/2007, mill-ġurisprudenza tal-Qorti tal-Ġustizzja jirriżulta, minn naħa, li tali regolament ta’ klassifikazzjoni jiġi adottat mill-Kummissjoni meta l-klassifikazzjoni ta’ prodott partikolari fin-NM tkun tista’ tqajjem diffikultajiet jew tista’ tkun suġġett ta’ tilwima u, min-naħa l-oħra, li tali regolament għandu portata ġenerali peress li ma japplikax għal operatur partikolari, iżda b’mod ġenerali għal prodotti identiċi għal dak li jkun is-suġġett ta’ tali klassifikazzjoni (sentenza tad‑19 ta’ Frar 2009, Kamino International Logistics, C‑376/07, EU:C:2009:105, punt 63).

35

Issa, kif ġustament jenfasizzaw il-Gvern Slovakk u l-Kummissjoni fl-osservazzjonijiet tagħhom bil-miktub, il-prodotti li ġew ikklassifikati mir-Regolament Nru 1231/2007, bħal dawk imsemmija fil-punti 3 sa 5 tat-tabella annessa ma’ dan ir-Regolament, ma humiex identiċi għall-oġġetti inkwistjoni. Fil-fatt, il-kameras diġitali msemmija minn dawn id-dispożizzjonijiet huma differenti mill-oġġetti inkwistjoni b’mod partikolari sa fejn huma jippermettu l-irrekordjar, minn naħa, ta’ immaġni fissi ta’ kwalità ogħla u, min-naħa l-oħra, ta’ vidjos b’riżoluzzjoni iktar baxxa u b’veloċità ta’ 30 immaġni meħuda fis-sekonda, filwaqt li l-oġġetti inkwistjoni jippermettu l-irrekordjar ta’ vidjos b’veloċità ta’ 50 immaġni meħuda fis-sekonda.

36

Huwa minnu li mill-ġurisprudenza tal-Qorti tal-Ġustizzja jirriżulta li l-applikazzjoni b’analoġija ta’ regolament ta’ klassifikazzjoni għall-prodotti analogi għal dawk koperti minn dan ir-regolament tiffavorixxi interpretazzjoni koerenti tan-NM kif ukoll l-ugwaljanza fit-trattament tal-operaturi (sentenza tal-4 ta’ Marzu 2004, Krings, C‑130/02, EU:C:2004:122, punt 35).

37

Madankollu, tali applikazzjoni b’analoġija la tkun neċessarja u lanqas possibbli meta, permezz tar-risposta tagħha għal domanda preliminari, il-Qorti tal-Ġustizzja tkun ipprovdiet lill-qorti tar-rinviju l-informazzjoni kollha neċessarji għall-klassifikazzjoni ta’ prodott fl-intestatura adatta tan-NM (sentenza tat-12 ta’ April 2018, Medtronic, C‑227/17, EU:C:2018:247, punt 59 u l-ġurisprudenza ċċitata).

38

Fid-dawl ta’ dak kollu li ntqal, ir-risposta għad-domanda magħmula għandha tkun li n-NM għandha tiġi interpretata fis-sens li vidjo kameras diġitali li għandhom funzjoni doppja, jiġifieri jieħdu u jirrekordjaw kemm immaġni fissi kif ukoll sekwenzi ta’ vidjo, minkejja li, għal dak li jirrigwarda s-sekwenzi tal-vidjo dawn il-kameras jippermettu biss li tali sekwenzi jittieħdu u jiġu rrekordjati permezz ta’ kwalità ta’ riżoluzzjoni tal-immaġni inferjuri għal 800 x 600 pixels, jaqgħu taħt is-subintestatura 85258091 tan-NM bħala “vidjowkameras li jirrekordjaw”, peress li l-funzjoni prinċipali ta’ dawn il-vidjo kameras diġitali hija li jieħdu u jirrekordjaw tali sekwenzi, u dan għandu jiġi vverifikat mill-qorti tar-rinviju.

39

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Is-Seba’ Awla) taqta’ u tiddeċiedi:

In-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana, fil-verżjonijiet tiegħu li jirriżultaw suċċessivament bir-Regolament tal-Kummissjoni (KE) Nru 1031/2008 tad-19 ta’ Settembru 2008, bir-Regolament tal-Kummissjoni (KE) Nru 948/2009 tat-30 ta’ Settembru 2009, bir-Regolament tal-Kummissjoni (UE) Nru 861/2010 tal-5 ta’ Ottubru 2010, bir-Regolament tal-Kummissjoni (UE) Nru 1006/2011 tas-27 ta’ Settembru 2011, u bir-Regolament ta’ Implimentazzjoni tal-Kummissjoni (UE) Nru 927/2012 tad-9 ta’ Ottubru 2012, għandha tiġi interpretata fis-sens li vidjo kameras diġitali li għandhom funzjoni doppja, jiġifieri jieħdu u jirrekordjaw kemm immaġni fissi kif ukoll sekwenzi ta’ vidjo, minkejja li, għal dak li jirrigwarda s-sekwenzi tal-vidjo dawn il-kameras jippermettu biss li tali sekwenzi jittieħdu u jiġu rrekordjati permezz ta’ kwalità ta’ riżoluzzjoni tal-immaġni inferjuri għal 800 x 600 pixels, jaqgħu taħt is-subintestatura 85258091 tan-NM bħala “vidjowkameras li jirrekordjaw”, peress li l-funzjoni prinċipali ta’ dawn il-vidjo kameras diġitali hija li jieħdu u jirrekordjaw tali sekwenzi, u dan għandu jiġi vverifikat mill-qorti tar-rinviju.