—

ir-rikorrenti jsostnu li r-regolament ikkontestat kien ġie adottat bi ksur tar-Regolament ta’ Tiġdid (1141/2010) u tar-Regolament ta’ Gwida (SANCO/10387/2010 rev. 8), sa fejn l-EFSA evalwat mill-ġdid il-profil ta’ perikolu tal-FPS minkejja li ma kienx hemm bidla fl-istat ta’ għarfien xjentifiku u fil-kuntest ġuridiku applikabbli;

—

ir-rikorrenti jsostnu li r-regolament ikkontestat kien ġie adottat bi ksur tar-Regolament CLP (1272/2008) u tal-Gwida tal-Kummissjoni dwar il-Metaboliti fl-Ilma ta’ Taħt l-Art (SANCO/221/2000 rev. 10), sa fejn l-EFSA bbażat ruħha fuq il-proposta tagħha stess ta’ klassifikazzjoni tal-perikolu għall-FPS sabiex tippreżumi t-tossiċità ta’ tliet metaboliti fl-ilma ta’ taħt l-art;

—

ir-rikorrenti jsostnu li r-regolament ikkontestat kien ġie adottat bi ksur tar-regoli tal-Unjoni dwar l-ittestjar fuq l-annimali, li jinsabu fir-Regolament PPP (1107/2009) u fid-Direttiva dwar l-Ittestjar Fuq l-Annimali (2010/63), sa fejn l-EFSA identifikat nuqqas ta’ data għal studji addizzjonali ta’ ġenotossiċità, mingħajr ma qieset kif meħtieġ il-provi kollha u minkejja l-assenza ta’ neċessità pprovata li jsiru testijiet addizzjonali.

—

ir-rikorrenti jsostnu li r-regolament ikkontestat kien ġie adottat bi ksur tal-prinċipju ta’ ċertezza legali, tad-drittijiet tad-difiża tal-applikant għal tiġdid kif ukoll ta’ diversi dispożizzjonijiet tad-dritt tal-Unjoni, sa fejn l-EFSA wettqet l-evalwazzjoni tal-ġenotossiċità għal żewġ metaboliti FPS abbażi ta’ opinjoni xjentifika ġdida u mhux approvata attwalment fi stadju ta’ eżami mill-ġdid, li wasslet lill-EFSA tidentifika nuqqas artifiċjali ta’ data fil-fajl ta’ tiġdid, li sussegwentement huma ma ngħatawx l-opportunità jindirizzaw.

—

ir-rikorrenti jsostnu li r-regolament ikkontestat kien ġie adottat bi ksur tad-drittijiet tad-difiża tal-applikant għal tiġdid u ta’ diversi dispożizzjonijiet tad-dritt tal-Unjoni, sa fejn il-Kummissjoni bbażat ruħha esklużivament fuq il-konklużjonijiet li waslet għalihom l-EFSA sabiex tiddeċiedi li tipprojbixxi l-FPS, mingħajr ma ħadet inkunsiderazzjoni l-informazzjoni xjentifika kollha disponibbli li turi s-sigurtà tal-FPS, u b’mod partikolari l-istudji addizzjonali spontanji mwettqa mill-applikant għal tiġdid sabiex jindirizza n-nuqqas allegat ta’ data u tħassib identifikat mill-EFSA, kif ukoll l-evalwazzjoni tal-Istat Membru relatur u l-kummenti tal-Istati Membri l-oħra waqt l-eżami mill-ġdid tat-tiġdid.

—

ir-rikorrenti jsostnu li r-regolament ikkontestat huwa manifestament sproporzjonat fir-rigward tal-profil ta’ sigurtà globali tal-FPS u li l-Kummissjoni setgħet indirizzat it-tħassib allegat relatat mar-regolament ikkontestat permezz ta’ miżuri inqas restrittivi li ma jinvolvux projbizzjoni tal-użu tal-FPS, pereżempju permezz tal-użu tal-Proċedura ta’ Informazzjoni ta’ Konferma prevista fl-Artikolu 6(f) tar-Regolament PPP (1107/2009) jew permezz ta’ miżuri ta’ attenwazzjoni tar-riskju deċiżi fuq livell nazzjonali mill-Istati Membri tal-Unjoni.

—

ir-rikorrenti jsostnu li l-Kummissjoni kisret il-prinċipju ta’ nondiskriminazzjoni, sa fejn it-tħassib allegat relatat mar-regolament ikkontestat kien b’mod konsistenti ġie indirizzat permezz ta’ miżuri inqas restrittivi fil-prassi deċiżjonali preċedenti tal-Kummissjoni. Madankollu, sa issa, il-Kummissjoni qatt ma bbażat ruħha fuq tali tħassib sabiex tiġġustifika projbizzjoni assoluta tal-użu ta’ sustanza.

—

ir-rikorrenti jsostnu li l-Kummissjoni naqset milli tittratta kif meħtieġ il-proċess ta’ eżami mill-ġdid għall-FPS, li kellu bħala effett li DuPont kellha tinvesti riżorsi kunsiderevoli fit-tħejjija ta’ fajls xjentifiċi li eventwalment sfaw totalment inutli peress li l-Kummissjoni b’mod mhux mistenni rrevediet il-pożizzjoni tagħha fir-rigward ta’ ċertu tħassib. Barra minn hekk, ir-rikorrenti jsostnu li r-regolament ikkontestat jikkomprometti l-għanijiet ta’ politika ta’ kompetizzjoni relatati mat-tneħħija tal-FPS, li l-Kummissjoni nnifisha imponiet fuq Dow/DuPont sabiex tevita l-ħolqien ta’ pożizzjoni dominanti fis-suq ŻEE tal-erbiċidi taċ-ċereali. Dan it-trattament ħażin tal-proċess ta’ eżami mill-ġdid għall-FPS jammonta għal ksur mill-Kummissjoni tad-dmir ta’ diliġenza tagħha, tal-prinċipji ta’ amministrazzjoni tajba u tal-aspettattivi leġittimi ta’ DuPont.