—

L-ewwel nett, ir-rikorrenti ssostni li d-determinazzjoni tal-valur normali huwa vvizzjat bl-inklużjoni tal-bejgħ ta’ numri ta’ kontroll tal-prodotti (“PCNs”) li kienu mibjugħa f’volumi żgħar ħafna mill-manifattur tal-pajjiż analogu. Ir-rikorrenti ssostni li hija wriet li l-prezzijiet ta’ bejgħ b’volum tant baxx ma kinux affidabbli u kkawżaw determinazzjoni irraġonevoli tal-valur normali. Barra minn hekk, ir-rikorrenti ssostni li l-bejgħ tal-volum baxx ma jirriflettix aġir normali min-naħa tax-xerrejja u jirriżulta minn sekwenzi normali ta’ stabbiliment ta’ prezzijiet, u konsegwentement ma jaqgħux taħt l-attività kummerċjali normali; għaldaqstant ma jippermettux paragun korrett. Skont ir-rikorrenti, il-Kummissjoni enfasizzat li wettqet evalwazzjoni tal-attività kummerċjali normali, iżda naqset milli tindirizza dak espost iktar ’il fuq.

—

It-tieni nett, skont ir-rikorrenti, il-Kummissjoni ma kisbitx data tal-kost affidabbli mill-PCN mill-manifattur tal-pajjiż analogu. Ir-rikorrenti ssostni li għalhekk, il-Kummissjoni żviluppat metodoloġija sabiex tikkalkola tali data tal-kost speċifikament għall-PCN, iżda li fir-realtà, din il-metodoloġija kienet sempliċement preżunzjoni li t-tranżazzjonijiet kollha li kellhom prezz inqas minn 91,14 % tal-prezz medju ma kinux profitabbli, minflok ma evalwat il-profitabbiltà permezz ta’ PCN bi PCN. Ir-rikorrenti ssostni li tali assunzjoni ġenerali hija kompletament irraġonevoli, u twassal għal esklużjoni arbitrarja tat-tranżazzjonijiet tal-bejgħ u għal żieda inġustifikata tal-valur normali. Ir-rikorrenti tikkonkludi li l-affidabbiltà fuq tali metodoloġija u data inaffidabbli sabiex bejgħ bi prezz iktar baxx jiġi eskluż mid-determinazzjoni tal-valur normali għad-detriment tagħha tikser l-Artikolu 2(7)(a).

—

Skont ir-rikorrenti, il-bejgħ kollu tagħha sar lil utenti finali filwaqt li l-manifattur tal-pajjiż analogu biegħ kemm lil utenti finali kif ukoll lil kummerċjanti. Ir-rikorrenti ssostni li hija pproduċiet diversi provi li juru li kien hemm differenza konsistenti fl-ipprezzar u li minkejja dan, il-Kummissjoni ċaħdet l-aġġustament rikjest għad-differenzi fil-livell tal-kummerċ.

—

Ir-rikorrenti tesponi li l-Kummissjoni, barra minn hekk, irrifjutat li tirrevedi l-kalkolu tal-aġġustament tal-kost tal-imballaġġ, minkejja li r-rikorrenti pproduċiet provi li l-valur tal-aġġustament kien żbaljat minħabba l-użu ta’ kriterju ta’ allokazzjoni skorrett. Skont ir-rikorrenti, il-Kummissjoni għalhekk kisret l-obbligi tagħha billi imputat il-kost totali tal-imballaġġ fuq il-fatturat totali pjuttost milli fuq il-fatturat tal-prodotti mmanifatturati mill-manifattur tal-pajjiż analogu.

—

Ir-rikorrenti ssostni wkoll li l-Kummissjoni rrifjutat li tagħmel aġġustament għall-kostijiet tal-kreditu għall-parti l-kbira tal-bejgħ tal-manifattur tal-pajjiż analogu. Skont ir-rikorrenti, hija wriet li l-provi kienu jikkontradixxu l-pożizzjoni tal-Kummissjoni li kienet wasslitha sabiex ma tagħmilx tali aġġustament, u minflok siltet il-konklużjonijiet korretti dwar il-bżonn li jsiru aġġustamenti għall-kundizzjonijiet ta’ kreditu, il-Kummissjoni għamlet aġġustament għal konsumatur wieħed speċifiku bi ksur tal-obbligi tagħha.

—

Fl-aħħar nett, ir-rikorrenti ssostni li l-Kummissjoni rrikonoxxiet li kien hemm differenzi bejn il-materja prima użata u l-produttività tal-manifattur tal-pajjiż analogu u tar-rikorrenti, iżda rrifjutat li tagħmel aġġustamenti għal dawn id-differenzi. F’dan ir-rigward, ir-rikorrenti ssostni li l-Kummissjoni, fost l-oħrajn, ma ħaditx inkunsiderazzjoni d-dikjrazzjonijiet tal-manifattur tal-pajjiż analogu nnifsu li kienu jattestaw li dawn id-differenzi jeżistu u kellhom impatt fuq il-paragunabbiltà tal-prezzijiet.

—

Skont ir-rikorrenti, il-Kummissjoni, barra minn hekk, imponiet oneru ta’ prova irraġonevoli fuq Jinan bi ksur tal-obbligi tagħha skont l-Artikolu 2(10) tar-Regolament Bażiku, tal-Artikolu 2.4 tal-Ftehim AntiDumping u tal-prinċipju ta’ amministrazzjoni tajba, fir-rigward ta’ kull wieħed mill-aġġustamenti mitluba indirizzati iktar ’il fuq.

—

Ir-rikorrenti ssostni li billi ddeterminat il-valur normali ta’ tipi ta’ prodotti mhux korrispondenti fuq il-bażi tal-valur normali medju aġġustat bil-valur tad-differenzi tal-prodotti li ġie ddeterminat abbażi tad-differenza bejn il-prezzijiet tal-esportazzjoni applikati mir-rikorrenti, il-Kummissjoni adottat metodoloġija irraġonevoli sabiex tiddetermina l-valur normali, bi ksur tal-Artikolu 2(7)(a) tar-Regolament Bażiku. Skont ir-rikorrenti, dan huwa bbażat fuq il-preżunzjoni li l-valur tas-suq tad-differenzi fil-karatteristiċi fiżiku huwa rifless fil-prezzijiet tal-esportazzjoni, filwaqt li fir-realtà il-prezzijiet tal-esportazzjoni tat-tipi ta’ prodotti korrispondenti użati bħala referenza jirriflettu, abbażi tal-konstatazzjonijiet tal-Kummissjoni, minn tal-inqas parzjalment, id-dumping. Skont ir-rikorrenti, il-metodoloġija tinkorpora l-preżunzjoni li l-esportazzjonijiet tat-tipi ta’ prodotti mhux korrispondenti inkwistjoni għandhom prezz li huwa suġġett għad-dumping bl-istess marġni li ġie kkonstatat fir-rigward tat-tipi ta’ prodotti korrispondenti. Ir-rikorrenti tqis li din il-preżunzjoni hija irraġonevoli u ma tistax tiġi vverifikata.

—

Ir-rikorrenti ssostni wkoll li billi adottat metodoloġija li tirriżulta fi preżunzjoni ta’ dumping għal tipi ta’ prodotti mhux korrispondenti fuq l-istess livell bħal dawk ta’ tipi ta’ prodotti korrispondenti, il-marġni dumping miksub ma jirriflettix l-iskala sħiħa ta’ dumping applikat, kuntrarjament għall-Artikolu 2(11) tar-Regolament Bażiku.

—

Sakemm il-Qorti Ġenerali ma tqisx li r-regolament ikkontestat jinkorpora l-konstatazzjoni ta’ ħsara u ta’ rabta kawżali inklużi fir-regolament annullat (2), permezz ta’ riferiment, ir-rikorrenti ssostni li, fid-dawl tal-annullament tar-regolament annullat fl-intier tiegħu fir-rigward tar-rikorrenti, ir-regolament ikkontestat jimponi dazji antidumping fuq l-importazzjonijiet mir-rikorrenti mingħajr kunsiderazzjoni għar-rekwiżiti stabbiliti fir-rigward ta’ elementi oħra għajr id-dumping. Skont ir-rikorrenti, dan iwassal, fost l-oħrajn, għal ksur tal-Artikolu 9(4) tar-Regolament Bażiku, peress li ġie impost dazju antidumping definittiv mingħajr konstatazzjoni ta’ ħsara jew rabta kawżali. Ir-rikorrenti ssostni li fin-nuqqas ta’ konstatazzjonijiet ta’ ħsara f’regolament fis-seħħ fir-rigward tar-rikorrenti, il-Kummissjoni kisret ukoll l-Artikolu 3 tar-Regolament Bażiku li jirrigwarda d-determinazzjoni tal-ħsara. Ir-rikorrenti ssostni wkoll li ma hemmx motivazzjoni.

—

Sussidjarjament, ir-rikorrenti ssostni wkoll li l-Kummissjoni kisret l-Artikoli 3(1), 3(2) u 3(3) tar-Regolament Bażiku sa fejn ibbażat ruħha fuq data tal-importazzjoni skorretta. Fil-fatt, skont ir-rikorrenti, għall-konstatazzjoni ta’ ħsara, tqieset bħala affidabbli d-data tal-importazzjoni li, abbażi tal-informazzjoni disponibbli lill-Kummissjoni, kienet ċertament tinkludi importazzjonijiet ta’ prodotti li ma jistgħux jitqiesu bħala l-prodott ikkonċernat. Ir-rikorrenti ssostni li l-Kummissjoni, madankollu, naqset milli tieħu l-passi neċessarji sabiex tivverifika l-eżattezza tad-data tal-importazzjoni u tikkorreġiha billi teskludi importazzjonijiet ta’ prodotti li ma jistgħux jitqiesu li huma l-prodott ikkonċernat. Ir-rikorrenti tikkonkludi li, bħala konsegwenza ta’ dan, il-Kummissjoni kisret l-Artikoli 3(1), 3(2) u 3(3) tar-Regolament Bażiku.