6.11.2017   

MT

Il-Ġurnal Uffiċjali tal-Unjoni Ewropea

C 374/46

Rikors ippreżentat fl-14 ta’ Settembru 2017 – Taminco u Arysta LifeScience Great Britain vs EFSA

(Kawża T-621/17)

(2017/C 374/69)

Lingwa tal-kawża: l-Ingliż

Partijiet

Rikorrenti: Taminco BVBA (Gent, il-Belġju), Arysta LifeScience Great Britain Ltd (Edinburgh, ir-Renju Unit) (rappreżentanti: C. Mereu u M. Grunchard, avukati)

Konvenuta: L-Awtorità Ewropea dwar is-Sigurtà fl-Ikel (EFSA)

Talbiet tar-Rikorrenti

—

tannulla d-deċiżjoni tal-Awtorità Ewropea dwar is-Sigurtà fl-Ikel tat-18 ta’ Lulju 2017, ikkomunikata lir-rikorrenti fl-20 ta’ Lulju 2017, fuq l-evalwazzjoni tat-talbiet ta’ kunfidenzjalità mressqa fir-rigward tal-applikazzjoni għat-tiġdid tal-proċess għall-approvazzjoni għal Thiram bħala sustanza attiva;

—

tikkundanna lill-konvenuta għall-ispejjeż.

Motivi u argumenti prinċipali

Insostenn tar-rikors tagħhom, ir-rikorrenti jinvokaw erba’ motivi.

1.

L-ewwel motiv ibbażat fuq l-assenza ta’ bażi legali għall-pubblikazzjoni.

—

Ir-rikorrenti jsostnu li pubblikazzjoni kienet tkun ultra vires billi ma hemm l-ebda bażi legali li fuqha tista’ tibbaża l-konvenuta biex tiġġustifika pubblikazzjoni, kemm jekk taħt Regolament 1107/2009, Regolament 178/2002 jew Regolament ta’ Implementazzjoni tal-Kummissjoni Nru 844/2012.

2.

It-tieni motiv ibbażat fuq il-fatt li l-konvenuta aġixxiet b’mod ultra vires fil-klassifikazzjoni proposta ta’ Thiram billi l-Aġenzija Ewropea għas-Sustanzi Kimiċi hija l-unika awtorità responsabbli legalment għall-klassifikazzjoni jew ir-riklassifikazzjoni ta’ sustanzi, kif stabbilit fir-Regolament 1272/2008, u l-konvenuta ma għandhiex is-setgħat f’dan ir-rigward.

3.

It-tielet motiv ibbażat fuq il-fatt li l-konvenuta kisret id-drittijiet fundamentali tad-difiża billi naqqset milli tiggarantixxi lir-rikorrenti opportunità sħiħa, xierqa u effettiva biex jissottomettu kummenti fuq riklassifikazzjoni proposta tas-sustanza tagħha.

4.

Ir-raba’ motiv ibbażat fuq il-fatt li l-konvenuta kisret l-Artikolu 63 tar-Regolament 1107/2009 billi ddeċidiet li tippubblika l-informazzjoni li r-rikorrenti fittxew li tkun sanalizzata, li tista’ ddgħajjef l-interessi kummerċjali tagħhom.