1.

It-talba għal deċiżjoni preliminari mressqa mill-Verwaltungsgerichtshof (il-Qorti Amministrattiva, l-Awstrija) tressqet fil-kuntest ta’ tilwima bejn id-diriġent ta’ kumpannija tat-trasport Torka u awtorità amministrattiva Awstrijaka li imponietlu multa talli wettaq trasport kummerċjali ta’ merkanzija mit-Turkija b’destinazzjoni lejn il-Ġermanja b’passaġġ minn ġol-Awstrija, mingħajr ma kellu l-awtorizzazzjoni meħtieġa għal dan il-għan.

2.

Skont il-leġiżlazzjoni Awstrijaka, it-trasport kummerċjali internazzjonali ta’ merkanzija bit-triq b’destinazzjoni lejn, b’passaġġ minn ġo jew li jitlaq mit-territorju Awstrijak jista’ jsir biss b’awtorizzazzjoni. Għat-trasportaturi li għandhom is-sede tagħhom fit-Turkija (iktar ’il quddiem it-“trasportaturi Torok”), din l-awtorizzazzjoni tista’ tieħu l-forma jew ta’ awtorizzazzjoni maħruġa fil-limiti ta’ kwota ffissata skont il-Ftehim Bilaterali Konkluż bejn ir-Repubblika tal-Awstrija u r-Repubblika tat-Turkija dwar it-Trasport bit-Triq ( 2 ) (iktar ’il quddiem il-“Ftehim tal-Awstrija-Turkija dwar it-Trasport bit-Triq”), jew ta’ permess individwali maħruġ għal trasport wieħed li jkun ta’ interess pubbliku maġġuri. Tali permess jinħareġ biss jekk l-applikant juri b’mod suffiċjenti li t-trasport ma jistax ikun evitat permezz ta’ miżuri loġistiċi u lanqas permezz tal-għażla ta’ mezz ta’ trasport ieħor.

3.

Il-qorti tar-rinviju tistaqsi, essenzjalment, fuq il-konformità tas-sistema Awstrijaka ta’ awtorizzazzjoni stabbilita fir-rigward tat-trasportaturi Torok mad-dispożizzjonijiet li jirregolaw l-assoċjazzjoni bejn il-Komunità Ekonomika Ewropea u t-Turkija (iktar ’il quddiem l-“Assoċjazzjoni KEE-Turkija”), b’mod partikolari dawk previsti mill-Ftehim dwar il-Ħolqien ta’ Assoċjazzjoni bejn il-Komunità Ekonomika Ewropea u t-Turkija ( 3 ) (iktar ’il quddiem il-“Ftehim ta’ Assoċjazzjoni KEE-Turkija”), mill-Protokoll Addizzjonali għall-Ftehim ta’ Assoċjazzjoni KEE-Turkija ( 4 ) (iktar ’il quddiem il-“Protokoll Addizzjonali”) kif ukoll mid-Deċiżjoni Nru 1/95 tal-Kunsill ta’ Assoċjazzjoni KE-Turkija ( 5 ) (iktar ’il quddiem id-“Deċiżjoni Nru 1/95 tal-Kunsill ta’ Assoċjazzjoni”).

4.

Il-qorti tar-rinviju tistaqsi, l-ewwel nett, jekk ir-rikorrent fil-kawża prinċipali jistax jinvoka d-dispożizzjonijiet dwar il-moviment liberu tal-merkanzija bejn l-Unjoni u t-Turkija sabiex isostni li s-sistema Awstrijaka ta’ awtorizzazzjoni tikkostitwixxi miżura li għandha effett ekwivalenti għal restrizzjonijiet kwantitattivi fis-sens tal-Artikolu 5 tad-Deċiżjoni Nru 1/95 tal-Kunsill ta’ Assoċjazzjoni, jew jekk l-imsemmija sistema taqax iktar taħt il-provvista ta’ servizzi ta’ trasport. Il-qorti tar-rinviju tistaqsi, barra minn hekk, jekk is-sistema Awstrijaka ta’ awtorizzazzjoni għandhiex effett diskriminatorju kontra t-trasportaturi Torok, bi ksur tal-Artikolu 9 tal-Ftehim ta’ Assoċjazzjoni KEE-Turkija.

5.

F’dawn il-konklużjonijiet, ser nispjega r-raġunijiet li għalihom inqis, min-naħa, li l-leġiżlazzjoni Awstrijaka inkwistjoni taqa’ taħt il-qasam tal-provvista tas-servizzi ta’ trasport u, min-naħa l-oħra, li d-dispożizzjonijiet li jirregolaw l-Assoċjazzjoni KEE-Turkija ma jipprekludux tali leġiżlazzjoni, sakemm il-qorti tar-rinviju tkun żgurat ruħha li din il-leġiżlazzjoni ma tinvolvix restrizzjoni ġdida għal-libertà li jiġu pprovduti servizzi fis-sens tal-Artikolu 41(1) tal-Protokoll Addizzjonali.

6.

Skont l-Artikolu 9 tal-Ftehim ta’ Assoċjazzjoni KEE–Turkija, “[i]l-Partijiet Kontraenti jirrikonoxxu li fil-qasam ta’ applikazzjoni tal-Ftehim, u bla ħsara għad-dispożizzjonijiet partikolari li jistgħu jiġu stabbiliti skont l-Artikolu 8, kull diskriminazzjoni mwettqa minħabba n-nazzjonalità hija pprojbita skont il-prinċipju stipulat fl-Artikolu 7 tat-Trattat li jistabbilixxi l-Komunità” [traduzzjoni mhux uffiċjali].

7.

L-Artikolu 10 tal-Ftehim jipprovdi:

“1.   L-Unjoni Doganali prevista fl-Artikolu 2(2) tal-Ftehim għandha testendi għall-kummerċ kollu ta’ merkanzija.

2.   L-Unjoni Doganali għandha tinvolvi:

[…]” [traduzzjoni mhux uffiċjali]

8.

Skont l-Artikolu 14 tal-Ftehim, “[i]l-Partijiet Kontraenti jaqblu li jispiraw ruħhom mill-Artikoli 55, 56 u 58 sa 65 tat-Trattat li jistabbilixxi l-Komunità sabiex jeliminaw bejniethom ir-restrizzjonijiet għal-libertà li jiġu pprovduti servizzi.” [traduzzjoni mhux uffiċjali]

9.

L-Artikolu 15 tal-Ftehim jipprovdi li “[l]-kundizzjonijiet u modalitajiet ta’ estensjoni għat-Turkija tad-dispożizzjonijiet tat-Trattat li jistabbilixxi l-Komunità u tal-atti adottati abbażi ta’ dawn id-dispożizzjonijiet għal dak li jirrigwarda t-trasport għandhom jiġu stabbiliti filwaqt li tittieħed inkunsiderazzjoni s-sitwazzjoni ġeografika tat-Turkija.” [traduzzjoni mhux uffiċjali]

10.

L-Artikolu 41, li jinsab fil-Kapitolu II tat-Titolu II tal-Protokoll Addizzjonali, intitolat “Id-dritt ta’ l-istabbeliment, tas-servizzi u tat-trasport”, huwa fformulat kif ġej:

“1.   Il-Partijiet Kontraenti għandhom jibqgħu lura milli jintroduċu bejniethom xi restrizzjonijiet ġodda rigward il-libertà ta’ l-istabbeliment u l-libertà tal-provvediment ta’ servizzi.

2.   Il-Kunsill ta’ l-Assoċjazzjoni għandu, b’konformità mal-prinċipji stabbiliti fl-Artikoli 13 u 14 tal-Ftehim ta’ l-Assoċjazzjoni, jiddetermina t-tabella taż-żmien u r-regoli għall-abbolizzjoni progressiva mill-Partijiet Kontraenti, bejniethom, tar-restrizzjonijiet rigward il-libertà ta’ l-istabbeliment u l-libertà li jkunu pprovvduti servizzi.

Il-Kunsill ta’ l-Assoċjazzjoni għandu, meta jiddetermina tabella taż-żmien bħal din u regoli għad-diversi klassijiet ta’ attività, jieħu akkont tal-miżuri korresspondenti diġa adotti mill-Komunità f’dawn l-oqsma u wkoll iċ-ċirkostanzi ekonomiċi u soċjali speċjali tat-Turkija. Prijorità għandha tingħata għall-attivitajiet li jagħmlu kontribuzzjoni partikolari għall-iżvilupp tal-produzzjoni u l-kummerċ”.

11.

L-Artikolu 42, li jinsab fl-istess kapitolu tal-Protokoll Addizzjonali jipprovdi:

“1.   Il-Kunsill ta’ l-Assoċjazzjoni għandu jestendi lejn it-Turkija, b’konformità mar-regoli li hu għandu jiddetermina, id-disposizzjonijiet tat-trasport tat-Trattat li jistabbilixxi l-Komunità b’attenzjoni partikolari għas-sitwazzjoni ġeografika tat-Turkija. Bl-istess mod hu jista jestendi lejn it-Turkija miżuri meħuda mill-Komunità fl-applikazzjoni ta’ dawn id-disposizzjonijiet fir-rigward tat-trasport bil-ferrovija, bit-triq jew b’kanali ta’ ilma nterni.

[…]”

12.

Skont l-Artikolu 1 tad-Deċiżjoni Nru 1/95 tal-Kunsill ta’ Assoċjazzjoni, “[b]la ħsara għad-dispożizzjonijiet tal-Ftehim ta’ Ankara, tal-Protokolls Addizzjonali u Supplimentari tiegħu, il-Kunsill ta’ Assoċjazzjoni KEE-Turkija jistabbilixxi iktar ’il quddiem il-modalitajiet għall-implimentazzjoni tal-fażi finali tal-Unjoni Doganali prevista fl-Artikoli 2 u 5 tal-imsemmi ftehim” [traduzzjoni mhux uffiċjali].

13.

L-Artikolu 5, li jinsab fis-Sezzjoni II tal-Kapitolu 1 tad-Deċiżjoni Nru 1/95 tal-Kunsill ta’ Assoċjazzjoni, intitolat “Eliminazzjoni tar-restrizzjonijiet kwantitattivi jew tal-miżuri li għandhom effett ekwivalenti”, jipprovdi:

“Ir-restrizzjonijiet kwantitattivi għall-importazzjoni u kull miżura li għandha effett ekwivalenti għandhom ikunu pprojbiti bejn il-Partijiet Kontraenti”. [traduzzjoni mhux uffiċjali]

14.

Skont l-Artikolu 7, “[l]-Artikoli 5 u 6 ma jipprekludux il-projbizzjonijiet jew ir-restrizzjonijiet ta’ importazzjoni, ta’ esportazzjoni jew ta’ tranżitu ġġustifikati għal raġunijiet ta’ moralità pubblika, ta’ ordni pubbliku, ta’ sigurtà pubblika, ta’ protezzjoni tas-saħħa u tal-ħajja tal-persuni u tal-annimali jew ta’ preżervazzjoni tal-pjanti, ta’ protezzjoni tat-teżori nazzjonali li għandhom valur artistiku, storiku jew arkeoloġiku, jew ta’ protezzjoni tal-proprjetà industrijali u kummerċjali. Madankollu, projbizzjonijiet jew restrizzjonijiet bħal dawn la għandhom jikkostitwixxu mezz ta’ diskriminazzjoni arbitrarja u lanqas restrizzjoni moħbija fil-kummerċ bejn il-Partijiet Kontraenti” [traduzzjoni mhux uffiċjali].

15.

Skont l-Artikolu 1 tal-Güterbeförderungsgesetz (il-Liġi dwar it-Trasport bit-Triq ta’ Merkanzija) tal-1995 (BGBl. 593/1995, fil-verżjoni ppubblikata fil-BGBl. 96/2013, iktar ’il quddiem il-“GütbefG”), il-liġi tapplika b’mod partikolari “għat-trasport kummerċjali ta’ merkanzija mwettaq minn impriżi ta’ trasport permezz ta’ vetturi bil-mutur tat-triq bi trejler jew mingħajru li l-piż total ammissibbli tagħhom jaqbeż 3500 kilo”.

16.

L-Artikolu 2 tal-GütbefG, intitolat “Liċenzji obbligatorji u tipi ta’ liċenzja” jipprovdi:

“(1)   It-trasport kummerċjali ta’ merkanzija permezz ta’ vetturi bil-mutur jista’ jsir biss abbażi ta’ liċenzja ħlief dispożizzjoni kuntrarja ta’ din il-liġi (Artikolu 4). […]”

17.

L-Artikolu 7 tal-GütbefG, intitolat “Trasport internazzjonali” jipprovdi:

“(1)   Minbarra d-detenturi tal-liċenzji msemmija fl-Artikolu 2, huma awtorizzati jwettqu trasport kummerċjali ta’ merkanzija permezz ta’ vetturi bil-mutur, minn postijiet li jinsabu barra mit-territorju federali lejn it-territorju federali jew b’passaġġ minn ġot-territorju federali jew minn postijiet li jinsabu fit-territorju federali lejn pajjiż ieħor, l-impriżi li, skont il-leġiżlazzjoni applikabbli fl-Istat li fit-territorju tiegħu huma stabbiliti, jistgħu jittrasportaw merkanzija permezz ta’ vetturi bil-mutur u huma detenturi ta’ waħda mill-awtorizzazzjonijiet li ġejjin:

18.

L-Artikolu 8 tal-GütbefG, intitolat “Ħruġ tal-awtorizzazzjonijiet”, jipprovdi:

“(1)   Il-permess imsemmi fl-Artikolu 7(1)(3) jinħareġ għal trasport ta’ merkanzija wieħed. Dan jinħareġ biss għal interess pubbliku maġġuri. Huwa l-applikant li għandu juri b’mod suffiċjenti li t-trasport ma jistax ikun evitat b’miżuri loġistiċi u lanqas bl-għażla ta’ mezz ieħor ta’ trasport. Il-permess jiġi rrifjutat meta (fid-dawl b’mod partikolari tal-istrutturi ta’ trasport eżistenti fit-territorju federali) it-trasport tal-merkanzija mitlub ma jkunx jirrifletti xi bżonn. Għal dan il-għan għandhom jittieħdu inkunsiderazzjoni l-interessi tal-ekonomija u tal-moviment tal-Awstrija, il-protezzjoni tal-popolazzjoni u tal-ambjent kif ukoll il-possibbiltà li t-trasport ta’ merkanzija jsir permezz tal-użu ta’ strutturi oħra ta’ trasport. […]

(3)   Jistgħu jiġu konklużi ftehimiet abbażi ta’ din il-liġi federali li jirrigwardaw it-trasport internazzjonali ta’ merkanzija msemmi fl-Artikolu 7 meta l-volum tat-traffiku internazzjonali ta’ merkanzija jkun jeżiġi dan. Il-ftehimiet jistgħu jippermettu, abbażi tar-reċiproċità, lill-vetturi bil-mutur irreġistrati barra mill-pajjiż iwettqu trasport b’destinazzjoni lejn, b’passaġġ minn ġo jew li jitlaq mill-Awstrija. Jistgħu jiġu ffissati kwoti bejn l-Istati, f’limiti li għandhom jieħdu inkunsiderazzjoni l-interessi tal-ekonomija u tal-moviment tal-Awstrija, il-protezzjoni tal-popolazzjoni u tal-ambjent. […]

(4)   Il-kwota miftehma għandha tinqasam permezz ta’ proċedura ssimplifikata. L-awtorità kompetenti tista’ toħroġ attestazzjonijiet li jiċċertifikaw li l-kundizzjonijiet stabbiliti fil-ftehim huma ssodisfatti u b’mod partikolari li l-kwota miftehma hija osservata (awtorizzazzjoni ta’ kwota) […]”

19.

L-Artikolu 9 tal-GütbefG jipprovdi li:

“(1)   It-trasportatur għandu l-obbligu jiżgura li, waqt kull trasport internazzjonali ta’ merkanzija, id-dokumenti li jattestaw li l-awtorizzazzjonijiet meħtieġa mill-Artikolu 7(1), debitament mimlija u, jekk ikun il-każ, approvati mill-awtorità kompetenti, ikunu jinsabu abbord il-vettura.

(2)   Is-sewwieq għandu l-obbligu, waqt kull trasport internazzjonali ta’ merkanzija u matul il-perijodu kollu tal-vjaġġ, ikollu abbord id-dokumenti li jattestaw l-awtorizzazzjonijiet meħtieġa mill-Artikolu 7(1), debitament mimlija u, jekk ikun il-każ, approvati mill-awtorità kompetenti, u jippreżentahom lill-awtoritajiet ta’ kontroll meta dawn jitolbu dan.

[…]”

20.

L-Artikolu 23 tal-GütbefG, intitolat “Dispożizzjonijiet kriminali”, jipprovdi li:

“(1)   […] [I]wettaq ksur amministrattiv, issanzjonat b’multa li tista’ tasal sa EUR 7267, dak li, bħala imprenditur,

[…]

(3)   iwettaq it-trasport imsemmi fl-Artikoli 7 sa 9 mingħajr l-awtorizzazzjoni meħtieġa jew ma josservax l-obbligi jew il-projbizzjonijiet ta’ ftehimiet internazzjonali;

[…]”

21.

Skont l-Artikolu 4(1) tal-Ftehim Awstrija-Turkija dwar it-Trasport bit-Triq “[h]uwa meħtieġ dokument għall-vetturi bil-mutur, inkluż it-trejlers, irreġistrati f’wieħed miż-żewġ Stati u li jintużaw sabiex jittrasportaw merkanzija bejn dawn l-Istati jew b’passaġġ minn ġo fihom”. Il-paragrafu 2 ta’ dan l-artikolu jipprovdi li “[e]bda dokument ma huwa meħtieġ għall-vjaġġi mingħajr merkanzija u għall-vetturi bil-mutur b’tagħbija ta’ inqas minn 2 tunnellati”.

22.

L-Artikolu 6 ta’ dan il-ftehim jipprovdi li:

“1.   Id-dokumenti jinħarġu għat-trasportaturi. Dawn jawtorizzaw it-trasport permezz ta’ vetturi bil-mutur inkluż it-trejlers.

2.   Id-dokument ta’ Stat jawtorizza t-twettiq ta’ trasport b’destinazzjoni lejn jew mill-Istat l-ieħor kif ukoll b’passaġġ minn ġo dan l-Istat.

3.   Id-dokumenti għandhom ikunu abbord matul il-vjaġġ fit-territorju tal-Istat kopert mid-dokumenti u għandhom jiġu ppreżentati lill-awtoritajiet ta’ kontroll kompetenti ta’ dan l-Istat fuq talba tagħhom”.

23.

L-Artikolu 7 tal-imsemmi ftehim jipprovdi li:

“1.   Id-dokumenti għandhom jinħarġu mill-awtoritajiet kompetenti tal-Istat ta’ reġistrazzjoni tal-vettura f’isem l-awtoritajiet kompetenti tal-Istat l-ieħor fil-limiti tal-kwota stabbilita kull sena bil-qbil mill-awtoritajiet kompetenti taż-żewġ Stati sat-30 ta’ Novembru tas-sena sussegwenti.

2.   L-awtoritajiet kompetenti taż-żewġ Stati għandhom jiskambjaw in-numru ta’ formoli neċessarji għat-trasport li jaqa’ taħt dan il-ftehim”.

24.

CX huwa d-diriġent tal-kumpannija FU li s-sede tagħha tinsab fit-Turkija u li teżerċita l-attività ta’ trasport ta’ merkanzija.

25.

Permezz ta’ deċiżjoni tas-17 ta’ Marzu 2015, il-Bezirkshauptmannschaft Schärding (l-Awtorità Amministrattiva tad-Distrett ta’ Schärding, l-Awstrija) imponiet fuq CX multa ta’ EUR 1453 (jew, fil-każ ta’ nuqqas ta’ ħlas, 67 siegħa ta’ detenzjoni) għal trasport kummerċjali ta’ merkanzija (oġġetti ta’ tessuti) imwettaq minn FU, fit-2 ta’ April 2015, li telaq mit-Turkija b’destinazzjoni lejn il-Ġermanja b’passaġġ minn ġol-Awstrija, mingħajr ma kellha l-permess meħtieġ għal dan il-għan.

26.

CX ikkontesta din id-deċiżjoni quddiem il-Landesverwaltungsgericht Oberösterreich (il-Qorti Amministrattiva Reġjonali tal-Awstrija ta’ Fuq, l-Awstrija). Permezz ta’ sentenza tat‑28 ta’ Diċembru 2015, din tal-aħħar ċaħdet ir-rikors minħabba li CX kien kiser id-dispożizzjonijiet tal-Artikolu 23(1)(3) u tal-Artikolu 7(1)(4) tal-GütbefG, kif ukoll tal-Artikolu 4(1) u tal-Artikoli 6 u 7 tal-Ftehim Awstrija-Turkija dwar it-Trasport bit-Triq, peress li s-sewwieq tal-vettura ma setax jippreżenta l-permess meħtieġ sabiex iwettaq it-trasport internazzjonali ta’ merkanzija bejn l-Awstrija u t-Turkija.

27.

CX appella minn din id-deċiżjoni quddiem il-Verwaltungsgerichtshof (il-Qorti Amministrattiva).

28.

Permezz ta’ deċiżjoni tat‑22 ta’ Novembru 2016, li waslet fil-Qorti tal-Ġustizzja fis‑7 ta’ Diċembru 2016, il-Verwaltungsgerichtshof (il-Qorti Amministrattiva) iddeċidiet li tissospendi l-proċeduri u li tagħmel id-domanda preliminari li ġejja lill-Qorti tal-Ġustizzja:

“Il-liġi tal-Unjoni, u b’mod partikolari l-[Ftehim ta’ Assoċjazzjoni KEE-Turkija], il-[Protokoll Addizzjonali] kif ukoll id-Deċiżjoni Nru 1/95 tal-Kunsill ta’ Assoċjazzjoni […], tipprekludi leġiżlazzjoni nazzjonali li abbażi tagħha l-impriżi ta’ trasport ta’ merkanzija stabbiliti fir-Repubblika tat-Turkija ma jistgħux iwettqu trasport internazzjonali kummerċjali ta’ merkanzija permezz ta’ vetturi bil-mutur b’destinazzjoni lejn jew b’passaġġ minn fuq it-territorju tar-Repubblika tal-Awstrija ħlief jekk dawn ikollhom dokumenti għall-vetturi bil-mutur li jinħarġu fil-limiti ta’ kwota fissa skont ftehim bilaterali bejn [ir-Repubblika tal-Awstrija] u [r-Repubblika tat-Turkija] jew jekk tinħarġilhom liċenzja għal trasport ta’ merkanzija wieħed bil-kundizzjoni li dan għandu jkollu interess pubbliku maġġuri u li jkun l-applikant li għandu l-oneru li jistabbilixxi b’mod suffiċjenti li t-trasport ma jistax jiġi evitat permezz ta’ miżuri loġistiċi u lanqas bl-għażla ta’ mezz ta’ trasport ieħor?”

29.

Ġew ippreżentati osservazzjonijiet bil-miktub minn CX, mill-Gvern Awstrijak u minn dak Ungeriż kif ukoll mill-Kummissjoni Ewropea. Kollha kemm huma kienu rrappreżentati fis-seduta tal‑31 ta’ Jannar 2018.

30.

Skont il-leġiżlazzjoni Awstrijaka inkwistjoni, it-trasport kummerċjali internazzjonali ta’ merkanzija bit-triq b’destinazzjoni lejn, b’passaġġ minn ġo jew li jitlaq mit-territorju Awstrijak jista’ jsir biss permezz ta’ awtorizzazzjoni. Għat-trasportaturi li għandhom is-sede tagħhom fi Stat Membru tal-Unjoni, din l-awtorizzazzjoni tista’ tieħu l-forma ta’ liċenzja Komunitarja maħruġa skont ir-Regolament Nru 1072/2009 ( 7 ). Għat-trasportaturi li għandhom is-sede tagħhom f’pajjiż terz, inkluż it-Turkija, din l-awtorizzazzjoni tista’, min-naħa l-oħra, tieħu waħda miż-żewġ forom sussegwenti.

31.

Fl-ewwel lok, skont l-Artikolu 7(1)(4) tal-GütbefG, it-trasportaturi li għandhom is-sede tagħhom f’pajjiż terz jistgħu jibbenefikaw minn awtorizzazzjoni maħruġa skont ftehim internazzjonali. Għal dak li jirrigwarda t-trasportaturi Torok, il-Ftehim Awstrija-Turkija dwar it-Trasport bit-Triq jipprevedi l-iffissar ta’ kwota annwali ta’ trasport bil-qbil bejn l-awtoritajiet kompetenti taż-żewġ Stati ( 8 ). Dawn l-awtorizzazzjonijiet jingħataw lit-trasportaturi Torok mill-awtoritajiet kompetenti Torok fil-limiti tal-kwota ffissata. Il-Gvern Awstrijak jindika, f’dan ir-rigward, li attwalment ir-Repubblika tal-Awstrija u r-Repubblika tat-Turkija huma miftehma fuq kwota annwali ta’ 21000 awtorizzazzjoni (kwota bażika) ( 9 ), li magħhom jiżdiedu numru varjabbli ta’ awtorizzazzjonijiet bħala tpaċija ( 10 ) kif ukoll awtorizzazzjonijiet mogħtija fil-kuntest tal-Konferenza Ewropea tal-Ministri għat-Trasport (KEMT) (“awtorizzazzjoni KEMT”) ( 11 ). Bħala total, it-Turkija jkollha kull sena madwar 90000 sa 100000 trasport ta’ tranżitu bit-triq b’passaġġ minn ġol-Awstrija.

32.

Fit-tieni lok, it-trasportaturi Torok għandhom il-possibbiltà jitolbu permess skont l-Artikolu 7(1)(3) u l-Artikolu 8(1) tal-GütbefG (“permess individwali”). Dan il-permess jinħareġ biss għal trasport wieħed li jkun ta’ interess pubbliku maġġuri u bil-kundizzjoni li l-applikant juri b’mod suffiċjenti li t-trasport ma jistax jiġi evitat permezz ta’ miżuri loġistiċi u lanqas bl-għażla ta’ mezz ieħor ta’ trasport ( 12 ).

33.

Permezz tad-domanda preliminari tagħha, il-qorti tar-rinviju tistaqsi, essenzjalment, jekk is-sistema Awstrijaka ta’ awtorizzazzjoni stabbilita fir-rigward tat-trasportaturi Torok hijiex kompatibbli mad-dispożizzjonijiet li jirregolaw l-Assoċjazzjoni KEE-Turkija.

34.

CX isostni li dan ma huwiex il-każ. Fl-ewwel lok, l-imsemmija sistema tirrestrinġi l-moviment liberu tal-merkanzija bejn l-Unjoni u t-Turkija, bi ksur tal-Artikolu 5 tad-Deċiżjoni Nru 1/95 tal-Kunsill ta’ Assoċjazzjoni, billi tippermetti t-tranżitu biss għal numru limitat ta’ trasportaturi Torok. Il-kwota ffissata għat-trasportaturi Torok hija insuffiċjenti. Konsegwentement, dawn it-trasportaturi jkunu obbligati jużaw ir-“Rollende Landstraße” (irmunkar fuq ferrovija) ( 13 ), fatt li jinvolvi spejjeż addizzjonali u jtawwal iż-żmien ta’ trasport meta mqabbel mat-trasport bit-triq ( 14 ). Dan jimplika li l-merkanzija li tkun ġejja mit-Turkija issir għola u li finalment din tkun inqas kompetittiva. Ir-restrizzjonijiet marbutin mas-sistema ta’ kwota ta’ trasport għandhom għaldaqstant effetti ekonomiċi kbar għall-produtturi u x-xerrejja ta’ din il-merkanzija u jimminaw l-effikaċità tal-Unjoni Doganali. Fit-tieni lok, is-sistema Awstrijaka ta’ kwota ta’ trasport twassal għal diskriminazzjoni kontra t-trasportaturi Torok, bi ksur tal-Artikolu 9 tal-Ftehim ta’ Assoċjazzjoni KEE-Turkija, peress li r-restrizzjonijiet marbutin mas-sistema ta’ kwota ma japplikawx għat-trasportaturi tal-Unjoni.

35.

Il-qorti tar-rinviju tistaqsi, l-ewwel nett, fuq il-punt dwar jekk CX jistax jibbaża ruħu fuq il-moviment liberu tal-merkanzija bejn l-Unjoni u t-Turkija, meta FU hija impriża tat-trasport ta’ merkanzija li ma tipproduċix hija stess il-merkanzija li hija tittrasporta, u jekk CX jistax isostni, b’mod partikolari, li l-kundizzjonijiet li japplikaw għal FU sabiex tibbenefika mill-awtorizzazzjoni meħtieġa mill-GütbefG jikkostitwixxu miżura li għandha effett ekwivalent għal restrizzjonijiet kwantitattivi fis-sens tal-Artikolu 5 tad-Deċiżjoni Nru 1/95 tal-Kunsill ta’ Assoċjazzjoni. Il-qorti tar-rinviju tqis, f’dan l-istadju, li l-każ ineżami ma għandux ikun eżaminat mill-anglu tal-moviment liberu tal-merkanzija, peress li jirriżulta, fil-fehma tagħha, li, fil-Ftehim ta’ Assoċjazzjoni KEE-Turkija, il-moviment liberu tal-merkanzija, il-libertà li jiġu pprovduti servizzi u s-settur tat-trasport huma meqjusa bħala materji distinti waħda mill-oħra, intiżi li jiġu implementati mill-Assoċjazzjoni bi gradi u ritmi differenti. Hemm raġunijiet serji sabiex jitqies li l-qasam tat-trasport għandu jiġi deliberatament eskluż u ma għandux jiġi implementat permezz tal-moviment liberu tal-merkanzija ( 15 ).

36.

Jekk il-Qorti tal-Ġustizzja kellha tqis li CX jista’ jinvoka l-moviment liberu tal-merkanzija sabiex isostni li l-leġiżlazzjoni Awstrijaka inkwistjoni twassal għal restrizzjoni għal din il-libertà jew, tal-inqas, għal diskriminazzjoni kontra ċ-ċittadini Tork fis-sens tal-Artikolu 9 tal-Ftehim ta’ Assoċjazzjoni KEE-Turkija, tqum imbagħad, skont il-qorti tar-rinviju, il-kwistjoni dwar jekk din ir-restrizzjoni hijiex iġġustifikata taħt l-Artikolu 7 tad-Deċiżjoni Nru 1/95 tal-Kunsill ta’ Assoċjazzjoni.

37.

Fl-analiżi li ssegwi, ser nittratta, fl-ewwel lok, il-kwistjoni tal-klassifikazzjoni tal-leġiżlazzjoni Awstrijaka inkwistjoni fid-dawl tad-dispożizzjonijiet li jirregolaw l-Assoċjazzjoni KEE-Turkija. F’dan ir-rigward, ser nispjega r-raġunijiet li għalihom inqis, l-istess bħall-Gvern Awstrijak u dak Ungeriż kif ukoll bħall-Kummissjoni, li tali leġiżlazzjoni taqa’ taħt il-qasam tas-servizzi tat-trasport u li d-dispożizzjonijiet previsti mid-Deċiżjoni Nru 1/95 tal-Kunsill ta’ Assoċjazzjoni dwar il-moviment liberu tal-merkanzija bejn l-Unjoni u t-Turkija, ma japplikawx għal tali leġiżlazzjoni (Sezzjoni B.1). Fit-tieni lok, ser niċħad l-argumenti kuntrarji invokati minn CX li jirrigwardaw il-ġurisprudenza tal-Qorti tal-Ġustizzja dwar il-moviment liberu tal-merkanzija (Sezzjoni B.2). Fit-tielet lok, ser neżamina l-leġiżlazzjoni inkwistjoni fid-dawl tal-klawżola ta’ “standstill”, prevista fl-Artikolu 41(1) tal-Protokoll Addizzjonali, li tipprojbixxi l-introduzzjoni ta’ restrizzjonijiet ġodda għal-libertà li jiġu pprovduti servizzi (Sezzjoni B.3). Fl-aħħar nett, ser nittratta fil-qosor il-kwistjoni ta’ eventwali diskriminazzjoni kontra t-trasportaturi Torok fis-sens tal-Artikolu 9 tal-Ftehim ta’ Assoċjazzjoni KEE-Turkija (Sezzjoni B.4).

38.

Id-domanda preliminari magħmula mill-Verwaltungsgerichtshof (il-Qorti Amministrattiva) tqajjem, l-ewwel nett, kwistjoni dwar il-klassifikazzjoni tal-leġiżlazzjoni inkwistjoni fid-dawl tad-dispożizzjonijiet li jirregolaw l-Assoċjazzjoni KEE-Turkija ( 16 ). Tali leġiżlazzjoni taqa’ taħt id-dispożizzjonijiet dwar il-moviment liberu tal-merkanzija bejn l-Unjoni u t-Turkija jew pjuttost taħt dawk dwar il-provvista ta’ servizzi ta’ trasport?

39.

L-istess bħall-Gvern Awstrijak u dak Ungeriż kif ukoll bħall-Kummissjoni, jiena intendi lejn it-tieni ipoteżi.

40.

F’dan ir-rigward, nibbaża ruħi fuq il-kunsiderazzjonijiet segwenti.

41.

Fl-ewwel lok, għandu jiġi kkonstatat li, fil-kuntest tal-Assoċjazzjoni KEE-Turkija, il-moviment liberu tal-merkanzija, il-libertà li jiġu pprovduti servizzi u t-trasport jikkostitwixxu materji distinti li huma suġġetti għal regoli differenti ( 17 ). Dawn ir-regoli jirriflettu gradi differenti ta’ liberalizzazzjoni tas-swieq ikkonċernati. Filwaqt li l-moviment liberu tal-merkanzija bejn l-Unjoni u t-Turkija huwa ggarantit b’mod partikolari mid-dispożizzjonijiet tad-Deċiżjoni Nru 1/95 tal-Kunsill ta’ Assoċjazzjoni dwar l-Unjoni Doganali ( 18 ), l-oqsma tas-servizzi u tat-trasport jibqgħu, fl-istat attwali tal-iżvilupp tal-Assoċjazzjoni KEE-Turkija, essenzjalment mhux illiberalizzati ( 19 ).

42.

Għal dak li jirrigwarda, b’mod partikolari, l-qasam tat-trasport, l-Artikolu 15 tal-Ftehim ta’ Assoċjazzjoni KEE-Turkija jipprovdi li “[l]-kundizzjonijiet u modalitajiet ta’ estensjoni għat-Turkija tad-dispożizzjonijiet tat-Trattat li jistabbilixxi l-Komunità u tal-atti adottati abbażi ta’ dawn id-dispożizzjonijiet għal dak li jirrigwarda t-trasport għandhom jiġu stabbiliti filwaqt li tittieħed inkunsiderazzjoni s-sitwazzjoni ġeografika tat-Turkija” [traduzzjoni mhux uffiċjali]. Barra minn hekk, l-Artikolu 42 tal-Protokoll Addizzjonali jipprovdi li l-Kunsill ta’ Assoċjazzjoni għandu jestendi, b’konformità mar-regoli li huwa għandu jiddetermina, b’teħid inkunsiderazzjoni tas-sitwazzjoni ġeografika tat-Turkija, id-dispożizzjonijiet tat-Trattat li jistabbilixxi l-Komunità applikabbli għat-trasport u li huwa jista’, taħt l-istess kundizzjonijiet, jestendi lejn it-Turkija il-miżuri adottati mill-Komunità b’applikazzjoni ta’ dawn id-dispożizzjonijiet, b’mod partikolari, fir-rigward tat-trasport bit-triq.

43.

Madankollu, għandu jiġi kkonstatat li, sal-lum, il-Kunsill ta’ Assoċjazzjoni ma ddeterminax regoli għal dan il-għan. Għaldaqstant, fl-istat attwali tal-iżvilupp tal-Assoċjazzjoni KEE-Turkija, ma teżisti ebda leġiżlazzjoni speċifika fil-qasam tat-trasport ( 20 ).

44.

Fit-tieni lok, fir-rigward tal-kwistjoni dwar jekk leġiżlazzjoni nazzjonali taqax taħt libertà ta’ moviment waħda jew oħra, skont ġurisprudenza stabbilita sew, għandu jittieħed inkunsiderazzjoni l-għan tal-leġiżlazzjoni inkwistjoni ( 21 ). Inqis li dan japplika wkoll, b’analoġija, għall-klassifikazzjoni ta’ leġiżlazzjoni nazzjonali fir-rigward tad-dispożizzjonijiet li jirregolaw l-Assoċjazzjoni KEE-Turkija.

45.

Għal dak li jirrigwarda l-leġiżlazzjoni Awstrijaka inkwistjoni fil-kawża prinċipali, inqis li din hija intiża, essenzjalment, sabiex tiddetermina l-kundizzjonijiet li għandhom ikunu ssodisfatti bil-għan tat-twettiq ta’ trasport kummerċjali internazzjonali ta’ merkanzija bit-triq b’destinazzjoni lejn, b’passaġġ minn ġo jew li jitlaq mit-territorju Awstrijak ( 22 ). F’dan ir-rigward, din il-leġiżlazzjoni tipprovdi b’mod partikolari li tali trasport jista’ jsir biss abbażi ta’ awtorizzazzjoni li, għat-trasportaturi Torok, tista’ tieħu l-forma jew ta’ awtorizzazzjoni maħruġa fil-limiti tal-kwota stabbilita skont il-Ftehim Awstrija-Turkija dwar it-Trasport bit-Triq, jew ta’ permess individwali maħruġ għat-trasport li jkun ta’ interess pubbliku maġġuri ( 23 ). Fi kliem ieħor, il-leġiżlazzjoni Awstrijaka inkwistjoni timponi restrizzjonijiet għall-aċċess tat-trasportaturi Torok għas-suq tat-trasport internazzjonali bit-triq tal-merkanzija.

46.

Ma hemmx dubju, fil-fehma tiegħi, li tali leġiżlazzjoni taqa’ taħt il-qasam tas-servizzi tat-trasport.

47.

Min-naħa, jirriżulta mill-ġurisprudenza tal-Qorti tal-Ġustizzja li l-libertà ta’ trasportatur tal-merkanzija bit-triq taqa’, fl-istruttura ġenerali tad-dispożizzjonijiet tat-Trattat, taħt il-qasam tal-provvista ta’ servizzi fil-kamp tat-trasport ( 24 ). Ma nara ebda raġuni sabiex għandu japplika mod ieħor fil-kuntest tad-dispożizzjonijiet li jirrigwardaw l-Assoċjazzjoni KEE-Turkija.

48.

Min-naħa l-oħra, għandu jiġi kkonstatat li qabel, it-trasport internazzjonali bit-triq ta’ merkanzija bejn l-Istati Membri kien suġġett għal sistemi ta’ awtorizzazzjoni simili għal dik attwalment stabbilita mil-leġiżlazzjoni Awstrijaka inkwistjoni fir-rigward tat-trasportaturi Torok. Dawn is-sistemi kienu bbażati, parzjalment, fuq kwoti bilaterali bejn l-Istati Membri u, parzjalment, fuq kwoti Komunitarji ( 25 ).

49.

Fis-sentenza Il‑Parlament vs Il‑Kunsill ( 26 ), il-Qorti tal-Ġustizzja kkonstatat li l-Kunsill kien naqas milli jwettaq l-obbligi tiegħu taħt l-Artikolu 75 KEE (li sar l-Artikolu 91 TFUE), meta astjena, b’mod partikolari, milli jiżgura l-libertà li jiġu pprovduti servizzi fil-qasam tat-trasport internazzjonali. Wara din is-sentenza, il-kwoti bilaterali u Komunitarji ġew progressivament eliminati sakemm ġew ssostitwiti, b’effett mill-1 ta’ Jannar 1993, bis-sistema tal-liċenzja Komunitarja mingħajr kwota, li hija attwalment fis-seħħ ( 27 ). L-atti li jirrigwardaw il-kwota Komunitarja u l-liċenzja Komunitarja ġew adottati skont id-dispożizzjonijiet tat-Trattat li jirrigwardaw il-politika komuni tat-trasport ( 28 ).

50.

Din l-evoluzzjoni leġiżlattiva u ġudizzjarja dwar it-trasport internazzjonali bejn l-Istati Membri tikkonferma, fil-fehma tiegħi, il-konklużjoni li leġiżlazzjoni nazzjonali bħal dik inkwistjoni, li tipprovdi għal sistema ta’ awtorizzazzjoni fil-qasam ta’ trasport internazzjonali bit-triq, għandha tkun ikklassifikata bħala miżura li taqa’ taħt il-kamp tas-servizzi ta’ trasport.

51.

F’dan il-kuntest, inqis li s-sentenza mogħtija mill-Qorti tal-Ġustizzja fil-kawża Lambregts Transportbedrijf ( 29 ) jistħoqqilha attenzjoni partikolari. F’dik is-sentenza, il-Qorti tal-Ġustizzja ddikjarat li l-Artikolu 75(1)(a) u (b) tat-Trattat KEE [li sar l-Artikolu 91(1)(a) u (b) tat-Trattat FUE], dwar l-implimentazzjoni, mill-Kunsill, tal-politika komuni tat-trasport, ma jagħtix liċ-ċittadini tal-Istati Membri drittijiet li huma jistgħu jinvokaw quddiem il-qrati nazzjonali kontra deċiżjonijiet meħudin mill-amministrazzjonijiet nazzjonali fl-1982. Fi kliem ieħor, il-Qorti tal-Ġustizzja qieset li din id-dispożizzjoni ma għandhiex effett dirett li jippermettilha li tiġi invokata minn trasportatur stabbilit fi Stat Membru sabiex jikkontesta deċiżjoni amministrattiva nazzjonali dwar l-awtorizzazzjonijiet ta’ transport nazzjonali u internazzjonali.

52.

F’dan ir-rigward, il-Qorti tal-Ġustizzja kkonstatat, fil-punt 14 tas-sentenza, li, “fl-1982, il-moviment liberu tas-servizzi fil-qasam tat-trasport internazzjonali kien […] żgurat biss internament kif ukoll meta jitlaq minn jew ikun iddestinat lejn l-Istat Membru fejn l-impriża tkun stabbilita u bla ħsara għall-ksib ta’ awtorizzazzjoni ta’ trasport, skont il-kwoti bilaterali jew Komunitarji fis-seħħ f’dak l-Istat Membru” ( 30 ). Il-Qorti tal-Ġustizzja qieset għaldaqstant li fin-nuqqas ta’ implimentazzjoni mill-Kunsill tal-prinċipju ta’ moviment liberu tas-servizzi fil-qasam tat-trasport internazzjonali u nazzjonali, skont l-obbligi li huwa għandu taħt l-Artikolu 75(1)(a) u (b) tat-Trattat KEE, tali servizzi setgħu jitwettqu biss fil-limiti tal-kwoti bilaterali u Komunitarji. F’dan il-kuntest, il-Qorti tal-Ġustizzja ma għamlet ebda eżami tal-effetti eventwali ta’ dawn il-kwoti fuq il-moviment liberu tal-merkanzija.

53.

Inqis li l-istess raġunament japplika a fortiori għat-trasport internazzjonali imwettaq minn trasportaturi Torok fil-kuntest tal-Assoċjazzjoni KEE-Turkija. F’dan ir-rigward, għandu jittieħed inkunsiderazzjoni li, filwaqt li l-Artikolu 75(1)(a) u (b) tat-Trattat KEE kien jipprevedi l-obbligu għall-Kunsill li jistabbilixxi politika komuni tat-trasport ( 31 ), jirriżulta mill-ġurisprudenza tal-Qorti tal-Ġustizzja li l-estenzjoni tad-dispożizzjonijiet tat-Trattat fil-qasam tat-trasport għar-Repubblika tat-Turkija hija biss fakultattiva ( 32 ). F’dan il-kuntest, il-Qorti tal-Ġustizzja kkonstatat li l-Kunsill ta’ Assoċjazzjoni “igawdi minn marġni ta’ diskrezzjoni kunsiderevolment iktar estiża fil-qasam tat-trasport” ( 33 ). Fuq din il-bażi, inqis li, jekk il-Qorti tal-Ġustizzja ma applikatx l-Artikolu 30 tat-Trattat KEE (li sar l-Artikolu 34 tat-Trattat FUE) fil-kawża Lambregts Transportbedrijf ( 34 ), iktar u iktar ma għandux jiġi applikat l-Artikolu 5 tad-Deċiżjoni Nru 1/95 tal-Kunsill ta’ Assoċjazzjoni f’din il-kawża.

54.

Minn dan isegwi, fil-fehma tiegħi, li sakemm il-Kunsill ta’ Assoċjazzjoni ma adottax regoli li jirrigwardaw it-trasport, skont l-Artikolu 15 tal-Ftehim ta’ Assoċjazzjoni KEE-Turkija u l-Artikolu 42 tal-Protokoll Addizzjonali ( 35 ), l-aċċess tat-trasportaturi Torok għas-suq tat-trasport internazzjonali jibqa’ suġġett għall-kundizzjonijiet stabbiliti mil-leġiżlazzjonijiet nazzjonali tal-Istati Membri u mill-ftehimiet bilaterali konklużi bejn l-Istati Membri u r-Repubblika tat-Turkija ( 36 ). F’dan il-kuntest, in-numru ta’ awtorizzazzjonijiet ta’ trasport mogħtija lit-trasportaturi Torok jiddependi, b’mod partikolari, fuq in-negozjati li jsiru, fil-kuntest ta’ tali ftehimiet, bejn l-Istati kkonċernati. Irrid nenfasizza li l-maġġoranza tal-Istati Membri implementaw, abbażi tal-ftehimiet bilaterali li huma kkonkludew mar-Repubblika tat-Turkija, sistemi ta’ awtorizzazzjoni ta’ trasport li jixbhu lil dik inkwistjoni fil-kawża prinċipali ( 37 ).

55.

Id-deċiżjoni li jiġi lliberalizzat il-qasam tas-servizzi ta’ trasport, fil-kuntest tal-Assoċjazzjoni KEE-Turkija, tappartjeni biss lill-partijiet kontraenti, jekk dawn iqisuha opportuna, wara analiżi approfondita tal-implikazzjonijiet konkreti li din l-operazzjoni jkun jista’ jkollha, fid-dawl b’mod partikolari tal-kundizzjonijiet ta’ kompetizzjoni fis-suq tat-trasport internazzjonali. F’dan il-kuntest, il-liberalizzazzjoni progressiva tat-trasport internazzjonali bejn l-Istati Membri tixhed il-ħtieġa li tali liberalizzazzjoni tkun akkumpanjata bl-introduzzjoni ta’ regoli komuni b’mod partikolari fil-qasam tat-trasport ( 38 ).

56.

F’dawn iċ-ċirkustanzi, inqis li l-applikazzjoni, mill-Qorti tal-Ġustizzja, tad-dispożizzjonijiet li jirrigwardaw il-moviment liberu tal-merkanzija bejn l-Unjoni u t-Turkija fir-rigward ta’ leġiżlazzjoni bħalma hija dik inkwistjoni fil-kawża prinċipali, toħloq riskju li twassal għal liberalizzazzjoni, li sal-lum ma hijiex mixtieqa mill-Partijiet Kontraenti, tal-Ftehim ta’ Assoċjazzjoni KEE-Turkija, fil-qasam tat-trasport internazzjonali ( 39 ).

57.

Fid-dawl tal-kunsiderazzjonijiet kollha preċedenti, nikkonkludi li leġiżlazzjoni bħal dik inkwistjoni fil-kawża prinċipali, taqa’ taħt il-qasam tas-servizzi ta’ trasport u li d-dispożizzjonijiet previsti mid-Deċiżjoni Nru 1/95 tal-Kunsill ta’ Assoċjazzjoni dwar il-moviment liberu tal-merkanzija bejn l-Unjoni u t-Turkija ma japplikawx għal tali leġiżlazzjoni.

58.

Din il-konklużjoni ma tistax tiġi kkontestata mill-argumenti invokati minn CX, li jirrigwardaw il-ġurisprudenza tal-Qorti tal-Ġustizzja dwar il-moviment liberu tal-merkanzija, Ser nittratta dawn l-argumenti iktar ’il quddiem.

59.

Insostenn tal-argument tiegħu li d-dispożizzjonijiet dwar il-moviment liberu tal-merkanzija bejn l-Unjoni u t-Turkija japplikaw għal-leġiżlazzjoni bħal dik inkwistjoni, CX jinvoka ċerta numru ta’ sentenzi tal-Qorti tal-Ġustizzja dwar din il-libertà.

60.

Fl-ewwel lok, CX jibbaża ruħu fuq is-sentenza mogħtija fil-kawża Istanbul Lojistik ( 40 ). F’dik is-sentenza, il-Qorti tal-Ġustizzja kkonstatat li t-taxxa fuq il-karozzi, li għandha titħallas mid-detenturi tal-vetturi tqal irreġistrati fit-Turkija li jgħaddu mit-territorju Ungeriż, tikkostitwixxi taxxa li għandha effett ekwivalenti għal dazju doganali fis-sens tal-Artikolu 4 tad-Deċiżjoni Nru 1/95 tal-Kunsill ta’ Assoċjazzjoni ( 41 ).

61.

Skont CX, jekk it-taxxa Ungeriża ta’ tranżitu tostakola l-moviment liberu tal-merkanzija, l-istess għandu japplika għal-leġiżlazzjoni Awstrijaka inkwistjoni, peress li s-sistema ta’ kwota ta’ trasport prevista minn dik il-leġiżlazzjoni tirrappreżenta perikolu għall-moviment liberu tal-merkanzija li huwa ħafna ikbar minn taxxa ta’ tranżitu.

62.

Dan l-argument ma huwiex konvinċenti.

63.

Fil-fehma tiegħi, il-leġiżlazzjoni Awstrijaka inkwistjoni ma tixbahx lil dik inkwistjoni fil-kawża Istanbul Lojistik. Min-naħa, iż-żewġ leġiżlazzjonijiet huma distinti minn xulxin minħabba n-natura tagħhom. Il-kawża Istanbul Lojistik kienet għaldaqstant tirrigwarda miżura fiskali (taxxa), filwaqt li l-kawża preżenti tirrigwarda miżura ta’ kwota.

64.

Min-naħa l-oħra, dawn huma differenti wkoll minħabba l-għan tagħhom. Fil-fatt, fil-kawża Istanbul Lojistik, il-Qorti tal-Ġustizzja qieset li “anki jekk it-taxxa fuq il-karozzi ma tinġabarx fuq prodotti bħala tali, hija tolqot il-merkanzija ttrasportata minn vetturi rreġistrati f’pajjiż terz, b’mod partikolari t-Turkija, waqt il-qsim tal-fruntiera Ungeriża, u mhux […] is-servizz ta’ trasport” ( 42 ). Min-naħa l-oħra, il-leġiżlazzjoni Awstrijaka inkwistjoni f’din il-kawża hija intiża preċiżament, kif esponejt diġà, sabiex tiddetermina l-kundizzjonijiet li għandhom ikunu ssodisfatti bil-għan tat-twettiq ta’ servizzi ta’ trasport ( 43 ). Nippreċiża li, fil-kawża Istanbul Lojistik, il-Qorti tal-Ġustizzja llimitat ruħha teżamina t-taxxa bħala tali u ma pproċediet għal ebda eżami tas-sistema ta’ kwota li magħha din it-taxxa kienet marbuta ( 44 ).

65.

Fit-tieni lok, CX jinvoka sensiela ta’ sentenzi li fihom il-Qorti tal-Ġustizzja rrikonoxxiet ir-rabta bejn l-attività ta’ trasport tal-merkanzija u l-moviment liberu tal-merkanzija fi ħdan l-Unjoni. Fis-sentenzi kkonċernati, il-Qorti tal-Ġustizzja ddeċidiet li tikkostitwixxi miżura li għandha effett ekwivalenti għal restrizzjoni kwantitattiva fis-sens tal-Artikolu 34 TFUE, b’mod partikolari, projbizzjoni imposta fuq it-trakkijiet ta’ iktar minn 7.5 tunnellati li jittrasportaw ċerta merkanzija milli jiċċirkulaw fuq parti ta’ awtostrada li tikkostitwixxi waħda mill-mezzi prinċipali ta’ komunikazzjoni terrestri fir-reġjun ikkonċernat ( 45 ), u leġiżlazzjoni li timponi żmien u distanzi massimi qosra ta’ trasport ta’ annimali ħajjin intiżi li jinqatlu ( 46 ).

66.

Skont CX, jirriżulta minn din il-ġurisprudenza li leġiżlazzjoni bħal dik inkwistjoni fil-kawża prinċipali, għalkemm hija marbuta teknikament mat-trasport ta’ merkanzija, tirrestrinġi neċessarjament il-moviment tal-merkanzija, billi tippermetti t-tranżitu liberu lil numru limitat ta’ trasportaturi biss u billi tidderiġi għaldaqstant iċ-ċaqliq kummerċjali lejn rotot alternattivi jew modi ta’ trasport oħrajn li jinvolvu iktar żmien u spejjeż ( 47 ).

67.

Dan l-argument ma jistax jintlaqa’.

68.

Fil-fatt, għandu jiġi kkonstatat li l-ġurisprudenza invokata minn CX kienet tirrigwarda leġiżlazzjonijiet nazzjonali li huma ta’ natura differenti ħafna minn dik tal-leġiżlazzjoni Awstrijaka inkwistjoni f’din il-kawża.

69.

Min-naħa, il-leġiżlazzjonijiet inkwistjoni ma jirrigwardawx il-kundizzjonijiet li għandhom ikunu ssodisfatti bil-għan tat-twettiq ta’ servizzi ta’ trasport (kundizzjonijiet għall-aċċess għas-suq tat-trasport), bħal f’dan il-każ, imma pjuttost il-kundizzjonijiet li fihom tista’ tkun ittrasportata ċerta merkanzija (kundizzjonijiet ta’ trasport tal-merkanzija) ( 48 ). F’dan ir-rigward, il-Qorti tal-Ġustizzja qieset li l-kundizzjonijiet imposti li jirrigwardaw il-mod ta’ trasport, id-dewmien u d-distanza ta’ trasport kienu ta’ natura li jirrestrinġu l-moviment liberu tal-merkanzija kkonċernata ( 49 ).

70.

Min-naħa l-oħra, b’kuntrast mal-leġiżlazzjoni Awstrijaka inkwistjoni, il-leġiżlazzjonijiet ikkonċernati mill-ġurisprudenza invokata minn CX ma kinux intiżi għal ċerti trasportaturi, imma kienu japplikaw b’mod ġenerali għal kull trasport ta’ merkanzija li jaqa’ taħt il-kamp ta’ applikazzjoni tagħhom. Huwa f’din il-perspettiva li l-Qorti tal-Ġustizzja qieset li l-kundizzjonijiet ta’ trasport imposti setgħu jostakolaw il-moviment liberu tal-merkanzija kkonċernata u, b’mod partikolari, it-tranżitu liberu tagħha ( 50 ).

71.

Issa, għandu jiġi kkonstatat li l-leġiżlazzjoni Awstrijaka inkwistjoni fil-kawża prinċipali ma timponi ebda restrizzjoni fir-rigward tal-kundizzjonijiet ta’ trasport tal-merkanzija li tiġi mit-Turkija. Skont din il-leġiżlazzjoni, din il-merkanzija tista’, fil-fatt, tiċċirkula liberament bit-triq b’destinazzjoni lejn, b’passaġġ minn ġo jew bi tluq mit-territorju Awstrijak. Hija biss il-possibbiltà għat-trasportaturi Torok li jittrasportaw din il-merkanzija li hija limitata. Fi kliem ieħor, il-merkanzija Torka tista’ tiċċirkula liberament fl-Awstrija, imma mhux neċessarjament fi trakkijiet Torok. Inżid ngħid li din il-leġiżlazzjoni ma hijiex intiża għall-merkanzija li tkun ġejja mit-Turkija imma tapplika wkoll għat-trasport minn trasportaturi Torok ta’ merkanzija li tkun ġejja mill-Istati Membri, inkluż mill-Awstrija.

72.

Minn dan isegwi, fil-fehma tiegħi li anki jekk wieħed jippreżumi li l-leġiżlazzjoni Awstrijaka inkwistjoni taqa’ taħt id-dispożizzjonijiet li jirrigwardaw il-moviment liberu tal-merkanzija, din il-leġiżlazzjoni ma hijiex inkompatibbli mal-prinċipju ġenerali ta’ libertà ta’ tranżitu tal-merkanzija ġewwa l-Unjoni, irrikonoxxut mill-Qorti tal-Ġustizzja bħala konsegwenza ta’ din il-libertà ( 51 ).

73.

Bħala konklużjoni, inqis li l-argumenti invokati minn CX ma jistgħux jikkontestaw il-klassifikazzjoni tal-leġiżlazzjoni Awstrijaka kkonċernata bħala miżura li taqa’ taħt il-qasam tas-servizzi ta’ trasport. Minn dan jirriżulta li d-dispożizzjonijiet previsti mid-Deċiżjoni Nru 1/95 tal-Kunsill ta’ Assoċjazzjoni dwar il-moviment liberu tal-merkanzija bejn l-Unjoni u t-Turkija ma japplikawx għal tali leġiżlazzjoni.

74.

Tali leġiżlazzjoni għandha madankollu tissodisfa l-klawżola ta’ “standstill”, prevista fl-Artikolu 41(1) tal-Protokoll Addizzjonali ( 52 ). Ser neżamina din il-kwistjoni fis-sezzjoni sussegwenti.

75.

L-Artikolu 41(1) tal-Protokoll Addizzjonali jipprevedi klawżola ta’ “standstill”, li abbażi tagħha l-Partijiet Kontraenti għandhom jastjenu milli jintroduċu bejniethom restrizzjonijiet ġodda, b’mod partikolari għal-libertà li jiġu pprovduti servizzi. Jirriżulta mill-ġurisprudenza tal-Qorti tal-Ġustizzja li din il-klawżola tista’ tapplika għas-servizzi ta’ trasport u li hija tista’ tiġi invokata minn impriża stabbilita fit-Turkija li twettaq legalment provvisti ta’ servizzi fi Stat Membru ( 53 ).

76.

Il-klawżola ta’ “standstill” tipprojbixxi b’mod ġenerali l-introduzzjoni ta’ kwalunkwe miżura ġdida li jkollha l-għan jew l-effett li tissuġġetta l-eżerċizzju min-naħa ta’ ċittadin Tork b’mod partikolari tal-libertà li jiġu pprovduti servizzi fit-territorju ta’ Stat Membru għal kundizzjonijiet iktar restrittivi minn dawk li kienu japplikaw fid-data tad-dħul fis-seħħ tal-Protokoll Addizzjonali fir-rigward ta’ dan l-Istat Membru ( 54 ). Sabiex jiġi stabbilit jekk l-imsemmija klawżola tipprekludix leġiżlazzjoni nazzjonali bħal dik inkwistjoni, għandu għaldaqstant jiġi eżaminat jekk din tinvolvix restrizzjoni għal-libertà li jiġu pprovduti servizzi u, fil-każ ta’ risposta fl-affermattiv, jekk din ir-restrizzjoni għandhiex titqies bħala ġdida ( 55 ).

77.

Fir-rigward, fl-ewwel lok, tal-punt dwar jekk il-leġiżlazzjoni inkwistjoni fil-kawża prinċipali tinvolvix restrizzjoni għal-libertà li jiġu pprovduti servizzi, inqis li dan il-punt jitlob risposta pożittiva. Infakkar, f’dan ir-rigward, li, skont ġurisprudenza stabbilita, leġiżlazzjoni interna li tissuġġetta l-eżerċizzju tal-provvista ta’ servizzi fit-territorju nazzjonali, minn impriża stabbilita fi Stat Membru ieħor, għall-ħruġ ta’ awtorizzazzjoni amministrattiva tikkostitwixxi restrizzjoni għall-prinċipju fundamentali stabbilit mill-Artikolu 56 TFUE ( 56 ).

78.

Għal dak li jirrigwarda, fit-tieni lok, il-punt dwar jekk il-leġiżlazzjoni inkwistjoni tikkostitwixxix restrizzjoni ġdida, għandu jiġi stabbilit jekk din il-leġiżlazzjoni tippreżentax novità, fis-sens li hija għandha bħala konsegwenza li taggrava s-sitwazzjoni tat-trasportaturi Torok meta mqabbla ma’ dik li tirriżulta mir-regoli li kienu applikabbli għalihom fl-Awstrija fid-data tad-dħul fis-seħħ tal-Protokoll Addizzjonali fir-rigward ta’ dan l-Istat Membru ( 57 ).

79.

F’dan ir-rigward, il-Gvern Awstrijak jindika li s-sistema ta’ kwota prevista fil-Ftehim Awstrija-Turkija dwar it-Trasport bit-Triq kienet diġà fis-seħħ fil-mument tad-dħul fis-seħħ tal-Protokoll Addizzjonali fil-konfront tar-Repubblika tal-Awstrija, waqt l-adeżjoni tagħha mal-Unjoni fl-1 ta’ Jannar 1995 ( 58 ).

80.

Bla ħsara għal verifika dwar dan il-punt li għandha ssir mill-qorti tar-rinviju, jidher għaldaqstant li l-leġiżlazzjoni Awstrijaka inkwistjoni ma tinvolvix restrizzjoni ġdida għal-libertà li jiġu pprovduti servizzi fis-sens tal-Artikolu 41(1) tal-Protokoll Addizzjonali ( 59 ).

81.

CX iqis li l-leġiżlazzjoni Awstrijaka inkwistjoni twassal għal diskriminazzjoni kontra t-trasportaturi Torok, bi ksur tal-Artikolu 9 tal-Ftehim ta’ Assoċjazzjoni KEE-Turkija, li jipprojbixxi kull diskriminazzjoni eżerċitata minħabba n-nazzjonalità fil-kamp ta’ applikazzjoni tal-imsemmi ftehim, peress li r-restrizzjonijiet marbutin mas-sistema ta’ kwota fuq it-trasport ma japplikawx għat-trasportaturi li huma stabbiliti fl-Unjoni ( 60 ).

82.

L-istess bħall-Gvern Awstrijak u dak Ungeriż kif ukoll bħall-Kummissjoni, inqis li l-Artikolu 9 tal-Ftehim ta’ Assoċjazzjoni KEE-Turkija ma jipprekludix leġiżlazzjoni bħal dik inkwistjoni fil-kawża prinċipali, u dan għar-raġunijiet segwenti.

83.

Fl-ewwel lok, inqis li l-Artikolu 9 tal-Ftehim ta’ Assoċjazzjoni KEE‑Turkija ma japplikax għal tali leġiżlazzjoni. Fil-fatt, skont kif inhu fformulat, din id-dispożizzjoni tapplika “bla ħsara għad-dispożizzjonijiet partikolari li jistgħu jiġu stabbiliti skont l-Artikolu 8” [traduzzjoni mhux uffiċjali] tal-imsemmi ftehim ( 61 ). Għalkemm, fl-istat attwali tal-iżvilupp tal-Assoċjazzjoni KEE-Turkija, ma jeżistux regoli speċifiċi fil-qasam tat-trasport ( 62 ), ma għandux jiġi eskluż li tali regoli jistgħu jkunu adottati mill-Kunsill ta’ Assoċjazzjoni skont l-Artikolu 15 tal-Ftehim ta’ Assoċjazzjoni KEE‑Turkija u l-Artikolu 42 tal-Protokoll Addizzjonali. Kif ġustament tirrileva l-Kummissjoni, il-fatt li jiġi applikat l-Artikolu 9 tal-Ftehim ta’ Assoċjazzjoni KEE-Turkija għal-leġiżlazzjoni bħal dik inkwistjoni fil-kawża prinċipali, jantiċipa għaldaqstant il-kontenut ta’ eventwali leġiżlazzjoni fil-qasam tat-trasport.

84.

Fit-tieni lok, anki jekk wieħed jippreżumi li l-Artikolu 9 tal-Ftehim ta’ Assoċjazzjoni KEE-Turkija japplika għal leġiżlazzjoni bħal dik inkwistjoni fil-kawża prinċipali, inqis li tali leġiżlazzjoni ma twassalx għal diskriminazzjoni fis-sens ta’ din id-dispożizzjoni.

85.

F’dan ir-rigward, għandu jiġi kkonstatat li l-leġiżlazzjoni Awstrijaka inkwistjoni ma tagħmel ebda distinzjoni skont il-post fejn ikun stabbilit it-trasportatur ( 63 ). It-trattament differenti invokat minn CX, skont jekk it-trasportatur huwiex stabbilit jew le fi Stat Membru, huwa biss il-konsegwenza tad-diversi oqsma regolamentari applikabbli għat-trasportaturi stabbiliti fl-Unjoni, min-naħa, u għat-trasportaturi stabbiliti fit-Turkija, min-naħa l-oħra. Filwaqt li dawk tal-ewwel huma suġġetti għar-regoli komuni li jirrigwardaw it-trasport internazzjonali, b’mod partikolari dawk stabbiliti mir-Regolament Nru 1072/2009, dawk tal-aħħar ma humiex suġġetti għal tali regoli.

86.

Minn dan isegwi li huma biss it-trasportaturi stabbiliti fl-Unjoni li għandhom il-possibbiltà li jibbenefikaw minn liċenzja Komunitarja maħruġa skont ir-Regolament Nru 1072/2009, li tikkostitwixxi waħda mill-forom ta’ awtorizzazzjoni li tissodisfa r-rekwiżiti tal-leġiżlazzjoni Awstrijaka inkwistjoni. Għat-trasportaturi Torok li l-attività tagħhom ma taqax taħt il-kamp ta’ applikazzjoni tar-Regolament Nru 1072/2009, din il-possibbiltà ma teżistix u dawn it-trasportaturi huma għaldaqstant obbligati li jirrikorru għal forom oħra ta’ awtorizzazzjoni sabiex jissodisfaw ir-rekwiżiti tal-leġiżlazzjoni Awstrijaka inkwistjoni ( 64 ). Din id-differenza, li hija dovuta minħabba d-diskrepanzi bejn ir-regoli applikabbli għat-trasportaturi tal-Unjoni u dawk applikabbli għat-trasportaturi Torok, ma tistax tiġi eliminata permezz tal-Artikolu 9 tal-Ftehim ta’ Assoċjazzjoni KEE-Turkija. Fi kliem ieħor, inqis li din id-dispożizzjoni ma tistax tiġi invokata sabiex tinkiseb liberalizzazzjoni tal-qasam tat-trasport internazzjonali, li sal-lum ma hijiex mixtieqa mill-Partijiet Kontraenti tal-Ftehim ta’ Assoċjazzjoni KEE-Turkija ( 65 ).

87.

Abbażi ta’ dan, nipproponi lill-Qorti tal-Ġustizzja tikkonstata li l-Artikolu 9 tal-Ftehim ta’ Assoċjazzjoni KEE-Turkija ma jipprekludix leġiżlazzjoni bħal dik inkwistjoni fil-kawża prinċipali.

88.

Fid-dawl tal-kunsiderazzjonijiet preċedenti, nipproponi li l-Qorti tal-Ġustizzja tirrispondi kif ġej għad-domanda preliminari magħmula mill-Verwaltungsgerichtshof (il-Qorti Amministrattiva, l-Awstrija):

Il-ftehim li joħloq assoċjazzjoni bejn il-Komunità Ekonomika Ewropea u t-Turkija, iffirmat f’Ankara fit-12 ta’ Settembru 1963 mir-Repubblika tat-Turkija, minn naħa, kif ukoll mill-Istati Membri tal-KEE u l-Komunità, min-naħa l-oħra, u konkluż, approvat u kkonfermat f’isem din tal-aħħar permezz tad-Deċiżjoni tal-Kunsill 64/732/KEE, tat-23 ta’ Diċembru 1963, il-Protokoll Addizzjonali, iffirmat fit-23 ta’ Novembru 1970 fi Brussell u konkluż, approvat u kkonfermat f’isem il-Komunità permezz tar-Regolament tal-Kunsill (KEE) Nru 2760/72, tad-19 ta’ Diċembru 1972, u d-Deċiżjoni Nru 1/95 tal-Kunsill ta’ Assoċjazzjoni KE-Turkija, tat-22 ta’ Diċembru 1995, dwar l-implimentazzjoni tal-fażi finali tal-Unjoni Doganali, ma jipprekludux leġiżlazzjoni nazzjonali bħal dik inkwistjoni fil-kawża prinċipali, li abbażi tagħha l-impriżi ta’ trasport ta’ merkanzija b’sede fit-Turkija jistgħu jwettqu trasport kummerċjali ta’ merkanzija internazzjonali permezz ta’ vetturi bil-mutur b’destinazzjoni lejn jew b’passaġġ minn ġot-territorju tal-Awstrija biss jekk ikollhom, għall-vetturi bil-mutur, dokumenti maħruġa fil-limiti ta’ kwota ffissata skont ftehim bilaterali bejn ir-Repubblika tal-Awstrija u r-Repubblika tat-Turkija, jew tinħarġilhom awtorizzazzjoni għal trasport wieħed ta’ merkanzija, sakemm dan ikun ta’ interess pubbliku maġġuri u huwa l-applikant li għandu jistabbilixxi b’mod suffiċjenti li t-trasport ma jistax jiġi evitat permezz ta’ miżuri loġistiċi u lanqas permezz tal-għażla ta’ mezz ieħor ta’ trasport, bil-kundizzjoni li l-qorti tar-rinviju tkun żgurat ruħha li din il-leġiżlazzjoni ma tinvolvix restrizzjoni ġdida għal-libertà li jiġu pprovduti servizzi fis-sens tal-Artikolu 41(1) tal-Protokoll Addizzjonali.