14.12.2015 |
MT |
Il-Ġurnal Uffiċjali tal-Unjoni Ewropea |
C 414/14 |
Appell ippreżentat fit-13 ta’ Lulju 2015 minn Louis Vuitton Malletier mis-sentenza mogħtija mill-Qorti Ġenerali (It-Tieni Awla) fil-21 ta’ April 2015 fil-Kawża T-360/12 – Louis Vuitton Malletier vs L-Uffiċċju għall-Armonizzazzjoni fis-Suq Intern (Trade marks u Disinni), Nanu-Nana Handelsgesellschaft mbH für Geschenkartikel & Co. KG
(Kawża C-364/15 P)
(2015/C 414/17)
Lingwa tal-kawża: l-Ingliż
Partijiet
Appellanti: Louis Vuitton Malletier (rappreżentanti: P. Roncaglia, G. Lazzeretti, F. Rossi, N. Parrotta, avukati)
Partijiet oħra fil-proċedura: L-Uffiċċju għall-Armonizzazzjoni fis-Suq Intern (Trade marks u Disinni), Nanu-Nana Handelsgesellschaft mbH für Geschenkartikel & Co. KG
Talbiet
— |
tannulla s-sentenza tal-Qorti Ġenerali tal-Unjoni Ewropea (It-Tieni Awla), tal-21 ta’ April 2015, fil-Kawża T-360/12, innotifikata lill-appellanti fid-29 ta’ April 2015; |
— |
tikkundanna lill-UASI għall-ispejjeż sostnuti mill-appellanti matul dawn il-proċeduri; |
— |
tikkundanna lil Nanu-Nana għall-ispejjeż sostnuti mill-appellanti matul dawn il-proċeduri. |
Aggravji u argumenti prinċipali
1. |
Permezz ta’ dan l-appell, Louis Vuitton Malletier (iktar ’il quddiem “Louis Vuitton” jew l-“appellanti”) titlob li l-Qorti tal-Ġustizzja tannulla s-sentenza tal-Qorti Ġenerali tal-Unjoni Ewropea (It-Tieni Awla), tal-21 ta’ April 2015, fil-Kawża T-360/12 (is-“sentenza appellata”), li permezz tagħha l-Qorti Ġenerali ċaħdet ir-rikors ta’ Louis Vuitton kontra d-deċiżjoni tal-Ewwel Bord tal-Appell tal-UASI, tas-16 ta’ Mejju 2012, fil-Każ R 1854/2011-1, li kienet iddikjarat ir-reġistrazzjoni tat-trade mark Komunitarja figurattiva Nru 658751 invalida kollha kemm hi, minħabba assenza ta’ karattru distintiv. |
2. |
Dan l-appell huwa intiż li juri li l-Qorti Ġenerali wettqet żball meta kkonkludiet li d-dispożizzjoni tal-Artikolu 7(1)(b) tar-Regolament dwar it-trade mark Komunitarja (1) hija applikabbli għat-trade mark ikkontestata. |
3. |
Billi kkonfermat id-deċiżjoni tal-Bord tal-Appell li kienet iddikjarat it-trade mark ikkontestata bħala invalida minħabba li ma kinitx distintiva b’mod inerenti, il-Qorti Ġenerali kisret ir-regoli dwar l-oneru tal-prova fi proċedimenti għal dikjarazzjoni ta’ invalidità. |
4. |
B’mod partikolari, l-appellanti ssostni li sabiex tikkonforma ruħha mal-prinċipji dwar il-preżunzjoni ta’ validità li jgawdu minnha t-trade marks Komunitarji rreġistrati u t-tqassim tal-oneru tal-prova f’azzjonijiet għal dikjarazzjoni ta’ invalidità, il-Qorti Ġenerali messha bidlet id-deċiżjoni kkontestata, fuq il-bażi li Nanu-Nana ma kinitx issodisfat l-oneru tagħha, peress li hija ma kinitx kapaċi turi x’kienu n-normi u l-użanzi tas-settur rilevanti fid-data tal-applikazzjoni għar-reġistrazzjoni tat-trade mark ikkontestata u għaldaqstant li t-trade mark ikkontestata ma kinitx titbiegħed minnhom b’mod sinjifikattiv. |
5. |
Fid-dawl ta’ dak li ntqal iktar ’il fuq l-appellanti titlob li l-Qorti tal-Ġustizzja tannulla s-sentenza appellata u tikkundanna lill-UASI u lil Nanu-Nana għall-ispejjeż sostnuti mill-appellanti matul dawn il-proċeduri. |
(1) Regolament tal-Kunsill (KE) Nru 207/2009, tas-26 ta’ Frar 2009, dwar it-trade mark Komunitarja (ĠU L 78, p. 1)