—

għal Medical Imaging Systems GmbH (MIS), minn G. Eder, avukat,

—

għall-Hauptzollamt München, minn C. Erhart-Parzefall,

—

għall-Kummissjoni Ewropea, minn M. Wasmeier u A. Caeiros, bħala aġenti,

1

It-talba għal deċiżjoni preliminari tirrigwarda l-interpretazzjoni tas-subintestatura 62113310000 tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni [...] (ĠU Edizzjoni Speċjali bil-Malti, Kapitolu 2, Vol. 2, p. 382), fil-verżjoni tagħha li tirriżulta mir-Regolament ta’ Implimentazzjoni tal-Kummissjoni (UE) Nru 927/2012, tad-9 ta’ Ottubru 2012 (ĠU 2012, L 304, p. 1) (iktar ’il quddiem in-“NM”).

2

Din it-talba tressqet fil-kuntest ta’ kawża bejn Medical Imaging Systems GmbH (MIS) u l-Hauptzollamt München (uffiċċju prinċipali tad-dwana ta’ München, il-Ġermanja), dwar il-klassifikazzjoni tariffarja ta’ fradal-kowtijiet għall-protezzjoni mir-radjazzjoni fi ħdan in-NM.

3

Il-klassifikazzjoni doganali tal-merkanzija importata fl-Unjoni Ewropea hija rregolata min-NM. In-NM hija bbażata fuq is-sistema armonizzata għad-deskrizzjoni u l-kodifikazzjoni ta’ oġġetti (iktar ’il quddiem is-“SA”), imfassla mill-Kunsill tal-Kooperazzjoni Doganali, li sar l-Organizzazzjoni Dinjija tad-Dwana (ODD), u stabbilita mill-konvenzjoni li toħloq l-imsemmi kunsill, konkluża fi Brussell fil-15 ta’ Diċembru 1950. Is-SA hija stabbilita mill-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika[zzjoni] ta’ Oġġetti, konkluża fi Brussell fl-14 ta’ Ġunju 1983 u approvata, flimkien mal-Protokoll li jemendaha tal-24 ta’ Ġunju 1986, f’isem il-Komunità Ekonomika Ewropea, permezz tad-Deċiżjoni tal-Kunsill 87/369/KEE, tas-7 ta’ April 1987 (ĠU Edizzjoni Speċjali bil-Malti, Kapitolu 2, Vol. 2, p. 288). In-NM tirriproduċi l-intestaturi u s-subintestaturi b’sitt ċifri tas-SA, filwaqt li huma biss is-seba’ u t-tmien ċifri li joħolqu subdiviżjonijiet li huma speċifiċi għaliha.

4

L-Artikolu 12 tar-Regolament Nru 2658/87, kif emendat bir-Regolament tal-Kunsill (KE) Nru 254/2000, tal-31 ta’ Jannar 2000 (ĠU Edizzjoni Speċjali bil-Malti, Kapitolu 2, Vol. 9, p. 357), jipprovdi li l-Kummissjoni Ewropea għandha ta’ kull sena tadotta regolament li jirriproduċi l-verżjoni kompleta tan-NM, flimkien mar-rati awtonomi u konvenzjonali tad-dazji tat-tariffa doganali komuni korrispondenti, kif tirriżulta mill-miżuri adottati mill-Kunsill tal-Unjoni Ewropea jew mill-Kummissjoni. Dan ir-regolament għandu jiġi ppubblikat fil-Ġurnal Uffiċjali tal-Unjoni Ewropea mhux iktar tard mill-31 ta’ Ottubru u għandu japplika mill-1 ta’ Jannar tas-sena ta’ wara.

5

Il-verżjoni tan-NM applikabbli għall-fatti fil-kawża prinċipali, kif jirriżulta mill-proċess ippreżentat lill-Qorti tal-Ġustizzja, hija dik li tirrigwarda s-sena 2013, li tirriżulta mir-Regolament ta’ Implimentazzjoni Nru 927/2012.

6

L-ewwel parti tan-NM tinkludi serje ta’ dispożizzjonijiet preliminari. Taħt it-Titolu I ta’ din il-parti, li tikkonċerna r-regoli ġenerali, it-Taqsima A, intitolata “Regoli ġenerali għall-interpretazzjoni tan-[NM]”, tipprovdi:

“Il-klassifikazzjoni ta’ oġġetti fin-[NM] għanda tkun irregolata mill-prinċipji li ġejjin:

[...]

7

It-tieni parti tan-NM, li tinkludi skeda tad-dazji doganali, hija maqsuma f’taqsimiet. It-Taqsima XI ta’ din il-parti tinkludi l-Kapitolu 62, li huwa intitolat “oġġetti ta’ lbies u aċċessorji tal-ħwejjeġ, mhux maħdumin bil-labar (knitted) jew bil-ganċ (crocheted)”.

8

L-intestatura 6211 tan-NM, li tifforma parti mill-Kapitolu 62, hija strutturata kif ġej:

“6211 Track suits, ilbiesi ta’ skijar u malji ta’ l-għawm, ħwejjeġ oħrajn

[...]

6211 33 – – Ta’ fibri magħmulin mill-bniedem

6211 33 10 – – – Industrijali u li għandhom x’jaqsmu max-xogħol

[...]”

9

It-tieni parti tan-NM tinkludi wkoll it-Taqsima XV, intitolata “metalli ta’ valur baxx u oġġetti ta’ metalli ta’ valur baxx”. Din it-taqsima tinkludi, b’mod partikolari, in-noti li ġejjin:

[...]”

10

Il-Kapitolu 81, intitolat “metalli oħrajn ta’ valur baxx; ċermiti; oġġetti tagħhom”, jifforma parti minn din it-Taqsima XV. L-intestatura 8110 ta’ dan il-kapitolu hija strutturata kif ġej:

“8110 Antimonju u oġġetti tiegħu, inklużi skart u fdal

8110 10 00 – Antimonju mhux maħdum; trabijiet

8110 20 00 – Skart u fdal

8110 90 00 – Oħrajn”.

11

Skont it-tieni inċiż tal-Artikolu 9(1)(a) tar-Regolament Nru 2658/87, kif emendat bir-Regolament Nru 254/2000, il-Kummissjoni għandha tadotta noti ta’ spjega tan-NM, skont il-proċedura msemmija fl-Artikolu 10 tal-istess regolament. Dawn għandhom ikunu ppubblikati fil-Ġurnal Uffiċjali tal-Unjoni Ewropea.

12

In nota ta’ spjega tan-NM dwar il-Kapitolu 62, fil-verżjoni tagħha applikabbli fid-data li fiha seħħew il-fatti fil-kawża prinċipali (ĠU 2011, C 137, p. 1), issemmi b’mod partikolari:

“Ġenerali

[...]

13

In-noti ta’ spjega tas-SA jitfasslu fi ħdan l-ODD skont id-dispożizzjonijiet tal-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika[zzjoni] ta’ Oġġetti u huma ppubblikati fiż-żewġ lingwi uffiċjali tal-ODD, jiġifieri l-Franċiż u l-Ingliż. In-nota ta’ spjega tas-SA dwar l-intestatura 62.10 tas-SA (“Ilbies magħmul minn prodotti tal-intestatura Nri 56.02, 56.03, 59.03, 59.06 jew 59.07), issemmi, b’mod partikolari:

“Fost l-oġġetti ta’ din l-intestatura jistgħu jiġu ċċitati: [...] ilbies li ma jħallix arja tgħaddi għall-protezzjoni mir-radjazzjoni, mhux ikkombinat ma’ apparat respiratorju.”

14

Fid-19 ta’ Marzu 2013, MIS ippreżentat quddiem l-uffiċċju prinċipali tad-dwana ta’ München dikjarazzjoni ta’ rilaxx għal ċirkulazzjoni libera ta’ prodotti għall-protezzjoni mir-radjazzjoni tal-mudell “Xenolite NL 8250” li ġejjin mill-Istati Uniti tal-Amerika (iktar ’il quddiem il-“prodotti inkwistjoni”). F’din id-dikjarazzjoni, MIS ikklassifikat dawn il-prodott fis-subintestatura 6211 33 10 00 0 tan-NM. Din id-dikjarazzjoni ġiet aċċettata minn dan l-uffiċċju li, b’avviż tal-istess jum, iffissa dazji fuq l-importazzjoni abbażi ta’ rata ta’ 12 %, applikabbli għas-subintestatura tan-NM imsemmija iktar ’il fuq.

15

Peress li l-ilment imressaq minn MIS kontra dan l-avviż ta’ tassazzjoni ġie miċħud, hija ppreżentat rikors għall-annullament ta’ dan l-avviż quddiem il-qorti tar-rinviju. Insostenn ta’ dan ir-rikors, hija ssostni, essenzjalment, li l-prodotti inkwistjoni messhom ġew ikklassifikati fis-subintestatura 8110 90 00 tan-NM.

16

Il-qorti tar-rinviju tispjega li l-prodotti inkwistjoni huma fradal-kowtijiet għall-protezzjoni mir-radjazzjoni li jinkludu, fuq ġewwa u fuq barra, drapp ta’ kulur wieħed bi ħxuna ta’ 0.2 millimetru li 100 % minnu huwa magħmul minn fibri sintetiċi (poliester u poliamide). Is-saff ta’ ġewwa jikkonsisti prinċipalment f’antimonju (madwar 60 %tal-piż) u f’elementi oħra, bi polimer bħala sottostrat. Dawn il-fradal-kowtijiet bla kmiem jestendu sal-parti ta’ fuq tar-riġlejn u għandhom skollatura tonda li tagħlaq mal-għonq, mingħajr għonq, u spallejn ikkuttunati meħjutin. Il-partijiet ta’ quddiem jirkbu fuq xulxin kompletament u l-parti ta’ quddiem tinqafel permezz ta’ qfieli tal-velcro li jinsabu fuq in-naħa tal-lemin u fil-livell tal-ispalla. Barra minn hekk, il-parti ta’ quddiem tinkludi but fil-livell tas-sider, li huwa magħmul minn drapp ikkulurit. Dawn il-prodotti jinkludu wkoll ħolqa għaċ-ċwievet tal-metall ta’ valur baxx, li hija mwaħħla ma’ qafla meħjuta mal-ġenb tal-iskollatura, bħala bokkla. L-imsemmija fradal-kowtijiet iservu sabiex jipproteġu lill-persuni mir-raġġi X waqt li jkunu qegħdin iwettqu l-attività professjonali tagħhom.

17

Skont l-ispjegazzjonijiet mogħtija mill-qorti tar-rinviju, MIS issostni quddiemha li l-prodotti inkwistjoni kienu magħmula minn diversi elementi, bi proporzjon dominanti ta’ antimonju, li jiddetermina n-natura tagħhom, fid-dawl tal-użu li għalih huma maħsuba u tal-valur tad-diversi elementi li minnhom huma magħmula. Fil-fatt, dawn il-prodotti ma jistgħux iwettqu l-funzjoni ta’ protezzjoni kontra r-raġġi X fl-assenza ta’ din il-porzjon ta’ antimonju. Id-dehra esterna tal-imsemmija prodotti hija irrilevanti, peress li huma magħmula minn diversi elementi. Konsegwentement, skont MIS, il-prodotti inkwistjoni messhom ġew ikklassifikati fis-subintestatura 8110 90 00 tan-NM.

18

Il-qorti tar-rinviju tispjega li l-eżitu tal-kawża pendenti quddiemha jiddependi mill-kwistjoni jekk, għall-finijiet tal-klassifikazzjoni ta’ oġġett fis-subintestatura 6211 33 10 00 0 tan-NM, humiex biss id-dehra esterna tal-oġġett ikkonċernat u l-użu li għalih huwa intiż li huma importanti jew jekk għandux jittieħed inkunsiderazzjoni l-element tal-oġġett li jagħtih in-natura essenzjali tiegħu.

19

Skontha, il-prodotti inkwistjoni jaqgħu taħt is-subintestatura 6211 33 10 00 0 tan-NM, fid-dawl tal-proprjetajiet oġġettivi tagħhom, tad-dehra esterna tagħhom u tal-użu inerenti li għalih huma intiżi. Barra minn hekk, hija tqis li l-intestatura 6211 tan-NM hija l-iktar intestatura speċifika, fis-sens tar-regola ġenerali 3(a) għall-interpretazzjoni tan-NM u, għaldaqstant, għandha tieħu preċedenza fuq l-intestaturi ta’ portata iktar ġenerali. Madankollu, hija għandha xi dubji dwar il-klassifikazzjoni fis-subintestatura 6211 33 10 tan-NM tal-prodotti inkwistjoni fil-kawża pendenti quddiemha, peress li tali klassifikazzjoni ma tiħux inkunsiderazzjoni l-materjal tal-ikkuttunar ta’ dawn il-prodotti, u b’mod partikolari l-antimonju, li jirrappreżenta madwar 60 % tal-piż tal-materjal tal-ikkuttunar u huwa l-element li jagħti l-protezzjoni mir-radjazzjoni li joffru l-imsemmija prodotti.

20

F’dawn iċ-ċirkustanzi, il-Finanzgericht München (qorti tal-finanzi ta’ München, il-Ġermanja) iddeċidiet li tissospendi l-proċeduri u li tagħmel id-domanda preliminari li ġejja lill-Qorti tal-Ġustizzja:

“Għall-klassifikazzjoni fis-subintestatura 6211 33 10 00 0 ‘ħwejjeġ tax-xogħol’ tan-[NM], hija biss l-apparenza esterna jew hija d-destinazzjoni tal-merkanzija li huma determinanti jew jaqbel, skont ir-regola ġenerali 3(b) għall-interpretazzjoni [tan-NM], li jitqiesu l-elementi li jagħtu lill-prodott il-karattru essenzjali tiegħu?”

21

Mid-deċiżjoni tar-rinviju jirriżulta li, permezz tad-domanda preliminari tagħha, il-qorti tar-rinviju tistaqsi, essenzjalment, jekk in-NM għandhiex tiġi interpretata fis-sens li fardal-kowt għall-protezzjoni mir-radjazzjoni, bħal dak inkwistjoni fil-kawża prinċipali, għandu jiġi kklassifikat fis-subintestatura 6211 33 10 00 tan-NM, abbażi tad-dehra esterna tiegħu jew tal-użu li għalih huwa intiż, jew jekk għandhomx jittieħdu inkunsiderazzjoni wkoll, għall-finijiet tal-klassifikazzjoni tiegħu, l-elementi li jagħtuh in-natura essenzjali tiegħu ta’ lbies li jipproteġi mir-radjazzjoni, liema elementi jistgħu, jekk ikun il-każ, jiġġustifikaw il-klassifikazzjoni tiegħu f’intestatura oħra tan-NM, b’mod partikolari fl-intestatura 8110 ta’ din tal-aħħar.

22

F’dan ir-rigward, għandha, qabelxejn, titfakkar il-ġurisprudenza stabbilita, li skontha, fl-interess taċ-ċertezza legali u tal-faċilità tal-kontrolli, il-kriterju deċiżiv għall-klassifikazzjoni tariffarja tal-oġġetti għandu jitfittex, b’mod ġenerali, fil-karatteristiċi u fil-proprjetajiet oġġettivi tagħhom, kif iddefiniti mill-kliem tal-intestatura tan-NM u tan-noti tat-taqsimiet jew tal-kapitoli (sentenza tat-18 ta’ Mejju 2011, Delphi Deutschland, C‑423/10, EU:C:2011:315, punt 23 u l-ġurisprudenza ċċitata).

23

Fir-rigward tan-noti ta’ spjega mfassla, f’dak li jirrigwarda n-NM, mill-Kummissjoni u, f’dak li jirrigwarda s-SA, mill-ODD, dawn jikkontribwixxu b’mod importanti għall-interpretazzjoni tal-portata tad-diversi intestaturi tariffarji, mingħajr madankollu ma għandhom saħħa vinkolanti (sentenza tat-18 ta’ Mejju 2011, Delphi Deutschland, C‑423/10, EU:C:2011:315, punt 23 u l-ġurisprudenza ċċitata).

24

Barra minn hekk, skont ġurisprudenza stabbilita wkoll, l-użu li għalih huwa intiż il-prodott jista’ jikkostitwixxi kriterju oġġettiv ta’ klassifikazzjoni sa fejn dan ikun inerenti għall-imsemmi prodott, u din in-natura inerenti għandha tkun tista’ tiġi evalwata abbażi tal-karatteristiċi u tal-proprjetajiet oġġettivi tiegħu (sentenzi tal-20 ta’ Ġunju 2013, Agroferm, C‑568/11, EU:C:2013:407, punt 41, u tal-4 ta’ Marzu 2015, Oliver Medical, C‑547/13, EU:C:2015:139, punt 47). Barra minn hekk, l-użu li għalih huwa intiż il-prodott huwa kriterju rilevanti biss jekk jekk il-klassifikazzjoni ma tistax issir biss abbażi tal-karatteristiċi u tal-proprjetajiet oġġettivi tal-prodott (sentenzi tas-16 ta’ Diċembru 2010, Skoma-Lux, C‑339/09, EU:C:2010:781, punt 47, u tat-28 ta’ April 2016, C‑233/15, Oniors Bio, EU:C:2016:305, punt 33).

25

Barra minn hekk, għandu jiġi kkonstatat li s-subintestatura 6211 33 10 tan-NM, li l-kliem tagħha jirreferi għall-“[ilbies] industrijali u li għandhom x’jaqsmu [għandu x’jaqsam] max-xogħol”, tifforma parti mill-intestatura 6211 33 tan-NM, li tirreferi għat-“track suits, ilbiesi ta’ skijar u malji ta’ l-għawm, ħwejjeġ oħrajn” magħmula minn “fibri magħmulin mill-bniedem”.

26

In-nota ta’ spjega tan-NM dwar il-Kapitolu 62, iċċitata fil-punt 12 ta’ din is-sentenza, tispeċifika li dan il-kapitolu jinkludi oġġetti ta’ lbies industrijali u tax-xogħol li, minħabba d-dehra ġenerali tagħhom u n-natura tat-tessut tagħhom, li ġeneralment ikun iebes u ma jinxtorobx, “jidhru b’mod ċar li huma disinjati biex jintlibsu biss jew prinċipalment biex jagħtu protezzjoni (fiżika jew għas-saħħa) għal ħwejjeġ u/jew għal nies matul attivitajiet industrijali, professjonali jew domestiċi”. Issa kif jirriżulta mill-ġurisprudenza ċċitata fil-punti preċedenti, prodott bħal dak inkwistjoni fil-kawża prinċipali, li huwa magħmul minn fibri sintetiċi jew artifiċjali u huwa maħsub sabiex jintlibes biss jew prinċipalment sabiex jipproteġi lill-persuni esposti għar-radjazzjoni fl-eżerċizzju tal-attività professjonali tagħhom, għandu jiġi kklassifikat bħala “[ilbies] industrijali u li għandhom x’jaqsmu [għandu x’jaqsam] max-xogħol”, fis-sens tas-subintestatura 6211 33 10 00 0, fid-dawl tal-karatteristiċi u tal-proprjetajiet oġġettivi tiegħu, u b’mod partikolari d-dehra esterna tiegħu.

27

Din l-interpretazzjoni hija kkonfermata min-nota ta’ spjega tas-SA dwar l-intestatura 62.10 tas-SA, li ssemmi li l-“ilbies li ma jħallix arja tgħaddi għall-protezzjoni mir-radjazzjoni”, meta jkun magħmul minn prodotti li jaqgħu taħt l-intestaturi Nri 56.02, 56.03, 59.03, 59.06 jew 59.07 tas-SA, għandu jitqies li huwa “ilbies” tal-intestatura 62.10 tas-SA. Għalkemm il-prodotti inkwistjoni fil-kawża prinċipali ma humiex magħmula minn prodotti li jaqgħu taħt l-intestaturi Nri 56.02, 56.03, 59.03, 59.06 jew 59.07 tas-SA, mill-imsemmija nota jista’ jiġi dedott li, b’mod iktar ġenerali, apparat ta’ protezzjoni mir-radjazzjoni, li għandu l-karatteristiċi u l-proprjetajiet oġġettivi ta’ lbies, huwa kopert mid-diversi intestaturi u subintestaturi tan-NM li jirrigwardaw l-ilbies.

28

Fl-aħħar nett, f’dak li jirrigwarda l-kwistjoni jekk għandhomx jittieħdu inkunsiderazzjoni wkoll, għall-finijiet tal-klassifikazzjoni ta’ prodott bħal dak inkwistjoni fil-kawża prinċipali, l-elementi li jagħtuh in-natura essenzjali tiegħu, għandu jitfakkar li dan il-kriterju jissemma fir-regola ġenerali 3(b) għall-interpretazzjoni tan-NM. Mit-termini stess ta’ din ir-regola ġenerali ta’ interpretazzjoni jirriżulta li din tal-aħħar tkopri l-każijiet li fihom “l-oġġetti jkunu klassifikati prima facie f’titlu wieħed [f’intestatura waħda] jew iżjed”.

29

Meta sseħħ tali sitwazzjoni, għandha tiġi applikata r-regola ġenerali 3(a) għall-interpretazzjoni tan-NM, li skontha “it-titlu li jagħti [l-intestatura li tagħti] l-iżjed deskrizzjoni speċifika għandha tkun preferuta għal titli [intestaturi] li jagħtu deskrizzjoni iżjed ġenerali”. Huwa biss meta l-applikazzjoni ta’ din ir-regola ma tippermettix li ssir klassifikazzjoni xierqa ta’ ċerti oġġetti, b’mod partikolari meta ma tkunx teżisti pożizzjoni tariffarja speċifika għall-klassifikazzjoni tal-imsemmija oġġetti (ara, f’dan is-sens, is-sentenzi tal-10 ta’ Mejju 2001, VauDe Sport, C‑288/99, EU:C:2001:262, punt 21, u tal-15 ta’ Novembru 2012, Kurcums Metal, C‑558/11, EU:C:2012:721, punt 36), li għandha tiġi applikata r-regola ġenerali 3(b) għall-interpretazzjoni tan-NM u tali oġġetti għandhom jiġu kklassifikati “daqs li kieku kienu magħmulin mill-materjal jew mill-komponent li jagħtihom il-karattru essenzjali tagħhom”.

30

Issa kif ġie rrilevat fil-punt 26 ta’ din is-sentenza, teżisti intestatura speċifika għall-klassifikazzjoni ta’ prodott bħal dak inkwstjoni fil-kawża prinċipali, f’dan il-każ l-intestatura 6211 tan-NM, li tinkludi s-subintestatura 6211 33 10 00 0 tagħha.

31

Għalkemm il-qorti tar-rinviju semmiet il-possibbiltà li l-prodott inkwistjoni fil-kawża prinċipali jiġi kklassifikat taħt intestatura oħra tan-NM, b’mod partikolari l-intestatura 8110 tagħha, mill-kliem ta’ din tal-aħħar madankollu jirriżulta li hija tirrigwarda l-“antimonju” u “oġġetti tiegħu, inklużi skart u fdal” u mhux l-ilbies bħall-prodott inkwistjoni fil-kawża prinċipali.

32

Il-fatt li dan il-prodott tal-aħħar jinkludi saff ta’ ġewwa li jikkonsisti prinċipalment f’antimonju, li jagħtih in-natura protettiva tiegħu kontra r-radjazzjoni, ma huwiex suffiċjenti sabiex jiġi kklassifikat bħala oġġett tal-antimonju, li għalih tirreferi l-intestatura 8110 tan-NM.

33

Fil-fatt, kif diġà ġie rrilevat, jidher li s-subintestatura 6211 33 10 00 0 tan-NM hija “it-titlu li jagħti [l-intestatura li tagħti] l-iżjed deskrizzjoni speċifika”, fis-sens tar-regola ġenerali 3(a) għall-interpretazzjoni tan-NM, u għandha tiġi ppreferuta għall-oħrajn. Għaldaqsant, għall-finijiet li tiġi ddeterminata l-klassifikazzjoni tariffarja tal-prodotti inkwistjoni fil-kawża prinċipali, ma għandhiex tintuża r-regola ġenerali 3(b) għall-interpretazzjoni tan-NM, li tirreferi għall-“materjal jew [...]komponent” li jagħti lil prodott il-“karattru essenzjali” tiegħu.

34

Fid-dawl tal-kunsiderazzjonijiet preċedenti kollha, ir-risposta li għandha tingħata għad-domanda magħmula għandha tkun li n-NM għandha tiġi interpretata fis-sens li fardal-kowt għall-protezzjoni mir-radjazzjoni, bħal dak inkwistjoni fil-kawża prinċipali, għandu jiġi kklassifikat fis-subintestatura 6211 33 10 00 0 tan-NM, minħabba l-karatteristiċi u l-proprjetajiet oġġettivi tiegħu, fosthom, b’mod partikolari, id-dehra esterna tiegħu, mingħajr ma huwa neċessarju li jsir riferiment għall-elementi li jagħtu lill-prodott inkwistjoni n-natura essenzjali tiegħu.

35

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tmien Awla) taqta’ u tiddeċiedi:

In-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni [...], fil-verżjoni tagħha li tirriżulta mir-Regolament ta’ Implimentazzjoni tal-Kummissjoni (UE) Nru 927/2012, tad-9 ta’ Ottubru 2012, għandha tiġi interpretata fis-sens li fardal-kowt għall-protezzjoni mir-radjazzjoni, bħal dak inkwistjoni fil-kawża prinċipali, għandu jiġi kklassifikat fis-subintestatura 6211 33 10 00 0 tal-imsemmija nomenklatura, minħabba l-karatteristiċi u l-proprjetajiet oġġettivi tiegħu, fosthom, b’mod partikolari, id-dehra esterna tiegħu, mingħajr ma huwa neċessarju li jsir riferiment għall-elementi li jagħtu lill-prodott inkwistjoni n-natura essenzjali tiegħu.