Kawża C‑123/15

Max-Heinz Feilen

vs

Finanzamt Fulda

(talba għal deċiżjoni preliminari mressqa mill-Bundesfinanzhof)

“Rinviju għal deċiżjoni preliminari — Tassazzjoni — Moviment liberu tal-kapital — Taxxa fuq is-suċċessjoni — Leġiżlazzjoni ta’ Stat Membru li tipprevedi tnaqqis tat-taxxa tas-suċċessjoni applikabbli għas-suċċessjoni li tinkludi patrimonju li kien diġà s-suġġett ta’ trasferiment causa mortis li ta lok għall-ġbir ta’ tali taxxa f’dan l-Istat Membru — Restrizzjoni — Ġustifikazzjoni — Koerenza tas-sistema fiskali”

Sommarju – Sentenza tal-Qorti tal-Ġustizzja (It-Tieni Awla) tat-30 ta’ Ġunju 2016

Moviment liberu tal-kapital u libertà tal-pagamenti – Restrizzjonijiet – Taxxa fuq is-suċċessjoni – Leġiżlazzjoni nazzjonali dwar il-kalkolu tat-taxxa tas-suċċessjoni li tipprevedi tnaqqis tal-imsemmija taxxa applikabbli għas-suċċessjoni li tinkludi patrimonju li kien diġà s-suġġett ta’ trasferiment causa mortis li huwa stess ta lok għall-ġbir ta’ tali taxxa f’dan l-Istat Membru – Trattament differenti skont fejn jinsab il-patrimonju u skont il-post ta’ residenza tal-partijiet għas-suċċessjoni fil-mument tas-suċċessjoni preċedenti – Inammissibbiltà – Ġustifikazzjoni – Neċessità li tiġi żgurata l-koerenza tas-sistema fiskali

(Artikoli 63(1) TFUE u 65 TFUE)

L-Artikolu 63(1) u l-Artikolu 65 TFUE ma jipprekludux leġiżlazzjoni ta’ Stat Membru li tipprevedi, fil-każ ta’ suċċessjoni favur persuni li jappartjenu għal klassi partikolari ta’ tassazzjoni, tnaqqis tat-taxxa tas-suċċessjoni meta s-suċċessjoni tinkludi patrimonju li, matul l-għaxar snin qabel din is-suċċessjoni, kien diġà s-suġġett ta’ trasferiment causa mortis, bil-kundizzjoni li dan tal-aħħar ikun ta lok għall-ġbir ta’ taxxa tas-suċċessjoni f’dan l-Istat Membru.

Ċertament, tali leġiżlazzjoni tirrendi l-benefiċċju tat-tnaqqis tat-taxxa tas-suċċessjoni dipendenti fuq il-post fejn il-beni inklużi fis-suċċessjoni kienu jinsabu fil-mument tas-suċċessjoni preċedenti u fuq il-post ta’ residenza tal-mejjet jew tal-benefiċjarju fil-mument ta’ din is-suċċessjoni preċedenti. Hija twassal għall-konsegwenza li suċċessjoni li tinkludi beni li jinsabu fi Stat Membru ieħor fil-mument ta’ suċċessjoni preċedenti, li matulha l-ebda waħda mill-partijiet ma kienet tirrisjedi fl-Istat Membru kkonċernat, hija suġġetta għal taxxa tas-suċċessjoni iktar għolja minn dik miġbura fil-każ ta’ suċċessjoni li tinkludi biss beni li jinsabu f’dan l-aħħar Stat Membru fil-mument ta’ suċċessjoni preċedenti jew li tinkludi beni li jinsabu fi Stat Membru ieħor fil-mument ta’ suċċessjoni preċedenti, li matulha mill-inqas waħda mill-partijiet kienet tirrisjedi fl-Istat Membru kkonċernat. Għaldaqstant, din il-leġiżlazzjoni għandha l-effett li tnaqqas il-valur tas-suċċessjoni u tikkostitwixxi restrizzjoni għall-moviment tal-kapital fis-sens tal-Artikolu 63(1) TFUE.

Għal dak li jirrigwarda ġustifikazzjoni eventwali tal-imsemmija restrizzjoni bbażata fuq l-Artikolu 65 TFUE, id-differenzi fit-trattament awtorizzati mill-Artikolu 65(1)(a) TFUE għandhom jiġu distinti mid-diskriminazzjonijiet arbitrarji pprojbiti bis-saħħa tal-Artikolu 65(3) TFUE. Jeħtieġ li d-differenza fit-trattament tikkonċerna sitwazzjonijiet li ma humiex oġġettivament paragunabbli jew li d-differenza tkun iġġustifikata minn raġuni imperattiva ta’ interess ġenerali. Għal dak li jirrigwarda l-komparabbiltà tas-sitwazzjonijiet inkwistjoni, huwa stabbilit li l-leġiżlazzjoni tpoġġi fuq l-istess livell, għall-finijiet tat-taxxa tas-suċċessjoni, il-persuni li jaqgħu taħt klassi ta’ tassazzjoni partikolari u li jirrisjedu fit-territorju nazzjonali li jakkwistaw, permezz ta’ suċċessjoni, patrimonju li jinkludi beni li jkunu diġà, matul l-għaxar snin qabel is-suċċessjoni, is-suġġett ta’ suċċessjoni li l-benefiċjarji tagħha jaqgħu taħt l-istess klassi ta’ tassazzjoni, irrispettivament minn fejn jinsabu dawn il-beni jew mill-post ta’ residenza tal-partijiet għas-suċċessjoni fil-mument ta’ din is-suċċessjoni preċedenti. Huwa biss fir-rigward tal-applikazzjoni tat-tnaqqis tat-taxxa tas-suċċessjoni li din il-leġiżlazzjoni tittratta b’mod differenti lil dawn il-persuni skont jekk il-beni inkwistjoni kinux jinsabu jew le fit-territorju nazzjonali fil-mument tas-suċċessjoni preċedenti u skont jekk il-partijiet għal din is-suċċessjoni kinux jirrisjedu jew le f’dan it-territorju. Minn dan jirriżulta li d-differenza fit-trattament magħmula mill-imsemmija leġiżlazzjoni tirrigwarda sitwazzjonijiet li huma oġġettivament komparabbli.

Madankollu, billi tipprevedi li jistgħu jibbenefikaw mit-tnaqqis tat-taxxa tas-suċċessjoni unikament il-persuni li jirċievu, permezz ta’ suċċessjoni, patrimonju li jkun ta lok għall-ġbir ta’ tali taxxa fl-Istat Membru ta’ impożizzjoni fil-mument ta’ suċċessjoni preċedenti, il-konfigurazzjoni ta’ dan il-vantaġġ fiskali tirrifletti loġika simetrika li b’hekk toħloq rabta diretta bejn l-imsemmi vantaġġ fiskali u l-intaxxar preċedenti. Din il-loġika tiġi ddisturbata jekk dan il-vantaġġ fiskali jkun favur ukoll persuni li jirtu patrimonju li ma jkunx ta lok għall-ġbir ta’ taxxa tas-suċċessjoni f’dan l-Istat Membru. Peress li l-għan tal-vantaġġ fiskali previst mil-leġiżlazzjoni nazzjonali huwa li jnaqqas sa ċertu estent l-oneru fiskali impost fuq suċċessjoni li tinkludi patrimonju ttrasferit bejn qraba li jkun diġà ta lok għal taxxa preċedenti, billi tiġi evitata parzjalment it-tassazzjoni doppja fl-Istat Membru ta’ impożizzjoni ta’ dan il-patrimonju f’perijodu qasir ta’ żmien, teżisti rabta diretta bejn it-tnaqqis tat-taxxa tas-suċċessjoni u l-ġbir preċedenti ta’ taxxa tas-suċċessjoni, billi dan il-vantaġġ fiskali u dan il-ġbir preċedenti jirrigwardaw l-istess taxxa, l-istess patrimonju u l-qraba tal-istess familja.

Konsegwentement, in-neċessità li tiġi żgurata l-koerenza tas-sistema fiskali tista’ tiġġustifika r-restrizzjoni għall-moviment tal-kapital li tirriżulta minn tali leġiżlazzjoni nazzjonali.

(ara l-punti 21, 22, 24, 26-28, 33, 34, 37, 38, 42 u d-dispożittiv)