25.8.2014

Il-Ġurnal Uffiċjali tal-Unjoni Ewropea

C 282/49

Rikors ippreżentat fis-17 ta’ Ġunju 2014 – Nexans France u Nexans vs Il-Kummissjoni

(Kawża T-449/14)

2014/C 282/63

Lingwa tal-kawża: l-Ingliż

Partijiet

Rikorrenti: Nexans France (Clichy, Franza); u Nexans SA (Pariġi, Franza) (rappreżentanti: M. Powell, Solicitor, G. Forwood, Barrister, u A. Rogers, Solicitor)

Konvenuta: Il-Kummissjoni Ewropea

Talbiet tar-rikorrenti

—	tannulla d-Deċiżjoni tal-Kummissjoni C(2014) 2139, tat-2 ta’ April 2014, dwar proċedura skont l-Artikolu 101 TFUE u l-Artikolu 53 tal-Ftehim ŻEE fil-Każ COMP/39.610 – Power Cables (iktar ’il quddiem id-“Deċiżjoni”);

—	tannulla parti mid-deċiżjoni kkontestata sa fejn din sabet li Nexans France ipparteċipat fi ksur qabel it-22 ta’ Frar 2001;

—	tnaqqas il-multi imposti fuq ir-rikorrenti b’ammont li jikkorrispondi għal terminu iqsar u fattur ta’ gravità ridott; u

—	tordna lill-Kummissjoni tbati l-ispejjeż tar-rikorrenti f’din il-kawża.

Motivi u argumenti prinċipali

Insostenn tar-rikors tagħhom, ir-rikorrenti jinvokaw tliet motivi.

1.	L-ewwel motiv, li jallega li meta qabdet ċerta informazzjoni matul ispezzjoni mhux imħabbra fl-uffiċċji ta’ Nexans France, il-Kummissjoni aġixxiet lil hinn mis-setgħat mogħtija lilha mir-Regolament Nru 1/2003 u kisret id-dritt għall-privatezza tar-rikorrenti.

2.	It-tieni motiv, li jallega li l-Kummissjoni żbaljat meta ddeterminat it-tul tal-ksur.

It-tielet motiv, li jallega li l-Kummissjoni wettqet żball manifest ta’ evalwazzjoni peress li naqset milli tieħu inkunsiderazzjoni n-nuqqas ta’ implementazzjoni u n-nuqqas ta’ effett fuq il-klijenti tal-ksur allegat, naqset milli tagħti motivazzjoni adegwata u kisret il-prinċipju ta’ ugwaljanza fit-trattament.