29.3.2014   

MT

Il-Ġurnal Uffiċjali tal-Unjoni Ewropea

C 93/19

Talba għal deċiżjoni preliminari mressqa mit-Tribunal do Comércio de Lisboa (il-Portugall) fis-16 ta’ Diċembru 2013 — Estado português vs Massa Insolvente do Banco Privado Português SA, fi stralċ

(Kawża C-667/13)

2014/C 93/31

Lingwa tal-kawża: il-Portugiż

Qorti tar-rinviju

Tribunal do Comércio de Lisboa

Partijiet fil-kawża prinċipali

Rikorrenti: Estado português

Konvenuta: Massa Insolvente do Banco Privado Português SA, fi stralċ

Domandi preliminari

(1)

Id-Deċiżjoni (1) hija vvizzjata b’nuqqas ta’ motivazzjoni minħabba:

(a)

nuqqas ta’ indikazzjoni tar-raġuni għalfejn il-garanzija pprovduta mill-Istat Portugiż taffettwa l-kummerċ bejn l-Istati Membri?

(b)

nuqqas ta’ kjarifika tar-raġuni għalfejn l-għajnuna mogħtija taħt il-forma ta’ garanzija li inizjalment ġiet kkunsidrata li taqa’ taħt l-Artikolu 107(3) [TFUE] issa ġiet iddikjarata inkompatibbli mas-suq komuni?

(2)

Id-Deċiżjoni hija vvizzjata b’kontradizzjoni bejn il-motivazzjoni tad-deċiżjoni u d-dispożittiv tad-deċiżjoni fir-rigward tal-mument li minnu d-deċiżjoni hija kkunsidrata illegali: 5 ta’ Diċembru 2008 jew 5 ta’ Ġunju 2009?

(3)

Id-Deċiżjoni tmur kontra d-dispożizzjonijet tal-Artikolu 107(1) TFUE sa fejn l-għajnuna mogħtija ma affetwatx il-kummerċ bejn l-Istati Membri, b’mod partikolari fid-dawl tal-għan tas-self u tal-użu effettiv tal-istess self u tal-fatt li sa mill-1 ta’ Diċembru 2008 il-benefiċjarju ma jeżerċitax l-attività tiegħu?

(4)

Id-Deċiżjoni tmur kontra d-dispożizzjonijiet tal-Artikolu 107(3) TFUE sa fejn l-għajnuna mogħtija kienet intiża sabiex tirrimedja perturbazzjoni serja tal-ekonomija ta’ Stat Membru u, f’dan is-sens, hija kompatibbli mas-suq komuni?

(5)

Sussidjarjament: [l-Artikolu 14](1) u (2) tar-Regolament Nru 659/1999 (2) jipprekludi l-applikazzjoni, fil-każ inkwistjoni, tat-tnaqqis tal-ammont li għandu jiġi rkuprat, meta l-istess regola hija applikabbli, b’mod mhux diskriminatorju, għall-kredituri kollha tal-kumpannija insolventi?

(1)  Deċiżjoni tal-Kummissjoni 2011/346/UE, tal-20 ta’ Lulju 2010, dwar l-Għajnuna mill-Istat C 33/09 (ex NN 57/09, CP 191/09) implimentata mill-Portugall fil-forma ta’ garanzija tal-Istat lil BPP [notifikata bid-dokument numru C(2010) 4932] (ĠU L 159, p. 95).

(2)  Regolament tal-Kunsill (KE) Nru 659/1999, tat-22 ta’ Marzu 1999, li jistabbilixxi regoli dettaljati għall-applikazzjoni tal-Artikolu 93 (li sar l-Artikolu 88) tat-Trattat tal-KE (ĠU Edizzjoni Speċjali bil-Malti, Kapitolu 8, Vol. 1, p. 339).