Sentenza tal-Qorti tal-Ġustizzja (Ir-Raba’ Awla) tat-13 ta’ Marzu 2014 (talba għal deċiżjoni preliminari tal-Commissione Tributaria Regionale di Mestre-Venezia – l-Italja) – Società Italiana Commercio e Servizi srl, fi stralċ (SICES) et vs Agenzia Dogane Ufficio delle Dogane di Venezia

(Kawża C-155/13) (1)

((Agrikoltura - Regolament (KE) Nru 341/2007 - Artikolu 6(4) - Kwoti tariffarji - Tewm ta’ oriġini Ċiniż - Liċenzji ta’ importazzjoni - Natura mhux trasferibbli tad-drittijiet li jirriżultaw minn ċerti liċenzji ta’ importazzjoni - Evitar - Abbuż ta’ dritt))

2014/C 135/17

Lingwa tal-kawża: it-Taljan

Qorti tar-rinviju

Commissione Tributaria Regionale di Mestre-Venezia

Partijiet fil-kawża prinċipali

Rikorrenti: Società Italiana Commercio e Servizi srl, fi stralċ (SICES), Agrima KG D. Gritsch Herbert & Gritsch Michael & Co., Agricola Lusia srl, Romagnoli Fratelli SpA, Agrimediterranea srl, Francesco Parini, Duoccio srl, Centro di Assistenza Doganale Triveneto Service srl, Novafruit srl, Evergreen Fruit Promotion srl

Konvenuta: Agenzia Dogane Ufficio delle Dogane di Venezia

Suġġett

Talba għal deċiżjoni preliminari – Commissione Tributaria Regionale di Mestre-Venezia – Interpretazzjoni tal-Artikolu 6 tar-Regolament tal-Kummissjoni (KE) Nru 341/2007, tad-29 ta’ Marzu 2007, li jiftaħ u jipprovdi għall-amministrazzjoni ta’ kwoti tariffarji u li jintroduċi sistema għal liċenzji tal-importazzjoni u ċertifikati ta’ oriġini għat-tewm u għal ċerti prodotti agrikoli oħra importati minn pajjiżi terzi (ĠU L 56M, 29.02.2008, p. 218) – Nuqqas ta’ trasferiment ta’ drittijiet li jirriżultaw mil-liċenzji “A” – Kumpanniji detenturi ta’ liċenzji ta’ importazzjoni li xtraw, qabel kwalunkwe importazzjoni, tewm Ċiniż permezz tal-involviment ta’ kumpannija mhux detentriċi ta’ tali liċenzji u li biegħu mill-ġdid it-tewm inkwistjoni, wara l-ħlas ta’ dazji doganali, lil din l-istess kumpannija

Dispożittiv

L-Artikolu 6(4) tar-Regolament (KE) Nru 341/2007, tad-29 ta’ Marzu 2007, li jiftaħ u jipprovdi għall-amministrazzjoni ta’ kwoti tariffarji u li jintroduċi sistema għal liċenzji tal-importazzjoni u ċertifikati ta’ oriġini għat-tewm u għal ċerti prodotti agrikoli oħra importati minn pajjiżi terzi, għandu jiġi interpretat fis-sens li dan ma jipprekludix, fil-prinċipju, operazzjonijiet li permezz tagħhom importatur, detentur ta’ liċenzji ta’ importazzjoni b’rata mnaqqsa, jixtri merkanzija barra mill-Unjoni Ewropea mingħand operatur, li huwa stess huwa importatur tradizzjonali fis-sens tal-Artikolu 4(2) ta’ dan ir-regolament iżda li eżawrixxa l-liċenzji tiegħu ta’ importazzjoni b’rata mnaqqsa, u sussegwentement ibigħha mill-ġdid lilu wara li jkun importaha fl-Unjoni. Madankollu, tali operazzjonijiet jikkostitwixxu abbuż ta’ dritt meta dawn ikunu nħolqu artifiċjalment bil-għan essenzjali li jittieħed vantaġġ mit-tariffa preferenzjali. Il-verifika tal-eżistenza ta’ prattika abbużiva teħtieġ lill-qorti tar-rinviju tieħu inkunsiderazzjoni l-fatti u ċ-ċirkustanzi kollha tal-każ, inkluż l-operazzjonijiet kummerċjali preċedenti u sussegwenti għall-importazzjoni inkwistjoni.

(1)  ĠU C 178, 22.06.2013.