11.8.2012

Il-Ġurnal Uffiċjali tal-Unjoni Ewropea

C 243/26

Rikors ippreżentat fit-13 ta’ Ġunju 2012 — Diadikasia Symvouloi Epicheiriseon vs Il-Kummissjoni

(Kawża T-261/12)

2012/C 243/47

Lingwa tal-kawża: l-Ingliż

Partijiet

Rikorrenti: Diadikasia Symvouloi Epicheiriseon AE (Chalandri, il-Greċja) (rappreżentant: A. Krystallidis, avukat)

Konvenuta: Il-Kummissjoni Ewropea

Talbiet

Ir-rikorrenti titlob li l-Qorti Ġenerali jogħġobha:

—

tordna kumpens għad-dannu allegatament subit mir-rikorrenti bid-deċiżjoni illegali tad-Delegazzjoni tal-UE fis-Serbja tat-23 ta’ Marzu 2012 li tannulla l-għoti tal-kuntratt “Tisħiħ tal-kapaċitajiet istituzzjonali tal-Kummissjoni għall-protezzjoni tal-kompetizzjoni (CPC) fir-Repubblika tas-Serbja” (ĠU 2011 S 147) li ngħata lir-rikorrenti fil-kapaċità tagħha bħala l-kumpannija ewlenija fil-konsorzju tal-imsemmi proġett;

—	tikkundannna lill-konvenuta għall-ispejjeż.

Motivi u argumenti prinċipali

Insostenn tar-rikors tagħha, ir-rikorrenti tinvoka ħames motivi.

(1)

L-ewwel motiv jallega li l-konvenuta aġixxiet b’mod illegali billi akkużat lir-rikorrenti b’vantaġġ indebitu fil-konfront tal-offerenti l-oħra, meta dan il-kunflitt ta’ interess li r-rikorrenti qed tiġi akkużata bih jikkonċerna kumpannija oħra totalment indipendenti, jiġifieri lil European profiles SA u mhux lir-rikorrenti.

(2)

It-tieni motiv jallega li l-konvenuta naqset mill-obbligu tagħha li tipprovdi raġuni ċara u fattwali għall-annullament tal-kuntratt, bi ksur tal-Artikolu 18 tal-Kodiċi ta’ Mġiba Amministrattiva Tajba, billi naqset milli tiġġustifika r-raġuni li permezz tagħha r-rikorrenti ingħatat vantaġġ indebitu fil-konfront tal-offerenti l-oħrajn.

(3)	It-tielet motiv jallega li l-konvenuta kisret id-dritt għal smigħ tar-rikorrenti billi naqset milli titlobha tesprimi l-pożizzjoni tagħha dwar ir-raġuni li tista’ tikkawża kunflitt ta’ interess, bi ksur tal-Artikolu 16 tal-Kodiċi ta’ Mġiba Amministrattiva Tajba.

(4)	Ir-raba’ motiv jallega li l-konvenuta kisret l-obbligu tagħha li tagħti lir-rikorrenti aċċess għad-dokumenti li jistgħu jagħtu prova tal-allegata konnessjoni illegali u tal-vantaġġ indebitu lil DIADIKASIA Consortium, skont l-Artikolu 42 tal-Karta tad-Drittijiet Fundamentali tal-UE.

(5)

Il-ħames motiv jallega li dawk l-azzjonijiet tal-konvenuta jikkostitwixxu ksur serju tal-prinċipju ta’ ċertezza legali u żball ta’ liġi kif ukoll ksur tal-Artikolu 4 tal-Kodiċi ta’ Mġieba Amministrattiva Tajba, meta b’mod mhux mistenni annullat id-deċiżjoni tagħha li tagħti l-kuntratt tal-proġett inkwistjoni lill-konsorzju tar-rikorrenti minħabba allegati raġunijiet ta’ “kunflitt ta’ interess”.