2.3.2013

Il-Ġurnal Uffiċjali tal-Unjoni Ewropea

C 63/8

Talba għal deċiżjoni preliminari mressqa min-Najvyšší súd Slovenskej republiky (ir-Repubblika Slovakka) fit-28 ta’ Novembru 2012 — Michal Zeman vs Krajské riaditeľstvo Policajného zboru v Žiline

(Kawża C-543/12)

2013/C 63/14

Lingwa tal-kawża: is-Slovakk

Qorti tar-rinviju

Najvyšší súd Slovenskej republiky (ir-Repubblika Slovakka)

Partijiet fil-kawża prinċipali

Rikorrenti Michal Zeman

Konvenuta: Krajské riaditeľstvo Policajného zboru v Žiline

Domandi preliminari

(1)

Id-dispożizzjonijiet moqrija flimkien tal-Artikolu 1(4) tad-Direttiva [tal-Kunsill 91/477/KEE, iktar ’il quddiem id-“Direttiva”], tal-Artikolu 3 tagħha, kif ukoll tal-Artikolu 45(1) u tal-Artikolu 52(1) tal-Karta għandhom jiġu interpretati fis-sens li:

(a)

jipprekludu Stat Membru milli jadotta leġiżlazzjoni li tipprojbixxi l-għoti ta’ Pass Ewropew tal-armi tan-nar fis-sens tal-Artikolu 1(4) tad-Direttiva lid-detentur ta’ permess għall-ġarr ta’ armi (awtorizzazzjoni meħtieġa għall-finijiet tal-pussess ta’ arma) li ngħata għal finijiet differenti mill-kaċċa jew attivitajiet sportivi u li mill-bqija jippermettilu jippossjedi (kif ukoll iġorr) arma tan-nar li għaliha jkun qiegħed jitlob il-Pass inkwistjoni,

u dan minkejja l-fatt li:

(b)

il-leġiżlazzjoni ta’ dan l-Istat Membru (ta’ oriġni) tippermetti lil dan id-detentur, anki fin-nuqqas ta’ Pass Ewropew tal-armi tan-nar, li joħroġ tali arma mit-territorju tiegħu lejn territorju ta’ Stat Membru ieħor, sempliċement bil-kundizzjoni li jiġu osservati l-obbligi fil-qasam ta’ notifika, peress li l-għoti tal-Pass Ewropew tal-armi tan-nar ma jaffettwa bl-ebda mod is-sitwazzjoni ta’ dan id-detentur fil-konfront tal-Istat Membru ta’ oriġni (jiġifieri li jkun biżżejjed li dan id-detentur josserva l-istess obbligi fil-qasam ta’ notifika)?

(2)

F’każ ta’ risposta affermattiva għall-ewwel domanda, peress li l-leġiżlazzjoni tal-Istat Membru ma tippermettix li jingħata lil dan il-pussessur Pass Ewropew tal-armi tan-nar, l-Artikolu 1(4) tad-Direttiva għandu effett dirett fis-sens li, abbażi ta’ din id-dispożizzjoni, l-Istat Membru għandu jagħti l-Pass inkwistjoni lill-imsemmi detentur?

(3)

F’każ ta’ risposta negattiva għall-ewwel jew għat-tieni domanda, l-awtorità kompetenti għandha tinterpreta l-leġiżlazzjoni tal-Istat Membru li:

(a)	ma tipprojbixxix espliċitament lid-detentur iċċitat iktar ’il fuq milli jikseb Pass Ewropew tal-armi tan-nar, iżda li

(b)	tistabbilixxi proċedura dwar l-għoti tal-Pass Ewropew tal-armi tan-nar unikament fir-rigward tad-detentur ta’ permess għall-ġarr ta’ armi (awtorizzazzjoni meħtieġa għall-finijiet tal-pussess ta’ arma) li jkun ingħata għal finijiet ta’ kaċċa jew sportivi,

sa fejn hu possibbli fis-sens li l-awtorità kompetenti għandha wkoll tagħti l-Pass Ewropew tal-armi tan-nar lid-detentur ta’ permess għall-ġarr ta’ armi li ma jkunx ingħata għal finijiet ta’ kaċċa jew sportivi, sa fejn dan huwa possibbli grazzi għall-effett indirett tad-Direttiva?