17.3.2012   

MT

Il-Ġurnal Uffiċjali tal-Unjoni Ewropea

C 80/12

(1)

Jekk istituzzjoni ta’ kreditu tipproponi lil klijent, li miegħu tkun preċedentement ikkonkludiet kuntratt ta’ self ipotekarju, swap ta’ interessi sabiex ikun kopert ir-riskju ta’ varjazzjoni tar-rata ta’ interessi ta’ din l-operazzjoni, għandu jiġi kkunsidrat li dan huwa servizz ta’ pariri dwar l-investiment fis-sens tad-definizzjoni mogħtija fil-punt (4) tal-Artikolu 4(1) tad-Direttiva 2004/38/KE (1)?

(2)

L-ommissjoni tat-test ta’ adegwatezza previst fl-Artikolu 19(4) tad-direttiva msemmija iktar ’il fuq fir-rigward ta’ investitur tax-xiri bl-imnut twassal għan-nullità assoluta tas-swap ta’ interessi li l-investitur ikkonkluda mal-istituzzjoni ta’ kreditu li pprovdiet il-parir?

(3)

Jekk is-servizz ipprovdut fil-kundizzjonijiet preċedenti ma huwiex ikkunsidrat bħala pariri dwar l-investiment, is-sempliċi fatt ta’ xiri ta’ strument finanzjarju kumpess bħas-swap ta’ interessi mingħajr ma jitwettaq it-test li jikkonċerna n-natura xierqa previst fl-Artikolu 19(5) tad-Direttiva 2004/39/KE minħabba raġuni imputabbli lill-istituzzjoni ta’ investiment jiddetermina n-nullità assoluta tal-kuntratt ta’ xiri konkluż mal-istituzzjoni ta’ kreditu nnifisha?

(4)

Skont l-Artikolu 19(9) tad-Direttiva 2004/39/KE, is-sempliċi fatt li istituzzjoni ta’ kreditu tipproponi strument finanzjarju kumpless marbut ma’ self ipotekarju huwa raġuni suffiċjenti sabiex tiġi eskluża l-applikazzjoni tal-obbligi li l-istituzzjoni ta’ investiment għandha li twettaq it-testijiet ta’ adegwatezza u dwar in-natura xierqa previsti f’dan l-Artikolu 19 għal investitur tax-xiri bl-imnut?

(5)

Sabiex tkun tista’ tiġi eskluża l-applikazzjoni tal-obbligi previsti fl-Artikolu 19 tad-Direttiva 2004/39/KE, huwa neċessarju li l-prodott finanzjarju li miegħu huwa marbut l-istrument finanzjarju propost ikun suġġett għal standards legali ta’ protezzjoni tal-investitur simili għal dawk meħtieġa fid-direttiva msemmija iktar ’il fuq?