28.5.2011   

MT

Il-Ġurnal Uffiċjali tal-Unjoni Ewropea

C 160/13

Talba għal deċiżjoni preliminari mressqa mir-Riigikohus (ir-Repubblika tal-Estonja) fil-25 ta’ Marzu 2011 — AS Pimix (fi stralċ) vs Maksu- ja Tolliameti Lõuna maksu- ja tollikeskus

(Kawża C-146/11)

2011/C 160/15

Lingwa tal-kawża: l-Estonjan

Qorti tar-rinviju

Riigikohus

Partijiet fil-kawża prinċipali

Rikorrenti: AS Pimix, (fi stralċ),

Konvenuti: Maksu- ja Tolliameti Lõuna maksu- ja tollikeskus, Põllumajandusministeerium

Domandi preliminari

(1)

Fid-dawl tal-ġurisprudenza tal-Qorti tal-Ġustizzja (sentenzi tal-11 ta’ Diċembru 2007, Skoma-Lux, C-161/06, Ġabra p. I-10841; tal-4 ta’ Ġunju 2009, Balbino, C-560/07, Ġabra p. I-4447; u tad-29 ta’ Ottubru 2009, Rakvere Lihakombinaat, C-140/08, Ġabra p. I-10533), id-dispożizzjonijiet magħquda tal-Artikolu 288 tat-Trattat dwar il-funzjonament tal-Unjoni Ewropea u tal-Artikolu 58 tal-Att ta’ adeżjoni għandhom jiġu interpretati fis-sens li jista’ jiġi rikjest li individwu għandu jissodisfa l-obbligu li jirriżulta mir-Regolament tal-Kummissjoni (KE) Nru 1972/2003 (1), tal-10 ta’ Novembru 2003

(a)

minkejja l-fatt li, fl-1 ta’ Mejju 2004, dan ir-regolament ma kienx ippubblikat fl-Estonjan fil-Ġurnal Uffiċjali tal-Unjoni Ewropea

(b)

u minkejja l-fatt li l-leġiżlatur tal-Istat Membru naqas milli jirrediġi, f’att ta’ dritt intern, id-definizzjoni tal-prodotti agrikoli prevista mir-regolament, iżda għamel sempliċi riferiment għall-Artikolu 4(5) tar-regolament iċċitat iktar ’il fuq, li ma kienx ippubblikat skont kif meħtieġ bil-liġi,

(c)

filwaqt li l-individwu ssodisfa wieħed mill-obbligi li jirriżultaw minn dan ir-regolament (iddikjara l-ħażna konformi mal-kodiċi applikabbli għall-merkanzija) u li ma ġiex ikkontestat f’dan is-sens,

(d)

u kien is-suġġett għal tassazzjoni mill-awtorità kompetenti tal-Istat Membru f’data meta r-Regolament Nru 1972/2003 kien diġà ppubblikat bl-Estjonjan fil-Ġurnal Uffiċjali tal-Unjoni Ewropea?

(2)

Mid-dispożizzjonijiet magħquda tal-Artikolu 58 tal-Att ta’ Adeżjoni, tal-Artikolu 297(1) tat-Trattat dwar il-funzjonament tal-Unjoni Ewropea, kif ukoll mill-premessa 3 u mill-Artikolu 4 tar-Regolament (KE) Nru 1972/2003, jista’ jiġi konkluż li l-Istat Membru jista’ jimponi fuq l-individwu l-ħlas ta’ taxxa fuq il-ħażniet żejda jekk, fl-1 ta’ Mejju 2004, ir-Regolament Nru 1972/2003 ma kienx ippubblikat bl-Estonjan fil-Ġurnal Uffiċjali tal-Unjoni Ewropea, iżda li, meta saret it-tassazzjoni ulterjuri mill-awtorità kompetenti tal-Istat Membru, dan ir-regolament kien diġà ġie ppubblikat bl-Estonjan fil-Ġurnal Uffiċjali tal-Unjoni Ewropea?

(1)  Regolament tal-Kummissjoni (KE) Nru 1972/2003, tal-10 ta’ Novembru 2003, dwar il-miżuri tranżitorji li għandhom ikunu adottati fir-rigward tal-kummerċ fi prodotti agrikoli minħabba l-adeżjoni tar-Repubblika Ċeka, l-Estonja, Ċipru, il-Latvja, il-Lituwanja, l-Ungerija, Malta, l-Polonja, Slovenja u Slovakkja (ĠU Edizzjoni Speċjali bil-Malti, Kapitolu 3, Vol. 40, p. 474)