—

għal Eurogate Distribution GmbH, minn U. Schrömbges u H. Bleier, avukat,

—

għall-Gvern Ċek, minn M. Smolek u J. Vláčil, bħala aġenti,

—

għall-Gvern Taljan, minn G. Palmieri, bħala aġent, assistita minn G. Albenzio, avvocato dello stato,

—

għall-Kummissjoni Ewropea, minn L. Bouyon u B.-R. Killmann, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 204(1)(a) tar-Regolament tal-Kunsill (KEE) Nru 2913/92, tat-12 ta’ Ottubru 1992, li jwaqqaf il-Kodiċi Doganali tal-Komunità (ĠU Edizzjoni Speċjali bil-Malti, Kapitolu 2, Vol. 4, p. 307), kif emendat bir-Regolament (KE) Nru 648/2005 tal-Parlament Ewropew u tal-Kunsill, tat-13 ta’ April 2005 (ĠU L 117, p. 13, iktar ’il quddiem il-“Kodiċi Doganali”).

2

Dik it-talba ġiet ippreżentata fil-kuntest ta’ kawża bejn Eurogate Distribution GmbH (iktar ’il quddiem “Eurogate”) u Hauptzollamt Hamburg-Stadt (iktar ’il quddiem il-“Hauptzollamt”) dwar dejn doganali fuq l-importazzjoni attribwit lil Eurogate minħabba l-iskrizzjoni tardiva fir-reġistri tal-ħażna ta’ informazzjoni relatata mat-tneħħija tal-merkanzija mill-maħżen doganali.

3

Il-proċedura tal-ħażna doganali hija proċedura sospensiva u proċedura doganali ekonomika fis-sens tal-Artikolu 84(1)(a) u (b), tal-Kodiċi Doganali. Il-proċedura tal-ħażna doganali hija rregolata mid-dispożizzjonijiet ġenerali tat-Titolu IV, Kapitolu 2, Taqsima 3, punt A, tal-Kodiċi Doganali kif ukoll mid-dispożizzjonijiet partikolari tal-punt Ċ, intitolat “Imħażen doganali”, tal-istess taqsima. L-Artikolu 89 ta’ dak il-kodiċi jinkludi dispożizzjonijiet li jirrigwardaw il-clearance tal-proċeduri sospensivi. L-Artikoli 98 u 99 tal-imsemmi kodiċi jipprovdu definizzjonijiet relatati mal-ħażna doganali. L-Artikolu 105 tal-istess kodiċi jipprovdi għall-obbligu taż-żamma ta’ reġistri tal-ħażna fil-kuntest tal-proċedura tal-ħażna doganali.

4

L-Artikolu 89(1) tal-Kodiċi Doganali jipprovdi:

“Arranġament sospensiv b’impatt ekonomiku għandu jitwettaq meta trattament jew użu ġdid approvat mid-dwana jiġi assenjat jew lill-merkanzija mqiegħda taħt dak l-arranġament jew lil prodotti li jikkumpensaw lil xulxin jew prodotti proċesatti mqiegħda taħtu.”

5

L-Artikoli 98 sa 99 ta’ dak il-kodiċi jipprovdu dan li ġej:

“Artikolu 98

1.   Il-proċedura ta’ magażinaġġ doganali għandha tippermetti l-ħażna f’maħżen doganali ta’:

[…]

Artikolu 99

Maħżen doganali jista’ jkun maħżen pubbliku jew inkella maħżen privat.

L-espressjonijiet li ġejjin għandu jkollhom it-tifsiriet li ġejjin:

Il-persuna responsabbli mill-maħżen hija l-persuna awtorizzata sabiex tiġġestixxi l-maħżen doganali.

Id-depożitant għandu jkun il-persuna marbuta bid-dikjarazzjoni li tqiegħed l-merkanzija taħt il-proċedura tal-magażinaġġ doganali jew li lilha ġew trasferiti d-drittijiet u l-obbigazzjoni ta’ dik il-persuna.”

6

L-Artikolu 105(1) tal-Kodiċi jipprovdi li:

“Il-persuna nominata mill-awtoritajiet doganali għandha żżomm dokumenti tal-ħażniet tal-merkanzija kollha mqiegħda taħt il-proċedura magażinaġġ doganali f’forma approvata minn dawk l-awtoritajiet. […]”

7

It-titolu VII tal-Kodiċi Doganali, intitolat “Dejn doganali” jinkludi, fil-Kapitolu 2 tiegħu, id-dispożizzjonijiet dwar it-tnissil tad-dejn doganali. Dak il-kapitolu jinkludi, b’mod partikolari, l-artikoli 201 sa 205 li jipprevedu l-fatti li jagħtu lok għal dejn doganali fuq l-importazzjoni.

8

L-Artikolu 204 tal-Kodiċi Doganali jipprovdi:

“1.   Dejn doganali fuq l-importazzjoni għandu jiġi inkors permezz:

[…]

f’każijiet oħra barra dawk [relatati mat-tneħħija kontra l-liġi mis-sorveljanza doganali ta’ merkanziji soġġetti għal dazji fuq l-importazzjoni] ħlief meta jiġi stabbilit li dawk in-nuqqasijiet m’għandhom ebda effett sinifikanti fuq l-operazzjoni korretta tal-ħażna temporanja jew proċedura doganali konċernata.

2.   Id-dejn doganali għandu jiġi inkors jew fil-mument meta l-obbligazzjoni li n-nuqqas ta’ l-eżekuzzjoni tagħha tagħti lok għad-dejn doganali ma tiġix issodisfata jew fil-mument meta l-merkanziji jitqiegħdu taħt il-proċedura doganali involuta fejn jiġi stabbilit sussegwentement li kondizzjoni li tirregola t-tqegħid tal-merkanziji taħt l-imsemmija proċedura jew l-għoti ta’ rata mnaqqsa jew mingħajr żieda ta’ dazju fuq l-importazzjoni bis-saħħa ta’ l-użu finali tal-merkanziji ma ġietx fil-fatt issodisfata.

3.   Id-debitur għandu jkun il-persuna li tkun meħtieġa, skond iċ-ċirkostanzi, jew li tesegwixxi l-obbligazzjonijiet li joħorġu, fir-rigward ta’ merkanziji soġġetti għal dazji fuq l-importazzjoni, mill-ħażna temporanja tagħhom jew mill-użu tal-proċedura doganali li taħtha jkunu tqegħdu, jew li tħares il-kondizzjonijiet li jirregolaw it-tqegħid tal-merkanziji taħt dik il-proċedura”.

9

Skont l-Artikoli 247 u 247a tal-Kodiċi Doganali, il-miżuri neċessarji għall-implementazzjoni ta’ dak il-kodiċi għandhom jittieħdu mill-Kummissjoni Ewropea assistita mill-Kumitat tal-Kodiċi Doganali. Għal dan l-għan din tal-aħħar adottat ir-Regolament tal-Kummissjoni (KEE) Nru 2454/93, tat-2 ta’ Lulju 1993, li jiffissa d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 (ĠU Edizzjoni Speċjali bil-Malti, Kapitolu 2, Vol. 6, p. 3), kif emendat bir-Regolament tal-Kummissjoni (KE) Nru 2286/2006, tat-18 ta’ Marzu 2006 (ĠU Edizzjoni Speċjali bil-Malti, Kapitolu 2, Vol. 15, p. 118, iktar ’il quddiem ir-“regolament ta’ implementazzjoni”).

10

L-Artikoli 529 u 530 tar-Regolament ta’ Implementazzjoni jinkludu dispożizzjonijiet dwar iż-żamma tar-reġistri tal-ħażna fil-maħżen doganali.

11

L-Artikolu 529(1) ta’ dan ir-regolament jipprovdi:

“Ir-rekords tal-ħażna għandhom f’kull żmien juru l-ħażniet kurrenti ta’ l-oġġetti li għadhom taħt arranġamenti ta’ magazzinaġġ doganali. Fiż-żmienijiet preskritti mill-awtoritajiet doganali, il-persuna li tieħu ħsieb il-maħżen għandha tiddepożita lista ta’ l-imsemmija ħażna fl-uffiċċju ta’ sorveljanza.”

12

L-Artikolu 530(3) tal-imsemmi regolament jiddikjara:

“Daħla fir-rekords tal-ħażna relatata ma skarigu ta’ l-arranġamenti għandha l-aktar tard iseħħ meta l-oġġetti jħallu l-maħżen doganali jew il-faċilitajiet tal-ħażna tad-detentur”.

13

L-Artikolu 859 tar-Regolament ta’ Implementazzjoni jipprovdi:

“In-nuqqasijiet li ġejjin għandhom jitqiesu bħala bla konsegwenzi reali fuq il-ħażna temporanja jew proċedura doganali fis-sens ta’ l-Artikolu 204 (1) tal-Kodiċi [Doganali], sakemm:

14

Skont l-Artikolu 860 tar-Regolament ta’ Implementazzjoni, “[l]-awtoritajiet doganali għandhom iqisu li jkun inħoloq dejn doganali permezz ta’ l-Artikolu 204(1) tal-Kodiċi [Doganali] sakemm il-persuna li kieku tkun id-debitriċi ma tistabilixxix illi l-kondizzjonijiet ta’ l-Artikolu 859 ikunu sodisfatti”.

15

Eurogate ġiet awtorizzata tamministra maħżen doganali privat sa mill-2006. Ir-reġistri tal-ħażna dwar dak il-maħżen tinżamm, skont l-awtorizzazzjoni, għall-użu ta’ programm tal-informatika.

16

Bħala l-persuna responsabbli mill-maħżen, Eurogate introduċiet fil-maħżen doganali privat tagħha merkanzija mhux Komunitarja li toriġina minn klijenti tagħha sabiex jintbagħtu barra mit-territorju tal-Unjoni Ewropea. Mat-tneħħija tal-imsemmija merkanzija mill-maħżen doganali, ġew stabbiliti dikjarazzjonijiet doganali għall-esportazzjoni mill-ġdid tagħhom.

17

Fl-okkażjoni ta’ kontroll doganali tal-31 ta’ Jannar 2007, ġie kkonstatat li l-ħruġ tal-merkanzija inkwistjoni ġie iskritt biss fir-reġistri tal-ħażna fit-terminu ta’ bejn 11 u 126 jum, jiġifieri data wisq tardiva skont l-Artikolu 105(1) tal-Kodiċi Doganali, moqri flimkien mal-Artikoli 529(1) u 530(3) tar-Regolament ta’ Implementazzjoni.

18

Permezz ta’ avviż tal-1 ta’ Lulju 2008, il-Hauptzollamt talbet id-dazju fuq l-importazzjoni fir-rigward tal-merkanzija iskritta tard fir-reġistri tal-ħażna. Eurogate ikkontestat dak l-avviż.

19

Wara maħfra ta’ parti mill-imsemmija dazji, mogħtija permezz ta’ avviż tal-11 ta’ Awwissu 2009, il-Hauptzollamt, fir-rigward tal-bqija tad-dazji, permezz tad-deċiżjoni tat-8 ta’ Diċembru 2009, ċaħdet bħala infondat l-ilment ta’ Eurogate, minħabba li l-iskrizzjonijiet tardivi fir-reġistri tal-ħażna kellhom jiġu kkunsidrati bħala ksur tal-obbligi imposti fuqha fil-kuntest tal-proċedura tal-ħażna doganali u li, konsegwentement, dan in-nuqqas nissel dejn doganali fuq il-bażi tal-Artikolu 204(1) tal-Kodiċi Doganali. F’dak ir-rigward, il-qorti tar-rinviju tqis li negliġenza manifesta min-naħa ta’ Eurogate ma tippermettix il-kunsiderazzjoni li l-imsemmi ksur ma kellu l-ebda inċidenza fuq il-funzjonament korrett tal-proċedura doganali kkunsidrata. Għaldaqstant, f’dan il-każ, il-kundizzjonijiet tal-Artikolu 859 tar-Regolament ta’ Implementazzjoni ma jistgħux jiġu sodisfatti.

20

Eurogate Distribution għalhekk ippreżentat rikors quddiem il-Finanzgericht Hamburg (it-tribunal tal-finanzi ta’ Hamburg) sabiex tikseb l-annullament tal-avviż għall-ħlas tat-taxxa tal-1 ta’ Lulju 2008, kif emendat bl-avviż tal-11 ta’ Awwissu 2009 u kkonfermat bid-deċiżjoni tat-8 ta’ Diċembru 2009, billi sostniet b’mod partikolari li l-iskrizzjonijiet tardivi tal-ħruġ mill-maħżen doganali fir-reġistri tal-ħażna ma kinux jikkostitwixxu ksur tal-obbligi tagħha skont l-Artikolu 204(1)(a) tal-Kodiċi Doganali, sa fejn dan l-obbligu ta’ iskrizzjoni, li jirriżulta mid-dispożizzjonijiet tal-Artikolu 105 tal-Kodiċi Doganali u tal-Artikolu 530(3) tar-Regolament ta’ Implementazzjoni, għandu jiġi eżegwit biss wara l-clearance tal-proċedura tal-ħażna doganali.

21

Il-Hauptzollamt irrispondiet għal dak l-argument li l-iskrizzjoni fir-reġistri tal-ħażna ma tikkostitwixxix obbligu applikabbli wara l-clearance tal-proċedura doganali kkunsidrata. Għall-kuntrarju, l-imsemmija iskrizzjoni għandha titwettaq matul il-proċedura tal-ħażna doganali jew fil-mument stess tal-clearance tal-imsemmija proċedura. Skont il-Hauptzollamt, il-clearance tal-proċedura tal-ħażna doganali avverat ruħha biss, fil-każ ineżami, wara l-ħruġ tal-merkanzija mhux Komunitarja bir-rilaxx tagħha għall-proċedura ta’ tranżitu bħala destinazzjoni doganali ġdida.

22

Il-qorti tar-rinviju tikkunsidra li l-interpretazzjoni li l-ksur tal-obbligu ta’ iskrizzjoni immedjata tal-ħruġ ta’ merkanzija fir-reġistri tal-ħażna joħloq dejn doganali tqajjem dubji.

23

F’dak ir-rigward, il-qorti tar-rinviju tenfasizza li jekk tiġi segwita l-opinjoni ta’ ċerti universitajiet Ġermaniżi li jibbażaw ruħhom fuq it-termini tal-Artikolu 204(1)(a) tal-Kodiċi Doganali, jista’ jiġi deċiż li, f’dan il-każ, il-ksur tal-obbligu ta’ iskrizzjoni immedjata tal-ħruġ tal-merkanzija fir-reġistri tal-ħażna jseħħ “matul” l-użu tal-proċedura doganali kkunsidrata u ma jiġix “ikkawżat” mill-imsemmi użu, u b’hekk ma jkun tnissel l-ebda dejn doganali. Barra minn hekk, sa fejn il-merkanzija diġà ingħatat destinazzjoni doganali ġdida u sa fejn il-ksur ta’ dak l-obbligu għaldaqstant ma jaffettwax l-istatus tal-merkanzija, hija tistaqsi jekk jistax iktar jitnissel dejn doganali u jekk ċertu ksur tal-imsemmija proċedura għandux jiġi ssanzjonat b’mod differenti.

24

Peress li kienet tal-opinjoni li s-soluzzjoni tal-kawża quddiemha kienet tiddependi fuq l-interpretazzjoni tad-dritt tal-Unjoni, il-Finanzgericht Hamburg iddeċidiet li tissospendi l-proċeduri u li tagħmel lill-Qorti tal-Ġustizzja d-domandi preliminari li ġejjin:

“L-Artikolu 204(1)(a) [tal-Kodiċi Doganali] għandu jiġi interpretat fis-sens li, fil-każ ta’ merkanzija mhux Komunitarja mqiegħda taħt il-proċedura tal-ħażna doganali u li tkun ngħatat destinazzjoni doganali ġdida fi tmiem din il-proċedura, il-ksur tal-obbligu ta’ reġistrazzjoni tal-ħruġ tal-merkanzija mill-maħżen tad-dwana fil-programm tal-informatika previst b’mod immedjat mat-tmiem tal-proċedura tal-ħażna doganali — u mhux f’data sostanzjalment iktar tard — inissel dejn doganali għall-merkanzija kkonċernata?”

25

Permezz tad-domanda tagħha, il-qorti tar-rinviju essenzjalment tistaqsi jekk l-Artikolu 204(1)(a) tal-Kodiċi Doganali għandux jiġi interpretat fis-sens li, f’każ ta’ merkanzija mhux Komunitarja, in-nuqqas ta’ eżekuzzjoni tal-obbligu ta’ iskrizzjoni immedjata fir-reġistri tal-ħażna pprovduti għal dan l-għan tal-ħruġ tal-merkanzija minn maħżen doganali, anki meta din tal-aħħar tkun ġiet esportata mill-ġdid waqt il-clearance tal-proċedura tal-ħażna doganali, inissel dejn doganali għall-imsemmija merkanzija.

26

Skont l-Artikolu 204(1)(a) tal-Kodiċi Doganali, in-nuqqas ta’ eżekuzzjoni ta’ wieħed mill-obbligi, li jirriżultaw fir-rigward ta’ merkanzija suġġetta għal dazji fuq l-importazzjoni, mill-użu tal-proċedura doganali li taħtha jkunu tqiegħdu, inissel dejn doganali fuq l-importazzjoni.

27

Hemm lok li jitfakkar li l-proċedura tal-ħażna doganali tippermetti il-ħażna f’maħżen ta’ merkanziji mhux Komunitarji b’sospensjoni tad-dazji fuq l-importazzjoni għal dawk il-merkanziji. Dawn tal-aħħar, jekk ikun jinsabu materjalment fit-territorju doganali tal-Unjoni, huma madankollu kkunsidrati bħala merkanziji mhux Komunitarji. Il-benefiċċju ta’ tali proċedura huwa marbut mal-osservanza ta’ ċerti obbligi li jippermettu lill-awtoritajiet doganali li jiksbu konoxxenza tal-istat tal-istokk fi kwalunkwe mument, kif previst mill-Artikolu 529(1) tar-Regolament ta’ Implementazzjoni. Fost dawk l-obbligi, l-obbligu taż-żamma ta’ reġistri tal-ħażna tal-merkanziji taħt il-proċedura tal-ħażna doganali, previst fl-Artikolu 105 tal-Kodiċi Doganali, huwa kkunsidrat bħala obbligu essenzjali marbut ma’ dik il-proċedura (sentenza tas-27 ta’ Ottubru 2011, Groupe Limagrain Holding, C-402/10, Ġabra p. I-10827, punti 33 u 37). Nuqqas fir-rigward tal-obbligu ta’ iskrizzjoni mingħajr dewmien fir-reġistri tal-ħażna pprovduti għal dan l-għan tal-ħruġ ta’ merkanziji mill-maħżen ikun jippreġudika s-sorveljanza doganali.

28

Barra minn hekk, hemm lok li jiġi enfasizzat li l-preżenza, fit-territorju doganali tal-Unjoni, ta’ merkanziji mhux Komunitarji tinvolvi r-riskju li dawn il-merkanziji jispiċċaw jiġu integrati, mingħajr ma jiġu żdoganati, fiċ-ċirku ekonomiku tal-Istati Membri, risjku li, kif irrilevat il-Kummissjoni, l-Artikolu 204 tal-Kodiċi Doganali jikkontribwixxi sabiex jiġi evitat (ara s-sentenza tal-15 ta’ Lulju 2010, Skatteministeriet vs DSV Road A/S, C-234/09, Ġabra p. I-7329, punt 31).

29

F’dan il-każ, l-awtorizzazzjoni mogħtija lil Eurogate għall-ġestjoni ta’ maħżen doganali privat kienet suġġetta għall-kundizzjoni taż-żamma ta’ reġistri tal-ħażna tal-merkanzija kollha ssuġġettata għall-proċedura tal-ħażna doganali. Fil-kawża prinċipali, huwa stabbilit li Eurogate rreġistrat b’mod tardiv f’dawk ir-reġistri il-ħruġ tal-merkanziji li ġew, barra minn hekk, esportati mill-ġdid b’mod regolari.

30

Eurogate tikkunsidra li n-nuqqas inkwistjoni fil-kawża prinċipali ma jistax inissel dejn doganali fid-dawl tal-Artikolu 204 tal-Kodiċi Doganali peress li l-obbligu li ma ġiex sodisfatt japplika wara l-clearance tal-proċedura doganali kkunsidrata u li huwa ma jikkostitwixxix obbligu sostanzjali marbut mal-proċedura tal-ħażna doganali, b’tali mod li n-nuqqas tiegħu ma huwa xejn ħlief sempliċi irregolarità doganali. F’dan ir-rigward, il-Kummissjoni tikkunsidra li ma kinitx għadha saret clearance tal-proċedura tal-ħażna doganali fil-mument meta Eurogate kellha l-obbligu li tirreġistra fir-reġistri tal-ħażna pprovduti għal dan l-għan, il-ħruġ tal-merkanziji mill-maħżen.

31

F’dak ir-rigward, il-Qorti tal-Ġustizzja ddeċidiet li l-ebda dispożizzjoni tal-Kodiċi Doganali u tar-regolament ta’ implementazzjoni tiegħu ma tippermetti li jiġi stabbilit li hemm lok, fir-rigward tal-effett tan-nuqqas ta’ eżekuzzjoni ta’ obbligu fuq it-tnissil ta’ dejn doganali, b’applikazzjoni tal-Artikolu 204 tal-Kodiċi Doganali, li ssir distinzjoni bejn obbligu li għandu jitwettaq qabel il-clearance tal-proċedura doganali kkonċernata u obbligu li għandu jitwettaq wara tali clearance, jew anki bejn obbligu msejjaħ prinċipali u ieħor imsejjaħ sekondarju (ara s-sentenza tas-6 ta’ Settembru 2012, Döhler Neuenkirchen, C-262/10, punt 38).

32

Kif irrileva l-Avukat Ġenerali fil-punt 47 tal-konklużjonijiet tiegħu, l-obbligu tal-ħlas tad-dazji doganali f’tali każ ma jikkostitwixxix sanzjoni amministrattiva, fiskali jew kriminali, iżda sempliċi konsegwenzi tal-konstatazzjoni tan-nuqqas ta’ sodisfazzjon tal-kundizzjonijiet meħtieġa għall-finijiet ta’ kisba tal-vantaġġ li jirriżulta mill-applikazzjoni tal-proċedura tal-ħażna doganali, li tirrendi inapplikabbli s-sospensjoni u tiġġustifika, konsegwentement, l-impożizzjoni ta’ dazji doganali. Fil-fatt, dik il-proċedura timplika l-għoti ta’ vantaġġ kundizzjonali li ma jistax jingħata jekk ma jkunux ġew sodisfatti l-kundizzjonijiet marbuta miegħu.

33

Barra minn hekk, l-iskrizzjoni tardiva fir-reġistri tal-ħażna ma tifformax parti mil-lista eżawrjenti, inkluża fl-Artikolu 859 tar-Regolament ta’ Implementazzjoni, ta’ nuqqasijiet li għandhom jistgħu jitqiesu bħala mingħajr konsegwenza reali fuq il-funzjonament korrett tal-proċedura doganali kkunsidrata.

34

F’dak ir-rigward, hemm lok li jitfakkar li l-Artikolu 859 tar-Regolament ta’ Implementazzjoni jistabbilixxi b’mod validu sistema li tirregola b’mod eżawrjenti n-nuqqasijiet, fis-sens tal-Artikolu 204(1)(a) tal-Kodiċi Doganali, li “[huma] bla konsegwenzi reali fuq il-ħażna temporanja jew fuq il-proċedura doganali [kkunsidrata]” (sentenza tal-11 ta’ Novembru 1999, Söhl & Söhlke, C-48/98, Ġabra p. I-7877, punt 43).

35

Fid-dawl ta’ dak li ntqal, hemm lok li tingħata risposta għad-domanda magħmula li l-Artikolu 204(1)(a) tal-Kodiċi Doganali għandu jiġi interpretat fis-sens li, f’każ ta’ merkanzija mhux Komunitarja, in-nuqqas ta’ eżekuzzjoni tal-obbligu ta’ iskrizzjoni fir-reġistri tal-ħażna pprovduti għal dan l-għan, tal-ħruġ tal-merkanzija minn maħżen doganali, u dan sa mhux iktar tard minn dak il-ħruġ, inissel dejn doganali għall-imsemmija merkanzija, anki jekk din tkun ġiet esportata mill-ġdid.

36

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tielet Awla) taqta’ u tiddeċiedi:

L-Artikolu 204(1)(a) tar-Regolament tal-Kunsill (KEE) Nru 2913/92, tat-12 ta’ Ottubru 1992, li jwaqqaf il-Kodiċi Doganali tal-Komunità, kif emendat bir-Regolament (KE) Nru 648/2005 tal-Parlament Ewropew u tal-Kunsill, tat-13 ta’ April 2005, għandu jiġi interpretat fis-sens li, f’każ ta’ merkanzija mhux Komunitarja, in-nuqqas ta’ eżekuzzjoni tal-obbligu ta’ iskrizzjoni fir-reġistri tal-ħażna pprovduti għal dan l-għan, tal-ħruġ tal-merkanzija minn maħżen doganali, u dan sa mhux iktar tard minn dak il-ħruġ, inissel dejn doganali għall-imsemmija merkanzija, anki jekk din tkun ġiet esportata mill-ġdid.