1. 

Il-preżenti azzjoni tistieden lill-Qorti tal-Ġustizzja, fil-kuntest tal-ġlieda kontra l-piraterija ’l barra mix-xtut tas-Somalja, sabiex tippreċiża l-fruntiera bejn tliet oqsma tal-azzjoni esterna tal-Unjoni Ewropea, jiġifieri l-politika barranija u ta’ sigurtà komuni (PESK), id-dimensjoni esterna tal-Ispazju ta’ libertà, sigurtà u ġustizzja (iktar ’il quddiem is-“SLSĠ”) u l-kooperazzjoni fl-iżvilupp.

2. 

Din il-kawża turi għal darb’oħra, b’mod partikolari wara s-sentenza tad-19 ta’ Lulju 2012, Il-Parlament vs Il-Kunsill ( 2 ), dwar il-ġlieda kontra t-terroriżmu internazzjonali, li d-dħul fis-seħħ tat-Trattat ta’ Lisbona ma eliminax, minkejja l-eliminazzjoni formali tal-pilastri, il-ħtieġa li jiġu ddelimitati l-kampijiet ta’ applikazzjoni rispettivi tad-diversi politiki tal-Unjoni.

3. 

Dan il-kompitu huwa delikat peress li l-għan tas-sigurtà jinsab involut. Fil-fatt, dan l-għan huwa komuni għall-PESK u għas-SLSĠ. L-imsemmi għan huwa wkoll marbut mal-politika ta’ kooperazzjoni fl-iżvilupp sa fejn is-sigurtà tikkostitwixxi prerekwiżit neċessarju għall-iżvilupp tal-Istati kkonċernati.

4. 

L-eżerċizzju ta’ delimitazzjoni bejn il-politiki tal-Unjoni huwa madankollu indispensabbli minħabba l-ispeċifiċità li tikkaratterizza lill-PESK meta mqabbla mal-politiki l-oħra tal-Unjoni.

5. 

Din l-ispeċifiċità hija kkaratterizzata b’mod partikolari mir-rwol limitat tal-Parlament Ewropew fil-kuntest tal-PESK. Minn din il-perspettiva, l-iffissar ta’ kriterji ċari sabiex jiġi ddefinit il-kamp ta’ applikazzjoni ta’ din il-politika meta mqabbla mal-oqsma l-oħra tal-azzjoni esterna tal-Unjoni jippreżenta kwistjoni kostituzzjonali.

6. 

Permezz tal-azzjoni tiegħu, il-Parlament jitlob lill-Qorti tal-Ġustizzja tannulla d-Deċiżjoni tal-Kunsill 2011/640/PESK, tat-12 ta’ Lulju 2011, dwar l-iffirmar u l-konklużjoni tal-Ftehim bejn l-Unjoni Ewropea u r-Repubblika tal-Mawrizju dwar il-kundizzjonijiet tat-trasferiment ta’ pirati ssuspettati u proprjetà ssekwestrata assoċjata mill-forza navali mmexxija mill-Unjoni Ewropea lejn ir-Repubblika tal-Mawrizju u dwar il-kundizzjonijiet tal-pirati ssuspettati wara t-trasferiment ( 3 ).

7. 

Id-deċiżjoni kkontestata hija bbażata fuq l-Artikolu 37 TUE, kif ukoll fuq l-Artikolu 218(5) u (6) TFUE.

8. 

Skont l-Artikolu 37 TUE, li jagħmel parti mill-Kapitolu 2 tat-Titolu V tat-Trattat UE, dwar “Dispożizzjonijiet speċifiċi dwar il-[PESK]”, “[l-]Unjoni tista’ tikkonkludi ftehim ma’ Stat wieħed jew aktar jew ma’ organizzazzjonijiet internazzjonali f’oqsma koperti minn dan il-Kapitolu”.

9. 

L-Artikolu 218 TFUE jinkludi r-regoli dwar in-negozjar, l-iffirmar u l-konklużjoni tal-ftehim internazzjonali. Huwa jaqra kif ġej:

“1.   Mingħajr preġudizzju għad-dispożizzjonijiet speċifiċi stabbiliti fl-Artikolu 207, ftehim bejn l-Unjoni u pajjiżi terzi jew organizzazzjonijiet internazzjonali għandhom jiġu negozjati u konklużi skond il-proċedura li ġejja.

2.   Il-Kunsill għandu jawtorizza l-ftuħ tan-negozjati, jadotta direttivi ta’ negozjati, jawtorizza l-iffirmar ta’ ftehim u jikkonkludihom.

3.   Meta l-ftehim in kwistjoni jikkonċerna esklużivament jew prinċipalment il-[PESK], il-Kummissjoni jew ir-Rappreżentant Għoli ta’ l-Unjoni għall-Affarijiet Barranin u l-Politika ta’ Sigurtà għandhom jippreżentaw rakkomandazzjonijiet lill-Kunsill, li għandu jadotta deċiżjoni li tawtorizza l-ftuħ tan-negozjati u li tinnomina, skond is-suġġett tal-ftehim previst, in-negozjatur ta’ l-Unjoni jew il-kap tal-grupp ta’ negozjaturi ta’ l-Unjoni.

[…]

5.   Il-Kunsill, fuq proposta min-negozjatur, għandu jadotta deċiżjoni li tawtorizza l-iffirmar tal-ftehim u, jekk meħtieġ, l-applikazzjoni provviżorja tiegħu qabel id-dħul fis-seħħ.

6.   Il-Kunsill, fuq proposta min-negozjatur, għandu jadotta deċiżjoni li tikkonkludi l-ftehim.

Minbarra meta l-ftehim jikkonċerna esklużivament il-politika estera u ta’ sigurtà komuni, il-Kunsill għandu jadotta deċiżjoni li tikkonkludi l-ftehim:

[…]

10.   Il-Parlament [...] għandu jinżamm informat immedjatament u kompletament fl-istadji kollha tal-proċedura.

[…]”

10. 

Insostenn tar-rikors tiegħu, il-Parlament iqajjem żewġ motivi.

11. 

Permezz tal-ewwel motiv tiegħu, il-Parlament isostni li l-ftehim bejn l-Unjoni Ewropea u r-Repubblika tal-Mawrizju dwar il-kundizzjonijiet tat-trasferiment ta’ pirati ssuspettati u proprjetà ssekwestrata assoċjata mill-forza navali mmexxija mill-Unjoni Ewropea lejn ir-Repubblika tal-Mawrizju u dwar il-kundizzjonijiet tal-pirati ssuspettati wara t-trasferiment ( 4 ) , ma jikkonċernax biss il-PESK, fis-sens tat-tieni subparagrafu tal-Artikolu 218(6) TFUE, peress li l-għan u l-kontenut tal-ftehim huma wkoll marbuta mal-kooperazzjoni ġudizzjarja f’materji kriminali, mal-kooperazzjoni tal-pulizija u mal-kooperazzjoni fl-iżvilupp u li hija l-proċedura leġiżlattiva ordinarja li għandha tapplika għal dawn l-oqsma. Għalhekk, id-deċiżjoni li l-ftehim jiġi konkluż kellha tittieħed wara approvazzjoni tal-Parlament skont l-inċiż (v) tal-punt (a) tat-tieni subparagrafu tal-Artikolu 218(6) TFUE.

12. 

Permezz tat-tieni motiv tiegħu, il-Parlament isostni li l-Kunsill kiser l-Artikolu 218(10) TFUE meta ma informahx b’mod immedjat u b’mod sħiħ fl-istadji kollha tal-proċedura.

13. 

Permezz ta’ digriet tal-President tal-Qorti tal-Ġustizzja tal-5 ta’ Ġunju 2012, ir-Repubblika Ċeka, ir-Repubblika Franċiża, ir-Repubblika Taljana, ir-Renju tal-Isvezja kif ukoll ir-Renju Unit tal-Gran Brittanja u l-Irlanda ta’ Fuq ġew ammessi jintervjenu f’din il-kawża insostenn tat-talbiet tal-Kunsill.

14. 

Min-naħa tagħha, il-Kummissjoni ġiet ammessa tintervjeni matul il-proċedura orali insostenn tal-Parlament.

15.

Il-Parlament jiddefendi interpretazzjoni restrittiva tal-kunċett ta’ ftehim li jikkonċerna esklużivament il-PESK. Skont dan, il-Kunsill huwa awtorizzat jikkonkludi ftehim internazzjonali mingħajr l-approvazzjoni jew il-konsultazzjoni tal-Parlament biss f’ċirkustanzi eċċezzjonali u jekk dan il-ftehim, sakemm ma jkun jinkludi ebda element li jirrigwarda politiki oħra tal-Unjoni, ikun jikkonċerna esklużivament il-PESK.

16.

Fir-rigward tal-ftehim inkwistjoni fil-kuntest tar-rikors preżenti, il-Parlament isostni li dan jinkludi komponenti li jirrigwardaw tliet politiki tal-Unjoni differenti, jiġifieri l-PESK, il-kooperazzjoni tal-pulizija u ġudizzjarja f’materji kriminali kif ukoll il-kooperazzjoni fl-iżvilupp. Fl-opinjoni tiegħu huwa biżżejjed li wieħed minn dawn il-komponenti jkun preżenti fil-ftehim, anki jekk b’mod sekondarju jew anċillari, sabiex l-obbligu li tinkiseb l-approvazzjoni tal-Parlament ikun japplika. Fil-fatt, f’tali sitwazzjoni, il-ftehim ma jistax, skont il-Parlament, jitqies li jikkonċerna esklużivament il-PESK.

17.

It-teżi difiża mill-Kunsill tikkonsisti, għall-kuntrarju, f’li ssostni li l-ftehim ma jinkludix komponenti oħra ħlief dak li jirrigwarda l-PESK, sew jekk b’mod prinċipali jew anċillari. Anki jekk ikun possibbli li jiġu identifikati tali komponenti, huma jkunu biss anċillari, b’mod li ma jkunux jeħtieġu ż-żieda ta’ bażi legali oħra. Billi l-bażi legali miżmuma hija, minn perspettiva materjali, esklużivament relattiva għall-PESK, jaqbel li minn dan jiġi dedott li, minn perspettiva proċedurali, il-ftehim “jikkonċerna esklużivament il-[PESK]”, fis-sens tat-tieni subparagrafu tal-Artikolu 218(6) TFUE, u għaldaqstant il-Parlament ma jkollux jagħti l-approvazzjoni tiegħu sabiex il-Kunsill ikun jista’ jadotta d-deċiżjoni ta’ konklużjoni ta’ dan il-ftehim.

18.

Bħalma jagħmlu l-Kunsill u l-Istati Membri li intervjenew fil-kuntest tal-kawża preżenti, jiena nqis li ftehim ikun “jikkonċerna esklużivament il-[PESK]”, fis-sens tat-tieni subparagrafu tal-Artikolu 218(6) TFUE, meta d-deċiżjoni relattiva għall-konklużjoni ta’ dan il-ftehim tkun ibbażata unikament fuq bażi legali materjali relattiva għall-PESK, jiġifieri b’esklużjoni ta’ kull bażi legali materjali oħra.

19.

Fl-opinjoni tiegħi ikun inkoerenti li tiġi eżaminata l-kwistjoni tal-proċedura applikabbli għall-konklużjoni ta’ ftehim internazzjonali b’mod distakkat mill-kwistjoni preliminari li tikkostitwixxi d-determinazzjoni tal-bażi legali materjali li tagħti lill-Unjoni l-kompetenza li tadotta tali ftehim, u dan billi dawn iż-żewġ kwistjonijiet huma marbutin mill-qrib. Tali separazzjoni twassal għal eżami doppju, li jinvolvi d-definizzjoni ta’ kriterji ġodda sabiex jiġi determinat jekk ftehim jikkonċernax esklużivament il-PESK jew le, b’riżultati inċerti li jwasslu għal inċertezza legali.

20.

Għaldaqstant jaqbel li tiġi ddeterminata l-bażi legali materjali li tawtorizza lill-Unjoni li tadotta ftehim internazzjonali qabel ma tiddetermina l-bażi legali proċedurali tiegħu. Barra minn hekk, tali approċċ huwa appoġġat mill-ġurisprudenza tal-Qorti tal-Ġustizzja, li tgħid li “ma humiex il-proċeduri li jiddefinixxu l-bażi legali ta’ att, iżda l-bażi legali ta’ att li tiddetermina l-proċeduri li għandhom jiġu segwiti għall-adozzjoni ta’ dan tal-aħħar” ( 5 ).

21.

Fil-kuntest tal-eżami ta’ jekk ftehim jikkonċernax esklużivament jew le l-PESK, ftit jimporta, għaldaqstant, kuntrarjament għal dak li jsostni l-Parlament, li l-ftehim inkwistjoni jikkonċerna wkoll, b’mod sekondarju, oqsma li ma humiex il-PESK. Għalhekk, ma huwiex biżżejjed li ftehim ikun jikkonċerna b’mod anċillari jew inċidentali oqsma oħra li ma humiex il-PESK sabiex il-konsultazzjoni jew l-approvazzjoni minn qabel tal-Parlament tkun meħtieġa skont l-Artikolu 218(6) TFUE.

22.

Kuntrarjament għar-rieda tal-awturi tat-Trattati li jagħtu lill-Parlament rwol limitat fil-qasam tal-PESK, l-interpretazzjoni ssuġġerita minn din l-istituzzjoni timplika li dan jiġi kkonsultat jew inkella li tinkiseb l-approvazzjoni tiegħu għall-adozzjoni ta’ kważi l-ftehim internazzjonali kollha. Fil-fatt, sa fejn, b’mod konformi mat-tieni subparagrafu tal-Artikolu 21(3) TUE, l-Unjoni għandha tiżgura l-koerenza bejn id-diversi oqsma tal-azzjoni esterna tagħha u bejn dawn u l-politiki l-oħra, huwa rari li ftehim konkluż fil-qasam tal-PESK ma jkunx jikkonċerna, tal-inqas b’mod inċidentali, politiki oħra tal-Unjoni.

23.

Kif jirrileva ġustament il-Kunsill, li kieku kellha tiġi segwita t-teżi tal-Parlament, l-approvazzjoni ta’ dan tal-aħħar tkun meħtieġa għal numru kbir ta’ ftehim li għandhom biss bażi legali li tirrigwarda l-PESK għaliex dawn spiss ikollhom xi rabta ma’ politiki oħra tal-Unjoni minħabba l-eżistenza ta’ għanijiet ġenerali u trasversali fil-qasam ta’ relazzjonijiet esterni kif ukoll ir-rekwiżit ta’ koerenza. Pereżempju, mill-interkonnessjoni innegabbli bejn is-sigurtà, l-iżvilupp u d-drittijiet tal-bniedem jirriżulta li spiss ħafna jkun possibbli li wieħed isostni li miżuri meħuda f’wieħed minn dawn it-tliet oqsma jkollhom ukoll effetti fuq it-tnejn l-oħra u għaldaqstant jirrigwardaw ukoll dawn l-oqsma għall-finijiet tal-applikazzjoni tal-Artikolu 218(6) TFUE. Issa, dan ma huwiex l-ispirtu tat-Trattati. Għall-kuntrarju, dawn tal-aħħar la neħħew u lanqas ma għaqqdu flimkien id-diversi politiki tal-Unjoni u l-bażijiet legali korrispondenti li permezz tagħhom dawn l-għanijiet orizzontali għandhom jintlaħqu, u kull miżura għadha distinta u suġġetta għall-bażi legali proprja tagħha u r-regoli deċiżjonali proprji tagħha.

24.

Ir-rekwiżit ta’ koerenza tħeġġeġ lill-Kunsill sabiex jinkludi, fl-atti li huwa jadotta f’materji ta’ PESK, elementi relattivi għal politiki oħra tal-Unjoni. Il-preżenza ta’ tali elementi, minkejja li huma anċillari, ma tippermettix li wieħed jikkunsidra li ċ-ċentru tal-gravità tal-att ma huwiex relattiv għall-PESK. L-għanijiet orizzontali u r-rekwiżit ta’ koerenza tal-azzjoni esterna tal-Unjoni ma jħassrux il-partikolaritajiet ta’ kull waħda mill-politiki tal-Unjoni, hekk kif il-komplementarjetà tagħhom ma tħassarx l-ispeċifiċità ta’ kull politika.

25.

Il-ftehim PESK jistgħu jinkludu elementi purament anċillari li jaqgħu taħt politiki oħra tal-Unjoni meta dawn ikollhom portata tant limitata li ma jkunux jiġġustifikaw iż-żieda ta’ bażi legali oħra. Konsegwentement, tali ftehim ikunu jikkonċernaw esklużivament il-PESK, anki għall-finijiet tal-Artikolu 218(6) TFUE.

26.

Kuntrarjament għal dak li jsostni l-Parlament, id-differenza bejn il-formulazzjoni tal-Artikolu 218(3) TFUE u dik tat-tieni subparagrafu tal-Artikolu 218(6) TFUE ma hijiex ta’ natura li tibdel l-analiżi tiegħi.

27.

Huwa minnu li, skont l-Artikolu 218(3) TFUE, huwa r-Rappreżentant Għoli tal-Unjoni għall-Affarijiet Barranin u l-Politika ta’ Sigurtà li għandu jippreżenta rakkomandazzjonijiet lill-Kunsill “[m]eta l-ftehim in kwistjoni jikkonċerna esklużivament jew prinċipalment il-[PESK] ( 6 )”. Il-formulazzjoni ta’ din id-dispożizzjoni b’hekk issemmi żewġ kategoriji ta’ ftehim ikkontemplati, jiġifieri dawk li jikkonċernaw esklużivament il-PESK u dawk li jikkonċernaw prinċipalment din il-politika. Mill-eżistenza ta’ dawn iż-żewġ kategoriji fl-Artikolu 218(3) TFUE, il-Parlament jiddeduċi li, skont l-Artikolu 218(6) TFUE, il-Kunsill ma jistax jikkonkludi ftehim mingħajr ma jinvolvi fih lill-Parlament meta l-ftehim ikun jikkonċerna prinċipalment lill-PESK biss, iżda mhux esklużivament lilha.

28.

Madankollu għandu jiġi enfasizzat li ż-żewġ dispożizzjonijiet imsemmija iktar ’il fuq ikopru żewġ stadji distinti tal-proċedura relattiva għall-ftehim internazzjonali. L-ewwel dispożizzjoni tikkonċerna d-determinazzjoni tal-istituzzjoni jew tal-persuna kompetenti sabiex tippreżenta rakkomandazzjonijiet lill-Kunsill għall-finijiet tal-ftuħ tan-negozjati relattivi għal ftehim previst. Għall-kuntrarju, it-tieni waħda tikkonċerna l-proċedura ta’ konklużjoni ta’ tali ftehim.

29.

Barra minn hekk, u b’mod iktar fundamentali, jiena nqis li d-differenza fil-formulazzjoni mressqa mill-Parlament ma tistax tippermetti li tiġi approvata t-teżi ta’ dan tal-aħħar peress li din tmur kontra s-sistema li fuqha huwa bbażat l-Artikolu 218(6) TFUE.

30.

L-Artikolu 218(6) TFUE jistabbilixxi, fil-fatt, simetrija bejn il-proċedura ta’ adozzjoni tal-miżuri fuq il-pjan intern u fuq il-pjan estern. Fi kliem ieħor, din id-dispożizzjoni tistrieħ fuq paralleliżmu bejn is-setgħat tal-Parlament fuq il-livell intern u s-setgħat tiegħu fuq il-livell estern. L-għoti ta’ iktar setgħat lill-Parlament għall-adozzjoni ta’ deċiżjoni li tikkonċerna l-iffirmar u l-konklużjoni ta’ ftehim internazzjonali minn dawk li huwa għandu għall-adozzjoni għal att intern li ma għandux tali għan ikun imur kontra l-formulazzjoni u l-ispirtu tal-imsemmija dispożizzjoni.

31.

Barra minn hekk, l-interpretazzjoni tal-Parlament tkun taffettwa l-bilanċ istituzzjonali stabbilit mit-Trattat ta’ Lisbona li jipprevedi rwol limitat tal-parlament fid-definizzjoni u l-implementazzjoni tal-PESK, sew jekk ikun permezz ta’ atti unilaterali kif ukoll jekk ikunu permezz ta’ ftehim internazzjonali.

32.

Hekk kif tindika r-Repubblika Ċeka, l-Artikolu 218(6) TFUE jikkostitwixxi dispożizzjoni proċedurali li l-għan tagħha huwa li jiġi ggarantit li s-setgħat “esterni” tal-Parlament ikunu jikkorrispondu għas-setgħat “interni” tiegħu, jiġifieri li huwa jkollu, b’rabta ma’ qasam partikolari, l-istess setgħat, indipendentement mill-kwistjoni ta’ jekk il-qasam inkwistjoni għandux jiġi rregolat minn att intern jew minn att estern.

33.

B’mod konkret, il-frażi “[m]inbarra meta l-ftehim jikkonċerna esklużivament il-[PESK]” li tinsab fit-tieni subparagrafu tal-Artikolu 218(6) TFUE għandha l-għan li tiggarantixxi, fil-każ fejn l-att estern ma jkunx ibbażat unikament fuq bażi legali li taqa’ taħt il-PESK, iżda jkun ibbażat, fl-istess waqt, anki fuq bażi legali waħda jew diversi bażijiet legali oħra, li l-Parlament igawdi mill-istess setgħat bħal dawk li huwa jkollu li kieku kienet kwistjoni ta’ att intern ibbażat ukoll fuq bażijiet legali oħra minbarra dik li taqa’ taħt il-PESK ( 7 ).

34.

Peress li, b’applikazzjoni tat-test li jirrigwarda ċ-ċentru tal-gravità tal-att inkwistjoni, jiġi konkluż li l-ftehim huwa bbażat, ġustament, fuq l-Artikolu 37 TUE, li għaldaqstant jikkostitwixxi l-bażi legali unika tiegħu, għandu jiġi dedott li, mill-perspettiva proċedurali, il-ftehim jikkonċerna esklużivament il-PESK fis-sens tal-Artikolu 218(6) TFUE.

35.

Minn din l-analiżi, li tgħaqqad l-interpretazzjoni tat-tieni subparagrafu tal-Artikolu 218(6) TFUE mal-għażla tal-bażi legali materjali, jirriżulta li, sabiex jiġi vverifikat jekk id-deċiżjoni kkontestata tikkonċernax ftehim li jikkonċerna esklużivament il-PESK fis-sens ta’ din id-dispożizzjoni, li għaldaqstant ġie ġustament adottat mingħajr konsultazzjoni jew approvazzjoni tal-Parlament, huwa indispensabbli li jiġi eżaminat jekk il-bażi legali materjali xierqa ta’ din id-deċiżjoni kinitx — u kinitx unikament — l-Artikolu 37 TUE.

36.

L-għażla tal-bażi legali xierqa ta’ att tal-Unjoni għandha importanza ta’ natura kostituzzjonali ( 8 ). Hija minn din l-għażla li tirriżulta l-proċedura applikabbli għall-adozzjoni ta’ tali att, sew jekk dan ikun relatat mal-azzjoni interna u sew jekk mal-azzjoni esterna tal-Unjoni.

37.

Skont ġurisprudenza stabbilita, l-għażla tal-bażi legali ta’ att tal-Unjoni għandha tibbaża ruħha fuq elementi oġġettivi, li jistgħu jkunu suġġetti għal stħarriġ ġudizzjarju, li fosthom hemm l-għan u l-kontenut ta’ dak l-att ( 9 ). Jekk l-eżami tal-att ikkonċernat juri li dan l-att għandu għan doppju jew għandu komponent doppju u jekk wieħed minn dawn jista’ jiġi identifikat bħala dak ewlieni jew predominanti, filwaqt li l-ieħor huwa biss anċillari, dak l-att għandu jkun ibbażat fuq bażi legali unika, jiġifieri dik meħtieġa mill-għan jew mill-komponent ewlieni jew predominanti ( 10 ). It-tfittxija taċ-ċentru tal-gravità tal-att ikkonċernat għandha wkoll tieħu inkunsiderazzjoni l-kuntest li fih jinsab dan l-att.

38.

Billi d-deċiżjoni kkontestata għandha bħala għan l-iffirmar u l-konklużjoni tal-Ftehim f’isem l-Unjoni, għandha tiġi eżaminata din id-deċiżjoni moqrija flimkien mal-Ftehim.

39.

Fil-kawża preżenti, it-tfittxija taċ-ċentru tal-gravità tad-deċiżjoni kkontestata timplika li wieħed jistaqsi jekk din kif ukoll il-Ftehim jaqgħux unikament taħt il-PESK jew jekk dawn jikkonċernawx ukoll, b’mod indisassoċjabbli u f’daqs ekwivalenti, minn naħa, is-SLSĠ u/jew, min-naħa l-oħra, il-kooperazzjoni fl-iżvilupp, b’mod li l-imsemmija deċiżjoni kellha tkun fondata fuq diversi bażijiet legali, li jikkorrispondu għal dawn id-diversi politiki tal-Unjoni.

40.

Fuq stedina tal-Qorti tal-Ġustizzja matul is-seduta, il-Parlament indika li, fl-opinjoni tiegħu, id-deċiżjoni kkontestata kellha tkun ibbażata fuq il-bażijiet legali materjali li ġejjin, jiġifieri, minbarra l-Artikolu 37 TUE, l-Artikoli 82 TFUE, 87 TFUE u 209 TFUE.

41.

Fl-opinjoni tiegħi, kemm il-kuntest li fih jidħol il-Ftehim kif ukoll l-għan u l-kontenut tiegħu jippermettu li wieħed jikkunsidra li d-deċiżjoni kkontestata relatata miegħu kellha tkun ibbażata unikament fuq il-bażi legali materjali stabbilita bl-Artikolu 37 TUE.

42.

Fil-każ tal-analiżi tiegħi intiża li turi n-natura xierqa tal-bażi legali materjali tad-deċiżjoni kkontestata, l-eżami tal-għan u tal-kontenut tagħha u tal-Ftehim ma jistax jitwettaq b’mod iżolat iżda għandu jieħu inkunsiderazzjoni l-atti li għalihom dawn tal-aħħar jirreferu u li magħhom huma jistabbilixxu rabta.

43.

F’dan ir-rigward, għandu jiġi rrilevat li kemm id-deċiżjoni kkontestata kif ukoll il-Ftehim jagħmlu riferiment għal riżoluzzjonijiet tal-Kunsill tas-Sigurtà tan-Nazzjonijiet Uniti ( 11 ) kif ukoll għall-Azzjoni Konġunta tal-Kunsill 2008/851/PESK, tal-10 ta’ Novembru 2008, dwar l-operazzjoni militari tal-Unjoni Ewropea bil-ħsieb ta’ kontribut għad-deterrenza, il-prevenzjoni u t-trażżin tal-atti ta’ piraterija u ta’ serq bl-użu tal-armi ’l barra mix-xtut tas-Somalja ( 12 ).

44.

B’teħid inkunsiderazzjoni tal-iżvilupp tal-piraterija ’l barra mix-xtut tas-Somalja u t-theddida li din toħloq għas-sigurtà internazzjonali, il-Kunsill tas-Sigurtà adotta diversi riżoluzzjonijiet dwar din il-kwistjoni, b’mod partikolari r-Riżoluzzjonijiet 1814 (2008), 1816 (2008), 1838 (2008), 1846 (2008) u 1851 (2008).

45.

Fir-Riżoluzzjoni 1814 (2008) tiegħu, il-Kunsill tas-Sigurtà rrileva li “s-sitwazzjoni fis-Somalja għadha ta’ theddida għall-paċi u għas-sigurtà internazzjonali fir-reġjun ( 13 )”. Fil-punt 11 tal-imsemmija riżoluzzjoni, huwa talab “lill-Istati Membri u lill-organizzazzjonijiet reġjonali sabiex, billi jikkoordinaw mill-qrib l-azzjoni tagħhom bejniethom, [...] jieħdu miżuri sabiex jiġu protetti l-bastimenti li jipparteċipaw fit-trasport u għall-kunsinna tal-għajnuna umanitarja ddestinata għas-Somalja u fl-attivitajiet awtorizzati mill-Organizzazzjoni tan-Nazzjonijiet Uniti (ONU)”.

46.

Fir-riżoluzzjoni 1816 (2008) tiegħu, il-Kunsill tas-Sigurtà ddikjara ruħu bħala inkwetat “bit-theddida li dawn l-atti ta’ piraterija u ta’ serq bl-użu tal-armi mwettqa kontra bastimenti jikkawżaw fuq il-kunsinna effettiva, fit-termini tal-kunsinna u s-sigurtà tal-kunsinna tal-għajnuna umanitarja fis-Somalja, fuq is-sigurtà tar-rotot marittimi kummerċjali u fuq in-navigazzjoni internazzjonali ( 14 )”. Huwa rrileva wkoll li “l-atti ta’ piraterija u s-serq bl-użu ta’ armi subiti minn bastimenti fl-ilmijiet territorjali tas-Somalja jew fl-ibħra internazzjonali, ’il barra mix-xtut tagħha, jiggravaw is-sitwazzjoni fil-pajjiż, liema sitwazzjoni tkompli thedded il-paċi internazzjonali u s-sigurtà tar-reġjun ( 15 )”.

47.

Ibbażat fuq din il-konstatazzjoni, il-Kunsill tas-Sigurtà sejjaħ għall-kooperazzjoni internazzjonali bl-għan li tiġi miġġielda l-piraterija. B’mod partikolari, huwa ħeġġeġ “lill-Istati li jixtiequ jużaw rotot marittimi kummerċjali li jinsabu ’l barra mix-xtut tas-Somalja sabiex isaħħu u jikkoordinaw, f’kooperazzjoni mal-Gvern Federali ta’ tranżizzjoni, l-azzjoni mibdija sabiex jiġu skoraġġuti l-atti ta’ piraterija u s-serq bl-użu tal-armi mwettaq fil-baħar ( 16 )”. Il-Kunsill tas-Sigurtà ħeġġeġ ukoll “lill-Istati kollha sabiex jikkooperaw bejniethom, flimkien mal-[Organizzazzjoni Marittima Internazzjonali (OMI)] u, jekk ikun il-każ, mal-organizzazzjonijiet reġjonali kompetenti, dwar atti ta’ piraterija u serq bl-użu tal-armi mwettqa fl-ilmijiet territorjali tas-Somalja u fl-ibħra internazzjonali ’l barra mix-xtut tagħha u li jgħaddu lil xulxin kull informazzjoni relattiva għalihom, u sabiex jagħtu assistenza lill-bastimenti mhedda jew attakkati minn pirati jew ħallelin armati, skont id-dritt internazzjonali applikabbli ( 17 )”.

48.

Fir-Riżoluzzjoni 1838 (2008) tiegħu, il-Kunsill tas-Sigurtà barra minn hekk talab “lill-Istati kollha kkonċernati mis-sigurtà tal-attivitajiet marittimi sabiex jipparteċipaw b’mod attiv fil-ġlieda kontra l-piraterija fuq il-bastimenti li jkunu jinsabu fl-ibħra internazzjonali ’l barra mix-xtut tas-Somalja, b’mod partikolari billi jiskjeraw bastimenti tal-gwerra jew ajruplani militari, skont id-dritt internazzjonali, kif stabbilit fil-[Konvenzjoni tan-Nazzjonijiet Uniti dwar il-Liġi tal-Baħar, iffirmata f’Montego Bay fl-10 ta’ Diċembru 1982 ( 18 )]” ( 19 ).

49.

Lil hinn mill-aspett militari, din il-kooperazzjoni internazzjonali testendi sal-qasam tar-repressjoni tal-atti ta’ piraterija. Għaldaqstant, fir-Riżoluzzjoni 1816 (2008) tiegħu, il-Kunsill tas-Sigurtà talab “lill-Istati kollha, b’mod partikolari lill-Istati tal-bandiera, lill-Istati portwali u lill-Istati kostali, kif ukoll lill-Istati taċ-ċittadinanza tal-vittmi jew tal-awturi tal-atti ta’ piraterija jew ta’ serq bl-użu tal-armi u lill-Istati li għandhom ġurisdizzjoni skont id-dritt internazzjonali jew skont id-dritt intern tagħhom, sabiex jikkooperaw bl-għan li jiddeterminaw liema wieħed għandu jkollu ġurisdizzjoni u sabiex jieħdu l-miżuri mixtieqa ta’ investigazzjoni u ta’ prosekuzzjoni kontra l-awturi ta’ atti ta’ piraterija u ta’ serq bl-użu tal-armi mwettqa ’l barra mix-xtut tas-Somalja, skont id-dritt internazzjonali applikabbli, inkluż id-dritt internazzjonali tad-drittijiet tal-bniedem, u sabiex jissekondaw dawn l-isforzi, b’mod partikolari billi jipprovdu assistenza fil-qasam loġistiku u ta’ eżerċizzju tar-rimedji legali fir-rigward tal-persuni li jaqgħu taħt il-ġurisdizzjoni u l-kontroll tagħhom, bħalma huma l-vittmi, xhieda u persuni miżmuma fil-kuntest ta’ operazzjonijiet imwettqa skont din ir-riżoluzzjoni ( 20 )”.

50.

Il-Kunsill tas-Sigurtà għaldaqstant inkoraġġixxa t-tisħiħ tal-kooperazzjoni internazzjonali bl-għan ta’ repressjoni iktar effikaċi tal-atti ta’ piraterija, filwaqt li osserva bi tħassib “li n-nuqqas ta’ mezzi, l-assenza ta’ leġiżlazzjoni interna u l-inċertezzi dwar is-suġġett ta’ x’għandu jsir mill-pirati wara li dawn jinqabdu xekklu milli jingħata bidu għal azzjoni internazzjonali iktar vigoruża kontra l-pirati li jaġixxu ’l barra mix-xtut tas-Somalja, u f’ċerti każijiet, kellhom jilliberaw lill-pirati mingħajr ma jressquhom quddiem il-ġustizzja ( 21 )”.

51.

Sabiex timplementa r-riżoluzzjonijiet tal-Kunsill tas-Sigurtà u tipparteċipa fil-kooperazzjoni internazzjonali fil-qasam tal-ġlieda kontra l-piraterija, l-Unjoni adottat l-Azzjoni Konġunta. Din hija bbażata fuq l-Artikolu 14 UE, l-aħħar paragrafu tal-Artikolu 25 UE, u l-Artikolu 28(3) UE.

52.

L-Artikolu 1 tal-azzjoni konġunta, intitolat “Missjoni”, fil-paragrafu (1) tiegħu jipprovdi:

“L-Unjoni [...] għandha tmexxi operazzjoni militari b’appoġġ għar-Riżoluzzjonijiet 1814 (2008), [1816 (2008) u 1838(2008)] tal-Kunsill tas-Sigurtà [...] b’mod konsistenti ma’ azzjoni permessa fir-rigward tal-piraterija skont l-Artikolu 100 et seq tal-Konvenzjoni tan-Nazzjonijiet Uniti dwar il-Liġi tal-Baħar [...] u permezz, b’mod partikolari, ta’ impenji magħmula ma’ Stati terzi (“Atalanta”) sabiex jikkontribwixxu [...]:

53.

Skont l-Artikolu 2 tal-Azzjoni Konġunta, intitolat “Mandat”:

“Atalanta, bil-kondizzjonijiet stabbiliti mil-liġi internazzjonali applikabbli, b’mod partikolari tan-Nazzjonijiet Uniti dwar il-Liġi tal-Baħar, u mir-Riżoluzzjonijiet 1814 (2008), 1816 (2008) u 1838 (2008) tal-[Kunsill tas-Sigurtà], u fil-limitu tal-kapaċitajiet disponibbli tagħha, għandha:

[…]

[…]”

54.

L-Artikolu 10 tal-Azzjoni Konġunta, intitolat “Parteċipazzjoni ta’ Stati terzi”, huwa fformulat kif ġej:

“1.   Mingħajr preġudizzju għall-awtonomija tat-teħid ta’ deċiżjonijiet tal-[Unjoni] u għall-qafas istituzzjonali uniku, u skont il-linji gwida rilevanti tal-Kunsill Ewropew, Stati terzi jistgħu jiġu mistiedna jipparteċipaw fl-operazzjoni.

[…]

3.   L-arranġamenti dettaljati għall-parteċipazzjoni minn Stati terzi għandhom ikunu s-suġġett ta’ ftehimiet konklużi f’konformità mal-proċedura stabbilita fl-Artikolu 37 tat-Trattat. Fejn l-[Unjoni] u Stat terz ikunu kkonkludew ftehim li jistabbilixxi qafas għall-parteċipazzjoni ta’ dan tal-aħħar fl-operazzjonijiet ta’ maniġġar ta’ kriżijiet tal-[Unjoni], id-dispożizzjonijiet ta’ tali ftehim għandhom japplikaw fil-kuntest ta’ din l-operazzjoni.

[…]

6.   Il-kondizzjonijiet għat-trasferiment, lejn Stat terz li qed jipparteċipa fl-operazzjoni, tal-persuni li nqabdu u ġew miżmuma bil-ħsieb tal-eżerċizzju tal-kompetenza ġurisdizzjonali ta’ dan l-Istat, għandhom jiġu deċiżi mal-konklużjoni jew l-implimentazzjoni tal-istrumenti ta’ ftehim dwar il-parteċipazzjoni msemmija fil-paragrafu 3.”

55.

Fl-aħħar nett, għandu jiġi ċċitat l-Artikolu 12 tal-Azzjoni Konġunta 2008/851/PESK, intitolat “Trasferiment ta’ persuni li nqabdu u nżammu bil-ħsieb tal-eżerċizzju tal-kompetenzi ġurisdizzjonali”, li jgħid li:

“1.   Abbażi tal-aċċettazzjoni mis-Somalja tal-eżerċizzju ta’ ġurisdizzjoni minn Stati Membri jew Stati terzi, minn naħa, u l-Artikolu 105 tal-Konvenzjoni tan-Nazzjonijiet Uniti dwar il-Liġi tal-Baħar, min-naħa l-oħra, persuni suspettati li għandhom il-ħsieb, kif imsemmi fl-Artikolu 101 u 103 [tal-imsemmija konvenzjoni], li jikkommettu, li qed jikkommettu jew li kkommettew atti ta’ piraterija jew ta’ serq bl-użu tal-armi fl-ilmijiet territorjali tas-Somalja jew fl-ibħra internazzjonali, li jinqabdu u jinżammu, bil-ħsieb li ssirilhom prosekuzzjoni, u l-proprjetà li tkunu intużat biex jitwettqu dawn l-atti, għandhom jiġu ttrasferiti:

2.   Ebda persuna msemmija fil-paragrafu 1 ma tista’ tiġi ttrasferita fi Stat terz, jekk il-kondizzjonijiet ta’ dan it-trasferiment ma jkunux ġew deċiżi ma’ dan l-Istat terz b’mod konformi mal-liġi internazzjonali applikabbli, b’mod partikolari l-liġi internazzjonali dwar id-drittijiet tal-bniedem, biex jiġi garantit b’mod partikolari li ħadd ma jkun soġġett għall-piena tal-mewt, għat-tortura jew għal kwalunkwe trattament krudili, inuman jew degradanti.”

56.

Hekk kif tindika l-premessa 3 tad-deċiżjoni kkontestata, il-Ftehim ġie adottat sabiex jimplementa l-Artikolu 12 tal-azzjoni konġunta. Il-Ftehim jipprevedi wkoll il-modalitajiet tal-parteċipazzjoni ta’ Stat terz fl-operazzjoni Atalanta skont l-Artikolu 10(3) u (6) tal-azzjoni konġunta.

57.

Fil-kuntest tal-proċedura preżenti, xejn ma jikkontesta li, fid-dawl tal-għan tagħha u tal-kontenut tagħha, l-azzjoni konġunta taqa’ taħt il-PESK. Fl-opinjoni tiegħi, dan japplika wkoll fir-rigward tal-Ftehim u tad-deċiżjoni kkontestata li jikkostitwixxu l-estensjoni tagħha. Jien ma narax, b’mod partikolari, għal liema raġunijiet il-prinċipju stess ta’ parteċipazzjoni tal-Istati terzi fl-azzjoni tal-Unjoni intiża għad-dissważjoni, il-prevenzjoni u r-repressjoni tal-atti ta’ piraterija ’l barra mix-xtut tas-Somalja, kif ukoll ir-regola li tgħid li t-trasferiment lejn Stat terz tal-persuni arrestati huwa suġġett għall-kundizzjoni li dan l-Istat josserva d-dritt internazzjonali, u b’mod partikolari fil-qasam tad-drittijiet tal-bniedem, jaqgħu taħt il-PESK filwaqt li d-definizzjoni l-iktar preċiża tal-modalitajiet tat-trasferiment u tat-trattament tal-persuni kkonċernati toħroġ mill-qasam tal-PESK.

58.

Issa se nara fiex jikkonsisti preċiżament il-ftehim li miegħu tirrelata d-deċiżjoni kkontestata.

59.

Il-Ftehim jorganizza l-modalitajiet ta’ trasferiment tal-persuni ssuspettati b’atti ta’ piraterija u tal-oġġetti relatati mill-qawwa navali mqiegħda taħt id-direzzjoni tal-Unjoni Ewropea (l-Eunavfor) lejn ir-Repubblika tal-Mawrizju, jinkludi l-kundizzjonijiet tat-trattament u ta’ prosekuzzjoni ta’ dawn il-persuni u jippreċiża l-għajnuna mogħtija f’dan il-kuntest fir-Repubblika tal-Mawrizju mill-Eunavfor.

60.

L-Artikolu 1 tal-Ftehim, intitolat “Għan”, jipprovdi:

“Dan il-Ftehim jiddefinixxi l-kondizzjonijiet u l-modalitajiet għal

61.

L-Artikolu 3 tal-ftehim jelenka l-prinċipji ġenerali li jirregolaw il-modalitajiet u l-kundizzjonijiet ta’ trasferiment, lejn ir-Repubblika tal-Mawrizju, tal-persuni ssuspettati b’atti ta’ piraterija miżmuma mill-Eunavfor tal-oġġetti ssekwestrati minn din tal-aħħar. B’mod partikolari, huwa jipprevedi li t-trasferiment ta’ dawn il-persuni lejn l-awtoritajiet repressivi kompetenti tar-Repubblika tal-Mawrizju għandu jsir biss fuq deċiżjoni ta’ dawn tal-aħħar. Barra minn hekk, skont l-Artikolu 3(5) tal-Ftehim, “[k]walunkwe persuna ttrasferita għandha tiġi ttrattata b’mod uman u f’konformità mal-obbligi internazzjonali tad-drittijiet tal-bniedem, inkorporati fil-Kostituzzjoni [tar-Repubblika tal-]Mawrizju, inklużi l-projbizzjoni tat-tortura u t-trattament jew il-piena krudili, inumana u degradanti, il-projbizzjoni ta’ detenzjoni arbitrarja u f’konformità mar-rekwiżit għal proċess ġust”.

62.

L-Artikolu 4 tal-ftehim jinkludi r-regoli relattivi għat-trattament, għall-prosekuzzjoni u għas-smigħ tal-persuni ttrasferiti. Fost dawn ir-regoli jinsabu d-dritt li wieħed tingħatalu deċiżjoni f’terminu raġonevoli, id-dritt għal smigħ xieraq jew anki l-garanzija tal-preżunzjoni tal-innoċenza. Barra minn hekk, l-Artikolu 5 tal-Ftehim jipprevedi l-projbizzjoni tal-piena tal-mewt għall-persuni ttrasferiti.

63.

Min-naħa tiegħu, l-Artikolu 6 tal-ftehim jirrigwarda r-reġistri u n-notifikazzjonijiet. Huwa jipprevedi, b’mod partikolari, li l-Eunavfor għandha tipprovdi lir-Repubblika tal-Mawrizju bil-fajl ta’ żamma ta’ kull persuna ttrasferita, li r-Repubblika tal-Mawrizju hija responsabbli mill-istabbiliment ta’ fajl preċiż li jikkonċerna l-persuni ttrasferiti kollha, u li r-reġistri għandhom jibqgħu għad-dispożizzjoni tal-Unjoni Ewropea u tal-Eunavfor.

64.

Barra minn hekk, l-Artikolu 7 tal-Ftehim jispeċifika l-assistenza li l-Eunavfor għandha tipprovdi lir-Repubblika tal-Mawrizju għal finijiet ta’ investigazzjoni u ta’ prosekuzzjonijiet li jikkonċernaw lill-persuni ttrasferiti. L-Eunavfor b’hekk tassisti lir-Repubblika tal-Mawrizju f’dak li jikkonċerna, b’mod partikolari, il-kunsinna tar-rekords stabbiliti skont l-Artikolu 6(2) tal-Ftehim, it-trattament tal-provi u l-produzzjoni tax-xhieda jew tad-dikjarazzjonijiet, taħt ġurament, tax-xhieda.

65.

Fl-Artikolu 7(3) tal-Ftehim hemm previst li “[s]afejn tali riżorsi mhumiex ipprovduti permezz ta’ donaturi finanzjarji oħra, il-Partijiet għandhom jiżviluppaw, soġġett għall-proċeduri applikabbli, arranġamenti ta’ implimentazzjoni dwar assistenza finanzjarja, teknika u assistenza oħra biex jippermettu t-trasferiment, id-detenzjoni, l-investigazzjoni, il-prosekuzzjoni u l-proċess tal-persuni ttrasferiti. Dawn l-arranġamenti ta’ implimentazzjoni għandhom jimmiraw ukoll li jkopru l-assistenza teknika u loġistika [għar-Repubblika tal-]Mawrizju fl-oqsma tar-reviżjoni tal-leġislazzjoni, it-taħriġ tal-investigaturi u l-prosekuturi, il-proċeduri investigattivi u ġudizzjarji, u b’mod partikolari, l-arranġamenti għall-ħżin u l-għoti tal-evidenza u l-proċeduri tal-appell. Barra minn hekk, dawn l-arranġamenti ta’ implimentazzjoni għandhom jimmiraw li jipprovdu għar-ripatrijazzjoni tal-persuni ttrasferiti f’każ ta’ ħelsien mill-akkużi jew nonprosekuzzjoni, it-trasferiment tagħhom għat-tmiem tas-sentenza fi Stat ieħor jew ir-ripatrijazzjoni tagħhom wara li jiskontaw is- sentenza ta’ priġunerija tagħhom fil-Mawrizju”.

66.

Barra minn hekk, l-Artikolu 10(1) tal-Ftehim jindika li, “[g]ħall-finijiet tal-applikazzjoni ta’ dan il-Ftehim, kwistjonijiet operattivi, amministrattivi u tekniċi jistgħu jkunu s-suġġett ta’ arranġamenti implimentattivi li għandhom jiġu konklużi bejn l-awtoritajiet kompetenti [tar-Repubblika] tal-Mawrizju, minn naħa waħda, u l-awtoritajiet kompetenti tal-[Unjoni], kif ukoll l-awtoritajiet kompetenti tal-Istati Mittenti, min-naħa l-oħra”. Skont l-Artikolu 10(2)(f) tal-Ftehim, dawn il-modalitajiet ta’ applikazzjoni jistgħu b’mod partikolari jirrigwardaw “[il-provvista] ta’ appoġġ tekniku, għajnuna esperta, taħriġ u assistenza oħra msemmija fl-Artikolu 7 hawn fuq, fuq talba [tar-Repubblika] tal-Mawrizju sabiex jinkisbu l-objettivi ta’ dan il-ftehim”.

67.

Fl-aħħar nett, l-Artikolu 11(2) tal-Ftehim jipprovdi li dan “Dan il-Ftehim għandu jibqa’ fis-seħħ sa tmiem l-Operazzjoni [Atalanta] kif innotifikat mill-[Eunavfor]”.

68.

Minn din id-deskrizzjoni tal-azzjoni konġunta u mill-Ftehim jirriżulta li teżisti rabta mill-qrib bejn l-operazzjoni militari prevista minn din tal-ewwel u d-dispożizzjonijiet relattivi għat-trasferiment u għat-trattament tal-persuni ssuspettati b’atti ta’ piraterija li jinsabu fit-tieni wieħed.

69.

Il-ftehim li l-Unjoni tikkonkludi skont l-Artikoli 10(3) u 12(2) tal-azzjoni konġunta huma intiżi li jagħtu effett lir-riżoluzzjonijiet tal-Kunsill tas-Sigurtà fil-qasam tal-ġlieda kontra l-piraterija ’l barra mix-xtut tas-Somalja u għaldaqstant jipparteċipaw fil-kooperazzjoni internazzjonali f’dan il-qasam. L-azzjoni konġunta u l-Ftehim flimkien jikkostitwixxu tweġiba xierqa u koerenti għall-mistoqsijiet ifformulati mill-Kunsill tas-Sigurtà.

70.

Hekk kif tirrileva r-Repubblika Taljana, hija l-azzjoni konġunta li tipprevedi, sabiex tiggarantixxi s-suċċess tal-attività ta’ prevenzjoni u ta’ repressjoni tal-atti ta’ piraterija, li huwa indispensabbli li jiġu konklużi mal-Istati tar-reġjun il-ftehim neċessarji għall-involviment tagħhom, inklużi fl-eżerċizzju tal-ġurisdizzjoni fuq il-persuni ssuspettati. Il-Ftehim għaldaqstant jista’ jitqies li huwa miżura ta’ applikazzjoni tal-azzjoni konġunta, li dan jagħmel parti integrali minnha. F’dan ir-rigward għandu jiġi rrilevat li l-Artikolu 28(1) TUE jipprevedi li, “[m]eta s-sitwazzjoni internazzjonali teħtieġ azzjoni operattiva mill-Unjoni, l-Kunsill għandu jadotta d-deċiżjonijiet meħtieġa[, liema deċiżjonijiet] għandhom jistabbilixxu [...] l-kondizzjonijiet għall-implementazzjoni tagħhom”. Il-fatt li l-ftehim jagħmel parti integrali mill-kundizzjonijiet tal-implementazzjoni tal-azzjoni konġunta diġà jikkostitwixxi ħjiel serju tar-rabta tiegħu mal-PESK.

71.

Barra minn hekk, għandha ssir insistenza fuq il-fatt li l-ftehim ta’ trasferiment huma indispensabbli għall-implementazzjoni tajba u għall-effikaċja tal-operazzjoni militari stabbilita mill-azzjoni konġunta.

72.

Fil-fatt, hekk kif tindika r-Repubblika Franċiża, il-ġlieda kontra l-piraterija ma tillimitax ruħha għall-qbid ta’ bastimenti pirati ssuspettati iżda testendi ruħha sat-trasferiment u sal-għoti tas-sentenza fir-rigward tal-persuni ssuspettati b’atti ta’ piraterija. Għalhekk, minkejja li l-attivitajiet ta’ trasferiment u ta’ prosekuzzjoni tal-persuni ssuspettati koperti mill-Ftehim ma jaqgħux stricto sensu taħt l-attivitajiet militari, xorta waħda jibqa’ l-fatt li dawn l-attivitajiet huma intrinsikament marbuta mal-operazzjoni militari Atalanta.

73.

Il-missjoni Atalanta għandha bħala għan id-dissważjoni, il-prevenzjoni u r-repressjoni tal-atti ta’ piraterija. Fil-kuntest ta’ din il-missjoni, huwa neċessarju mhux biss li l-bastimenti jiġu protetti, iżda wkoll, jekk ikun il-każ, li jiġu arrestati l-persuni ssuspettati b’atti ta’ piraterija u li sussegwentement jitressqu quddiem l-awtoritajiet kompetenti. L-għan tal-mandat ikun diffiċli sabiex jitwettaq jekk il-persuni li jkunu wettqu atti ta’ piraterija ma jkunux jistgħu jkunu suġġetti għal prosekuzzjonijiet u għaldaqstant ikunu jistgħu jerġgħu jibdew bl-attivitajiet kriminali tagħhom immedjatament.

74.

Hekk kif enfasizzat ir-Repubblika Taljana, li kieku l-identifikazzjoni u l-qbid tal-persuni ssuspettati b’atti ta’ piraterija ma kinitx tissarraf fi smigħ kemm rapidu, effikaċi u li jirrispetta d-drittijiet tal-bniedem, l-azzjoni konġunta stess tkun nieqsa minn effett utli. Altrimenti hija ma jkollha ebda effett dissważiv u ma tkunx xierqa sabiex issolvi b’mod definittiv il-problema tal-piraterija ’l barra mix-xtut tas-Somalja.

75.

Il-ftehim bħal dak inkwistjoni fil-kawża preżenti huma essenzjali għat-twettiq tal-operazzjoni militari deċiża mill-Unjoni. Il-kontinwità bejn l-attivitajiet operazzjonali u l-attività ġudizzjarja ilha li ġiet identifikata bħala wieħed miċ-ċentri tal-gravità ta’ din l-operazzjoni militari. Mingħajr din il-kontinwità, il-prosekuzzjonijiet kontra l-pirati jsiru iktar diffiċli, jekk mhux impossibbli. L-effikaċja operazzjonali tal-attivitajiet għaldaqstant tiġi mhedda u l-effett dissważiv mistenni mill-azzjoni tal-Unjoni jitnaqqas kważi għal xejn xejn ( 22 ).

76.

Il-ġlieda kontra l-piraterija tinkludi dimensjoni importanti ta’ sigurtà u militari li bilfors għandha tkun akkumpanjata minn aspett repressiv u ġudizzjarju daqstant ieħor importanti ( 23 ). Dan huwa għaliex il-komunità internazzjonali impenjat ruħha fl-iffirmar ta’ ftehim ta’ trasferiment għall-finijiet ta’ għoti ta’ deċiżjoni ma’ Stati tar-reġjun ikkonċernat, fi spirtu ta’ qsim globali tal-piż u għal raġunijiet operazzjonali ta’ interess li jsir trasferiment għal x’imkien qrib tal-post ta’ fejn jitwettaq il-ksur ( 24 ).

77.

Barra minn hekk il-Parlament stess jirrikonoxxi, fir-riżoluzzjoni tiegħu tal-10 ta’ Mejju 2012 dwar il-piraterija marittima ( 25 ), li “l-issuktar tal-piraterija bl-impunità tkun ostakolu għad-deterrenza ( 26 )”.

78.

Mill-punti ta’ qabel dan jirriżulta li l-Ftehim huwa konformi mal-estensjoni tar-riżoluzzjonijiet tal-Kunsill tas-Sigurtà u tal-azzjoni konġunta, u li dan huwa intrinsikament marbut mat-twettiq tal-operazzjoni militari Atalanta. Issa ser naraw li l-għan imfittex mill-Ftehim jaqa’, bħall-azzjoni konġunta, fil-qasam tal-PESK.

79.

Mill-perspettiva tal-għan tagħhom, l-azzjoni konġunta u l-Ftehim huma strumenti li permezz tagħhom l-Unjoni implementat azzjoni deċiża fi ħdan il-Kunsill tas-Sigurtà u intiża li tippreżerva l-paċi u s-sigurtà internazzjonali. B’mod konformi ma’ dak li jipprevedu r-riżoluzzjonijiet tal-Kunsill tas-Sigurtà kif ukoll l-Artikolu 12(2) tal-azzjoni konġunta, il-Ftehim għandu, b’mod iktar partikolari, l-għan li jirrikonċilja l-ġlieda effikaċi kontra l-piraterija ’l barra mix-xtut tas-Somalja mar-rispett tad-drittijiet fundamentali.

80.

Il-piraterija ’l barra mix-xtut tas-Somalja tirrappreżenta theddida għas-sigurtà internazzjonali u għall-istabbiltà reġjonali. L-azzjoni tal-Unjoni hija intiża li tiġġieled kontra din il-forma ta’ kriminalità internazzjonali li kibret fl-oċean Indjan, b’mod partikolari ’l barra mix-xtut tas-Somalja u tal-Qarn tal-Afrika. Hekk kif il-Parlament irrileva, fir-riżoluzzjoni tiegħu tal-10 ta’ Mejju 2012 dwar il-piraterija marittima, iċċitata iktar ’il fuq, din “tikkostitwixxi theddida dejjem akbar għall-ħajja tal-persuni, għas-sikurezza tal-baħħara u ta’ persuni oħra, kif ukoll għall-iżvilupp reġjonali u għall-istabilità, l-ambjent tal-baħar, il-kummerċ dinji u kull-forma ta’ trasport marittimu u bastimenti ta’ kull tip, inklużi bastimenti tas-sajd, kif ukoll għat-twassil tal-għajnuna umanitarja ( 27 )”.

81.

L-azzjoni tal-Unjoni għaldaqstant hija intiża li tissalvagwardja s-sigurtà tan-navigazzjoni marittima f’din iż-żona ta’ tranżitu internazzjonali qawwi. Għalhekk, din l-azzjoni ssegwi għan ta’ protezzjoni tas-sigurtà internazzjonali ’l barra mix-xtut tas-Somalja. Hija tiffavorixxi wkoll l-istabbiltà u l-paċi fir-reġjun.

82.

Mill-perspettiva tal-Unjoni, il-paraliżi tat-traffiku marittimu fil-Baħar l-Aħmar u ’l barra mill-golf ta’ Aden tagħmel lill-piraterija problema strateġika. Fil-fatt, din hija rotta marittima meqjusa fundamentali għall-provvista tal-Ewropa. B’mod iktar wiesa’, il-mobilizzazzjoni fuq livell internazzjonali kontra l-atti ta’ piraterija turi li dawn jistgħu potenzjalment jolqtu l-bastimenti kummerċjali kollha li joriġinaw minn diversi partijiet tad-dinja u, għal din ir-raġuni, jikkostitwixxu theddida għall-paċi u s-sigurtà internazzjonali.

83.

Fl-opinjoni tiegħi, l-għan intiż li jiġġieled kontra l-piraterija ’l barra mix-xtut tas-Somalja sabiex tinżamm il-paċi u s-sigurtà nazzjonali, u dan b’mod konformi mad-drittijiet tal-bniedem, fil-kuntest ta’ kooperazzjoni internazzjonali mibdija mill-Kunsill tas-Sigurtà, jaqa’ taħt il-qasam tal-PESK.

84.

F’dan ir-rigward għandu jiġi osservat li tali għan jikkorrispondi għall-finalitajiet tal-azzjoni esterna tal-Unjoni kif inhuma elenkati b’mod iktar partikolari fl-Artikolu 21(2)(a) sa (c) u (h) TUE. Skont din id-dispożizzjoni:

“L-Unjoni għandha tiddefinixxi u twettaq politika u azzjonijiet komuni, u għandha taħdem sabiex tassigura grad għoli ta’ koperazzjoni fl-oqsma kollha tar-relazzjonijiet internazzjonali, sabiex:

[…]

85.

Huwa minnu li l-għanijiet elenkati fl-Artikolu 21(2) TUE jikkostitwixxu għanijiet orizzontali tal-azzjoni esterna tal-Unjoni, mingħajr ma wieħed jew l-ieħor huma espressament attribwiti għall-PESK. L-identifikazzjoni tal-għanijiet tal-PESK issir iktar diffiċli billi, minn naħa, l-Artikolu 23 TUE, li jinsab fil-Kapitolu 2 dwar id-dispożizzjonijiet tal-azzjoni esterna tal-Unjoni jagħmel riferiment għall-għanijiet orizzontali tal-azzjoni esterna tal-Unjoni msemmija fl-Artikolu 21(2) TUE u billi, min-naħa l-oħra, l-Artikolu 24(1) TUE jiddefinixxi b’mod partikolarment wiesa’ u ġenerali l-qasam tal-PESK. Fil-fatt, skont din id-dispożizzjoni, “[i]l-kompetenza ta’ l-Unjoni f’materji ta’ [PESK] għandha tkopri l-oqsma kollha tal-politika estera u l-kwistjonijiet kollha li għandhom x’jaqsmu mas-sigurtà ta’ l-Unjoni, inkluż it-tfassil progressiv ta’ politika ta’ difiża komuni, li tista’ twassal għal difiża komuni”.

86.

Madankollu huwa indispensabbli li jiġu ddefiniti l-limiti eżistenti bejn il-PESK u l-politiki l-oħra tal-Unjoni. Dan l-obbligu jirriżulta mill-applikazzjoni tal-klawżola tan-nuqqas ta’ assenjazzjoni reċiproka bejn il-kompetenzi tal-Unjoni fil-qasam tal-PESK u skont politiki oħra tal-Unjoni, prevista fl-Artikolu 40 TUE.

87.

Għal dan l-għan, qabelxejn għandu jiġi osservat li l-għanijiet imsemmija iktar ’il fuq tal-azzjoni esterna tal-Unjoni, jiġifieri dawk elenkati fl-Artikolu 21(2)(a) sa (c) u (h) TUE, jagħmlu parti minn dawk li tradizzjonalment huma assenjati lill-PESK. F’dan ir-rigward, jiena nosserva li l-għanijiet indikati f’din id-dispożizzjoni jikkorrispondu, essenzjalment, għal dawk li kienu assenjati lill-PESK, permezz tal-Artikolu 11(1) tat-Trattat UE, fil-verżjoni tiegħu ta’ qabel it-Trattat ta’ Lisbona.

88.

Sussegwentement, sa fejn l-Artikolu 21(2) TFUE jindika l-għanijiet komuni għall-azzjoni esterna tal-Unjoni, sabiex jiġi determinat ma’ liema politika tal-Unjoni għandu rabta b’mod partikolari tali jew tali għan, din id-dispożizzjoni għandha tinqara b’rabta mad-dispożizzjonijiet iktar speċifiċi applikabbli fil-kuntest ta’ kull politika.

89.

Fir-rigward, b’mod partikolari, tal-għan li jirrigwarda ż-żamma tal-paċi u t-tisħiħ tas-sigurtà internazzjonali, is-sentenza Il-Parlament vs Il-Kunsill, iċċitata iktar ’il fuq, hija favur l-irbit tiegħu mal-PESK.

90.

Fil-fatt, f’din is-sentenza, il-Qorti tal-Ġustizzja rabtet mal-qasam tal-PESK l-għan intiż li jiġġieled kontra t-terroriżmu internazzjonali u l-finanzjament tiegħu sabiex tiġi ppreżervata l-paċi u s-sigurtà fuq il-livell internazzjonali, billi bbażat ruħha mhux biss fuq l-Artikolu 21(2)(c) TUE, u l-ewwel subparagrafu tal-Artikolu 24(1) TFUE, iżda wkoll fuq l-Artikolu 43(1) TUE.

91.

Bħal fil-kawża li tat lok għall-imsemmija sentenza, il-fatt li l-ftehim jikkostitwixxi wieħed mill-istrumenti li permezz tagħhom l-Unjoni timplementa azzjoni b’orjentazzjoni internazzjonali suġġetta għal numru kbir ta’ riżoluzzjonijiet tal-Kunsill tas-Sigurtà u intiża, b’mod inkontestabbli, li tippreżerva l-paċi u s-sigurtà internazzjonali huwa element importanti sabiex wieħed jikkunsidra li dan il-ftehim jista’ jkun marbut mal-qasam tal-PESK ( 29 ).

92.

Skont l-Artikolu 37 TUE li, kif wieħed għandu jfakkar, jikkostitwixxi l-bażi legali materjali tad-deċiżjoni kkontestata, l-Unjoni tista’ tikkonkludi ftehim internazzjonali fl-oqsma kollha tal-PESK, inkluż għaldaqstant fil-qasam tal-Politika tas-Sigurtà u tad-Difiża Komuni (iktar ’il quddiem il-“PSDK”), li, hekk kif jindika l-Artikolu 42(1) TUE, tagħmel parti integrali mill-PESK.

93.

Issa, jiena nqis li, fir-rigward tal-estensjoni neċessarja tal-operazzjoni militari Atalanta, li ssegwi l-istess għan ta’ preżervazzjoni tal-paċi u tas-sigurtà nazzjonali, il-ftehim jagħmel parti mill-qasam tal-PSDK.

94.

Skont l-Artikolu 42(1) TUE, il-PSDK “tipprovdi lill-Unjoni b’kapaċità operattiva billi tagħmel użu minn riżorsi ċivili u militari. L-Unjoni tista’ tużahom f’missjonijiet barra mill-Unjoni għaż-żamma tal-paċi, għall-prevenzjoni ta’ konflitti u sabiex tissaħħaħ is-sigurtà internazzjonali skond il-prinċipji tal-Karta tan-Nazzjonijiet Uniti”.

95.

Il-kontenut tal-missjonijiet tal-PSDK huwa ppreċiżat fl-Artikolu 43(1) TUE, li jgħid li “[l-]missjonijiet previsti fl-Artikolu 42[(1)], li matulhom l-Unjoni tista’ tuża mezzi ċivili u militari, għandhom jinkludu operazzjonijiet konġunti ta’ diżarm, missjonijiet umanitarji u ta’ salvataġġ, missjonijiet ta’ għoti ta’ pariri u ta’ assistenza fi kwistjonijiet militari, missjonijiet ta’ prevenzjoni ta’ konflitti u taż-żamma tal-paċi, missjonijiet ta’ forzi ta’ kumbattiment fl-immaniġġar ta’ kriżijiet, inklużi l-missjonijiet għall-istabbiliment tal-paċi u għall-istabbilizzazzjoni wara l-konflitti. Dawn il-missjonijiet kollha jistgħu jikkontribwixxu għall-ġlieda kontra t-terroriżmu, inkluż bl-appoġġ għal pajjiżi terzi fil-ġlieda kontra t-terroriżmu fit-territorji tagħhom”.

96.

Il-Parlament jindika li huwa ma jifhimx fiex il-missjonijiet fdati lir-rappreżentanti tal-Unjoni u lill-Eunavfor bis-saħħa ta’ dan il-ftehim, bħalma huma t-trasferiment ta’ persuni u ta’ oġġetti, il-komunikazzjoni ta’ provi, l-iffaċilitar tal-prosekuzzjonijiet u tas-sentenzi, ir-reviżjoni tal-leġiżlazzjoni, it-taħriġ tal-investigaturi u l-provvista ta’ għajnuna finanzjarja, teknika, loġistika jew għajnuna oħra lir-Repubblika tal-Mawrizju, jistgħu jaqgħu taħt waħda mill-missjonijiet speċifiċi tal-PSDK imsemmija fl-Artikoli 42 TUE u 43 TUE. Anki jekk jaċċetta li dawn il-missjonijiet jistgħu jikkontribwixxu għall-għan ġenerali ta’ tisħiħ tas-sigurtà internazzjonali u huma marbuta mal-operazzjoni militari Atalanta, il-Parlament iqis li n-natura stess tagħhom u l-għanijiet speċifiċi tagħhom imorru lil hinn minn dawk li għalihom l-operazzjoni Atalanta ġiet stabbilita.

97.

Għall-kuntrarju, jiena nqis li l-elenkar tal-missjonijiet tal-PSDK li jinsabu fl-Artikolu 43(1) TUE huwa wiesa’ biżżejjed sabiex ikopri d-dispożizzjonijiet kollha tal-ftehim u sabiex, konsegwentement, jiġi kkunsidrat li dan jagħmel parti integrali minn missjoni li taqa’ taħt il-PSDK.

98.

Minkejja li wieħed għandu jikkunsidra li t-trasferiment tas-suspettati u l-għoti ta’ prosekuzzjonijiet kontrihom ma jikkostitwixxux, min-natura tagħhom, attivitajiet militari, għandu jiġi rrilevat li waħda mill-karatteristiċi importanti tal-PSDK, li tirriżulta b’mod ċar mill-Artikoli 42(1) TUE u 43(1) TUE, hija li l-użu ta’ mezzi militari ma għandux jiġi limitat billi jiġi previst ukoll l-użu ta’ mezzi ċivili, b’mod partikolari fil-kuntest ta’ missjonijiet ta’ ġestjoni ta’ kriżi ( 30 ).

99.

Skont il-Parlament, il-fatt li l-ftehim huwa intiż li jiġġieled kontra forma ta’ kriminalità, u dan permezz ta’ strumenti viċini ta’ dawk użati fil-qasam tal-kooperazzjoni tal-pulizija u tal-kooperazzjoni ġudizzjarja f’materji kriminali, fil-kuntest tat-Titolu V tat-tielet parti tat-Trattat FUE, dwar is-SLSĠ, ifisser li d-deċiżjoni kkontestata għandha wkoll tkun ibbażata fuq bażijiet legali li jinsabu f’dan it-Titolu, jiġifieri l-Artikoli 82 TFUE u 87 TFUE.

100.

Min-naħa tal-Kummissjoni, din issostni li l-għan prinċipali tal-ftehim huwa li jiġi evitat li l-Istati Membri kkonċernati jkollhom iwettqu l-proċeduri kriminali huma stess. Dan il-ftehim ikun jiffaċilita l-kooperazzjoni bejn l-awtoritajiet tal-Istati Membri u l-awtoritajiet tar-Repubblika tal-Mawrizju billi jinħoloq kuntest legali u prattiku għall-konsenja tas-suspettati lill-Istat terz kostali għall-finijiet ta’ investigazzjoni u ta’ prosekuzzjonijiet kriminali minn dan tal-aħħar. Minn dan isegwi li l-għan u l-kontenut tal-ftehim iġġustifikaw li l-Artikolu 82 TFUE jittieħed bħala bażi legali tal-konklużjoni tal-ftehim b’teħid inkunsiderazzjoni tan-natura tiegħu essenzjalment intiża għall-kooperazzjoni ġudizzjarja. Il-fatt li l-persunal militari jkun involut fl-applikazzjoni tal-ftehim ma jibdel xejn mill-konklużjonijiet li għalihom tasal il-Kummissjoni. Fil-fatt, sabiex tiġi ddeterminata l-bażi legali xierqa, in-natura jew il-kwalità tal-attur ma hijiex importanti, iżda min-naħa l-oħra, in-natura tal-attività proposta hija kruċjali.

101.

Fl-opinjoni tiegħi, l-argument tal-Parlament u tal-Kummissjoni huwa żbaljat.

102.

Insostenn tal-ewwel aspett tal-argument tiegħu, il-Parlament isostni li l-ġlieda kontra l-kriminalità ma hijiex l-għan jew il-missjoni speċifika tal-Unjoni fil-kuntest tal-PESK jew tal-PSDK, iżda qasam li jaqa’ taħt is-SLSĠ. Huwa jirrileva wkoll li hija biss il-ġlieda kontra t-terroriżmu li hija msemmija fl-Artikolu 43(1) TUE.

103.

Madankollu, l-indikazzjoni li tinsab f’din l-aħħar dispożizzjoni, li tgħid li l-missjonijiet tal-PSDK jistgħu jikkontribwixxu għall-ġlieda kontra t-terroriżmu, bl-ebda mod ma teskludi, fl-opinjoni tiegħi, li tali missjonijiet jistgħu wkoll jikkontribwixxu għall-ġlieda kontra forom oħra ta’ kriminalità.

104.

Barra minn hekk, kif ġustament jindika l-Kunsill, il-ġlieda kontra delitti internazzjonali li jikkostitwixxu theddid għas-sigurtà internazzjonali mwettqa barra mit-territorju tal-Unjoni, hija kwistjoni li taqa’ taħt il-PESK, inkluża, sa fejn tagħmel parti integrali minnha, il-PSDK tramite operazzjonijiet ta’ ġestjoni ta’ kriżi, jekk ikun il-każ.

105.

F’dan ir-rigward għandu jiġi osservat li l-Unjoni wettqet diversi missjonijiet ta’ riforma tas-settur tas-sigurtà fil-kuntest tal-PSDK, b’mod partikolari missjonijiet ċivili, sabiex tiffaċċja theddid għas-sigurtà, inkluż theddid li jirriżulta minn attivitajiet kriminali, kif ukoll ċertu numru ta’ missjonijiet tal-pulizija u ta’ missjonijiet “Stat tad-Dritt ( 31 )”. Issa, dawn il-missjonijiet ma ġewx, u fl-opinjoni tiegħi ġustament, ikkunsidrati bħala li jirrigwardaw is-SLSĠ. L-operazzjonijiet li jitwettqu fil-kuntest tal-imsemmija missjonijiet jistgħu jirrigwardaw iż-żamma jew l-istabbiliment mill-ġdid tal-ordni pubbliku. Il-kompiti previsti jistgħu, b’mod partikolari, jinkludu t-taħriġ u t-trawwim ta’ persunal tas-sigurtà kif ukoll l-għajnuna għat-tfassil ta’ liġijiet ( 32 ).

106.

L-argument żviluppat mill-Parlament u mill-Kummissjoni fil-verità juri li d-distinzjoni bejn il-PESK u d-dimensjoni esterna tas-SLSĠ teħtieġ li tiġi kjarifikata.

107.

Id-distinzjoni bejn dawn iż-żewġ politiki tal-Unjoni ssir diffiċli minħabba r-rabta doppja tal-ħtieġa tas-sigurtà magħhom ( 33 ). L-għanijiet ta’ salvagwardja tas-sigurtà tal-Unjoni u tat-tisħiħ tas-sigurtà internazzjonali huma assenjati lill-Unjoni bħala għanijiet tal-azzjoni esterna tagħha, skont l-Artikolu 21(2)(a) u (c) TUE. Fl-istess waqt, li jiġi żgurat livell għoli ta’ sigurtà huwa wkoll għan tas-SLSĠ, skont l-Artikolu 67(3) TFUE.

108.

Madankollu, il-kampijiet ta’ applikazzjoni rispettivi tal-PESK u tas-SLSĠ fid-dimensjoni esterna tagħha għandhom jiġu distinti sew.

109.

Kif jindika l-Kunsill, il-miżuri li jikkonċernaw is-SLSĠ, sew jekk dawn għandhom dimensjoni interna jew esterna, għandhom jittieħdu bl-għan li javvanzaw il-libertà, is-sigurtà u l-ġustizzja fl-Unjoni. L-Artikolu 67(1) TFUE fil-fatt jipprevedi li “[l-]Unjoni għandha tikkonsisti fi [SLSĠ]”, u dan huwa wkoll rifless fl-Artikolu 3(2) TUE. Għalhekk, skont din l-aħħar dispożizzjoni, “[l‑]Unjoni għandha toffri liċ-ċittadini tagħha [SLSĠ] mingħajr fruntieri interni, li fih il-moviment liberu tal-persuni jkun assigurat flimkien ma’ miżuri xierqa f’dak li jirrigwarda l-kontrolli tal-fruntieri esterni, l-asil, l-immigrazzjoni kif ukoll il-prevenzjoni tal-kriminalità u l-ġlieda kontriha”.

110.

Il-ħolqien tas-SLSĠ favur iċ-ċittadini tal-Unjoni jeħtieġ l-eżerċizzju, mill-Unjoni, tal-kompetenza esterna tagħha ( 34 ). Pereżempju, l-Artikolu 79(3) TFUE jagħti lill-Unjoni kompetenza esterna espliċita sabiex tikkonkludi ftehim ta’ ammissjoni mill-ġdid. Barra minn hekk, abbażi tal-Artikolu 216 TFUE, l-Unjoni tista’ tikkonkludi ftehim internazzjonali fil-qasam tal-kooperazzjoni tal-pulizija jew ġudizzjarja, b’mod partikolari meta dan jirriżulta neċessarju għat-twettiq ta’ għan proprju tas-SLSĠ.

111.

Huwa għaldaqstant mill-għanijiet stabbiliti fl-Artikolu 3(2) TUE u fl-Artikolu 67 TFUE li wieħed jista’ jidentifika liema hija d-dimensjoni esterna tas-SLSĠ. Fi kliem ieħor, id-dimensjoni esterna tas-SLSĠ hija funzjonali u strumentali fir-rigward tal-għanijiet espressi f’dawn id-dispożizzjonijiet ( 35 ). Il-politiki interni u esterni fil-qasam tas-SLSĠ huma marbuta b’mod inseparabbli. Sabiex wieħed jiddefinixxi x’jikkostitwixxi l-aspett estern fil-qasam tas-SLSĠ, għandu jittieħed kont, b’mod prijoritarju, tal-funzjonijiet politiċi interni tas-SLSĠ ( 36 ).

112.

Minn dan isegwi li, minkejja li l-kostruzzjoni ta’ dan l-ispazju tista’ teħtieġ azzjoni esterna min-naħa tal-Unjoni, hemm bżonn, sabiex ftehim ikun jista’ jitqies li jaqa’ taħt is-SLSĠ, li huwa jkollu rabta mill-qrib mal-libertà, is-sigurtà u l-ġustizzja fi ħdan l-Unjoni. Fi kliem ieħor, ir-rabta mas-SLSĠ tiġġustifika ruħha meta tkun teżisti rabta diretta bejn l-għan ta’ sigurtà interna tal-Unjoni u l-kooperazzjoni ġudizzjarja u/jew tal-pulizija li hija żviluppata barra mill-Unjoni. Għall-kuntrarju, azzjoni tal-Unjoni għandha tkun marbuta mal-PESK meta l-għan tagħha jkun qabelxejn il-paċi, l-istabbiltà u l-iżvilupp demokratiku f’reġjun barra mill-Unjoni ( 37 ).

113.

Id-distinzjoni, ċertament, ma hijiex dejjem evidenti, u dan tant huwa minnu li l-iżvilupp ta’ forma ta’ kriminalità f’reġjun partikolari jista’ jikkostitwixxi perikolu kemm għas-sigurtà interna tal-Unjoni u kif ukoll għall-istabbiltà tar-reġjun ikkonċernat ( 38 ). Kif jirriżulta b’mod partikolari mill-Programm ta’ Stokkolma ( 39 ), adottat mill-Kunsill Ewropew fl-2010, is-sigurtà interna u s-sigurtà esterna huma inseparabbli. Huwa essenzjali li t-theddid jiġi indirizzat, inkluż dak li jinsab ’il bogħod mill-kontinent tagħha, u dan għall-protezzjoni tal-Ewropa u ċ-ċittadini tagħha ( 40 ).

114.

Xorta waħda jibqa’ l-fatt, fil-fehma tiegħi, li, peress li quddiemna għandna azzjoni tal-Unjoni li tagħmel parti minn approċċ ta’ kooperazzjoni internazzjonali mibdija mill-Kunsill tas-Sigurtà u li huwa intiż li qabelxejn tiġi miġġielda theddida li taffettwa l-paċi u s-sigurtà internazzjonali, din l-azzjoni għandha tiġi adottata fil-kuntest tal-PESK.

115.

Issa, f’dan il-każ, il-Ftehim, li rajna li jagħmel parti mill-kuntest ta’ azzjoni deċiża fuq livell internazzjonali u li huwa intiż li jiġġieled kontra atti ta’ piraterija ’l barra mix-xtut tas-Somalja sabiex jiġu żgurati l-paċi u s-sigurtà internazzjonali f’din iż-żona, fl-opinjoni tiegħi ma jkoprix sitwazzjoni li għandha rabta suffiċjenti mal-kostruzzjoni tas-SLSĠ.

116.

Kuntrarjament għal dak li jsostni l-Parlament, il-fatt li l-Ftehim jipprevedi forma ta’ kooperazzjoni bejn l-Eunavfor u l-awtoritajiet repressivi tar-Repubblika tal-Mawrizju, u li jkopri attivitajiet li jixbhu lil attivitajiet ta’ natura eżekuttiva jew ġudizzjarja, ma jikkostitwixxix element suffiċjenti ta’ rabta mas-SLSĠ.

117.

Fil-fehma tiegħi, huwa żbaljat li wieħed jgħid li, hekk kif it-trattament ġudizzjarju jinsab involut, dan huwa biżżejjed sabiex wieħed jintroduċi l-azzjoni tal-Unjoni fil-qasam tal-kamp tal-politika dwar is-SLSĠ, hawnhekk fid-dimensjoni esterna tagħha. Fil-fatt, il-PESK tista’ tinvolvi l-użu ta’ mezzi ta’ infurzar tal-liġi jew ġudizzjarji sabiex tippermetti li l-għanijiet tagħha jintlaħqu. L-użu ta’ tali strumenti ma huwiex, fih innifsu, determinanti sakemm dawn jintużaw sabiex iservu l-għan taż-żamma tal-paċi u tas-sigurtà internazzjonali, li inkontestabbilment jagħmel parti mill-PESK kif rajna, u mhux mill-għan proprju tas-SLSĠ.

118.

Il-missjonijiet mibdija mill-Unjoni fil-kuntest tal-PSDK huma xhieda tal-fatt li l-istrumenti tradizzjonali tas-SLSĠ jistgħu jiġu mobilizzati favur għanijiet tal-PESK. Għalhekk, il-missjonijiet internazzjonali deċiżi mill-Unjoni sabiex tiżgura ż-żamma tal-paċi, il-prevenzjoni tal-kunflitti u t-tisħiħ tas-sigurtà internazzjonali huma ffaċilitati mill-possibbiltà li wieħed jirrikorri għal mezzi ċivili, bħalma huwa t-tisħiħ tas-sistema ġudizzjarja u tad-dipartimenti tal-pulizija tal-Istati terzi kkonċernati ( 41 ). L-aspett estern tas-SLSĠ huwa għaldaqstant assorbit mill-eżerċizzju tal-kompetenza ta’ politika barranija tal-Unjoni favur għanijiet tal-PESK ( 42 ).

119.

Fl-aħħar nett nenfasizza li l-konstatazzjoni li tgħid li l-Ftehim huwa intiż li jipproteġi d-drittijiet tal-persuni ssuspettati b’atti ta’ piraterija, bħalma jirreferi għal ftehim futur tal-partijiet sabiex jiġu ddeterminati l-modalitajiet tal-assistenza teknika u loġistika pprovduta mill-Unjoni lir-Repubblika tal-Mawrizju għall-finijiet, b’mod partikolari, tar-reviżjoni tal-leġiżlazzjoni tagħha, tat-taħriġ tal-investigaturi u tar-rappreżentanti tal-prosekutur pubbliku, tal-proċedura ta’ investigazzjoni u tal-proċedura ġudizzjarja, ma tippermettix li dan il-ftehim jidħol fil-qasam tas-SLSĠ. Fil-fatt, dawn il-komponenti tal-ftehim huma intiżi li jiggarantixxu l-protezzjoni tad-drittijiet tal-bniedem u l-konsolidazzjoni tal-istat tad-dritt, li jagħmlu parti mill-għanijiet tal-PESK. F’dan ir-rigward, ikun paradossali li r-rieda tal-partijiet għall-ftehim li jiġi żgurat li r-ripressjoni effikaċi tal-atti ta’ piraterija ma ssirx għad-detriment tad-drittijiet fundamentali tal-awturi tagħhom tikkontribwixxi sabiex dan il-ftehim joħroġ mill-qasam tal-PESK, li, bħall-politiki l-oħra tal-Unjoni, hija suġġetta għar-rispett tad-drittijiet fundamentali.

120.

L-operazzjoni militari mwettqa mill-Unjoni twassal neċessarjament għall-arrest tal-awturi ta’ atti ta’ piraterija. Li jiġu ddefiniti l-modalitajiet li skonthom dawn il-persuni għandhom jiġu ttrattati wara l-arrest tagħhom u liema destin huwa riżervat għalihom evidentement jagħmel parti mill-operazzjoni fiha nfisha. Issa, l-uniku trattament tal-persuni arrestati li huwa konformi mal-liġi huwa l-prosekuzzjoni. F’din il-perspettiva, li jiġi permess, lill-Istati li lilhom jiġu kkunsinnati l-pirati, li jagħmlu mod li l-proċeduri tagħhom ikunu konformi mad-dritt internazzjonali tad-drittijiet tal-bniedem jikkostitwixxi l-aħħar fażi iżda l-fażi essenzjali tal-operazzjoni militari mwettqa fil-kuntest tal-PESK.

121.

Mill-elementi preċedenti jirriżulta li huwa b’mod korrett li l-Kunsill qies, meta adotta d-deċiżjoni kkontestata, li din ma kinitx taqa’ taħt is-SLSĠ fid-dimensjoni esterna tagħha u li għaldaqstant ma kellux isir użu minn waħda mill-bażijiet legali relatati ma’ din il-politika tal-Unjoni.

122.

Fl-opinjoni tiegħi, il-Ftehim lanqas ma jinkludi komponenti relattivi għall-kooperazzjoni fl-iżvilupp li ġġustifika l-użu ta’ bażi legali li tidher fil-ħames parti, Titolu III, Kapitolu 1 tat-Trattat FUE.

123.

Fis-sentenza tagħha tal-20 ta’ Mejju 2008, Il-Kummissjoni vs Il-Kunsill ( 43 ), il-Qorti tal-Ġustizzja ddeċidiet li “sabiex miżura konkreta li tirrigwarda l-ġlieda kontra l-proliferazzjoni ta’ armi żgħar u ta’ kalibru żgħir tkun tista’ tiġi adottata mill-Komunità fil-kuntest tal-politika tagħha ta’ kooperazzjoni għall-iżvilupp, din il-miżura għandha taqa’, kemm minħabba l-għan kif ukoll minħabba l-kontenut tagħha, fil-kamp ta’ applikazzjoni tal-kompetenzi li t-Trattat KE jattribwilha f’dan il-qasam ( 44 )”. Skont il-Qorti tal-Ġustizzja, “[d]an ma jkunx il-każ meta tali miżura, anke jekk tikkontribwixxi għall-iżvilupp ekonomiku u soċjali ta’ pajjiż li qiegħed jiżviluppa, ikollha bħala għan prinċipali l-implementazzjoni tal-P[E]SK ( 45 )”.

124.

Issa, rajna li hija fil-fatt il-PESK li tikkostitwixxi ċ-ċentru tal-gravità tal-ftehim u tad-deċiżjoni kkontestata.

125.

Skont it-tieni subparagrafu tal-Artikolu 208(1) TFUE “[l-]objettiv prinċipali tal-politika ta’ koperazzjoni għall-iżvilupp ta’ l-Unjoni għandu jkun it-tnaqqis u, eventwalment, il-qerda tal-faqar”.

126.

Kif jirrileva l-Kunsill, l-Artikolu 208(1) TFUE wettaq fokalizzazzjoni mill-ġdid tal-kamp ta’ applikazzjoni tal-kooperazzjoni għall-iżvilupp, b’mod li l-element essenzjali tal-politika tal-iżvilupp tal-Unjoni jkun it-tnaqqis u l-eliminazzjoni tal-povertà. Barra minn hekk, l-aħħar sentenza tat-tieni subparagrafu tal-Artikolu 208(1) TFUE tippreċiża li “[l-]Unjoni għandha tieħu in kunsiderazzjoni l-objettivi ta’ koperazzjoni għall-iżvilupp fl-implimentazzjoni tal-politika li x’aktarx tolqot lill-pajjiżi li qed jiżviluppaw”. Il-politiki l-oħra tal-Unjoni, bħall-PESK, għaldaqstant għandhom jieħdu kont tal-għanijiet tal-kooperazzjoni għall-iżvilupp u għaldaqstant jistgħu jikkontribwixxu fiha, liema fatt huwa konformi mar-rekwiżit ta’ koerenza tal-azzjoni esterna tal-Unjoni. Konsegwentement, is-sempliċi fatt li miżura li taqa’ taħt il-PESK tista’ tipproduċi effetti pożittivi li jinċidu fuq l-iżvilupp ta’ Stat terz ma jagħmilhiex miżura li taqa’ taħt il-kamp ta’ applikazzjoni tal-kooperazzjoni għall-iżvilupp fis-sens tal-Artikolu 208 TFUE.

127.

Ċertament, taħt l-influwenza tat-trattati li ppreċedew it-Trattat ta’ Lisbona, il-Qorti tal-Ġustizzja interpretat b’mod relattivament wiesa’ l-kamp kopert mill-kooperazzjoni għall-iżvilupp ( 46 ). Tali interpretazzjoni wiesgħa madankollu għandha ċerti limiti. B’mod partikolari għandha tiġi stabbilita distinzjoni bejn il-miżuri intiżi għall-iżvilupp u dawk li jsegwu għanijiet oħra tal-Unjoni, bħal dawk tal-PESK. F’dan il-kuntest, it-tisħiħ tal-kapaċitajiet ta’ deċiżjoni tar-Repubblika tal-Mawrizju ma huwiex għan fih innifsu, iżda huwa intiż li jrażżan b’mod effikaċi atti ta’ piraterija li jikkostitwixxu theddida għall-paċi u għas-sigurtà internazzjonali, u dan b’osservanza tad-drittijiet fundamentali tal-awturi ta’ dawn l-atti.

128.

Kull assistenza pprovduta taħt dan il-Ftehim, b’mod partikolari dik imsemmija fl-Artikolu 7(2) u (3) tiegħu, tkun tirrigwarda t-trasferiment tal-persuni ssuspettati b’atti ta’ piraterija, b’għan ta’ repressjoni effikaċi tal-atti ta’ piraterija, u fuq il-kapaċità tar-Repubblika tal-Mawrizju li tapplika l-ftehim skont id-dritt internazzjonali dwar id-drittijiet tal-bniedem. Nosserva, barra minn hekk, li l-provvista, imsemmija fl-Artikolu 10(2)(f) tal-Ftehim, ta’ għajnuna teknika, ta’ kompetenza, ta’ taħriġ jew ta’ kull forma oħra ta’ assistenza msemmija fl-Artikolu 7 tal-istess ftehim, hija msemmija biss“sabiex jinkisbu l-objettivi [tal-imsemmi] ftehim”. L-assistenza prevista mill-Ftehim għaldaqstant ma tmurx lil hinn mill-għanijiet li għalihom l-operazzjoni Atalanta ġiet stabbilita. Għaldaqstant, din bl-ebda mod ma għandha bħala għan l-iżvilupp tar-Repubblika tal-Mawrizju u, għaldaqstant, ma tikkostitwixxix miżura ta’ żvilupp li taqa’ taħt l-Artikoli 208 TFUE u 209 TFUE.

129.

It-tip ta’ assistenza ma hijiex determinanti u ebda wieħed ma jappartjeni, min-natura tiegħu, għall-kooperazzjoni fl-iżvilupp ( 47 ). F’dan ir-rigward, assistenza bħalma hija “l-assistenza teknika u loġistika [għar-Repubblika tal‑]Mawrizju fl-oqsma tar-reviżjoni tal-leġislazzjoni, it-taħriġ tal-investigaturi u l-prosekuturi, il-proċeduri investigattivi u ġudizzjarji ( 48 )” tista’ perfettament tiġi pprovduta fil-kuntest tal-PESK, u b’mod partikolari fil-kuntest tal-PSDK kif rajna iktar ’il quddiem, sabiex tiġi żgurata s-sigurtà u jiġu promossi d-drittijiet tal-bniedem u l-istat tad-dritt.

130.

Minn dawn il-kunsiderazzjonijiet jirriżulta li, peress li, fil-Ftehim, ma nistax insib komponenti dwar il-kooperazzjoni fl-iżvilupp, id-deċiżjoni kkontestata ġustament ġiet ibbażata fuq l-Artikolu 37 TUE mingħajr ma kienet appoġġata minn bażi legali li taqa’ taħt il-kooperazzjoni fl-iżvilupp.

131.

Billi d-deċiżjoni kkontestata kienet ġustament fondata unikament fuq bażi legali dwar il-PESK, il-ftehim relatat magħha għandu jitqies li huwa jikkonċerna esklużivament il-PESK fis-sens tat-tieni subparagrafu tal-Artikolu 218(6) TFUE. L-adozzjoni tad-deċiżjoni ta’ konklużjoni ta’ dan il-ftehim għaldaqstant la teħtieġ l-approvazzjoni u lanqas il-konsultazzjoni tal-Parlament.

132.

Permezz tat-tieni motiv tiegħu, il-Parlament jikkritika lill-Kunsill li ma “[informahx] immedjatament u kompletament fl-istadji kollha tal-proċedura”, kuntrarjament għal dak li jeħtieġ l-Artikolu 218(10) TFUE.

133.

B’mod prinċipali, il-Kunsill isostni li l-motiv huwa inammissibbli sa fejn, fir-rigward ta’ ftehim li jikkonċerna esklużivament il-PESK, il-Qorti tal-Ġustizzja ma hijiex kompetenti sabiex tivverifika jekk huwa osservax jew le l-obbligu ta’ informazzjoni previst f’din id-dispożizzjoni. Sussidjarjament, fil-każ fejn il-Qorti tal-Ġustizzja tiddikjara ruħha li għandha ġurisdizzjoni sabiex tivverifika l-osservanza, mill-Kunsill, tal-imsemmija dispożizzjoni, dan isostni li ma jista’ jikkritikaha b’ebda ksur tal-Artikolu 218(10) TFUE.

134.

Skont it-tieni subparagrafu tal-Artikolu 24(1) TUE, il-Qorti tal-Ġustizzja “m’għandhiex ikollha ġurisdizzjoni fir-rigward [tad-dispożizzjonijiet dwar il-PESK], ħlief għall-kompetenza tagħha li tissorvelja l-konformità ma’ l-Artikolu 40 [TUE] u sabiex tikkontrolla l-legalità ta’ ċerti deċiżjonijiet previsti fit-tieni subparagrafu ta’ l-Artikolu 275 [TFUE]”.

135.

Barra minn hekk, l-ewwel paragrafu tal-Artikolu 275 TFUE jippreċiża li l-Qorti tal-Ġustizzja ma għandhiex ġurisdizzjoni “fir-rigward ta’ l-atti adottati abbażi [tad-dispożizzjonijiet dwar il-PESK]”. Madankollu, skont it-tieni subparagrafu tal-Artikolu 275 TFUE, “il-Qorti għandha tkun kompetenti sabiex timmonitorja r-rispett taa’ l-Artikolu 40 tat-[TUE] u sabiex tiddeċiedi dwar rikorsi, mressqa skond il-kondizzjonijiet stabbiliti fir-raba’ subparagrafu ta’ l-Artikolu 263 [TFUE] dwar il-legalità ta’ deċiżjonijiet li jipprovdu miżuri restrittivi kontra persuni fiżiċi jew ġuridiċi adottati mill-Kunsill abbażi tal-Kapitolu 2 tat-Titolu V tat-Trattat [UE]”.

136.

Minn dawn id-dispożizzjonijiet jirriżulta li, minkejja li n-nuqqas ta’ ġurisdizzjoni tal-Qorti tal-Ġustizzja fil-qasam tal-PESK tibqa’ r-regola, din ma taħrabx totalment mill-viġilanża tal-qorti tal-Unjoni.

137.

Huwa stabbilit li l-Artikolu 218 TFUE jistabbilixxi r-regoli dwar in-negozjar u l-konklużjoni tal-ftehim internazzjonali kollha. B’mod partikolari, ir-regola prevista fl-Artikolu 218(10) TFUE li tgħid li “[l-]Parlament [...] għandu jinżamm informat immedjatament u kompletament fl-istadji kollha tal-proċedura” tapplika għall-oqsma kollha tad-dritt tal-Unjoni. Minkejja li din id-dispożizzjoni għaldaqstant hija orjentata sabiex tapplika b’mod partikolari f’dak li jikkonċerna l-ftehim internazzjonali konklużi mill-Unjoni fil-qasam tal-PESK, din bl-ebda mod ma hija dispożizzjoni li tikkonċerna l-PESK, fis-sens tat-tieni subparagrafu tal-Artikolu 24(1) TUE u l-ewwel paragrafu tal-Artikolu 275 TFUE. Dan l-ewwel motiv ta’ ġurisdizzjoni għaldaqstant għandu jiġi eskluż.

138.

Barra minn hekk, anki jekk id-deċiżjoni kkontestata tikkostitwixxi ċertament, kif rajna iktar ’il quddiem, att adottat, minn perspettiva materjali, abbażi tad-dispożizzjonijiet dwar il-PESK, fis-sens tal-ewwel paragrafu tal-Artikolu 275 TFUE, minn dan madankollu ma jirriżultax, fl-opinjoni tiegħi, li l-Qorti tal-Ġustizzja għandha tiddikjara ruħha bħala li ma għandhiex ġurisdizzjoni sabiex tistħarreġ l-osservanza, mill-Kunsill, ta’ modalità proċedurali, bħalma hija dik prevista fl-Artikolu 218(10) TFUE, li hija applikabbli għall-ftehim internazzjonali kollha u li l-applikazzjoni tagħha għall-ftehim internazzjonali konklużi fil-qasam tal-PESK ma hijiex eskluża b’mod espress.

139.

Minkejja li l-prinċipju ta’ ġurisdizzjoni tal-Qorti tal-Ġustizzja għall-istħarriġ tal-osservanza, mill-Kunsill, tal-Artikolu 218(10) TFUE għaldaqstant għandu, fil-fehma tiegħi, jintlaqa’, xorta waħda jibqa’ l-fatt li, fil-kuntest tal-istħarriġ tagħha, meta din tkun tinsab fil-preżenza ta’ ftehim li jikkonċerna esklużivament il-PESK kif inhu l-każ fil-kawża preżenti, il-Qorti tal-Ġustizzja għandha tieħu kont tan-natura speċifika tar-regoli u tal-proċeduri li għalihom hija suġġetta l-PESK, hekk kif jirriżulta mit-tieni subparagrafu tal-Artikolu 24(1) TUE.

140.

Ċertament, hekk kif il-Qorti tal-Ġustizzja fakkret fis-sentenza Il-Parlament vs Il-Kunsill, iċċitata iktar ’il fuq, “[i]l-parteċipazzjoni tal-Parlament fil-proċess leġiżlattiv hija r-riflessjoni, fuq il-livell Komunitarju, ta’ prinċipju demokratiku fundamentali, li l-popli jipparteċipaw fl-eżerċizzju tas-setgħa permezz tal-intermedarju ta’ assemblea rappreżentattiva ( 49 )”. Madankollu, fl-istess waqt, il-Qorti tal-Ġustizzja setgħet biss tikkonstata li l-awturi tat-Trattat ta’ Lisbona kienu għamlu l-għażla li jagħtu “rwol iktar limitat lill-Parlament fir-rigward tal-azzjoni tal-Unjoni fil-kuntest tal-PESK ( 50 )”.

141.

Issa, waħda mir-regoli u l-proċeduri speċifiċi fil-qasam tal-PESK hija li, skont it-tieni subparagrafu tal-Artikolu 218(6) TFUE, l-approvazzjoni jew il-konsultazzjoni tal-Parlament ma humiex meħtieġa meta l-ftehim inkwistjoni jikkonċerna esklużivament il-PESK.

142.

Minn dan jirriżulta, fil-fehma tiegħi, li l-modalitajiet u l-preċiżjoni tal-informazzjoni li minnhom għandu jibbenefika l-Parlament skont l-Artikolu 218(10) TFUE ma jistgħux ikunu l-istess skont jekk il-ftehim inkwistjoni jikkonċernax esklużivament jew le l-PESK. Fi kliem ieħor, jiena naħseb li l-Kunsill jista’ leġittimament jinħtieġ jipprovdi b’mod iktar rapidu u iktar dettaljat, lill-Parlament, informazzjoni dwar ftehim internazzjonali meta din l-istituzzjoni tintalab tagħti l-approvazzjoni jew tintalab tiġi kkonsultata skont it-tieni subparagrafu tal-Artikolu 218(6) TFUE, milli meta ebda approvazzjoni u ebda konsultazzjoni tal-Parlament ma tkun meħtieġa. Fil-fatt, sabiex jagħti opinjoni informata, il-Parlament bilfors għandu jkollu informazzjoni ddettaljata biżżejjed u f’temp utli, u huwa jkun ġustifikat jirrifjuta li jagħti l-approvazzjoni tiegħu għad-deċiżjoni ta’ konklużjoni ta’ ftehim fl-assenza ta’ din l-informazzjoni.

143.

F’kull każ, il-verifika, mill-Qorti tal-Ġustizzja, tal-osservanza mill-Kunsill tal-obbligu ta’ informazzjoni previst fl-Artikolu 218(10) TFUE għaldaqstant għandha, fl-opinjoni tiegħi, issir b’teħid inkunsiderazzjoni tan-natura tal-ftehim ikkonċernat u tas-setgħat li l-Parlament għandu, bis-saħħa tat-tieni subparagrafu tal-Artikolu 218(6) TFUE, sabiex jinfluwenza l-kontenut materjali ta’ dan il-ftehim.

144.

Minkejja dan, li wieħed jaċċetta li l-intensità tal-obbligu ta’ informazzjoni previst fl-Artikolu 218(10) TFUE tista’ tvarja skont l-involviment li minnu jgawdi l-Parlament fil-proċedura relattiva għall-konklużjoni ta’ ftehim internazzjonali, ma għandux iwassal sabiex wieħed jaċċetta li l-Parlament jiġi mċaħħad minn informazzjoni suffiċjenti meta l-ftehim ikkonċernat ikun jikkonċerna esklużivament il-PESK. Infakkar, fil-fatt, li, minkejja li dan jista’ jvarja skont il-każ, l-obbligu ta’ informazzjoni previst fl-Artikolu 218(10) TFUE japplika b’mod ġenerali, inkluż għaldaqstant fil-qasam tal-PESK.

145.

Barra minn hekk, wieħed ma għandux jinsa li, minkejja li għandu rwol limitat fil-qasam tal-PESK, u biss meta ftehim ikun jikkonċerna esklużivament il-PESK, il-Parlament madankollu għandu dritt ta’ skrutinju fuq din il-politika, hekk kif jirriżulta b’mod partikolari mill-Artikolu 36 TUE ( 51 ).

146.

Issa ser nara f’liema mumenti l-Parlament ġie informat bin-negozjati u l-konklużjoni tal-ftehim.

147.

Fit-22 ta’ Marzu 2010, il-Kunsill awtorizza lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà sabiex jiftaħ negozjati sabiex jiġu konklużi ftehim ta’ trasferiment ma’ diversi Stati terzi, fosthom ir-Repubblika tal-Mawrizju.

148.

Permezz ta’ ittra tal-istess jum, il-Kunsill informa lill-President tal-Parlament b’din id-deċiżjoni, billi indikalu li huwa ser iżommu informat, meta jasal il-waqt, bil-konklużjoni tal-ftehim ta’ trasferiment inkwistjoni.

149.

In-negozjati wasslu, fit-12 ta’ Lulju 2011, għall-adozzjoni tad-deċiżjoni kkontestata, li permezz tagħha l-Kunsill awtorizza l-iffirmar tal-Ftehim.

150.

Il-Ftehim ġie ffirmat fl-14 ta’ Lulju 2011.

151.

Id-deċiżjoni kkontestata u l-Ftehim ġew ippubblikati f’Il-Ġurnal Uffiċjali tal-Unjoni Ewropea fit-30 ta’ Settembru 2011.

152.

Permezz ta’ ittra tas-17 ta’ Ottubru 2011, il-Kunsill informa lill-President tal-Parlament bl-adozzjoni tad-deċiżjoni kkontestata u bl-iffirmar tal-Ftehim.

153.

Il-Parlament jikkritika lill-Kunsill, minn naħa, li ma żammux informat matul il-fażi ta’ negozjati tal-Ftehim u, min-naħa l-oħra, li stenna iktar minn tliet xhur qabel ma informah bid-deċiżjoni kkontestata u l-Ftehim.

154.

Fl-opinjoni tiegħi, dawn l-ilmenti ma humiex ta’ natura li jwasslu għall-annullament tad-deċiżjoni kkontestata.

155.

Fil-fatt, l-ewwel nett, jiena nqis li l-Artikolu 218(10) TFUE jimplika metodu effettiv ta’ informazzjoni min-naħa tal-Kunsill lill-Parlament. B’hekk, l-obbligu ta’ informazzjoni previst f’din id-dispożizzjoni ma jistax, fil-fehma tiegħi, jitqies li huwa sodisfatt bis-sempliċi pubblikazzjoni f’Il-Ġurnal Uffiċjali tal-Unjoni Ewropea ta’ deċiżjoni tal-Kunsill. Issa, jiena nikkonstata li l-Kunsill informa lill-President tal-Parlament dwar il-ftuħ tan-negozjati, u sussegwentement dwar l-adozzjoni tad-deċiżjoni kkonstatata u dwar l-iffirmar tal-Ftehim b’mod dirett u personali.

156.

It-tieni nett, kif indikajt iktar ’il quddiem, il-Kunsill ma jistax jinħtieġ, meta l-ftehim ikkonċernat ikun jikkonċerna esklużivament il-PESK, li jinforma lill-Parlament b’mod daqstant dettaljat milli jekk l-approvazzjoni jew il-konsultazzjoni ta’ dan tal-aħħar kienu meħtieġa. B’mod partikolari, sa fejn il-Parlament ma kienx mitlub jagħti l-opinjoni tiegħu fuq il-kontenut tal-ftehim, li huwa jiġi informat dwar l-iżvilupp tan-negozjat ma kienx obbligatorju.

157.

It-tielet nett, fir-rigward tat-terminu ta’ tliet xhur li għadda qabel ma d-deċiżjoni kkontestata u l-Ftehim ġew ikkomunikati mill-Kunsill lill-Parlament, jiena nosserva li kien iktar konformi mal-ispirtu tal-Artikolu 218(10) TFUE li l-Parlament jiġi informat qabel il-pubblikazzjoni tad-deċiżjoni kkontestata u l-Ftehim f’Il-Ġurnal Uffiċjali tal-Unjoni Ewropea. Madankollu, fid-dawl tal-fatt li t-terminu inkwistjoni, għal raġunijiet esposti iktar ’il quddiem li juru li l-ftehim inkwistjoni jikkonċerna esklużivament il-PESK, la jikkawża preġudizzju lill-prerogattivi tal-Parlament u lanqas ma seta’ jkollu impatt fuq il-kontenut tal-Ftehim, jiena nqis li l-kundizzjonijiet sabiex wieħed jikkonstata ksur tal-Artikolu 218(10) TFUE ma humiex sodisfatti.

158.

Fid-dawl tal-kunsiderazzjonijiet kollha li ssemmew iktar ’il fuq, nipproponi li l-Qorti tal-Ġustizzja jogħġobha: