|
27.10.2012 |
MT |
Il-Ġurnal Uffiċjali tal-Unjoni Ewropea |
C 331/11 |
Sentenza tal-Qorti tal-Ġustizzja (It-Tieni Awla) tas-6 ta’ Settembru 2012 (talba għal deċiżjoni preliminari tal-Administratīvā rajona tiesa — il-Latvja) — Laimonis Treimanis vs Valsts ieņēmumu dienests
(Kawża C-487/11) (1)
(Regolament (KEE) Nru 918/83 - Artikoli 1(2)(c), 2 u 7(1) - Eżenzjoni mid-dazji fuq l-importazzjoni ta’ proprjetà personali - Kunċett ta’ ‘proprjetà intiża għall-bżonnijiet tal-familja’ - Vettura bil-mutur importata fit-territorju tal-Unjoni - Vettura użata minn membru tal-familja tal-proprjetarju li jkun wettaq l-importazzjoni)
(2012/C 331/17)
Lingwa tal-kawża: il-Latvjan
Qorti tar-rinviju
Administratīvā rajona tiesa
Partijiet fil-kawża prinċipali
Rikorrent: Laimonis Treimanis
Konvenuta: Valsts ieņēmumu dienests
Suġġett
Talba għal deċiżjoni preliminari — Administratīvā rajona tiesa Rīgas tiesu nams — Interpretazzjoni tal-Artikolu 7(1) tar-Regolament tal-Kunsill (KEE) Nru 918/83, tat-28 ta’ Marzu 1983, li jwaqqaf sistema Komunitarja ta’ eżenzjoniiet minn dazju doganali (ĠU Edizzjoni Speċjali bil-Malti, Kapitolu 2, Vol. 1, p. 419) — Eżenzjoni mid-dazji fuq l-importazzjoni ta’ proprjetà personali — Kunċett ta’ familja — Vettura bil-mutur li ntużat għall-bżonnijiet tal-familja fi Stat terz — Importazzjoni tal-imsemmija vettura mill-proprjetarju tagħha, residenti prinċipalment fi Stat terz, ġewwa Stat Membru tal-Unjoni Ewropea għall-finijiet tal-użu tagħha bla ħlas minn membru tal-familja tal-proprjetarju li ttrasferixxa r-residenza tiegħu f’dan l-Istat Membru wara li għamel parti mill-istess dar tal-proprjetarju qabel l-importazzjoni tal-vettura
Dispożittiv
L-Artikoli 2 u 7(1) tar-Regolament tal-Kunsill (KEE) Nru 918/83, tat-28 ta’ Marzu 1983, li jwaqqaf sistema Komunitarja ta’ eżenzjonijiet minn dazju doganali, għandhom jiġu interpretati fis-sens li tista’ tiġi importata b’eżenzjoni mid-dazji fuq l-importazzjoni vettura bil-mutur għal użu privat importata minn Stat terz fit-territorju doganali tal-Unjoni Ewropea bil-kundizzjoni li l-importatur ikun effettivament ittrasferixxa r-residenza normali tiegħu fit-territorju doganali tal-Unjoni Ewropea, ħaġa li għandha tiġi vverifikata mill-qorti nazzjonali. Il-vettura bil-mutur użata bla ħlas minn membru tal-familja ta’ dan l-importatur, jiġifieri persuna li tgħix taħt l-istess saqaf bħalu jew fil-parti l-kbira hija dipendenti fuqu, ħaġa li hija l-qorti nazzjonali li għandha tivverifika, hija kkunsidrata bħala intiża għall-bżonnijiet tal-familja tal-importatur, u dan l-użu ma jipprekludix il-benefiċċju ta’ din l-eżenzjoni.