—

għal Celaya Emparanza y Galdos Internacional SA, minn J. L. Gracia Albero, F. Rodríguez Domínguez, F. Miazetto u S. Ferrandis González, abogados,

—

għall-Gvern Pollakk, minn M. Laszuk kif ukoll minn I. Žarski u M. Szpunar, bħala aġenti,

—

għall-Kummissjoni Ewropea, minn F. Wenzel Bulst u R. Vidal Puig, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 19(1) tar-Regolament tal-Kunsill (KE) Nru 6/2002, tat-12 ta’ Diċembru 2001, dwar id-disinji Komunitarji (ĠU Edizzjoni Speċjali bil-Malti, Kapitolu 13, Vol. 27, p. 142).

2

Din it-talba tressqet fil-kuntest ta’ kawża bejn Celaya Emparanza y Galdos Internacional SA (iktar ’il quddiem “Cegasa”) u Proyectos Integrales de Balizamiento SL (iktar ’il quddiem “PROIN”) dwar proċedimenti ta’ vjolazzjoni ppreżentati minn Cegasa.

3

Mill-premessa 5 tar-regolament jirriżulta li l-għan tiegħu huwa l-“ħolqien ta’ disinn Komunitarju li jkun jista’ jiġi applikat f’kull wieħed mill-Istati Membri” sabiex “jinkiseb disinn wieħed għal żona waħda li tikkomprendi l-Istati Membri kollha”.

4

Il-premessa 18 tar-Regolament tistabbilixxi:

“Disinn Komuntarju rreġistrat jeħtieġ il-ħolqien u ż-żamma fl-ordni ta’ reġistru li fih għandhom jiġu rreġistrati dawk l-applikazzjonijiet kollha li jħarsu l-kondizzjonijiet formali u li jkunu ġew assenjati data għall-infilzar. Din is-sistema ta’ reġistrazzjoni ma għandhiex fil-prinċipju tkun imsejsa fuq eżami sostantiv dwar il-konformità mal-ħtiġiet għall-protezzjoni qabel ir-reġistrazzjoni, hekk li b’hekk iżżomm għal minimu fuq l-applikanti l-piż tar-reġistrazzjoni u piżijiet oħra.”

5

Skont l-Artikolu 1(2)(b) tar-Regolament, disinn Komunitarju huwa protett bħala “‘disinn Komunitarju rreġistrat’, jekk magħmul disponibbli għall-pubbliku fil-manjiera pprovduta f’dan ir-Regolament”.

6

L-Artikolu 1(3) tar-Regolament jistabbilixxi:

“Disinn Komunitarju għandu jkollu karattru unitarju. Għandu jkollu effett egwali fil-Komunità kollha. Ma jistax jiġi rreġistrat, ittrasferit jew ċedut jew ikun is-suġġett ta’ deċiżjoni li tiddikjarah invalidu, u lanqas ma jista’ jiġi pprojbit l-użu tiegħu, għajr rigward il-Komunità kollha. Dan il-prinċipju u l-implikazzjoni tiegħu għandhom japplikaw għajr jekk ipprovdut xorta oħra f’dan ir-Regolament.”

7

Skont l-Artikolu 3(a) tar-Regolament:

“[…] ‘disinn’ ifisser

8

L-Artikolu 4(1) tar-Regolament jistabbilixxi:

“Disinn għandu jiġi protett b’disinn Komunitarju safejn u sakemm ikun ġdid u jkollu karattru individwali.”

9

Skont l-Artikolu 5(1)(b) tar-Regolament, disinn Komunitarju rreġistrat huwa meqjus bħala ġdid jekk l-ebda disinn identiku ma jkun ġie żvelat lill-pubbliku “qabel id-data ta’ l-infilzar ta’ l-applikazzjoni għar-reġistrazzjoni tad-disinn li għalih ikun hemm talba għall-protezzjoni, jew, jekk ikun hemm talba dwar il-prijorità, id-data tal-prijorità”.

10

L-Artikolu 6(1)(b) tar-Regolament jistabbilixxi li disinn Komunitarju rreġistrat huwa meqjus bħala li għandu karattru individwali jekk l-impressjoni ġenerali li jħalli fuq utent informat tkun differenti mill-impressjoni ġenerali fuq tali utent minn kull disinn li jkun ġie żvelat għall-pubbliku “qabel id-data ta’ l-infilzar ta’ l-applikazzjoni għar-reġistrazzjoni jew, jekk ikun hemm talba dwar il-prijorità, id-data tal-prijorità”.

11

L-Artikolu 10 tar-Regolament, intitolat “Skop tal-protezzjoni”, jistabbilixxi fil-paragrafu 1 tiegħu:

“L-iskop tal-protezzjoni kkonferita b’disinn Komunitarju għandu jinkludi kull disinn li ma jħallix impressjoni ġenerali differenti fuq l-utent informat.”

12

L-Artikolu 19 tar-Regolament, intitolat “Drittijiet ikkonferiti bid-disinn Komunitarju”, jistabbilixxi:

“1.   Disinn Komunitarju rreġistrat għandu jikkonferixxi fuq il-pussessur tiegħu id-dritt esklużiv li jużah u jipprevjeni kull parti terza li ma jkollhiex il-kunsens tiegħu milli tużah. L-użu msemmi hawn fuq għandu jkopri, b’mod partikolari, l-għemil, l-offerta, it-tqegħid fis-suq, l-importazzjoni, l-esportazzjoni jew l-użu ta’ prodott li fih ikun inkorporat id-disinn jew li jiġi applikat fih jew il-ħażna ta’ dan il-prodott għal dawn l-għanijiet.

2.   Disinn Komunitarju mhux irreġistrat għandu, madankollu, jikkonferixxi fuq il-pussessur tiegħu d-dritt li jipprevjeni l-atti riferiti fil-paragrafu 1 biss jekk l-użu kkontestat jirriżulta għaliex ikun ġie kkupjat id-disinn protett.

L-użu kkontestat ma għandux jitqies li jirriżulta mill-kopja tad-disinn protett jekk jirriżulta minn xogħol indipendenti ta’ kreazzjoni minn disinjatur li jista’ jiġi raġonevolment maħsub li ma kienx familjari mad-disinn magħmul disponibbli għall-pubbliku mid-disinjatur.

[…]”

13

It-Taqsima 5 tat-Titolu II tar-regolament, intitolat “Invalidità”, tiġbor fi ħdanha l-Artikoli 24 sa 26 ta’ dan tal-aħħar.

14

Skont l-Artikolu 24(1) tar-Regolament:

“Disinn Komunitarju rreġistrat għandu jiġi ddikjarat invalidu fuq applikazzjoni lill-Uffiċċju skond il-proċedura fit-Titoli VI u VII jew minn qorti tad-disinji Komunitarji fuq il-bażi ta’ kontrotalba fil-proċeduri tal-kontravenzjonijiet.”

15

L-Artikolu 25 tar-regolament, intitolat “Raġunijiet għall-invalidità”, jistabbilixxi fil-paragrafu 1(d) tiegħu, li disinn Komunitarju jista’ jiġi ddikjarat invalidu biss, b’mod partikolari, “jekk disinn Komunitarju jkun f’konflitt ma’ disinn minn qabel”.

16

It-Titolu 5 tar-Regolament, intitolat “Proċedura ta’ reġistrazzjoni” huwa kkostitwit mill-Artikoli 45 sa 50 ta’ dan tal-aħħar.

17

L-Artikolu 45 tar-Regolament, intitolat “Eżami rigward il-ħtiġiet formali għall-infilzar”, jistabbilixxi fil-paragrafu 2 tiegħu:

“L-[UASI] għandu jeżamina jekk:

18

L-Artikolu 47 tar-Regolament, intitolat “Raġunijiet għan-nuqqas tal-kapaċità tar-reġistrazzjoni”, jistabbilixxi fil-paragrafu 1 tiegħu:

“Jekk l-[UASI], fit-twettiq ta’ l-eżami skond l-Artikolu 45, jinnota illi d-disinn li għalih tkun qiegħda titfittex il-protezzjoni:

għandu jirrifjuta l-applikazzjoni.”

19

Skont l-Artikolu 48 tar-regolament “[j]ekk ikunu twettqu l-ħtiġiet illi għandha tissodisfa applikazzjoni għal disinn Komunitarju rreġistrat u safejn u sakemm din l-applikazzjoni ma tkunx ġiet irrifjutata bis-saħħa ta’ l-Artikolu 47, l-[UASI] għandu jirreġistra l-applikazzjoni fir-Reġistru tad-disinji Komunitarji […]”.

20

It-Titolu VI tar-Regolament, intitolat “Iċ-ċediment u l-invalidità ta’ disinni rreġistrati”, huwa kkostitwit mill-Artikoli 41 sa 54 ta’ dan tal-aħħar.

21

L-Artikolu 52 tar-Regolament, intitolat “Applikazzjoni għal dikjarazzjoni ta’ l-invalidità”, jistabbilixxi fil-paragrafu 1 tiegħu, li “kull persuna naturali jew legali, kif ukoll awtorità pubblika mogħtija s-setgħa li tagħmel dan, jistgħu jissottomettu lill-[UASI] applikazzjoni għal dikjarazzjoni ta’ l-invalidità ta’ disinn Komunitarju rreġistrat”.

22

It-Titolu IX tar-Regolament, intitolat “Il-ġurisdizzjoni u l-proċedura legali fil-kawżi li jkollhom x’jaqsmu mad-disinji Komunitarji”, jiġbor fi ħdanu l-Artikoli 80 sa 92 tar-regolament.

23

Skont l-Artikolu 81 tar-Regolament:

“il-qrati tad-disinni Komunitarji għandhom il-ġurisdizzjoni esklużiva rigward:

24

L-Artikolu 85 tar-Regolament, intitolat “Preżunzjoni tad-difiża ta’ validità rigward il-merti tagħha”, jistabbilixxi fil-paragrafu 1 tiegħu:

“Fil-proċeduri rigward kawża ta’ kontravenzjoni jew kawża dwar kontravenzjoni mhedda dwar disinn Komunitarju, il-qorti tad-disinji Komunitarji għandu jittratta d-disinn Komunitarju bħala validu. Il-validità tista’ tiġi sfidata biss b’kontrotalba għal dikjarazzjoni ta’ l-invalidità. Madankollu, talba li jkollha x’taqsam ma’ l-invalidità ta’ disinn Komunitarju, sottomessa xorta oħra għajr bħala kontrotalba, għandha tkun ammissbbli safejn u sakemm il-konvenut jagħmel talba illi d-disinn Komunitarju jista’ jiġi ddikjarat invalidu minħabba dritt iktar bikri ta’ disinn nazzjonali, fit-tifsira ta’ l-Artikolu 25(1)(d), li jappartjeni lilu.”

25

Cegasa hija d-detentur ta’ disinn Komunitarju rreġistrat taħt in-numru N 000421649-0001, kompost minn bollard iddestinat biex iservi bħala sinjal għat-traffiku. Dan id-disinn ġie ppreżentat quddiem l-UASI fis-26 ta’ Ottubru 2005 u ppubblikat fir-reġistru tad-disinni Komunitarji fit-13 ta’ Diċembru 2005.

26

Fl-aħħar tas-sena 2007, PROIN ikkummerċjalizzat il-bollard li jservi bħala sinjal H-75. Peress li dan il-bollard ma kienx jipproduċi impressjoni globali differenti minn dik ta’ disinn Komunitarju rreġistrat taħt in-numru N 000421649-0001, Cegasa extraġudizzjarjament talbet lil PROIN, f’Jannar 2008, biex twaqqaf il-vjolazzjoni. Din tal-aħħar innegat il-vjolazzjoni, iżda impenjat ruħha li tagħmel xi tibdiliet fid-disinn tagħha. F’Marzu 2008, Cegasa tenniet quddiem PROIN it-talba tagħha biex titwaqqaf il-vjolazzjoni.

27

Fil-11 ta’ April 2008, PROIN ippreżentat quddiem l-UASI applikazzjoni għal reġistrazzjoni ta’ disinn Komunitarju kompost minn bollard iddestinat biex iservi bħala sinjal għat-traffiku. Dan id-disinn ġie ppubblikat fir-reġistru tad-disinni Komunitarji fis-7 ta’ Mejju 2008 taħt in-numru N 000915426-001.

28

Il-qorti tar-rinviju tqis li l-bollard ċilindriku kkummerċjalizzat minn PROIN huwa riproduzzjoni ta’ disinn Komunitarju rreġistrat taħt in-numru N 000421649-0001 ta’ Cegasa, sa fejn dan il-bollard ma jipproduċix fuq l-utent informat impressjoni globali differenti minn dik prodotta minn dan id-disinn. Madankollu, hija tippreċiża li l-ebda talba għal dikjarazzjoni ta’ invalidità tad-disinn Komunitarju rreġistrat taħt in-numru N 000915426-001 ma tressqet minn Cegasa.

29

Min-naħa l-oħra, Cegasa ppreżentat quddiem il-Juzgado de lo Mercantil n° 1 de Alicante y n° 1 de Marca Comunitaria proċedimenti ta’ vjolazzjoni ta’ disinn Komunitarju rreġistrat, billi ssostni li l-offerta, il-promozzjoni, il-pubbliċità, it-taħżin, il-kummerċjalizzazzjoni u d-distribuzzjoni ta’ sinjal tat-toroq H-75 minn PROIN jikkostitwixxu ksur tad-drittijiet irrikonoxxuti lilha mir-regolament bħala d-detentur tad-disinn Komunitarju rreġistrat taħt in-numru N 000421649-0001.

30

PROIN opponiet l-imsemmija proċedimenti ta’ vjolazzjoni. Hija sostniet, b’mod partikolari, li Cegasa ma għandhiex il-locus standi fi proċedimenti ta’ vjolazzjoni fir-rigward tad-disinn Komunitarju tagħha, sa fejn il-bollard li jservi bħala sinjal ikkummerċjalizzat minn PROIN huwa riproduzzjoni ta’ disinn Komunitarju li huwa wkoll irreġistrat. Ghalhekk, hija sostniet li, sakemm l-imsemmija reġistrazzjoni ma ġietx invalidata, id-detentur tagħha jibbenefika minn dritt ta’ użu abbażi tar-regolament b’mod li l-użu tal-imsemmi dritt ma jistax jitqies li huwa vjolazzjoni.

31

F’dawn iċ-ċirkustanzi, il-Juzgado de lo Mercantil n°1 de Alicante y n°1 de Marca Comunitaria ddeċidiet li tissospendi l-proċeduri u li tistaqsi lill-Qorti tal-Ġustizzja d-domandi preliminari segwenti:

32

Preliminarjament, għandu jiġi rrilevat li r-regolament ma jinkludix regoli li espressament jirreferu għall-possibbiltà, għal detentur ta’ disinn Komunitarju rreġistrat qabel, li jippreżenta proċedimenti ta’ vjolazzjoni kontra d-detentur ta’ disinn Komunitarju rreġistrat wara.

33

Madankollu, għandu jiġi kkonstatat li kliem l-Artikolu 19(1) tar-Regolament ma jagħmilx differenza skont jekk it-terz huwa d-detentur ta’ disinn Komunitarju rreġistrat jew jekk ma huwiex id-detentur.

34

Għalhekk, skont l-imsemmija dispożizzjoni, id-disinn Komunitarju rreġistrat jagħti lill-proprjetarju tiegħu d-dritt esklużiv li jużah u li jipprojbixxi lil “kull parti terza” milli jużah mingħajr il-kunsens tiegħu.

35

Bl-istess mod, il-paragrafu 10(1) tar-Regolament jistabbilixxi li l-protezzjoni mogħtija mid-disinn Komunitarju tinkludi “kull disinn li ma jħallix impressjoni ġenerali differenti fuq l-utent informat”.

36

Minn dawn id-dispożizzjonijiet jirriżulta li r-regolament ma jeskludix li d-detentur ta’ disinn Komunitarju rreġistrat jippreżenta proċedimenti ta’ vjolazzjoni li jkunu intiżi biex jipprojbixxu l-użu ta’ disinn Komunitarju rreġistrat wara li ma jipproduċix fuq l-utent informat impressjoni viżiva globali differenti.

37

Ċertament, kif il-Gvern Pollakk irrileva fl-osservazzjonijiet tiegħu ppreżentati lill-Qorti tal-Ġustizzja, id-detentur ta’ disinn Komunitarju rreġistrat, bħala regola ġenerali, igawdi huwa wkoll minn dritt esklużiv ta’ użu tad-disinn tiegħu.

38

Madankollu, dan il-fatt ma huwiex ta’ natura li jqiegħed inkwistjoni l-interpretazzjoni tal-kunċett ta’ “kull parti terza”, fis-sens tal-Artikolu 19(1) tar-Regolament, bħala li jinkludi terz detentur ta’ disinn Komunitarju li jkun ġie rreġistrat wara.

39

F’dan ir-rigward, għandu jitfakkar li, kif il-Kummissjoni Ewropea sostniet fl-osservazzjonijiet tagħha, id-dispożizzjonijiet tar-Regolament għandhom jiġu interpretati fid-dawl tal-prinċipju ta’ prijorità, li abbażi tiegħu d-disinn Komunitarju rreġistrat qabel għandu jipprevali fuq id-disinni Komunitarji rreġistrati wara.

40

Mill-Artikolu 4(1) tar-Regolament jirriżulta b’mod partikolari li l-protezzjoni ta’ disinn minn disinn Komunitarju hija żgurata biss sa fejn dan ikun ġdid u jippreżenta karattru individwali. Issa, fil-każ ta’ kunflitt bejn żewġ disinni Komunitarji rreġistrati, dak irreġistrat fl-ewwel lok huwa meqjus bħala li jissodisfa dawn il-kundizzjonijiet biex jikseb il-protezzjoni Komunitarja qabel dak irreġistrat fit-tieni lok. Għalhekk, id-detentur ta’ disinn jew mudell Komunitarju rreġistrat wara jista’ jingħata l-protezzjoni li r-Regolament jagħtih biss jekk juri n-nuqqas tal-imsemmija kundizzjonijiet fil-kontenut tad-disinn Komunitarju rreġistrat qabel permezz ta’ azzjoni għal dikjarazzjoni ta’ invalidità, jew jekk ikun il-każ permezz ta’ azzjoni rikonvenzjonali.

41

F’dan il-kuntest, u kif l-Avukat Ġenerali rrileva fil-punti 32 u 33 tal-konklużjonijiet tiegħu, għandhom jiġu kkunsidrati l-aspetti essenzjali tal-proċedura għal reġistrazzjoni tad-disinni Komunitarji stabbilita bir-Regolament.

42

Fil-fatt, abbażi ta’ din il-proċedura, irregolata bl-Artikoli 45 sa 48 tar-Regolament, l-UASI teżamina l-konformità ta’ applikazzjoni mal-kundizzjonijiet proċedurali marbuta mal-preżentazzjoni, bħalma huwa previst bir-Regolament. Jekk l-applikazzjoni tissodisfa l-imsemmija kundizzjonijiet, tissodisfa d-definizzjoni ta’ disinn imsemmi fl-Artikolu 3(a) tar-regolament u ma tiksirx l-ordni pubbliku jew il-moralità, l-UASI jdaħħal l-applikazzjoni fir-reġistru tad-disinni Komunitarji bħala disinn Komunitarju rreġistrat.

43

Madankollu, dan huwa kontroll prima facie li huwa ta’ natura essenzjalment formali, li, kif indikat fil-premessa 18 tar-Regolament, ma jeħtieġx eżami dwar il-mertu li huwa intiż li jiddetermina qabel ma ssir ir-reġistrazzjoni jekk disinn jissodisfax il-kundizzjonijiet għall-kisba tal-protezzjoni u li, barra minn hekk, kuntrarjament għall-proċedura ta’ reġistrazzjoni skont ir-Regolament (KE) tal-Kunsill Nru 207/2009, tas-26 ta’ Frar 2009, dwar it-trade mark Komunitarja (ĠU L 78, p. 1), ma jipprovdix għal fażi li tippermetti lill-proprjetarju ta’ disinn irreġistrat qabel biex jopponi r-reġistrazzjoni.

44

F’dawn iċ-ċirkustanzi, hija biss interpretazzjoni tal-kunċett ta’ “kull parti terza”, fis-sens tal-Artikolu 19(1) tar-regolament, bħala li tinkludi terz detentur ta’ disinn Komunitarju rreġistrat wara li tista’ tiggarantixxi kemm l-għan imfittex mir-Regolament ta’ protezzjoni effikaċi tad-disinni Komunitarji rreġistrati, kif ukoll l-effettività tal-proċedimenti ta’ vjolazzjoni.

45

Barra minn hekk, din il-konklużjoni ma hija b’ebda mod kontradetta mill-fatt li r-Regolament ma jagħtix lill-qrati tad-disinni Komunitarji l-ġurisdizzjoni biex jiddeċiedu talbiet għal dikjarazzjoni ta’ invalidità tad-disinni Komunitarji rreġistrati u jistabbilixxi, fl-Artikolu 85 tiegħu, li dawn il-qrati għandhom, fil-proċeduri li jirriżultaw mill-proċedimenti ta’ vjolazzjoni jew minn theddida ta’ vjolazzjoni, iqisu lid-disinn Komunitarju rreġistrat bħala validu.

46

F’dan ir-rigward, għandu jiġi enfasizzat li r-Regolament jagħmel distinzjoni ċara, fost il-proċedimenti dwar id-disinni Komunitarji rreġistrati, bejn dawk fil-qasam ta’ vjolazzjoni u dawk fil-qasam tal-invalidità.

47

Fir-rigward, minn naħa, il-proċedimenti fil-qasam tal-vjolazzjoni, l-Artikolu 81 tar-regolament jagħti lill-qrati tad-disinni Komunitarji l-ġurisdizzjoni esklużiva biex jiddeċiedu dawn il-kawżi. Fil-kuntest ta’ dawn il-proċedimenti, l-imsemmija qrati jeżaminaw biss jekk inkisirx id-dritt esklużiv ta’ użu li r-Regolament jagħti lid-detentur ta’ disinn Komunitarju rreġistrat.

48

Fir-rigward, min-naħa l-oħra, it-talbiet għal dikjarazzjoni ta’ invalidità ta’ disinni Komunitarji rreġistrati, ir-Regolament għażel li jiċċentralizza l-ipproċessar tagħhom għand l-UASI, fejn dan il-prinċipju huwa madankollu ristrett mill-possibbiltà, għall-qrati ta’ disinni Komunitarji, li jiddeċiedu t-talbiet rikonvenzjonali għal dikjarazzjoni ta’ invalidità ta’ disinn Komunitarju rreġistrat li jitressqu fil-kuntest ta’ proċedimenti ta’ vjolazzjoni jew ta’ theddida ta’ vjolazzjoni.

49

F’dan ir-rigward, l-argument li interpretazzjoni tal-kunċett ta’ “kull parti terza”, skont l-Artikolu 19(1) tar-Regolament, għandha tinftiehem bħala li tinkludi terzi detenturi ta’ disinn Komunitarju rreġistrat wara ser iwassal biex tbiddel it-tqassim tal-ġurisdizzjoni bejn l-imsemmija qrati u l-UASI, filwaqt li, barra minn hekk, iġġib fix-xejn il-ġurisdizzjoni ta’ dan tal-aħħar fil-qasam tal-invalidità, ma għandux jiġi milqugħ.

50

Fil-fatt, mill-karatteristiċi spjegati iktar ’il fuq jirriżulta li l-proċedimenti fil-qasam tal-vjolazzjoni u t-talbiet għal dikjarazzjoni ta’ invalidità huma differenti fir-rigward tal-għan tagħhom u tal-effetti tagħhom, b’mod li l-possibbiltà għad-detentur ta’ disinn Komunitarju rreġistrat qabel li jippreżenta proċedimenti ta’ vjolazzjoni kontra d-detentur ta’ disinn Komunitarju rreġistrat wara ma hijiex ta’ natura li ġġib fix-xejn is-sens tal-preżentazzjoni ta’ talba għal dikjararazzjoni ta’ invalidità quddiem l-UASI kontra dan tal-aħħar.

51

Konsegwentement, għandu jiġi kkonstatat li, sa fejn id-disinn Komunitarju rreġistrat wara, li l-użu tiegħu ġie pprojbit, jibqa’ validu sakemm l-invalidità tiegħu ma tkunx ġiet iddikjarata mill-UASI jew minn qorti tad-disinni Komunitarji fil-kuntest ta’ talba rikonvenzjonali għal dikjarazzjoni ta’ invalidità, is-sistema ta’ rimedju stabbilita bir-regolament ma hijiex mibdula mill-konklużjoni stabbilita fil-punt 44 ta’ din is-sentenza.

52

Fid-dawl tal-kunsiderazzjonijiet kollha preċedenti, ir-risposta għall-ewwel domanda għandha tkun li l-Artikolu 19(1) tar-Regolament għandu jiġi interpretat fis-sens li, f’kawża dwar ksur ta’ dritt esklużiv mogħti minn disinn Komunitarju rreġistrat, id-dritt li terzi jiġu pprojbiti milli jużaw l-imsemmi disinn għandu jinkludi kull terz li juża disinn li ma jipproduċix fuq utent informat impressjoni globali differenti, inkluż terz detentur ta’ disinn Komunitarju rreġistrat wara.

53

Permezz tat-tieni domanda tagħha, il-qorti tar-rinviju essenzjalment tistaqsi jekk ir-risposta għall-ewwel domanda tvarjax skont l-intenzjoni u l-aġir ta’ terz detentur ta’ disinn Komunitarju li jkun ġie rreġistrat wara.

54

Il-qorti tar-rinviju tirreferi b’mod partikolari għas-sitwazzjoni fil-kawża prinċipali, li fiha PROIN irreġistrat d-disinn Komunitarju tagħha biss wara li ġiet intimata minn Cegasa.

55

F’dan ir-rigward, għandu l-ewwel nett jiġi kkonstatat, kif irrilevat kull parti kkonċernata li ppreżentat osservazzjonijiet lill-Qorti tal-Ġustizzja, li l-portata tad-drittijiet mogħtija mir-regolament għandha tiġi ddeterminata b’mod oġġettiv u ma tistax tinbidel skont iċ-ċirkustanzi relatati mal-aġir tal-persuna li tapplika għar-reġistrazzjoni ta’ disinn Komunitarju.

56

It-tieni nett, kif l-Avukat Ġenerali essenzjalment irrileva fil-punt 49 tal-konklużjonijiet tiegħu, mit-tieni subparagrafu tal-Artikolu 19(2) tar-Regolament jirriżulta li l-leġiżlatur tal-Unjoni tassew ħa inkunsiderazzjoni l-bona fide sabiex jipproteġi d-disinjatur li ma jkunx jaf bid-disinn mhux irreġistrat żvelat mid-detentur.

57

Min-naħa l-oħra, għandu jiġi kkunsidrat li fl-ewwel paragrafu tal-imsemmi artikolu l-leġiżlatur ma inkludiex kunsiderazzjonijiet marbuta mal-intenzjonijiet ta’ terz.

58

Għalhekk, ir-risposta għat-tieni domanda għandha tkun li l-ewwel domanda hija ma tiddependix mill-intenzjoni u mill-aġir ta’ terz.

59

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (L-Ewwel Awla) taqta’ u tiddeċiedi: