1.

Permezz tar-rikors tiegħu, il-Parlament Ewropew jitlob lill-Qorti tal-Ġustizzja tannulla r-Regolament tal-Kunsill (UE) Nru 1286/2009, tat-22 ta’ Diċembru 2009, li jemenda r-Regolament (KE) Nru 881/2002 li jimponi ċerti miżuri speċifiċi restrittivi diretti kontra ċerti persuni u entitajiet assoċjati ma’ Usama bin Laden, in-netwerk ta’ Al-Qaida u t-Taliban ( 2 ), għar-raġuni prinċipali li ma ġiex adottat fuq bażi legali xierqa.

2.

Ir-regolament ikkontestat kien ġie adottat fuq il-bażi tal-Artikolu 215(2) TFUE. Il-Parlament isostni li kellu jiġi adottat fuq il-bażi tal-Artikolu 75 TFUE.

3.

L-Artikolu 215 TFUE jidher fit-Titolu IV (“Il-miżuri restrittivi”) tal-ħames parti tat-Trattat FUE, dwar l-azzjoni esterna tal-Unjoni Ewropea.

4.

Dan l-artikolu jgħid hekk:

5.

Il-Kapitolu 2 tat-Titolu V tat-Trattat UE li jirreferi għalih l-Artikolu 215 TFUE fih “dispożizzjonijiet speċifiċi dwar il-politika estera u ta’ sigurtà komuni”.

6.

L-Artikolu 75 TFUE, min-naħa tiegħu, jagħmel parti mill-Kapitolu 1 (“Dispożizzjonijiet ġenerali”) tat-Titolu V (“L-ispazju ta’ libertà, sigurtà u ġustizzja”) tat-Tielet Parti (“Politika u azzjonijiet interni ta’ l-Unjoni”) tat-Trattat FUE. Skont dan l-Artikolu:

“Fejn meħtieġ biex jitwettqu l-objettivi previsti fl-Artikolu 67, fir-rigward tal-prevenzjoni u l-ġlieda kontra t-terroriżmu u attivitajiet marbuta ma’ dan, il-Parlament Ewropew u l-Kunsill, li jaġixxu permezz ta’ regolament skond il-proċedura leġislattiva ordinarja, għandhom jiddefinixxu qafas għal miżuri amministrattivi fir-rigward tal-movimenti tal-kapital u tal-pagamenti, bħall-iffriżar ta’ fondi, assi finanzjarji jew benefiċċji ekonomiċi li jappartjenu lil, jew li jkunu proprjetà ta’, jew miżmuma minn, persuni fiżiċi jew ġuridiċi, gruppi jew entitajiet mhux statali.

Il-Kunsill fuq proposta tal-Kummissjoni għandu jadotta miżuri sabiex jimplimenta l-qafas imsemmi fl-ewwel subparagrafu.

L-atti previsti f’dan l-Artikolu għandhom jinkludu d-dispożizzjonijiet meħtieġa dwar salvagwardji legali.”

7.

Fil-każ li l-Qorti tal-Ġustizzja tikkonferma li l-Artikolu 215(2) TFUE jikkostitwixxi l-bażi legali xierqa tar-regolament ikkontestat, il-Parlament isostni, b’mod sussidjarju, li l-kundizzjonijiet dwar l-użu ta’ din id-dispożizzjoni ma ġewx irrispettati.

8.

Il-motiv prinċipali imqajjem mill-Parlament joffri lill-Qorti tal-Ġustizzja l-okkażjoni li tippreċiża l-metodu u l-kriterji li jippermettu li ssir distinzjoni, fir-rigward ta’ miżuri restrittivi, bejn dawk li jaqgħu taħt l-ispazju ta’ libertà, sigurtà u ġustizzja ( 4 ) u dawk li għandhom jiġu adottati fil-qafas tal-politika barranija u ta’ sigurtà komuni (PESK).

9.

Għandu jiġi ppreċiżat li, għalkemm it-Trattat ta’ Lisbona neħħa l-istruttura ta’ pilastri li kienet teżisti qabel, l-eżerċizzju tad-delimitazzjoni bejn il-politiki tal-Unjoni xorta tibqa’ meħtieġa. Xhieda ta’ dan, l-Artikolu 40 TUE jgħid li:

“L-implimentazzjoni tal-[PESK] m’għandhiex tolqot l-applikazzjoni tal-proċeduri u l-firxa rispettiva tal-kompetenzi ta’ l-istituzzjonijiet stabbiliti fit-Trattati għall-eżerċizzju tal-kompetenzi ta’ l-Unjoni msemmija fl-Artikoli 3 sa 6 E tat-Trattat dwar il-Funzjonament ta’ l-Unjoni Ewropea.

Bl-istess mod, l-implimentazzjoni tal-politika prevista f’dawk l-Artikoli m’għandhiex tolqot l-applikazzjoni tal-proċeduri u l-firxa rispettiva tal-kompetenzi ta’ l-istituzzjonijiet stabbiliti fit-Trattati għall-eżerċizzju tal-kompetenzi ta’ l-Unjoni taħt dan il-Kapitolu (fuq id-“dispożizzjonijiet speċifiċi dwar il-[PESK]’)” ( 5 ).

10.

Qabel ma jiġi eżaminat dan ir-rikors, ser nindika fil-qosor il-ġrajjiet li ppreċedew l-adozzjoni tar-regolament ikkontestat.

11.

Fis-16 ta’ Jannar 2002, il-Kunsill tas-Sigurtà tan-Nazzjonijiet Uniti ( 6 ) adotta r-Riżoluzzjoni 1390 (2002) li tistabbilixxi l-miżuri li għandhom jiġu imposti fir-rigward ta’ Usama bin Laden, tal-Membri ta’ l-organizzazzjoni Al-Qaida kif ukoll tat-Taliban u ta’ persuni, gruppi, impriżi u entitajiet assoċjati oħra. Din ir-riżoluzzjoni, essenzjalment tipprevedi, fil-paragrafi 1 u 2 tagħha, iż-żamma ta’ miżuri tal-iffriżar ta’ fondi, imposti fil-paragrafu 4(b) tar-Riżoluzzjoni 1267 (1999) u 8(c) tar-Riżoluzzjoni 1333 (2000). Skont il-paragrafu 3 tar-Riżoluzzjoni 1390 (2002), dawn il-miżuri għandhom jerġgħu jiġu eżaminati mill-Kunsill tas-Sigurtà tnax-il xahar wara li jiġu adottati, u fit-tmiem ta’ dan il-perijodu l-Kunsill kellu jiddeċiedi jew li jippermetti li jinżammu jew jiddeċiedi li jtejjibhom.

12.

Peress li azzjoni tal-Komunità Ewropea kienet neċessarja sabiex tiġi implementata din l-aħħar riżoluzzjoni, il-Kunsill, fis-27 ta’ Mejju 2002 adotta, fuq il-bażi tal-Artikolu 15 UE, il-Pożizzjoni Komuni 2002/402/PESK, dwar miżuri restrittivi fir-rigward ta’ Usama bin Laden, il-membri tal-organizzazzjoni Al-Qaida kif ukoll tat-Taliban u ta’ persuni, gruppi, impriżi u entitajiet assoċjati oħra, u ħassret il-Pożizzjonijiet Komuni 96/746/PESK, 1999/727/PESK, 2001/154/PESK u 2001/771/PESK ( 7 ). L-Artikolu 3 tal-Pożizzjoni Komuni 2002/402 jipprevedi, b’mod partikolari, il-proroga tal-iffriżar tal-fondi u l-assi finanzjarji jew riżorsi ekonomiċi oħra tal-individwi, gruppi impriżi u entitajiet imsemmijin fil-lista stabbilità skont ir-Riżoluzzjonijiet 1267 (1999) u 1333 (2000).

13.

Fl-istess jum, ġie adottat fuq il-bażi tal-Artikoli 60 KE, 301 KE u 308 KE ir-Regolament tal-Kunsill (KE) Nru 881/2002, li jimponi ċerti miżuri speċifiċi restrittivi diretti kontra ċerti persuni u entitajiet assoċjati ma’ Usama bin Laden, in-network ta’ Al-Qaida u t-Taliban, u li jħassar ir-Regolament tal-Kunsill (KE) Nru 467/2001 li jipprojbixxi l-esportazzjoni ta’ ċerti merkanzija u servizzi lejn l-Afganistan, waqt li jsaħħaħ il-projbizzjoni ta’ titjiriet u jestendi l-friża fuq fondi u riżorsi finanzjarji oħra rigward it-Taliban tal-Afganistan ( 8 ). L-Anness I tar-Regolament Nru 881/2002 jinkludi lista ta’ persuni, entitatjiet u gruppi li fir-rigward tagħhom japplika l-iffriżar tal-fondi impost permezz tal-Artikolu 2 (iktar ’il quddiem il-“lista”).

14.

Ir-regolament ikkontestat ġie adottat mill-Kunsill fit-22 ta’ Diċembru 2009. Dan ir-regolament huwa bbażat fuq l-Artikolu 215(2) TFUE u jirreferi għal proposta konġunta tar-Rappreżentant Għoli u tal-Kummissjoni. Dan jemenda r-Regolament Nru 881/2002 wara s-sentenza tat-3 ta’ Settembru 2008, Kadi u Al Barakaat International Foundation vs Il-Kunsill u Il-Kummissjoni ( 9 ), billi introduċa proċedura ta’ elenkar li tiżgura li d-drittijiet fundamentali tad-difiża u, b’mod partikolari, dak għal smigħ xieraq, jiġu rrispettati. Il-proċedura riveduta tistabbilixxi li l-persuna, l-entità, l-organu jew il-grupp li jidhru fil-lista għandhom jiġu informati bir-raġunijiet għall-elenkar fuqha skont l-istruzzjonijiet tal-kumitat tal-Kunsill tas-Sigurtà maħluq bir-Riżoluzzjoni 1267 (1999) tal-Kunsill tas-Sigurtà dwar l-Al-Qaida u t-Taliban ( 10 ), biex jingħataw il-possibbiltà li jesprimu l-veduti tagħhom fuq dawn ir-raġunijiet.

15.

Il-Parlament jitlob li l-Qorti tal-Ġustizzja jogħġobha:

16.

Il-Kunsill jitlob lill-Qorti tal-Ġustizzja jogħġobha:

17.

B’digriet tal-President tal-Qorti tal-Ġustizzja tal-10 ta’ Awwissu 2010, ir-Repubblika Ċeka, ir-Renju tal-Isvezja, ir-Repubblika Franċiża u r-Renju tad-Danimarka ġew ammessi bħala intervenjenti insostenn tat-talbiet tal-Kunsill.

18.

B’digriet tal-President tal-Qorti tal-Ġustizzja tat-2 ta’ Diċembru 2010, ir-Renju tad-Danimarka tneħħa minn parti intervenjenti billi kien talab li jirtira l-intervent tiegħu.

19.

It-trattazzjonijiet tal-partijiet instemgħu mill-Qorti tal-Ġustizzja fis-seduta tat-7 ta’ Diċembru 2011.

20.

Fl-ewwel lok, ser neżamina l-motiv imqajjem b’mod prinċipali mill-Parlament, ibbażat fuq għażla allegatament ħażina tal-bażi legali tar-regolament ikkontestat, imbagħad, jekk ikun il-każ, fit-tieni lok, il-motiv sussidjarju, ibbażat fuq in-nuqqas ta’ osservanza tal-kundizzjonijiet dwar l-użu tal-Artikolu 215 TFUE.

21.

Bl-ewwel motiv tiegħu, il-Parlament jitlob lill-Qorti tal-Ġustizzja tikkonstata li r-regolament ikkontestat ma setax ikun validament ibbażat fuq l-Artikolu 215 TFUE. Dan il-motiv huwa suddiviż f’żewġ partijiet fejn l-ewwel parti tirrigwarda l-iskop u l-kontenut ta’ dan ir-regolament u t-tieni parti s-sinjifikat ġenerali tat-Trattati.

22.

Skont il-Parlament, hija ġurisprudenza stabbilita, li l-għażla ta’ bażi legali ta’ att tal-Unjoni għandha tkun ibbażata fuq elementi oġġettivi suġġetti għal stħarriġ ġudizzjarju, li fosthom jinsabu, b’mod partikolari, l-iskop u l-kontenut tal-att. Il-bażi ġuridika tar-regolament ikkontestat għandha tkun, fid-dawl tal-kontenut u tal-għan tagħha, l-istess bħal dik tar-Regolament Nru 881/2002, adottat fuq il-bażi tal-Artikoli 60 KE, 301 KE u 308 KE. Madankollu, billi dawn l-artikoli kienu tħassru jew saru inapplikabbli wara d-dħul fis-seħħ tat-Trattat ta’ Lisbona, fl-1 ta’ Diċembru 2009, il-bażi legali xierqa għandha tkun l-Artikolu 75 TFUE li jirrigwarda l-prevenzjoni tat-terroriżmu u tal-attivitajiet konnessi.

23.

Għal dak li jirrigwarda l-kontenut tiegħu, fil-parti l-kbira r-regolament ikkontestat sempliċement jifformula mill-ġdid jew jikkjarifika dispożizzjonijiet tar-Regolament Nru 881/2002 jew biex jiffaċilita l-applikazzjoni tiegħu, mingħajr ma jibdel bl-ebda mod in-natura tal-kontenut ta’ dan tal-aħħar. L-uniċi dispożizzjonijiet sostantivi verament ġodda huma dawk li jirrigwardaw il-proċedura tal-elenkar. Ir-regolament ikkontestat għandu min-natura ta’ “qafas għal miżuri amministrattivi” fis-sens tal-Artikolu 75 TFUE sa fejn dan jemenda jew jikkompleta l-qafas leġiżlattiv għall-adozzjoni u l-applikazzjoni ta’ miżuri amministrattivi intiżi għall-iffriżar tal-fondi tal-partijiet ikkonċernati.

24.

Fir-rigward tal-għan tar-regolament ikkontestat, dan huwa mmirat, l-istess bħar-Regolament Nru 881/2002, biex jiġġieled kontra t-terroriżmu u l-finanzjament tiegħu, li jikkorrispondi mal-għanijiet tal-Artikolu 75 TFUE. Din il-konstatazzjoni hija kkorroborata mill-punt 169 tas-sentenza Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq, li jgħid li l-iskop essenzjali u l-għan tar-Regolament ikkontestat huwa li jiġi miġġieled it-terroriżmu internazzjonali, b’mod partikolari li jinqatgħu ir-riżorsi finanzjarji tiegħu billi jiġu ffriżati l-fondi u r-riżorsi ekonomiċi tal-persuni jew entitajiet issuspettati li huma involuti f’attivitajiet li huma marbuta miegħu. Barra minn hekk, il-Qorti tal-Ġustizzja kkonstatat ukoll, fil-punt 199 ta’ din is-sentenza, li l-pożizzjoni tal-Qorti tal-Prim’Istanza tal-Komunitajiet Ewropej (li saret il-Qorti Ġenerali), li r-Regolament Nru 881/2002 fih wieħed mill-għanijiet tat-Trattat UE fir-rigward ta’ relazzjonijiet esterni, fosthom il-PESK, tmur kontra l-kliem stess tal-Artikolu 308 KE.

25.

Billi dan ir-regolament ma huwiex intiż biex jitwettqu l-għanijiet tal-PESK, huwa diffiċli li wieħed jifhem kif jista’ jagħmel hekk ir-regolament ikkontestat, adottat biex jiżgura l-applikazzjoni ta’ dan ir-regolament. Il-Parlament jenfasizza li l-Kunsill jista’ jirrikorri għall-Artikolu 215 TFUE biss għal miżuri li jwettqu l-għanijiet tal-PESK u, b’mod iktar preċiż, meta deċiżjoni intiża biex tilħaq l-għanijiet ta’ din il-politika tkun tipprevedih.

26.

Skont il-Parlament, il-pożizzjoni tal-Kunsill ma tikkorrispondix mal-fatti jew mar-realtà tal-affarijiet sa fejn din tibbaża fuq distinzjoni bejn, minn naħa, it-terroriżmu internazzjonali jew “estern” u, min-naħa l-oħra, it-terroriżmu “intern”. Biex tkun effettiva, il-ġlieda kontra t-terrożimu għandu jkollha natura internazzjonali. L-unika distinzjoni li hija possibbli li ssir f’dan il-kuntest hija dik bejn, minn naħa, il-miżuri nazzjonali kontra t-terroriżmu u, min-naħa l-oħra, il-miżuri internazzjonali kontra dan il-fenomenu. Ma huwiex dejjem possibbli li jiġi ddeterminat b’ċertezza jekk l-attivitajiet terroristiċi u konnesi magħmulin fi ħdan l-Unjoni joħolqux theddida ġewwa jew ’il barra minnha.

27.

Il-Kunsill isostni li, fir-rigward tal-għanijiet u l-kontenut tiegħu, ir-regolament ikkontestat jirrigwarda l-kamp ta’ applikazzjoni tad-dispożizzjonijiet tat-Trattati fuq l-azzjoni esterna tal-Unjoni, u b’mod iktar partikolari, il-qasam tal-PESK. L-Artikolu 215 TFUE jikkostitwixxi l-bażi legali xierqa għal din il-miżura.

28.

Dan ir-regolament, bħar-Regolament Nru 881/2022, huwa intiż biex jiġġieled kontra t-terroriżmu internazzjonali u l-finanzjament tiegħu sabiex jiġu pperservati l-paċi u s-sigurtà fil-livell internazzjonali. Il-Kunsill ifakkar, f’dan ir-rigward, il-kliem tar-Riżoluzzjoni 1390 (2002) tal-Kunsill tas-Sigurtà u tar-Regolament Nru 881/2002 li jimplementaha, kif ukoll is-sentenza Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq.

29.

Il-kontenut tar-regolament ikkontestat jikkorrispondi ma’ dan l-għan. L-Artikoli 7a u 7c li dan jintroduċi fir-Regolament Nru 881/2002 jikkonfermaw li dawn ir-regolamenti jimplementaw direttament id-deċiżjonijiet ta’ elenkar adottati mill-Kumitat tas-Sanzjonijiet u li jistabbilixxu sistema ta’ interazzjoni bejn dan il-kumitat, l-Unjoni u l-persuni u entitajiet elenkati.

30.

Ir-Regolament Nru 881/2002 u r-regolament ikkontestat bl-ebda mod ma jidħlu fil-kuntest tad-dispożizzjonijiet intiżi biex jinħoloq SLSĠ fi ħdan l-Unjoni. Ma jirregolawx kwistjonijiet dwar il-kontrolli tal-fruntieri, u lanqas dwar is-sigurtà interna u lanqas l-għarfien tad-deċiżjonijiet ġudizzjarji jew extraġudizzjarji.

31.

Il-Kunsill, kif ukoll ir-Repubblika Franċiża, isostnu li t-Trattati, fil-verżjoni tagħhom ta’ qabel id-dħul fis-seħħ tat-Trattat ta’ Lisbona, ma kienu jiprevedu l-ebda bażi legali speċifika li tippermetti l-adozzjoni ta’ miżuri ta’ ffriżar ta’ fondi ta’ terroristi li jikkostitwixxu theddida għas-sigurtà pubblika fl-Istati Membri, jiġifieri terroristi “interni”. L-uniċi bażijiet legali għall-adozzjoni ta’ dawn il-miżuri restrittivi setgħu kienu l-Artikoli 60 KE, 301 KE u 308 KE li applikaw biss għal terroristi “esterni” fil-kuntest tal-azzjoni esterna tal-Unjoni.

32.

Mill-istruttura tal-formulazzjoni tat-Trattati, kif emendati mit-Trattat ta’ Lisbona jirriżulta, li l-post fejn tinstab theddida possibbli kif ukoll l-għanijiet politiċi ta’ persuna jew ta’ grupp elenkat għandhom jiġu kkunsidrati biex tiġi deċiża l-bażi legali ta’ miżura restrittiva. L-Artikolu 75 TFUE diġà pprovda bażi legali għall-adozzjoni ta’ miżuri ta’ ffriżar ta’ fondi ta’ terroristi “interni”, bħal dawk il-persuni u l-gruppi li l-ismijiet tagħhom, immarkat b’asterisk, huwa elenkat fil-lista annessa mal-Pożizzjoni Komuni tal-Kunsill 2001/931/PESK, tas-27 ta’ Diċembru 2001, dwar l-applikazzjoni ta’ miżuri speċifiki fil-ġlieda kontra t-terroriżmu ( 11 ). Iżda, jekk it-theddida tirrigwarda prinċipalment Stat terz wieħed jew diversi jew lill-komunità internazzjonali inġenerali, l-Artikolu 215 TFUE huwa l-bażi legali xierqa. Ikun illegali għall-Unjoni li tadotta, fuq il-bażi tad-dispożizzjonijiet tat-Titolu V tat-tielet parti tat-Trattat FUE, li tirregola l-SLSĠ, l-iffriżar ta’ assi li kkontribwew għas-sigurtà ta’ Stat terz iżda li ma kienx intiż biex jiżgura s-sigurtà interna.

33.

Barra minn hekk, skont il-Kunsill, sostnut sostanzjalment mir-Renju tal-Isvezja, l-argument tal-Parlament ma jikkunsidrax il-każijiet fejn l-Unjoni tfittex li tadotta jew timponi, fil-kuntest tal-ġlieda kontra t-terroriżmu, miżuri restrittivi minbarra l-iffriżar tal-assi, bħal projbizzjoni tal-ivvjaġġar, kontra persuni jew entitajiet assoċjati mat-terroriżmu “estern”.

34.

Ir-Renju tal-Isvezja jippreċiża li l-pożizzjoni tal-Parlament għandha l-effett li l-implementazzjoni tas-sanzjonijiet meħudin fil-kuntest tan-Nazzjonijiet Uniti kontra t-terroristi tibbaża fuq bażijiet legali differenti li jikkonċernaw diversi miżuri ta’ sanzjonijiet fi ħdan l-istess sistema waħda ta’ sanzjonijiet. Din ma setgħetx kienet l-intenzjoni tal-leġiżlatur tal-Unjoni, b’mod partikolari minħabba l-fatt li sistema bħal din tfisser l-applikazzjoni ta’ proċeduri deċiżjonali differenti fil-kuntest rispettivament tal-qasam tal-PESK u tal-politika interna tal-Unjoni.

35.

Il-Kummissjoni tispjega li meta tipproponi att li jagħmel emenda, hija tibbaża ruħha fuq id-dispożizzjoni jew dispożizzjonijiet li servew ta’ bażi għall-adozzjoni tal-att inizjali. Għalhekk, il-proposta ta’ regolament tal-Kunsill li l-Kummissjoni ppreżentat fit-22 ta’ April 2009 ( 12 ), semmiet l-Artikoli 60 KE, 301 KE u 308 KE bħala bażijiet legali. Billi dik il-proposta kienet pendenti quddiem il-Kunsill fl-1 ta’ Diċembru 2009, il-Kummissjoni tindika li kellha teżamina l-konsegwenzi purament legali u tekniċi tad-dħul fis-seħħ tat-Trattat ta’ Lisbona fir-rigward ta’ dan l-att. Hija waslet għall-konklużjoni, approvata mir-Rappreżentant Għoli, li l-Artikolu 215(2) TFUE jkopri l-aspetti kollha kkonċernati tal-Artikoli 60 KE, 301 KE u 308 KE. Dan l-approċċ jaqbel mal-konstatazzjonijiet magħmulin mill-Qorti tal-Ġustizzja fis-sentenza tagħha Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq.

36.

Fir-rigward tal-effett ta’ din is-sentenza fuq il-kwistjoni tal-bażi legali, il-Kummissjoni tikkontesta l-allegazzjoni tal-Parlament li, fid-dawl ta’ din is-sentenza, att ibbażat fuq l-Artikolu 308 KE ma jistax ikollu bħala għan il-PESK. Skont il-Kummissjoni, il-Qorti tal-Ġustizzja ma kkontestatx li l-Artikoli 60 KE u 301 KE kienu jikkostitwixxu l-bażijiet legali li kienu jippermettu l-adozzjoni tal-miżuri Komunitarji li għandhom l-għan tal-PESK. Għal dak li jirrigwarda r-Regolament Nru 881/2002, hija identifikat it-tieni għan Komunitarju sottostanti, marbut mal-funzjonament tas-suq komuni, biex tiġġustifika l-inklużjoni tal-Artikolu 308 KE bħala t-tielet bażi legali. Barra minn hekk, ikkonfermat li t-Trattat KE kien jeħtieġ li din id-dispożizzjoni tintuża biex jiġu imposti miżuri restrittivi kontra persuni fiżiċi jew ġuridiċi fil-każ ta’ nuqqas ta’ rabta mas-sistema regolatorja ta’ Stat terz.

37.

Il-Kummissjoni tikkunsidra li l-Artikoli 215 TFUE u 75 TFUE ma jistgħux jintużaw flimkien bħala bażijiet legali għar-regolament ikkontestat. Huwa impossibbli li att jiġi bbażat fl-istess ħin fuq dawn iż-żewġ artikoli meta jistabbilixxu kundizzjonijiet differenti fir-rigward tal-proċedura t-teħid ta’ deċiżjonijiet, inkluża l-applikazzjoni tal-Protokoll (Nru 21) fuq il-Pożizzjoni tar-Renju Unit u tal-Irlanda fir-rigward tal-ispazju tal-libertà, tas-sigurtà u tal-ġustizzja, anness mat-Trattat UE u mat-Trattat FUE, kif ukoll il-Protokoll (Nru 22) fuq il-pożizzjoni tad-Danimarka annessa mal-istess Trattati. Hija ssostni li waħda mid-differenzi kruċjali bejn l-Artikoli 215 TFUE u 75 TFUE hija n-neċessità ta’ rabta mad-deċiżjonijiet adottati skont il-Kapitolu 2 tat-Titolu V tat-Trattat UE ( 13 ) meħudin fl-interess tal-paċi u tas-sigurtà fil-livell internazzjonali, ikun xi jkun il-post ġeografiku preċiż u tkun xi tkun il-portata tat-theddida terroristika inkwistjoni. Meta miżuri restrittivi dwar it-terroriżmu jkollhom jittieħdu skont it-Trattat FUE fit-teħid ta’ deċiżjoni PESK li ssegwi riżoluzzjoni tal-Kunsill tas-Sigurtà, l-Artikolu 215 TFUE huwa l-unika bażi legali possibbli.

38.

Skont il-Parlament, is-sinjifikat ġenerali u l-ispirtu tat-Trattati jistgħu jittieħdu inkunsiderazzjoni għall-interpretazzjoni tad-dispożizzjonijiet tagħhom. F’dan il-każ, jiġġustifikaw l-għażla tal-Artikolu 75 TFUE bħala bażi legali tar-regolament ikkontestat.

39.

L-ewwel nett, ir-regolament ikkontestat huwa marbut mal-protezzjoni ta’ persuni u ta’ gruppi. Mid-dħul fis-seħħ tat-Trattat ta’ Lisbona, l-Unjoni tista’ tadotta miżuri dwar id-drittijiet fundamentali fil-qafas tal-proċedura leġiżlattiva ordinarja jew bl-approvazzjoni tal-Parlament biss. L-Artikolu 215(2) TFUE japplika biss għal dak li jirrigwarda miżuri li ma jqajmux, bl-istess intensità, kwistjonijiet dwar id-drittijiet fundamentali.

40.

It-tieni nett, l-Artikolu 75 TFUE jawtorizza lill-Unjoni tadotta miżuri li jirrigwardaw il-movimenti ta’ kapitali u ta’ ħlasijet, b’għarfien tal-fatt li dawn il-miżuri jistgħu jkollhom effett fuq il-funzjonament tajjeb tas-suq intern tal-kapitali u tal-provvista tas-servizzi finanzjarji. Il-Qorti tal-Ġustizzja rrikonoxxiet, fil-punt 229 tas-sentenza Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq, li l-“[miżuri restrittivi ta’ natura ekonomika] min-natura tagħhom, jippreżentaw […] konnessjoni mal-funzjonament tas-suq komuni”. Barra minn hekk, ir-Regolament Nru 881/2002 jirreferi huwa stess, fir-raba’ premessa tiegħu, għall-ħtieġa li tiġi evitata b’mod partikolari distorsjoni tal-kompetizzjoni.

41.

It-tielet nett, ir-regolament ikkontestat jirrigwarda t-twaqqif ta’ SLSĠ. Jikkontribwixxi għall-ġlieda kontra l-kriminalità, b’mod partikolari t-terroriżmu u l-finanzjament tiegħu, li jikkostitwixxi wieħed mill-għanijiet ta’ dan l-ispazju, kif jirriżulta b’mod partikolari mill-Artikolu 3(2) TUE.

42.

Fl-aħħar nett, il-Parlament isemmi n-nuqqas ta’ konnessjoni bejn ir-regolament ikkontestat u l-PESK. Skont l-Artikolu 24(1) TUE, il-PESK hija suġġetta għal regoli u proċeduri speċifiċi. L-applikazzjoni ta’ dawn ir-regoli u dawn il-proċeduri ’l barra mill-kamp ta’ applikazzjoni tagħhom tmur kontra l-għanijiet stabbiliti fit-tieni paragrafu tal-Artikolu 1 TUE u għandha l-effett li ċċaħħad lill-parlamenti nazzjonali mill-applikazzjoni tal-protokolli fuq ir-rwol tagħhom u fuq l-applikazzjoni tal-prinċipji ta’ sussidjarjetà u proporzjonalità kif ukoll iċċaħħad lill-Parlament mill-applikazzjoni tal-proċedura leġiżlattiva ordinarja.

43.

Insostenn tal-pożizzjoni tiegħu, il-Parlament jirreferi wkoll għall-punt 235 tas-sentenza Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq, fejn il-Qorti tal-Ġustizzja kkonstatat li ż-żieda tal-Artikolu 308 KE mal-bażi legali tar-Regolament Nru 881/2002 kienet iġġustifikata għaliex “ippermettiet lill-Parlament [...] jipparteċipa fil-proċess deċiżjonali dwar il-miżuri inkwistjoni li kienu jikkonċernaw speċifikament lil individwi filwaqt li, fil-kuntest tal-Artikoli 60 KE u 301 KE, ebda rwol mhuwa previst għal din l-istituzzjoni”.

44.

Il-Parlament jikkonkludi li huwa kontra d-dritt tal-Unjoni li wieħed ikun jista’ jadotta miżuri li jkollhom effett dirett fuq id-drittijiet fundamentali tal-individwi u tal-gruppi, fuq is-suq intern u fuq il-ġlieda kontra l-kriminalità, permezz ta’ proċedura li teskludi l-parteċipazzjoni tal-Parlament, meta l-proċedura leġiżlattiva ordinarja tapplika għall-adozzjoni tal-miżuri f’ċerti oqsma. It-Trattat ta’ Lisbona jirrifletti r-rieda tal-Istati Membri li tiġi rrinforzata n-natura demokratika tal-Unjoni. Huwa risposta għal bżonn urġenti li jiġi stabbilit kontroll Parlamentari dwar il-prattiċi ta’ elenkar. Ir-rikonoxximent tal-Artikolu 215(2) TFUE bħala bażi legali xierqa għall-miżuri bħar-regolament ikkontestat fil-prattika jispiċċa biex iċaħħad lill-Artikolu 75 TFUE minn parti kbira mill-effettività tiegħu. Il-Parlament jirrimarka wkoll li dan l-aħħar artikolu jikkostitwixxi bażi legali iktar speċifika milli l-Artikolu 215 TFUE.

45.

Il-Kunsill isostni li l-argumenti ppreżentati mill-Parlament dwar is-sinjifikat ġenerali tat-Trattati ma jikkostitwixxux kriterji rilevanti għad-determinazzjoni tal-bażi legali xierqa tar-regolament ikkontestat.

46.

Il-kompetenzi tal-istituzzjonijiet huma stabbiliti mit-Trattati u jvarjaw skont l-oqsma differenti ta’ azzjoni tal-Unjoni. L-argument sostnut mill-Parlament ifisser li huma l-proċeduri li jiddeterminaw l-għażla tal-bażi legali u mhux bil-maqlub. L-element varjabbli marbut mar-rwol tal-Parlament fil-proċedura huwa rilevanti biss f’ċirkustanzi eċċezzjonali. Huwa hekk fil-każ ta’ miżura li fl-istess ħin ikollha numru ta’ għanijiet jew ikollha diversi komponenti li huma marbutin flimkien, mingħajr ma wieħed ikun sekondarju għall-ieħor. F’dawn iċ-ċirkustanzi, huwa possibbli li jinstabu bażijiet legali differenti korrispondenti sakemm dawn ma jkunux inkompatibbli. Biex tiġi ddeterminata l-kompatibbiltà tagħhom, irid jiġi kkunsidrat jekk meta jittieħdu flimkien dawn il-bażijiet legali jkunux ta’ natura li jippreġudikaw id-drittijiet tal-Parlament. F’dan ir-rigward, il-Kunsill jirreferi b’mod partikolari għas-sentenza tas-6 ta’ Novembru 2008, Il-Parlament vs Il-Kunsill ( 14 ).

47.

Il-Kunsill jenfasizza li l-għażla tal-bażi legali għandha tibbaża fuq elementi oġġettivi, b’mod partikolari l-iskop u l-kontenut tal-att. Dan il-prinċipju kien ġie kkonfermat fis-sentenza Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq. Għalkemm il-Qorti tal-Ġustizzja kienet semmiet, fil-punt 235 ta’ din is-sentenza, li l-użu tal-Artikolu 308 KE kien jippermetti lill-Parlament li jipparteċipa fil-proċess deċiżjonali, xorta jibqa’ l-fatt li din l-osservazzjoni kienet ġiet ippreżentata biss biex tikkompleta l-argumenti prinċipali tal-Qorti tal-Ġustizzja bbażati fuq l-għanijiet tat-Trattat KE.

48.

Barra minn hekk, l-argument tal-Parlament li l-Unjoni setgħet tadotta miżuri li jirrigwardaw ir-rispett tad-drittijiet tal-bniedem bl-involviment tiegħu biss jidher kontradett mill-Artikolu 215(3) TFUE, li jgħid li l-“atti previsti f’dan l-Artikolu għandhom jinkludu d-dispożizzjonijiet meħtieġa dwar salvagwardji legali”. Din id-dispożizzjoni tagħmilha ċara li att adottat skont l-artikolu msemmi jista’ jaffettwa d-drittijiet fundamentali.

49.

Il-Kunsill isostni wkoll li l-Artikolu 215 TFUE għandu l-għan li jippermetti lill-Kunsill li jadotta miżuri direttament applikabbli għall-operaturi ekonomiċi. Din id-dispożizzjoni tikkontribwixxi biex tiżgura l-funzjonament tajjeb tas-suq komuni.

50.

Fir-rigward tar-relazzjoni bejn ir-regolament ikkontestat u l-PESK, il-Kunsill isemmi t-theddida partikolari li tirrappreżenta Al-Qaida. Dan ir-regolament jikkostitwixxi l-qafas li fih l-Unjoni timplementa l-obbligi li għandha skont il-Karta tan-Nazzjonijiet Uniti. Ma jkunx irraġonevoli li jittieħed inkunsiderazzjoni l-għan tar-riżoluzzjonijiet adottati mill-Kunsill tas-Sigurtà sabiex tiġi stabbilita l-bażi legali xierqa.

51.

Fl-aħħar nett, il-Kunsill jenfasizza li t-Trattat ta’ Lisbona ma affettwax id-delimitazzjoni bejn il-PESK u l-SLSĠ. Għall-kuntrarju, fit-tieni paragrafu tal-Artikolu 40 TUE kienet ġiet enfasizzata l-importanza ta’ linja li tiddelimita b’mod ċar iż-żewġ oqsma. Għaldaqstant, kieku l-Qorti tal-Ġustizzja kellha tikkunsidra li r-regolament ikkontestat kellu għan li jirrigwarda l-PESK, l-Artikolu 215(2) TFUE kien jikkostitwixxi l-unika bażi possibbli għall-adozzjoni tiegħu.

52.

Waħda mill-kontribuzzjonijiet tat-Trattat ta’ Lisbona kienet li kkompleta l-istrumenti legali li jippermettu lill-Unjoni tadotta miżuri restrittivi kontra persuni fiżiċi jew ġuridiċi, gruppi jew entitajiet mhux statali. L-ewwel paragrafu tal-Artikolu 75 TFUE u l-Artikolu 215(2) TFUE issa espressament ikopru dawn l-indirizzati b’mod li jkun inutli li wieħed jirrikorri għal dak li jikkostitwixxi l-ekwivalenti tal-Artikolu 308 KE, jiġifieri l-Artikolu 352 TFUE ( 15 ).

53.

Il-kwistjoni li għandha tiġi ddeterminata hawnhekk hija l-oqsma ta’ applikazzjoni rispettivi tal-Artikolu 75 TFUE u l-Artikolu 215 TFUE. Il-fehmiet espressi, minn naħa, mill-Parlament u min-naħa l-oħra, mill-partijiet l-oħrajn fuq dan is-suġġett huma radikalment opposti.

54.

L-argument prinċipali tal-Parlament jikkonsisti, biex ngħidu f’sentenza, fil-kunsiderazzjoni li l-Artikolu 75TFUE biss jista’ jintuża bħala bażi għall-adozzjoni ta’ miżuri restrittivi fil-ġlieda kontra t-terroriżmu.

55.

Ngħid mall-ewwel li dan l-argument xejn ma jikkonvinċini.

56.

Infakkar li skont ġurisprudenza stabbilita, l-għażla tal-bażi legali ta’ att tal-Unjoni għandha tibbaża fuq elementi oġġettivi, suġġetti għal stħarriġ ġudizzjarju, li fosthom jinsabu, b’mod partikolari, l-iskop u l-kontenut tal-att ( 16 ).

57.

L-eżami tal-għan li jrid jintlaħaq mir-regolament ikkontestat ma jistax isir b’mod iżolat imma għandu jikkunsidra l-atti li dan tal-aħħar jirreferi għalihom u li magħhom jistabbilixxi konnessjoni ( 17 ), jiġifieri, b’ordni kronoloġiku, ir-Riżoluzzjoni 1390 (2002) tal-Kunsil tas-Sigurtà, il-Pożizzjoni Komuni 2002/402 kif ukoll ir-Regolament Nru 881/2002 li r-regolament ikkontestat jimmodifika f’diversi punti.

58.

Fir-realtà, dawn l-atti legali kollha għandhom skop wieħed, jiġifieri l-ġlieda kontra t-terroriżmu internazzjonali. Wieħed mill-mezzi essenzjali biex jintlaħaq dan l-għan jikkonsisti f’li jinqatgħu r-riżorsi finanzjarji mill-organizzazzjonijiet terroristiċi billi jiġu ffriżati l-fondi u r-riżorsi ekonomiċi tal-persuni jew tal-entitajiet issuspettati li huma implikati fl-attivitajiet li huma marbutin mat-terroriżmu.

59.

Kif sostniet il-Qorti tal-Ġustizzja fis-sentenza tagħha Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq, l-iskop essenzjali u l-għan tar-Regolament Nru 881/2002 huma li jiġi miġġieled it-terroriżmu internazzjonali ( 18 ). Fil-ħdax-il premessa tiegħu, ir-regolament ikkontestat jippreċiża li l-“iskop tar-Regolament […] Nru 881/2002 huwa li jipprevjeni r-reati terroristiċi, inkluż l-iffinanzjar tat-terroriżmu, sabiex jinżammu l-paċi u s-sigurtà internazzjonali”. Fil-fehma tiegħi dan huwa l-għan aħħari segwit kemm mil-leġiżlazzjoni internazzjonali kif ukoll mil-leġiżlazzjoni tal-Unjoni msemmija iktar ’il fuq.

60.

Fir-rigward, b’mod iktar speċifiku, tar-regolament ikkontestat, nikkunsidra li kemm fl-għan kif ukoll fil-kontenut tiegħu, huwa għal kollox konformi ma’ dak l-approċċ u, fid-dawl partikolari tal-lezzjonijiet li jistgħu jittieħdu mis-sentenza Kadi u Al Barakaat International Foundation vs Il-Kunsill u Il-Kummissjoni, jiżviluppah b’mod li tiġi rrikonċiljata l-ġlieda kontra t-terroriżmu internazzjonali u r-rispett għad-drittijiet fundamentali. Ir-regolament ikkontestat jikkostitwixxi għalhekk, fl-eżekuzzjoni ta’ din is-sentenza, proċedura ta’ elenkar li għandha bħala għan li jkun iggarantit li jiġu rrispettati d-drittijiet fundamentali tad-difiża, u b’mod partikolari d-dritt għal smigħ.

61.

Issa għandu jiġi ddeterminat ma’ liema politika tal-Unjoni jista’ jintrabat, wara t-Trattat ta’ Lisbona, l-għan li jiġi miġġieled it-terroriżmu internazzjonali sabiex jinżammu l-paċi u s-sigurtà fil-livell internazzjonali.

62.

Fil-fehma tiegħi, għan bħal dan jikkorrispondi mal-finijiet tal-azzjoni esterna tal-Unjoni kif inhuma enumerati b’mod partikolari fl-Artikolu 21(2)(a) u (c) TUE. Skont din id-dispożizzjoni:

“L-Unjoni għandha tiddefinixxi u twettaq politika u azzjonijiet komuni, u għandha taħdem sabiex tassigura grad għoli ta’ koperazzjoni fl-oqsma kollha tar-relazzjonijiet internazzjonali, sabiex:

63.

Għalkemm l-għanijiet elenkati fl-Artikolu 21(2) TUE huma komuni għall-azzjoni esterna tal-Unjoni, mingħajr ma wħud jkunu irriżervati espressament għall-PESK, nikkunsidra li l-għanijiet li hemm fis-subparagrafi (a) sa (c) huma fost dawk li tradizzjonalment huma assenjati għal din il-politika. F’dan ir-rigward nirrileva li l-għanijiet li jidhru fl-Artikolu 21(2)(a) sa (c) TUE essenzjalment jikkorrispondu għal dawk li kienu assenjati lill-PESK skont l-Artikolu 11(1) UE ( 19 ). Barra minn hekk, dawn l-għanijiet jikkoinċidu mal-ewwel paragrafu tal-Artikolu 24(1) TUE li jgħid l-“kompetenza ta’ l-Unjoni f’materji ta’ politika estera u ta’ sigurtà komuni għandha tkopri l-oqsma kollha tal-politika estera u l-kwistjonijiet kollha li għandhom x’jaqsmu mas-sigurtà ta’ l-Unjoni, inkluż it-tfassil progressiv ta’ politika ta’ difiża komuni, li tista’ twassal għal difiża komuni”.

64.

Fid-dawl ta’ dawn l-elementi, jiena tal-fehma li azzjoni tal-Unjoni fix-xena internazzjonali li ssegwi għan wieħed jew iżjed imsemmijin fl-Artikolu 21(2)(a) sa (c) TUE u b’mod partikolari dak intiż għall-preservazzjoni tal-paċi u għat-tisħiħ tas-sigurtà internazzjonali, għandha tiġi kkunsidrata li taqa’ fil-qasam tal-PESK, b’mod li azzjoni bħal din għandha titmexxa skont ir-regoli u l-proċeduri speċifiċi li jidhru fil-Kapitolu 2 tat-Titolu V tat-Trattat UE.

65.

Inżid ngħid li, kuntrarjament għal dak li ċerti argumenti mressqin mill-Parlament iġiegħluk taħseb, il-ġlieda kontra t-terroriżmu tista’ ċertament titmexxa mill-Unjoni fil-qafas tal-azzjonijiet tagħha fil-qasam tal-PESK. Għalkemm ir-rwol tal-PESK kien diġà ġie affermat f’diversi dokumenti politiċi adottati fil-livell tal-Unjoni ( 20 ), issa dan huwa stabbilit fi ħdan it-Trattati. Minbarra l-Artikolu 215 TFUE li, fil-fehma tiegħi, jixhed l-affermazzjoni tar-rwol tal-PESK fir-rigward tal-ġlieda kontra t-terroriżmu internazzjonali, niċċita l-Artikolu 43(1) TUE minn fejn jirriżulta li l-missjonijiet kollha li jaqgħu taħt il-politika ta’ sigurtà u ta’ difiża komuni ( 21 )“jistgħu jikkontribwixxu għall-ġlieda kontra t-terroriżmu, inkluż bl-appoġġ għal pajjiżi terzi fil-ġlieda kontra t-terroriżmu fit-territorji tagħhom”. Barra minn hekk, mill-kliem tal-klawżola tas-solidarjetà li hemm fl-Artikolu 222 TFUE, li jista’ jiskatta jekk Stat Membru jkun suġġett għal attakk terroristiku, jirriżulta li din hija marbuta mal-PESK, partikolament fejn huwa kkonċernat il-PSDK.

66.

Fil-każ inkwistjoni, il-fatt li r-regolament ikkontestat jikkostitwixxi wieħed mill-istrumenti li permezz tiegħu l-Unjoni implementat azzjoni ta’ natura internazzjonali deċiża fi ħdan il-Kunsill tas-Sigurtà u intiża bla dubju biex tippreserva l-paċi u s-sigurtà internazzjonali ( 22 ) huwa element importanti għall-kunsiderazzjoni li dan ir-regolament jista’ jintrabat mal-qasam tal-PESK. Huwa preċiżament fil-kuntest ta’ din il-politika li hija implementata s-sistema li tippermetti interazzjoni bejn id-deċiżjonijiet meħudin fil-livell tan-Nazzjonijiet Uniti u dawk meħudin fil-livell tal-Unjoni sabiex jiċċaħħdu mir-riżorsi l-persuni u l-entitajiet marbutin mal-movimenti terroristiċi. F’dan il-qafas għandha tiġi kkunsidrata, fil-kuntest ta’ dan ir-rikors, iċ-ċirkustanza li l-persuni u l-entitajiet koperti b’dawn il-miżuri ta’ ffriżar tal-fondi u tar-riżorsi ekonomiċi huma indikati mill-Kumitat tas-Sanzjonijiet u li l-Unjoni sempliċement tirriproduċi l-lista deċiża fi ħdan il-kumitat.

67.

Ladarba dan jiġi stabbilit, huwa ċar, fl-opinjoni tiegħi, li l-Artikolu 215(2) TFUE huwa l-unika dispożizzjoni li tippermetti lill-Unjoni tadotta miżuri restrittivi bħal dawk relatati mar-regolament ikkontestat. Fil-fatt, b’differenza mal-Artikolu 75 TFUE, l-Artikolu 215(2) TFUE ma jistax jintuża ħlief meta deċiżjoni rilevanti tal-PESK tistabbilixxi azzjoni ta’ dan it-tip. Meta l-Unjoni tieħu deċiżjoni li tmexxi azzjoni fix-xena internazzjonali, bħal dik li hemm fiċ-ċentru ta’ din il-kawża, fil-qafas tal-PESK, hija naturalment il-bażi legali li tistabbilixxi pont ma’ din il-politika li għandha tintuża. L-għażla ta’ bażi legali oħra tmur kontra t-tieni paragrafu tal-Artikolu 40 TUE li, infakkar, jafferma l-prinċipju li l-implementazzjoni tal-politiki imsemmijin fl-Artikoli 3 TFUE sa 6 TFUE ma għandhiex taffettwa l-applikazzjoni tal-proċeduri u l-portata rispettiva tal-poteri tal-istituzzjonijiet previsti mit-Trattati għall-eżerċizzju tal-kompetenzi tal-Unjoni skont il-PESK.

68.

Ngħid ukoll li, b’differenza mal-Artikolu 75 TFUE, l-Artikolu 215(2) TFUE jipprevedi l-adozzjoni ta’ “miżuri restrittivi” b’mod ġenerali, mingħajr ma jillimitahom għal dawk il-miżuri li jikkonċernaw il-moviment ta’ kapital u ta’ ħlasijiet. Għalhekk, l-Artikolu 215(2) TFUE jikkostitwixxi l-bażi legali li tippermetti lill-Unjoni li tadotta miżuri bħal dawk li jirrestrinġu l-moviment tal-persuni milquta jew li jipprojbixxu l-bejgħ ta’ armi lil dawk il-persuni ( 23 ). Għaldaqstant din id-dispożizzjoni tidher adatta aħjar għall-varjetà ta’ azzjonijiet li jistgħu jitmexxew mill-Unjoni fil-qafas tal-PESK fil-ġlieda kontra t-terroriżmu internazzjonali.

69.

Barra minn hekk ngħid ukoll li, sa fejn l-Artikoli 75 TFUE u 215 TFUE jaqgħu taħt politiki differenti tal-Unjoni Ewropea, li jsegwu għanijiet ċertament kumplimentari, imma mhux neċessarjament għandhom l-istess dimensjoni, u li jobdu regoli u proċeduri li huma differenti ( 24 ), ma jidhirlix li huwa opportun li wieħed jara r-relazzjoni bejn dawk iż-żewġ bażijiet legali billi waħda titqies lex generalis u l-oħra lex specialis. Ir-relazzjoni bejn l-Artikoli 75 u 215 TFUE għandha pjuttost titqies f’termini kumplimentari. Barra minn hekk, id-differenzi fil-proċeduri li bihom jistgħu jiġu implimentati l-Artikoli 75 TFUE u 215 TFUE, li jirriflettu d-diverġenza ta’ natura tal-politiki li huma marbutin magħhom, fil-fehma tiegħi, jipprekludu li dawn iż-żewġ bażijiet legali jintużaw fl-istess ħin.

70.

Huwa veru li fil-kuntest tal-Artikolu 215 TFUE, il-Parlament ma għandux poteri daqstant wesgħin bħal fil-kuntest tal-Artikolu 75 TFUE, li jistabbilixxi l-użu tal-proċedura leġiżlattiva ordinarja. Dan il-fatt, madankollu, ma huwiex determinanti fir-rigward tal-għażla tal-bażi legali tar-regolament ikkontestat. Kif jgħid ġustament il-Kunsill, ma humiex il-proċeduri li jiddefinixxu l-bażi ġuridika, imma bil-maqlub. Barra minn hekk, id-dimensjoni “PESK” li tikkaratterizza l-Artikolu 215 TFUE ċertament tispjega l-għażla magħmula mill-awturi tat-Trattat FUE dwar il-pożizzjoni tal-Parlament.

71.

Billi dan huwa l-każ, il-pożizzjoni li jokkupa l-Parlament fil-qasam tal-PESK ċertament ma hijiex negliġibbli. B’mod partikolari, l-obbligi li għandu, f’dan il-kuntest, ir-Rappreżentant Għoli f’termini ta’ relazzjonijiet mal-Parlament jippermettu, b’ċertu mod, li tiġi kkumpensata n-nuqqas ta’ proċedura leġiżlattiva ordinarja. Għalhekk l-ewwel paragrafu tal-Artikolu 36 TUE jistabbilixxi li r-Rappreżentant Għoli “għandu jikkonsulta regolarment mal-Parlament Ewropew dwar l-aspetti prinċipali u l-għażliet fundamentali tal-[PESK] u tal-[PSDK] u jinformah bl-evoluzzjoni ta’ din il-politika. Hu għandu jiżgura li l-opinjonijiet tal-Parlament Ewropew jiġu kkunsidrati kif dovut. Ir-rappreżentanti speċjali jistgħu jkunu involuti fl-għoti ta’ informazzjoni lill-Parlament Ewropew”. Għalhekk ir-Rappreżentant Għoli għandu l-obbligu li jinvolvi lill-Parlament fid-deċiżjonijiet meħudin f’materja tal-PESK, sa fejn jippermettu l-eżiġenzi ta’ kunfidenzjalità u ta’ għaġla li jikkaratterizzaw din il-politika tal-Unjoni. It-tieni paragrafu tal-Artikolu 36 TUE jkompli jgħid li l-Parlament “jista’ jagħmel mistoqsijiet jew rakkomandazzjonijiet lill-Kunsill jew lir-Rappreżentant Għoli. Għandu jkollu dibattitu darbtejn fis-sena dwar il-progress fl-implimentazzjoni tal-[PESK], inkluża l-[PSDK]”

72.

Fid-dawl tal-kunsiderazzjonijiet preċedenti, nista’ nfisser fil-qosor il-ħsieb tiegħi kif ġej. Nikkunsidra li r-regolament ikkontestat ġie adottat b’mod korrett fuq il-bażi tal-Artikolu 215(2) TFUE minħabba d-dimensjoni “PESK” tiegħu. Din id-dimensjoni qiegħda fil-fatt li, minn naħa, meta jissupplimenta l-qafas leġiżlattiv għall-miżuri restrittivi adottati fir-rigward ta’ persuni u entitajiet assoċjati ma’ Usama bin Laden, in-netwerk Al-Qaida u t-Talibani, dan ir-regolament għandu bħala għan prinċipali l-ġlieda kontra t-terroriżmu internazzjonali sabiex jinżammu l-paċi u s-sigurtà fil-livell internazzjonali. Min-naħa l-oħra, ir-regolament ikkontestat jagħmel parti mis-sistema implementata mill-Unjoni sabiex tmexxi ’l quddiem azzjoni internazzjonali deċiża fil-Kunsill tas-Sigurtà u, b’mod iktar speċifiku, għall-implementazzjoni ta’ miżuri għall-iffriżar ta’ fondi u riżorsi ekonomiċi fir-rigward ta’ persuni u entitajiet indikati mill-Kumitat tas-Sanzjonijiet.

73.

L-analiżi li wasslitni għall-konferma tal-għażla magħmula mil-leġiżlatur tal-Unjoni fl-użu tal-Artikolu 215(2) TFUE bħala bażi legali għar-regolament ikkontestat teħtieġ ftit iktar rimarki.

74.

L-ewwel nett nixtieq nenfasizza li l-każ imressaq quddiem il-Qorti tal-Ġustizzja fil-kuntest ta’ dan ir-rikors ma huwiex l-uniku wieħed fejn l-Artikolu 215(2) TFUE jista’ jikkostitwixxi bażi legali xierqa. Fil-fatt, din id-dispożizzjoni tista’ tippermetti lill-Unjoni li tadotta miżuri restrittivi kontra persuni u entitajiet marbutin ma’ organizzazzjonijiet terroristiċi biex tiġi ssuplimentata l-azzjoni deċiża mill-Unjoni fil-qafas tal-PESK intiża għal Stati terzi biex dawn tal-aħħar ikunu jistgħu jiġġieldu t-terroriżmu. Fl-ispirtu ta’ dak stabbilit fl-Artikolu 43(1) TUE, miżuri restrittivi bħal dawn jippermettu lill-Unjoni, flimkien mad-diversi missjonijiet ta’ natura ċivili u militari li hija tista’ twettaq skont il-PSDK, li tappoġġa azzjoni meħuda minn Stati terzi biex jiġġieldu t-terroriżmu fit-territorju tagħhom. Billi dawn il-miżuri jikkostitwixxu azzjoni mill-Unjoni fil-kuntest tal-PESK, għandhom ikunu bbażati fuq l-Artikolu 215(2) TFUE.

75.

Barra minn hekk, ma nistax naċċetta l-argument tal-Kunsill li d-delimitazzjoni bejn il-kampijiet ta’ applikazzjoni rispettivi tal-Artikoli 75 TFUE u 215(2) TFUE għandha tibbaża fuq distinzjoni bejn terroristi msejħin “interni”, it-terroristi msejħin “esterni” u t-terroristi msejħin “internazzjonali”. Fil-fatt kategorizzazzjoni bħal din tmur kontra n-natura stess tat-terroriżmu li, bl-attakk fuq il-valuri komuni u l-pedamenti stess tal-Istat tad-dritt, jirrigwarda lill-komunità internazzjonali kollha, tkun xi tkun il-portata ġeografika tat-theddida. Barra minn hekk, billi tiġġenera inċertezza legali, id-distinzjoni li jiddefendi l-Kunsill tmur kontra l-ħtieġa ta’ ġlieda effikaċi kontra t-terroriżmu.

76.

It-terroriżmu jinjora l-fruntieri. Anki jekk il-mira ewlenija ta’ organizzazzjoni terroristika tista’, għall-ewwel, tidher li hija limitata għal żona ġeografika partikolari, din l-organizzazzjoni spiss ikollha friegħi internazzjonali, b’mod partikolari għall-finanzjament tal-azzjonijiet tagħha. Barra minn hekk, jekk grupp terroristiku li jaġixxi ġeneralment ġewwa l-Unjoni jiddeċiedi f’mument partikolari li jikkollabora ma’ gruppi oħrajn terroristiċi li b’għanijiet simili u li jinsabu barra mill-Unjoni, il-persuni u l-entitajiet marbutin mal-ewwel grupp jitilfu b’hekk l-istatus ta’ terroristi “interni” biex isiru terroristi “esterni”, jekk mhux terroristi “internazzjonali”? Dawn l-elementi huma biżżejjed, fil-fehma tiegħi, biex juru l-impossibbiltà prattika li tiġi implementata distinzjoni bħal din.

77.

L-importanza tal-ġlieda kontra t-terroriżmu timponi, barra minn hekk, li jiġu mmobilizzati l-istrumenti legali kollha li joffru t-Trattati lill-Unjoni. F’din il-perspettiva, qed ninsisti fuq il-fatt li l-analiżi li wasslitni, f’din il-kawża, li norbot ir-regolament ikkontestat mal-qasam tal-PESK bl-ebda mod ma jfisser li kull azzjoni esterna tal-Unjoni bl-għan li tiġġieled it-terroriżmu għandha tittieħed sistematikament fil-kuntest tal-PESK.

78.

B’mod partikolari, ma għandhiex tiġi injorata d-dimensjoni esterna li jista’ jkollha l-azzjoni tal-Unjoni fil-qafas tal-politika tagħha tat-twaqqif ta’ SLSĠ. Bħala eżempju, insemmi li l-proposta għal deċiżjoni tal-Kunsill fuq il-konklużjoni tal-Ftehim bejn l-Istati Uniti tal-Amerika u l-Unjoni Ewropea fuq l-użu u t-trasferiment ta’ Rekords ta’ Ismijiet ta’ Passiġġieri (data PNR) lejn id-Dipartiment tal-Istati Uniti għas-Sigurtà Interna, li l-Kummissjoni ppreżentat fit-23 ta’ Novembru 2011 ( 25 ), hija bbażata fuq l-Artikoli 82(1)(d) TFUE u 87(2)(a) TFUE li jirrigwardaw rispettivament il-kooperazzjoni ġudizzjarja f’materja kriminali u l-kooperazzjoni tal-pulizija, flimkien mal-Artikolu 218(6)(a) TFUE li tirrigwarda l-konklużjoni ta’ ftehim internazzjonali mill-Unjoni.

79.

Fl-aħħar nett, infakkar li, fil-fehma tiegħi, l-Artikoli 75 TFUE u 215(2) TFUE għandhom jiġu analiżżati mhux bħala li jmorru kontra xulxin imma bħala li jikkompletaw lil xulxin. F’dan id-dawl inqis li l-fatt li r-regolament ikkontestat jiġi kkunsidrat li huwa bbażat kif xieraq fuq l-Artikolu 215(2) TFUE ma jfissirx li l-Artikolu 75 TFUE jitneħħielu s-sens tiegħu. Fil-fatt, jidhirli li dan l-aħħar artikolu jikkostitwixxi l-bażi legali opportuna għall-adozzjoni mill-Unjoni, b’mod awtonomu u indipendenti minn kull inizjattiva fil-qasam tal-PESK, ta’ miżuri ta’ ffriżar tal-fondi u ta’ riżorsi ekonomiċi kontra persuni u entitajiet mhux statali li jwettqu attivitajiet terroristiċi jew relatati, mingħajr ma jkun hemm bżonn li d-destinatarji ta’ dawn il-miżuri jiġu kklassifikati bħala terroristi “interni”, “esterni” jew “internazzjonali”.

80.

In-natura tal-Artikoli 215(2) TFUE u 75 TFUE bħala dispożizzjonijiet reċiprokament kumplimentari għandha sservi biex tneħħi t-tħassib, li huwa fundamentali fir-rigward tal-ġlieda kontra t-terroriżmu, li s-sistema ma għandu jkollha l-ebda difett ta’ natura li tikkomprometti l-għan mixtieq, li huwa li jiġu ppreservati d-demokraziji kontra azzjonijiet li fil-verità huma intiżi biex itemmu l-eżistenza tagħhom.

81.

F’dan id-dawl, l-Artikolu 215(2) TFUE għandu jikkostitwixxi l-bażi legali xierqa għall-adozzjoni, kontra persuni u entitajiet mhux statali, tal-miżuri restrittivi li ġejjin:

82.

Iżda, fl-oqsma ’l barra mill-PESK fejn l-Unjoni hija għal kollox libera, kemm biex tibni l-SLSĠ, li tiżviluppa l-kooperazzjoni tal-pulizija jew ġudizzjarja mal-Istati terzi, jew li żżid, fuq inizjattiva tagħha, mal-listi stabbiliti mill-Kumitat tas-Sanzjonijiet li hija tqis li ma humiex kompleti, l-Unjoni għandha mbagħad taġixxi fuq il-bażi tal-Artikolu 75 TFUE.

83.

Fi tmiem ta’ dawn l-argumenti qed nipproponi lill-Qorti tal-Ġustizzja li tikkunsidra li l-ewwel motiv imqajjem mill-Parlament għandu jiġi miċħud bħala infondat.

84.

Il-motiv sussidjarju, imqajjem mill-Parlament fil-każ li l-Qorti tal-Ġustizzja tikkunsidra, kif jiena qed nipproponilha, li l-Artikolu 215(2) TFUE jikkostitwixxi l-bażi legali xierqa għar-regolament ikkontestat, huwa maqsum f’żewġ partijiet. L-ewwel parti tirrigwarda l-allegat nuqqas ta’ osservanza tal-kundizzjoni dwar proposta konġunta tar-Rappreżentant Għoli u tal-Kummissjoni u t-tieni, fuq in-nuqqas allegat ta’ deċiżjoni PESK meħuda qabel ir-regolament ikkontestat.

85.

Skont il-Parlament, meta ġie adottat ir-regolament ikkontestat, fit-22 ta’ Diċembru 2009, ma kienx hemm Kummissjoni li setgħet leġittimament tippreżenta proposta konġunta flimkien mar-Rappreżentant Għoli billi l-mandat tal-Kummissjoni maħtura fit-22 ta’ Novembru 2004 skada fil-31 ta’ Ottubru 2009 u l-Kummissjoni l-ġdida bdiet taħdem biss fl-10 ta’ Frar 2010. Anki jekk kien aċċettabbli, fl-interess tal-kontinwità tax-xogħol ta’ din l-istituzzjoni li l-Kummissjoni maħtura fix-xahar ta’ Novembru 2004 tkompli tagħmel ċerti ħidmiet, l-awtorità tagħha kienet tkun limitata għall-ġestjoni ta’ kwistjonijiet kurrenti, jiġifieri deċiżjonijiet ta’ rutina. Hija ma kinitx awtorizzata li tieħu inizjattiva politika ewlenija li temenda l-bażi legali ta’ att li kien ifisser it-telf min-naħa tiegħu tan-natura leġiżlattiva tiegħu u ta’ kull influwenza mill-Parlament u l-parlamenti nazzjonali.

86.

Il-Parlament jikkunsidra li ma jistax jiġi sostnut li l-proposta ppreżentata mill-Kummissjoni u r-Rappreżentant Għoli kienet tikkostitwixxi sempliċi kontinwazzjoni tal-proposta ppreżentata mill-Kummissjoni li aġixxiet weħedha fit-22 ta’ April 2009. Barra minn hekk, il-mod kif ġiet ippreżentata l-proposta ma kienx jikkonforma mar-rwol u r-responsabbiltajiet tar-Rappreżentant Għoli, kif stabbilit mit-Trattat ta’ Lisbona. Ma huwiex konċepibbli li proposta konġunta meħtieġa skont l-Artikolu 215(2) TFUE tista’ tinbidel b’sempliċi approvazzjoni mir-Rappreżentant Għoli, bi proposta tal-Kummissjoni diġà eżistenti, adottata minn din tal-aħħar qabel id-dħul fis-seħħ tat-Trattat ta’ Lisbona. Barra minn hekk, ir-Rappreżentant Għoli, bħala responsabbli tal-PESK, huwa obbligat li jimmotiva b’mod adegwat l-proposta konġunta ppreżentata.

87.

Il-Kunsill isostni li meta l-mandat tal-Kummissjoni, mogħti fix-xahar ta’ Novembru 2004, skada fil-31 ta’ Ottubru 2009, din baqgħet tiffunzjona fl-istennija tal-ħatra ta’ Kummissjoni ġdida biex tiġi żgurata l-kontinwità meħtieġa tax-xogħol tal-istituzzjoni, kif inhu stabbilit fl-ewwel premessa tad-Deċiżjoni 2010/80/UE tal-Kunsill Ewropew, tad-9 ta’ Frar 2010, dwar il-ħatra tal-Kummissjoni Ewropea ( 27 ). Il-Parlament baqa’, matul il-perijodu tranżitorju mill-1 ta’ Novembru 2009 sal-10 ta’ Frar 2010, jittratta mal-Kummissjoni daqs li kieku kienet kompliet teżisti validament.

88.

Il-Kunsill jenfasizza li r-regolament ikkontestat ġie adottat fuq il-bażi ta’ proposta ta’ regolament tat-22 ta’ April 2009 approvata mir-Rappreżentant Għoli fl-14 ta’ Diċembru 2009. Din il-proposta baqgħet valida wara l-iskadenza tal-mandat tal-Kummissjoni fil-31 ta’ Ottubru 2009. Id-dħul fis-seħħ tat-Trattat ta’ Lisbona kellu bħala l-uniku effett li jemenda l-proċedura li tirregola l-adozzjoni tar-regolament ikkontestat.

89.

Il-Kunsill ifakkar li l-Kummissjoni ppreżentat lill-Parlament u lill-Kunsill, fit-2 ta’ Diċembru 2009, Komunikazzjoni fuq il-Konsegwenzi tad-dħul fis-seħħ tat-Trattat ta’ Lisbona dwar il-proċeduri interistituzzjonali ta’ teħid ta’ deċiżjonijiet li għadejjin bħalissa ( 28 ) li kienet tinkludi lista indikattiva ta’ proposti pendenti li hija kienet ippreżentat qabel id-dħul fis-seħħ tat-Trattat ta’ Lisbona u indikat, għal kull proposta minn dawn, il-konsegwenzi marbutin ma’ dan id-dħul fis-seħħ. Il-proposta tar-Regolament tat-22 ta’ April 2009 kienet inkluża f’din il-lista akkumpanjata b’riferiment li jindika li l-bażi legali tagħha kienet inbidlet, mill-artikoli ta’ qabel 60 KE, 301 KE u 308 KE għall-Artikolu 215 TFUE.

90.

Anki jekk wieħed jammetti li s-sitwazzjoni li fiha kienet il-Kummissjoni hija analoga għal dik prevista fl-aħħar paragrafu tal-Artikolu 246 TFUE (riżenja volontarja tal-membri kollha tal-Kummissjoni) il-ġurisprudenza ma tippermettix li jiġi konkluż li l-Kummissjoni qabżet il-qafas tal-ġestjoni tal-kwistjonijiet kurrenti. Fil-punt 96 tas-sentenza tagħha tas-6 ta’ Marzu 2003 Westdeutsche Landesbank Girozentrale u Land Nordrhein-Westfalen vs Il-Kummissjoni ( 29 ), il-Qorti Ġenerali ddeċidiet li deċiżjoni dwar l-għajnuna tal-Istat adottata mill-Kummissjoni wara r-riżenja kollettiva tal-membri tagħha “ma kinitx tikkostitwixxi inizjattiva politika ġdida, u b’hekk tmur lil hinn mis-setgħat ta’ Kummissjoni limitata għall-ġestjoni ta’ kwistjonijiet kurrenti”. Jekk din il-konklużjoni tgħodd għal deċiżjoni ġdida adottata mill-Kummissjoni matul il-perijodu kkunsidrat, hija a fortiori għandha tapplika fiċ-ċirkustanzi fejn proposta preeżistenti baqgħet pendenti. Barra minn dan, tqum il-kwistjoni jekk il-limitazzjoni għall-ġestjoni ta’ kwistjonijiet kurrenti prevista fit-tieni paragrafu tal-Artikolu 201 KE kinitx tapplika peress li l-Parlament ma kienx adotta l-mozzjoni ta’ ċensura fuq il-ġestjoni tal-Kummissjoni.

91.

Skont il-Kunsill, il-proposta konġunta tar-Rappreżentant Għoli u tal-Kummissjoni kienet ġiet debitament ippreżentata. Ir-Rappreżentant Għoli approvat, fl-14 ta’ Diċembru 2009, il-proposta tar-Regolament tat-22 ta’ April 2009. Ma kien la neċessarju u lanqas possibbli li tippreżenta stqarrija tar-raġunijiet separata. Lanqas ma kien ikun possibbli li tagħmel żidiet b’mod unilaterali lill-istqarrija tar-raġunijiet li hemm fil-premessi ta’ din il-proposta.

92.

L-argumenti mressqin mill-Kummissjoni inġenerali jaqblu ma dawk tal-Kunsill. Hija tippreċiża li l-komunikazzjoni tat-2 ta’ Diċembru 2009, imsemmija iktar ’il fuq, kienet inizjattiva purament legali u teknika li ma kienet tinvolvi l-ebda diskrezzjoni politika min-naħa tagħha. Barra minn hekk, din l-inizjattiva kienet indispensabbli biex tippermetti lill-leġiżlatur tal-Unjoni li jsegwi l-proċeduri leġiżlattivi pendenti wara d-dħul fis-seħħ tat-Trattat ta’ Lisbona. Il-Kummissjoni tenfasizza li l-ebda emenda ma saret lit-test tal-proposta ta’ Regolament tat-22 ta’ April 2009 u li r-Rappreżentant Għoli approvat din il-proposta fl-14 ta’ Diċembru 2009, kif jistabbilixxi l-Artikolu 215 TFUE.

93.

Skont il-Parlament, ir-regolament ikkontestat ma fih l-ebda riferiment għal deċiżjoni PESK, minkejja li l-Artikolu 215 TFUE jipprovdi għal dan. Il-preambolu ta’ dan ir-regolament jirreferi għall-Pożizzjoni Komuni 2002/402, imma din ma tikkostitiwixxix deċiżjoni fis-sens ta’ din id-dispożizzjoni. Pożizzjoni komuni adottata qabel id-dħul fis-seħħ tat-Trattat ta’ Lisbona ma tistax tiġi kkunsidrata bl-istess mod bħal tali deċiżjoni.

94.

L-argumenti tal-Kunsill dwar iż-żamma tal-effetti legali ta’ dik il-pożizzjoni komuni skont il-Protokoll (Nru 36) dwar id-dispożizzjonijiet tranżitorji, anness mat-Trattat UE u mat-Trattat FUE ( 30 ), u skont dak li din l-istituzzjoni sejjaħ il-“prinċipju ta’ kontinwità tal-atti” ma humiex rilevanti. Ma jeżisti l-ebda element f’dan il-Protokoll, u lanqas ebda prinċipju tad-dritt tal-Unjoni li jistabbilixxi li pożizzjoni komuni tista’ tieħu post id-deċiżjoni PESK. Il-Kunsill jinjora wkoll il-fatt li tali deċiżjoni nnifisha hija suġġetta għal stħarriġ ġudizzjarju minn parti li għandha locus standi u li l-Qorti tal-Ġustizzja stess tista’ anki tipprojbixxi lill-Kunsill milli jadotta miżuri skont l-Artikolu 215 TFUE.

95.

Fi kwalunkwe każ, ir-regolament ikkontestat huwa vvizzjat b’irregolarità sa fejn ma huwiex immotivat skont it-tieni paragrafu tal-Artikolu 296 TFUE.

96.

Il-Kunsill jenfasizza li r-Regolament Nru 881/2002, preċedut mill-adozzjoni tal-Pożizzjoni Komuni 2002/402, jiddefinixxi d-dispożizzjonijiet u l-proċeduri speċifiċi meħtieġa sabiex tiġi żgurata l-implementazzjoni tal-iffriżar tal-fondi. Anki kieku ġie deċiż li dan ir-regolament jiġi emendat wara s-sentenza Kadi u Al Barakaat International Foundation vs Il-Kunsill u Il-Kummissjoni, iċċitata iktar ’il fuq, billi jiżdiedu dispożizzjonijiet li jirrigwardaw il-garanziji proċedurali, ma kienx meħtieġ li tiġi emendata l-Pożizzjoni Komuni 2002/402 u lanqas li tiġi adottata deċiżjoni ġdida PESK għal dan l-iskop. Fil-fatt, meta att li jaqa’ taħt il-PESK li jkun jeħtieġ l-adozzjoni ta’ miżuri restrittivi jeżisti diġà (billi dan l-att ma jkunx tħassar, annullat jew emendat), ma jistax ikun meħtieġ li deċiżjoni ġdida PESK tiġi adottata skont il-Kapitolu 2 tat-Titolu V tat-Trattat UE. Approċċ bħal dan jinjora l-prinċipju ta’ kontinwità tal-atti sanċit fl-Artikolu 9 tal-Protokoll (Nru 36).

97.

Il-Kunsill isostni wkoll li ma jfissirx li peress li issa l-persuni u l-entitajiet elenkati jistgħu jippreżentaw rikors għal annullament kontra d-deċiżjonijiet PESK li jimponu miżuri restrittivi kontrihom, kwalunkwe emenda ta’ regolament eżistenti għandha neċessarjament tiġi ppreċeduta mill-adozzjoni ta’ deċiżjoni PESK ġdida.

98.

Nikkunsidra li l-kundizzjonijiet li bihom ġie adottat ir-regolament ikkontestat ma jmorrux kontra l-proċedura prevista fl-Artikolu 215(2) TFUE. L-elementi differenti li l-Parlament iressaq biex jikkontesta l-legalità ta’ dan ir-regolament ma jidhirlix li huma biżżejjed, fir-rigward tal-kuntest speċifiku li jikkostitwixxi d-dħul fis-seħħ ta’ Trattat ġdid, biex jiġi kkonstatat li hemm ksur tal-Artikolu 215(2) TFUE.

99.

Fl-ewwel lok, fir-rigward tal-allegat nuqqas ta’ proposta konformi mat-Trattati, inqis li anki kieku l-kompiti tal-Kummissjoni wara l-iskadenza tal-mandat tagħha fil-31 ta’ Ottubru 2009 kellhom jitqiesu bħala ġestjoni ta’ kwistjonijiet kurrenti, dan bl-ebda mod ma jipprekludi lill-Kummissjoni milli, minn naħa, issostni l-proposta ta’ regolament tagħha tat-22 ta’ April 2009 jew, min-naħa l-oħra, temendaha formalment billi tibdel ir-riferiment fih għall-bażi legali preċedenti b’riferiment għal wieħed ġdid. F’dan ir-rigward nosserva li, dwar il-proposti fejn ma kienx possibbli għalihom, minħabba n-natura u l-portata ta’ dawn l-atti, li ssir sempliċi sostituzzjoni tal-bażi legali preċedenti b’waħda ġdida, dawn ġew irtirati ( 31 ).

100.

Għar-rigward tal-ħtieġa ta’ proposta konġunta tar-Rappreżentant Għoli u tal-Kummissjoni, għandu jiġi kkonstatat li r-Rappreżentant Għoli uffiċjalment approvat, fl-14 ta’ Diċembru 2009, il-proposta għal regolament tat-22 ta’ April 2009. L-Artikolu 215 TFUE ma jeħtieġx li dan ir-Rappreżentant Għoli, li, infakkar, jagħmel parti mill-kulleġġ tal-Kummissjoni bħala viċi president u membru responsabbli mir-relazzjonijiet esterni ( 32 ), jagħmel stqarrija tar-raġunijiet separata jew jissupplimenta dik fil-proposta tal-Kummissjoni.

101.

Fit-tieni lok, dwar in-nuqqas allegat ta’ deċiżjoni PESK, għandu jiġi enfasizzat li, skont l-Artikolu 9 tal-Protokoll Nru 36, l-effetti legali tal-atti tal-istituzzjonijiet, il-korpi, l-uffiċċji u l-aġenziji tal-Unjoni, adottati abbażi tat-Trattat UE qabel id-dħul fis-seħħ tat-Trattat ta’ Lisbona huma ppreservati sakemm dawk l-atti jiġu revokati, annullati jew emendati fl-implementazzjoni tat-Trattati.

102.

Il-fatt li t-Trattat UE ma għadux jistabbilixxi pożizzjonijiet komuni imma deċiżjonijiet f’materja li tirrigwarda l-PESK ma għandux l-effett li jirrendi ineżistenti l-pożizzjonijiet komuni adottati taħt it-Trattat UE, fil-verżjoni tiegħu ta’ qabel it-Trattat ta’ Lisbona, għaliex kieku dan kien il-każ, l-Artikolu 9 tal-Protokoll (Nru 36) jitneħħielu ħafna mill-effettività tiegħu. Għall-istess raġuni, il-fatt li l-kuntest ġuridiku li fih isiru d-deċiżjonijiet PESK ma huwiex eżattament l-istess bħal dak li qabel kien jirregola l-pożizzjonijiet komuni ma jmurx kontra li dawn iż-żewġ kategoriji ta’ atti legali jistgħu jiġu assimilati għall-finijiet tal-implementazzjoni tal-Artikolu 215 TFUE. Ir-riferiment li jagħmel dan l-artikolu għal deċiżjoni adottata b’mod konformi mal-Kapitolu 2 tat-Titolu V tat-Trattat UE għandha neċessarjament, għalhekk, jekk naqrawha flimkien mal-Artikolu 9 tal-Protokoll (Nru 36), testendi għall-pożizzjonijiet komuni adottati qabel id-dħul fis-seħħ tat-Trattat ta’ Lisbona.

103.

Minn dan isegwi li t-tieni motiv tal-Parlament għandu wkoll jiġi miċħud bħala infondat.

104.

Fid-dawl tal-kunsiderazzjonijiet kollha li ssemmew iktar ’il fuq, nipproponi li l-Qorti tal-Ġustizzja jogħġobha: