Sentenza tal-Qorti tal-Ġustizzja (It-Tieni Awla) tal-21 ta’ Lulju 2011 (talba għal deċiżjoni preliminari tal-Court of Appeal (England & Wales), (Civil Division) (ir-Renju Unit) — Tural Oguz vs Secretary of State for the Home Department

(Kawża C-186/10) (1)

(Ftehim ta’ Assoċjazzjoni KEE-Turkija - Artikolu 41(1) tal-Protokoll Addizzjonali - Klawżola ta’ ‘standstill’ - Libertà ta’ stabbiliment - Rifjut ta’ tiġdid tal-permess ta’ residenza ta’ ċittadin Tork li stabbilixxa impriża bi ksur tal-kundizzjonijiet stabbiliti minn dan il-permess - Abbuż ta’ dritt)

2011/C 269/22

Lingwa tal-kawża: l-Ingliż

Qorti tar-rinviju

Court of Appeal (England & Wales) (Civil Division)

Partijiet fil-kawża prinċipali

Rikorrent: Tural Oguz

Konvenut: Secretary of State for the Home Department

fil-preżenza ta’: Centre for Advice on Individual Rights in Europe

Suġġett

Talba għal deċiżjoni preliminari — Court of Appeal (England & Wales) (Civil Division) — Interpretazzjoni tal-Artikolu 41(1) tal-Protokoll addizzjonali u l-protokoll finanzjarju, iffirmati fit-23 ta’ Novembru 1970, u mehmuż mal-Ftehim li jwaqqaf Assoċjazzjoni bejn il-Komunità Ekonomika Europea u t-Turkija u li jikkonċerna l-miżuri li għandhom jittieħdu għall-implimentazzjoni tagħhom — Regola ta’ standstill — Portata — Projbizzjoni għall-Istati Membru milli jintroduċu restrizzjonijiet ġodda fir-rigward tal-libertà ta’ stabbiliment u tal-libertà li jiġu pprovduti servizzi — Ċittadin Tork li beda negozju fir-Renju Unit wara li kiseb permess ta’ residenza bil-kundizzjoni li ma jinvolvix ruħu f’negozju mingħajr il-kunsens tas-Secretary of State — Rifjut li dan il-permess jiġi mġedded minħabba ksur tal-kundizzjonijiet tiegħu

Dispożittiv

L-Artikolu 41(1) tal-Protokoll Addizzjonali, iffirmat fit-23 ta’ Novembru 1970 fi Brussell, u konkluż, approvat u kkonfermat f’isem il-Komunità bir-Regolament tal-Kunsill (KEE) Nru 2760/72, tad-19 ta’ Diċembru 1972, għandu jiġi interpretat fis-sens li dan jista’ jiġi invokat minn ċittadin Tork, li jkollu permess joqgħod fi Stat Membru bil-kundizzjoni li ma jinvolvix ruħu f’negozju jew fi professjoni, li madankollu jibda jaħdem għal rasu bi ksur ta’ din il-kundizzjoni u mbagħad japplika mal-awtoritajiet nazzjonali sabiex jestendi l-permess ta’ residenza tiegħu fuq il-bażi tan-negozju li sadattant ikun stabbilixxa.

(1)  ĠU C 179, 03.07.2010.