16.5.2009

Il-Ġurnal Uffiċjali tal-Unjoni Ewropea

C 113/43

Rikors ippreżentat fit-23 ta’ Marzu 2009 — Protege International vs Il-Kummissjoni

(Kawża T-119/09)

2009/C 113/86

Lingwa tal-kawża: Il-Franċiż

Partijiet

Rikorrenti: Protege International Ltd (Londra, ir-Renju Unit) (rappreżentant: D. Shefet, avukat)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

—	tannulla d-deċiżjoni mogħtija mill-Kummissjoni fit-23 ta’ Jannar 2009, dwar proċedura skont l-Artikolu 82 tat-Trattat KE (Każ COMP/39414 — Protégé International vs Pernod Ricard)

Motivi u argumenti prinċipali

Ir-rikorrenti titlob l-annullament tad-deċiżjoni tal-Kummissjoni, tat-23 ta’ Jannar 2009, li biha l-Kummissjoni ċaħdet, wara li waslet għall-konklużjoni li ma kienx hemm biżżejjed interess Komunitarju sabiex l-investigazzjoni titkompla, l-ilment imressaq mir-rikorrenti kontra Pernod Ricard dwar l-allegat abbuż minn pożizzjoni dominanti pprattikat minn din tal-aħħar fis-suq tal-wiski Irlandiż li jikkonsisti, min-naħa, fi proċedimenti legali mibdija minn Pernod Richard kontra r-rikorrenti għar-reġistrazzjoni mir-rikorrenti tat-trade marks “WILD GEESE”, “WILD GEESE RARE IRISH WHISKEY” u “WILD GEESE IRISH SOLDIERS AND HEROES”, u, min-naħa l-oħra, f’rifjut ta’ provvista.

Insostenn tar-rikors tagħha, ir-rikorrenti ssostni li:

—

il-proċedimenti legali mibdija minn Pernod Richard ma għandhomx bħala għan il-protezzjoni tad-drittijiet ta’ proprjetà intellettwali ta’ dan tal-aħħar għat-trade mark tiegħu “WILD TURKEY”, inkwantu ma teżistix il-probabbiltà ta’ konfużjoni bejn it-trade marks inkwistjoni, imma li telimina lir-rikorrenti, li hija kompetitriċi ta’ Pernod Richard, mis-suq tal-wiski Irlandiż;

—	abbuż minn pożizzjoni dominanti għaliex Pernod Richard irrifjuta li jipprovdi wiski Irlandiż lir-rikorrenti minħabba li din tal-aħħar irrifjutat li taċċetta l-kundizzjonijiet ta’ restrizzjoni fuq il-bejgħ fis-swieq approvati minn Pernod Richard;

—	jeżisti interess Komunitarju, sa fejn l-allegat abbuż jikkonċerna Stati Membri differenti u t-territorju Komunitarju kollhu kemm hu.