Rikors ippreżentat fil-15 ta’ Diċembru 2009 — Il-Kummissjoni Ewropea vs Ir-Rumanija

(Kawża C-522/09)

2010/C 51/31

Lingwa tal-kawża: ir-Rumen

Partijiet

Rikorrenti: Il-Kummissjoni Ewropea (rappreżentanti: D. Recchia u L. Bouyon, aġenti)

Konvenuta: Ir-Rumanija

Talbiet tar-rikorrenti

Motivi u argumenti prinċipali

Id-Direttiva tal-Kunsill 79/409/KEE, tat-2 ta’ April 1979, dwar il-konservazzjoni tal-għasafar selvaġġi, kif emendata, tirregola l-konservazzjoni tal-ispeċi kollha ta’ għasafar selvaġġi li jinsabu fin-natura fit-territorju Ewropew tal-Istati Membri. L-obbligi li jirriżultaw mid-dispożizzjonijiet tad-Direttiva huma applikabbli għar-Rumanija mid-data tal-adeżjoni tagħha (fl-1 ta’ Jannar 2007) u, konsegwentement, ir-Rumanija għandha l-obbligu li twettaq, b’mod konformi mal-Artikolu 4(1) u (2) tad-Direttiva msemmija, il-klassifikazzjoni taż-żoni speċjali ta’ protezzjoni fit-territorju tagħha.

Insegwitu għall-eżami taż-żoni speċjali ta’ protezzjoni kklassifikati mill-awtoritajiet Rumeni, il-Kummissjoni waslet għall-konklużjoni li tali klassifikazzjoni tat-territoriji l-iktar adatti bħala żoni speċjali ta’ protezzjoni mhijiex biżżejjed fin-numru u fid-daqs.

F’dan il-każ, iż-żoni kklassifikati mir-Rumanija bħala żoni speċjali ta’ protezzjoni ġew eżaminati fid-dawl tal-Inventarju taż-Żoni Importanti għall-Għasafar imwettaq mill-organizzazzjoni Birdlife International, u fid-dawl ta’ analiżi simili mwettqa mis-Societatea Ornitologică Română. Il-proċedura għall-klassifikazzjoni taż-żoni importanti għall-għasafar fir-Rumanija ntemmet fl-2007, u wasslet għall-klassifikazzjoni ta’ 130 żona importanti għall-għasafar.

Fuq total ta’ 130 żona importanti għall-għasafar, b’superfiċi ta’ 4 157 500 ettaru, l-awtoritajiet Rumeni kklassifikaw bħala żoni speċjali ta’ protezzjoni 108 żoni biss, b’superfiċi ta’ 2 998 700 ettaru. Minn fost dawn il-108 żoni, 38 biss ġew ikklassifikati kompletament bħala żoni speċjali ta’ protezzjoni.

Bl-istess mod, 21 żona importanti għall-għasafar, b’superfiċi ta’ 341 013 ettaru, għadhom ma ġewx ikklassifikati bħala żoni speċjali ta’ protezzjoni fir-Rumanija, u d-daqs ta’ 71 żona speċjali ta’ protezzjoni huwa ferm differenti minn dak taż-żoni importanti għall-għasafar.

Barra minn hekk, għalkemm 71 żona importanti għall-għasafar ma ġewx ikklassifikati kompletament bħala żoni speċjali ta’ protezzjoni u 21 żona importanti għall-għasafar ma ġewx inklużi fil-proċedura ta’ klassifikazzjoni, l-awtoritajiet Rumeni ma ppreżentaw l-ebda inventarju u l-ebda metodoloġija xjentifika li jiġġustifikaw tali disprekanzi bejn iż-żoni importanti għall-għasafar u ż-żoni speċjali ta’ protezzjoni li ġew ikklassifikati.

Tali nuqqas ta’ klassifikazzjoni, kif ukoll il-klassifikazzjoni parzjali tad-diversi żoni importanti għall-għasafar iwasslu għal nuqqas ta’ miżuri ta’ protezzjoni anki f’dak li jirrigwarda l-ispeċi msemmija fl-Anness I tad-Direttiva 79/409/KEE, kif ukoll f’dak li jirrigwarda lill-ispeċi migratorji, bi ksur tal-Artikolu 4(1) u (2) tad-Direttiva 79/409.

Għaldaqstant, il-Kummissjoni tqis li, minħabba l-klassifikazzjoni insuffiċjenti taż-żoni speċjali ta’ protezzjoni, kemm fin-numru kif ukoll fid-daqs, ir-Rumanija naqset milli twettaq l-obbligi tagħha taħt l-Artikolu 4(1) u (2) tad-Direttiva 79/409.

(1)  Direttiva tal-Kunsill 79/409/KEE, tat-2 ta’ April 1979, dwar il-konsevazzjoni tal-għasafar selvaġġi (ĠU Edizzjoni Speċjali bil-Malti, Kapitolu 15, Vol. 1 p. 98 — 117)