7.2.2009   

MT

Il-Ġurnal Uffiċjali tal-Unjoni Ewropea

C 32/21

Appell ippreżentat fit-28 ta' Novembru 2008 minn Luigi Marcuccio mid-digriet tal-Qorti tal-Prim'Istanza (Ir-Raba' Awla) mogħti fid-9 ta' Settembru 2008 fil-Kawża T-144/08, Marcuccio vs Il-Kummissjoni

(Kawża C-528/08 P)

(2009/C 32/36)

Lingwa tal-kawża: It-Taljan

Partijiet

Appellant: Luigi Marcuccio (rappreżentant: G. Cipressa, avukat)

Appellata: Il-Kummissjoni tal-Komunitajiet Ewropej

Talbiet tal-appellant

—

1. F'kull każ:

(l.a)

tannulla d-digriet appellat in toto;

(l.b)

tiddikjara li l-appell inkwistjoni huwa perfettament ammissibbli;

u barra minn hekk:

—

2/A prinċipalment: (2/A.l) tannulla d-deċiżjoni kkontestata; (2/A.2) tannulla sa fejn meħtieġ, il-lista tar-rimburżar tat-18 ta' Lulju 2005 (iktar 'il quddiem, “il-lista tar-rimburżar tat-18 ta' Lulju 2005”); (2/A.3) tannulla sa fejn meħtieġ, id-deċiżjoni li ċaħdet it-talba inkwistjoni tal-appellant; (2/A.4) tikkundanna lill-appellata bħala ħlas lura tal-bqija ta' 100 % tal-ispejjeż, jiġifieri sabiex jinkiseb il-ħlas lura tal-100 % tal-ispejjeż mediċi inkwistjoni, bħala kumpens għad-dannu kkawżat mill-aġir illegali tal-appellata, li jammontaw għas somma ta' EUR 89,56 (jiġifieri disgħa u tmenin euro u 56ċ) jew dik is-somma ikbar jew iżgħar li din il-Qorti jidrilha li hija ġusta u ekwa; (2/A.5) tikkundanna lill-appellata tħallas lill-appellant l-interessi għad-dewmien ta' ħlas fuq is-sommom imsemmija preċedentement fil-punt 2.A.4 ta' dan ir-rikors tall-appell, f'dan il-każ bil-kapitalizzazzjoni, bid-dies a quo u d-dies ad quem li għandhom jiġu determinati skont l-atti tal-kawża inkwistjoni; (2/A.6) tikkundanna lill-appellata tħallas lura favur l-appellant, l-isejjeż kollha tal-kawża sostnuti;

—

2/B. sussidjarjament, tirrinvija l-kawża inkwistjoni quddiem il-Qorti tal-Prim'Istanza sabiex din terġa' tiddeċiedi fuq il-mertu tagħha.

Aggravji u argumenti prinċipali

1.

Żnaturament u distorsjoni tal-fatti kif ukoll tal-affermazzjonijiet tal-appellant fl-atti ppreżentati minnu, minħabba l-ineżattezza materjali tal-istħarriġ imwettaq mill-Qorti tal-Prim'Istanza (b'mod partikolari l-punti 29, 31, 34 u 38 tad-digriet appellat).

2.

Interpretazzjoni u applikazzjoni falza u żbaljata tal-kunċett ta' att li jista' jiġi kkontestat, anki minħabba konfużjoni, nuqqas ta' motivazzjoni, nuqqas ta' loġika, ksur tal-Artikolu 231 tat-Trattat KE u nuqqas ta' għarfien tal-ġurisprudenza relattiva għall-effetti tal-annullament, min-naħa tal-Qorti Komunitarja, ta' deċiżjoni li toriġina minn istituzzjoni Komunitarja, ksur tal-prinċipju tal-awtorità tar-res iudicata, ksur tal-prinċipju tas-separazzjoni tal-poteri (b'mod partikolari l-punti 32 u 34 tad-digriet appellat).

3.

Interpretazzjoni u applikazzjoni falza u żbaljata tal-Artikolu 90 u l-Artikolu 91 tar-Regolamenti tal-Persunal u tal-kunċett ta' deċiżjoni li toriġina minn istituzzjoni Komunitarja.

4.

Ksur tal-prinċipju tal-qorti kompetenti skont il-liġi u irregolaritajiet fil-proċeduri (errores in procedendo) ta' serjetà tali li jaffettwaw id-drittijiet tal-appellant, b'mod partikulari d-drittijiet għal difiża, kif ukoll għal smigħ xieraq.