19.7.2008 |
MT |
Il-Ġurnal Uffiċjali ta’ l-Unjoni Ewropea |
C 183/14 |
Talba għal deċiżjoni preliminari magħmula mill-Hessisches Finanzgericht (il-Ġermanja) fis-16 ta' Mejju 2008 — Plantanol GmbH & Co.KG vs Hauptzollamt Darmstadt
(Kawża C-201/08)
(2008/C 183/28)
Lingwa tal-kawża: Il-Ġermaniż
Qorti tar-rinviju
Hessisches Finanzgericht (il-Ġermanja)
Partijiet fil-kawża prinċipali
Rikorrenti: Plantanol GmbH & Co.KG
Konvenuta: Hauptzollamt Darmstadt
Domandi preliminari
1) |
L-Artikolu 3 tad-Direttiva 2003/30/KE tal-Parlament Ewropew u tal-Kunsill, tat-8 ta' Mejju 2003, dwar il-promozzjoni ta' l-użu tal-bijokarburanti jew karburanti oħra rinnovabbli għat-trasport (direttiva dwar il-bijokarburanti) (1) jipprekludi, fid-dawl b'mod partikolari tal-premessi 10, 12, 14, 19, 22 u 27 ta' din id-direttiva, dispożizzjoni nazzjonali, bħalma huwa l-ewwel punt ta' l-Artikolu 50(1) tal-liġi dwar l-intaxxar ta' l-enerġija (Energiesteuergesetz), emendat bil-liġi rigward kwoti fil-qasam tal-bijokarburanti (Biokraftstoffquotengesetz), tat-18 ta' Diċembru 2006, li jeskludi mill-benefiċċju ta' eżenzjoni mit-taxxi l-parti ta' taħlita ta' bijokarburanti li tikkonsisti f'bijokarburant magħmul minn żejt veġetali li jikkorrispondi għall-istandard DIN V 51605 (fil-verżjoni tiegħu f'Lulju 2006)? |
2) |
Il-prinċipji tad-dritt Komunitarju ta' ċertezza legali u ta' protezzjoni ta' l-aspettattivi leġittimi jeżiġu li Stat Membru jkun jista' jimmodifika, bi ħsara għall-impriżi li jibbenefikaw minnhom, id-dispożizzjonijiet adottati għall-finijiet tat-traspożizzjoni tad-direttiva dwar il-bijokarburanti u li għandhom bħala għan l-istabbiliment ta' sistema li tikkonsisti f'vantaġġi fiskali mqassmin fuq diversi snin, biss f'ċirkustanzi ferm eċċezzjonali matul il-perijodu ta' applikazzjoni tas-sistema in kwistjoni? |
(1) ĠU L 123, p. 42.