Sentenza tal-Qorti tal-Ġustizzja (It-Tielet Awla) tal-24 ta’ April 2008 – Il-Kummissjoni vs Il-Lussemburgu

(Kawża C‑286/07)

“Nuqqas ta’ Stat li jwettaq obbligu – Artikolu 28 KE – Reġistrazzjoni tal-vetturi użati preċedentement irreġistrati fi Stat Membri oħra – Rekwiżit ta’ estratt mir-reġistru tal-kummerċ jew ta’ dokument ekwivalenti li jiċċertifika r-reġistrazzjoni tal-bejjiegħ tal-vettura bħala kummerċjant – Eżenzjoni mir-rekwiżit ta’ preżentazzjoni tal-fatturi jew ta’ dokumenti oħra li jiċċertifikaw it-trasferimenti ta’ proprjetà preċedenti”

Moviment liberu tal-merkanzija - Restrizzjonijiet kwantitattivi - Miżuri li għandhom effett ekwivalenti (Artikoli 28 KE u 30 KE) (ara l-punti 26, 28, 32, 35, 38-39, 43, 46-48 u d-dispożittiv)

Suġġett

Nuqqas ta’ Stat li jwettaq obbligu - Ksur ta’ l-Artikolu 28 KE - Leġiżlazzjoni nazzjonali li timponi, għall-finijiet tar-reġistrazzjoni tal-vetturi użati preċedentement irreġistrati fi Stati Membri oħra, il-preżentazzjoni ta’ estratt mir-reġistrazzjoni tal-bejjiegħ tal-vettura fir-reġistru tal-kummerċ, filwaqt li l-vetturi rreġistrati preċedentement fil-Lussemburgu mhumiex suġġetti għal tali obbligu - Ostakolu għall-moviment liberu tal-merkanzija - Nuqqas ta’ ġustifikazzjoni u ta’ proporzjonalità.

Dispożittiv

1)

Billi impona, permezz tal-prassi kkontestata, għall-finijiet tar-reġistrazzjoni fil-Lussemburgu tal-vetturi, il-preżentazzjoni ta’ estratt mir-registru tal-kummerċ jew ta’ dokument ekwivalenti li jiċċertifika r-reġistrazzjoni tal-bejjiegħ tal-vettura bħala kummerċjant, bl-eċċezzjoni tal-kummerċjanti li jidhru fir-reġistru tas-Société Nationale de Contrôle Technique, il-Gran Dukat tal-Lussemburgu naqas milli jwettaq l-obbligi imposti fuqu taħt l-Artikolu 28 KE.

2)

Il-Gran Dukat tal-Lussemburgu huwa kkundannat għall-ispejjeż.