1.

Dan ir-rikors għal nuqqas ta’ twettiq ta’ obbligu jirrigwarda l-kompatibbiltà tal-leġiżlazzjoni Franċiża dwar il-kundizzjonijiet għall-awtorizzazzjoni ta’ l-importazzjonijiet paralleli ta’ prodotti għall-protezzjoni tal-pjanti ma’ l-Artikolu 28 KE. B’mod iktar preċiż, il-Kummissjoni tal-Komunitajiet Ewropej tfittex li jiġi deċiż li, billi teħtieġ li l-prodott għall-protezzjoni tal-pjanti importat b’mod parallel u l-prodott ta’ referenza jkollhom oriġini komuni, ir-Repubblika Franċiża naqset li twettaq l-obbligi tagħha skond l-Artikolu 28 KE.

2.

Skond l-Artikolu 28 KE, “[r]estrizzjonijiet kwantitattivi fuq l-importazzjoni u kull miżura li għandha effett ekwivalenti għandhom ikunu projbiti bejn l-Istati Membri”.

3.

Skond l-Artikolu 3(1) tad-Direttiva tal-Kunsill 91/414/KEE, tal-15 ta’ Lulju 1991, li tikkonċerna t-tqegħid fis-suq ta’ prodotti għall-protezzjoni tal-pjanti ( 2 ) (iktar ’il quddiem id-“Direttiva”), “[l]-Istati Membri għandhom jistipulaw illi l-prodotti għall-ħarsien [protezzjoni] tal-pjanti ma jistgħux jiġu introdotti fis-suq u użati fit-territorju tagħhom sakemm ma jkunux awtorizzaw il-prodott [in kwistjoni] […]”.

4.

L-Artikolu 5 tad-Direttiva jistabbilixxi li “[f]id-dawl tat-tagħrif xjentifiku u tekniku preżenti, sustanza attiva għandha tiġi inkluża fl-Anness I għal perjodu ta’ żmien inizjali li ma jkunx jaqbeż l-10 snin […]”.

5.

B’mod partikolari, l-ewwel subparagrafu ta’ l-Artikolu 9(1) tad-Direttiva jipprovdi, b’mod partikolari, li l-“[a]pplikazzjoni għall-awtorizzazzjoni ta’ prodott għall-ħarsien [protezzjoni] tal-pjanti għandha ssir minn jew f’isem il-persuna responsabbli sabiex ipoġġiha għall-ewwel darba fis-suq ġo Stat Membru lill-awtoritajiet kompetenti ta’ kull Stat Membru meta l-prodott għall-ħarsien tal-pjanti huwa intiż biex jitpoġġa fis-suq”. L-ewwel awtorizzazzjoni teħtieġ evalwazzjoni kompleta tal-proprjetajiet tal-prodott.

6.

Madankollu, id-direttiva ma fiha l-ebda dispożizzjoni li tirregola l-kundizzjonijiet għall-għoti ta’ awtorizzazzjonijiet ta’ tqegħid fis-suq (iktar ’il quddiem l-“ATS”) f’każijiet ta’ importazzjonijiet paralleli, jiġifieri meta operatur ifittex li jimporta prodott awtorizzat fi Stat Membru lejn Stat Membru ieħor li fih prodott simili diġà ġie awtorizzat.

7.

Skond l-Artikolu L 253-1 tal-Kodiċi Rurali, “it-tqegħid fis-suq, l-użu u d-detenzjoni mill-utent finali tal-prodotti għall-protezzjoni tal-pjanti huma pprojbiti jekk dawn il-prodotti ma jibbenefikawx minn awtorizzazzjoni ta’ tqegħid fis-suq […]”.

8.

Il-kundizzjoniiet għall-għoti ta’ l-ATS tal-prodotti għall-protezzjoni tal-pjanti fi Franza huma definiti bid-Digriet Nru 94-359 tal-5 ta’ Mejju 1994 ( 3 ), adottat għat-traspożizzjoni tad-Direttiva.

9.

Id-Digriet Nru 2001-317 ta’ l-4 ta’ April 2001 jistabbilixxi proċedura simplifikata għall-għoti ta’ l-ATS tal-prodotti għall-protezzjoni tal-pjanti li jkunu ġejjin miż-Żona Ekonomika Ewropea ( 4 ).

10.

Skond l-Artikolu 1 tad-Digriet Nru 2001-317:

“[L]-introduzzjoni fit-territorju nazzjonali ta’ prodott għall-protezzjoni tal-pjanti li jkun ġej minn Stat taż-Żona Ekonomika Ewropea li fih diġà jibbenefika minn awtorizzazzjoni ta’ tqegħid fis-suq maħruġa b’mod konformi mad-Direttiva 91/414/KEE msemmija iktar ’il fuq, u li huwa identiku għal prodott iktar ’il quddiem imsejjaħ ‘prodott ta’ referenza’, hija awtorizzata taħt is-segwenti kundizzjonijiet:

L-identiċità tal-prodott introdott fit-territorju nazzjonali mal-prodott ta’ referenza għandha tiġi evalwata fid-dawl tat-tliet kriterji segwenti:

11.

Skond l-Artikolu 4 ta’ l-imsemmi digriet, “l-awtorizzazzjoni ta’ tqegħid fis-suq tal-prodott introdott fit-territorju nazzjonali tista’ tiġi rrifjutata jew irtirata […] għal motivi relatati mal-protezzjoni tas-saħħa tal-bniedem jew ta’ l-annimali kif ukoll ta’ l-ambjent; […] minħabba nuqqas ta’ identiċità, fis-sens ta’ l-Artikolu 1, mal-prodott ta’ referenza […]”.

12.

Dan id-digriet huwa kkompletat mill-Ordni tas-17 ta’ Lulju 2001 li tistabbilixxi proċedura simplifikata ta’ l-ATS fil-kuntest ta’ importazzjoni parallela ta’ prodotti għall-protezzjoni tal-pjanti ( 5 ).

13.

Fid-29 ta’ Frar 2000, l-impriża Endres-Merath stabbilita f’Tettnang (il-Ġermanja) talbet lill-awtoritajiet Franċiżi sabiex jagħtuha l-awtorizzazzjoni sabiex tqiegħed fis-suq Franċiż, bl-isem Deltamex, il-prodott għall-protezzjoni tal-pjanti Deltamethrin provenjenti mill-Awstrija fejn kien ikkummerċjalizzat bl-isem Mac-Deltamethrin. Il-prodott korrispondenti li diġà huwa awtorizzat fi Franza jismu Decis.

14.

Skond l-ispjegazzjonijiet mogħtija mill-Gvern Franċiż, id-Deltamex, bħad-Decis, huwa insettiċida li jaħdem bil-kuntatt u bl-inġestjoni, b’azzjoni rapida u irriversibbli fuq is-sistema nervuża ta’ l-insetti. Huwa jintuża, b’mod partikolari, fuq iċ-ċereali, il-kolza, il-qamħirrum, il-ħxejjex, il-patata, il-piżelli, id-dwieli u t-tkabbir tas-siġar.

15.

Fis-17 ta’ April 2000, l-awtoritajiet Franċiżi ħarġu ATS lill-impriża Endres-Merath għad-Deltamex għal perijodu ta’ għaxar snin. Madankollu, b’deċiżjoni tal-31 ta’ Lulju 2001, l-awtoritajiet Franċiżi rtiraw din l-awtorizzazzjoni.

16.

Dan l-irtirar ġie diskuss matul laqgħa bilaterali bejn l-awtoritajiet Franċiżi u l-Kummissjoni, li nżammet f’Pariġi fl-24 ta’ Ġunju 2004, fejn il-Kummissjoni xtaqet issir taf ir-raġunijiet għall-irtirar imsemmi. Ir-rappreżentanti tal-Ministeru ta’ l-Agrikultura qalu li l-informazzjoni dwar id-Deltamex ma kinitx ċara u semmew diffikultajiet dwar xi impuritajiet u problemi bit-tikkettjar.

17.

Peress li ma kinitx konvinta b’dawn l-ispjegazzjonijiet, il-Kummissjoni, fit-18 ta’ Ottubru 2004, bagħtet ittra ta’ intimazzjoni lill-awtoritajiet Franċiżi li fiha qalet li r-Repubblika Franċiża naqset li twettaq l-obbligi imposti fuqha skond l-Artikoli 28 KE u 30 KE:

18.

L-awtoritajiet Franċiżi ma rrispondewx għal din l-ittra ta’ intimazzjoni.

19.

Permezz ta’ ittra tat-13 ta’ Lulju 2005, il-Kummissjoni bagħtet opinjoni motivata lir-Repubblika Franċiża fejn qalet li, bil-fatt li teħtieġ li l-prodott għall-protezzjoni tal-pjanti importat b’mod parallel u l-prodott ta’ referenza jkollhom “oriġini komuni”, ir-Repubblika Franċiża naqset li twettaq l-obbligi imposti fuqha skond l-Artikolu 28 KE. L-ilmenti l-oħra msemmija fl-ittra ta’ intimazzjoni ma jissemmewx fl-opinjoni motivata.

20.

L-awtoritajiet Franċiżi rrispondew, permezz ta’ ittra tal-15 ta’ Settembru 2005, li r-rekwiżit ta’ oriġini komuni taż-żewġ prodotti imposta mid-Digriet Nru 2001-317, li għandu jinftiehem fis-sens li dawn ikunu ġew immanifatturati skond l-istess formulazzjoni, mill-istess kumpannija u minn impriżi konnessi jew li joperaw taħt liċenzja, mhuwiex ħlief ir-repetizzjoni tat-termini tas-sentenza tal-11 ta’ Marzu 1999, British Agrochemicals Association ( 6 ).

21.

Peress li ma kinitx sodisfatta b’din ir-risposta, il-Kummissjoni, fl-4 ta’ Mejju 2006, ressqet dan ir-rikors abbażi ta’ l-Artikolu 226 KE.

22.

Il-Kummissjoni titlob li l-Qorti tal-Ġustizzja jogħġobha:

23.

Ir-Repubblika Franċiża titlob li l-Qorti tal-Ġustizzja jogħġobha:

24.

Ir-Renju ta’ l-Olanda jintervjeni in sostenn tar-Repubblika Franċiża u jitlob li l-Qorti tal-Ġustizzja jogħġobha tiċħad dan ir-rikors.

25.

Il-Kummissjoni ssostni li l-issuġġettar ta’ l-għoti u taż-żamma ta’ awtorizzazzjoni għall-importazzjoni parallela ta’ prodotti għall-protezzjoni tal-pjanti għall-prova ta’ l-oriġini komuni tal-prodott importat u tal-prodott ta’ referenza tikkostitwixxi restrizzjoni għall-moviment liberu tal-merkanzija, bi ksur ta’ l-Artikolu 28 KE. Barra minn hekk, din il-kundizzjoni tmur lil hinn minn dak li huwa neċessarju biex jintlaħaq l-għan tal-protezzjoni tas-saħħa pubblika, ta’ l-annimali u ta’ l-ambjent.

26.

Fil-fatt, fis-sentenza ta’ l-1 ta’ April 2004, Kohlpharma ( 7 ), il-Qorti tal-Ġustizzja ddikjarat li, fir-rigward ta’ żewġ prodotti mediċinali li m’għandhomx differenzi sinjifikattivi bejniethom, in-nuqqas ta’ oriġini komuni bejn il-prodott mediċinali ta’ referenza u l-prodott mediċinali importat ma jistax fih innifsu jikkostitwixxi raġuni għar-rifjut ta’ l-ATS għat-tieni prodott mediċinali. Din is-soluzzjoni, mogħtija fir-rigward tal-prodotti mediċinali, tista’ tiġi trasposta għall-prodotti għall-protezzjoni tal-pjanti. Il-Kummissjoni tirreferi għas-sentenza ta’ l-14 ta’ Lulju 2005, Il-Kummissjoni vs Il-Ġermanja ( 8 ), li, fil-punt 24 tagħha, tgħid li “il-kummerċjalizzazzjoni tal-prodotti mediċinali u tal-prodotti għall-protezzjoni tal-pjanti tinvolvi interessi komparabbli”, u, fil-punt 27 tagħha, tgħid li “il-punt ta’ liġi in kwistjoni huwa l-istess f’dan il-każ u fil-ġurisprudenza relattiva għall-importazzjonijiet paralleli ta’ prodotti mediċinali”.

27.

Fl-aħħar nett, il-Kummissjoni ssostni li l-għoti ta’ l-ATS lil persuna li ma tissodisfax il-kundizzjoni ta’ oriġini komuni ma jiksirx, kuntrarjament għal dak li jsostni l-Gvern Olandiż (ara infra, punt 32), id-dritt tad-detentur ta’ l-ATS ta’ referenza għall-protezzjoni ta’ l-informazzjoni stabbilita fl-Artikolu 13 tad-Direttiva, għaliex din id-dispożizzjoni tirrigwarda esklużivament l-ATS inizjali u ma tapplikax għall-importazzjonijiet paralleli.

28.

Ir-Repubblika Franċiża tikkontesta n-nuqqas allegat. Il-prinċipji stabbiliti mis-sentenza Kohlpharma, iċċitata iktar ’il fuq, mogħtija fil-kuntest tad-Direttiva 2001/83/KE tal-Parlament Ewropew u tal-Kunsill, tas-6 ta’ Novembru 2001, dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem ( 9 ), ma jistgħux jiġu trasposti għall-qasam tal-prodotti għall-protezzjoni tal-pjanti. Filwaqt li d-Direttiva 2001/83 tirrigwarda biss il-protezzjoni tas-saħħa tal-bniedem, id-Direttiva mhux biss tfittex li tassigura din il-protezzjoni billi tevita l-inġestjoni involontarja ta’ sustanzi kimiċi li jinsabu fuq il-ħxejjex, iżda tfittex ukoll li tiggarantixxi l-protezzjoni tas-saħħa ta’ l-annimali u dik ta’ l-ambjent kontra l-konsegwenzi ta’ l-użu ta’ sustanzi kimiċi intiżi għat-trattament tal-ħxejjex. Barra minn hekk, id-differenzi li jeżistu bejn l-Istati Membri f’dak li jirrigwarda d-drawwiet tal-konsum, id-drawwiet professjonali kif ukoll il-kundizzjonijiet agrikoli u ambjentali, b’mod partikolari dawk klimatiċi, jikkostitwixxu fatturi speċifiċi li daqstant ieħor għandhom jittieħdu in kunsiderazzjoni, ħaġa li l-leġiżlazzjoni dwar il-prodotti farmaċewtiċi m’għandhiex għalfejn tagħmel.

29.

Bil-fatt li l-leġiżlazzjoni Franċiża teħtieġ li l-prodott importat ikun identiku għall-prodott ta’ referenza, hija ma tagħmel xejn ħlief twieġeb għall-għanijiet tad-Direttiva filwaqt li tassigura t-trasparenza tal-proċedura ta’ l-ATS. Barra minn hekk, id-Digriet Nru 2001-317 ġie adottat sabiex il-leġiżlazzjoni Franċiża tkun konformi mas-sentenza British Agrochemicals Association, iċċitata iktar ’il fuq.

30.

Din il-kundizzjoni ta’ oriġini komuni tassigura li s-sustanzi attivi jkollhom l-istess oriġini, ħaġa li tagħti garanzija massima f’dak li jirrigwarda l-identiċità ta’ dawn is-sustanzi, u b’mod partikolari l-ispeċifikazzjonijiet tagħhom (per eżempju, il-grad ta’ impuritajiet). Differenzi kwantitattivi jew kwalitattivi fil-kompożizzjoni tas-sustanza jew sustanzi attivi jistgħu fil-fatt jiżnaturaw l-azzjoni jew l-effetti nfushom tal-prodott, b’mod partikolari billi jaggravaw it-tossiċità tiegħu.

31.

Il-Gvern Franċiż jenfasizza li, fil-kuntest tad-Direttiva, l-istess sustanza attiva tista’ attwalment tiġi awtorizzata bi speċifikazzjonijiet differenti skond l-Istati. Konsegwentement, li kieku ma kienx meħtieġ li l-prodott ta’ referenza u l-prodott importat ikunu mmanifatturati mill-istess kumpannija jew minn impriżi konnessi jew li joperaw taħt liċenzja, l-evalwazzjoni tal-prodott importat kien ikollha tirrigwarda wkoll is-sustanzi attivi. B’riżultat ta’ dan tittaqqal il-proċedura ta’ l-importazzjonijiet paralleli.

32.

Il-Gvern Olandiż isostni l-istess argumenti bħall-Gvern Franċiż u jqis li r-rekwiżit ta’ oriġini komuni jissodisfa l-prinċipju ta’ proporzjonalità.

33.

B’mod partikolari, il-Gvern Olandiż isostni wkoll li l-protezzjoni ta’ l-informazzjoni ma tkunx effettiva jekk l-oriġini komuni ma tkunx tista’ tintuża bħala kriterju u jgħid li jekk dan ir-rekwiżit ma jinżammx, ir-riskji ta’ traffiku fil-prodotti għall-protezzjoni tal-pjanti, li diġà huma kbar, ikunu ikbar.

34.

Skond l-Artikolu 28 KE, restrizzjonijiet kwantitattivi fuq l-importazzjoni u kull miżura li għandha effett ekwivalenti għandhom ikunu projbiti bejn l-Istati Membri. Kull miżura li, direttament jew indirettament, attwalment jew potenzjalment, tista’ tfixkel il-kummerċ intrakomunitarju għandha titqies bħala miżura li għandha effett ekwivalenti ( 10 ). Madankollu, l-Artikolu 30 KE jaċċetta l-possibbiltà ta’ projbizzjonijiet jew ta’ restrizzjonijiet iġġustifikati minn raġunijiet ta’ “protezzjoni tas-saħħa u l-ħajja ta’ persuni jew ta’ annimali, jew il-preservazzjoni tal-pjanti”. Fil-fatt, il-Qorti tal-Ġustizzja ddikjarat li l-protezzjoni ta’ l-ambjent tikkostitwixxi ħtieġa imperattiva li tista’ tillimita l-applikazzjoni ta’ l-Artikolu 28 KE ( 11 ). Madankollu, il-prinċipju ta’ proporzjonalità, li huwa l-bażi ta’ l-aħħar sentenza ta’ l-Artikolu 30 KE, jeħtieġ li l-fakoltà ta’ l-Istati Membri li jipprojbixxu l-importazzjoni ta’ prodotti ta’ Stati Membri oħra tkun limitata għal dak li huwa neċessarju sabiex jintlaħqu l-għanijiet ta’ protezzjoni tas-saħħa mfittxija leġittimament ( 12 ).

35.

Għalkemm id-Direttiva tistabbilixxi li l-ATS tal-prodotti għall-protezzjoni tal-pjanti għandhom jinħarġu mill-Istati Membri, is-sustanzi attivi għandhom jiġu awtorizzati mill-Kummissjoni u jitniżżlu f’lista li tidher fl-Anness I tad-Direttiva ( 13 ). Madankollu, l-Istati Membri jistgħu jawtorizzaw, għal perijodu massimu ta’ tnax-il sena, id-distribuzzjoni ta’ prodotti għall-protezzjoni tal-pjanti li jikkontjenu elementi li ma jkunux imsemmija fl-Anness I tad-Direttiva, bil-kundizzjoni li jkunu diġà preżenti fis-suq sentejn wara d-data tan-notifika tad-Direttiva ( 14 ). Dan it-terminu, li skada fis-26 ta’ Lulju 2003, ġie madankollu pprorogat kemm-il darba. Il-Kummissjoni stabbiliet programm sabiex tevalwa gradwalment, matul din il-fażi provviżorja, il-prinċipji attivi in kwistjoni ( 15 ) u, wara li ssir l-evalwazzjoni rilevanti, tiddeċiedi dwar it-tniżżil tagħhom fl-Anness I ta’ din id-Direttiva ( 16 ).

36.

Kif iddikjarat il-Qorti tal-Ġustizzja, jidher mill-motivi tad-Direttiva 91/414 li din għandha bħala għan, minn naħa, l-eliminazzjoni ta’ l-ostakli għall-kummerċ intrakomunitarju fil-prodotti veġetali kif ukoll it-titjib tal-produzzjoni veġetali u, min-naħa l-oħra, il-protezzjoni tas-saħħa tal-bniedem u ta’ l-annimali, u ta’ l-ambjent ( 17 ).

37.

Kif intqal fil-punt 6 ta’ dawn il-konklużjonijiet, id-Direttiva ma fiha l-ebda dispożizzjoni li tirregola speċifikament il-kundizzjonijiet għall-għoti ta’ l-ATS ta’ prodotti għall-protezzjoni tal-pjanti ( 18 ) f’każijiet ta’ importazzjoni parallela.

38.

Kienet il-Qorti tal-Ġustizzja, fis-sentenza tagħha British Agrochemicals, iċċitata iktar ’il fuq ( 19 ), li ddikjarat li fejn żewġ ATS ikunu nħarġu b’mod konformi mad-Direttiva, l-għanijiet ta’ protezzjoni tas-saħħa tal-bniedem u ta’ l-annimali kif ukoll ta’ l-ambjent li d-Direttiva tfittex li tilħaq m’għandhomx l-istess rilevanza. Fil-fatt, f’tali sitwazzjoni, l-applikazzjoni tad-dispożizzjonijiet ta’ din id-Direttiva relattivi għall-proċedura ta’ l-għoti ta’ l-ATS tmur lil hinn minn dak li huwa meħtieġ biex jintlaħqu dawn dawn l-għanijiet u tipperikola li tippreġudika, mingħajr ġustifikazzjoni, il-prinċipju tal-moviment liberu tal-merkanzija stabbilit mill-Artikolu 28 KE ( 20 ).

39.

Il-Qorti tal-Ġustizzja għaddiet biex tispeċifika, fl-imsemmija sentenza, il-kundizzjonijiet ta’ ammissibbiltà ta’ tali proċedura ta’ awtorizzazzjoni simplifikata. Minbarra l-eżistenza ta’ oriġini komuni fis-sens li jkunu ġew immanifatturati skond l-istess formulazzjoni mill-istess kumpannija jew minn impriża konnessa jew li topera taħt liċenzja, il-prodott għall-protezzjoni tal-pjanti li għalih tintalab l-importazzjoni parallela u l-prodott ta’ referenza, mingħajr ma jkunu identiċi f’kollox, għandhom, għall-inqas, ikunu ġew immanifatturati skond l-istess formulazzjoni bl-użu ta’ l-istess sustanza attiva u jkollhom l-istess effetti meta jiġu kkunsidrati d-differenzi li jistgħu jeżistu fuq il-livell tal-kundizzjonijiet agrikoli, tal-protezzjoni tal-pjanti u ambjentali, b’mod partikolari dawk klimatiċi, relatati ma’ l-użu tal-prodott ( 21 ).

40.

Il-Kummissjoni tqis li l-leġiżlazzjoni Franċiża tikser l-obbligi imposti mill-Artikolu 28 KE, billi teħtieġ li l-prodott għall-protezzjoni tal-pjanti importat b’mod parallel u l-prodott ta’ referenza jkollhom oriġini komuni. Madankollu, kif isostni l-Gvern Franċiż, meta l-leġiżlazzjoni Franċiża, jiġifieri preċiżament id-Digriet Nru 2001-317, tissuġġetta l-ħruġ ta’ l-ATS, inter alia, għall-kundizzjoni ta’ din l-oriġini komuni, hija ma tagħmel xejn ħlief tirriproduċi, kważi bl-istess termini, l-ewwel kundizzjoni stabbilita mill-Qorti tal-Ġustizzja fis-sentenza British Agrochemicals Association, iċċitata iktar ’il fuq, jiġifieri li, filwaqt li, kif intqal fil-punt 10 ta’ dawn il-konklużjonijiet, l-Artikolu 1 ta’ l-imsemmi digriet jeħtieġ “oriġini komuni taż-żewġ prodotti fis-sens li jkunu ġew immanifatturati skond l-istess formulazzjoni, mill-istess kumpannija jew minn impriżi konnessi jew li joperaw taħt liċenzja”, il-punt 40 ta’ l-imsemmija sentenza jgħid li l-prodott li għalih intalbet l-ATS għandu jkollu “oriġini komuni ma dan il-prodott [jiġifieri l-prodott ta’ referenza] fis-sens li jkun ġie mmanifatturat mill-istess kumpannija jew minn impriża konnessa jew li topera taħt liċenzja skond l-istess formulazzjoni”.

41.

Il-Kummissjoni ssostni li għandha tiġi applikata, għall-prodotti għall-protezzjoni tal-pjanti, is-soluzzjoni mogħtija mill-Qorti tal-Ġustizzja fir-rigward tal-prodotti mediċinali għall-użu mill-bniedem. B’hekk, il-Kummissjoni tirreferi għas-sentenza Kohlpharma, iċċitata iktar ’il fuq, li skondha l-kundizzjoni ta’ l-oriġini komuni mhijiex determinanti iżda sempliċement utli sabiex tiġi pprovata l-identiċità sostantiva bejn il-prodott li għalih intalbet l-ATS u l-prodott ta’ referenza.

42.

Għar-raġunijiet esposti iktar ’il quddiem, ma jidhirlix li s-soluzzjoni ta’ l-imsemmija sentenza għandha tiġi estiża għall-qasam tal-prodotti għall-protezzjoni tal-pjanti ( 22 ), u konsegwentement, ma jidhirlix li jkun xieraq li terġa’ tiġi kkunsidrata l-utilità tal-kundizzjoni ta’ oriġini komuni li ġiet stabbilita b’mod ċar fis-sentenza British Agrochemicals Association, iċċitata iktar ’il fuq, fil-kuntest ta’ l-importazzjonijiet paralleli ta’ prodotti għall-protezzjoni tal-pjanti.

43.

Fl-ewwel lok, il-perikolożità tal-prodotti għall-protezzjoni tal-pjanti hija differenti minn dik tal-prodotti mediċinali. Filwaqt li prodott mediċinali jingħata fuq riċetta ta’ tabib, jew għall-inqas jinbiegħ minn spiżjar, u jittieħed unikament minn pazjent wieħed, prodott għall-protezzjoni tal-pjanti, bħall-insettiċida li ta lok għar-rikors għan-nuqqas ta’ twettiq ta’ obbligu, li jintuża b’mod partikolari, skond l-ispjegazzjonijiet tal-Gvern Franċiż, fuq il-ħxejjex, is-siġar tal-frott u d-dwieli, jista’ jinfirex fl-ambjent ( 23 ), kemm mill-arja kif ukoll minn taħt l-art. Barra minn hekk, tali prodotti huma intiżi sabiex jintużaw fuq prodotti tal-ħaxix intiżi sabiex jinbiegħu u jiġu kkonsmati mill-bniedem jew mill-annimali.

44.

Il-perikolożità tal-prodotti għall-protezzjoni tal-pjanti hija ċerta ( 24 ). Sabiex wieħed ikun konvint, ikun biżżejjed, per eżempju, li jaqra s-Sitt Programm ta’ Azzjoni Ambjentali li jfittex, b’mod partikolari, li jnaqqas ir-riskji marbuta ma’ l-użu ta’ pestiċidi, li jsaħħaħ il-kontroll ta’ l-użu u tad-distribuzzjoni tal-pestiċidi kif ukoll li jiffavorixxi s-sostituzzjoni ta’ l-iktar sustanzi attivi perikolużi b’sustanzi inqas perikolużi, bħal alternattivi mhux kimiċi ( 25 ), jew li jaqra l-kitbiet dwar dan is-suġġett ( 26 ). Barra minn hekk, ma jeżisti l-ebda mezz ieħor inqas restrittiv iżda daqstant ieħor adegwat biex jimpedixxi t-tixrid ta’ sustanzi attivi fl-ambjent. Għalhekk, il-ħtieġa li l-prodott importat u l-prodott ta’ referenza jkollhom oriġini komuni ma tistax titqies li tmur kontra l-prinċipju ta’ proporzjonalità.

45.

Fil-konklużjonijiet tiegħu, tat-2 ta’ Ottubru 1997, fil-kawża British Agrochemicals Association, iċċitata iktar ’il fuq, l-Avukat Ġenerali Léger, li rraġuna b’analoġija ma’ l-affermazzjoni magħmula mill-Qorti tal-Ġustizzja fis-sentenza tal-5 ta’ Ottubru 1995, Scotia Pharmaceuticals ( 27 ), qies “li l-proċedura li għandha tiġi segwita fil-kuntest ta’ importazzjoni parallela ta’ prodotti għall-protezzjoni tal-pjanti m’għandhiex ikollha l-konsegwenza li tintroduċi fis-suq prodotti li jistgħu jkunu ta’ periklu għas-saħħa tal-bniedem” ( 28 ). Fil-punt 75 tal-konklużjonijiet tiegħu, l-Avukat Ġenerali Léger qal ukoll li “għalkemm huwa neċessarju li l-komponenti tal-prodott importat u tal-prodott ta’ referenza jkunu mmanifatturati mill-istess kumpannija, dan il-kriterju mhuwiex bizzejjed”. A fortiori, din l-ewwel kundizzjoni, neċessarja iżda mhux suffiċjenti, ma tistax titneħħa.

46.

Barra minn hekk, il-Qorti tal-Ġustizzja diġà enfasizzat “l-importanza suprema li għandha tingħata lill-protezzjoni tas-saħħa” ( 29 ) u qieset li l-ħtiġijiet imperattivi ta’ protezzjoni tas-saħħa pubblika kellhom jiġu qabel kunsiderazzjonijiet oħra, b’mod partikolari l-prinċipju tal-moviment liberu tal-merkanzija fil-Komunità Ewropea ( 30 ). Il-Qorti tal-Ġustizzja qalet ukoll li “ħafna drabi, danni lill-ambjent u lis-saħħa ma jistgħux, minħabba n-natura tagħhom, jiġu eliminati b’mod retroattiv” ( 31 ).

47.

Il-Kummissjoni ssostni li s-soluzzjoni adottata fis-sentenza Kohlpharma, iċċitata iktar ’il fuq, fir-rigward tal-prodotti mediċinali tista’ tiġi trasposta fil-qasam tal-prodotti għall-protezzjoni tal-pjanti, skond is-sentenza Il-Kummissjoni vs Il-Ġermanja, iċċitata iktar ’il fuq, li tgħid li l-kummerċjalizzazzjoni ta’ dawn iż-żewġ tipi ta’ prodotti “tinvolvi interessi komparabbli” (punt 24) u li “il-punt ta’ liġi in kwistjoni huwa l-istess” (punt 27) f’dawn iż-żewġ każijiet. Madankollu, meta tagħmel dan, il-Kummissjoni tonqos milli tispeċifika x’kien il-“punt ta’ liġi in kwistjoni”. Fil-kawża li tat lok għall-imsemmija sentenza Kohlpharma, il-Kummissjoni talbet lill-Qorti tal-Ġustizzja sabiex tikkonstata li, billi ma tatx lill-importaturi paralleli terminu raġonevoli sabiex jiddisponu mill-prodotti maħżuna tagħhom fil-każ ta’ l-irtirar ta’ l-ATS għal prodott ta’ referenza għall-protezzjoni tal-pjanti, ir-Repubblika Federali tal-Ġermanja kienet naqset li twettaq l-obbligi imposti fuqha skond l-Artikolu 28 KE. Għalhekk, il-Qorti tal-Ġustizzja ddikjarat sempliċement f’din is-sentenza li “l-effetti ta’ l-irtirar ta’ l-ATS ta’ referenza f’dan il-każ huma l-istess għall-importaturi paralleli bħal dawk li ġew identifikati fil-ġurisprudenza relattiva għall-importazzjonijiet paralleli ta’ prodotti mediċinali (sentenza Ferring, iċċitata iktar ’il fuq, punt 25). Fiż-żewġ każijiet, l-importaturi paralleli jitilfu l-fakoltà li jikkummerċjalizzaw il-prodotti in kwistjoni” ( 32 ). Rigward il-punt 24 ta’ l-istess sentenza, li jenfasizza l-komparabbiltà ta’ l-interessi involuti permezz ta’ dawn il-kummerċjalizzazzjonijiet, dan kien intiż sabiex jirrileva li l-kummerċjalizzazzjoni tal-prodotti għall-protezzjoni tal-pjanti teħtieġ attenzjoni mhux iżgħar minn dik meħtieġa għal dik tal-prodotti mediċinali. F’dik is-sentenza, il-Qorti tal-Ġustizzja bl-ebda mod ma riedet tafferma li l-kummerċjalizzazzjoni tal-prodotti għall-protezzjoni tal-pjanti ma tistax eventwalment teħtieġ attenzjoni ikbar minn dik meħtieġa fir-rigward tal-prodotti mediċinali. Din sempliċement ma kinitx il-kwistjoni f’din il-kawża. Għalhekk, is-sentenza Il-Kummissjoni vs Il-Ġermanja, iċċitata iktar ’il fuq, li ngħatat mingħajr ma saru konklużjonijiet u li ma ġietx ippubblikata fil-Ġabra, bl-ebda mod ma kienet intiża sabiex terġa’ tikkunsidra l-kundizzjoni ta’ l-oriġini komuni kif definita u imposta mis-sentenza British Agrochemicals Association, iċċitata iktar ’il fuq.

48.

Fit-tieni lok, il-Gvern Franċiż għandu raġun meta jgħid li t-tneħħija tal-kundizzjoni ta’ l-oriġini komuni, minflok ma tħaffef il-ħruġ ta’ l-ATS, isservi biss sabiex ittaqqal il-proċedura għall-importazzjoni parallela u hija ostakolu ħafna ikbar għall-kummerċ minn dak ilmentat mill-Kummissjoni. Fil-fatt, l-istess sustanza attiva tista’ tkun ġiet awtorizzata bi speċifikazzjonijiet differenti skond l-Istati Membri, peress li matul il-perijodu li fih is-sustanzi attivi jkunu s-suġġett ta’ programm ta’ evalwazzjoni bil-għan li jiksbu rikonoxximent mill-Kummissjoni, kull Stat Membru jkompli jawtorizza l-prodotti għall-protezzjoni tal-pjanti b’mod konformi mad-dispożizzjonijiet nazzjonali tiegħu. Jekk il-prodott importat u l-prodott ta’ referenza jkollhom l-istess oriġini, jiġifieri jkunu mmanifatturati mill-istess kumpannija jew minn impriżi konnessi jew li joperaw taħt liċenzja, mhuwiex neċessarju li ssir evalwazzjoni ta’ l-ispeċifikazzjonijiet tal-prodott importat. Min-naħa l-oħra, jekk il-prodott importat u l-prodott ta’ referenza jkunu ġew immanifatturati minn impriżi differenti, it-tneħħija tal-kundizzjoni ta’ l-oriġini komuni teħtieġ li ssir evalwazzjoni sistematika tas-sustanzi attivi li jinsabu fil-prodott importat. Fil-fatt, kif isostni l-Gvern Franċiż (ara iktar ’il fuq, punt 31), l-identiċità tas-sustanzi attivi hija ħafna iktar ċerta meta jkollhom sors ta’ manifattura komuni, billi s-sustanzi attivi jinkludu, skond it-termini tad-Direttiva, “kull impurità li inevitabbilment tiġi ġenerata matul il-proċess ta’ manifattura” ( 33 ).

49.

Fit-tielet lok, għandha tiġi aċċettata wkoll l-argumentazzjoni żviluppata mill-Gvern Olandiż dwar il-kunċett ta’ kunfidenzjalità ta’ l-informazzjoni. Fil-fatt, ir-regola stabbilita fl-Artikolu 13 tad-Direttiva, li skondha Stat Membru ma jistax, fil-kuntest ta’ l-għoti ta’ awtorizzazzjoni, jagħmel użu mill-informazzjoni pprovduta mill-ewwel applikant għal ATS “għall-benefiċċju ta’ applikanti oħrajn” ( 34 ), ukoll tidher li hija inkompatibbli mat-tneħħija tal-ħtieġa ta’ oriġini komuni ( 35 ). Fil-fatt, kieku din il-ħtieġa, li hija faċli biex tkun ivverifikata, kellha titneħħa, l-applikant għal ATS ta’ prodott importat b’mod parallel ikollu jipprova l-identiċità tal-prodott li qed jitlob li jimporta mal-prodott ta’ referenza diġà awtorizzat. Din il-prova hija loġikament diffiċli biex tingħata, peress li l-inkartament li jinkludi l-informazzjoni kollha relattiva għall-prodott ta’ referenza huwa kunfidenzjali, sakemm id-detentur ta’ l-ewwel ATS ma jaċċettax li jaqsam din l-informazzjoni.

50.

Għaldaqstant, għandu jiġi kkonstatat li, billi teħtieġ li l-prodott għall-protezzjoni tal-pjanti importat b’mod parallel u l-prodott ta’ referenza jkollhom oriġini komuni, ir-Repubblika Franċiża ma naqsitx li twettaq l-obbligi imposti fuqha skond l-Artikolu 28 KE. Konsegwentement, ir-rikors għandu jiġi miċħud.

51.

Skond l-Artikolu 69(2) tar-Regoli tal-Proċedura, il-parti li titlef il-kawża għandha tbati l-ispejjeż, jekk dawn ikunu ġew mitluba. Peress li l-Kummissjoni tilfet, hemm lok li hija tiġi ordnata tbati l-ispejjeż kif mitlub mir-Repubblika Franċiża.

52.

Fid-dawl tal-kunsiderazzjonijiet fuq imsemmija, nipproponi li l-Qorti tal-Ġustizzja: