SENTENZA TAL-QORTI TAL-ĠUSTIZZJA (L-Ewwel Awla)
tat-22 ta' Marzu 2007 (*)
“Libertà ta' stabbiliment –Artikolu 52 tat-Trattat KE (li, wara emendi, sar l-Artikolu 43 KE) − Persuna taxxabbli li mhijiex residenti li twettaq attività bla paga − Stabbiliment tal-bażi minimi ta' tassazzjoni fir-rigward tal-persuni taxxabbli li mhumiex residenti biss − Ġustifikazzjoni minħabba raġunijiet ta' interess ġenerali − Effettività tal-kontrolli fiskali − Nuqqas”
Fil-kawża C-383/05,
li għandha bħala suġġett talba għal deċiżjoni preliminari skond l-Artikolu 234 KE, imressqa mill-Cour de cassation (Il-Belġju), permezz ta' deċiżjoni tat-7 ta' Ottubru 2005, li waslet fil-Qorti tal-Ġustizzja fl-24 ta' Ottubru 2005, fil-proċedura
Raffaele Talotta
vs
L-Istat Belġjan,
IL-QORTI TAL-ĠUSTIZZJA (l-Ewwel Awla),
komposta minn P. Jann, President ta' l-Awla, R. Schintgen, A. Borg Barthet, M. Ilešič (Relatur) u E. Levits, Imħallfin,
Avukat Ġenerali: P. Mengozzi,
Reġistratur: R. Grass,
wara li kkunsidrat l-osservazzjonijiet ippreżentati:
– għal Raffaele Talotta, minn X. Thiebaut u X. Pace, avocats,
– għall-Gvern Belġjan, minn M. Wimmer, bħala aġent, assistit minn B. van de Walle de Ghelcke, avocat,
– għall-Kummissjoni tal-Komunitajiet Ewropej, minn R. Lyal u D. Martin, bħala aġenti,
wara li semgħet il-konklużjonijiet ta' l-Avukat Ġenerali, ippreżentati fis-seduta tas-16 ta' Novembru 2006,
tagħti l-preżenti
Sentenza
1 It-talba għal deċizjoni preliminari tirrigwarda l-interpretazzjoni ta' l-Artikolu 52 tat-Trattat KE (li, wara emendi, sar l-Artikolu 43 KE).
2 Din it-talba ġiet ippreżentata fil-kuntest ta' kawża bejn Raffaele Talotta u l-Istat Belġjan dwar l-applikazzjoni, fil-konfront tiegħu bħala persuna taxxabbli li mhijiex residenti, ta' bażi minima ta' tassazzjoni għas-sena ta' tassazzjoni 1992.
Kuntest Ġuridiku
3 Fil-Belġju, it-taxxa fuq id-dħul tal-persuni fiżiċi u ġuridiċi hija rregolata mill-Kodiċi tat-taxxi fuq id-dħul ta' l-1992 (Moniteur belge tat-30 ta' Lulju 1992) li, fil-verżjoni tiegħu li kienet applikabbli meta seħħew il-fatti fil-kawża prinċipali, fl-ewwel subparagrafu ta' l-Artikolu 341 tiegħu jipprovdi li:
"Sakemm ma tingħatax prova mod ieħor, l-istima tal-bażi tat-tassazzjoni tista' ssir, kemm għall-persuni ġuridiċi kif ukoll għall-persuni fiżiċi, skond sinjali jew indizji li jixhdu ċirkustanzi aħjar minn dawk li juri d-dħul iddikjarat."
4 L-Artikolu 342 ta' l-istess Kodiċi jistabbilixxi li:
"§ 1. Fin-nuqqas ta' elementi probatorji pprovduti mill-persuni interessati jew mill-amministrazzjoni, il-qliegħ jew il-profitti msemmija fl-Artikolu 23, §1, 1° u 2°, huma stabbiliti, għal kull persuna taxxabbli, fid-dawl tal-qliegħ jew tal-profitti normali ta', minn ta' l-anqas tliet persuni taxxabbli simili u billi jitqiesu, skond il-każ, il-kapital investit, il-fatturat, in-numru ta' ħaddiema, is-saħħa tal-mutur użat, il-valur mill-kiri ta' l-artijiet maħduma, kif ukoll kull informazzjoni oħra li tista' tkun utli.
[…]
§ 2. Ir-Re għandu jistabbilixxi, fid-dawl ta' l-elementi indikati fl-ewwel subparagrafu ta' § 1, il-qliegħ minimu taxxabbli tal-kumpanniji barranin li joperaw fil-Belġju."
5 L-Artikolu 182 tad-Digriet Irjali tas-27 ta' Awwissu 1993 ta' eżekuzzjoni tal-Kodiċi tat-taxxi fuq id-dħul 1992 (Moniteur belge tat-13 ta' Settembru 1993, aktar 'il quddiem id-"Digriet Irjali tas-27 ta' Awwissu 1993") jipprovdi li:
"§ 1er. Il-qliegħ minimu taxxabbli tal-kumpanniji barranin li joperaw fil-Belġju, li huma taxxabbli skond il-proċedura ta' tqabbil prevista fl-ewwel subparagrafu ta' l-Artikolu 342 §1 tal-Kodiċi tat-taxxi fuq id-dħul ta' l-1992, huwa stabbilit kif ġej:
[…]
3° impriżi fis-setturi tal-kummerċ u tal-provvista ta' servizzi:
a) […] horeca [(lukandi, restoranti u kafetteriji)] […]:[BEF] 100 għal kull [BEF] 1000 mill-fatturat b'minimu ta' [BEF] 300 000 għal kull membru tal-persunal (in-numru medju għas-sena kkonċernata);
[…]
§ 2. L-ammont tal-qliegħ taxxabbli, stabbilit skond § 1, ma jista', fl-ebda każ, ikun ta' anqas minn [BEF] 400 000.
[…]"
6 Skond l-Artikolu 24, §5, tal-Konvenzjoni bejn il-Belġju u l-Lussemburgu għall-Ħelsien mit-Tassazzjoni Doppja u għas-soluzzjoni ta' kwistjonijiet oħra ta' tassazzjoni fuq id-dħul u fuq il-ġid, iffirmata fil-Lussemburgu fis-17 ta' Settembru 1970 (aktar 'il quddiem il-"konvenzjoni"):
"It-tassazzjoni ta' stabbiliment permanenti li impriża ta' Stat Kontraenti jkollha fl-Istat Kontraenti l-ieħor ma tistax tkun anqas favorevoli f'dan l-Istat mit-tassazzjoni ta' l-impriżi fl-istess Stat li jkollhom l-istess attività."
Il-kawża prinċipali u d-domanda preliminari
7 Raffaele Talotta, li hu residenti fil-Gran Dukat tal-Lussemburgu, imexxi, bħala persuna fiżika, restorant fil-Belġju.
8 Peress li ma stabbilixxiex il-Belġju bħala r-residenza tiegħu għall-finijiet tat-tassazzjoni, fil-Belġju, Raffaele Talotta huwa suġġett għat-taxxa tal-persuni fiżiċi li mhumiex residenti fir-rigward tad-dħul li jirċievi f'dan l-Istat Membru biss.
9 Peress li Raffaele Talotta ppreżenta d-dikjarazzjoni tiegħu tat-taxxa tal-persuni fiżiċi li mhumiex residenti għas-sena ta' tassazzjoni 1992 tard, l-amministrazzjoni tat-taxxa Belġjana infurmatu bl-intenzjoni tagħha li tintaxxah ex officio skond l-Artikolu 342, §2, tal-Kodiċi tat-taxxi fuq id-dħul ta' l-1992. Din id-dispożizzjoni tawtorizza lill-imsemmija amministrazzjoni, fin-nuqqas ta' elementi probatorji pprovduti mill-persuna taxxabbli jew mill-amministrazzjoni, li tintaxxa, skond il-fatturat u n-numru tal-membri tal-persunal, il-kumpanniji barranin li joperaw fil-Belġju, billi tagħmel riferiment għal minimu ta' qliegħ taxxabbli stabbilit mid-Digriet Irjali tas-27 ta' Awwissu 1993, liema minimu, għall-kumpanniji li joperaw fis-settur horeca, ma setax ikun ta' anqas minn BEF 400 000 għas-sena ta' tassazzjoni in kwistjoni fil-kawża prinċipali.
10 Abbażi ta' din il-leġiżlazzjoni, l-amministrazzjoni tat-taxxa Belġjana ħarġet kont tat-taxxa għall-persuni fiżiċi li mhumiex residenti fl-isem ta' Rafaelle Talotta, liema kont ġie stabbilit fuq il-bażi ta' sitt membri tal-persunal.
11 B'deċiżjoni tat-23 ta' Ġunju 1998, din l-istess amministrazzjoni ċaħdet ilment ippreżentat minn Raffaele Talotta kontra l-imsemmi kont.
12 Ir-rikorrent fil-kawża prinċipali kkontesta din id-deċiżjoni quddiem il-cour d’appel de Liège li, permezz ta' sentenza tas-16 ta' Ġunju 2004, ċaħdet dan ir-rikors.
13 Fl-appell tiegħu lill-Cour de cassation, Raffaele Talotta sostna, permezz ta' l-ewwel parti ta' l-ewwel ilment invokat, li l-Cour d’appel de Liège ma kinitx immotivat is-sentenza kkontestata kif dovut, bi ksur ta' l-Artikolu 149 tal-Kostituzzjoni Belġjana, minħabba li ma kinitx wieġbet għall-motiv tiegħu bbażat fuq il-fatt li l-kont tat-taxxa li nħariġlu, kien stabbilit skond metodu anqas favorevoli minn dak li huwa applikat fil-każ ta' impriżi Belġjani li jeżerċitaw l-istess attività. Permezz tat-tieni parti ta' l-ewwel ilment tiegħu, Raffaele Talotta sostna li billi ddeċidiet li t-tassazzjoni in kwistjoni kienet ġiet stabbilita legalment permezz ta' l-applikazzjoni ta' l-Artikolu 342, § 2 tal-Kodiċi tat-taxxi fuq id-dħul ta' l-1992 u l-Artikolu 182 tad-Digriet Irjali tas-27 ta' Awwissu 1993, l-imsemmija Cour d’appel kienet kisret l-Artikolu 24, § 5, tal-Konvenzjoni u l-Artikolu 52 tat-Trattat.
14 Wara li ċaħdet l-ewwel parti ta' l-ewwel ilment invokat minħabba li ma kienx jirriżulta mill-fatti, il-Cour de cassation iddeċidiet li, għal dak li jirrigwarda t-tieni parti ta' l-ewwel ilment, tissospendi l-proċeduri quddiemha u tagħmel lill-Qorti tal-Ġustizja d-domanda preliminari li ġejja:
"[L-Artikolu 52 tat-Trattat] għandu jiġi interpretat fis-sens li jipprekludi dispożizzjoni ta' dritt nazzjonali li, bħall-Artikolu 182 tad-Digriet Irjali tas-27 ta' Awwissu 1993, li ġie adottat b'applikazzjoni ta' l-Artikolu 342, § 2 tal-Kodiċi tat-taxxi fuq id-dħul ta' l-1992, japplika bażi minimi ta' tassazzjoni għal dawk li mhumiex residenti biss?"
Fuq id-domanda preliminari
15 Permezz tad-domanda tagħha, il-qorti tar-rinviju tixtieq issir taf jekk l-Artikolu 52 tat-Trattat jipprekludix leġiżlazzjoni ta' Stat Membru, bħal dik li tirriżulta mill-Artikolu 342, § 2 tal-Kodiċi tat-taxxi fuq id-dħul ta' l-1992 u mill-Artikolu 182 tad-Digriet Irjali tas-27 ta' Awwissu 1993, li tipprovdi għal bażi minimi ta' tassazzjoni għall-persuna taxxabbli li mhumiex residenti biss.
16 Għandu jiġi mfakkar, qabel kollox li għalkemm it-tassazzjoni diretta taqa' fil-kompetenza ta' l-Istati Membri, dawn għandhom, madankollu, jeżerċitaw din il-kompetenza in konformità mad-dritt Komunitarju (sentenza tas-7 ta' Settembru 2004, Manninen, C-319/02, Ġabra p. I-7477, punt 19 u l-ġurisprudenza ċċitata).
17 Ir-regoli tat-trattament ugwali jipprojbixxu mhux biss id-diskriminazzjonijiet ċari bbażati fuq in-nazzjonalità iżda wkoll kull forma moħbija ta' diskriminazzjoni li, permezz ta' l-użu ta' kriterji oħra li jiddistingwu, twassal fil-fatt għall-istess riżultat (sentenza ta' l-14 ta' Frar 1995, Schumacker, C-279/93, Ġabra p. I-225, punt 26 u l-ġurisprudenza ċċitata).
18 Diskriminazzjoni ma tista' tikkonsisti f'xejn ħlief l-applikazzjoni ta' regoli differenti għal sitwazzjonijiet komparabbli jew inkella fl-applikazzjoni ta' l-istess regola għal sitwazzjonijiet differenti (sentenzi Schumacker, iċċitata aktar 'il fuq, punt 30, u ta' l-14 ta' Settembru 1999, Gschwind, C-391/97, Ġabra p. I-5451, punt 21).
19 Rigward it-tassazzjoni diretta, il-Qorti tal-Ġustizzja ammettiet, f'kawżi dwar it-tassazzjoni tad-dħul ta' persuni fiżiċi, li s-sitwazzjoni tar-residenti u s-sitwazzjoni ta' dawk li mhumiex residenti fi Stat partikolari mhumiex, bħala regola ġenerali, komparabbli minħabba li fihom differenzi oġġettivi kemm mill-perspettiva tas-sors tad-dħul kif ukoll minn dik tal-kapaċità kontributtiva personali jew tat-teħid in kunsiderazzjoni tas-sitwazzjoni personali u tal-familja (sentenzi Schumacker, iċċitati aktar 'il fuq, punti 31 sa 34; tal-11 ta' Awwissu 1995, Wielockx, C-80/94, Ġabra p. I-2493, punt 18, u tas-27 ta' Ġunju 1996, Asscher, C-107/94, Ġabra p. I-3089, punt 41). Hija madankollu ppreċiżat li, meta jkun hemm vantaġġ fiskali li jiġi miċħud lil dawk li mhumiex residenti, din id-differenza fit-trattament bejn iż-żewġ kategoriji tista' tkun ikkwalifikata bħala diskriminazzjoni fis-sens tat-Trattat sakemm ma jkunx hemm xi differenza fis-sitwazzjoni oġġettiva ta' natura tali li tiġġustifika differenza fit-trattament fuq dan il-punt bejn iż-żewġ kategoriji ta' persuni taxxabbli (sentenzi Schumacker, iċċitata aktar 'il fuq, punti 36 sa 38, u Asscher, iċċitata aktar 'il fuq, punt 42).
20 F'dan ir-rigward, għandu jiġi osservat li mill-faxxiklu li ġie sottomess lill-Qorti tal-Ġustizzja jirriżulta li l-Artikolu 342, §1 tal-Kodiċi tat-taxxi fuq id-dħul ta' l-1992 huwa intiż sabiex jirregola s-sitwazzjonijiet li fihom il-persuna taxxabbli, residenti jew mhix residenti, ma tkunx ipprovdiet provi dwar il-qliegħ jew il-profitti tagħha lill-amministrazzjoni tat-taxxa.
21 F'dak li jirrigwarda l-persuni taxxabbli residenti, mill-faxxiklu sottomess lill-Qorti tal-Ġustizzja jirriżulta wkoll li l-amministrazzjoni tat-taxxa Belġjana tista', skond il-kriterji stabbiliti mill-Artikolu 342, § 1 tal-Kodiċi tat-taxxi fuq id-dħul ta' l-1992, tiddeċiedi l-qliegħ li għandu jittieħed in kunsiderazzjoni permezz ta' tqabbil mal-qliegħ normali ta' minn ta' l-anqas tliet persuni taxxabbli residenti li jkunu simili.
22 Fil-każ li jkun impossibbli li jintuża dan il-metodu sabiex jiġi stabbilit il-qliegħ, mill-faxxiklu sottomess lill-Qorti tal-Ġustizzja jirriżulta wkoll li l-imsemmija amministrazzjoni tista', skond l-ewwel subparagrafu ta' l-Artikolu 341 ta' l-imsemmi Kodiċi, tapplika, fil-konfront tal-persuni taxxabbli residenti biss, il-metodu fiss ta' tassazzjoni bbażat fuq is-"sinjali jew indizji li jixhdu ċirkustanzi aħjar minn dawk li juri d-dħul iddikjarat".
23 Min-naħa l-oħra, il-fatturat tal-persuni taxxabbli li ma jkunux residenti huwa, fin-nuqqas ta' provi, stabbilit billi jiġu applikati bażi minimi ta' tassazzjoni.
24 Għaldaqstant, għandu jiġi kkonstatat li l-leġiżlazzjoni nazzjonali in kwistjoni fil-kawża principali tittratta l-persuni taxxabbli b'mod differenti, skond jekk huma jew mhumiex residenti fil-Belġju.
25 Ma jistax ikun aċċettat li l-Istat Membru ta' stabbiliment jista' japplika bażi minimi ta' tassazzjoni fil-konfront tal-persuni taxxabbli li mhumiex residenti biss minħabba l-fatt waħdieni li għandhom residenza fi Stat Membru ieħor għaliex dan iġib l-Artikolu 52 tat-Trattat fix-xejn (ara, b'analoġija, is-sentenza tat-28 ta' Jannar 1986, Il-Kummissjoni vs Franza, C-270/83, Ġabra p. 273, punt 18).
26 Fil-fatt, id-dħul li tirċievi persuna taxxabbli residenti, fil-kuntest ta' attività bla paga fit-territorju ta' l-Istat Membru kkonċernat, u dak li tirċievi persuna taxxabbli li ma tkunx residenti, fil-kuntest ta' attività li tkun ukoll bla paga u li tkun eżercitata fit-territorju ta' dan l-Istat Membru, huma kklassifikati fl-istess kategorija ta' dħul li joriġina minn attivitajiet bla paga li jitwettqu fit-territorju ta' l-istess Stat Membru.
27 Il-Gvern Belġjan isostni, in sostenn ta' l-asserzjonijiet tiegħu li hemm differenzi oġġettivi bejn is-sitwazzjoni tar-residenti u s-sitwazzjoni ta' dawk li mhumiex residenti f'dak li jirrigwarda l-mezzi ta' prova li l-amministrazzjoni tat-taxxa għandha sabiex tistabbilixxi l-bażi ta' tassazzjoni tad-dħul taxxabbli, li, fil-każ li parti mill-operazzjonijiet ta' persuna taxxabbli li mhijiex residenti titwettaq fit-territorju ta' Stat Membru li ma jkunx dak fejn teżerċita l-attività bla paga tagħha, il-possibbiltà ta' skambju ta' informazzjoni ma' l-Istat ta' residenza permezz tal-mekkaniżmu previst mid-Direttiva tal-Kunsill Nru 77/799/KEE, tad-19 ta' Diċembru 1977, dwar għajnuna reċiproka mill-awtoritajiet kompetenti ta' l-Istati Membri fil-qasam tat-tassazzjoni diretta (ĠU L 336, p. 15), la tidher realistika u lanqas effettiva sabiex tirrimedja d-diffikultajiet prattiċi li l-applikazzjoni tat-tassazzjoni permezz ta' tqabbil tqajjem, minħabba li l-amministrazzjoni tat-taxxa Belġjana, f'każ bħal dan, la għandha, minn naħa, informazzjoni kkomunikata mill-Istat ta' residenza fil-kuntest ta' skambji spontanji jew awtomatiċi ta' informazzjoni u lanqas, min-naħa l-oħra, elementi preċiżi, b'tali mod li t-talba ta' skambju ta' informazzjoni ma tkunx ammissibbli.
28 Kif osserva l-Avukat Ġenerali fil-punt 70 tal-konklużjonijiet tiegħu, għall-amministrazzjoni tat-taxxa kkonċernata, persuna taxxabbli li tkun residenti u persuna taxxabbli li ma tkunx residenti jqajmu, fil-każ li parti mill-operazzjonijiet ta' dawn il-persuni taxxabbli titwettaq fit-territorju ta' Stat Membru li mhuwiex dak fejn iwettqu l-attività bla paga tagħhom, l-istess diffikultajiet, biex b'hekk dawn iż-żewġ kategoriji ta' persuni taxxabbli jinsabu f'sitwazzjoni li hija oġġettivament komparabbli.
29 Barra minn dan, għandu jiġi mfakkar li d-Direttiva 77/799 tista', fil-każ li parti mill-operazzjonijiet ta' persuna taxxabbli titwettaq fit-territorju ta' Stat Membru li ma jkunx dak fejn iwettaq l-attività bla paga tiegħu, tiġi invokata minn Stat Membru sabiex jikseb, mingħand l-awtoritajiet kompetenti ta' Stat Membru ieħor, l-informazzjoni kollha li tista' tippermettilu jistabbilixxi b'mod korrett it-taxxi fuq id-dħul jew l-informazzjoni kollha li huwa jqis neċessarja sabiex ikun jista' jevalwa l-ammont eżatt tat-taxxa fuq id-dħul dovuta minn persuna taxxabbli skond il-leġiżlazzjoni li japplika (is-sentenza tas-26 ta' Ġunju 2003, Skandia u Ramstedt, C-422/01, Ġabra, p. I-6817, punt 42 u l-ġurisprudenza ċċitata).
30 Għaldaqstant, għandu jiġi kkonstatat li, fis-sens tal-leġiżlazzjoni nazzjonali in kwistjoni fil-kawża prinċipali, il-persuni taxxabbli residenti u l-persuni taxxabbli li mhumiex residenti jinsabu f'sitwazzjoni li hija oġġettivament komparabbli.
31 Din l-interpretazzjoni ma hija l-ebda mod ivvizzjata mill-osservazzjoni tal-Gvern Belġjan li l-bażi minimi ta' tassazzjoni fis-sens tal-leġiżlazzjoni in kwistjoni fil-kawża prinċipali huma ta' spiss aktar favorevoli għall-persuni taxxabbli li mhumiex residenti mit-tassazzjoni permezz ta' tqabbil applikata lill-persuni taxxabbli li huma residenti. Fil-fatt, anki jekk is-sistema tat-taxxa Belġjana hija l-aktar spiss favorevoli għall-persuni taxxabbli li mhumiex residenti, meta jirriżulta li din is-sistema tkun ta' żvantaġġ għall-imsemmija persuni taxxabbli, xorta waħda tista' tirriżulta f'trattament li ma jkunx ugwali ma' dak tal-persuni taxxabbli li huma residenti u b'hekk fil-ħolqien ta' xkiel għal-libertà ta' l-istabbiliment garantita mill-Artikolu 52 tat-Trattat (ara, bħala analoġija, is-sentenza ta' l-14 ta' Diċembru 2000, AMID, C‑141/99, Ġabra p. I-11619, punt 27 u l-ġurisprudenza ċċitata).
32 F'dawn iċ-ċirkustanzi, leġiżlazzjoni ta' Stat Membru bħal dik li tirriżulta mill-Artikolu 342, § 2, tal-Kodiċi tat-taxxi fuq id-dħul ta' l-1992 u mill-Artikolu 182 tad- tad-Digriet Irjali tas-27 ta' Awwissu 1993, li jipprovdi għal bażi minimi ta' tassazzjoni għall-persuni taxxabbli li mhumiex residenti biss, tikkostitwixxi diskriminazzjoni indiretta minħabba n-nazzjonalità fis-sens ta' l-Artikolu 52 tat-Trattat. Fil-fatt, anki jekk l-imsemmija leġiżlazzjoni tipprovdi għal distinzjoni bbażata fuq il-kriterju tar-residenza fis-sens li tiċħad lil dawk li ma jkunux residenti ċerti vantaġġi fil-qasam tat-tassazzjoni li, min-naħa l-oħra, huma mogħtija lir-residenti fit-territorju nazzjonali, hemm ir-riskju li hija tapplika prinċipalment għad-detriment taċ-ċittadini ta' Stati Membri oħra, minħabba li, ta' sikwit, b'analoġija, s-sentenza Schumacker, iċċitata aktar 'il fuq, punt 28).
33 Madankollu wieħed għandu jfittex jekk hemmx xi ġustifikazzjoni possibbli għal din id-diskriminazzjoni.
34 Il-Gvern Belġjan isostni li l-applikazzjoni ta' bażi minimi ta' tassazzjoni fil-konfront tal-persuni taxxabbli li mhumiex residenti biss hija ġġustifikata mill-ħtieġa li tkun żgurata l-effettività tal-kontrolli fiskali u li hija konformi mal-prinċipju ta' proporzjonalità. Huwa jippreċiża li l-metodu ta' tassazzjoni permezz ta' tqabbil li hu previst għall-persuni taxxabbli residenti mhuwiex applikabbli għall-persuni taxxabbli li mhumiex residenti minħabba diffikultajiet ta' natura prattika, b'mod partikolari l-impossibbiltà li tintuża d-Direttiva 77/799.
35 Għandu jiġi osservat, f'dan ir-rigward, li l-effettività tal-kontrolli fiskali tikkostitwixxi raġuni imperattiva ta' interess pubbliku li tista' tiġġustifika restrizzjoni fuq l-eżerċizzju tal-libertajiet fondamentali garantiti mit-Trattat (ara, f'dan is-sens, is-sentenza tat-8 ta' Lulju 1999, Baxter et, C-254/97, Ġabra, p. I‑4809, punt 18 u l-ġurisprudenza ċċitata).
36 Għandu jiġi kkonstatat li, minn naħa, id-diffikultajiet ta' natura prattika invokati mill-Gvern Belġjan jeżistu, hekk kif jirriżulta mill-punt 28 ta' din is-sentenza, bl-istess mod fir-rigward tal-persuni taxxabbli residenti u, min-naħa l-oħra, mill-punt 29 ta' l-istess sentenza, jirriżulta li l-Istat Membru kkonċernat għandu l-possibbiltà li jagħmel użu minn skambji ta' informazzjoni ma' l-Istati Membri l-oħra fuq il-bażi tad-Direttiva 77/799.
37 F'dawn iċ-ċirkustanzi, il-ħtieġa li tiġi ggarantita l-effettività tal-kontrolli fiskali ma tiġġustifikax l-eżistenza ta' differenza fit-trattament, b'tali mod li hemm lok li jiġi applikat l-istess trattament lill-persuni taxxabbli li mhumiex residenti bħal dak previst għall-persuni taxxabbli residenti.
38 Fid-dawl ta' dak kollu li għadu kemm intqal, ir-risposta għad-domanda li saret għandha tkun li l-Artikolu 52 tat-Trattat jipprekludi leġiżlazzjoni ta' Stat Membru, bħal dik li tirriżulta mill-Artikolu 342, § 2 tal-Kodiċi tat-taxxi fuq id-dħul ta' l-1992 u mill-Artikolu 182 tad-Digriet Irjali tas-27 ta' Awwissu 1993, li jipprovdi bażi minimi ta' tassazzjoni għall-persuni taxxabbli li mhumiex residenti biss.
Fuq l-ispejjeż
39 Peress li l-proċedura għandha, fir-rigward tal-partijiet fil-kawża prinċipali, in-natura ta' kwistjoni mqajma quddiem il-qorti tar-rinviju, hija din il-qorti li għandha tiddeċiedi fuq l-ispejjeż. L-ispejjeż sostnuti għas-sottomissjoni ta' l-osservazzjonijiet lill-Qorti, barra dawk ta' l-imsemmija partijiet, ma jistgħux jitħallsu lura.
Għal dawn il-motivi, Il-Qorti tal-Ġustizzja (l-Ewwel Awla) taqta' u tiddeċiedi li:
1) L-Artikolu 52 tat-Trattat (li, wara emendi, sar l-Artikolu 43 KE) jipprekludi leġiżlazzjoni ta' Stat Membru, bħal dik li tirriżulta mill-Artikolu 342, § 2 tal-Kodiċi tat-taxxi fuq id-dħul ta' l-1992 u mill-Artikolu 182 tad-Digriet Irjali tas-27 ta' Awwissu 1993 ta' eżekuzzjoni tal-Kodiċi tat-taxxi fuq id-dħul 1992, li jipprovdi bażi minimi ta' tassazzjoni għall-persuni taxxabbli li mhumiex residenti biss.
Firem
* Lingwa tal-kawża: il-Franċiż.