MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

L-għan tal-proposta mehmuża għal Regolament huwa s-sospensjoni temporanja tad-dazji tat-Tariffa Doganali Komuni msemmija fl-Artikolu 56(2), il-punt (c), tar-Regolament (UE) Nru 952/2013 fuq oġġetti użati għall-produzzjoni ta’ fertilizzanti bbażati fuq in-nitroġenu, ċerti fertilizzanti bbażati fuq in-nitroġenu, u taħlitiet li fihom in-nitroġenu; bħalissa kklassifikati taħt l-intestatura 2814 tan-Nomenklatura Magħquda (NM) u s-subintestatura 3102 10, 3102 21, 3102 60, 3102 80, 3105 20, 3105 30, u 3105 40, sa ċertu volum ta’ importazzjonijiet fl-Unjoni.

Is-suq tal-Unjoni għal ċerti fertilizzanti tan-nitroġenu, inklużi oġġetti għall-produzzjoni tagħhom jiddependi b’mod konsiderevoli fuq l-importazzjonijiet minn pajjiżi terzi. Fl-2024, l-Unjoni importat 2 miljun tunnellata ta’ ammonijaka u 5,9 miljun tunnellata ta’ urea biex tipproduċi fertilizzanti tan-nitroġenu. Barra minn hekk, l-Unjoni importat total ta’ 6,7 miljun tunnellata ta’ fertilizzanti bbażati fuq in-nitroġenu, u taħlitiet li fihom in-nitroġenu taħt is-subintestaturi l-oħra kkonċernati. Dawn huma kollha fertilizzanti intensivi fil-karbonju, li l-produzzjoni tagħhom hija soġġetta għal emissjonijiet sostanzjali tal-karbonju u fejn id-diversifikazzjoni u s-sostituzzjoni huma diffiċli, u jeħtieġu ż-żmien. Għal dawn il-prodotti, il-Federazzjoni Russa kienet il-fornitur globali dominanti tal-Unjoni. Dawn il-fertilizzanti huma essenzjali għall-bdiewa. Il-bdiewa Ewropej jeħtieġu fluss kummerċjali sigur u regolari ta’ fertilizzanti bi prezzijiet kompetittivi biex jiggarantixxu l-produzzjoni agrikola u s-sigurtà tal-ikel fl-Unjoni u fis-swieq globali – peress li l-Unjoni hija esportatur dinji ewlieni ta’ ħafna għelejjel tar-raba’ ewlenin. Il-prezzijiet għall-fertilizzanti bbażati fuq in-nitroġenu fl-Unjoni żdiedu drastikament wara l-invażjoni Russa tal-Ukrajna, u l-irkupru mill-ogħla livelli tal-prezzijiet fl-2023 u fl-2024 kien biss parzjali. Barra minn hekk, il-prezzijiet tal-fertilizzanti bbażati fuq in-nitroġenu fl-2025 reġgħu żdiedu, u f’Diċembru 2025 kienu 23 % 1 ogħla mill-medja tal-2024.

Sabiex jittaffew il-kostijiet għall-produtturi tal-fertilizzanti tal-Unjoni u b’hekk jitnaqqsu l-kostijiet għall-bdiewa tal-Unjoni u jingħata kontribut għall-provvista xierqa tal-ikel prodott fl-Unjoni, jixraq li jiġu sospiżi temporanjament ir-rati tad-dazju doganali applikabbli għall-oġġetti użati għall-produzzjoni ta’ fertilizzanti tan-nitroġenu, ċerti fertilizzanti bbażati fuq in-nitroġenu, u taħlitiet li fihom in-nitroġenu sa ċertu livell ta’ importazzjonijiet. Sabiex tiżdied l-istabbiltà tal-provvista, huwa xieraq ukoll li jitwessa’ l-ambitu ġeografiku tal-importazzjonijiet minn oriġini mhux preferenzjali, minħabba li l-biċċa l-kbira tal-importazzjonijiet mhux preferenzjali tal-prodotti rilevanti bħalissa għadhom joriġinaw mill-Federazzjoni Russa, minkejja ż-żieda fil-miżuri tariffarji applikabbli għal ċerti fertilizzanti ta’ oriġini Russa mill-1 ta’ Lulju 2025 2 . Fil-fatt, u b’mod partikolari fi żmien ta’ skarsezza fis-swieq internazzjonali tal-fertilizzanti tan-nitroġenu, l-eżistenza ta’ tariffi fuq l-importazzjoni fl-Unjoni tal-ammonijaka u l-urea tikkostitwixxi diżinċentiv għall-provvista tas-suq tal-Unjoni meta mqabbla ma’ swieq dinjija oħra, li ma jimponu l-ebda tariffa tal-importazzjoni bħal din. Meta jitqies li l-prodotti nnegozjati f’din il-kategorija huma primarjament komoditajiet, din id-differenza fit-tariffi xxekkel l-isforzi għad-diversifikazzjoni tal-importazzjonijiet tal-Unjoni. Għall-fertilizzanti bbażati fuq in-nitroġenu fil-kamp ta’ applikazzjoni ta’ dan ir-regolament, l-UE hija importatur nett strutturali kbir mid-dinja, b’din il-provvista kkonċentrata, kemm għall-ammonijaka kif ukoll għall-urea, fi tliet sħab kummerċjali ewlenin biss, li l-Federazzjoni Russa hija waħda minnhom fiż-żewġ każijiet.

Sabiex titrawwem din id-diversifikazzjoni filwaqt li tiġi protetta l-produzzjoni domestika tal-Unjoni u ma tiżdiedx aktar id-dipendenza fuq l-importazzjoni, il-miżuri temporanji ta’ liberalizzazzjoni tal-kummerċ ta’ din il-proposta għall-kodiċijiet NM 2814, 3102 10, 3102 21, 3102 60, 3102 80, 3105 20, 3105 30 u 3105 40 isiru fi ħdan sistema ta’ kwoti li tikkorrispondi għal kwota mingħajr dazju skont il-prodott li għaliha l-volum tal-kwota jikkorrispondi għall-volum tal-importazzjonijiet tan-Nazzjon l-Aktar Iffavorit (Most Favoured Nation, MFN) tal-Unjoni ta’ 2024 ħlief l-importazzjonijiet mill-Federazzjoni Russa u mir-Repubblika tal-Belarussja iżda miżjuda b’żieda ta’ 20 % tal-volumi importati fl-Unjoni minn dawn iż-żewġ pajjiżi fl-2024. Limitu tal-kwota huwa ġġustifikat minħabba li s-sehem tal-produzzjoni domestika fl-Unjoni ta’ dawn it-tipi ta’ fertilizzanti għadu għoli. Mit-tliet tipi ewlenin ta’ fertilizzanti użati mill-bdiewa, il-fertilizzanti bbażati fuq in-nitroġenu huma l-uniċi soġġetti għal dazji tariffarji doganali komuni applikabbli għal oġġetti li huma essenzjali għall-produzzjoni tagħhom, għall-kuntrarju tal-potassa u l-fosforu, fejn oġġetti ewlenin meħtieġa għall-produzzjoni diġà jibbenefikaw minn rata tariffarja doganali komuni b’dazju żero. Il-fertilizzanti bbażati fuq in-nitroġenu huma wkoll l-aktar tip wiesa’ ta’ fertilizzanti kkunsmati fl-Unjoni, kif ukoll dak li għalih l-Unjoni tiddependi fuq l-importazzjonijiet u l-kost assoċjat mal-emissjonijiet tal-karbonju huwa l-ogħla. Għalhekk, il-miżuri proposti jiffukaw fuq l-importazzjonijiet ta’ oġġetti għall-produzzjoni ta’ fertilizzanti bbażati fuq in-nitroġenu, u fuq l-importazzjonijiet tal-fertilizzanti bbażati fuq in-nitroġenu l-aktar importati.

•Konsistenza mad-dispożizzjonijiet eżistenti fil-qasam ta’ politika kkonċernat

Bħalissa, il-pajjiżi terzi li jibbenefikaw minn aċċess preferenzjali mingħajr dazju għas-suq tal-Unjoni skont ftehimiet kummerċjali preferenzjali huma l-fornituri ewlenin tal-ammonijaka u tal-urea. Madankollu, importazzjonijiet sinifikanti joriġinaw f’pajjiżi soġġetti għat-Tariffa Doganali Komuni, b’rati tariffarji li bħalissa jvarjaw bejn 5,5 u 6,5 %. Sabiex tiżdied l-istabbiltà tal-provvista, huwa xieraq li jitwessa’ temporanjament l-ambitu ġeografiku tal-pajjiżi fornituri li jibbenefikaw minn trattament mingħajr dazju lil hinn minn dawk li jibbenefikaw minn ftehim ta’ kummerċ ħieles. Dan għaliex il-provvista bħalissa hija kkonċentrata f’għadd relattivament żgħir ta’ fornituri mhux preferenzjali, li minnhom il-Federazzjoni Russa hija fost l-aktar importanti. Madankollu, għall-kuntrarju tal-aċċess mingħajr dazju permezz ta’ ftehimiet kummerċjali preferenzjali, il-miżuri proposti għas-sospensjonijiet tariffarji stabbiliti f’din il-proposta huma temporanji, u huma limitati f’termini ta’ volum għal-livell ta’ kwoti tariffarji speċifiċi. Huwa xieraq ukoll li l-prodotti mill-Federazzjoni Russa u mir-Repubblika tal-Belarussja jiġu esklużi mit-tnaqqis fit-tariffi applikabbli għall-kwoti miftuħa, b’mod partikolari b’konsistenza mar-Regolament 1227/2025 li jiddetermina speċifikament iż-żieda fit-tariffi fuq l-importazzjonijiet ta’ fertilizzanti ta’ dawn l-oriġini u f’konformità mal-obbligi internazzjonali tal-Unjoni.

•Konsistenza ma’ politiki oħra tal-Unjoni

Il-miżuri ta’ liberalizzazzjoni tal-kummerċ li jinsabu f’din il-proposta għandhom l-għan li jiżguraw li s-sospensjoni temporanja tat-tariffa doganali komuni tal-Unjoni titwettaq fil-kuntest tal-prinċipji u l-objettivi tal-azzjoni esterna tal-Unjoni stabbiliti fl-Artikolu 21 tat-TUE u li oqsma differenti ta’ azzjoni esterna tal-Unjoni, kif ukoll l-azzjoni esterna tagħha u politiki oħra tal-Unjoni, ikunu konsistenti. Għalhekk huwa xieraq li l-prodotti li joriġinaw mill-Federazzjoni Russa u mir-Repubblika tal-Belarussja jiġu esklużi mit-tnaqqis fit-tariffi, f’konformità mal-miżuri restrittivi meħuda mill-Unjoni kontra dawn il-pajjiżi wara l-aggressjoni tar-Russja kontra l-Ukrajna.

2.BAŻI LEGALI, SUSSIDJARJETÀ U PROPORZJONALITÀ

•Bażi legali

Il-bażi legali ta' din il-proposta għal regolament hi l-Artikolu 31 tat-Trattat dwar il-Funzjonament tal-Unjoni Ewropea (TFUE).

•Sussidjarjetà (għall-kompetenza mhux esklużiva)

Il-prinċipju tas-sussidjarjetà ma japplikax, peress li l-proposta taqa’ taħt il-kompetenza esklussiva tal-Unjoni.

•Proporzjonalità

Il-proposta tikkonforma mal-prinċipju tal-proporzjonalità peress li tibbilanċja l-interess kummerċjali tal-operaturi ekonomiċi (il-produtturi tal-fertilizzanti tan-nitroġenu u l-konsumaturi). Il-proposta tipprevedi s-sospensjoni tad-dazji tat-Tariffa Doganali Komuni biss għal-linji tariffarji tal-oġġetti użati għall-produzzjoni tal-fertilizzanti, ċerti fertilizzanti bbażati fuq in-nitroġenu, u taħlitiet li fihom in-nitroġenu li għalihom id-dipendenza tal-Unjoni fuq l-importazzjonijiet tkun l-ogħla, u fejn id-diversifikazzjoni lil hinn mill-Federazzjoni Russa u mill-konċentrazzjoni eżistenti tal-fornituri tkun kruċjali. Barra minn hekk, is-sospensjoni se tapplika biss temporanjament.

•Għażla tal-istrument

Skont l-Artikolu 31 tat-TFUE, “Id-dazji tat-Tariffi Doganali Komuni għandhom ikunu stabbiliti mill-Kunsill li jaġixxi fuq proposta mill-Kummissjoni”. Għalhekk Regolament tal-Kunsill hu l-istrument xieraq. Bis-saħħa tal-Artikolu 31 TFUE, il-Kunsill jistabbilixxi d-dazji tat-Tariffa Doganali Komuni, filwaqt li jaġixxi b’maġġoranza kwalifikata fuq il-bażi ta’ proposta tal-Kummissjoni.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

Mhux applikabbli.

•Konsultazzjonijiet mal-partijiet ikkonċernati

Mhux applikabbli.

•Ġbir u użu tal-għarfien espert

Mhux applikabbli.

•Valutazzjoni tal-impatt

Fid-dawl taż-żieda sinifikanti fl-importazzjonijiet ta’ oġġetti minn fornituri ta’ pajjiżi terzi użati fil-produzzjoni ta’ fertilizzanti tan-nitroġenu, aggravata mis-sitwazzjoni ta’ emerġenza li pprovokat l-invażjoni tal-Ukrajna mill-Federazzjoni Russa – preċedentement l-akbar fornitur ta’ fertilizzanti tan-nitroġenu lejn l-Unjoni – huwa importanti li r-Regolament jidħol fis-seħħ malajr kemm jista’ jkun sabiex titrawwem id-diversifikazzjoni tal-provvisti għall-oġġetti meħtieġa għall-produzzjoni tal-fertilizzanti, u tnaqqis fil-kostijiet tal-produzzjoni, qabel l-istaġun tat-tħawwil/tat-tiżrigħ li jmiss. Għalhekk, ma twettqet l-ebda valutazzjoni tal-impatt għall-miżura inkwistjoni. Madankollu, huwa mistenni li l-miżura proposta tbiddel il-profil tal-fornituri tal-fertilizzanti tan-nitroġenu u ta’ ċerti fertilizzanti bbażati fuq in-nitroġenu lejn l-Unjoni u tgħin fid-diversifikazzjoni lil hinn mill-Federazzjoni Russa u mill-konċentrazzjoni eżistenti ta’ fornituri.

•Idoneità regolatorja u simplifikazzjoni

Il-miżura ma żżidx il-piż regolatorju tal-kumpaniji.

•Drittijiet fundamentali

Mhux applikabbli.

4.IMPLIKAZZJONIJIET BAĠITARJI

Din il-proposta ma għandha l-ebda impatt finanzjarju fuq in-nefqa, iżda għandha impatt finanzjarju fuq id-dħul. Id-dazji doganali mhux miġbura li jikkorrispondu għas-sospensjoni se jammontaw għal madwar EUR 59,5 miljun għall-perjodu ta’ applikazzjoni ta’ 12-il xahar tal-miżura. It-tul ta’ żmien tal-miżura huwa perjodu ta’ sena, sa nofs l-2027.

L-effett negattiv fuq ir-riżorsi proprji tradizzjonali tal-baġit huwa ta’ EUR 44,7 miljun (jiġifieri 75 % tat-total). Id-dikjarazzjoni finanzjarja leġiżlattiva tistabbilixxi l-implikazzjonijiet baġitarji tal-proposta f’aktar dettall.

It-telf ta’ dħul f’riżorsi proprji tradizzjonali se jiġi kkumpensat mill-Introjtu Nazzjonali Gross (ING) tal-Istati Membri abbażi tal-kontribuzzjonijiet tar-riżorsi.

5.ELEMENTI OĦRA

•Pjanijiet ta’ implimentazzjoni u arranġamenti għall-monitoraġġ, l-evalwazzjoni u r-rapportar

Ir-rappurtar online dwar l-evoluzzjoni tal-importazzjonijiet tal-Unjoni ta’ fertilizzanti bbażati fuq in-nitroġenu huwa disponibbli permezz ta’ siti web iddedikati tal-Kummissjoni Ewropea (Eurostat).

•Dokumenti ta’ spjegazzjoni (għad-direttivi)

Mhux applikabbli.

•Spjegazzjoni fid-dettall tad-dispożizzjonijiet speċifiċi tal-proposta

Fid-dawl tas-sitwazzjoni straordinarja fis-suq tal-Unjoni għall-fertilizzanti, il-miżura għandha l-għan li żżid il-flussi kummerċjali, u trawwem id-diversifikazzjoni, fir-rigward tal-importazzjonijiet ta’ oġġetti għall-produzzjoni ta’ fertilizzanti bbażati fuq in-nitroġenu, ċerti fertilizzanti bbażati fuq in-nitroġenu, u taħlitiet li fihom in-nitroġenu billi tissospendi temporanjament id-dazji tal-importazzjoni applikati għal dawn il-prodotti.

2026/0062 (NLE)

Proposta għal

REGOLAMENT TAL-KUNSILL

li jissospendi d-dazji tat-Tariffa Doganali Komuni msemmija fl-Artikolu 56(2), il-punt (c), tar-Regolament (UE) Nru 952/2013 tal-Parlament Ewropew u tal-Kunsill, li jiftaħ u jipprevedi l-ġestjoni ta’ kwoti tariffarji awtonomi għal ċerti fertilizzanti

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 31 tiegħu,

Wara li kkunsidra l-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Filwaqt li jaġixxi f’konformità mal-proċedura leġiżlattiva speċjali,

Billi:

(1)Is-suq tal-Unjoni għal ċerti inputs ta’ fertilizzanti tan-nitroġenu jiddependi b’mod konsiderevoli fuq l-importazzjonijiet minn pajjiżi terzi. Fl-2024, l-Unjoni importat 2 miljun tunnellata ta’ ammonijaka u 5,9 miljun tunnellata ta’ urea b’mod partikolari biex tipproduċi fertilizzanti tan-nitroġenu. Barra minn hekk, l-Unjoni importat total ta’ 6,7 miljun tunnellata ta’ fertilizzanti bbażati fuq in-nitroġenu u taħlitiet li fihom in-nitroġenu. Dawn huma oġġetti intensivi fil-karbonju għall-fertilizzanti fejn id-diversifikazzjoni hija diffiċli u teħtieġ iż-żmien. Dawn il-fertilizzanti huma essenzjali wkoll għall-bdiewa Ewropej li jeħtieġu fluss kummerċjali sigur u regolari ta’ fertilizzanti bi prezzijiet kompetittivi biex jiggarantixxu l-produzzjoni agrikola u s-sigurtà tal-ikel. Il-prezzijiet għal dawk il-prodotti żdiedu sostanzjalment mill-2021.

(2)Għall-fertilizzanti bbażati fuq in-nitroġenu li jaqgħu fil-kamp ta’ applikazzjoni ta’ dan ir-Regolament, l-Unjoni hija importatur nett strutturali, bi provvista kkonċentrata fi ftit pajjiżi, fejn wieħed mill-fornituri ewlenin huwa l-Federazzjoni Russa.

(3)Bħalissa, parti sinifikanti minn dawn l-oġġetti għall-produzzjoni ta’ fertilizzanti bbażati fuq in-nitroġenu, u ta’ fertilizzanti bbażati fuq in-nitroġenu, diġà huma importati fl-Unjoni mingħajr dazju minn pajjiżi terzi li jibbenefikaw minn aċċess preferenzjali għas-suq tal-Unjoni. Minkejja dan, l-Unjoni għadha timporta volum kbir ta’ dawn l-oġġetti li joriġinaw minn pajjiżi soġġetti għat-Tariffa Doganali Komuni, bir-rati tad-dazju doganali li bħalissa jvarjaw bejn 5,5 % u 6,5 %.

(4)Dawn id-dazji jżidu l-kostijiet għall-produtturi tal-fertilizzanti tan-nitroġenu u jaffettwaw il-prezz tal-fertilizzanti li min-naħa tiegħu jaffettwa l-prezz tal-ikel, u dan iqajjem tħassib fir-rigward tal-kapaċità tal-akkwist tal-konsumaturi inklużi l-bdiewa Ewropej. F’dawn l-aħħar snin, l-Unjoni rat żieda sinifikanti fil-prezzijiet tal-fertilizzanti filwaqt li l-prezzijiet ta’ ċerti prodotti agrikoli ma kinux jirriflettu bis-sħiħ l-istess xejra. Din is-sitwazzjoni tpoġġi taħt pressjoni l-vijabbiltà tal-produzzjoni agrikola tal-Unjoni.

(5)Sabiex jiġi żgurat dinamiżmu qawwi tas-suq tal-fertilizzanti tal-Unjoni u jiġu diversifikati l-ktajjen tal-provvista, huwa meħtieġ li jiġu ffaċilitati l-importazzjonijiet ta’ oġġetti użati għall-produzzjoni ta’ fertilizzanti bbażati fuq in-nitroġenu, ċerti fertilizzanti bbażati fuq in-nitroġenu, u taħlitiet li fihom in-nitroġenu. Barra minn hekk, id-diversifikazzjoni urġenti tas-sorsi ta’ provvista lil hinn mill-Federazzjoni Russa hija kruċjali, b’mod partikolari minħabba l-miżuri stabbiliti mir-Regolament 2025/1227 tal-Parlament Ewropew u tal-Kunsill li se jżidu progressivament it-tariffi għal xi wħud mill-oġġetti li jaqgħu fil-kamp ta’ applikazzjoni ta’ dan ir-Regolament.

(6)L-Unjoni esperjenzat kostijiet għoljin tal-enerġija f’dawn l-aħħar snin, li affettwaw b’mod negattiv il-produzzjoni tal-fertilizzanti fl-Unjoni u speċjalment il-fertilizzanti bbażati fuq in-nitroġenu minħabba li l-gass naturali huwa s-sors ewlieni tal-enerġija u materja prima. Dan wassal għal impatt sinifikanti fuq il-produzzjoni u l-bejgħ tal-industrija tal-fertilizzanti tal-Unjoni. Il-produtturi tal-fertilizzanti tal-Unjoni għad iridu jadattaw għal dan l-ambjent kumpless xprunat minn fatturi ġeopolitiċi. Għalhekk, kwalunkwe miżura meħuda biex tittejjeb il-provvista tal-fertilizzanti jeħtieġ li tevita li jkollha impatt negattiv fuq il-produtturi tal-fertilizzanti tal-Unjoni.

(7)Peress li l-produzzjoni eżistenti tal-fertilizzanti tal-Unjoni jeħtieġ li tibqa’ protetta, hemm bżonn li tiżdied ir-reżiljenza ta’ din il-katina tal-provvista billi tiġi ffavorita d-diversifikazzjoni tal-inputs tagħha u jiġi minimizzat aktar ir-riskju ta’ dipendenzi esterni.

(8)Huwa xieraq ukoll li tittieħed azzjoni biex jitnaqqsu l-kostijiet tal-importazzjoni ta’ oġġetti għall-produzzjoni ta’ fertilizzanti bbażati fuq in-nitroġenu, ċerti fertilizzanti bbażati fuq in-nitroġenu, u taħlitiet li fihom in-nitroġenu li għalihom il-produzzjoni tal-Unjoni mhijiex biżżejjed.

(9)Għalhekk huwa xieraq li d-dazju tat-Tariffa Doganali Komuni msemmi fl-Artikolu 56(2), il-punt (c), tar-Regolament (UE) Nru 952/2013 tal-Parlament Ewropew u tal-Kunsill 3 għall-urea u l-ammonijaka, kif ukoll għal ċerti fertilizzanti bbażati fuq in-nitroġenu, u taħlitiet li fihom in-nitroġenu sa ċertu volum tal-importazzjonijiet tagħhom jiġi sospiż temporanjament. Sabiex jiġu bbilanċjati l-interessi tal-produtturi tal-Unjoni u dawk tal-konsumaturi tal-Unjoni tal-fertilizzanti, is-sospensjoni temporanja tad-dazji tat-Tariffa Doganali Komuni hija limitata għal kull prodott għall-volum tal-importazzjonijiet tan-Nazzjon l-Aktar Iffavorit (Most Favoured Nation, MFN) tal-Unjoni għall-2024, esklużi l-importazzjonijiet mill-Federazzjoni Russa u mir-Repubblika tal-Belarussja iżda miżjuda b’żieda ta’ 20 % tal-volumi importati minn dawn iż-żewġ pajjiżi fl-2024. Jenħtieġ li s-sospensjoni tariffarja temporanja tapplika għal sena. Il-Kummissjoni se timmonitorja s-sitwazzjoni fis-suq tal-fertilizzanti u jekk ikun meħtieġ, tipproponi t-tiġdid tas-sospensjoni tat-tariffi biex tinkiseb diversifikazzjoni suffiċjenti u tittejjeb id-disponibbiltà ta’ fertilizzanti bi prezz kompetittiv għall-bdiewa Ewropej.

(10)Jenħtieġ li jiġu esklużi l-importazzjonijiet ta’ oġġetti użati għall-produzzjoni ta’ fertilizzanti bbażati fuq in-nitroġenu, ċerti fertilizzanti bbażati fuq in-nitroġenu, u taħlitiet li fihom in-nitroġenu mill-Federazzjoni Russa u mir-Repubblika tal-Belarussja mill-kamp ta’ applikazzjoni tal-miżura tariffarja temporanja stabbilita f’dan ir-Regolament. L-esklużjoni tal-importazzjonijiet mill-Federazzjoni Russa u mir-Repubblika tal-Belarussja mis-sospensjoni temporanja stabbilita f’dan ir-Regolament hija konsistenti mal-azzjoni esterna tal-Unjoni f’oqsma oħra, kif stabbilit fl-Artikolu 21(3) tat-Trattat dwar l-Unjoni Ewropea.

(11)Il-qagħda tar-relazzjonijiet bejn l-Unjoni u l-Federazzjoni Russa ddeterjorat bil-bosta fl-aħħar snin u b’mod partikolari mill-2022 ’l hawn. Dak id-deterjorament tar-relazzjonijiet huwa dovut għan-nuqqas ta’ rispett sfaċċat tal-Federazzjoni Russa lejn il-liġi internazzjonali u għall-gwerra ta’ aggressjoni mhux provokata u mhux ġustifikata tagħha kontra l-Ukrajna. Minn Lulju 2014 ’l hawn, l-Unjoni imponiet progressivament miżuri restrittivi fuq il-kummerċ mal-Federazzjoni Russa bħala rispons għall-azzjonijiet tal-Federazzjoni Russa kontra l-Ukrajna. L-Unjoni imponiet ukoll tariffi ogħla fuq l-importazzjonijiet ta’ fertilizzanti bbażati fuq in-nitroġenu mill-Federazzjoni Russa li jaqgħu wkoll fil-kamp ta’ applikazzjoni ta’ dan ir-Regolament

(12)Il-Federazzjoni Russa hija membru tal-Organizzazzjoni Dinjija tal-Kummerċ (World Trade Organization, “WTO”). Madankollu, l-Unjoni bħalissa hija permessa, bis-saħħa tal-eċċezzjonijiet li japplikaw skont il-Ftehim li Jistabbilixxi l-Organizzazzjoni Dinjija tal-Kummerċ (il-“Ftehim tad-WTO”), u b’mod partikolari l-Artikolu XXI tal-Ftehim Ġenerali dwar Tariffi u Kummerċ 1994 (eċċezzjonijiet ta’ sigurtà), li tinjora l-obbligu li tagħti lill-prodotti importati mill-Federazzjoni Russa it-trattament tan-nazzjon l-aktar iffavorit, u mhijiex imwaqqfa milli timponi dazji ta’ importazzjoni ogħla minn dawk li jinsabu fl-iskeda tal-impenji tariffarji tal-Unjoni fuq il-kummerċ tal-prodotti, jekk l-Unjoni tqis li tali miżuri huma meħtieġa sabiex jiġu protetti l-interessi tas-sigurtà essenzjali tal-Unjoni.

(13)Ir-relazzjonijiet bejn l-Unjoni u r-Repubblika tal-Belarussja ddeterjoraw ukoll matul dawn l-aħħar snin minħabba n-nuqqas ta’ rispett min-naħa tar-Repubblika tal-Belarussja għad-dritt internazzjonali, il-libertajiet fundamentali u d-drittijiet tal-bniedem, kif ukoll l-appoġġ tagħha għall-gwerra ta’ aggressjoni kontra l-Ukrajna mill-Federazzjoni Russa. Minn Ottubru 2020, l-Unjoni imponiet progressivament miżuri restrittivi fuq il-kummerċ mar-Repubblika tal-Belarussja. L-Unjoni imponiet ukoll tariffi ogħla fuq l-importazzjonijiet ta’ fertilizzanti bbażati fuq in-nitroġenu mill-Belarussja.

(14)Ir-Repubblika tal-Belarussja mhijiex membru tad-WTO. Għalhekk, l-Unjoni mhijiex obbligata, bis-saħħa tal-Ftehim tad-WTO, li tagħti lill-prodotti mir-Repubblika tal-Belarussja t-trattament tan-nazzjon l-aktar iffavorit u trattament ieħor f’konformità ma’ dak il-Ftehim. Barra minn hekk, il-ftehimiet kummerċjali eżistenti bejn l-Unjoni u r-Repubblika tal-Belarussja jippermettu azzjonijiet ġustifikati fuq il-bażi ta’ klawżoli ta’ eċċezzjoni applikabbli, b’mod partikolari eċċezzjonijiet ta’ sigurtà.

(15)Sabiex titrawwem id-diversifikazzjoni tal-provvisti u tnaqqis fl-ispejjeż tal-produzzjoni, qabel l-istaġun tat-tħawwil/taż-żrigħ li jmiss, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,

ADOTTA DAN IR-REGOLAMENT:

Artikolu 1

1.Id-dazji tat-Tariffa Doganali Komuni msemmija fl-Artikolu 56(2), il-punt (c), tar-Regolament (UE) Nru 952/2013 għandhom jiġu sospiżi għall-kodiċijiet NM li ġejjin, għall-ammonti aggregati ġenerali stabbiliti fl-Anness ta’ dan ir-Regolament:

(a)il-kodiċijiet NM 2814 10 00 u 2814 20 00;

(b)il-kodiċijiet NM 3102 10 12, 3102 10 15, 3102 10 19 u 3102 10 90;

(c)il-kodiċi NM 3102 21 00;

(d)il-kodiċi NM 3102 60 00;

(e)il-kodiċi NM 3102 80 00;

(f)il-kodiċijiet NM 3105 20 10 u 3105 20 90;

(g)il-kodiċi NM 3105 30 00;

(h)il-kodiċi NM 3105 40 00.

2.Is-sospensjoni tad-dazji fuq oġġetti taħt il-kodiċijiet NM imsemmija fil-paragrafu 1, il-punt (a), ma għandhiex tapplika għall-importazzjonijiet ta’ oġġetti taħt dawk il-kodiċijiet NM mill-Federazzjoni Russa u mir-Repubblika tal-Belarussja.

3.Is-sospensjoni tad-dazji fuq oġġetti taħt il-kodiċijiet NM imsemmija fil-paragrafu 1, il-punti (b), (c), (d), (e), (f), (g) u (h) ma għandhiex tapplika għall-importazzjonijiet ta’ oġġetti taħt dawk il-kodiċijiet mill-Federazzjoni Russa u mir-Repubblika tal-Belarussja li jaqgħu fil-kamp ta’ applikazzjoni tar-Regolament 2025/1227 tal-Parlament Ewropew u tal-Kunsill.

4.In-numri tal-ordni tal-kwota l-ġodda għandhom jinfetħu bir-referenzi elenkati fl-Anness ta’ dan ir-Regolament.

Artikolu 2

Il-Kummissjoni u l-Istati Membri għandhom jimmaniġġjaw il-kwoti ta’ volum tal-importazzjoni stabbiliti fl-Artikolu 1 ta’ dan ir-Regolament f’konformità mas-sistema ta’ ġestjoni għall-kwoti tariffarji prevista fl-Artikoli 49 sa 54 tar-Regolament ta’ Implimentazzjoni tal-Kummissjoni (UE) 2015/2447 4 .

Artikolu 3

Il-Kummissjoni għandha timmonitorja s-sitwazzjoni fis-suq tal-fertilizzanti u jekk ikun meħtieġ, tipproponi l-estensjoni tas-sospensjoni prevista fl-Artikolu 1.

Artikolu 4

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika sa [Uffiċċju tal-Pubblikazzjonijiet jekk jogħġbok żid: sena wara d-data tad-dħul fis-seħħ ta’ dan ir-Regolament].

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Kunsill

Il-President

DIKJARAZZJONI FINANZJARJA LEĠIŻLATTIVA “DĦUL” - GĦAL PROPOSTI LI GĦANDHOM IMPATT BAĠITARJU FUQ IN-NAĦA TAD-DĦUL TAL-BAĠIT

1.ISEM IL-PROPOSTA:

Proposta għal Regolament tal-Kunsill li jissospendi d-dazji tat-Tariffa Doganali Komuni msemmija fl-Artikolu 56(2), il-punt (c), tar-Regolament (UE) Nru 952/2013 tal-Parlament Ewropew u tal-Kunsill, li jiftaħ u jipprevedi l-ġestjoni ta’ kwoti tariffarji awtonomi għal ċerti fertilizzanti.

2.LINJI BAĠITARJI:

Linja tad-dħul (Kapitolu/Artikolu/Partita): Il-Kapitolu 12, l-Artikolu 120

Ammont ibbaġitjat għas-sena kkonċernata: 2026: EUR 21 368 300 000

3.IMPATT FINANZJARJU

 Il-proposta ma għandha l-ebda implikazzjoni finanzjarja

X Il-proposta ma għandha l-ebda impatt finanzjarju fuq in-nefqa iżda għandha impatt finanzjarju fuq id-dħul

 Il-proposta għandha impatt finanzjarju fuq id-dħul assenjat

L-effett huwa kif ġej:

(miljuni ta’ EUR sa pożizzjoni deċimali waħda)

Linja tad-dħul	Impatt fuq id-dħul 5 6	Perjodu ta’ 12-il xahar li jibda	Sena N
NM 2814	EUR 6,1 miljun	01/05/2026	2026
Il-Kodiċijiet NM 3102 10 12, 3102 10 12, 3102 10 15, 3102 10 19 u 3102 10 90	EUR 14,6 miljun	01/05/2026	2026
NM 3102 21	EUR 4,3 miljun	01/05/2026	2026
NM 3102 60	EUR 0,4 miljun	01/05/2026	2026
NM 3102 80	EUR 5,4 miljun	01/05/2026	2026
NM 3105 20	EUR 7,0 miljun	01/05/2026	2026
NM 3105 30	EUR 4,0 miljun	01/05/2026	2026
NM 3105 40	EUR 2,9 miljun	01/05/2026	2026

Sitwazzjoni wara l-azzjoni

Linja tad-dħul

[N+1]

[N+2]

[N+3]

[N+4]

[N+5]

NM 2814

0

0

0

0

0

NM 3102 10

0

0

0

0

0

NM 3102 21

0

0

0

0

0

NM 3102 60

0

0

0

0

0

NM 3102 80

0

0

0

0

0

NM 3105 20

0

0

0

0

0

NM 3105 30

0

0

0

0

0

NM 3105 40

0

0

0

0

0

4.MIŻURI KONTRA L-FRODI

Nru

5.RIMARKI OĦRA

Fl-2024, il-valur totali tal-importazzjonijiet tal-kodiċi NM 2814 ammonta għal EUR 1,1 biljun. Ir-rata konvenzjonali tad-dazju għal dan il-kodiċi NM hija 5,5 %. Il-biċċa l-kbira ta’ dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tad-dazju tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 489 għal tunnellata metrika. Id-dazji stmati mhux miġbura għal kwota ta’ 300 000 tunnellata metrika huma għalhekk EUR 8,1 miljun (489 x 300 000 x 5,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 6,1 miljun għal perjodu ta’ 12-il xahar.

Fl-2024, il-valur totali tal-importazzjonijiet tal-kodiċi NM 3102 10 ammonta għal EUR 2 biljun. Ir-rata konvenzjonali tad-dazju għal dan il-kodiċi NM hija 6,5 %. Il-biċċa l-kbira ta’ dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 336 għal kull tunnellata metrika. Id-dazji stmati mhux miġbura għal kwota ta’ 890 000 tunnellata metrika huma għalhekk EUR 19,5 miljun (336 x 890 000 x 6,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 14,6 miljun għal perjodu ta’ 12-il xahar.

Fl-2024, il-valur totali tal-importazzjonijiet tal-kodiċi NM 3102 21 ammonta għal EUR 119 miljun. Ir-rata konvenzjonali tad-dazju għal dan il-kodiċi NM hija 6,5 %. Il-biċċa l-kbira ta’ dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 212 għal kull tunnellata metrika. Id-dazji stmati li ma nġabrux huma għalhekk EUR 5,7 miljun EUR (212 x 413 000 x 6,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 4,3 miljun għal perjodu ta’ 12-il xahar.

Fl-2024, il-valur totali tal-importazzjonijiet tal-kodiċi NM 3102 60 ammonta għal EUR 84 miljun. Ir-rata konvenzjonali tad-dazju għal dan il-kodiċi NM hija 6,5 %. Il-biċċa l-kbira ta’ dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 298 għal kull tunnellata metrika. Id-dazji stmati li ma nġabrux huma għalhekk EUR 0,5 miljun EUR (298 x 27 000 x 6,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 0,4 miljun għal perjodu ta’ 12-il xahar.

Fl-2024, il-valur totali tal-importazzjonijiet tal-kodiċi NM 3102 80 ammonta għal EUR 269 miljun. Ir-rata konvenzjonali tad-dazju għal dan il-kodiċi NM hija 6,5 %. Parti minn dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 190 għal kull tunnellata metrika. Id-dazji stmati li ma nġabrux huma għalhekk EUR 7,2 miljun EUR (190 x 583 000 x 6,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 5,4 miljun għal perjodu ta’ 12-il xahar.

Fl-2024, il-valur totali tal-importazzjonijiet tal-kodiċi NM 3105 20 ammonta għal EUR 915 miljun. Ir-rata konvenzjonali tad-dazju għal dan il-kodiċi NM hija 6,5 %. Parti minn dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 401 għal kull tunnellata metrika. Id-dazji stmati li ma nġabrux huma għalhekk EUR 9,4 miljun EUR (401 x 360 000 x 6,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 7 miljun għal perjodu ta’ 12-il xahar.

Fl-2024, il-valur totali tal-importazzjonijiet tal-kodiċi NM 3105 30 ammonta għal EUR 881 miljun. Ir-rata konvenzjonali tad-dazju għal dan il-kodiċi NM hija 6,5 %. Il-biċċa l-kbira ta’ dawn l-importazzjonijiet kienu ħielsa mid-dazju bħala riżultat tal-implimentazzjoni tal-Ftehimiet ta’ Kummerċ Ħieles. Il-bqija kienu importazzjonijiet li jħallsu r-rata tat-Tariffa Doganali Komuni, u l-valur unitarju ta’ dawk l-importazzjonijiet, ħlief il-Federazzjoni Russa u r-Repubblika tal-Belarussja, li mhux se jkunu soġġetti għal tnaqqis fit-tariffi, kien ta’ EUR 945 għal kull tunnellata metrika. Id-dazji stmati li ma nġabrux huma għalhekk EUR 5,3 miljun EUR (945 x 87 000 x 6,5 %) fis-sena. Il-kostijiet tal-ġbir ta’ 25 % jitnaqqsu minn dan il-valur, u għalhekk id-dazju massimu stmat mitluf għall-baġit tal-UE għal dan il-prodott huwa ta’ EUR 4 miljun għal perjodu ta’ 12-il xahar.

Kodiċi NM	Volum tal-kwota tariffarja (tunnellati metriċi)	Numru tal-Ordni

2814 10 00, 2814 20 00	300 000	09.0172
3102 10 12, 3102 10 15, 3102 10 19, 3102 10 90	890 000	09.0173
3102 21 00	413 000	09.0174
3102 60 00	27 000	09.0175
3102 80 00	583 000	09.0176
3105 20 10, 3105 20 90	360 000	09.0177
3105 30 00	87 000	09.0178
3105 40 00	83 000	09.0179

Sitwazzjoni wara l-azzjoni
Linja tad-dħul	[N+1]	[N+2]	[N+3]	[N+4]	[N+5]
NM 2814	0	0	0	0	0
NM 3102 10	0	0	0	0	0
NM 3102 21	0	0	0	0	0
NM 3102 60	0	0	0	0	0
NM 3102 80	0	0	0	0	0
NM 3105 20	0	0	0	0	0
NM 3105 30	0	0	0	0	0
NM 3105 40	0	0	0	0	0