IL-KUMMISSJONI EWROPEA

Brussell, 30.6.2026

COM(2026) 323 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Ir-Rapport Annwali tal-Fond ta' Solidarjetà tal-Unjoni Ewropea tal-2025

WERREJ

Introduzzjoni

Applikazzjonijiet li waslu fl-2025

Finanzjament

Għeluq...................

Konklużjonijiet

Introduzzjoni

L-Artikolu 12 tar-Regolament tal-Kunsill (KE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà tal-Unjoni Ewropea 1 (“ir-Regolament”) jirrikjedi li l-Kummissjoni tippreżenta rapport dwar l-attività tal-Fond ta’ Solidarjetà tal-UE (“FSUE”) fis-sena preċedenti lill-Parlament Ewropew u lill-Kunsill. Dan ir-rapport jiddeskrivi l-attivitajiet tal-FSUE fl-2025. Huwa jiġbor fil-qosor (i) l-applikazzjonijiet li waslu; (ii) il-kontribuzzjonijiet finanzjarji proposti u approvati; u (iii) il-każijiet magħluqa fl-2025.

Fl-2025, il-Kummissjoni rċeviet sitt applikazzjonijiet ġodda għal kontribuzzjonijiet finanzjarji mill-FSUE, jiġifieri minn Ċipru (nirien fis-selvaġġ), Spanja (applikazzjoni waħda għall-għargħar, u waħda għan-nirien fis-selvaġġ), Franza (żewġ applikazzjonijiet minħabba ċikluni) u r-Rumanija (għargħar). Tliet applikazzjonijiet kienu relatati ma’ “diżastri naturali maġġuri” u tlieta oħra kienu relatati ma’ “diżastri naturali reġjonali”. Is-sitt applikazzjonijiet kollha ġew ivvalutati u tqiesu eliġibbli abbażi tal-kriterji fir-Regolament.

Spanja (għaż-żewġ applikazzjonijiet tagħha), Franza (għaż-żewġ applikazzjonijiet tagħha) u Ċipru talab pagamenti antiċipati. Fl-2025, il-Kummissjoni tat erba’ pagamenti antiċipati (Ċipru (nirien fis-selvaġġ), Spanja (għargħar), Franza (żewġ ċikluni) u ħallset total ta’ madwar EUR 131,41 miljun. Il-pagament antiċipati mitlub minn Spanja (nirien fis-selvaġġ) se jingħata u jitħallas fl-2026.

Id-deċiżjonijiet ta’ implimentazzjoni dwar is-sitt applikazzjonijiet b’suċċess mill-2025 se jiġu adottati matul l-2026. Barra minn hekk, il-Kummissjoni għalqet 18-il każ tal-FSUE fl-2025.

L-Anness I jelenka l-limiti ta’ ħsara ta’ “diżastru naturali maġġuri” applikabbli fl-2025 għall-mobilizzazzjoni tal-FSUE. L-Anness II jippreżenta ħarsa ġenerali tal-applikazzjonijiet li waslu fl-2025, inkluża l-informazzjoni finanzjarja relevanti.

Applikazzjonijiet li waslu fl-2025

Il-Kummissjoni rċeviet sitt applikazzjonijiet eliġibbli għal kontribuzzjoni finanzjarja mill-FSUE fl-2025. Dawn kollha waslu għand il-Kummissjoni fi żmien l-iskadenza legali ta’ “mhux aktar tard minn 12-il ġimgħa wara l-ewwel okkorrenza tal-ħsara” (l-Artikolu 4(1) tar-Regolament). Tliet applikazzjonijiet kienu relatati ma’ “diżastri naturali maġġuri” u tlieta oħra kienu relatati ma’ “diżastri naturali reġjonali”.

It-tabelli finanzjarji dettaljati rigward dawn l-applikazzjonijiet jinsabu fl-Anness II ta’ dan ir-rapport.

Spanja – Għargħar ta’ DANA f’Valenzja

Bejn it-28 ta’ Ottubru u l-4 ta’ Novembru 2024, maltempata li ġabet xita qawwija laqtet ir-reġjun kollu ta’ Valenzja fi Spanja, li wassal għal għargħar qawwi. Madwar 2 600 dar u żona ta’ aktar minn 500 km2 ġew affettwati. Eluf ta’ unitajiet domestiċi tħallew mingħajr elettriku, ilma tax-xorb u servizz tat-telefown, u l-infrastruttura u l-infrastruttura pubblika ġarrbet ħsara sinifikanti. Ġew impattati aktar minn 170 stabbiliment edukattiv u aktar minn 50 istituzzjoni tas-saħħa. L-għargħar wassal ukoll għal 232 mewta.

L-awtoritajiet Spanjoli stmaw il-ħsara diretta totali fil-livell ta’ EUR 20,28 biljun. Il-Kummissjoni aċċettat EUR 18,08 biljun bħala ħsara diretta totali plawżibbli. Dan l-ammont jaqbeż il-livell ta’ “diżastru naturali maġġuri” ta’ Spanja, li fl-2025 kien ta’ EUR 3,96 biljun (EUR 3 biljun fi prezzijiet tal-2011 skont l-Artikolu 2(2) tar-Regolament).

Fl-20 ta’ Jannar 2025, Spanja applikat għal kontribuzzjoni finanzjarja mill-FSUE għall-finanzjament ta’ operazzjonijiet ta’ emerġenza u ta’ rkupru wara l-għargħar fir-reġjun ta’ Valenzja ta’Ottubru 2024.

Spanja talbet il-ħlas ta’ pagament antiċipat skont l-Artikolu 4a tar-Regolament. Il-Kummissjoni kkonkludiet, fuq il-bażi tal-valutazzjoni preliminari, li ġew issodisfati l-kundizzjonijiet għall-ħlas tal-ammont massimu permess mir-Regolament għal pagament antiċipat mill-FSUE. Ingħata pagament antiċipat ta’ EUR 100 000 000 bid-Deċiżjoni ta’ Implimentazzjoni tal-Kummissjoni C(2025) 1798 tal-20 ta’ Marzu 2025. Il-pagament antiċipat tħallas lil Spanja fit-8 ta’ April 2025.

Wara l-proposta tal-Kummissjoni COM(2025) 855 tat-3 ta’ Ottubru 2025, l-awtorità baġitarja approvat pagament ta’ EUR 946 153 691 mill-FSUE lil Spanja. Id-deċiżjoni ta’ implimentazzjoni rilevanti se tiġi adottata fl-2026.

Franza – Ċiklun f’Mayotte

Fl-14 ta’ Diċembru 2024, l-għajn taċ-ċiklun Chido laqat lill-gżira ta’ Mayotte, Franza. Il-buffuri tar-riħ taċ-ċiklun qabżu l-180 km fis-siegħa fit-territorju kollu. Iċ-ċiklun ġab miegħu wkoll xita qawwija fuq il-gżira, b’total stmat tax-xita ta’ bejn 100 u 150 mm fi 12-il siegħa. Ix-xita qawwija u l-irjieħ qawwija ġew ikkombinati ma’ mewġ perikoluż ta’ għoli bejn 5 u 9 m, li qerdu l-abitazzjonijiet kollha. Il-grilja tal-elettriku u n-network tal-ilma ngħalqu kompletament u diversi mezzi ta’ qsim bejn iż-żewġ gżejjer ta’ Mayotte ġew affettwati b’mod sever. It-trasport pubbliku u s-servizzi tat-trasport fl-iskejjel kellhom jiġu sospiżi temporanjament jew inaqqsu b’mod sinifikanti l-operazzjonijiet tagħhom. Iċ-ċiklun wassal ukoll għal mill-inqas 39 imwiet.

L-awtoritajiet Franċiżi stmaw li l-ħsara diretta totali kkawżata mid-diżastru kienet ta’ EUR 3,8 biljun. Il-Kummissjoni aċċettat ammont ta’ EUR 3,6 biljun bħala ħsara diretta totali plawżibbli. Dan l-ammont jaqbeż il-livell applikabbli għal “diżastru naturali reġjonali” skont l-Artikolu 2(3), it-tieni sentenza, tar-Regolament, li kien ta’ EUR 33,47 miljun għal Mayotte fl-2025.

Fis-7 ta’ Marzu 2025, Franza applikat għal kontribuzzjoni finanzjarja mill-FSUE għall-finanzjament ta’ operazzjonijiet ta’ emerġenza u ta’ rkupru wara ċ-ċiklun Chido fil-gżira ta’ Mayotte, Franza fl-14 ta’ Diċembru 2024.

Franza talbet il-ħlas ta’ pagament antiċipat skont l-Artikolu 4a tar-Regolament. Il-Kummissjoni kkonkludiet fuq il-bażi tal-valutazzjoni preliminari li ġew issodisfati l-kundizzjonijiet għall-ħlas ta’ pagament antiċipat li jikkorrispondi għal 25 % tal-ammont tal-kontribuzzjoni finanzjarja antiċipata tal-FSUE. Ingħata pagament antiċipat ta’ EUR 23 782 012 bid-Deċiżjoni ta’ Implimentazzjoni tal-Kummissjoni C(2025) 3192 tal-20 ta’ Mejju 2025. Il-pagament antiċipat tħallas lil Franza fl-4 ta’ Ġunju 2025.

Wara l-proposta tal-Kummissjoni COM(2025) 855 tat-3 ta’ Ottubru 2025, l-awtorità baġitarja approvat pagament ta’ EUR 89 628 050 mill-FSUE lil Franza. Id-deċiżjoni ta’ implimentazzjoni rilevanti se tiġi adottata fl-2026.

Franza – Ċiklun f’Réunion

Fit-28 ta’ Frar 2025, ċiklun bl-isem ta’ Garance laqat lill-gżira ta’ Réunion, Franza. L-irjieħ ċikloniċi f’xi żoni laħqu veloċità ta’ 215-il kilometru fis-siegħa u ġabu magħhom xita qawwija u kundizzjonijiet tal-baħar perikolużi. Iċ-ċiklun kellu impatt qawwi fuq in-network tat-toroq u fixkel ħafna lill-ekonomija. Is-settur agrikolu, speċjalment is-settur tal-kannamiela, u l-kumpaniji li jiddependu mit-turiżmu ġarrbu ħsara maġġuri minħabba ċ-ċiklun. Biex tiġi megħjuna l-popolazzjoni affettwata, infetħu 123 ċentru ta’ akkomodazzjoni biex in-nies ifittxu l-kenn. Iċ-ċiklun wassal ukoll għal mill-inqas ħames imwiet.

L-awtoritajiet Franċiżi stmaw li l-ħsara diretta totali kkawżata mid-diżastru kienet ta’ EUR 849,45 miljun. Dan l-ammont jaqbeż il-livell applikabbli għal “diżastru naturali reġjonali”, skont l-Artikolu 2(3), it-tieni sentenza, tar-Regolament, li kien ta’ EUR 216,68 miljun għal Réunion fl-2025.

Fit-23 ta’ Mejju 2025, Franza applikat għal kontribuzzjoni finanzjarja mill-FSUE għall-finanzjament ta’ operazzjonijiet ta’ emerġenza u ta’ rkupru wara ċ-ċiklun Garance fil-gżira ta’ Réunion, Franza fit-28 ta’ Frar 2025.

Franza talbet il-ħlas ta’ pagament antiċipat skont l-Artikolu 4a tar-Regolament. Il-Kummissjoni kkonkludiet fuq il-bażi tal-valutazzjoni preliminari li ġew issodisfati l-kundizzjonijiet għall-ħlas ta’ pagament antiċipat li jikkorrispondi għal 25 % tal-ammont tal-kontribuzzjoni finanzjarja antiċipata tal-FSUE. Ingħata pagament antiċipat ta’ EUR 5 309 084 bid-Deċiżjoni ta’ Implimentazzjoni tal-Kummissjoni C(2025) 5615 tal-5 ta’ Awwissu 2025. Il-pagament antiċipat tħallas lil Franza fis-26 ta’ Awwissu 2025.

Wara l-proposta tal-Kummissjoni COM(2025) 855 tat-3 ta’ Ottubru 2025, l-awtorità baġitarja approvat il-pagament ta’ EUR 21 236 336 mill-FSUE lil Franza. Id-deċiżjoni ta’ implimentazzjoni rilevanti se tiġi adottata fl-2026.

Ir-Rumanija – Għargħar

Bejn is-26 ta’ Mejju u l-bidu ta’ Ġunju 2025, ir-Rumanija esperjenzat diversi jiem ta’ xita qawwija, li wasslu għal għargħar fir-reġjuni ta’ Centru, Sud Muntenia u Nord Est. L-akbar ħsara ġiet irreġistrata fis-27 ta’ Mejju fil-Minjiera tal-Melħ ta’ Praid, meta l-ilma tal-għargħar mix-Xmara Corund ħall parti mis-sodda tax-xmara, għamel ħsara serja lill-infrastruttura idroteknika taż-żona u ppenetra l-minjiera tal-melħ. Il-minjiera tal-melħ kollha ġiet mgħarrqa bl-ilma, u ġiet kompromessa l-istabbiltà tal-pilastri ta’ appoġġ tal-melħ u ġiet ipperikolata l-integrità strutturali tal-minjiera. F’partijiet oħra ta’ dawk ir-reġjuni, is-silġ u l-irjieħ qawwija kkawżaw ħsara mifruxa fl-infrastruttura. Il-maltempati fixklu wkoll il-funzjonament tas-servizzi pubbliċi u ħallew eluf ta’ unitajiet domestiċi mingħajr elettriku.

L-awtoritajiet Rumeni jistmaw li l-ħsara diretta totali kkawżata mid-diżastru hija ta’ EUR 573,59 miljun. Skont l-Artikolu 2(3), it-tielet sentenza, tar-Regolament, meta d-diżastru naturali jikkonċerna diversi reġjuni tal-livell NUTS 2, il-livell irid jiġi applikat għall-medja tal-PDG ta’ dawk ir-reġjuni, ponderata skont is-sehem tal-ħsara totali f’kull reġjun. Il-ħsara diretta espressa bħala perċentwal tal-PDG reġjonali ponderat totali tar-reġjuni ta’ Centru, Sud Muntenia u Nord Est hija ta’ 1,8 %. Dan l-ammont jaqbeż 1,5 % tal-PDG reġjonali ponderat totali tar-reġjuni ta’ Centru, Sud Muntenia u Nord Est.

Fl-14 ta’ Awwissu 2025, ir-Rumanija applikat għal kontribuzzjoni finanzjarja mill-FSUE għall-finanzjament ta’ operazzjonijiet ta’ emerġenza u ta’ rkupru wara l-għargħar li laqat il-pajjiż fis-27 ta’ Mejju 2025. Fis-26 ta’ Settembru 2025 u fl-24 ta’ Marzu 2026, ir-Rumanija ppreżentat kjarifiki addizzjonali rigward id-data u l-informazzjoni pprovduti fl-applikazzjoni tal-FSUE.

Ir-Rumanija ma talbitx pagament antiċipat.

Il-Kummissjoni ppreżentat proposta ta’ mobilizzazzjoni lill-awtorità baġitarja f’Mejju 2026. Ladarba l-awtorità baġitarja tapprova l-assistenza proposta mill-FSUE lir-Rumanija, id-deċiżjoni rilevanti ta’ implimentazzjoni se tiġi adottata fl-2026.

Ċipru – Nirien fis-selvaġġ

Matul is-sajf tal-2025, Ċipru esperjenza taħlita ta’ nixfa fit-tul, mewġiet ta’ sħana estremi u rjieħ qawwija, li ħolqu l-kundizzjonijiet għal żewġ nirien fis-selvaġġ bla preċedent fir-reġjuni ta’ Limassol u Pafos f’Lulju. Eluf ta’ residenti kienu mġiegħla jevakwaw minħabba n-nirien fis-selvaġġ ta’ Limassol. Diversi skejjel u stabbilimenti tas-saħħa kellhom inaqqsu s-servizzi tagħhom, u nqerdu kważi 900 proprjetà privata. Sadanittant, in-nirien fis-selvaġġ ta’ Pafos ikkawżaw telfiet ekonomiċi serji fis-settur agrikolu u ħsara ambjentali, u heddew l-istabbiltà soċjoekonomika ta’ komunitajiet rurali. Ir-nirien fis-selvaġġ wasslu wkoll għal żewġ imwiet.

L-awtoritajiet Ċiprijotti stmaw il-ħsara diretta totali kkawżata mid-diżastru fil-livell ta’ EUR 253,691 miljun. Il-Kummissjoni aċċettat ammont ta’ EUR 252,68 miljun bħala ħsara diretta totali plawżibbli. Dan l-ammont jaqbeż il-livell ta’ “diżastru naturali maġġuri” ta’ Ċipru ta’ 0,6 % tal-introjtu nazzjonali gross tiegħu, skont l-Artikolu 2(2) tar-Regolament, li fl-2025 kien ta’ EUR 170,046 miljun.

Fl-14 ta’ Ottubru 2025, Ċipru applika għal kontribuzzjoni finanzjarja mill-FSUE għall-finanzjament ta’ operazzjonijiet ta’ emerġenza u ta’ rkupru wara n-nirien fis-selvaġġ ta’ Lulju 2025.

Ċipru talab il-ħlas ta’ pagament antiċipat skont l-Artikolu 4a tar-Regolament. I-Kummissjoni kkonkludiet fuq il-bażi tal-valutazzjoni preliminari li ġew issodisfati l-kundizzjonijiet għall-ħlas ta’ pagament antiċipat mill-FSUE. Ingħata pagament antiċipat ta’ EUR 2 317 465 bid-Deċiżjoni ta’ Implimentazzjoni tal-Kummissjoni C(2025) 8276 tat-3 ta’ Diċembru 2025. Il-pagament antiċipat tħallas lil Ċipru fid-29 ta’ Diċembru 2025.

Il-Kummissjoni ppreżentat proposta ta’ mobilizzazzjoni lill-awtorità baġitarja f’Mejju 2026. Ladarba l-awtorità baġitarja tapprova l-assistenza proposta mill-FSUE lil Ċipru, id-deċiżjoni rilevanti ta’ implimentazzjoni se tiġi adottata fl-2026.

Spanja – Nirien fis-selvaġġ

Matul is-sajf tal-2025, Spanja esperjenzat taħlita ta’ nixfa fit-tul, mewġiet ta’ sħana estremi u tliet mewġiet ta’ nirien fis-selvaġġ severi. Ġew irreġistrati mill-inqas 243 nar fis-selvaġġ f’16-il komunità awtonoma. In-nirien ikkawżaw ħsara ambjentali, soċjali u ekonomika sinifikanti, u qerdu l-għajxien ta’ ħafna nies, speċjalment f’żoni rurali. Bosta nies kellhom jiġu evakwati minn djarhom. In-nirien fis-selvaġġ wasslu wkoll għal tmien imwiet. Din l-applikazzjoni hija relatata mal-ħsara kkawżata mit-tielet u l-aktar mewġa qerrieda ta’ nirien, li bdiet fit-8 ta’ Awwissu 2025.

L-awtoritajiet Spanjoli stmaw il-ħsara diretta totali kkawżata mid-diżastru fil-livell ta’ EUR 4 318,27 miljun. Dan l-ammont jaqbeż il-livell ta’ “diżastru naturali maġġuri” ta’ Spanja, li fl-2025 kien ta’ EUR 3 958,44 miljun (EUR 3 biljun fi prezzijiet tal-2011 skont l-Artikolu 2(2) tar-Regolament).

Fit-30 ta’ Ottubru 2025, Spanja applikat għal kontribuzzjoni finanzjarja mill-FSUE għall-finanzjament ta’ operazzjonijiet ta’ emerġenza u ta’ rkupru wara n-nirien fis-selvaġġ f’Awwissu 2025.

Spanja talbet il-ħlas ta’ pagament antiċipat skont l-Artikolu 4a tar-Regolament. Il-Kummissjoni kkonkludiet fuq il-bażi tal-valutazzjoni preliminari li ġew issodisfati l-kundizzjonijiet għall-ħlas ta’ pagament antiċipat li jikkorrispondi għal 25 % tal-ammont tal-kontribuzzjoni finanzjarja antiċipata tal-FSUE. Pagament antiċipat ta’ EUR 30 137 714 għandu jingħata bid-deċiżjoni ta’ implimentazzjoni tal-Kummissjoni fl-2026.

Il-Kummissjoni ppreżentat proposta ta’ mobilizzazzjoni lill-awtorità baġitarja f’Mejju 2026. Ladarba l-awtorità baġitarja tapprova l-assistenza proposta mill-FSUE lil Spanja, id-deċiżjoni rilevanti ta’ implimentazzjoni se tiġi adottata fl-2026.

Finanzjament

L-ammonti individwali ta’ assistenza proposti mill-Kummissjoni ġew ikkalkulati bl-użu tal-metodu li ġie deċiż fl-2002 u ġie applikat fil-każijiet sussegwenti kollha. Huwa bbażat fuq il-ħsara diretta totali aċċettata kkawżata mid-diżastru fir-rigward tal-ġid relattiv tal-istat affettwat, kif rifless mil-livell għal diżastru maġġuri (ara l-Anness I).

Għaldaqstant, għal “diżastri naturali maġġuri”, tiġi applikata sistema progressiva f’żewġ stadji. Skont din is-sistema, il-pajjiż jirċievi rata aktar baxxa ta’ għajnuna ta’ 2,5 % tal-ħsara diretta totali għall-parti tal-ħsara taħt il-livell u rata ogħla ta’ għajnuna ta’ 6 % għall-parti tal-ħsara li taqbeż il-livell. Iż-żewġ ammonti huma miżjuda flimkien. “Diżastri naturali reġjonali” u “diżastri naturali ta’ pajjiż ġar” jirċievu 2,5 % tal-ħsara diretta totali.

Ladarba l-Parlament Ewropew u l-Kunsill japprovaw il-mobilizzazzjoni tal-FSUE u jagħmlu l-approprjazzjonijiet baġitarji meħtieġa disponibbli fil-baġit tal-UE, il-Kummissjoni tadotta deċiżjonijiet ta’ implimentazzjoni li jagħtu l-assistenza lill-pajjiżi individwali u mbagħad tħallas l-ammont sħiħ. F’każijiet li fihom ikun ingħata pagament antiċipat, titħallas biss il-bilanċ tal-kontribuzzjoni sħiħa. L-annessi tad-deċiżjonijiet ta’ implimentazzjoni inkludew deskrizzjoni ġenerika tal-użu maħsub tal-flus, elenkaw l-awtoritajiet nominati mill-istati benefiċjarji biex jipproċessaw il-kontribuzzjoni tal-FSUE u semmew l-awtorità indipendenti responsabbli għall-awditjar u l-kontroll.

Matul il-perjodu ta’ rapportar, il-Parlament Ewropew u l-Kunsill, bħala l-awtorità baġitarja, approvaw disa’ kontribuzzjonijiet finanzjarji mill-FSUE kif propost mill-Kummissjoni. Il-Kummissjoni ppreżentat il-proposti tagħha għall-mobilizzazzjoni tal-FSUE f’żewġ gruppi.

·Fit-22 ta’ Mejju 2025, il-Kummissjoni ħarġet proposta 2 għal deċiżjoni tal-Parlament Ewropew u tal-Kunsill dwar il-mobilizzazzjoni tal-FSUE biex tipprovdi assistenza lill-Awstrija, il-Bożnija-Ħerzegovina, iċ-Ċekja, il-Moldova, il-Polonja u s-Slovakkja wara diżastri naturali fl-2024. Din il-proposta kienet akkumpanjata mid-Deċiżjoni Nru 10/2025, li pproponiet it-trasferiment ta’ EUR 270 077 316, kemm f’approprjazzjonijiet ta’ impenn kif ukoll f’approprjazzjonijiet ta’ pagament, mil-linja ta’ riżerva tar-Riżerva ta’ Solidarjetà Ewropea (‘‘ESR’’, European Solidarity Reserve) għal-linja baġitarja operazzjonali tal-FSUE.

L-awtorità baġitarja adottat il-proposta fid-9 ta’ Lulju 2025. Hija tat EUR 280 740 903 f’assistenza mill-FSUE lil: (i) l-Awstrija fir-rigward tal-għargħar ta’ Settembru 2024; (ii) il-Polonja fir-rigward tal-għargħar ta’ Settembru 2024; (iii) iċ-Ċekja fir-rigward tal-għargħar ta’ Settembru 2024; (iv) is-Slovakkja fir-rigward tal-għargħar ta’ Settembru 2024; (v) il-Moldova fir-rigward tal-għargħar ta’ Settembru 2024; u (vi) il-Bożnija-Ħerzegovina fir-rigward tal-għargħar f’Ottubru 2024. Wara li ġew adottati d-deċiżjonijiet ta’ implimentazzjoni li jagħtu l-assistenza, tħallsu EUR 42 789 075 lill-Awstrija, tħallsu EUR 75 998 939 lill-Polonja, u tħallsu EUR 113 979 781 liċ-Ċekja f’Novembru u Diċembru 2025.

Il-Kummissjoni se tħallas ukoll EUR 2 108 187 lis-Slovakkja ladarba tirċievi d-dokumenti rilevanti rigward l-arranġamenti ta’ implimentazzjoni ppjanati mis-Slovakkja f’konformità mal-Artikolu 5(1) tar-Regolament u wara li tkun ġiet adottata d-deċiżjoni rilevanti ta’ implimentazzjoni. Il-Kummissjoni se tħallas ukoll EUR 195 196 lill-Moldova u EUR 45 669 725 lill-Bożnija-Ħerzegovina ladarba jiġu ffirmati l-ftehimiet ta’ kontribuzzjoni ma’ dawn il-pajjiżi, li qed jinnegozjaw l-adeżjoni tagħhom mal-UE, f’konformità mal-Artikolu 5(2) tar-Regolament.

·Fit-3 ta’ Ottubru 2025, il-Kummissjoni ħarġet proposta 3 għal deċiżjoni tal-Parlament Ewropew u tal-Kunsill dwar il-mobilizzazzjoni tal-FSUE biex tingħata assistenza lil Spanja u Franza wara diżastri naturali fl-2024 u l-2025. Din il-proposta kienet akkumpanjata mid-Deċiżjoni Nru 16/2025, li pproponiet it-trasferiment ta’ EUR 927 926 981, kemm f’approprjazzjonijiet ta’ impenn kif ukoll f’approprjazzjonijiet ta’ pagament, mil-linja ta’ riżerva tal-ESR għal-linja baġitarja operazzjonali tal-FSUE.

L-awtorità baġitarja adottat il-proposta fit-13 ta’ Novembru 2025. Hija tat EUR 1 057 018 077 f’assistenza mill-FSUE lil: (i) Spanja fir-rigward tal-għargħar fir-reġjun ta’ Valenzja ta’ Ottubru 2024; (ii) Franza fir-rigward taċ-ċiklun f’Mayotte ta’ Diċembru 2024; u (iii) Franza fir-rigward taċ-ċiklun f’Réunion ta’ Frar 2025. Huwa mistenni li l-adozzjoni tad-deċiżjonijiet ta’ implimentazzjoni li jagħtu l-assistenza u l-ħlas tal-assistenza se jsiru fl-2026.

Għeluq

L-Artikolu 8(3) tar-Regolament jirrikjedi li fi żmien 24 xahar mid-data tal-iżborż tal-kontribuzzjoni finanzjarja, l-istat benefiċjarju jippreżenta rapport dwar l-eżekuzzjoni finanzjarja (“rapport ta’ implimentazzjoni”) b’dikjarazzjoni li tissostanzja n-nefqa (“dikjarazzjoni ta’ validità”).

Il-Kummissjoni għalqet 18-każ tal-FSUE fl-2025.

Il-Greċja, terremot f’Kefalonia fl-2014. Il-kontribuzzjoni finanzjarja mill-FSUE kienet tammonta għal EUR 3 683 320. L-awtoritajiet Griegi ssottomettew ir-rapport ta’ implimentazzjoni u d-dikjarazzjoni ta’ validità f’April 2017. Abbażi tal-informazzjoni pprovduta mill-Greċja, in-nefqa eliġibbli kienet tammonta għal EUR 3 127 724,07, li kienet EUR 555 595,93 inqas mill-kontribuzzjoni finanzjarja tal-FSUE. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 555 595,93. Fil-31 ta’ Jannar 2024, il-Kummissjoni rċeviet irkupru ta’ EUR 555 595,93 mill-Greċja. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq f’Ġunju 2025.

Ir-Rumanija, għargħar tar-rebbiegħa fl-2014. Il-kontribuzzjoni finanzjarja mill-FSUE kienet tammonta għal EUR 4 198 175. L-awtoritajiet Rumeni ssottomettew ir-rapport ta’ implimentazzjoni u d-dikjarazzjoni ta’ validità fi Frar 2018. Abbażi tal-informazzjoni pprovduta mir-Rumanija, in-nefqa eliġibbli kienet tammonta għal EUR 1 143 565,25, li kienet EUR 3 054 609,75 inqas mill-kontribuzzjoni finanzjarja tal-FSUE. Barra minn hekk, kien dovut imgħax li jammonta għal EUR 3 611,16. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 3 058 220,91. Fid-29 ta’ Marzu 2022, il-Kummissjoni rċeviet irkupru ta’ EUR 3 058 220,91 mir-Rumanija. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq f’Jannar 2025.

Il-Bulgarija, għargħar fl-2014. Il-kontribuzzjoni finanzjarja mill-FSUE kienet tammonta għal EUR 10 542 110. L-awtoritajiet Bulgari ssottomettew ir-rapport ta’ implimentazzjoni u d-dikjarazzjoni ta’ validità f’April 2017. Abbażi tal-informazzjoni pprovduta mill-Bulgarija, in-nefqa eliġibbli taħt l-FSUE kienet tammonta għal EUR 9 008 785,21, li kienet EUR 1 533 324,79 inqas mill-kontribuzzjoni finanzjarja tal-FSUE. Barra minn hekk, kien dovut imgħax li jammonta għal EUR 48 977,22. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 1 582 302,01. Fit-22 ta’ Diċembru 2020, il-Kummissjoni rċeviet irkupru ta’ EUR 1 582 302,01 mill-Bulgarija. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq fi Frar 2025.

Ir-Rumanija, għargħar tas-sajf fl-2014. Il-kontribuzzjoni finanzjarja mill-FSUE kienet tammonta għal EUR 4 297 775. L-awtoritajiet Rumeni ssottomettew ir-rapport ta’ implimentazzjoni u d-dikjarazzjoni ta’ validità f’April 2018. Abbażi tal-informazzjoni pprovduta mir-Rumanija, in-nefqa eliġibbli kienet tammonta għal EUR 3 048 079,20, li kienet EUR 1 249 695,80 inqas mill-kontribuzzjoni finanzjarja tal-FSUE. Barra minn hekk, kien dovut imgħax li jammonta għal EUR 5 242,90. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 1 254 938,70. Fid-29 ta’ Marzu 2022, il-Kummissjoni rċeviet irkupru ta’ EUR 1 254 938,70 mir-Rumanija. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq f’Novembru 2025.

Il-Bulgarija, għargħar tas-sajf f’Mizia fl-2014. Il-kontribuzzjoni finanzjarja mill-FSUE kienet tammonta għal EUR 1 983 600. L-awtoritajiet Bulgari ssottomettew ir-rapport ta’ implimentazzjoni u d-dikjarazzjoni ta’ validità f’Awwissu 2017. Abbażi tal-informazzjoni pprovduta mill-Bulgarija, in-nefqa eliġibbli taħt l-FSUE kien jammonta għal EUR 1 771 594,34, li kienet EUR 212 005,66 inqas mill-kontribuzzjoni finanzjarja tal-FSUE. Barra minn hekk, kien dovut imgħax li jammonta għal EUR 14,81. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 212 020,47. Fit-22 ta’ Diċembru 2020, il-Kummissjoni rċeviet irkupru ta’ EUR 212 020,47 mill-Bulgarija. Fl-24 ta’ Frar 2021, il-Bulgarija infurmat lill-Kummissjoni li minħabba proċedimenti amministrattivi u legali, kien meħtieġ li jiġu rkuprati EUR 11 006,22 addizzjonali mill-Kummissjoni. Fis-26 ta’ Settembru 2023, il-Kummissjoni rċeviet irkupru ta’ EUR 11 006,22 mill-Bulgarija. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq f’Novembru 2025.

L-Italja, terremoti fl-2016. Il-kontribuzzjoni finanzjarja mill-FSUE kienet tammonta għal EUR 1 196 797 579. L-awtoritajiet Taljani ssottomettew ir-rapport ta’ implimentazzjoni u d-dikjarazzjoni ta’ validità f’Diċembru 2019. Abbażi tal-informazzjoni pprovduta mill-Italja, in-nefqa eliġibbli kienet tammonta għal EUR 1 473 913 724.12, li kienet aktar mill-kontribuzzjoni tal-FSUE. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Ġunju 2025.

Il-Greċja, terremot fuq il-gżira ta’ Lesbos fl-2017. Il-kontribuzzjoni finanzjarja mill-FSUE kienet tammonta għal EUR 1 359 119. L-awtoritajiet Griegi ssottomettew ir-rapport ta’ implimentazzjoni u d-dikjarazzjoni ta’ validità f’Ottubru 2020. Abbażi tal-informazzjoni pprovduta mill-Greċja, in-nefqa eliġibbli kienet tammonta għal EUR 1 182 470,22, li kienet EUR 176 648,78 inqas mill-kontribuzzjoni finanzjarja tal-FSUE. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 176 648,78. Fis-27 ta’ Settembru 2024, il-Kummissjoni rċeviet irkupru ta’ EUR 176 648,78 mill-Greċja. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq f’Ġunju 2025.

Il-Latvja, għargħar fl-2017. Il-kontribuzzjoni finanzjarja mill-FSUE kienet tammonta għal EUR 17 730 519. L-awtoritajiet Latvjani ssottomettew ir-rapport ta’ implimentazzjoni u d-dikjarazzjoni ta’ validità f’Diċembru 2020. Abbażi tal-informazzjoni pprovduta mil-Latvja, in-nefqa eliġibbli kienet tammonta għal EUR 19 291 264.19, li kienet aktar mill-kontribuzzjoni tal-FSUE. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Jannar 2025.

Spanja, nirien fis-selvaġġ fil-Galicia fl-2017. Il-kontribuzzjoni finanzjarja mill-FSUE kienet tammonta għal EUR 3 228 675. L-awtoritajiet Spanjoli ssottomettew ir-rapport ta’ implimentazzjoni u d-dikjarazzjoni ta’ validità f’Lulju 2020. Abbażi tal-informazzjoni pprovduta minn Spanja, in-nefqa eliġibbli kienet tammonta għal EUR 3 885 001, li kienet aktar mill-kontribuzzjoni tal-FSUE. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Ġunju 2025.

Il-Litwanja, għargħar fl-2017. Il-kontribuzzjoni finanzjarja mill-FSUE kienet tammonta għal EUR 16 918 941. L-awtoritajiet Litwani ssottomettew ir-rapport ta’ implimentazzjoni u d-dikjarazzjoni ta’ validità f’Ottubru 2020. Abbażi tal-informazzjoni pprovduta mil-Litwanja, in-nefqa eliġibbli kienet tammonta għal EUR 16 916 736,24, li kienet EUR 2 204,76 inqas mill-kontribuzzjoni finanzjarja tal-FSUE. Dan wassal lill-Kummissjoni biex issib li kienet meħtieġa korrezzjoni finanzjarja ta’ EUR 2 204,76. Fil-25 ta’ Settembru 2024, il-Kummissjoni rċeviet irkupru ta’ EUR 2 204,76 mil-Litwanja. Il-Kummissjoni sabet li ma kienet meħtieġa l-ebda korrezzjoni finanzjarja addizzjonali, u l-fajl ingħalaq f’Ġunju 2025.

L-Italja, temp estrem fl-2018. Il-kontribuzzjoni finanzjarja mill-FSUE kienet tammonta għal EUR 277 204 595. L-awtoritajiet Taljani ssottomettew ir-rapport ta’ implimentazzjoni u d-dikjarazzjoni ta’ validità f’Mejju 2022. Abbażi tal-informazzjoni pprovduta mill-Italja, in-nefqa eliġibbli kienet tammonta għal EUR 291 657 411,82, li kienet aktar mill-kontribuzzjoni tal-FSUE. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Settembru 2025.

Spanja, event ta’ temp estrem fl-2019. Il-kontribuzzjoni finanzjarja mill-FSUE kienet tammonta għal EUR 56 743 358. L-awtoritajiet Spanjoli ssottomettew ir-rapport ta’ implimentazzjoni u d-dikjarazzjoni ta’ validità f’Novembru 2022. Abbażi tal-informazzjoni pprovduta minn Spanja, in-nefqa eliġibbli kienet tammonta għal EUR 62 034 794,45, li kienet aktar mill-kontribuzzjoni tal-FSUE. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Ġunju 2025.

L-Italja, il-pandemija tal-COVID-19 fl-2020. Il-kontribuzzjoni finanzjarja mill-FSUE kienet tammonta għal EUR 76 271 930. L-awtoritajiet Taljani ssottomettew ir-rapport ta’ implimentazzjoni u d-dikjarazzjoni ta’ validità f’Ġunju 2023. Abbażi tal-informazzjoni pprovduta mill-Italja, in-nefqa eliġibbli kienet tammonta għal EUR 86 250 000 u ma nstabet l-ebda irregolarità. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Novembru 2025.

L-Awstrija, il-pandemija tal-COVID-19 fl-2020. Il-kontribuzzjoni finanzjarja mill-FSUE kienet tammonta għal EUR 31 755 580. L-awtoritajiet Awstrijaċi ssottomettew ir-rapport ta’ implimentazzjoni u d-dikjarazzjoni ta’ validità f’Diċembru 2023. Abbażi tal-informazzjoni pprovduta mill-Awstrija, in-nefqa eliġibbli kienet tammonta għal EUR 42 368 657,03 u ma nstabet l-ebda irregolarità. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Lulju 2025.

Ir-Rumanija, il-pandemija tal-COVID-19 fl-2020. Il-kontribuzzjoni finanzjarja mill-FSUE kienet tammonta għal EUR 13 926 870. L-awtoritajiet Rumeni ssottomettew ir-rapport ta’ implimentazzjoni u d-dikjarazzjoni ta’ validità f’Ottubru 2023. Abbażi tal-informazzjoni pprovduta mir-Rumanija, in-nefqa eliġibbli kienet tammonta għal EUR 19 148 310,58 u ma nstabet l-ebda irregolarità. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Lulju 2025.

Il-Kroazja, il-pandemija tal-COVID-19 fl-2020. Il-kontribuzzjoni finanzjarja mill-FSUE kienet tammonta għal EUR 7 618 270. L-awtoritajiet Kroati ssottomettew ir-rapport ta’ implimentazzjoni u d-dikjarazzjoni ta’ validità f’Diċembru 2023. Abbażi tal-informazzjoni pprovduta mill-Kroazja, in-nefqa eliġibbli kienet tammonta għal EUR 7 618 270 u ma nstabet l-ebda irregolarità. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Settembru 2025.

Il-Ġermanja, il-pandemija tal-COVID-19 fl-2020. Il-kontribuzzjoni finanzjarja mill-FSUE kienet tammonta għal EUR 29 147 795. L-awtoritajiet Ġermaniżi ssottomettew ir-rapport ta’ implimentazzjoni u d-dikjarazzjoni ta’ validità f’Diċembru 2023. Abbażi tal-informazzjoni pprovduta mill-Ġermanja, in-nefqa eliġibbli kienet tammonta għal EUR 2 079 000 000 u ma nstabet l-ebda irregolarità. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Lulju 2025.

Il-Lussemburgu, il-pandemija tal-COVID-19 fl-2020. il-kontribuzzjoni finanzjarja mill-FSUE kienet tammonta għal EUR 2 857 025. L-awtoritajiet Lussemburgiżi ssottomettew ir-rapport ta’ implimentazzjoni u d-dikjarazzjoni ta’ validità f’Ottubru 2023. Abbażi tal-informazzjoni pprovduta mil-Lussemburgu, in-nefqa eliġibbli kienet tammonta għal EUR 5 064 900 u ma nstabet l-ebda irregolarità. Il-Kummissjoni sabet li ma kienet meħtieġa l-ebda korrezzjoni finanzjarja, u l-fajl ingħalaq f’Jannar 2025.

Konklużjonijiet

Fl-2025, l-Ewropa baqgħet il-kontinent li qed jisħon l-aktar malajr, b’aktar minn 95 % tal-kontinent jirreġistra temperaturi ogħla mill-medja u kien ikkaratterizzat minn firxa ta’ eventi estremi, minn nixfa mifruxa fir-rebbiegħa u fis-sajf għal mewġiet ta’ sħana mill-Mediterran għaċ-Ċirku Artiku, nirien fis-selvaġġ fin-Nofsinhar tal-Ewropa u maltempati madwar il-kontinent 4 .

L-Ewropa kontinentali tal-Lvant ġarrbet perjodi twal ta’ xita qawwija segwiti minn nixfa qawwija, li skatta għargħar devastanti. B’mod simili għas-snin preċedenti, in-Nofsinhar tal-Ewropa ffaċċja nixfiet persistenti, mewġiet ta’ sħana rekord u nirien fis-selvaġġ rampanti. It-territorji ultraperiferiċi Franċiżi ta’ Mayotte u ta’ Réunion kienu partikolarment esposti u ġarrbu ħsara minn ċikluni suċċessivi minħabba l-ġeografija tagħhom. Il-qerda li rriżultat – inkluża ħsara mifruxa fid-djar u fl-infrastruttura kritika – qerdet il-ħajjiet u l-għajxien ta’ eluf ta’ Ewropej. Dawn l-eventi jissottolinjaw il-ħtieġa kritika għal miżuri robusti ta’ adattament u ta’ mitigazzjoni tat-tibdil fil-klima li għandhom jiġu implimentati madwar l-Ewropa.

Bis-saħħa taż-żieda fil-baġit tiegħu mill-2024 ’il quddiem, il-FSUE seta’ jassisti aħjar l-isforzi nazzjonali ta’ rikostruzzjoni u ta’ rkupru f’pajjiżi milquta minn diżastri naturali, billi jipprovdi l-ammonti ta’ għajnuna kkalkolati abbażi tal-metodoloġija miftiehma li għandhom jitħallsu bis-sħiħ.

Barra minn hekk, il-FSUE għen lir-reġjuni affettwati jerġgħu jibdew malajr l-attività ekonomika u soċjali tagħhom billi sewwa u rrestawra l-infrastruttura kritika filwaqt li naqqas il-piż finanzjarju fuq il-gvernijiet nazzjonali u lokali.

Bħala konklużjoni, l-għadd ta’ applikazzjonijiet għal assistenza u ż-żieda fil-pressjoni fuq il-baġit tal-FSUE jikkonfermaw il-ħtieġa kbira għall-appoġġ tal-Fond.

(1) Ir-Regolament tal-Kunsill (UE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà tal-Unjoni Ewropea (ĠU L 311, 14.11.2002, p. 3).

(2) C(2025) 3237 tat-22.5.2025.

(3) COM(2025) 855 tat-3.10.2025.

(4)   Rapport Ewropew tal-2025 dwar l-Istat tal-Klima | Copernicus .

IL-KUMMISSJONI EWROPEA

Brussell, 30.6.2026

COM(2026) 323 final

ANNESSI

tar-

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Ir-Rapport Annwali tal-Fond ta' Solidarjetà tal-Unjoni Ewropea tal-2025

Anness I:    FSUE - Limiti għal diżastri maġġuri

Għall-mobilizzazzjoni tal-FSUE japplikaw livelli limitu speċifiċi għall-pajjiż tal-FSUE (fejn il-ħsara diretta totali trid taqbeż 0,6 % tal-ING jew EUR 3 biljun fi prezzijiet tal-2011). Japplika l-inqas ammont.

Limiti applikabbli fl-2025
abbażi taċ-ċifri tal-Eurostat tal-2023 għall-introjtu nazzjonali gross    (f’miljun EUR)

		ING 2023	0,6 % tal-ING	Limitu ta’ diżastru maġġuri 2025
AT	L-AWSTRIJA	473 419	2 840,514	2 840,514
BE	IL-BELĠJU	604 431	3 626,586	3 626,586
BG	IL-BULGARIJA**	90 173	541,038	541,038
CY	ĊIPRU	28 341	170,046	170,046
CZ	IĊ-ĊEKJA	312 882	1 877,292	1 877,292
DE	IL-ĠERMANJA	4 332 217	25 993,302	3 958,436*
DK	ID-DANIMARKA	387 140	2 322,840	2 322,840
EE	L-ESTONJA	36 993	221,958	221,958
EL	IL-GREĊJA	218 152	1 308,912	1 308,912
ES	SPANJA	1 491 103	8 946,618	3 958,436*
FI	IL-FINLANDJA	274 032	1 644,192	1 644,192
FR	FRANZA	2 875 214	17 251,284	3 958,436*
HR	IL-KROAZJA	77 465	464,790	464,790
HU	L-UNGERIJA	190 829	1 144,974	1 144,974
IE	L-IRLANDA	388 351	2 330,106	2 330,106
IT	L-ITALJA	2 115 909	12 701,454	3 958,436*
LT	IL-LITWANJA	71 534	429,204	429,204
LU	IL-LUSSEMBURGU (G.D.)	51 618	309,708	309,708
LV	IL-LATVJA	38 146	228,876	228,876
MT	MALTA	17 897	107,382	107,382
NL	IN-NETHERLANDS	1 058 690	6 352,140	3 958,436*
PL	IL-POLONJA	720 408	4 322,448	3 958,436*
PT	IL-PORTUGALL	260 790	1 564,740	1 564,740
RO	IR-RUMANIJA	315 156	1 890,936	1 890,936
SE	L-IŻVEZJA	561 188	3 367,128	3 367,128
SK	IS-SLOVAKKJA	120 122	720,732	720,732
SI	IS-SLOVENJA	63 352	380,112	380,112
AL	L-ALBANIJA**	21 533	129,198	129,198
ME	IL-MONTENEGRO **	7 031	42,186	42,186
MK	IL-MAĊEDONJA TA’ FUQ**	13 837	83,022	83,022
RS	IS-SERBJA	71 016	426,096	426,096
TR	IT-TURKIJA**	1 020 155	6 120,930	3 958,436*
BA	IL-BOSNJA-ĦERZEGOVINA***	-	-	-
MD	IL-MOLDOVA***	-	-	-

                

Anness II: Il-Fond ta’ Solidarjetà tal-UE – Ħarsa ġenerali lejn l-applikazzjonijiet li waslu fl-2025

Sena tal-okkorrenza	2025
Stat applikant	Spanja	Franza	Franza	Ir-Rumanija	Ċipru	Spanja
Isem u natura tad-diżastru	L-Għargħar DANA f’Valenzja tal-2024	Ċiklun f’Mayotte tal-2024	Ċiklun f’Réunion tal-2025	Għargħar tal-2025	Nirien fis-selvaġġ tal-2025	Nirien fis-selvaġġ tal-2025
Data tal-ewwel ħsara	28-10-2024	14-12-2024	28-02-2025	27-05-2025	23-07-2025	08-08-2025
Skadenza tal-applikazzjoni	20-01-2025	08-03-2025	23-05-2025	19-08-2025	15-10-2025	31-10-2025
Data tal-applikazzjoni	20-01-2025	07-03-2025	23-05-2025	14-08-2025	14-10-2025	30-10-2025
Applikazzjoni kompluta	14-08-2025	07-03-2025	23-05-2025	24-03-2026	14-10-2025	30-10-2025
Limitu ta’ diżastru maġġuri (f’miljuni ta’ EUR)	3 958,436	-	-	-	170,046	3 958,436
Ħsara diretta totali aċċettata mill-Kummissjoni (f’miljuni ta’ EUR)	18 078,315	3 585,122	849,453	573,587	252,681	4 318,269
Kategorija	Maġġuri	Reġjonali	Reġjonali	Reġjonali	Maġġuri	Maġġuri
Kost tal-operazzjonijiet eliġibbli (f’miljuni ta’ EUR)	4 394,106	1 256,845	125,380	449,710	84,256	121,119
Rata ta’ għajnuna (% tal-ħsara totali)	5,23%	2,50%	2,50%	2,50%	3,64%	2,79%
Data tad-deċiżjoni dwar il-pagament antiċipat	20-03-2025	20-05-2025	05-08-2025	Mhux mitluba	03-12-2025	-
Data tal-komunikazzjoni	25-09-2025	25-09-2025	25-09-2025	-	-	-
Data tad-deċiżjoni dwar l-għoti	-	-	-	-	-	-
Kontribuzzjoni finanzjarja mill-FSUE (EUR)	946 153 691	89 628 050	21 236 336	14 339 675	9 209 223	120 550 858

Tista’ ssib ħarsa ġenerali lejn il-każijiet kollha tal-Fond ta’ Solidarjetà tal-UE mill-2002 ’l hawn hawnhekk:
https://ec.europa.eu/regional_policy/funding/solidarity-fund_en