Brussell, 17.11.2025

COM(2025) 693 final

2025/0351(NLE)

Proposta għal

DEĊIŻJONI TAL-KUNSILL

dwar il-konklużjoni, f’isem l-Unjoni, ta’ Ftehim bejn l-Unjoni Ewropea, min-naħa waħda, u l-Iżlanda, min-naħa l-oħra, li jistabbilixxi r-regoli għall-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura


MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

L-Iżlanda hija sieħeb spazjali mill-qrib tal-UE li jipparteċipa f’diversi komponenti tal-Programm Spazjali tal-Unjoni 1 , b’xi eċċezzjonijiet inkluż il-komponent tal-GOVSATCOM.

Fl-14 ta’ Diċembru 2023, l-Iżlanda talbet li tibda negozjati dwar ftehim bil-ħsieb li tipparteċipa fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura. Fil-25 ta’ Frar 2025, il-Kunsill awtorizza l-ftuħ tan-negozjati f’isem l-Unjoni 2 .

Kif definit fil-Programm tal-Unjoni dwar il-Konnettività tas-Sigurtà, ir-Regolament (UE) 2023/588 3 (ir-“Regolament dwar Konnettività Sigura”) u fir-Regolament (UE) 2021/696 dwar il-Programm Spazjali tal-Unjoni 4 (ir-“Regolament dwar l-Ispazju”), il-parteċipazzjoni ta’ pajjiżi terzi fil-Konnettività Sigura u fil-GOVSATCOM rispettivament għandha tiġi organizzata permezz ta’ ftehim internazzjonali awtonomu f’konformità mal-Artikolu 218 tat-TFUE.

Il-parteċipazzjoni tal-Iżlanda fil-Konnettività Sigura u fil-GOVSATCOM se tiġi konkluża fi ftehim wieħed minħabba li ż-żewġ programmi huma interkonnessi, peress li l-GOVSATCOM hija wkoll iċ-ċentru ta’ servizz għall-Konnettività Sigura u minħabba li l-istess kundizzjonijiet japplikaw għall-parteċipazzjoni tal-Iżlanda fiż-żewġ programmi.

Minn perspettiva ġeopolitika, il-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura hija ta’ interess għall-Unjoni peress li se tikkontribwixxi għat-tisħiħ tar-rwol tal-Ewropa bħala attur globali minħabba li tkabbar l-użu tal-Konnettività Sigura lil hinn mill-fruntieri tal-Unjoni u se tippromwovi wkoll il-kooperazzjoni internazzjonali kif definita fl-Istrateġija Spazjali għall-Ewropa 5 . Ftehim mal-Iżlanda jsaħħaħ il-pożizzjoni strateġika tal-UE li hija objettiv tal-Istrateġija Spazjali tal-UE għas-Sigurtà u d-Difiża 6 .

Il-parteċipazzjoni ta’ pajjiż terz bħall-Iżlanda hija ta’ interess għall-Unjoni Ewropea, anke minħabba li billi jitkabbar l-użu tal-Konnettività Sigura, din tiġġenera introjtu għall-Unjoni Ewropea.

•Konsistenza mad-dispożizzjonijiet eżistenti fil-qasam ta’ politika kkonċernat

Ir-Regolament dwar il-Konnettività Sigura joffri l-possibbiltà li l-Programm għal Konnettività Sigura jinfetaħ għal pajjiżi terzi, li l-ewwel kategorija tagħhom huma l-pajjiżi taż-ŻEE-EFTA.

Ftehim mal-Iżlanda se jikkomplementa l-Programm tal-Unjoni għal Konnettività Sigura. Ftehim se jippromwovi u jsaħħaħ ukoll il-Konnettività Sigura barra mill-Unjoni, fit-Tramuntana estrema strateġikament importanti.

•Konsistenza ma’ politiki oħra tal-Unjoni

Minħabba l-pożizzjoni ġeografika ta’ benefiċċju tal-Iżlanda, qrib ir-reġjun tal-Artiku, il-Konnettività Sigura hija importanti biex tappoġġa s-setturi ekonomiċi ewlenin, b’mod partikolari t-telekomunikazzjoni u t-trasport.

Ftehim dwar Konnettività Sigura mal-Iżlanda jikkontribwixxi għal għadd ta’ prijoritajiet tal-UE inkluż il-Patt Ekoloġiku, Ewropa Lesta għall-Era Diġitali, Ekonomija għas-servizz tan-nies u Ewropa Aktar b’Saħħitha fid-Dinja.

Minħabba l-pożizzjoni ġeografika ta’ benefiċċju tal-Iżlanda, qrib ir-reġjun tal-Artiku, ftehim bħal dan se jikkontribwixxi wkoll għall-paċi u s-sigurtà u għall-iżvilupp sostenibbli tad-Dinja.

Il-Boxxla Strateġika għas-sigurtà u d-difiża adottata mill-Kunsill fil-21 ta’ Marzu 2022 tipproponi li s-sistemi spazjali tal-UE joffru konnettività globali lill-atturi tas-sigurtà u tad-difiża. Tappella wkoll lill-Unjoni biex taħdem fuq il-proposta għal sistema ta’ komunikazzjoni sigura globali tal-UE bbażata fl-ispazju. Ftehim mal-Iżlanda se jikkontribwixxi għal dan.

2.BAŻI LEGALI, SUSSIDJARJETÀ U PROPORZJONALITÀ

•Bażi legali

Skont l-Artikolu 189(2) tat-TFUE, il-Parlament Ewropew u l-Kunsill, li jaġixxu f’konformità mal-proċedura leġiżlattiva ordinarja, għandhom jistabbilixxu l-miżuri meħtieġa biex jintlaħqu l-objettivi ta’ politika Ewropea dwar l-ispazju. Miżura waħda hija li jiġu konklużi ftehimiet ta’ kooperazzjoni spazjali internazzjonali, bħal dak imħejji skont din l-inizjattiva.

L-Artikolu 218(6) tat-Trattat dwar il-Funzjonament tal-Unjoni Ewropea (TFUE) jipprevedi li l-Kunsill, fuq proposta min-negozjatur, għandu jadotta deċiżjoni li tikkonkludi l-ftehim.

•Sussidjarjetà (għall-kompetenza mhux esklużiva)

Permezz tar-Regolament dwar il-Konnettività Sigura u r-Regolament dwar l-Ispazju, l-Unjoni għandha l-kompitu li tipprovdi soluzzjonijiet ta’ komunikazzjoni bis-satellita reżiljenti, globali, siguri, protetti, mingħajr interruzzjoni, garantiti u flessibbli, mibnija fuq bażi teknoloġika u industrijali tal-Unjoni, sabiex tiżdied ir-reżiljenza tal-operazzjonijiet tal-Istati Membri u tal-istituzzjonijiet tal-Unjoni.

Peress li l-Programm tal-Unjoni għal Konnettività Sigura u l-Programm Spazjali tal-Unjoni huma programmi tal-Unjoni, il-parteċipazzjoni ta’ pajjiżi terzi fiż-żewġ programmi ma tistax tinkiseb mill-Istati Membri tal-UE nfushom.

•Proporzjonalità u għażla tal-istrument

Kif definit fir-Regolament dwar il-Konnettività Sigura u fir-Regolament dwar l-Ispazju, il-parteċipazzjoni ta’ pajjiżi terzi fil-Konnettività Sigura u fil-GOVSATCOM rispettivament għandha tiġi organizzata permezz ta’ ftehim internazzjonali awtonomu f’konformità mal-Artikolu 218 tat-TFUE bil-ħsieb li jinħolqu drittijiet u obbligi bejn il-partijiet.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Ġbir u użu tal-għarfien espert

Il-Kummissjoni ġabret l-informazzjoni u l-għarfien espert meħtieġa, anke fid-diskussjonijiet tagħha mal-Istati Membri tal-UE, inkluż dwar id-drittijiet u l-obbligi ta’ parteċipazzjoni ta’ pajjiżi mhux tal-UE kif imsemmi fir-Regolament dwar il-Konnettività Sigura u r-Regolament dwar l-Ispazju.

4.IMPLIKAZZJONIJIET BAĠITARJI

L-Iżlanda se tikkontribwixxi għall-Programm tal-Unjoni għal Konnettività Sigura u għas-subkomponent tal-GOVSATCOM abbażi tal-PDG tagħha inkluż l-aġġustament għall-2023–2025 għall-Konnettività Sigura tal-Unjoni u għall-2021–2025 għall-GOVSATCOM.

5.ELEMENTI OĦRA

•Pjanijiet ta’ implimentazzjoni u arranġamenti għall-monitoraġġ, l-evalwazzjoni u r-rapportar

L-implimentazzjoni ta’ dan il-ftehim se tiġi mmonitorjata mill-Unjoni u mill-Iżlanda permezz ta’ Kumitat Konġunt stabbilit skont il-Ftehim.

2025/0351 (NLE)

Proposta għal

DEĊIŻJONI TAL-KUNSILL

dwar il-konklużjoni, f’isem l-Unjoni, ta’ Ftehim bejn l-Unjoni Ewropea, min-naħa waħda, u l-Iżlanda, min-naħa l-oħra, li jistabbilixxi r-regoli għall-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 189, flimkien mal-Artikolu 218(6), it-tieni subparagrafu, il-punt (a) tiegħu,

Wara li kkunsidraw il-proposta tal-Kummissjoni Ewropea,

Wara li kkunsidra l-approvazzjoni tal-Parlament Ewropew 7 ,

Billi:

(1)F’konformità mad-Deċiżjoni tal-Kunsill (UE) …/… 8 ta’ [data], il-Ftehim bejn l-Unjoni Ewropea, min-naħa waħda, u l-Iżlanda, min-naħa l-oħra, li jistabbilixxi r-regoli għall-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura, u għall-aċċess għas-servizzi tagħhom
(il-“Ftehim”) jiġi ffirmat f’isem l-Unjoni fi … 9 ,, soġġett għall-konklużjoni tiegħu f’data aktar tard.

(2)Minn perspettiva ġeopolitika, il-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura se tikkontribwixxi għat-tisħiħ tar-rwol tal-Ewropa bħala attur globali u se tippromwovi l-kooperazzjoni internazzjonali kif definit fl-Istrateġija Spazjali għall-Ewropa 10 . Ftehim mal-Iżlanda jsaħħaħ il-pożizzjoni strateġika tal-UE li hija objettiv tal-Istrateġija Spazjali tal-UE għas-Sigurtà u d-Difiża 11 .

(3)Jenħtieġ li l-Ftehim jiġi approvat,

ADOTTA/ADOTTAT DIN ID-DEĊIŻJONI:

Artikolu 1

Dan il-Ftehim bejn l-Unjoni Ewropea, min-naħa waħda, u l-Iżlanda, min-naħa l-oħra, li jistabbilixxi r-regoli għall-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura, u (il-“Ftehim”) huwa b’dan approvat.

Artikolu 2 

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fi Brussell,

   Għall-Kunsill

   Il-President



DIKJARAZZJONIJIET FINANZJARJI LEĠIŻLATTIVI

DIKJARAZZJONI FINANZJARJA LEĠIŻLATTIVA “DĦUL” - GĦAL PROPOSTI LI GĦANDHOM IMPATT BAĠITARJU FUQ IN-NAĦA TAD-DĦUL TAL-BAĠIT

1.ISEM IL-PROPOSTA:

Ftehim bejn l-Unjoni Ewropea u l-Iżlanda li jistabbilixxi r-regoli għall-parteċipazzjoni tal-Iżlanda fil-Programm tal-Unjoni għal Konnettività Sigura u fil-komponent tal-GOVSATCOM tal-Programm Spazjali tal-Unjoni

[l-Iżlanda, Govsatcom]

2.LINJI BAĠITARJI:

Linja tad-dħul (Kapitolu/Artikolu/Partita): 6 6 0 0

Ammont ibbaġitjat għas-sena kkonċernata:

(fil-każ ta’ dħul assenjat biss):

Id-dħul jiġi assenjat għal-linja tan-nefqa li ġejja (Kapitolu/Artikolu/Partita): 04 02 03.01.

3.IMPATT FINANZJARJU

◻    Il-proposta ma għandha l-ebda implikazzjoni finanzjarja

◻     Il-proposta ma għandha l-ebda impatt finanzjarju fuq in-nefqa iżda għandha impatt finanzjarju fuq id-dħul

x    Il-Proposta għandha impatt finanzjarju fuq id-dħul assenjat

L-effett huwa kif ġej: 

(miljuni ta’ EUR għal pożizzjoni deċimali waħda)

Linja tad-dħul

Impatt fuq id-dħul 12 13

Perjodu ta’ 12-il xahar li jibda mill-01/01/2026 (jekk applikabbli)

Sena N

6 6 0 0

0,09

2026

Kapitolu/Artikolu/Partita …

Sitwazzjoni wara l-azzjoni

Linja tad-dħul

2027

[N+2]

[N+3]

[N+4]

[N+5]

6 6 0 0

0,12

Kapitolu/Artikolu/Partita …

(Fil-każ ta’ dħul assenjat biss, bil-kundizzjoni li l-linja baġitarja tkun diġà magħrufa):

Linja tan-nefqa 14

2026

2027

04 02 03.01

0,09

0,12

Kapitolu/Artikolu/Partita …

Linja tan-nefqa

[N+2]

[N+3]

[N+4]

[N+5]

Kapitolu/Artikolu/Partita …

Kapitolu/Artikolu/Partita …

4.MIŻURI KONTRA L-FRODI

5.KUMMENTI OĦRA

(il-metodu/il-formula li ntużaw biex jiġi kkalkolat id-dħul)

Għall-2026 u l-2027, il-kontribuzzjoni hija bbażata fuq il-koeffiċjent tal-EFTA għall-parteċipazzjoni fil-programmi, filwaqt li għall-2021–2025 il-parteċipazzjoni retroattiva hija kkalkulata abbażi tal-ammonti attwali implimentati fil-perjodu, kif stabbilit fid-Deċiżjoni tal-Kumitat Konġunt taż-ŻEE Nru xx/2025 ta’ xx 2025.



DIKJARAZZJONI FINANZJARJA LEĠIŻLATTIVA “DĦUL” - GĦAL PROPOSTI LI GĦANDHOM IMPATT BAĠITARJU FUQ IN-NAĦA TAD-DĦUL TAL-BAĠIT

1.ISEM IL-PROPOSTA:

Ftehim bejn l-Unjoni Ewropea u l-Iżlanda li jistabbilixxi r-regoli għall-parteċipazzjoni tal-Iżlanda fil-Programm tal-Unjoni għal Konnettività Sigura u fil-komponent tal-GOVSATCOM tal-Programm Spazjali tal-Unjoni

[l-Iżlanda, USC]

2.LINJI BAĠITARJI:

Linja tad-dħul (Kapitolu/Artikolu/Partita): 6 6 0 0

Ammont ibbaġitjat għas-sena kkonċernata:

(fil-każ ta’ dħul assenjat biss):

Id-dħul jiġi assenjat għal-linja tan-nefqa li ġejja (Kapitolu/Artikolu/Partita): 04 01 02, 04 03 01, 13 05 01, 14 08 01.

3.IMPATT FINANZJARJU

◻    Il-proposta ma għandha l-ebda implikazzjoni finanzjarja

◻     Il-proposta ma għandha l-ebda impatt finanzjarju fuq in-nefqa iżda għandha impatt finanzjarju fuq id-dħul

x    Il-Proposta għandha impatt finanzjarju fuq id-dħul assenjat

L-effett huwa kif ġej: 

(miljuni ta’ EUR għal pożizzjoni deċimali waħda)

Linja tad-dħul

Impatt fuq id-dħul 15 16

Perjodu ta’ 12-il xahar li jibda mill-01/01/2026 (jekk applikabbli)

Sena N

6 6 0 0

0,8

2026

Kapitolu/Artikolu/Partita …

Sitwazzjoni wara l-azzjoni

Linja tad-dħul

2027

[N+2]

[N+3]

[N+4]

[N+5]

6 6 0 0

0,7

Kapitolu/Artikolu/Partita …

(Fil-każ ta’ dħul assenjat biss, bil-kundizzjoni li l-linja baġitarja tkun diġà magħrufa):

Linja tan-nefqa 17

2026

2027

04 01 02

0,001

0,001

04 03 01

0,3

0,5

13 05 01

0,4

0,2

14 08 01

0,1

0,1

Linja tan-nefqa

[N+2]

[N+3]

[N+4]

[N+5]

Kapitolu/Artikolu/Partita …

Kapitolu/Artikolu/Partita …

4.MIŻURI KONTRA L-FRODI

5.KUMMENTI OĦRA

(il-metodu/il-formula li ntużaw biex jiġi kkalkolat id-dħul)

Għall-2026 u l-2027, il-kontribuzzjoni hija bbażata fuq il-koeffiċjent tal-EFTA għall-parteċipazzjoni fil-programmi, filwaqt li għall-2023–2025 il-parteċipazzjoni retroattiva hija kkalkulata abbażi tal-ammonti attwali implimentati fil-perjodu, kif stabbilit fid-Deċiżjoni tal-Kumitat Konġunt taż-ŻEE Nru xx/2025 ta’ xx 2025.

(1)    Ir-Regolament (UE) 2021/696 tal-Parlament Ewropew u tal-Kunsill tat-28 ta’ April 2021 li jistabbilixxi l-Programm Spazjali tal-Unjoni u l-Aġenzija tal-Unjoni Ewropea għall-Programm Spazjali u li jħassar ir-Regolamenti (UE) Nru 912/2010, (UE) Nru 1285/2013 u, (UE) Nru 377/2014 u d-Deċiżjoni Nru 541/2014/UE, ĠU L 170 tat-12.5.2021, p.79–148.
(2)    Il-Kunsill tal-Unjoni Ewropea, 16060/24 ADD 1 ESPACE 106 tal-11 ta’ Diċembru 2024.
(3)    Ir-Regolament (UE) 2023/588 tal-Parlament Ewropew u tal-Kunsill tal-15 ta’ Marzu 2023 li jistabbilixxi l-Programm tal-Unjoni għal Konnettività Sigura għall-perjodu 2023-2027 (ĠU L 79, 17.3.2023, p. 1, ELI: http://data.europa.eu/eli/reg/2023/588/oj).
(4)    Ir-Regolament (UE) 2021/696 tal-Parlament Ewropew u tal-Kunsill tat-28 ta’ April 2021 li jistabbilixxi l-Programm Spazjali tal-Unjoni u l-Aġenzija tal-Unjoni Ewropea għall-Programm Spazjali u li jħassar ir-Regolamenti (UE) Nru 912/2010, (UE) Nru 1285/2013 u (UE) Nru 377/2014, u d-Deċiżjoni Nru 541/2014/UE (ĠU L 170, 12.5.2021, p. 69, ELI: http://data.europa.eu/eli/reg/2021/696/oj).
(5)    Strateġija Spazjali għall-Ewropa, il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, COM(2016) 705 final tas-26.10.2016.
(6)    L-Istrateġija tal-Unjoni Ewropea għas-Sigurtà u d-Difiża, il-Komunikazzjoni konġunta lill-Parlament Ewropew u lill-Kunsill, JOIN (2023) 9 final tal-10.3.2023.
(7)    Approvazzjoni tal-ĠU C , , p. […] (għadha mhijiex ippubblikata f’Il-Ġurnal Uffiċjali).
(8)    ĠU: Jekk jogħġbok daħħal fit-test in-numru tad-Deċiżjoni li tinsab fid-dokument ST 7773/23 u daħħal in-numru, id-data u r-referenza tal-ĠU ta’ dik id-Deċiżjoni fin-nota f’qiegħ il-paġna: Id-Deċiżjoni tal-Kunsill (UE) …/… ta’ … dwar l-iffirmar, f’isem l-Unjoni, tal-Ftehim bejn l-Unjoni Ewropea, min-naħa waħda, u l-Iżlanda, min-naħa l-oħra, li jistabbilixxi r-regoli għall-parteċipazzjoni tal-Iżlanda fil-komponent tal-Govsatcom tal-Programm Spazjali tal-Unjoni u fil-Programm tal-Unjoni għal Konnettività Sigura (ĠU L …, …, p. …).
(9)    ĠU: Jekk jogħġbok daħħal fit-test id-data tal-iffirmar tal-Ftehim.
(10)    Strateġija Spazjali għall-Ewropa, il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, COM 705 final tas-26.10.2016.
(11)    L-Istrateġija tal-Unjoni Ewropea għas-Sigurtà u d-Difiża, il-Komunikazzjoni konġunta lill-Parlament Ewropew u lill-Kunsill, JOIN (2023) 9 final tal-10.3.2023.
(12)    L-ammonti għal kull sena jeħtieġu jkunu stima bbażata fuq il-formula jew fuq il-metodu definit skont it-Taqsima 5. Għas-sena tal-bidu, l-ammont annwali normalment jitħallas mingħajr tnaqqis jew fuq bażi pro rata.
(13)    Fil-każ ta’ riżorsi proprji tradizzjonali (dazji doganali, imposti fuq iz-zokkor) l-ammonti indikati jridu jkunu ammonti netti, jiġifieri ammonti grossi wara t-tnaqqis ta’ 20 % għall-kostijiet tal-ġbir.
(14)    Tintuża biss jekk meħtieġ.
(15)    L-ammonti għal kull sena jeħtieġu jkunu stima bbażata fuq il-formula jew fuq il-metodu definit skont it-Taqsima 5. Għas-sena tal-bidu, l-ammont annwali normalment jitħallas mingħajr tnaqqis jew fuq bażi pro rata.
(16)    Fil-każ ta’ riżorsi proprji tradizzjonali (dazji doganali, imposti fuq iz-zokkor) l-ammonti indikati jridu jkunu ammonti netti, jiġifieri ammonti grossi wara t-tnaqqis ta’ 20 % għall-kostijiet tal-ġbir.
(17)    Tintuża biss jekk meħtieġ.

Brussell, 17.11.2025

COM(2025) 693 final

ANNESS

tal-

Proposta għal Deċiżjoni tal-Kunsill

dwar il-konklużjoni, f’isem l-Unjoni, ta’ Ftehim bejn l-Unjoni Ewropea, min-naħa waħda, u l-Iżlanda, min-naħa l-oħra, li jistabbilixxi r-regoli għall-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura


Ftehim bejn l-Unjoni Ewropea u l-Iżlanda li jistabbilixxi r-regoli għall-parteċipazzjoni tal-Iżlanda fil-Programm tal-Unjoni għal Konnettività Sigura u fil-komponent tal-GOVSATCOM tal-Programm Spazjali tal-Unjoni  

L-UNJONI EWROPEA (minn hawn ’il quddiem l-“Unjoni”)

Minn naħa waħda,

kif ukoll

L-IŻLANDA (minn hawn ’il quddiem “l-Iżlanda”),

Min-naħa l-oħra,

minn hawn ’il quddiem imsejħa b’mod konġunt “il-Partijiet”

FILWAQT LI JIRRIKONOXXU l-parteċipazzjoni tal-Iżlanda fil-Programm Spazjali tal-Unjoni,

FILWAQT LI JIRRIKONOXXU l-obbligi tal-Partijiet skont id-dritt internazzjonali,

FILWAQT LI JFAKKRU fir-Regolament (UE) 2021/696 dwar il-Programm Spazjali tal-Unjoni 1 (minn hawn ’il quddiem imsejjaħ “ir-Regolament dwar l-Ispazju”) u fir-Regolament (UE) 2023/588 dwar il-Programm tal-Unjoni għal Konnettività Sigura 2 (minn hawn ’il quddiem imsejjaħ “ir-Regolament dwar il-Konnettività Sigura”),

FILWAQT LI JIRRIKONOXXU li l-Iżlanda qed tikkontribwixxi b’mod finanzjarju għall-attivitajiet li jirriżultaw mill-Programm tal-Unjoni għal Konnettività Sigura u mill-komponent tal-GOVSATCOM tal-Programm Spazjali tal-Unjoni kif stabbilit fid-Deċiżjoni tal-Kumitat Konġunt taż-ŻEE Nru xx/2025 ta’ xx 2025 li temenda l-Protokoll 31 dwar il-kooperazzjoni f’oqsma speċifiċi li ma jagħmlux parti mill-erba’ libertajiet u l-Protokoll 37 li fih il-lista stabbilita fl-Artikolu 101 tal-Ftehim dwar iż-Żona Ekonomika Ewropea (minn hawn ’il quddiem imsejjaħ il-“Ftehim ŻEE”),

FILWAQT LI JIRRIKONOXXU l-importanza tal-Ftehim ŻEE bħala bażi legali u istituzzjonali biex tissaħħaħ u titwessa’ l-kooperazzjoni bejn l-Unjoni u l-Iżlanda fil-qasam tal-konnettività sigura,

FILWAQT LI JFAKKRU fil-Ftehim bejn ir-Repubblika tal-Iżlanda u l-Unjoni Ewropea dwar proċeduri ta’ sigurtà għall-iskambju ta’ informazzjoni klassifikata (minn hawn’ il quddiem imsejjaħ “il-Ftehim dwar is-Sigurtà tal-Informazzjoni”) li ġie ffirmat fit-12 ta’ Ġunju 2006, u li daħal fis-seħħ fl-1 ta’ Marzu 2007,

FILWAQT LI JFAKKRU fl-Arranġamenti ta’ Sigurtà għall-protezzjoni ta’ informazzjoni klassifikata skambjata bejn ir-Repubblika tal-Iżlanda u l-Unjoni (minn hawn’ il quddiem imsejħa “l-Arranġamenti ta’ Sigurtà”), maqbula fit-22 ta’ Frar 2007,

FILWAQT LI JIRRIKONOXXU li d-Deċiżjoni tal-Kunsill (PESK) 2021/698 tistabbilixxi r-responsabbiltajiet li għandhom jiġu eżerċitati mill-Kunsill u mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”) biex tiġi evitata theddida għas-sigurtà tal-Unjoni jew ta’ Stat Membru wieħed jew aktar jew biex tiġi mitigata ħsara serja għall-interessi essenzjali tal-Unjoni jew ta’ Stat Membru wieħed jew aktar jew kull meta s-sigurtà tal-Unjoni jew tal-Istati Membri tagħha tista’ tiġi affettwata mill-operazzjoni tas-sistema jew mill-forniment tas-servizzi governattivi, id-Deċiżjoni (PESK) 2021/698 għandha tapplika kif stipulat fl-Artikolu 35 tar-Regolament dwar l-Ispazju u fl-Artikolu 31 tar-Regolament dwar il-Konnettività Sigura,

FILWAQT LI JIRRIKONOXXU l-interess tal-Iżlanda fil-komponent tal-GOVSATCOM tal-Programm Spazjali tal-Unjoni u fis-servizzi tal-Konnettività Sigura tal-Unjoni,

FILWAQT LI JIXTIEQU jistabbilixxu ftehim bilaterali dwar il-parteċipazzjoni tal-Iżlanda fil-Programm tal-Unjoni għal Konnettività Sigura u fil-komponent tal-GOVSATCOM tal-Programm Spazjali tal-Unjoni,

FTIEHMU KIF ĠEJ:

Artikolu 1

Għan tal-Ftehim

1. Dan il-Ftehim jistabbilixxi t-termini u l-kundizzjonijiet għall-parteċipazzjoni tal-Iżlanda fil-Programm tal-Unjoni għal Konnettività Sigura u fil-komponent tal-GOVSATCOM tal-Programm Spazjali tal-Unjoni u għall-aċċess tal-Iżlanda għas-servizzi governattivi tal-Unjoni għal Konnettività Sigura u għas-servizzi tal-GOVSATCOM.

2. L-Iżlanda għandha tkun Parteċipant tal-Unjoni għal Konnettività Sigura u Parteċipant tal-GOVSATCOM sa fejn tawtorizza lill-utenti tal-Unjoni għal Konnettività Sigura tal-kapaċitajiet governattivi u lill-utenti tal-GOVSATCOM, jew tipprovdi kapaċitajiet ta’ komunikazzjoni bis-satellita, siti tas-segmenti terrestri jew parti mill-faċilitajiet tas-segmenti terrestri.

3. Id-drittijiet mogħtija skont dan il-Ftehim għandhom ikunu mingħajr preġudizzju għall-Programm tal-Unjoni għal Konnettività Sigura u għall-komponent tal-GOVSATCOM tal-Programm Spazjali tal-Unjoni. Il-Ftehim ma għandu jagħti lill-Iżlanda l-ebda setgħa tat-teħid ta’ deċiżjonijiet fir-rigward tal-Programm tal-Unjoni għal Konnettività Sigura u tal-komponent tal-GOVSATCOM tal-Programm Spazjali tal-Unjoni.

4. Dan il-Ftehim ma jaffettwax il-qafas legali u l-istruttura istituzzjonali tal-Programm tal-Unjoni għal Konnettività Sigura u l-komponent tal-GOVSATCOM tal-Programm Spazjali tal-Unjoni stabbilit bid-dritt tal-Unjoni, l-atti rilevanti tal-Unjoni inkorporati fil-Ftehim ŻEE jew il-miżuri meħuda għall-implimentazzjoni tal-atti tal-Unjoni. Dan il-Ftehim lanqas ma jaffettwa d-drittijiet, ir-regolamenti u l-politiki applikabbli tal-Unjoni li jimplimentaw l-impenji ta’ nonproliferazzjoni u l-kontroll tal-esportazzjoni għal oġġetti b’użu doppju.

5. L-Unjoni għandha tkun is-sid tal-assi tanġibbli u intanġibbli kollha li jiffurmaw parti mill-infrastruttura governattiva żviluppata skont il-Programm tal-Unjoni għal Konnettività Sigura, kif previst fl-Artikoli 5(2) u 19(2) tar-Regolament dwar il-Konnettività Sigura, u skont il-komponent tal-GOVSATCOM tal-Programm Spazjali tal-Unjoni.

6. Dan il-Ftehim ma għandux jaffettwa d-drittijiet u l-obbligi ta’ xi waħda mill-Partijiet skont kwalunkwe ftehim internazzjonali ieħor.

Artikolu 2

Definizzjonijiet

Għall-finijiet ta’ dan il-Ftehim, japplikaw id-definizzjonijiet li ġejjin:

1.“Ċentru tal-GOVSATCOM” tfisser ċentru tal-GOVSATCOM kif definit fl-Artikolu 2, il-punt (23), tar-Regolament (UE) 2021/696.

2.“L-Aġenzija” tfisser l-Aġenzija tal-Unjoni Ewropea għall-Programm Spazjali stabbilita bir-Regolament (UE) 2021/696.

3.“Informazzjoni klassifikata tal-UE” jew “IKUE” tfisser informazzjoni klassifikata tal-UE jew IKUE kif definit fl-Artikolu 2, il-punt (25), tar-Regolament (UE) 2021/696.

4.“Informazzjoni sensittiva mhux klassifikata” tfisser informazzjoni sensittiva mhux klassifikata kif definit fl-Artikolu 2, il-punt (26), tar-Regolament (UE) 2021/696.

5. “Tokens” tfisser l-unità użata għall-ħlas jew għall-kumpens għas-servizzi tal-GOVSATCOM, kif definit fl-Artikolu 2 tad-Deċiżjoni ta’ Implimentazzjoni tal-Kummissjoni (UE) 2023/1055 3 .

6. “Kontroll” tfisser il-kapaċità li tiġi eżerċitata influwenza deċiżiva fuq entità legali b’mod dirett jew indirett permezz ta’ entità legali intermedja waħda jew aktar.

7. “Struttura maniġerjali eżekuttiva” tfisser il-korp ta’ entità legali maħtur f’konformità mad-dritt nazzjonali, u li, meta applikabbli, jirrapporta lill-uffiċjal kap eżekuttiv jew lil kwalunkwe persuna oħra b’setgħa deċiżjonali komparabbli, u li jkollu s-setgħa jistabbilixxi l-istrateġija, l-objettivi u d-direzzjoni ġenerali tal-entità legali, u jissorvelja u jimmonitorja t-teħid ta’ deċiżjonijiet tal-immaniġġjar.

8. “Pajjiż terz” tfisser kwalunkwe pajjiż li mhuwiex l-Iżlanda jew kwalunkwe Stat Membru tal-UE jew kwalunkwe Stat taż-ŻEE-EFTA ieħor li jipparteċipa, kif rilevanti, fil-komponent tal-GOVSATCOM tal-Programm Spazjali tal-Unjoni jew tal-Programm tal-Unjoni għal Konnettività Sigura.

9. “Komponent tal-GOVSATCOM tal-Programm Spazjali tal-Unjoni” jew “GOVSATCOM” tfisser il-komponent tal-GOVSATCOM stabbilit bir-Regolament (UE) 2021/696.

10. “Parteċipant tal-GOVSATCOM” tfisser parteċipant skont it-tifsira tal-Artikolu 68 tar-Regolament (UE) 2021/696.

11. “Programm tal-Unjoni għal Konnettività Sigura” tfisser il-programm stabbilit bir-Regolament (UE) 2023/588.

12. “Parteċipant tal-Unjoni għal Konnettività Sigura” tfisser parteċipant skont it-tifsira tal-Artikolu 11 tar-Regolament (UE) 2023/588.

Artikolu 3

Ambitu tal-Kooperazzjoni

Dan il-Ftehim jirregola l-parteċipazzjoni tal-Iżlanda fil-komponent tal-GOVSATCOM tal-Programm Spazjali tal-Unjoni u fil-Programm tal-Unjoni għal Konnettività Sigura u l-aċċess tal-Iżlanda għas-servizzi governattivi tal-Unjoni għal Konnettività Sigura u għas-servizzi tal-GOVSATCOM.

Jikkumplimenta d-Deċiżjoni tal-Kumitat Konġunt taż-ŻEE Nru xx/2025 ta’ xx.

Artikolu 4

Konnettività Sigura tal-Unjoni u parteċipazzjoni tal-GOVSATCOM

L-Iżlanda għandha tkun Parteċipant fil-Programm tal-Unjoni għal Konnettività Sigura u Parteċipant tal-GOVSATCOM skont it-tifsira tal-Artikolu 11 tar-Regolament dwar il-Konnettività Sigura u tal-Artikolu 68 tar-Regolament dwar l-Ispazju fis-sens li tawtorizza lill-utenti tas-servizzi governattivi tal-Unjoni għal Konnettività Sigura jew tas-servizzi tal-GOVSATCOM, jew tipprovdi kapaċitajiet, siti jew faċilitajiet.

Il-prijoritizzazzjoni tas-servizzi koperti minn dan il-Ftehim bejn l-utenti awtorizzati mill-Iżlanda għandha tiġi ddeterminata u implimentata mill-Iżlanda.

Artikolu 5

Awtorità kompetenti tal-konnettività sigura

L-Iżlanda għandha taħtar awtorità kompetenti tal-konnettività sigura.

L-awtorità kompetenti tal-konnettività sigura għandha tiżgura li:

(a) l-użu tas-servizzi koperti minn dan il-Ftehim ikun konformi mar-rekwiżiti ġenerali tas-sigurtà msemmija fl-Artikolu 30(3) tar-Regolament dwar il-Konnettività Sigura u fl-Artikolu 34(2) tar-Regolament dwar l-Ispazju;

(b) id-drittijiet ta’ aċċess għas-servizzi koperti minn dan il-Ftehim ikunu ddeterminati u mmaniġġjati;

(c) it-tagħmir tal-utent meħtieġ għall-użu tas-servizzi koperti minn dan il-Ftehim u l-konnessjonijiet u l-informazzjoni ta’ komunikazzjoni elettronika assoċjati jintużaw u jiġu mmaniġġjati f’konformità mar-rekwiżiti ġenerali tas-sigurtà msemmija fl-Artikolu 30(3) tar-Regolament dwar il-Konnettività Sigura u fl-Artikolu 34(2) tar-Regolament dwar l-Ispazju;

(d) jiġi stabbilit punt ċentrali ta’ kuntatt biex jassisti kif meħtieġ fir-rapportar tar-riskji u tat-theddid għas-sigurtà, b’mod partikolari fid-detezzjoni ta’ interferenza elettromanjetika potenzjalment dannuża li taffettwa s-servizzi skont il-komponent tal-GOVSATCOM tal-Programm Spazjali tal-Unjoni u tal-Programm tal-Unjoni għal Konnettività Sigura.

Artikolu 6

Servizzi governattivi

1.Is-servizzi koperti minn dan il-Ftehim għandhom jiġu pprovduti lill-parteċipanti msemmija fl-Artikolu 4 skont ir-regoli stabbiliti fid-Deċiżjoni ta’ Implimentazzjoni tal-Kummissjoni (UE) 2023/1053 u fid-Deċiżjoni ta’ Implimentazzjoni tal-Kummissjoni (UE) 2023/1055.

2.L-aċċess għas-servizzi tal-GOVSATCOM u għas-servizzi governattivi tal-Unjoni għal Konnettività Sigura għandu jkun soġġett għall-issodisfar tal-kundizzjonijiet li jirregolaw l-użu tagħhom f’konformità ma’ dan l-Artikolu.

3.L-entitajiet li ġejjin jistgħu jiġu awtorizzati bħala utenti tas-servizzi tal-GOVSATCOM u tas-servizzi governattivi tal-Unjoni għal Konnettività Sigura:

(a)awtorità pubblika Iżlandiża jew korp inkarigat bl-eżerċizzju ta’ awtorità pubblika fl-Iżlanda; kif ukoll

(b)persuna fiżika jew ġuridika li taġixxi f’isem u taħt il-kontroll ta’ entità msemmija fil-punt (a).

4.L-utenti tas-servizzi tal-GOVSATCOM u tas-servizzi governattivi tal-Unjoni għal Konnettività Sigura msemmija fil-paragrafu 3 ta’ dan l-Artikolu għandhom ikunu awtorizzati kif xieraq mill-Iżlanda biex jużaw dawk is-servizzi u għandhom jikkonformaw mar-rekwiżiti ġenerali tas-sigurtà msemmija fl-Artikolu 30(3) tar-Regolament dwar il-Konnettività Sigura u fl-Artikolu 34(2) tar-Regolament dwar l-Ispazju.

 Artikolu 7

Fornituri ta' kapaċitajiet u ta' servizzi ta' komunikazzjoni bis-satellita

 

L-Unjoni tista’ takkwista kapaċitajiet u servizzi ta’ komunikazzjoni bis-satellita skont il-komponent tal-GOVSATCOM tal-Programm Spazjali tal-Unjoni pprovduti mill-entitajiet li ġejjin:

(a) l-Iżlanda, bħala Parteċipant tal-GOVSATCOM imsemmi fl-Artikolu 68 tar-Regolament dwar l-Ispazju; kif ukoll

(b) il-persuni ġuridiċi Iżlandiżi akkreditati kif xieraq biex jipprovdu kapaċitajiet jew servizzi ta’ komunikazzjoni bis-satellita f’konformità mal-proċedura ta’ akkreditazzjoni tas-sigurtà msemmija fl-Artikolu 37 tar-Regolament dwar l-Ispazju, li għandhom jikkonformaw mar-rekwiżiti ġenerali tas-sigurtà għall-komponent tal-GOVSATCOM tal-Programm Spazjali tal-Unjoni, kif imsemmi fl-Artikolu 34(2) tar-Regolament dwar l-Ispazju.

Is-sistema li twassal dawk il-kapaċitajiet u s-servizzi għandha titqies bħala sistema li tipprovdi servizzi governattivi jekk tissodisfa r-rekwiżiti stabbiliti fl-Artikolu 2.2a tad-Deċiżjoni ta’ Implimentazzjoni tal-Kummissjoni (UE) 2023/1054 4 , fejn l-Istat Membru għandu jinftiehem bħala Stat Membru jew l-Iżlanda.

Artikolu 8

Kapaċitajiet rilevanti għas-servizzi

Il-Kummissjoni Ewropea għandha tiddefinixxi l-għadd totali ta’ Tokens li għandhom jiġu distribwiti għall-perjodi programmatiċi li ġejjin skont il-baġit disponibbli u l-kundizzjonijiet tal-kuntratti u l-ftehimiet konklużi mal-fornituri tar-riżorsi.

L-Iżlanda għandha tirċievi perċentwal (f’Tokens) tas-sehem totali tal-Istati Membri stabbilit fid-Deċiżjoni ta’ Implimentazzjoni tal-Kummissjoni (UE) 2023/1055 5 u fid-Deċiżjoni ta’ Implimentazzjoni tal-Kummissjoni (UE) 2023/1053 6 .

Artikolu 9

Kopertura Artika msaħħa

L-infrastruttura governattiva tal-Unjoni għal Konnettività Sigura tista’ tinkludi elementi addizzjonali biex tissaħħaħ il-kopertura ta’ latenza baxxa fuq ir-reġjun tal-Artiku.

Kwalunkwe kontribuzzjoni finanzjarja addizzjonali meħtieġa għat-tfassil, l-iżvilupp, l-implimentazzjoni u l-isfruttament ta’ tali elementi għandha tiġi stabbilita permezz ta’ deċiżjoni tal-kumitat konġunt imsemmi fl-Artikolu 18 li temenda dan l-Artikolu f’konformità mal-Artikolu 18(4) u implimentata f’konformità mal-Artikolu 12.

Artikolu 10

Kundizzjonijiet ta’ eliġibbiltà u ta’ parteċipazzjoni għall-entitajiet Iżlandiżi

L-Artikolu 24 tar-Regolament dwar l-Ispazju u l-Artikolu 22 tar-Regolament dwar il-Konnettività Sigura rigward il-kundizzjonijiet ta’ eliġibbiltà u ta’ parteċipazzjoni skont il-programmi għandhom japplikaw għal dan il-Ftehim.

Meta l-Kummissjoni Ewropea tiddeċiedi dwar eżenzjoni f’konformità mal-Artikolu 24(3) tar-Regolament dwar l-Ispazju mingħajr ma tuża deroga mill-aħħar subparagrafu tal-Artikolu 24(3), entità eliġibbli għandha tikkonforma mal-kundizzjonijiet parteċipanti li ġejjin:

(a) l-entità legali eliġibbli tkun stabbilita fl-Iżlanda u l-istrutturi maniġerjali eżekuttivi tagħha jkunu stabbiliti fl-Iżlanda, jew fi Stat Membru tal-UE, jew fi kwalunkwe Stat taż-ŻEE-EFTA ieħor li jipparteċipa, kif rilevanti, fil-komponent tal-GOVSATCOM tal-Programm Spazjali tal-Unjoni jew fil-Programm tal-Unjoni għal Konnettività Sigura;

(b) l-entità legali eliġibbli timpenja ruħha li twettaq l-attivitajiet rilevanti kollha fl-Iżlanda jew fi Stat Membru tal-UE jew fi kwalunkwe Stat taż-ŻEE-EFTA ieħor li jipparteċipa, kif rilevanti, fil-komponent tal-GOVSATCOM tal-Programm Spazjali tal-Unjoni jew fil-Programm tal-Unjoni għal Konnettività Sigura; kif ukoll

(c) l-entità legali eliġibbli mhijiex soġġetta għal kontroll minn pajjiż terz jew minn entità ta’ pajjiż terz.

Artikolu 11

Deċiżjonijiet implimentattivi

Id-deċiżjonijiet ta’ implimentazzjoni rilevanti tal-Kummissjoni applikabbli għall-komponent tal-GOVSATCOM tal-Programm Spazjali tal-Unjoni u tal-Programm tal-Unjoni għal Konnettività Sigura għandhom japplikaw għall-attivitajiet implimentati skont dan il-Ftehim.

Artikolu 12

Kontribuzzjoni addizzjonali

 

Skont dan il-Ftehim, l-Iżlanda tista’ toffri kontribuzzjoni finanzjarja addizzjonali biex tkopri elementi addizzjonali, bil-kundizzjoni li tali elementi addizzjonali ma joħolqu ebda piż finanzjarju jew tekniku jew ebda dewmien fl-implimentazzjoni xierqa tal-komponent ikkonċernat. Tali kontribuzzjoni finanzjarja addizzjonali għandha tiġi stabbilita permezz ta’ deċiżjoni tal-kumitat konġunt imsemmi fl-Artikolu 18 li temenda dan l-Artikolu f’konformità mal-Artikolu 18(4) u għandha tintuża biex tiffinanzja l-element addizzjonali assoċjat f’konformità mal-Artikolu 12 tar-Regolament dwar l-Ispazju u mal-Artikolu 15 tar-Regolament dwar il-Konnettività Sigura.

Artikolu 13

L-ispettru tar-radju

1. Il-Partijiet jaqblu li jikkooperaw dwar kwistjonijiet tal-ispettru li jikkonċernaw il-konnettività sigura Ewropea fl-Unjoni Internazzjonali tat-Telekomunikazzjoni (UIT).

2. F’dan il-kuntest il-Partijiet għandhom jipproteġu l-allokazzjonijiet tal-frekwenzi meħtieġa għas-sistemi Ewropej ta’ konnettività sigura biex jiżguraw id-disponibbiltà tas-servizzi ta’ dawn is-sistemi għall-benefiċċju tal-utenti.

3. Barra minn hekk, il-Partijiet jirrikonoxxu l-importanza tal-protezzjoni tal-ispettru tar-radju użat minn konnettività sigura mill-interruzzjoni u l-interferenza. Għal dan il-għan, għandhom jidentifikaw is-sorsi ta’ interferenza u jfittxu s-soluzzjonijiet aċċettabbli b’mod reċiproku sabiex jilqgħu kontra tali interferenza.

4. Xejn f'dan il-Ftehim ma għandu jinftiehem bħala deroga mid-dispożizzjonijiet applikabbli tal-UIT, inklużi r-Regolamenti tar-Radju tal-UIT.

Artikolu 14

Ħarsien tal-interessi finanzjarji tal-Unjoni

L-Iżlanda għandha tagħti d-drittijiet meħtieġa u l-aċċess meħtieġ biex l-uffiċjal tal-awtorizzazzjoni responsabbli, l-OLAF u l-Qorti tal-Awdituri jeżerċitaw b’mod komprensiv il-kompetenzi rispettivi tagħhom. Fil-każ tal-OLAF, dawn id-drittijiet għandhom jinkludu d-dritt li jsiru investigazzjonijiet, inkluż kontrolli u spezzjonijiet fuq il-post, kif previst fir-Regolament (UE, Euratom) Nru 883/2013.

Artikolu 15

Sigurtà

1. Il-Partijiet għandhom jipproteġu s-sistemi ta’ konnettività sigura kontra theddid bħal użu ħażin, interferenza, tfixkil u atti ostili. B’konsegwenza ta’ dan, il-Partijiet għandhom jieħdu l-passi prattikabbli kollha biex jiżguraw il-kontinwità, is-sikurezza u s-sigurtà tas-servizzi tal-Unjoni għal Konnettività Sigura u tal-GOVSATCOM u l-infrastruttura u l-assi kritiċi relatati fit-territorji tagħhom.

2. Il-Kummissjoni Ewropea beħsiebha tiżviluppa miżuri biex tipproteġi, tikkontrolla u timmaniġġja l-assi sensittivi, l-informazzjoni u t-teknoloġiji tal-Programm tal-Unjoni għal Konnettività Sigura u tal-komponent tal-GOVSATCOM tal-Programm Spazjali tal-Unjoni kontra kwalunkwe theddid.

3. L-Iżlanda għandha tadotta u tinforza fil-ħin, fil-ġuriżdizzjoni tagħha, miżuri li jipprovdu livell ekwivalenti ta’ sigurtà u ta’ sikurezza bħal dawk applikabbli fl-Unjoni Ewropea.

Artikolu 16

Parteċipazzjoni fil-kumitati

Ir-rappreżentanti tal-Iżlanda għandhom jiġu mistiedna jipparteċipaw bħala osservaturi fil-kumitati u fil-gruppi ta’ ħidma stabbiliti għall-immaniġġjar, l-iżvilupp u l-implimentazzjoni tal-attivitajiet skont il-komponent tal-GOVSATCOM tal-Programm Spazjali tal-Unjoni u tal-Programm tal-Unjoni għal Konnettività Sigura f’konformità mar-regoli u l-proċeduri rilevanti u mingħajr id-dritt tal-vot.

L-Iżlanda għandha tipparteċipa, mingħajr id-dritt tal-vot, fil-Bord ta’ Akkreditazzjoni tas-Sigurtà tal-Aġenzija, għall-partijiet rilevanti tal-komponent tal-GOVSATCOM tal-Programm Spazjali tal-Unjoni u tal-Programm tal-Unjoni għal Konnettività Sigura. Il-parteċipazzjoni għandha tkun ristretta f’konformità mal-politika dwar il-ħtieġa ta’ tagħrif stabbilita għall-komponent tal-GOVSATCOM tal-Programm Spazjali tal-Unjoni u tal-Programm tal-Unjoni għal Konnettività Sigura u tikkonforma mar-regoli ta’ proċedura tal-Bord ta’ Akkreditazzjoni tas-Sigurtà.

Artikolu 17

Miżuri ta’ salvagwardja

1. Wara konsultazzjoni mal-kumitat konġunt imsemmi fl-Artikolu 18, kull Parti tista’ tieħu miżuri ta’ salvagwardja xierqa, inkluża s-sospensjoni ta’ dispożizzjoni waħda jew aktar ta’ dan il-Ftehim jekk issib li l-Parti l-oħra tonqos milli tikkonforma mal-obbligi tagħha skont dan il-Ftehim. Wara l-adozzjoni tal-miżuri ta’ salvagwardja, il-Partijiet għandhom jidħlu, mingħajr dewmien, f’konsultazzjonijiet reċiproċi fil-Kumitat Konġunt sabiex jistabbilixxu mill-ġdid l-applikazzjoni tad-dispożizzjonijiet kollha ta’ dan il-Ftehim mill-aktar fis possibbli.

2. Il-kamp ta’ applikazzjoni u t-tul ta’ żmien tal-miżuri msemmija fil-paragrafu 1 għandhom ikunu limitati għal dak li huwa meħtieġ sabiex tiġi rimedjata s-sitwazzjoni u jiġi żgurat bilanċ ġust tad-drittijiet u l-obbligi skont dan il-Ftehim. Il-Partijiet għandhom ikomplu bl-isforzi tagħhom biex isolvu t-tilwima f’konformità mal-Artikolu 19.

Artikolu 18

Kumitat konġunt

1. Il-Partijiet b’dan jistabbilixxu kumitat konġunt li jikkonsisti minn rappreżentanti uffiċjali ta’ kull Parti li l-ħtieġa ta’ tagħrif tagħhom tkun stabbilita.

Il-kumitat konġunt għandu jissorvelja l-funzjonament ta’ dan il-Ftehim u jkun il-forum fejn il-Partijiet għandhom jiskambjaw fehmiet u informazzjoni dwar kwalunkwe kwistjoni mqajma minn kwalunkwe Parti fir-rigward tal-implimentazzjoni tal-Ftehim.

3. Il-kumitat konġunt għandu jadotta r-regoli ta’ proċedura tiegħu. Il-kumitat konġunt jista’ jiddeċiedi li jistabbilixxi sottokumitati biex jassistuh fit-twettiq tal-kompiti tiegħu. Il-kumitat konġunt għandu jistabbilixxi t-termini ta’ referenza ta’ dawn is-sottokumitati.

4. L-Artikoli 9 u 12 jistgħu jiġu emendati b’deċiżjoni adottata mill-kumitat konġunt. Tali emenda għandha tidħol fis-seħħ 30 jum wara d-data tal-adozzjoni.

5. Il-kumitat konġunt għandu jiltaqa’ darbtejn fis-sena, jew aktar meta meħtieġ, fuq talba ta’ waħda mill-Partijiet.

6. Il-kumitat konġunt għandu jkun il-forum biex jindirizza talbiet għal assistenza teknika mill-Iżlanda.

Artikolu 19

Soluzzjoni ta’ tilwim

Kwalunkwe soluzzjoni ta’ tilwim bejn il-Partijiet li tirriżulta mit-termini, l-interpretazzjoni jew l-applikazzjoni ta’ dan il-Ftehim jew tkun relatata magħhom għandha tissolva biss permezz ta’ konsultazzjoni bejn il-Partijiet u mhi se tiġi riferuta lill-ebda tribunal nazzjonali jew internazzjonali jew lil kwalunkwe parti terza għas-soluzzjoni.

Artikolu 20

Dħul fis-seħħ, emendar u terminazzjoni

1.Dan il-Ftehim għandu jidħol fis-seħħ fl-ewwel jum tat-tieni xahar wara d-data li fiha l-Partijiet ikunu nnotifikaw lil xulxin bit-tlestija tal-proċeduri legali interni rispettivi tagħhom.

2.Dan il-Ftehim jista’ jiġi emendat bi ftehim bil-miktub bejn il-Partijiet. Kwalunkwe emenda ta’ dan il-Ftehim għandha tidħol fis-seħħ fl-ewwel jum tat-tieni xahar wara d-data li fiha l-Partijiet ikunu nnotifikaw lil xulxin bit-tlestija tal-proċeduri legali interni rispettivi tagħhom.

3.Dan il-Ftehim għandu jibqa’ fis-seħħ sal-31 ta’ Diċembru 2027. Għandu jiġi estiż awtomatikament għal perjodi suċċessivi ulterjuri ta’ 10 snin, sakemm xi waħda mill-Partijiet ma tinnotifikax lill-Parti l-oħra bil-miktub bl-intenzjoni tagħha li ma testendix dan il-Ftehim mhux aktar tard minn 3 xhur qabel it-tmiem tat-terminu inizjali jew kwalunkwe perjodu sussegwenti ta’ 10 snin.

4.Kwalunkwe Parti tista’ tinnotifika lill-Parti l-oħra bil-miktub bl-intenzjoni tagħha li tittermina dan il-Ftehim. It-terminazzjoni għandha sseħħ 6 xhur wara d-data tal-wasla tan-notifika.

5.Wara tmiem it-terminu ta’ dan il-Ftehim skont il-paragrafu 3, jew it-terminazzjoni tiegħu skont il-paragrafu 4, dan għandu jiġi applikat mill-Partijiet għall-proġetti, l-azzjonijiet u l-attivitajiet kollha ffinanzjati skont il-komponent tal-GOVSATCOM tal-Programm Spazjali tal-Unjoni u tal-Programm tal-Unjoni għal Konnettività Sigura jew dan il-Ftehim, sa tmiem l-arranġamenti kuntrattwali relatati ma’ dawk il-proġetti, l-azzjonijiet u l-attivitajiet.

6.F’każ li r-Regolament dwar l-Ispazju, ir-Regolament dwar il-Konnettività Sigura jew id-deċiżjonijiet ta’ implimentazzjoni msemmija f’dan il-Ftehim jiġu emendati, imħassra jew riveduti b’xi mod ieħor, ir-referenzi għar-Regolament dwar l-Ispazju, ir-Regolament dwar il-Konnettività Sigura jew id-deċiżjonijiet ta’ implimentazzjoni f’dan il-Ftehim għandhom jinftiehmu bħala referenzi għall-att jew għall-atti emendati, imħassra jew riveduti b’xi mod ieħor.

B’XHIEDA ta’ DAN, is-sottoskritti, li huma debitament awtorizzati sabiex jagħmlu dan mill-Awtoritajiet rispettivi tagħhom, iffirmaw dan il-Ftehim.

Magħmul fi …. fi…jum ta’ …. F’żewġ kopji oriġinali, bil-lingwa Bulgara, Ċeka, Daniża, Estonjana, Finlandiża, Franċiża, Ġermaniża, Griega, Ingliża, Irlandiża, Kroata, Latvjana, Litwana, Maltija, Olandiża, Pollakka, Portugiża, Rumena, Slovakka, Slovena, Spanjola, Taljana, Ungeriża, Żvediża u Iżlandiża, u t-testi kollha huma ugwalment awtentiċi.

Għall-Unjoni Ewropea            Għall-Iżlanda

(1)

Ir-Regolament (UE) 2021/696 tal-Parlament Ewropew u tal-Kunsill tat-28 ta’ April 2021 li jistabbilixxi l-Programm Spazjali tal-Unjoni u l-Aġenzija tal-Unjoni Ewropea għall-Programm Spazjali u li jħassar ir-Regolamenti (UE) Nru 912/2010, (UE) Nru 1285/2013 u, (UE) Nru 377/2014 u d-Deċiżjoni Nru 541/2014/UE (ĠU L 170, 12.5.2021, p. 69, ELI: http://data.europa.eu/eli/reg/2021/696/oj).

(2)

Ir-Regolament (UE) 2023/588 tal-Parlament Ewropew u tal-Kunsill tal-15 ta’ Marzu 2023 li jistabbilixxi l-Programm tal-Unjoni għal Konnettività Sigura għall-perjodu 2023–2027 (ĠU L 79, 17.3.2023, p. 1, ELI: http://data.europa.eu/eli/reg/2023/588/oj).

(3)

ĠU L 141, 31.5.2023, p. 57–66; ELI: http://data.europa.eu/eli/dec_impl/2023/1055/oj

(4)

ĠU L 141, 31.5.2003, p. 49-56; ELI: http://data.europa.eu/eli/dec_impl/2023/1054/oj

(5)

ĠU L 141, 31.5.2003, p. 57-66; ELI: http://data.europa.eu/eli/dec_impl/2023/1055/oj

(6)

ĠU L 141, 31.5.2023, p. 44–48; ELI: http://data.europa.eu/eli/dec_impl/2023/1053/oj