IL-KUMMISSJONI EWROPEA

Brussell, 29.9.2025

COM(2025) 564 final

ANNESS

tad-

DEĊIŻJONI TAL-KUNSILL

li tistabbilixxi l-pożizzjoni li għandha tittieħed f’isem l-Unjoni fi ħdan il-Korp Governattiv tat-Trattat Internazzjonali dwar ir-Riżorsi Ġenetiċi tal-Pjanti għall-Ikel u l-Agrikoltura fir-rigward ta’ ċerti proposti sottomessi għall-adozzjoni matul il-11-il sessjoni tiegħu

Anness II

ABBOZZ TA’ FTEHIM RIVEDUT DWAR IT-TRASFERIMENT TA’ MATERJAL STANDARD

1.FTEHIM DWAR IT-TRASFERIMENT TA’ MATERJAL STANDARD

PREAMBOLU

BILLI

It-Trattat Internazzjonali dwar ir-Riżorsi Ġenetiċi tal-Pjanti għall-Ikel u l-Agrikoltura (minn hawn ’il quddiem imsejjaħ “it-Trattat” 1(1) ġie adottat mill-31 sessjoni tal-Konferenza tal-FAO fit-3 ta’ Novembru 2001 u daħal fis-seħħ fid-29 ta’ Ġunju 2004;

L-objettivi tat-Trattat huma l-konservazzjoni u l-użu sostenibbli tar-Riżorsi Ġenetiċi tal-Pjanti għall-Ikel u l-Agrikoltura u l-qsim ġust u ekwu tal-benefiċċji li jirriżultaw mill-użu tagħhom, f’armonija mal-Konvenzjoni dwar id-Diversità Bijoloġika, għall-agrikoltura sostenibbli u għas-sigurtà tal-ikel;

Il-Partijiet Kontraenti għat-Trattat, fl-eżerċizzju tad-drittijiet sovrani tagħhom fuq ir-Riżorsi Ġenetiċi tal-Pjanti għall-Ikel u l-Agrikoltura tagħhom, stabbilew Sistema Multilaterali kemm biex jiffaċilitaw l-aċċess għar-Riżorsi Ġenetiċi tal-Pjanti għall-Ikel u l-Agrikoltura kif ukoll biex jaqsmu, b’mod ġust u ekwu, il-benefiċċji li jirriżultaw mill-użu ta’ dawn ir-riżorsi, fuq bażi komplementari u ta’ tisħiħ reċiproku;

Jitqiesu l-Artikoli 4, 11, 12(4) u 12(5) tat-Trattat;

Id-diversità tas-sistemi legali tal-Partijiet Kontraenti fir-rigward tar-regoli proċedurali nazzjonali tagħhom li jirregolaw l-aċċess għall-qrati u għall-arbitraġġ, u l-obbligi li jirriżultaw minn konvenzjonijiet internazzjonali u reġjonali applikabbli għal dawn ir-regoli proċedurali, huma rikonoxxuti;

L-Artikolu 12(4) tat-Trattat jipprevedi li l-aċċess iffaċilitat skont is-Sistema Multilaterali għandu jiġi previst skont Ftehim dwar it-Trasferiment ta’ Materjal Standard, u l-Korp Governattiv tat-Trattat, fir-Riżoluzzjoni tiegħu 1/2006 tas-16 ta’ Ġunju 2006, adotta l-Ftehim dwar it-Trasferiment ta’ Materjal Standard, li fir-Riżoluzzjoni [XX]/2025 ta’ [XX] ta’ Novembru 2025 iddeċieda li jemenda.

ARTIKOLU 1 — PARTIJIET GĦALL-FTEHIM

1.1 Dan il-Ftehim dwar it-Trasferiment ta’ Materjal Standard (minn hawn ’il quddiem imsejjaħ “dan il-Ftehim”) huwa l-Ftehim dwar it-Trasferiment ta’ Materjal Standard imsemmi fl-Artikolu 12(4) tat-Trattat.

1.2 Dan il-Ftehim huwa:

BEJN: (l-isem u l-indirizz tal-fornitur jew tal-istituzzjoni li tipprovdi, l-isem tal-uffiċjal awtorizzat, l-informazzjoni ta’ kuntatt għall-uffiċjal awtorizzat*) (minn hawn ’il quddiem imsejjaħ “il-Fornitur”),

U: (l-isem u l-indirizz tar-riċevitur jew tal-istituzzjoni tar-riċevitur, l-isem tal-uffiċjal awtorizzat, l-informazzjoni ta’ kuntatt għall-uffiċjal awtorizzat* 2(2)) (minn hawn ’il quddiem imsejjaħ “ir-Riċevitur”).

1.3 Il-partijiet għal dan il-Ftehim b’dan jaqblu kif ġej:

ARTIKOLU 2 — DEFINIZZJONIJIET

F’dan il-Ftehim l-espressjonijiet imsemmija hawn taħt għandu jkollhom it-tifsira li ġejja:

“Affiljat”: korp korporattiv wieħed ikun affiljat ma’ korp korporattiv ieħor jekk wieħed minnhom ikun is-sussidjarju tal-ieħor, jew it-tnejn ikunu sussidjarji tal-istess korp korporattiv, jew kull wieħed minnhom ikun ikkontrollat mill-istess persuna legali.

“Disponibbli mingħajr restrizzjoni”: Prodott jitqies li huwa disponibbli mingħajr restrizzjoni għall-oħrajn għal aktar riċerka u tnissil meta jkun disponibbli għar-riċerka u t-tnissil mingħajr ebda obbligu legali jew kuntrattwali, jew mingħajr ebda restrizzjoni teknoloġika, li tipprekludi l-użu tiegħu bil-mod speċifikat fit-Trattat.

“Li tikkummerċjalizza” tfisser li r-Riżorsi Ġenetiċi tal-Pjanti għall-Ikel u l-Agrikoltura jkunu magħmulin disponibbli għall-kunsiderazzjoni monetarja fis-suq miftuħ, u “kummerċjalizzazzjoni” għandha tifsira korrispondenti. Il-kummerċjalizzazzjoni ma għandha tinkludi l-ebda forma ta’ trasferiment ta’ Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati, u lanqas ma għandha tinkludi l-bejgħ ta’ komoditajiet.

“Materjal ġenetiku” tfisser kwalunkwe materjal li joriġina mill-pjanti, inkluż materjal għall-propagazzjoni veġetattiva u riproduttiva, li fih unitajiet funzjonali ta’ eredità.

“Korp Governattiv” tfisser il-Korp Governattiv tat-Trattat.

“Sistema Multilaterali” tfisser is-Sistema Multilaterali stabbilita skont l-Artikolu 10(2) tat-Trattat.

“Riżorsi Ġenetiċi tal-Pjanti għall-Ikel u l-Agrikoltura” tfisser kwalunkwe materjal ġenetiku li joriġina mill-pjanti ta’ valur reali jew potenzjali għall-ikel u l-agrikoltura.

“Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati” tfisser materjal li ġej mill-Materjal, u għalhekk distint minnu, li għadu mhux lest għall-kummerċjalizzazzjoni u li l-iżviluppatur beħsiebu jkompli jiżviluppa jew jittrasferixxi lil persuna jew entità oħra għal żvilupp ulterjuri. Il-perjodu ta’ żvilupp għar-Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati għandu jitqies li waqaf meta dawk ir-riżorsi jiġu kkummerċjalizzati bħala Prodott.

“Prodott” tfisser Riżorsi Ġenetiċi tal-Pjanti għall-Ikel u l-Agrikoltura li jinkorporaw 3(3) il-Materjal jew kwalunkwe waħda mill-partijiet jew komponenti ġenetiċi tiegħu li huma lesti għall-kummerċjalizzazzjoni, minbarra l-komoditajiet u prodotti oħra użati għall-ikel, l-għalf u l-ipproċessar.

“Bejgħ” tfisser id-dħul gross li jirċievi r-Riċevitur u l-affiljati tiegħu mill-kummerċjalizzazzjoni u fil-forma ta’ miżati ta’ liċenzji għar-Riżorsi Ġenetiċi tal-Pjanti għall-Ikel u l-Agrikoltura.

“Karatteristika ta’ valur kummerċjali” tfisser kwalunkwe karatteristika li tintiret u li tista’ titkejjel li tagħti valur kummerċjali sinifikanti għall-ikel u l-agrikoltura lil Prodott, inkluż iżda mhux limitat għal karatteristiċi agronomiċi, karatteristiċi li jagħtu reżistenza għal stress bijotiku jew abijotiku, karatteristiċi li jtejbu l-valur nutrizzjonali jew tal-ipproċessar ta’ komoditajiet maħsuda, u kwalunkwe karatteristika oħra użata biex tiddeskrivi Prodott għall-fini tal-promozzjoni tal-kummerċjalizzazzjoni tiegħu.

ARTIKOLU 3 — SUĠĠETT TAL-FTEHIM

Ir-Riżorsi Ġenetiċi tal-Pjanti għall-Ikel u l-Agrikoltura speċifikati fl-Anness 1 ta’ dan il-Ftehim (minn hawn ’il quddiem imsejħa “Materjal”) u l-informazzjoni relatata disponibbli msemmija fl-Artikolu 5b u fl-Anness 1 huma b’dan trasferiti mill-Fornitur lejn ir-Riċevitur soġġett għat-termini u l-kundizzjonijiet stabbiliti f’dan il-Ftehim.

ARTIKOLU 4 — DISPOŻIZZJONIJIET ĠENERALI

4.1 Dan il-Ftehim jidħol fis-seħħ fil-qafas tas-Sistema Multilaterali u għandu jiġi implimentat u interpretat f’konformità mal-objettivi u d-dispożizzjonijiet tat-Trattat.

4.2 Il-partijiet jirrikonoxxu li huma soġġetti għall-miżuri u l-proċeduri legali applikabbli, li ġew adottati mill-Partijiet Kontraenti għat-Trattat, f’konformità mat-Trattat, b’mod partikolari dawk meħuda f’konformità mal-Artikoli 4, 12(2) u 12(5) tat-Trattat. 4(4)

4.3 Il-partijiet għal dan il-Ftehim jaqblu li l-Organizzazzjoni tal-Ikel u l-Agrikoltura tan-Nazzjonijiet Uniti li taġixxi f’isem il-Korp Governattiv tat-Trattat u s-Sistema Multilaterali tiegħu, hija l-parti terza benefiċjarja skont dan il-Ftehim.

4.4 Il-parti terza benefiċjarja għandha d-dritt li titlob l-informazzjoni xierqa kif meħtieġ mill-Artikoli 5e, 6(5)(c), 8(3), l-Anness 2, l-Artikolu 3(6), u l-Anness 4, il-Paragrafu 7 ta’ dan il-Ftehim.

4.5 Id-drittijiet mogħtija lill-Organizzazzjoni tal-Ikel u l-Agrikoltura tan-Nazzjonijiet Uniti hawn fuq ma jimpedixxux lill-partijiet għal dan il-Ftehim milli jeżerċitaw id-drittijiet tagħhom skont dan il-Ftehim.

ARTIKOLU 5 — DRITTIJIET U OBBLIGI TAL-FORNITUR

Il-Fornitur jimpenja ruħu li l-Materjal jiġi ttrasferit f’konformità mad-dispożizzjonijiet li ġejjin tat-Trattat:

a) l-aċċess għandu jingħata minnufih, mingħajr il-ħtieġa li jiġu segwiti l-adeżjonijiet individwali u mingħajr ħlas, jew, meta tiġi imposta tariffa, dan ma għandux jaqbeż il-kost minimu involut;

b) id-data kollha disponibbli dwar il-passaporti u, soġġett għal-liġi applikabbli, kwalunkwe informazzjoni deskrittiva oħra assoċjata disponibbli u mhux kunfidenzjali, għandha tkun magħmula disponibbli mar-Riżorsi Ġenetiċi tal-Pjanti għall-Ikel u l-Agrikoltura pprovduti;

c) l-aċċess għar-Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati, inkluż il-materjal li qed jiġi żviluppat mill-bdiewa, għandu jkun fid-diskrezzjoni tal-iżviluppatur tiegħu, matul il-perjodu tal-iżvilupp tiegħu;

d) l-aċċess għar-Riżorsi Ġenetiċi tal-Pjanti għall-Ikel u l-Agrikoltura protetti mid-drittijiet intellettwali tal-proprjetà u drittijiet oħra tal-proprjetà għandu jkun konsistenti mal-ftehimiet internazzjonali rilevanti, u mal-liġijiet nazzjonali rilevanti;

e) il-Fornitur għandu jinforma lill-Korp Governattiv, permezz tas-Segretarju tiegħu, mill-inqas darba kull sentejn kalendarji, jew f’intervall li għandu jiġi deċiż, minn żmien għal żmien, mill-Korp Governattiv, dwar il-Ftehimiet dwar it-Trasferiment ta’ Materjal li jkun daħal għalihom, 5(5)

jew permezz ta’:

Għażla A: it-trażmissjoni ta’ kopja tal-Ftehim dwar it-Trasferiment ta’ Materjal Standard komplut, 6(6)

jew

Għażla B: fil-każ li ma tintbagħatx kopja tal-Ftehim dwar it-Trasferiment ta’ Materjal Standard,

i. jiġi żgurat li l-Ftehim dwar it-Trasferiment ta’ Materjal Standard komplut ikun għad-dispożizzjoni tal-parti terza benefiċjarja kif u meta jkun meħtieġ;

ii. jiġi ddikjarat fejn huwa maħżun il-Ftehim dwar it-Trasferiment ta’ Materjal Standard inkwistjoni, u kif jista’ jinkiseb; u

iii. tiġi pprovduta l-informazzjoni li ġejja:

a) is-simbolu ta’ identifikazzjoni jew in-numru attribwit għall-Ftehim dwar it-Trasferiment ta’ Materjal Standard mill-Fornitur;

b) l-isem u l-indirizz tal-Fornitur;

c) id-data li fiha l-Fornitur ikun qabel mal-Ftehim dwar it-Trasferiment ta’ Materjal Standard jew aċċettah, u fil-każ ta’ ftehim shrink-wrap, id-data li fiha ntbagħtet il-konsenja;

d) l-isem u l-indirizz tar-Riċevitur, u fil-każ ta’ ftehim shrink-wrap, l-isem tal-persuna li lilha ntbagħtet il-konsenja;

e) l-identifikazzjoni ta’ kull adeżjoni fl-Anness 1 tal-Ftehim dwar it-Trasferiment ta’ Materjal Standard, u tal-għelejjel li tappartjeni għalihom.

Din l-informazzjoni għandha tkun magħmula disponibbli mis-Segretarju lill-parti terza benefiċjarja. Sakemm il-partijiet għal dan il-Ftehim ma jaqblux mod ieħor u ħlief kif jista’ jkun meħtieġ fil-kuntest tas-soluzzjoni ta’ tilwim skont l-Artikolu 8 ta’ dan il-Ftehim, tali informazzjoni għandha tiġi ttrattata bħala informazzjoni kummerċjali kunfidenzjali u għandha tintuża biss biex jiġi żviluppat ir-rapportar aggregat.

ARTIKOLU 6 — DRITTIJIET U OBBLIGI TAR-RIĊEVITUR 7(7)

6.1 Ir-Riċevitur jimpenja ruħu li l-Materjal għandu jintuża jew jiġi kkonservat biss għall-finijiet ta’ riċerka, tnissil u taħriġ għall-ikel u l-agrikoltura. Tali finijiet ma għandhomx jinkludu użi industrijali kimiċi, farmaċewtiċi u/jew oħrajn li ma humiex ta’ ikel/għalf.

6.2 Ir-Riċevitur ma għandu jiddikjara l-ebda dritt tal-proprjetà intellettwali jew drittijiet oħra li jillimitaw l-aċċess iffaċilitat għall-Materjal ipprovdut skont dan il-Ftehim, jew il-partijiet jew il-komponenti ġenetiċi tiegħu, fil-formola riċevuta mis-Sistema Multilaterali.

6.3 Fil-każ li r-Riċevitur jikkonserva l-Materjal fornut, ir-Riċevitur għandu jagħmel il-Materjal, u l-informazzjoni relatata msemmija fl-Artikolu 5b, disponibbli għas-Sistema Multilaterali li tuża l-Ftehim dwar it-Trasferiment ta’ Materjal Standard.

6.4 Fil-każ li r-Riċevitur jittrasferixxi l-Materjal fornut skont dan il-Ftehim lil persuna jew entità oħra (minn hawn ’il quddiem imsejjaħ “ir-riċevitur sussegwenti”), ir-Riċevitur għandu

a) jagħmel dan skont it-termini u l-kundizzjonijiet tal-Ftehim dwar it-Trasferiment ta’ Materjal Standard, permezz ta’ Ftehim ġdid dwar it-Trasferiment ta’ Materjal Standard; u

b) jinnotifika lill-Korp Governattiv, f’konformità mal-Artikolu 5e.

F’konformità ma’ dan ta’ hawn fuq, ir-Riċevitur ma għandu jkollu l-ebda obbligu ieħor dwar l-azzjonijiet tar-riċevitur sussegwenti.

6.5 Fil-każ li r-Riċevitur jittrasferixxi Riżorsa Ġenetika tal-Pjanti għall-Ikel u l-Agrikoltura li qed tiġi Żviluppata lil persuna jew entità oħra, sakemm jiskadi perjodu ta’ 12-il sena wara l-iffirmar jew l-aċċettazzjoni ta’ dan il-Ftehim, ir-Riċevitur għandu: 

a) jagħmel dan skont it-termini u l-kundizzjonijiet tal-Ftehim dwar it-Trasferiment ta’ Materjal Standard, permezz ta’ Ftehim ġdid dwar it-Trasferiment ta’ Materjal Standard, dment li l-Artikolu 5a tal-Ftehim dwar it-Trasferiment ta’ Materjal Standard ma japplikax;

b) jidentifika, fl-Anness 1 tal-Ftehim ġdid dwar it-Trasferiment ta’ Materjal Standard, il-Materjal riċevut mis-Sistema Multilaterali, u jispeċifika li r-Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati li qed jiġu ttrasferiti jkunu ġejjin mill-Materjal;

c) jinnotifika lill-Korp Governattiv, f’konformità mal-Artikolu 5e; u

d) ma għandu jkollu l-ebda obbligu ieħor rigward l-azzjonijiet ta’ kwalunkwe riċevitur sussegwenti.

L-obbligi f’dan l-Artikolu 6(5) ma japplikawx għar-Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati, li għalihom japplikaw iż-żewġ elementi li ġejjin:

i. ikun fihom kontribut ġenetiku ta’ inqas minn 12,5 % bil-linja axxendentali tal-Materjal u

ii ma jkunx fihom karatteristika ta’ valur kummerċjali li kienet ikkontribwita mill-Materjal.

6.6 Id-dħul fi Ftehim dwar it-Trasferiment ta’ Materjal Standard skont il-paragrafu 6.5 għandu jkun mingħajr preġudizzju għad-dritt tal-partijiet li jorbtu kundizzjonijiet addizzjonali, relatati ma’ żvilupp ulterjuri tal-prodott, inkluż, kif ikun xieraq, il-pagamemt ta’ kunsiderazzjoni monetarja.

6.9 Ir-Riċevitur għandu jagħmel disponibbli għas-Sistema Multilaterali, permezz tas-sistema ta’ informazzjoni prevista fl-Artikolu 17 tat-Trattat, l-informazzjoni mhux kunfidenzjali kollha li tirriżulta minn riċerka u żvilupp imwettqa fuq il-Materjal u huwa mħeġġeġ biex permezz tas-Sistema Multilaterali jaqsam il-benefiċċji mhux monetarji identifikati b’mod espliċitu fl-Artikolu 13(2) tat-Trattat li jirriżultaw minn tali riċerka u żvilupp. Ir-Riċevitur huwa mħeġġeġ iqiegħed kampjun ta’ kwalunkwe Prodott li jinkorpora l-Materjal f’ġabra li hija parti mis-Sistema Multilaterali, għal riċerka, u tnissil u taħriġ.

6.10 Riċevitur li applika għal drittijiet tal-proprjetà intellettwali jew li jikseb dawn id-drittijiet, fuq kwalunkwe Prodott żviluppat mill-Materjal jew mill-partijiet ġenetiċi jew mill-komponenti tiegħu, miksub mis-Sistema Multilaterali, u jassenja tali applikazzjoni jew drittijiet tal-proprjetà intellettwali lil parti terza, għandu jittrasferixxi l-obbligi tal-qsim tal-benefiċċji ta’ dan il-Ftehim lil dik il-parti terza.

6.6a Ir-Riċevitur, fil-mument tal-iffirmar jew tal-aċċettazzjoni ta’ dan il-Ftehim, għandu jagħżel bejn żewġ għażliet ta’ aċċess, kif previst fl-Artikolu 10 ta’ dan il-Ftehim: l-għażla ta’ abbonament skont l-Artikolu 6(11) u l-Anness 2, jew l-għażla ta’ aċċess uniku skont l-Artikoli 6(7) u 6(8) u l-Anness 4, sakemm ir-Riċevitur ma jkunx diġà abbona.

6.11 Sabiex jagħżel l-għażla ta’ abbonament, ir-Riċevitur, jekk ir-Riċevitur ma jkunx diġà abbona, irid jissottometti l-Formola tar-Reġistrazzjoni li tinsab fl-Anness 3 ta’ dan il-Ftehim, mimlija u ffirmata kif xieraq, lill-Korp Governattiv tat-Trattat, permezz tas-Segretarju tiegħu (Abbonament). L-Abbonament jitlesta mal-wasla tan-numru tal-Abbonat mis-Segretarju.

6.11a It-termini u l-kundizzjonijiet tal-għażla ta’ abbonament huma stabbiliti fl-Anness 2 ta’ dan il-Ftehim. L-Anness 2 ta’ dan il-Ftehim jikkostitwixxi parti integrali minn dan il-Ftehim u kwalunkwe referenza għal dan il-Ftehim għandha tinftiehem, fejn il-kuntest jippermetti u mutatis mutandis, li tinkludi wkoll l-Anness 2.

6.11b Skont l-għażla ta’ abbonament, ir-Riċevitur ma għandu jkollu l-ebda obbligu ta’ pagament fir-rigward tal-Materjal riċevut, u kwalunkwe Prodott li jinkorpora l-Materjal, għajr l-obbligi ta’ pagament previsti taħt l-għażla ta’ abbonament, matul il-perjodu tal-Abbonament.

6.7 Skont l-għażla ta’ aċċess uniku, jekk ir-Riċevitur jew kwalunkwe wieħed mill-affiljati tiegħu jikkummerċjalizza Prodott, u meta tali Prodott ma jkunx disponibbli mingħajr restrizzjoni, japplikaw it-termini u l-kundizzjonijiet stabbiliti fl-Anness 4. Wara li tintemm ir-restrizzjoni, ir-Riċevitur jew kwalunkwe wieħed mill-affiljati tiegħu li jikkummerċjalizza l-Prodott se jkompli jagħmel il-pagamenti bir-rata msemmija fl-Artikolu 6(8) hawn taħt. L-Anness 4 ta’ dan il-Ftehim jikkostitwixxi parti integrali minn dan il-Ftehim u kwalunkwe referenza għal dan il-Ftehim għandha tinftiehem, fejn il-kuntest jippermetti u mutatis mutandis, li tinkludi wkoll l-Anness 4.

6.8 Skont l-għażla ta’ aċċess uniku, jekk ir-Riċevitur jew kwalunkwe wieħed mill-affiljati tiegħu jikkummerċjalizza Prodott u meta dak il-Prodott ikun disponibbli mingħajr restrizzjoni, japplikaw it-termini u l-kundizzjonijiet stabbiliti fl-Anness 4. L-Anness 4 ta’ dan il-Ftehim jikkostitwixxi parti integrali minn dan il-Ftehim u kwalunkwe referenza għal dan il-Ftehim għandha tinftiehem, fejn il-kuntest jippermetti u mutatis mutandis, li tinkludi wkoll l-Anness 4.

6.8a Riċevitur li jaċċessa l-Materjal skont l-Artikoli 6(7)/6(8) għandu jiżvela l-affiljati tiegħu fil-ħin tal-iffirmar tal-SMTA. F’każ li kwalunkwe wieħed minn dawk l-affiljati jingħata materjal wara l-iffirmar tal-SMTA, għandu japplika l-Artikolu 6.5 ta’ dan il-Ftehim.

ARTIKOLU 7 — LIĠI APPLIKABBLI

Il-liġi applikabbli għandha tkun il-Prinċipji Ġenerali tal-Liġi, inklużi l-Prinċipji tal-Kuntratti Kummerċjali Internazzjonali UNIDROIT tal-2016 u kif sussegwentement aġġornati, l-objettivi u d-dispożizzjonijiet rilevanti tat-Trattat, u, meta meħtieġ għall-interpretazzjoni, id-deċiżjonijiet tal-Korp Governattiv.

ARTIKOLU 8 — SOLUZZJONI TA’ TILWIM

8.1 Is-soluzzjoni ta’ tilwim tista’ tinbeda mill-Fornitur jew mir-Riċevitur jew mill-parti terza benefiċjarja li taġixxi f’isem il-Korp Governattiv tat-Trattat u s-Sistema Multilaterali tiegħu.

8.2 Il-partijiet għal dan il-Ftehim jaqblu li l-Organizzazzjoni tal-Ikel u l-Agrikoltura tan-Nazzjonijiet Uniti, li tirrappreżenta l-Korp Governattiv u s-Sistema Multilaterali, għandha d-dritt, bħala parti terza benefiċjarja, li tibda proċeduri għas-soluzzjoni ta’ tilwim rigward id-drittijiet u l-obbligi tal-Fornitur u tar-Riċevitur skont dan il-Ftehim.

8.3 Il-parti terza benefiċjarja għandha d-dritt li titlob li l-informazzjoni xierqa, inkluż il-kampjuni kif meħtieġ, tkun magħmula disponibbli mill-Fornitur u r-Riċevitur, rigward l-obbligi tagħhom fil-kuntest ta’ dan il-Ftehim. Kwalunkwe informazzjoni jew kampjun mitlub b’dan il-mod għandu jingħata mill-Fornitur u mir-Riċevitur, skont il-każ.

8.4 Kwalunkwe tilwima li tinqala’ minn dan il-Ftehim għandha tiġi solvuta b’dan il-mod:

a) Ftehim bonarju dwar it-tilwima: il-partijiet għandhom jippruvaw bona fide jsolvu t-tilwima permezz ta’ negozjati.

b) Medjazzjoni: jekk it-tilwima ma tiġix solvuta permezz ta’ negozjati, il-partijiet jistgħu jagħżlu medjazzjoni permezz ta’ medjatur newtrali ta’ parti terza, li għandu jsir qbil fuqu b’mod reċiproku.

c) Arbitraġġ: jekk it-tilwima ma tkunx ġiet solvuta permezz ta’ negozjati jew medjazzjoni, kwalunkwe parti tista’ tissottometti t-tilwima għal arbitraġġ skont ir-Regoli tal-Arbitraġġ ta’ korp internazzjonali kif miftiehem bejn il-partijiet fit-tilwima. Fin-nuqqas ta’ tali ftehim, it-tilwima għandha tiġi solvuta skont ir-Regoli tal-Arbitraġġ tal-Kamra Internazzjonali tal-Kummerċ, minn arbitru wieħed jew aktar maħtura f’konformità mar-Regoli msemmija. Kull parti fit-tilwima tista’, jekk tagħżel hekk, taħtar l-arbitru tagħha minn tali lista ta’ esperti li l-Korp Governattiv jista’ jistabbilixxi għal dan il-għan; iż-żewġ partijiet, jew l-arbitri maħtura minnhom, jistgħu jaqblu li jaħtru arbitru uniku, jew arbitru li jippresjedi skont il-każ, minn tali lista ta’ esperti. Ir-riżultat ta’ tali arbitraġġ għandu jkun vinkolanti.

d) Il-partijiet offiżi jistgħu jagħmlu użu mill-opportunitajiet disponibbli skont id-dispożizzjonijiet tal-Artikolu 12(5) tat-Trattat.

8.5 Fil-każ ta’ ksur tal-Artikoli 6(1) jew 6(2) li jkun hemm prova tiegħu, ir-Riċevitur jista’ jinżamm responsabbli għad-danni. Fir-rigward tal-Artikolu 6(1), id-danni għandhom ikunu proporzjonali għall-introjtu riċevut mir-Riċevitur bħala riżultat tal-ksur ipprovat. Fir-rigward tal-Artikolu 6(2), id-danni għandhom ikunu proporzjonali għall-introjtu riċevut mir-Riċevitur bħala riżultat tad-dritt tal-proprjetà intellettwali jew ta’ drittijiet oħra li jillimitaw l-aċċess iffaċilitat għall-Materjal, jew il-partijiet jew il-komponenti ġenetiċi tiegħu, fil-forma riċevuta mis-Sistema Multilaterali, u jistgħu wkoll jirriżultaw fl-assenjazzjoni tad-drittijiet tal-proprjetà intellettwali jew tad-drittijiet l-oħra involuti, f’konformità mad-dritt internazzjonali u mal-leġiżlazzjoni nazzjonali rilevanti.

ARTIKOLU 9 — OĠĠETTI ADDIZZJONALI

Garanzija

9.1 Il-Fornitur ma jagħti l-ebda garanzija f’dan il-Ftehim fir-rigward tas-sikurezza jew tat-titolu tal-Materjal, u lanqas fir-rigward tal-akkuratezza jew tal-korrettezza ta’ kwalunkwe passaport jew data oħra pprovduta mal-Materjal. Lanqas ma jagħmel garanziji dwar il-kwalità, il-vijabbiltà, jew il-purità (ġenetika jew mekkanika) tal-Materjal li jkun qed jiġi fornut. Il-kundizzjoni fitosanitarja tal-Materjal hija ġġustifikata biss kif deskritt fi kwalunkwe ċertifikat fitosanitarju mehmuż. Ir-Riċevitur jassumi responsabbiltà sħiħa għall-konformità mar-regolamenti dwar il-kwarantina, l-ispeċijiet aljeni invażivi u l-bijosikurezza tan-nazzjon riċevitur u mar-regoli dwar l-importazzjoni jew ir-rilaxx ta’ materjal ġenetiku.

Irtirar minn dan il-Ftehim

9.2 Ir-Riċevitur jista’ jirtira minn dan il-Ftehim f’konformità mal-Anness 2 u mal-Anness 4.

Emendi tal-Ftehim dwar it-Trasferiment ta’ Materjal Standard

9.3 Jekk il-Korp Governattiv jemenda t-termini u l-kundizzjonijiet tal-Ftehim dwar it-Trasferiment ta’ Materjal Standard, ir-Riċevitur għandu, mid-data deċiża mill-Korp Governattiv, juża l-SMTA emendat għal trasferimenti sussegwenti tal-Materjal lil partijiet terzi. Id-drittijiet u l-obbligi l-oħra tar-Riċevitur għandhom jibqgħu l-istess, sakemm ir-Riċevitur ma jaqbilx b’mod espliċitu bil-miktub mal-Ftehim dwar it-Trasferiment ta’ Materjal Standard emendat.

Fażi Tranżizzjonali

9.4 Fil-każ li l-Emenda tal-Anness I tat-Trattat, kif tinsab fir-Riżoluzzjoni [XX]/2025, ma tidħolx fis-seħħ sal-31 ta’ Lulju 2031 u sakemm il-Korp Governattiv ma jestendix il-perjodu jew ma jiddeċidix mod ieħor, fis-Sessjoni tiegħu fl-2031:

l-Artikolu 6(11) u l-Annessi relatati mhux se jibqgħu japplikaw għal Riċevituri ġodda u l-ebda Abbonament ġdid ma huwa se jkun permess skont dan il-Ftehim. Riċevitur li jkun sar Abbonat qabel il-31 ta’ Lulju 2031 jista’, fi żmien [XX] jum, jew:

1) jinnotifika lill-Korp Governattiv tat-Trattat, permezz tas-Segretarju tiegħu, li se jżomm l-Abbonament tiegħu; jew

2) jirtira mill-Abbonament tiegħu b’effett immedjat. Jekk l-Abbonat jagħżel din l-għażla, it-Termini tal-Abbonament ma għandhomx jibqgħu japplikaw u għandhom jiġu sostitwiti bit-termini u l-kundizzjonijiet tal-mekkaniżmu ta’ pagament skont l-Artikoli 6(7), 6(8) u l-Anness 4 ta’ dan il-Ftehim. Wara tali irtirar, kwalunkwe ammont imħallas mill-Abbonat taħt l-Abbonament se jiġi kkreditat, fuq talba mill-Abbonat, għal kwalunkwe pagament li jista’ jkun dovut skont il-mekkaniżmu ta’ pagament skont l-Artikoli 6(7), 6(8) u l-Anness 4 ta’ dan il-Ftehim.

ARTIKOLU 10 — FIRMA/AĊĊETTAZZJONI

Il-Fornitur u r-Riċevitur jistgħu jagħżlu l-metodu ta’ aċċettazzjoni sakemm waħda mill-partijiet ma tirrikjedix li dan il-Ftehim jiġi ffirmat.

Għażla 1 — Firma* 8(8)

Jien, (Isem sħiħ tal-Uffiċjal Awtorizzat), nirrappreżenta u niġġustifika li għandi l-awtorità li neżegwixxi dan il-Ftehim f’isem ir-Riċevitur u nirrikonoxxi r-responsabbiltà u l-obbligu tal-istituzzjoni tiegħi li nirrispetta d-dispożizzjonijiet ta’ dan il-Ftehim, kemm eżattament kif hemm miktub kif ukoll fil-prinċipju, sabiex nippromwovi l-konservazzjoni u l-użu sostenibbli tar-Riżorsi Ġenetiċi tal-Pjanti għall-Ikel u l-Agrikoltura.

□ Nifhem u naqbel b’mod espliċitu li l-parti terza benefiċjarja għandu jkollha d-drittijiet previsti fl-Artikoli 4 u 8 ta’ dan il-Ftehim.

□ B’dan niddikjara li l-Bejgħ tar-Riċevitur ma jaqbiżx il-USD [xx] f’konformità mal-Anness 2, l-Artikolu 3(4). Ir-Riċevitur jintrabat li jagħmel pagamenti annwali u li jissottometti rapporti annwali minn meta l-Bejgħ tiegħu jaqbeż il-USD [xx]. Id-dritt tal-parti terza benefiċjarja li titlob l-informazzjoni xierqa f’konformità mal-Artikolu 4(4) ta’ dan il-Ftehim huwa mifhum u rikonoxxut b’mod espliċitu.

□ Nikkonferma li jien diġà Abbonat(a) għas-Sistema Multilaterali.

Jew

□ B’dan nagħżel l-għażla ta’ abbonament skont l-Artikolu 6(11) u l-Anness 2 ta’ dan il-Ftehim u nikkonferma li bgħatt il-Formola tar-Reġistrazzjoni fl-Anness 3 ta’ dan il-Ftehim lill-Korp Governattiv, permezz tas-Segretarju tiegħu.

Jew

□ B’dan nagħżel l-għażliet ta’ aċċess uniku skont l-Artikoli 6(7) u 6(8) u l-Anness 4 ta’ dan il-Ftehim. 

Firma 

Data

Isem ir-Riċevitur

Għażla 2 — Ftehimiet dwar it-Trasferiment ta’ Materjal Standard Shrink-wrap* 9(9) 

Il-Materjal huwa pprovdut bil-kundizzjoni li jiġu aċċettati t-termini ta’ dan il-Ftehim.

Il-provvista tal-Materjal mill-Fornitur u l-aċċettazzjoni u l-użu tal-Materjal mir-Riċevitur jikkostitwixxu l-aċċettazzjoni tat-termini ta’ dan il-Ftehim.

Ir-Riċevitur jifhem u jaqbel b’mod espliċitu li l-parti terza benefiċjarja għandu jkollha d-drittijiet ipprovduti fl-Artikoli 4 u 8 ta’ dan il-Ftehim.

Jekk il-Bejgħ tar-Riċevitur ma jaqbiżx il-USD [xx], huwa għandu jissottometti d-dikjarazzjoni li ġejja bil-miktub u ffirmata kif xieraq lill-Korp Governattiv, permezz tas-Segretarju tiegħu, jew inkella l-eżenzjoni pprovduta fl-Artikolu 3(4) tal-Anness 2 ma tapplikax: “B’dan niddikjara li l-Bejgħ tar-Riċevitur ma jaqbiżx il-USD [xx] f’konformità mal-Artikolu 3(4) tal-Anness 2. Ir-Riċevitur jintrabat li jagħmel pagamenti annwali u li jissottometti rapporti annwali minn meta l-Bejgħ tiegħu jaqbeż il-USD [xx]. Id-dritt tal-parti terza benefiċjarja li titlob l-informazzjoni xierqa f’konformità mal-Artikolu 4(4) ta’ dan il-Ftehim huwa mifhum u rikonoxxut b’mod espliċitu.”

Jekk ir-Riċevitur huwa Abbonat, huwa għandu jissottometti l-informazzjoni li ġejja lill-Korp Governattiv, permezz tas-Segretarju tiegħu: “B’dan nikkonferma li jien Abbonat, bin-numru tal-Abbonat ..................”

Jew

Jekk ir-Riċevitur jagħżel l-għażla ta’ abbonament, huwa għandu jissottometti l-informazzjoni li ġejja lill-Korp Governattiv, permezz tas-Segretarju tiegħu: “B’dan nagħżel l-għażla ta’ abbonament skont l-Artikolu 6(11) u l-Anness 2 ta’ dan il-Ftehim u nikkonferma li bgħatt il-Formola tar-Reġistrazzjoni fl-Anness 3 ta’ dan il-Ftehim lill-Korp Governattiv, permezz tas-Segretarju tiegħu.”

Jew

Jekk ir-Riċevitur jagħżel l-għażla ta’ aċċess uniku, huwa għandu jissottometti l-informazzjoni li ġejja lill-Korp Governattiv, permezz tas-Segretarju tiegħu: “B’dan nagħżel l-għażliet ta’ aċċess uniku skont l-Artikoli 6(7) u 6(8) u l-Anness 4 ta’ dan il-Ftehim.”

Għażla 3 — Ftehim dwar it-Trasferiment ta’ Materjal Standard click-wrap* 10(10)

□ B’dan naqbel mal-kundizzjonijiet ta’ hawn fuq.

□ Nifhem u naqbel b’mod espliċitu li l-parti terza benefiċjarja għandu jkollha d-drittijiet previsti fl-Artikoli 4 u 8 ta’ dan il-Ftehim. 

□ B’dan niddikjara li l-Bejgħ tar-Riċevitur ma jaqbiżx il-USD [xx] f’konformità mal-Artikolu 3(4) tal-Anness 2. Ir-Riċevitur jintrabat li jagħmel pagamenti annwali u li jissottometti rapporti annwali minn meta l-Bejgħ tiegħu jaqbeż il-USD [xx]. Id-dritt tal-parti terza benefiċjarja li titlob l-informazzjoni xierqa f’konformità mal-Artikolu 4(4) ta’ dan il-Ftehim huwa mifhum u rikonoxxut b’mod espliċitu.

□ B’dan nikkonferma li jien Abbonat, bin-numru tal-Abbonat ............ 

Jew

□ B’dan nagħżel l-għażla ta’ abbonament skont l-Artikolu 6(11) u l-Anness 2 ta’ dan il-Ftehim u nikkonferma li bgħatt il-Formola tar-Reġistrazzjoni fl-Anness 3 ta’ dan il-Ftehim lill-Korp Governattiv, permezz tas-Segretarju tiegħu.

Jew

□ B’dan nagħżel l-għażliet ta’ aċċess uniku skont l-Artikoli 6(7) u 6(8) u l-Anness 4 ta’ dan il-Ftehim.

2.Anness 1

LISTA TA’ MATERJALI PPROVDUTI

Dan l-Anness jelenka l-Materjal ipprovdut skont dan il-Ftehim, inkluż l-informazzjoni assoċjata msemmija fl-Artikolu 5b. L-informazzjoni li ġejja hija inkluża, jew hemm is-sors indikat minn fejn tista’ tinkiseb, għal kull Materjal elenkat: id-data kollha disponibbli dwar il-passaporti u, soġġett għal-liġi applikabbli, kwalunkwe informazzjoni deskrittiva oħra assoċjata, disponibbli u mhux kunfidenzjali.

Tabella A

Materjali:

Għalla: Numru tal-adeżjoni jew identifikatur ieħor

Informazzjoni assoċjata, jekk disponibbli, jew sors li minnu tista’ tinkiseb (URL)

Tabella B

Materjali li huma Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati:

Għalla:

Numru tal-adeżjoni jew identifikatur ieħor

Informazzjoni assoċjata, jekk disponibbli, jew sors li minnu tista’ tinkiseb (URL)

F’konformità mal-Artikolu 6(5)(b), hija pprovduta l-informazzjoni li ġejja fir-rigward tal-materjali riċevuti taħt l-SMTA jew li ddaħħlu fis-Sistema Multilaterali bi ftehim skont l-Artikolu 15 tat-Trattat, li minnu ġejjin ir-Riżorsi Ġenetiċi tal-Pjanti għall-Ikel u l-Agrikoltura li qed jiġu Żviluppati elenkati fit-Tabella B:

Għalla:

Numru tal-adeżjoni jew identifikatur ieħor

Informazzjoni assoċjata, jekk disponibbli, jew sors li minnu tista’ tinkiseb (URL)

3.Anness 2

TERMINI U KUNDIZZJONIJIET TAL-GĦAŻLA TA’ ABBONAMENT (L-ARTIKOLU 6.11)

ARTIKOLU 1 — ABBONAMENT

1.1 Ir-Riċevitur, li jabbona f’konformità mal-Artikolu 6(11) ta’ dan il-Ftehim (minn hawn ’il quddiem imsejjaħ “Abbonat”), jaqbel li jintrabat bit-termini u l-kundizzjonijiet addizzjonali li ġejjin (it-“Termini tal-Abbonament”).

1.2 L-Abbonament għandu jidħol fis-seħħ malli l-Abbonat jirċievi n-numru tal-Abbonat mingħand is-Segretarju tal-Korp Governattiv, wara s-sottomissjoni tal-Formola tar-Reġistrazzjoni li tinsab fl-Anness 3 ffirmata kif xieraq. L-Abbonat ma għandux ikun meħtieġ jiffirma l-Anness 3 ta’ kwalunkwe Ftehim dwar it-Trasferiment ta’ Materjal Standard sussegwenti, matul il-perjodu ta’ Abbonament.

1.3 L-Abbonat għandu jinħeles minn kwalunkwe obbligu li jagħmel pagamenti skont kwalunkwe Ftehim Standard dwar it-Trasferiment ta’ Materjal iffirmat qabel [data], u fir-rigward ta’ materjali aċċessati skont dawk il-Ftehimiet Standard dwar it-Trasferiment ta’ Materjal, għandhom japplikaw biss l-obbligi ta’ pagament f’dawn it-Termini tal-Abbonament.

1.3a Sa fejn l-Abbonat ikun iffirma kwalunkwe Ftehim Standard dwar it-Trasferiment ta’ Materjal skont l-Artikoli 6(7) jew 6(8) ta’ dan il-Ftehim wara [data], l-obbligi ta’ pagament tal-Abbonat skont dawk il-Ftehimiet Standard dwar it-Trasferiment ta’ Materjal għandhom jibqgħu fis-seħħ, u l-Abbonat jista’ jnaqqas il-bejgħ ta’ prodotti assoċjati li huma Riżorsi Ġenetiċi Essenzjali għall-Ikel u l-Agrikoltura mill-bażi tal-pagament tal-abbonament tiegħu.

1.4 Il-Korp Governattiv jista’ jemenda t-Termini tal-Abbonament f’kull ħin. Tali Termini tal-Abbonament emendati ma għandhom japplikaw għall-ebda Abbonament eżistenti, sakemm l-Abbonat ma jinnotifikax lill-Korp Governattiv bil-qbil tiegħu li jkun soġġett għat-Termini tal-Abbonament emendati. Jekk l-Abbonat jaqbel mat-Termini tal-Abbonament emendati, tali ftehim ma għandux jaffettwa d-data li fiha l-Abbonament ikun daħal fis-seħħ.

ARTIKOLU 2 — REĠSITRU

L-Abbonat jaqbel li l-isem sħiħ u d-dettalji ta’ kuntatt tiegħu u d-data li fiha l-Abbonament daħal fis-seħħ, għandhom jitqiegħdu f’reġistru pubbliku (ir-“Reġistru”), u jimpenja ruħu li jikkomunika immedjatament kwalunkwe bidla f’din l-informazzjoni lill-Korp Governattiv tat-Trattat, permezz tas-Segretarju tiegħu.

ARTIKOLU 3 — QSIM TAL-BENEFIĊĊJI MONETARJI

3.1 Sabiex jaqsam il-benefiċċji monetarji mill-użu tar-Riżorsi Ġenetiċi tal-Pjanti għall-Ikel u l-Agrikoltura skont it-Trattat, l-Abbonat għandu jagħmel pagamenti annwali bbażati fuq il-Bejgħ ta’ prodotti li huma Riżorsi Ġenetiċi tal-Pjanti għall-Ikel u l-Agrikoltura.

3.2 Ir-rata applikabbli ta’ pagament fuq il-Bejgħ ta’ prodotti li huma Riżorsi Ġenetiċi tal-Pjanti għall-Ikel u l-Agrikoltura għandha tkun ta’ [yy] %.

3.3 Fuq talba tal-Abbonat, li jikkummerċjalizza biss prodotti li huma Riżorsi Ġenetiċi tal-Pjanti għall-Ikel u l-Agrikoltura li huma disponibbli mingħajr restrizzjoni, permezz tal-Formola tar-Reġistrazzjoni li tinsab fl-Anness 3, ir-rata ta’ pagament għandha tkun ta’ [xx]%.

3.4 Minkejja dan ta’ hawn fuq, ma għandu jkun meħtieġ l-ebda pagament għal Abbonat f’sena finanzjarja li fiha l-Bejgħ tiegħu ma jaqbiżx il-USD [xx].

3.5 Il-pagament għandu jsir fi żmien 60 jum wara l-għeluq tal-kontijiet kull sena finanzjarja, għas-sena ta’ qabel. Kull meta l-Abbonament ikun daħal fis-seħħ matul is-sena, l-Abbonat għandu jagħmel pagament proporzjonat għall-ewwel sena tal-Abbonament tiegħu.

3.6 L-Abbonat għandu jissottometti rendikont lis-Segretarju tal-Korp Governattiv, fi żmien 60 jum wara l-għeluq tal-kontijiet kull sena finanzjarja, inkluż b’mod partikolari dan li ġej:

a) Informazzjoni dwar il-Bejgħ li għalih sar il-pagament;

b) Fil-każ tal-Artikolu 3(3) tal-Anness 2, informazzjoni dwar il-portafoll tal-prodotti tal-Abbonat;

c) is-sors verifikabbli tal-informazzjoni pprovduta;

jew dikjarazzjoni ffirmata li turi li hija eżentata mill-pagament f’konformità mal-Artikolu 3(4) hawn fuq.

Tali informazzjoni għandha tiġi ttrattata bħala informazzjoni kummerċjali kunfidenzjali, sa fejn speċifikat mill-Abbonat fil-limiti stabbiliti minn dan il-Ftehim, u għandha tkun magħmula disponibbli għall-parti terza benefiċjarja, fil-kuntest tas-soluzzjoni ta’ tilwim, kif previst fl-Artikolu 8 ta’ dan il-Ftehim, u għall-Korp Governattiv għal finijiet ta’ rapportar aggregat dwar id-dħul għall-fond stabbilit mill-Korp Governattiv f’konformità mal-Artikolu 19(3)(f) tat-Trattat.

3.7 Il-pagamenti kollha dovuti lill-Korp Governattiv għandhom jitħallsu f’dollari Amerikani (USD) bir-rata tal-kambju li kienet prevalenti fid-data tal-għeluq tal-kontijiet għall-kont li ġej stabbilit mill-Korp Governattiv f’konformità mal-Artikolu 19(3)(f) tat-Trattat:

Il-Fond Fiduċjarju tal-FAO (USD)

GINC/INT/031/MUL,

IT-PGRFA (Benefit-sharing),

Citibank

399 Park Avenue, New York, NY, USA, 10022,

Swift/BIC: CITIUS33, ABA/Kodiċi bankarju: 021000089, Kont Nru 36352577

ARTIKOLU 4 — IRTIRAR MILL-ABBONAMENT

4.1 L-Abbonament għandu jkun fis-seħħ sakemm l-Abbonat jirtira minnu, soġġett għall-eżiti ta’ kwalunkwe soluzzjoni ta’ tilwim skont l-Artikolu 8 ta’ dan il-Ftehim.

4.2 L-Abbonat jista’ jirtira mill-Abbonament tiegħu wara 6 xhur ta’ avviż bil-miktub lill-Korp Governattiv permezz tas-Segretarju tiegħu, mhux inqas minn 10 snin mid-data li fiha l-Abbonament ikun daħal fis-seħħ.

4.3 Malli jirtira mill-Abbonament tiegħu, l-Abbonat ma għandux jibqa’ juża l-Materjal. L-Abbonat jista’ jikkonserva l-Materjal u jagħmlu disponibbli għas-Sistema Multilaterali f’konformità mal-Artikolu 6(3). L-Abbonat jista’ joffri wkoll li jirritorna kwalunkwe Materjal li jkun fadal fil-pussess tiegħu lill-Fornitur. Jekk dan ma jkunx possibbli jew il-Fornitur jirrifjuta l-offerta, l-Abbonat għandu joffri li jittrasferixxi l-Materjal lil istituzzjoni internazzjonali li tkun iffirmat ftehim mal-Korp Governattiv skont l-Artikolu 15 tat-Trattat jew kwalunkwe bank ġenetiku ieħor li jopera skont it-termini u l-kundizzjonijiet tas-Sistema Multilaterali. Jekk l-offerta tiġi rrifjutata jew tali trasferiment ma jkunx possibbli, bħala l-aħħar alternattiva, il-Materjal jista’ jinqered, u għandha tiġi pprovduta evidenza tal-qerda tiegħu lill-parti terza benefiċjarja.

4.4 Id-dispożizzjonijiet dwar il-qsim tal-benefiċċji monetarji tal-Artikolu 3 ta’ dawn it-Termini tal-Abbonament għandhom ikomplu japplikaw għal sentejn mit-tmiem tal-Abbonament. Minkejja dak li ntqal qabel, l-Artikoli 4, 6(1), 6(2), 6(3), 6(4), 6(9), 6(10) u 8 ta’ dan il-Ftehim biss għandhom ikomplu japplikaw wara t-tmiem tal-Abbonament.

4.Anness 3 11(11)

FORMOLA TAR-REĠISTRAZZJONI

Ir-Riċevitur b’dan jaqbel li jkun marbut bit-Termini tal-Abbonament. Huwa mifhum u miftiehem b’mod espliċitu li l-isem sħiħ u d-dettalji ta’ kuntatt tar-Riċevitur u d-data li fiha l-Abbonament ikun daħal fis-seħħ, għandhom jitqiegħdu f’reġistru pubbliku tal-Abbonati (ir-“Reġistru”), u li kwalunkwe bidla għal din l-informazzjoni tiġi kkomunikata immedjatament lill-Korp Governattiv tat-Trattat, permezz tas-Segretarju tiegħu, mir-Riċevitur jew l-uffiċjal awtorizzat tiegħu.

□ (Jekk jintgħażlu biss ir-rati ta’ pagament tal-qsim tal-benefiċċji monetarji skont l-Artikolu 3(3) tal-Anness 2): B’dan nagħżel ir-rati ta’ pagament previsti fl-Artikolu 3(3) tal-Anness 2. Nifhem u naqbel b’mod espliċitu li r-rendikont annwali tiegħi se jkollu jinkludi l-informazzjoni addizzjonali stipulata fl-Artikolu 3(6) tal-Anness 2.

Firma

 Data

Isem sħiħ tar-Riċevitur:

Indirizz:

Telefon: 

Posta elettronika:

Uffiċjal awtorizzat tar-Riċevitur:

Indirizz:

Telefon: 

Posta elettronika:

NB: ir-Riċevitur irid jiffirma jew jaċċetta wkoll dan il-Ftehim, kif previst fl-Artikolu 10, li mingħajru r-Reġistrazzjoni ma tkunx valida. Ir-Riċevitur għandu juri li aċċetta billi jibgħat lura Formola tar-Reġistrazzjoni ffirmata lill-Korp Governattiv, permezz tas-Segretarju tiegħu, fl-indirizz ta’ hawn taħt. Formola tar-Reġistrazzjoni ffirmata trid tkun akkumpanjata minn kopja ta’ dan il-Ftehim.

Is-Segretarju,

it-Trattat Internazzjonali dwar Riżorsi Ġenetiċi tal-Pjanti għall-Ikel u l-Agrikoltura 

Organizzazzjoni tal-Ikel u l-Agrikoltura tan-Nazzjonijiet Uniti

I-00153 Ruma, l-Italja

Posta elettronika: ITPGRFA-Secretary@FAO.org.

5.Anness 4 12(12)

TERMINI U KUNDIZZJONIJIET TAL-GĦAŻLA TA’ AĊĊESS UNIKU (L-ARTIKOLI 6.7 U 6.8)

1. Mal-kummerċjalizzazzjoni tal-Prodott, ir-Riċevitur għandu jħallas kull sena [bb %] tal-Bejgħ annwali tal-Prodott, jekk il-Prodott ma jkunx disponibbli mingħajr restrizzjoni għall-oħrajn għal riċerka u tnissil ulterjuri, għall-perjodu li għalih tkun applikabbli r-restrizzjoni. Wara li tintemm ir-restrizzjoni, ir-Riċevitur jew kwalunkwe wieħed mill-affiljati tiegħu li jikkummerċjalizzaw il-Prodott se jkomplu jagħmlu pagamenti bir-rata msemmija fil-Paragrafu 2 hawn taħt.

2. Mal-kummerċjalizzazzjoni tal-Prodott, ir-Riċevitur għandu jħallas kull sena, għal perjodu ta’ 25 sena, [aa] % tal-Bejgħ annwali tal-Prodott, jekk il-Prodott ikun disponibbli mingħajr restrizzjoni għal oħrajn għar-riċerka u għat-tnissil.

3. Għal Prodott partikolari, ir-Riċevitur għandu jkun meħtieġ jagħmel pagamenti għal mhux aktar minn 25 sena b’kollox.

4. Ir-Riċevitur għandu jinnotifika lill-Korp Governattiv, permezz tas-Segretarju tiegħu, li jkun ikkummerċjalizza l-Prodott, fi żmien 6 xhur mid-data li fiha tkun bdiet il-kummerċjalizzazzjoni.

4a. Ir-Riċevitur jista’ jagħżel li jagħmel pagament ta’ darba ekwivalenti għal [zz %] tan-nefqa totali fuq ir-riċerka u l-iżvilupp relatata mal-iżvilupp tal-Prodott mat-tlestija tal-fażi inizjali tar-riċerka. Dak il-pagament se jitnaqqas minn kwalunkwe pagament dovut skont l-Artikoli 1 jew 2 ta’ hawn fuq. It-tlestija tar-riċerka inizjali tfisser li l-analiżijiet tal-laboratorju, l-istudji fuq il-post, jew kwalunkwe attività oħra ta’ riċerka meħtieġa biex tiġi ddeterminata l-utilità tal-Materjal jew tal-komponenti tiegħu miksuba mis-Sistema Multilaterali jkunu saru u ġew iffinalizzati.

5. L-ebda pagament ma għandu jkun dovut mir-Riċevitur meta l-Prodott:

(a) ikun inxtara jew inkiseb b’mod ieħor minn persuna jew entità oħra li diġà għamlet pagament fuq il-Prodott;

(b) jinbiegħ jew jiġi nnegozjat bħala komodità; jew

(c) ikun fih kontribut ġenetiku ta’ inqas minn 6,25 % bil-linja axxendentali tal-Materjal u ma jkunx fih karatteristika ta’ valur kummerċjali li ġiet ikkontribwita mill-Materjal.

6. Meta Prodott ikun fih Riżorsa Ġenetika tal-Pjanti għall-Ikel u l-Agrikoltura aċċessata mis-Sistema Multilaterali taħt żewġ ftehimiet jew aktar dwar it-trasferiment ta’ materjal ibbażati fuq il-Ftehim dwar it-Trasferiment ta’ Materjal Standard, għandu jkun meħtieġ pagament wieħed biss skont il-paragrafi 1 u 2 ta’ hawn fuq.

7. Ir-Riċevitur għandu jissottometti lill-Korp Governattiv, fi żmien 60 jum wara l-għeluq tal-kontijiet kull sena finanzjarja, rapport annwali li fih jintwerew:

(a) il-Bejgħ tal-Prodott jew tal-Prodotti mir-Riċevitur, u kwalunkwe wieħed mill-affiljati tiegħu, għall-perjodu ta’ 12-il xahar qabel l-għeluq annwali tal-kontijiet;

(b) l-ammont tal-pagament dovut;

(c) informazzjoni li tippermetti l-identifikazzjoni tar-rata jew rati ta’ pagament applikabbli; u 

(d) is-sors verifikabbli tal-informazzjoni pprovduta. 

Tali informazzjoni għandha tiġi trattata bħala informazzjoni kummerċjali kunfidenzjali, sa fejn speċifikat mir-Riċevitur fil-limiti stabbiliti minn dan il-Ftehim, u għandha tkun magħmula disponibbli għall-parti terza benefiċjarja, fil-kuntest tas-soluzzjoni ta’ tilwim, kif previst fl-Artikolu 8 ta’ dan il-Ftehim, u għall-Korp Governattiv għall-finijiet ta’ rapportar aggregat dwar id-dħul għall-fond stabbilit mill-Korp Governattiv f’konformità mal-Artikolu 19(3)(f) tat-Trattat.

8. Il-pagament għandu jkun dovut u għandu jkun pagabbli mas-sottomissjoni ta’ kull rapport annwali. Il-pagamenti kollha dovuti lill-Korp Governattiv għandhom jitħallsu f’dollari Amerikani (USD) bir-rata tal-kambju li kienet prevalenti fid-data tal-għeluq tal-kontijiet għall-kont li ġej stabbilit mill-Korp Governattiv f’konformità mal-Artikolu 19(3)(f) tat-Trattat:

Il-Fond Fiduċjarju tal-FAO (USD)

GINC/INT/031/MUL,

IT-PGRFA (Benefit-sharing),

Citibank

399 Park Avenue, New York, NY, USA, 10022,

Swift/BIC: CITIUS33, ABA/Kodiċi bankarju: 021000089, Kont Nru 36352577

9. Riċevitur jista’ jirtira minn dan il-Ftehim wara avviż bil-miktub ta’ 6 xhur lill-Korp Governattiv permezz tas-Segretarju tiegħu, mhux inqas minn 10 snin mid-data tal-iffirmar ta’ dan il-Ftehim mill-Fornitur jew mir-Riċevitur, skont liema data tkun aktar tard, jew mid-data ta’ aċċettazzjoni ta’ dan il-Ftehim mir-Riċevitur.

10. Fil-każ li r-Riċevitur jikkummerċjalizza Prodott, li fir-rigward tiegħu l-pagament ikun dovut f’konformità mal-Artikoli 6(7), 6(8) u l-Anness 4 ta’ dan il-Ftehim, tali pagament għandu jitkompla wara l-irtirar waqt li dak il-Prodott ikun ikkummerċjalizzat u f’konformità mat-termini tal-Artikoli 6(7), 6(8) u l-Anness 4 ta’ dan il-Ftehim.

11. Malli jirtira minn dan il-Ftehim, ir-Riċevitur ma għandux jibqa’ juża l-Materjal. Ir-Riċevitur jista’ jikkonserva l-Materjal u jagħmlu disponibbli għas-Sistema Multilaterali f’konformità mal-Artikolu 6(3). Ir-Riċevitur jista’ joffri wkoll li jirritorna kwalunkwe Materjal li jkun fadal fil-pussess tiegħu lill-Fornitur. Jekk dan ma jkunx possibbli jew il-Fornitur jirrifjuta l-offerta, ir-Riċevitur għandu joffri li jittrasferixxi l-Materjal lil istituzzjoni internazzjonali li tkun iffirmat ftehim mal-Korp Governattiv skont l-Artikolu 15 tat-Trattat jew kwalunkwe bank ġenetiku ieħor li jopera skont it-termini u l-kundizzjonijiet tas-Sistema Multilaterali. Jekk l-offerta tiġi rrifjutata jew tali trasferiment ma jkunx possibbli, bħala l-aħħar alternattiva, il-Materjal jista’ jinqered u tiġi pprovduta evidenza tal-qerda tiegħu lill-parti terza benefiċjarja.

12. Minkejja dan ta’ hawn fuq, l-Artikoli 4, 6(1), 6(2), 6(3), 6(4), 6(9), 6(10) u 8 biss ta’ dan il-Ftehim għandhom ikomplu japplikaw wara li jkun daħal fis-seħħ l-irtirar.

(1) (1)    It-termini definiti, għal raġunijiet ta’ ċarezza, tpoġġew b’tipa grassa tul it-test kollu.

(2) (2)    Daħħal kif meħtieġ. Mhux applikabbli għall-Ftehimiet dwar it-Trasferiment ta’ Materjal Standard shrink-wrap u click-wrap. Ftehim dwar it-Trasferiment ta’ Materjal Standard “shrink-wrap” huwa meta kopja tal-Ftehim dwar it-Trasferiment ta’ Materjal Standard tiġi inkluża fl-imballaġġ tal-Materjal, u l-aċċettazzjoni tal-Materjal min-naħa tar-Riċevitur tikkostitwixxi aċċettazzjoni tat-termini u l-kundizzjonijiet tal-Ftehim dwar it-Trasferiment ta’ Materjal Standard. Ftehim dwar it-Trasferiment ta’ Materjal Standard “click-wrap” huwa meta l-ftehim jiġi konkluż fuq l-Internet u r-Riċevitur jaċċetta t-termini u l-kundizzjonijiet tal-Ftehim dwar it-Trasferiment ta’ Materjal Standard billi jikklikkja fuq l-ikona x-xierqa fuq is-sit web jew fil-verżjoni elettronika tal-Ftehim dwar it-Trasferiment ta’ Materjal Standard, kif ikun xieraq.

(3) (3)    Kif jidher, pereżempju, bil-linja axxendentali jew bin-notazzjoni tal-inserzjoni tal-ġeni.

(4) (4)    Fil-każ taċ-Ċentri Internazzjonali għar-Riċerka Agrikola tal-Grupp Konsultattiv dwar ir-Riċerka Agrikola Internazzjonali (CGIAR, Consultative Group on International Agricultural Research) u istituzzjonijiet internazzjonali oħra, se japplika l-Ftehim bejn il-Korp Governattiv u ċ-Ċentri CGIAR jew istituzzjonijiet rilevanti oħra.

(5) (5)    Din l-informazzjoni għandha tiġi sottomessa mill-Fornitur lil: is-Segretarju, it-Trattat Internazzjonali dwar ir-Riżorsi Ġenetiċi tal-Pjanti għall-Ikel u l-Agrikoltura, l-Organizzazzjoni tal-Ikel u l-Agrikoltura tan-Nazzjonijiet Uniti I-00153 Ruma, l-Italja, Posta elettronika: ITPGRFA-Secretary@FAO.org jew permezz ta’ EasySMTA: https://mls.planttreaty.org/itt/.

(6) (6)    fil-każ li l-kopja tal-Ftehim dwar it-Trasferiment ta’ Materjal Standard komplut li tiġi trażmessa tkun shrink-wrap, f’konformità mal-Artikolu 10, l-Għażla 2. tal-Ftehim dwar it-Trasferiment ta’ Materjal Standard, il-Fornitur għandu jinkludi wkoll l-informazzjoni dwar (a) id-data li fiha ntbagħtet il-konsenja, u (b) l-isem tal-persuna li lilha ntbagħtet il-konsenja.

(7) (7)    Kumment editorjali: in-numri tal-Artikolu għal “6(11)”, “6(11a)”, “6(11b)”, u “6(7)/6(8)” inżammu, minħabba li jintużaw b’mod komuni biex jiddeskrivu l-għażliet u l-kunċetti ta’ pagament tal-Ftehim dwar it-Trasferiment ta’ Materjal Standard (SMTA) kurrenti, u saru sinonimi għall-għażla ta’ abbonament u għall-għażla ta’ aċċess uniku, rispettivament. Ġie miftiehem li dawn l-Artikoli se jiġu nnumerati mill-ġdid biss fi stadju aktar tard.

(8) (8)    * Meta l-Fornitur jagħżel firma, il-kliem fl-Għażla 1 biss se jidher fil-Ftehim dwar it-Trasferiment ta’ Materjal Standard. Bl-istess mod, meta l-Fornitur jagħżel shrink-wrap jew click-wrap, il-kliem fl-Għażla 2 jew fl-Għażla 3 biss, kif ikun xieraq, se jidher fil-Ftehim dwar it-Trasferiment ta’ Materjal Standard. Meta tintgħażel il-formola “click-wrap”, il-Materjal għandu jkun akkumpanjat ukoll minn kopja bil-miktub tal-Ftehim dwar it-Trasferiment ta’ Materjal Standard.

(9) (9)    * Meta l-Fornitur jagħżel firma, il-kliem fl-Għażla 1 biss se jidher fil-Ftehim dwar it-Trasferiment ta’ Materjal Standard. Bl-istess mod, meta l-Fornitur jagħżel shrink-wrap jew click-wrap, il-kliem fl-Għażla 2 jew fl-Għażla 3 biss, kif ikun xieraq, se jidher fil-Ftehim dwar it-Trasferiment ta’ Materjal Standard. Meta tintgħażel il-formola “click-wrap”, il-Materjal għandu jkun akkumpanjat ukoll minn kopja bil-miktub tal-Ftehim dwar it-Trasferiment ta’ Materjal Standard.

(10) (10)    * Meta l-Fornitur jagħżel firma, il-kliem fl-Għażla 1 biss se jidher fil-Ftehim dwar it-Trasferiment ta’ Materjal Standard. Bl-istess mod, meta l-Fornitur jagħżel shrink-wrap jew click-wrap, il-kliem fl-Għażla 2 jew fl-Għażla 3 biss, kif ikun xieraq, se jidher fil-Ftehim dwar it-Trasferiment ta’ Materjal Standard. Meta tintgħażel il-formola “click-wrap”, il-Materjal għandu jkun akkumpanjat ukoll minn kopja bil-miktub tal-Ftehim dwar it-Trasferiment ta’ Materjal Standard.

(11) (11)    Dan l-Anness japplika biss jekk ir-Riċevitur ikun għażel l-għażla ta’ abbonament. Jekk ir-Riċevitur ikun diġà Abbonat u jkun indika n-numru ta’ Abbonament fl-Artikolu 10 ta’ hawn fuq, ma għandux ikun meħtieġ jiffirma l-Formola tar-Reġistrazzjoni.

(12) (12)    Dan l-Anness japplika biss jekk ir-Riċevitur ma jkunx għażel l-għażla ta’ abbonament

IL-KUMMISSJONI EWROPEA

Brussell, 29.9.2025

COM(2025) 564 final

ANNESS

tad-

DEĊIŻJONI TAL-KUNSILL

li tistabbilixxi l-pożizzjoni li għandha tittieħed f’isem l-Unjoni fi ħdan il-Korp Governattiv tat-Trattat Internazzjonali dwar ir-Riżorsi Ġenetiċi tal-Pjanti għall-Ikel u l-Agrikoltura fir-rigward ta’ ċerti proposti sottomessi għall-adozzjoni matul il-11-il sessjoni tiegħu

Anness III

PRINĊIPJI ĠENERALI TAN-NEGOZJATI

1.It-tisħiħ tal-funzjonament tas-Sistema Multilaterali (MLS) għandu jinkiseb permezz ta’ pakkett ta’ miżuri li jinkludi l-elementi kollha li ġejjin:

1.1.L-iżvilupp ta’ sistema ta’ pagamenti bbażata fuq l-abbonamenti li tippermetti introjtu prevedibbli u sostenibbli għall-Fond għall-qsim tal-Benefiċċji u li tkun aċċettabbli għall-utenti u għall-fornituri. 

1.2.    Iż-żamma ta’ sistema ta’ aċċess uniku ta’ pagamenti bħala alternattiva għal sistema bbażata fuq l-abbonamenti, li tippermetti biżżejjed flessibbiltà għal diversi gruppi ta’ utenti 1(1).

1.3.    L-espansjoni kemm jista’ jkun tal-kamp ta’ applikazzjoni tal-MLS biex idealment jiġu koperti r-riżorsi ġenetiċi kollha tal-pjanti għall-ikel u l-agrikoltura.

2.    Kwalunkwe reviżjoni tal-Ftehim dwar it-Trasferiment ta’ Materjal Standard (SMTA) għandha tirrikonoxxi l-valur tal-eżenzjoni tan-nissiela billi tagħmel distinzjoni ċara bejn dawk il-prodotti li jkunu magħmulin disponibbli mingħajr restrizzjoni għal oħrajn għal riċerka u tnissil ulterjuri, u dawk li ma humiex. Għaldaqstant, il-pagamenti obbligatorji fil-Fond għall-qsim tal-Benefiċċji li jirriżultaw mill-kummerċjalizzazzjoni ta’ prodotti li jsiru disponibbli mingħajr restrizzjoni għal oħrajn għal riċerka u tnissil ulterjuri għandhom ikunu ferm aktar baxxi mill-pagamenti obbligatorji li jirriżultaw mill-kummerċjalizzazzjoni ta’ prodotti li ma jkunux magħmulin disponibbli mingħajr tali restrizzjoni. Din id-differenzjazzjoni għandha tapplika kemm għas-sistema ta’ abbonamenti kif ukoll għas-sistema ta’ aċċess uniku 2(2).

3.    Fir-rigward tal-Informazzjoni Diġitali dwar is-Sekwenzi (DSI) għandu jiġi rrispettat dan li ġej:

3.1.    Sakemm ma jkun hemm l-ebda qbil finali fuq id-definizzjoni tad-DSI, kwalunkwe reviżjoni tal-SMTA ma għandhiex tinkludi dispożizzjonijiet speċifiċi dwar il-qsim tal-benefiċċji derivati mill-użu tad-DSI fuq ir-riżorsi ġenetiċi tal-pjanti għall-ikel u l-agrikoltura. Dan sabiex tiġi evitata l-inċertezza legali, peress li l-SMTA jikkostitwixxi kuntratt vinkolanti bejn il-fornitur u r-riċevitur tal-materjal.

3.2.    Is-sistema ta’ pagament ibbażata fuq l-abbonamenti għandha tiġi definita b’mod li l-kontribuzzjonijiet taħt dik is-sistema jissodisfaw l-obbligu għall-kontribuzzjonijiet għall-“Fond Cali għall-Qsim Ġust u Ekwu tal-Benefiċċji mill-użu ta’ Informazzjoni Diġitali dwar is-Sekwenzi ta’ Riżorsi Ġenetiċi” li ġie stabbilit mid-Deċiżjoni 16/2 tal-Konferenza tal-Partijiet għall-Konvenzjoni dwar id-Diversità Bijoloġika. Dan sabiex jiġu evitati pagamenti doppji bejn iż-żewġ sistemi.

(1) (1)    A    Madankollu, sistema ta’ abbonamenti għal għelejjel speċifiċi tista’ tiġi aċċettata mill-Unjoni u mill-Istati Membri bħala għażla addizzjonali ta’ pagament jekk dan ikun meħtieġ għall-konklużjoni b’suċċess tan-negozjati, u bil-kundizzjoni li t-termini għal tali għażla jkunu definiti b’mod ċar u ma jagħmlux is-sistema ta’ pagament kumplessa wisq.

(2) (2)    H    Madankollu, jekk l-applikazzjoni ta’ din id-differenzjazzjoni għas-sistema ta’ abbonament tkun l-unika kwistjoni li tipprekludi l-konklużjoni b’suċċess tan-negozjati, l-Unjoni u l-Istati Membri tagħha jistgħu jaqblu li jaċċettaw sistema ta’ abbonament b’rata waħda.