IL-KUMMISSJONI EWROPEA

Brussell, 28.5.2025

COM(2025) 292 final/2 DOWNGRADED ON 4/7/2025

2025/0153(NLE)

Proposta għal

DEĊIŻJONI TAL-KUNSILL

li tistabbilixxi l-pożizzjoni li għandha tittieħed f’isem l-Unjoni Ewropea fil-Kunsill ta’ Sħubija stabbilit mill-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, fir-rigward tad-Deċiżjoni Nru 2/2025 tal-Kunsill ta’ Sħubija

MEMORANDUM TA’ SPJEGAZZJONI

1.Suġġett tal-proposta

Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kunsill ta’ Sħubija stabbilit mill-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (“il-Ftehim”, jew “Ftehim dwar il-Kummerċ u l-Kooperazzjoni”). Il-pożizzjoni tirrigwarda l-interpretazzjoni u l-implimentazzjoni tal-Artikolu 331(2) ta’ dan il-Ftehim.

2.Kuntest tal-proposta

2.1.Il-Ftehim dwar il-Kummerċ u l-Kooperazzjoni bejn l-UE u r-Renju Unit

Il-Ftehim dwar il-Kummerċ u l-Kooperazzjoni ġie ffirmat fit-30 ta’ Diċembru 2020, applikat proviżorjament mill-1 ta’ Jannar 2021 u daħal fis-seħħ fl-1 ta’ Mejju 2021. Huwa jistabbilixxi l-bażi għal relazzjoni wiesgħa bejn l-Unjoni u r-Renju Unit li tinvolvi drittijiet u obbligi reċiproċi, azzjonijiet komuni u proċeduri speċjali.

2.2.Il-Kunsill ta’ Sħubija

L-Artikolu 7(1) tal-Ftehim dwar il-Kummerċ u l-Kooperazzjoni jistabbilixxi l-Kunsill ta’ Sħubija.

Skont l-Artikolu 519(b) tal-Ftehim, il-Kunsill ta’ Sħubija jista’ jadotta deċiżjonijiet biex joħroġ interpretazzjonijiet dwar id-dispożizzjonijiet tat-Tieni Parti tal-Ftehim.

Skont l-Artikolu 331(2) tal-Ftehim, il-Kunsill ta’ Sħubija jista’ jadotta wkoll deċiżjoni biex jestendi l-applikazzjoni tat-Tieni Parti, l-Ewwel Intestatura, it-Titolu VIII dwar l-enerġija tal-Ftehim dwar il-Kummerċ u l-Kooperazzjoni (“it-Titolu VIII”).

2.3.L-att previst tal-Kunsill ta’ Sħubija

F’konformità mal-Artikolu 519(b) tal-Ftehim dwar il-Kummerċ u l-Kooperazzjoni, il-Kunsill ta’ Sħubija għandu jadotta fil-laqgħa li jmiss tiegħu jew permezz ta’ proċedura bil-miktub, deċiżjoni li tinterpreta dispożizzjoni fit-Tieni Parti tal-Ftehim, jiġifieri l-Artikolu 331(2) tal-Ftehim.

F’konformità mal-Artikolu 331(2) tal-Ftehim dwar il-Kummerċ u l-Kooperazzjoni, il-Kunsill ta’ Sħubija għandu jadotta wkoll deċiżjoni biex jimplimenta l-Artikolu 331(2) tal-Ftehim.

3.Pożizzjoni li għandha tittieħed f’isem l-Unjoni

Il-pożizzjoni li għandha tittieħed f’isem l-Unjoni hija biex tiġi approvata l-adozzjoni ta’ deċiżjoni mill-Kunsill ta’ Sħubija li tinterpreta l-Artikolu 331(2) tal-Ftehim dwar il-Kummerċ u l-Kooperazzjoni. Jenħtieġ li l-pożizzjoni tkun li l-Artikolu 331(2) tal-Ftehim dwar il-Kummerċ u l-Kooperazzjoni għandu jiġi interpretat fis-sens li d-deċiżjoni biex jiġi estiż it-Titolu VIII sal-31 ta’ Marzu 2027 tkun tista’ tiġi adottata qabel l-1 ta’ Lulju 2026 dment li tidħol fis-seħħ mill-1 ta’ Lulju 2026.

Jenħtieġ li l-pożizzjoni tkun ukoll li tiġi approvata l-adozzjoni, mill-Kunsill ta’ Sħubija, ta’ deċiżjoni li timplimenta l-Artikolu 331(2) tal-Ftehim dwar il-Kummerċ u l-Kooperazzjoni billi tkun applikabbli sal-31 ta’ Marzu 2027.

4.Bażi legali

4.1.Bażi legali proċedurali

4.1.1.Prinċipji

L-Artikolu 218(9) tat-Trattat dwar il-Funzjonament tal-Unjoni Ewropea (it-TFUE) jipprevedi deċiżjonijiet tal-Kunsill li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”

4.1.2.Applikazzjoni għal dan il-każ

Il-Kunsill ta’ Sħubija huwa korp stabbilit minn ftehim, jiġifieri l-Ftehim dwar il-Kummerċ u l-Kooperazzjoni.

Id-deċiżjoni li l-Kunsill ta’ Sħubija huwa mitlub jadotta f’konformità mal-Artikolu 519(b) u l-Artikolu 331(2) tal-Ftehim tikkostitwixxi att li għandu effetti legali, fis-sens tal-Artikolu 218(9) TFUE. Id-deċiżjoni se tkun vinkolanti fuq il-Partijiet f’konformità mal-Artikolu 10(1) tal-Ftehim.

Id-deċiżjoni ma tissupplimentax jew ma temendax il-qafas istituzzjonali tal-Ftehim dwar il-Kummerċ u l-Kooperazzjoni.

Għalhekk, il-bażi legali proċedurali għad-deċiżjoni proposta hija l-Artikolu 218(9) TFUE.

 

4.2.Bażi legali sostantiva

4.2.1.Prinċipji

Il-bażi legali sostantiva għal deċiżjoni skont l-Artikolu 218(9) TFUE tiddependi primarjament mill-objettiv u l-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew il-komponenti jkun jista’ jiġi identifikat bħala dak prinċipali, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) TFUE trid tissejjes fuq bażi legali sostantiva waħda, jiġifieri dik mitluba mill-għan jew mill-komponent prinċipali jew predominanti.

Fir-rigward ta’ att previst li jsegwi għadd ta’ objettivi simultanjament, jew li għandu diversi komponenti li huma marbuta b’mod inseparabbli mingħajr ma wieħed ikun inċidentali għall-ieħor, il-bażi legali sostantiva ta’ deċiżjoni skont l-Artikolu 218(9) TFUE jkollha tinkludi, b’mod eċċezzjonali, id-diversi bażijiet legali korrispondenti.

4.2.2.Applikazzjoni għal dan il-każ

L-objettiv u l-kontenut tal-att previst jirrigwardaw l-enerġija. Għalhekk, il-bażi legali sostantiva għad-deċiżjoni proposta hija l-Artikolu 194(2) TFUE.

4.3.Konklużjoni

Il-bażi legali tad-Deċiżjoni proposta jenħtieġ li tkun l-Artikolu 194(2) TFUE, flimkien mal-Artikolu 218(9) TFUE.

5.Pubblikazzjoni tal-att previst

Peress li l-għan tad-deċiżjoni tal-Kunsill ta’ Sħubija huwa li tinterpreta u timplimenta dispożizzjoni tal-Ftehim dwar il-Kummerċ u l-Kooperazzjoni, fl-interess taċ-ċertezza legali u tat-trasparenza, huwa xieraq li d-deċiżjoni tal-Kunsill ta’ Sħubija tiġi ppubblikata f’Il-Ġurnal Uffiċjali tal-Unjoni Ewropea wara l-adozzjoni tagħha.

2025/0153 (NLE)

Proposta għal

DEĊIŻJONI TAL-KUNSILL

li tistabbilixxi l-pożizzjoni li għandha tittieħed f’isem l-Unjoni Ewropea fil-Kunsill ta’ Sħubija stabbilit mill-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, fir-rigward tad-Deċiżjoni Nru 2/2025 tal-Kunsill ta’ Sħubija

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 194(2) tiegħu, flimkien mal-Artikolu 218(9) tiegħu,

Wara li kkunsidra l-proposta mill-Kummissjoni Ewropea,

Billi:

(1)Il-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ fuq, min-naħa l-oħra (“il-Ftehim dwar il-Kummerċ u l-Kooperazzjoni” jew “il-Ftehim”) ġie konkluż mill-Unjoni permezz tad-Deċiżjoni tal-Kunsill (UE) 2021/689 1 u daħal fis-seħħ fl-1 ta’ Mejju 2021, wara li kien ilu japplika b’mod proviżorju mill-1 ta’ Jannar 2021.

(2)Skont l-Artikolu 519(b) tal-Ftehim dwar il-Kummerċ u l-Kooperazzjoni, il-Kunsill ta’ Sħubija stabbilit skont il-Ftehim jista’ jadotta deċiżjonijiet biex joħroġ interpretazzjonijiet dwar id-dispożizzjonijiet tat-Tieni Parti tal-Ftehim.

(3)F’konformità mal-Artikolu 331(2) tal-Ftehim, bejn l-1 ta’ Lulju 2026 u l-31 ta’ Diċembru 2026, il-Kunsill ta’ Sħubija jista’ jiddeċiedi li jestendi l-applikazzjoni tat-Titolu VIII sal-31 ta’ Marzu 2027.

(4)Il-Kunsill ta’ Sħubija għandu jadotta fil-laqgħa li jmiss tiegħu jew permezz ta’ proċedura bil-miktub deċiżjoni li tinterpreta u timplimenta l-Artikolu 331(2) tal-Ftehim dwar il-Kummerċ u l-Kooperazzjoni.

(5)Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kunsill ta’ Sħubija rigward l-interpretazzjoni u l-implimentazzjoni tal-Artikolu 331(2) tal-Ftehim dwar il-Kummerċ u l-Kooperazzjoni.

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni fil-Kunsill ta’ Sħubija stabbilit mill-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, fir-rigward tal-interpretazzjoni u tal-implimentazzjoni tal-Artikolu 331(2) ta’ dak il-Ftehim, għandha tkun ibbażata fuq l-abbozz tad-deċiżjoni tal-Kunsill ta’ Sħubija mehmuż ma’ din id-Deċiżjoni.

Artikolu 2

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fi Brussell,

(1)    Id-Deċiżjoni tal-Kunsill (UE) 2021/689 tad-29 ta’ April 2021 dwar il-konklużjoni, f’isem l-Unjoni, tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, u tal-Ftehim bejn l-Unjoni Ewropea u r-Renju Unit tal-Gran Brittanja u l-Irlanda ta’ Fuq dwar il-proċeduri ta’ sigurtà għall-iskambju u għall-protezzjoni ta’ informazzjoni klassifikata ( ĠU L 149, 30.4.2021, p. 2 ).

IL-KUMMISSJONI EWROPEA

Brussell, 28.5.2025

COM(2025) 292 final/2 DOWNGRADED ON 4.7.2025

ANNESS

tal-

Proposta għal DEĊIŻJONI TAL-KUNSILL

li tistabbilixxi l-pożizzjoni li għandha tittieħed f’isem l-Unjoni Ewropea fil-Kunsill ta’ Sħubija stabbilit mill-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, fir-rigward tad-Deċiżjoni Nru 2/2025 tal-Kunsill ta’ Sħubija

ANNESS

DEĊIŻJONI Nru 2/2025 TAL-KUNSILL TAS-SĦUBIJA STABBILIT MILL-FTEHIM DWAR IL-KUMMERĊ U L-KOOPERAZZJONI BEJN L-UNJONI EWROPEA U L-KOMUNITÀ EWROPEA TAL-ENERĠIJA ATOMIKA, MINN NAĦA WAĦDA, U R-RENJU UNIT TAL-GRAN BRITTANJA U L-IRLANDA TA’ FUQ, MIN-NAĦA L-OĦRA

ta’ [ ] 2025

li tagħti l-interpretazzjoni tal-Artikolu 331(2) u li testendi l-applikazzjoni tat-Tieni Parti, l-Ewwel Intestatura, it-Titolu VIII dwar l-enerġija, tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra

 

IL-KUNSILL TA’ SĦUBIJA,

Wara li kkunsidra l-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa, u r-Renju Unit tal-Gran Brittanja u l-Irlanda ta’ Fuq, min-naħa l-oħra (“il-Ftehim”), u b’mod partikolari l-Artikolu 519(b) u Artikolu 331(2) tiegħu,

Billi:

(1)F’konformità mal-Artikolu 331(1) tal-Ftehim dwar il-Kummerċ u l-Kooperazzjoni, it-Tieni Parti, l-Ewwel Intestatura, it-Titolu VIII ta’ dak il-Ftehim (“it-Titolu VIII”) għandu jieqaf japplika fit-30 ta’ Ġunju 2026.

(2)F’konformità mal-Artikolu 331(2) tal-Ftehim, bejn l-1 ta’ Lulju 2026 u l-31 ta’ Diċembru 2026, il-Kunsill ta’ Sħubija jista’ jiddeċiedi li jestendi l-applikazzjoni tat-Titolu VIII sal-31 ta’ Marzu 2027.

(3)Sitwazzjoni fejn il-Kunsill ta’ Sħubija jista’ jadotta deċiżjoni dwar l-estensjoni tal-applikazzjoni tat-Titolu VIII ladarba t-Titolu VIII ma jkunx baqa’ japplika biss, u li tista’ twassal għal interruzzjoni fl-applikazzjoni tat-Titolu VIII u b’hekk għal inċertezza fir-rigward tal-qafas legali applikabbli għall-kummerċ u għall-investiment bejn l-Unjoni Ewropea u r-Renju Unit fl-oqsma tal-enerġija u tal-materja prima.

(4)Għalhekk, biex jiġu pprovduti ċ-ċertezza legali u l-prevedibbiltà, huwa xieraq li tiġi adottata deċiżjoni li tinterpreta l-Artikolu 331(2) tal-Ftehim fis-sens li deċiżjoni tal-Kunsill ta’ Sħubija dwar l-estensjoni tal-applikazzjoni tat-Titolu VIII sal-31 ta’ Marzu 2027 tista’ tiġi adottata qabel l-1 ta’ Lulju 2026, dment li tidħol fis-seħħ mill-1 ta’ Lulju 2026 biss.

(5)L-objettivi tat-Titolu VIII huma li jiffaċilitaw il-kummerċ u l-investiment bejn l-Unjoni Ewropea u r-Renju Unit fis-setturi tal-enerġija u tal-materja prima, u li jappoġġaw is-sigurtà tal-provvista u tas-sostenibbiltà ambjentali, b’mod partikolari billi jikkontribwixxu għall-ġlieda kontra t-tibdil fil-klima f’dawk l-oqsma.

(6)Biex jintlaħqu l-objettivi tat-Titolu VIII huwa xieraq, kemm għall-Unjoni Ewropea u kemm għar-Renju Unit, li jkomplu bil-kooperazzjoni ta’ bejniethom dwar l-enerġija permezz tal-applikazzjoni tat-Titolu VIII.

(7)Il-partijiet ikkonċernati fl-enerġija jenħtieġ li jkollhom qafas legali stabbli u prevedibbli biex ikomplu b’din il-kooperazzjoni li tiffaċilita n-negozju u tiżgura l-istabbiltà tas-suq.

(8)Għalhekk huwa xieraq li tiġi adottata deċiżjoni dwar l-applikazzjoni tat-Titolu VIII sal-31 ta’ Marzu 2027.

 

ADOTTA DIN ID-DEĊIŻJONI:

Artikolu 1

L-Artikolu 331(2) tal-Ftehim dwar il-Kummerċ u l-Kooperazzjoni għandu jiġi interpretat fis-sens li deċiżjoni dwar l-estensjoni tal-applikazzjoni tat-Tieni Parti, l-Ewwel Intestatura, it-Titolu VIII tal-Ftehim dwar il-Kummerċ u l-Kooperazzjoni, sal-31 ta’ Marzu 2027 tista’ tiġi adottata qabel l-1 ta’ Lulju 2026, dment li tidħol fis-seħħ mill-1 ta’ Lulju 2026 biss.

Artikolu 2

L-applikazzjoni tat-Tieni Parti, l-Ewwel Intestatura, it-Titolu VIII tal-Ftehim dwar il-Kummerċ u l-Kooperazzjoni għandha tiġi estiża sal-31 ta’ Marzu 2027.

Artikolu 3

Din id-Deċiżjoni għandha tidħol fis-seħħ fil-jum tal-adozzjoni tagħha.

L-Artikolu 2 għandu jidħol fis-seħħ fl-1 ta’ Lulju 2026.

Magħmul fi Brussell u Londra, [ ] 2025.

Għall-Kunsill ta’ Sħubija

Il-Kopresidenti

Maroš ŠEFČOVIČ

Nick THOMAS-SYMONDS