IL-KUMMISSJONI EWROPEA
Brussell, 4.6.2025
COM(2025) 269 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u s-Seychelles
{SWD(2025) 136 final} - {SWD(2025) 137 final}
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Il-Kummissjoni tipproponi li jiġi nnegozjat Protokoll ta’ Implimentazzjoni ġdid tal-Ftehim ta’ Sħubija dwar is-Sajd Sostenibbli mas-Seychelles, li jkun jissodisfa l-ħtiġijiet tal-flotta tal-Unjoni u li jkun f’konformità mal-Artikoli 28, 31 u 32 tar-Regolament (UE) Nru 1380/2013 dwar il-Politika Komuni tas-Sajd (il-PKS) 1 u mal-Konklużjonijiet tal-Kunsill tad-19 ta’ Marzu 2012 dwar Komunikazzjoni tal-Kummissjoni dwar id-Dimensjoni Esterna tal-Politika Komuni tas-Sajd.
•Konsistenza mad-dispożizzjonijiet eżistenti fil-qasam ta’ politika kkonċernat
Il-Ftehim ta’ Sħubija dwar is-Sajd Sostenibbli (SFPA, Sustainable Fisheries Partnership Agreement) attwali bejn l-Unjoni Ewropea u s-Seychelles 2 daħal fis-seħħ fl-24 ta’ Frar 2020 għal perjodu ta’ 6 snin, u jiġġedded b’mod taċitu għal perjodi addizzjonali ta’ 6 snin. Il-Protokoll ta’ Implimentazzjoni attwali 3 ta’ 6 snin beda japplika fl-24 ta’ Frar 2020 u se jiskadi fit-23 ta’ Frar 2026. Dan il-Protokoll jistabbilixxi l-opportunitajiet tas-sajd tal-flotta tal-Unjoni u l-kontribuzzjonijiet finanzjarji korrispondenti li l-Unjoni u s-sidien tal-bastimenti jridu jħallsu. Huwa b’dan irrakkomandat li jiġi nnegozjat Protokoll ta’ Implimentazzjoni ġdid tal-Ftehim ta’ Sħubija dwar is-Sajd Sostenibbli attwali mas-Seychelles.
Il-kontribuzzjoni finanzjarja pubblika annwali tal-Unjoni dovuta lis-Seychelles tammonta għal EUR 2 500 000 għall-aċċess, flimkien ma’ ammont speċifiku ta’ EUR 2 800 000 allokat għall-appoġġ settorjali għall-politika tas-sajd tas-Seychelles.
Il-Protokoll mas-Seychelles jipprevedi opportunitajiet tas-sajd għas-sajd għat-tonn u għall-ispeċijiet tal-ħut li jpassi ħafna għall-bastimenti tal-Unjoni minn 4 Stati Membri (Spanja, Franza, l-Italja u l-Portugall). L-Unjoni Ewropea diġà żviluppat network ta’ Ftehimiet bilaterali ta’ Sħubija dwar is-Sajd Sostenibbli fl-Oċean Indjan, jiġifieri ma’ Mauritius u ma’ Madagascar.
Il-Ftehimiet ta’ Sħubija dwar is-Sajd Sostenibbli jikkontribwixxu għall-promozzjoni tal-objettivi tal-PKS fil-livell internazzjonali u jiżguraw li l-attivitajiet tas-sajd tal-Unjoni ’l barra mill-ilmijiet tagħha jissejsu fuq l-istess prinċipji u l-istess standards li japplikaw skont id-dritt tal-Unjoni. Barra minn hekk, il-Ftehimiet ta’ Sħubija dwar is-Sajd Sostenibbli jrawmu l-kooperazzjoni xjentifika bejn l-UE u s-sħab tagħha, jippromwovu t-trasparenza u s-sostenibbiltà sabiex ir-riżorsi tas-sajd jiġu ġestiti aħjar u jinkoraġġixxu l-governanza billi jappoġġaw il-monitoraġġ, il-kontroll u s-sorveljanza tal-attivitajiet tal-flotot nazzjonali u barranin u billi jipprovdu l-fondi biex jiġi miġġieled is-sajd illegali, mhux irrappurtat u mhux irregolat (is-sajd IUU) u biex jingħata kontribut għall-iżvilupp sostenibbli tal-industrija tas-sajd lokali. Il-ftehimiet ta’ sħubija dwar is-sajd sostenibbli jikkomplementaw strumenti oħra tal-Unjoni, inkluż l-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali (NDICI, Neighbourhood, Development and International Cooperation Instrument), fit-tisħiħ tal-kapaċitajiet nazzjonali u reġjonali fil-qasam tal-ġestjoni tas-sajd. Il-ftehimiet ta’ sħubija dwar is-sajd sostenibbli jsaħħu l-pożizzjoni tal-Unjoni fost l-organizzazzjonijiet internazzjonali u reġjonali tas-sajd: fil-każ tas-Seychelles, b’mod partikolari fil-Kummissjoni għat-Tonn tal-Oċean Indjan (IOTC, Indian Ocean Tuna Commission).
•Konsistenza ma’ politiki oħra tal-Unjoni
In-negozjar ta’ Protokoll ta’ Implimentazzjoni ġdid mas-Seychelles huwa konformi mal-azzjoni esterna tal-Unjoni b’rabta mal-pajjiżi Afrikani, tal-Karibew u tal-Paċifiku (il-pajjiżi AKP) u, b’mod partikolari, mal-objettivi tal-Unjoni f’dak li għandu x’jaqsam mal-ħarsien tal-prinċipji demokratiċi u tad-drittijiet tal-bniedem.
2.BAŻI LEGALI, SUSSIDJARJETÀ U PROPORZJONALITÀ
•Bażi legali
Il-bażi legali proċedurali għad-deċiżjoni jipprovdiha l-Artikolu 218 tat-Trattat dwar il-Funzjonament tal-Unjoni Ewropea (it-TFUE), fil-Parti Ħamsa dwar l-azzjoni esterna tal-Unjoni, fit-Titolu V dwar il-ftehimiet internazzjonali, li jistabbilixxi l-proċedura għan-negozjar u għall-konklużjoni ta’ ftehimiet bejn l-Unjoni u pajjiżi terzi. Il-bażi legali sostantiva hija l-Artikolu 43(2) tat-TFUE b’rabta mal-politika komuni dwar is-sajd.
•Sussidjarjetà (għall-kompetenza mhux esklużiva)
Ma tapplikax, kompetenza esklużiva.
•Proporzjonalità
Id-deċiżjoni hija proporzjonali mal-objettiv li jiġi stabbilit qafas ta’ governanza legali, ambjentali, ekonomika u soċjali għall-attivitajiet tas-sajd imwettqa mill-bastimenti tal-Unjoni fl-ilmijiet tal-pajjiżi terzi, f’konformità mal-Artikolu 31 tar-Regolament (UE) Nru 1380/2013 li jistabbilixxi l-Politika Komuni tas-Sajd.
•Għażla tal-istrument
L-istrument huwa previst fl-Artikolu 218(3) tat-TFUE.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Fl-2024, il-Kummissjoni wettqet evalwazzjoni ex post tal-protokoll attwali tal-Ftehim ta’ Sħubija dwar is-Sajd Sostenibbli mas-Seychelles, kif ukoll evalwazzjoni ex ante tat-tiġdid potenzjali tal-protokoll. Il-konklużjonijiet tal-evalwazzjoni huma mogħtija b’mod separat f’Dokument ta’ Ħidma tal-Persunal tal-Kummissjoni.
Mill-evalwazzjoni ħareġ li s-setturi tas-sajd tal-Unjoni huma interessati ferm fis-sajd fis-Seychelles u li huwa fl-interess taż-żewġ Partijiet li jiġġedded il-Protokoll. Barra minn hekk, it-tiġdid tal-Protokoll se jgħin biex jissaħħu l-monitoraġġ, il-kontroll u s-sorveljanza u se jikkontribwixxi għat-titjib tal-governanza tas-sajd fir-reġjun.
Għall-Unjoni, huwa importanti li jinżamm strument li jippermetti kooperazzjoni settorjali profonda mas-Seychelles, li huwa attur strateġiku fil-livell subreġjonali minħabba ż-żona tas-sajd taħt il-ġuriżdizzjoni tiegħu u alleat importanti fil-qafas tal-IOTC. Barra minn hekk, għall-flotta tal-Unjoni dan ifisser li jinżamm l-aċċess għal żona tas-sajd importanti fejn ikunu jistgħu jintużaw strateġiji tal-qbid skont qafas legali internazzjonali pluriennali. Barra minn hekk, l-importanza tas-Seychelles f’termini tal-ipproċessar tat-tonn maqbud fl-Oċean Indjan u l-esportazzjonijiet ta’ prodotti tat-tonn lejn l-Unjoni tikkontribwixxi għar-rilevanza tal-Protokoll il-ġdid previst, kemm għall-industrija tas-sajd tal-Unjoni kif ukoll għall-pajjiż sieħeb. Għall-awtoritajiet tas-Seychelles, l-għan hu li jkomplu jżommu relazzjonijiet mal-Unjoni anke għat-tisħiħ tal-governanza tal-oċeani, u biex jibbenefikaw mill-appoġġ settorjali speċifiku li jipprevedi opportunitajiet ta’ finanzjament pluriennali.
•Konsultazzjonijiet mal-partijiet ikkonċernati
Bħala parti mill-evalwazzjoni ġew ikkonsultati l-Istati Membri, ir-rappreżentanti tal-industrija, l-organizzazzjonijiet internazzjonali tas-soċjetà ċivili, u l-amministrazzjoni tas-sajd u s-soċjetà ċivili tas-Seychelles. Saru wkoll konsultazzjonijiet fil-qafas tal-laqgħat tal-Kunsill Konsultattiv għall-Flotta ta’ Distanzi Twal.
•Ġbir u użu tal-għarfien espert
Mhux applikabbli
•Valutazzjoni tal-impatt
Mhux applikabbli
•Idoneità regolatorja u simplifikazzjoni
Mhux applikabbli
•Drittijiet fundamentali
Id-direttivi ta’ negozjati, proposti fl-Anness ta’ din id-Deċiżjoni, jirrakkomandaw li jiġi awtorizzat il-ftuħ tan-negozjati u li tiddaħħal klawżola dwar il-konsegwenzi li jkun hemm f’każ li jinkisru d-drittijiet tal-bniedem u l-prinċipji demokratiċi.
4.IMPLIKAZZJONIJIET BAĠITARJI
L-implikazzjonijiet baġitarji ta’ Protokoll ġdid jinkludu l-ħlas ta’ kontribuzzjoni finanzjarja lis-Seychelles. Jeħtieġ li l-allokazzjonijiet baġitarji korrispondenti għall-approprjazzjonijiet ta’ impenn u ta’ pagament jiddaħħlu kull sena fil-linja baġitarja għall-Ftehimiet ta’ Sħubija dwar is-Sajd Sostenibbli (11 03 01) u li dawn l-allokazzjonijiet ikunu kompatibbli mal-ipprogrammar finanzjarju tal-Qafas Finanzjarju Pluriennali 4 għall-2022–2027. L-ammonti annwali għall-impenji u għall-pagamenti huma stabbiliti fil-proċedura baġitarja annwali, inkluża l-linja ta’ riżerva għall-protokolli li ma daħlux fis-seħħ fil-bidu tas-sena. 5
5.ELEMENTI OĦRA
•Pjanijiet ta’ implimentazzjoni u arranġamenti għall-monitoraġġ, l-evalwazzjoni u r-rapportar
In-negozjati huma mistennija li jinfetħu fil-bidu tal-aħħar kwart tal-2025.
•Spjegazzjoni fid-dettall tad-dispożizzjonijiet speċifiċi tal-proposta
Il-Kummissjoni tirrakkomanda li:
— il-Kunsill jawtorizza lill-Kummissjoni tiftaħ u twettaq negozjati għall-konklużjoni ta’ Protokoll ta’ Implimentazzjoni ġdid tal-Ftehim ta’ Sħubija dwar is-Sajd Sostenibbli mas-Seychelles;
— il-Kummissjoni tinħatar bħala n-negozjatur tal-UE f’dan il-qasam;
— il-Kummissjoni twettaq in-negozjati b’konsultazzjoni mal-kumitat speċjali, kif stabbilit fit-Trattat dwar il-Funzjonament tal-Unjoni Ewropea;
— il-Kunsill japprova d-direttivi ta’ negozjati annessi ma’ din ir-Rakkomandazzjoni.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u s-Seychelles
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(2), flimkien mal-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi jenħtieġ li jinfetħu n-negozjati bil-għan li jiġi konkluż Protokoll ta’ Implimentazzjoni ġdid tal-Ftehim ta’ Sħubija dwar is-Sajd Sostenibbli mas-Seychelles,
ADOTTA DIN ID-DEĊIŻJONI:
Artikolu 1
B’dan, il-Kummissjoni qed tiġi awtorizzata tinnegozja, f’isem l-Unjoni, Protokoll ta’ Implimentazzjoni ġdid tal-Ftehim ta’ Sħubija dwar is-Sajd Sostenibbli mas-Seychelles.
Artikolu 2
Id-direttivi ta’ negozjati huma stabbiliti fl-Anness.
Artikolu 3
In-negozjati għandhom isiru b’konsultazzjoni mal-Grupp ta’ Ħidma tal-Kunsill dwar il-Politika Esterna tas-Sajd.
Artikolu 4
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 4.6.2025
COM(2025) 269 final
ANNESS
ta’
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u s-Seychelles
{SWD(2025) 136 final} - {SWD(2025) 137 final}
ANNESS
Direttivi ta’ negozjati
–L-objettiv tan-negozjati huwa l-konklużjoni ta’ protokoll ta’ implimentazzjoni ġdid tal-Ftehim ta’ Sħubija dwar is-Sajd Sostenibbli bejn l-Unjoni Ewropea u s-Seychelles f’konformità mal-Artikoli 28, 31 u 32 tar-Regolament (UE) Nru 1380/2013 dwar il-Politika Komuni tas-Sajd 1 u mal-Konklużjonijiet tal-Kunsill tad-19 ta’ Marzu 2012 dwar Komunikazzjoni tal-Kummissjoni tat-13 ta’ Lulju 2011 dwar id-Dimensjoni Esterna tal-Politika Komuni tas-Sajd.
–Jenħtieġ li l-protokoll ta’ implimentazzjoni jiddefinixxi l-qafas ġenerali tal-attivitajiet tas-sajd tal-bastimenti tal-Unjoni fl-ilmijiet tas-Seychelles kif ukoll il-modalitajiet tal-kooperazzjoni mas-Seychelles fil-qasam tas-sajd;
–Sabiex tippromwovi s-sajd sostenibbli u responsabbli, filwaqt li tiżgura, permezz ta’ li dan il-protokoll ta’ implimentazzjoni, benefiċċji reċiproċi kemm għall-Unjoni u kemm għas-Seychelles, jenħtieġ li l-Kummissjoni ssejjes l-objettivi ta’ negozjar tagħha fuq dan li ġej:
·Jiġu żgurati l-aċċess għall-bastimenti tal-flotta tal-Unjoni għaż-żona tas-sajd tas-Seychelles u l-awtorizzazzjonijiet li dawn il-bastimenti jeħtieġu biex jistadu f’dik iż-żona u, b’hekk, jiġi żviluppat, fost l-oħrajn, in-network ta’ Ftehimiet ta’ Sħubija dwar is-Sajd Sostenibbli li l-operaturi tal-Unjoni għandhom għad-dispożizzjoni tagħhom fl-Oċean Indjan;
·Jitqiesu l-aqwa parir xjentifiku disponibbli u l-pjanijiet ta’ ġestjoni rilevanti adottati mill-Organizzazzjonijiet Reġjonali tal-Ġestjoni tas-Sajd (RFMO, Regional Fisheries Management Organisations), sabiex tiġi żgurata s-sostenibbiltà ambjentali tal-attivitajiet tas-sajd u tiġi promossa l-governanza tal-oċeani fil-livell internazzjonali. Jenħtieġ li l-attivitajiet tas-sajd jimmiraw esklużivament ir-riżorsi disponibbli, filwaqt li titqies il-kapaċità tas-sajd tal-flotta lokali, u filwaqt li titqies b’mod speċjali n-natura migratorja ħafna tal-istokkijiet ikkonċernati;
·Ikun imfittex li jinkiseb sehem xieraq mir-riżorsi tas-sajd li jikkkorrispondi għalkollox mal-interessi tal-flotot tal-Unjoni, f’każ li jkun hemm flotot barranin oħrajn interessati f’dawn ir-riżorsi wkoll, kif ukoll li jiġu applikati l-istess kundizzjonijiet tekniċi għall-flotot barranin kollha;
·Jiġi żgurat li l-aċċess għas-sajd jissejjes fuq l-attività storika tal-flotta tal-Unjoni f’dan ir-reġjun u l-attività li din mistennija jkollha fih fil-ġejjieni, fid-dawl tal-aqwa valutazzjonijiet xjentifiċi disponibbli u l-aktar aġġornati u tal-interessi tar-reġjuni ultraperiferiċi tal-Unjoni;
·Jitwaqqaf djalogu biex tissaħħaħ il-politika settorjali bil-ħsieb li titħeġġeġ l-implimentazzjoni ta’ politika tas-sajd responsabbli, b’rabta mal-objettivi tal-iżvilupp tas-Seychelles, partikolarment fir-rigward tal-governanza tas-sajd, tal-ġlieda kontra s-sajd illegali, mhux irrappurtat u mhux irregolat, tal-kontroll, il-monitoraġġ u s-sorveljanza tal-attivitajiet tas-sajd u tal-għoti tal-pariri xjentifiċi, id-drittijiet tax-xogħol tas-sajjieda u t-trawwim tal-attività ekonomika; Dawn l-isforzi se jikkomplementaw strumenti oħra tal-Unjoni, inkluż l-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali (NDICI), u jiddependu fuq opportunitajiet eżistenti bħat-taħriġ offrut miċ-Ċentru Konġunt tar-Riċerka (JRC);
·Jiġi żgurat li l-Protokoll se jikkontribwixxi għall-promozzjoni tat-tkabbir sostenibbli u ta’ xogħol deċenti b’rabta mal-attivitajiet tas-sajd, filwaqt li jitqiesu l-Konvenzjonijiet rilevanti tal-Organizzazzjoni Internazzjonali tax-Xogħol (ILO, International Labour Organisation); B’mod partikolari, il-klawżola soċjali jenħtieġ li tindika li l-kundizzjonijiet tal-impjieg u tax-xogħol tas-sajjieda abbord il-bastimenti tal-UE ma għandhomx ikunu f’kontradizzjoni mal-istrumenti applikabbli għas-sajjieda tal-Organizzazzjoni Internazzjonali tax-xogħol (ILO) u tal-Organizzazzjoni Marittima Internazzjonali (IMO), b’mod partikolari d-Dikjarazzjoni tal-ILO dwar il-prinċipji u d-Drittijiet Fundamentali fuq ix-xogħol (1998), kif emendata fl-2022, u l-Konvenzjoni Nru 188 tal-ILO dwar ix-xogħol tas-sajd.
·Jiġi promoss involviment xieraq tal-partijiet ikkonċernati fl-ipprogrammar u fl-implimentazzjoni ta’ attivitajiet li jirriżultaw mill-Ftehim;
·Tiddaħħal klawżola dwar il-konsegwenzi f’każ li jinkisru d-drittijiet tal-bniedem (inkluż id-drittijiet tax-xogħol) u l-prinċipji demokratiċi.
·Tiddaħħal klawżola dwar in-nondiskriminazzjoni bejn il-flotot, u dwar it-trasparenza.
–B’mod partikolari, jenħtieġ li l-protokoll jiddefinixxi dawn li ġejjin:
·l-opportunitajiet tas-sajd li l-bastimenti tal-Unjoni se jingħataw;
·il-kumpens finanzjarju u l-kundizzjonijiet biex dan jitħallas; kif ukoll
·il-mekkaniżmi għall-implimentazzjoni tal-appoġġ settorjali.