IL-KUMMISSJONI EWROPEA

Brussell, 4.6.2024

COM(2024) 220 final

2024/0123(NLE)

Proposta għal

DEĊIŻJONI TAL-KUNSILL

dwar il-kontribuzzjonijiet finanzjarji li għandhom jitħallsu mill-partijiet għall-Fond Ewropew għall-Iżvilupp bħala t-tieni pagament parzjali għall-2024

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Il-11-il FEŻ u fondi oħra tal-FEŻ li għadhom miftuħin (id-9 u l-10 FEŻ) huma ġestiti skont il-ġabra ta’ regoli li ġejja:

(a)Il-Ftehim Intern bejn ir-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fi ħdan il-Kunsill, dwar l-iffinanzjar ta’ għajnuna mill-Unjoni Ewropea taħt il-Qafas Finanzjarju Pluriennali għall-perjodu mill-2014 sal-2020, f’konformità mal-Ftehim ta’ Sħubija AKP-UE, u dwar l-allokazzjoni ta’ assistenza finanzjarja għall-Pajjiżi u t-Territorji Extra-Ewropej li għalihom tapplika r-Raba’ Parti tat-Trattat dwar il-Funzjonament tal-Unjoni Ewropea 1 (il-“Ftehim Intern” tal-11-il FEŻ);

(b)Ir-Regolament tal-Kunsill (UE) 2018/1877 dwar ir-Regolament Finanzjarju applikabbli għall-11-il Fond Ewropew għall-Iżvilupp 2 (“ir-Regolament Finanzjarju tal-11-il FEŻ”).

(c)Id-Deċiżjoni tal-Kunsill (UE) 2020/2233 dwar l-impenn tal-fondi li jirriżultaw mir-rimborżi taħt il-Faċilità ta’ Investiment tal-AKP minn operazzjonijiet taħt id-9, l-10 u l-11-il Fond Ewropew għall-Iżvilupp 3 ;

(d)Id-Deċiżjoni tal-Kunsill (UE) 2022/1223 4 dwar l-allokazzjoni ta’ fondi diżimpenjati minn proġetti taħt l-10 u l-11-il Fond Ewropew għall-Iżvilupp bil-għan li jiġu ffinanzjati azzjonijiet li jindirizzaw il-kriżi tas-sigurtà tal-ikel u x-xokk ekonomiku fil-pajjiżi Afrikani, tal-Karibew u tal-Paċifiku (AKP) wara l-gwerra ta’ aggressjoni tar-Russja kontra l-Ukrajna.

Id-dokumenti msemmija fil-punti minn (a) sa (d) fihom l-impenji pluriennali mill-partijiet biex jappoġġaw f’livell finanzjarju lit-teżor tal-FEŻ. Ir-Regolament Finanzjarju tal-11-il FEŻ jipprevedi li jsiru kontribuzzjonijiet regolari mill-partijiet lit-teżor tal-FEŻ skont impenji finanzjarji determinati minn qabel. Il-kontribuzzjonijiet regolari jiskattaw minn Deċiżjonijiet tekniċi tal-Kunsill li jirriflettu l-implimentazzjoni ta’ impenji finanzjarji deċiżi minn qabel.

2.BAŻI LEGALI, SUSSIDJARJETÀ U PROPORZJONALITÀ

•Bażi legali

F’konformità mal-Artikolu 19(3) tar-Regolament Finanzjarju tal-11-il FEŻ, il-Kunsill irid jiddeċiedi dwar din il-proposta mhux aktar tard minn 21 jum kalendarju wara li l-Kummissjoni Ewropea, li taġixxi f’isem l-Unjoni Ewropea, tippreżenta din il-proposta.    

2024/0123 (NLE)

Proposta għal

DEĊIŻJONI TAL-KUNSILL

dwar il-kontribuzzjonijiet finanzjarji li għandhom jitħallsu mill-partijiet għall-Fond Ewropew għall-Iżvilupp bħala t-tieni pagament parzjali għall-2024

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra l-Ftehim Intern bejn ir-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fi ħdan il-Kunsill, dwar l-iffinanzjar ta’ għajnuna mill-Unjoni Ewropea taħt il-qafas finanzjarju pluriennali għall-perjodu mill-2014 sal-2020, f’konformità mal-Ftehim ta’ Sħubija AKP-UE, u dwar l-allokazzjoni ta’ assistenza finanzjarja għall-Pajjiżi u t-Territorji Extra-Ewropej li għalihom tapplika r-Raba’ Parti tat-Trattat dwar il-Funzjonament tal-Unjoni Ewropea 5 u b’mod partikolari l-Artikolu 7(2) flimkien mal-Artikolu 14(3) tiegħu,

Wara li kkunsidra r-Regolament tal-Kunsill (UE) 2018/1877 6 tas-26 ta’ Novembru 2018 dwar ir-regolament finanzjarju applikabbli għall-11-il Fond Ewropew għall-Iżvilupp, u li jħassar ir-Regolament (UE) 2015/323 7 , u b’mod partikolari l-Artikolu 19(3) tiegħu,

Wara li kkunsidra l-proposta tal-Kummissjoni Ewropea,

Billi:

(1)F’konformità mal-Artikolu 46 tar-Regolament tal-Kunsill (UE) 2018/1877, il-Bank Ewropew tal-Investiment (“BEI”) għandu jibgħat lill-Kummissjoni l-istimi aġġornati tiegħu tal-impenji u tal-pagamenti taħt l-istrumenti li jimmaniġġa.

(2)F’konformità mal-Artikolu 19(3) tar-Regolament tal-Kunsill (UE) 2018/1877, il-Kummissjoni għandha tippreżenta proposta sal-15 ta’ Ġunju 2024 li tispeċifika l-ammont tat-tieni pagament parzjali tal-kontribuzzjoni għall-2024.

(3)Skont l-Artikolu 20(1) tar-Regolament tal-Kunsill (UE) 2018/1877 sejħiet għal kontribuzzjonijiet għandhom l-ewwel jużaw l-ammonti previsti fil-Fondi Ewropej għall-Iżvilupp (“FEŻ”) preċedenti. Għaldaqstant, jenħtieġ li ssir sejħa għall-fondi għall-BEI u għall-Kummissjoni skont ir-Regolament (UE) 2018/1877.

(4)Skont l-Artikolu 152 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (“il-ftehim dwar il-ħruġ”), ir-Renju Unit tal-Gran Brittanja u l-Irlanda ta’ Fuq (“ir-Renju Unit”) jibqa’ parti għall-FEŻ sal-għeluq tal-11-il FEŻ u ta’ kull FEŻ preċedenti li għadu mhux magħluq. Madankollu, skont l-Artikolu 153 tal-ftehim dwar il-ħruġ, is-sehem tar-Renju Unit f’fondi diżimpenjati minn proġetti fl-ambitu tal-11-il FEŻ, meta dawk il-fondi jkunu ġew diżimpenjati wara l-31 ta’ Diċembru 2020, jew FEŻ preċedenti, ma għandux jerġa’ jintuża.

(5)Id-Deċiżjoni tal-Kunsill (UE) 2023/2586 8 tiffissa l-ammont annwali tal-kontribuzzjoni li għandu jitħallas mill-partijiet għall-FEŻ għall-2024 għal EUR 1 200 000 000 9 għall-Kummissjoni, u għal EUR 300 000 000 għall-Bank Ewropew tal-Investiment.

(6)Sabiex il-miżuri stipulati f’din id-Deċiżjoni jkunu jistgħu jiġu applikati minnufih, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea,

ADOTTA DIN ID-DEĊIŻJONI:

Artikolu 1

L-ammont tal-kontribuzzjonijiet li għandu jitħallas mill-partijiet għall-Fond Ewropew għall-Iżvilupp bħala t-tieni pagament parzjali għall-2024 huwa b’dan stabbilit għal EUR 500 000 000. Dan għandu jinqasam f’EUR 400 000 000 għall-Kummissjoni, u f’EUR 100 000 000 għall-BEI.

Artikolu 2

Il-kontribuzzjonijiet individwali tal-Fond Ewropew għall-Iżvilupp għandhom jitħallsu mill-partijiet għall-Fond Ewropew għall-Iżvilupp lill-Kummissjoni Ewropea u lill-Bank Ewropew tal-Investiment bħala t-tieni pagament parzjali għall-2024, f’konformità mal-Anness.

Artikolu 3

Din id-Deċiżjoni għandha tidħol fis-seħħ fid-data tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Magħmul fi Brussell,

(1)    ĠU L 210, 6.8.2013, p. 1

(2)    ĠU L 307, 3.12.2018, p. 1-21

(3)    ĠU L 437, 28.12.2020, p. 188-191

(4)    ĠU L 188, 15.7.2022, p. 147

(5)    ĠU L 210, 6.8.2013, p. 1

(6)    ĠU L 307, 3.12.2018, p. 1

(7)    ĠU L 58, 3.3.2015, p.17-38

(8)    Id-DEĊIŻJONI TAL-KUNSILL (UE) 2023/2586 tat-13 ta’ Novembru 2023 dwar il-kontribuzzjonijiet finanzjarji li għandhom jitħallsu mill-partijiet għall-Fond Ewropew għall-Iżvilupp għall-finanzjament ta’ dak il-fond, li jispeċifika l-limitu massimu għall-2025, l-ammont annwali għall-2024, l-ammont tal-ewwel pagament parzjali għall-2024 u previżjoni indikattiva, mhux vinkolanti għall-ammonti annwali mistennija ta’ kontribuzzjonijiet għas-snin 2026 u 2027

(9)    Ir-Regolament tal-Kunsill (UE) 2018/1877 tas-26 ta’ Novembru 2018 dwar ir-Regolament Finanzjarju applikabbli għall-11-il Fond Ewropew għall-Iżvilupp, u li jħassar ir-Regolament (UE) 2015/323 (ĠU L 307, 3.12.2018, p. 1.), l-Artikolu 20(5): “Meta jiġi applikat mgħax negattiv għall-kont imsemmi fil-paragrafu 3 ta’ dan l-Artikolu, l-Istat Membru kkonċernat għandu, mhux aktar tard mid-data tal-ħlas ta’ kull pagament imsemmi fl-Artikolu 19, jikkredita l-kont b’ammont li jikkorrispondi għall-ammont ta’ tali mgħax negattiv applikat sal-ewwel jum tax-xahar li jiġi qabel il-ħlas tal-pagament.”

IL-KUMMISSJONI EWROPEA

Brussell, 4.6.2024

COM(2024) 220 final

ANNESS

ta’

Proposta għal

DEĊIŻJONI TAL-KUNSILL

dwar il-kontribuzzjonijiet finanzjarji li għandhom jitħallsu mill-partijiet għall-Fond Ewropew għall-Iżvilupp bħala t-tieni pagament parzjali għall-2024

ANNESS

It-tieni pagament parzjali tal-Kontribuzzjonijiet tal-FEŻ għall-2024 (f’EUR)

STATI MEMBRI U R-RENJU UNIT	Il-koeffiċjent tal-11-il FEŻ f’%	It-tieni pagament parzjali tal-2024 (EUR)		Total
		Il-Kummissjoni	Il-BEI
		Il-11-il FEŻ	Il-11-il FEŻ
IL-BELĠJU	3,24927	12 997 080	3 249 270	16 246 350
IL-BULGARIJA	0,21853	874 120	218 530	1 092 650
IĊ-ĊEKJA	0,79745	3 189 800	797 450	3 987 250
ID-DANIMARKA	1,98045	7 921 800	1 980 450	9 902 250
IL-ĠERMANJA	20,57980	82 319 200	20 579 800	102 899 000
L-ESTONJA	0,08635	345 400	86 350	431 750
L-IRLANDA	0,94006	3 760 240	940 060	4 700 300
IL-GREĊJA	1,50735	6 029 400	1 507 350	7 536 750
SPANJA	7,93248	31 729 920	7 932 480	39 662 400
FRANZA	17,81269	71 250 760	17 812 690	89 063 450
IL-KROAZJA	0,22518	900 720	225 180	1 125 900
L-ITALJA	12,53009	50 120 360	12 530 090	62 650 450
ĊIPRU	0,11162	446 480	111 620	558 100
IL-LATVJA	0,11612	464 480	116 120	580 600
IL-LITWANJA	0,18077	723 080	180 770	903 850
IL-LUSSEMBURGU	0,25509	1 020 360	255 090	1 275 450
L-UNGERIJA	0,61456	2 458 240	614 560	3 072 800
MALTA	0,03801	152 040	38 010	190 050
IN-NETHERLANDS	4,77678	19 107 120	4 776 780	23 883 900
L-AWSTRIJA	2,39757	9 590 280	2 397 570	11 987 850
IL-POLONJA	2,00734	8 029 360	2 007 340	10 036 700
IL-PORTUGALL	1,19679	4 787 160	1 196 790	5 983 950
IR-RUMANIJA	0,71815	2 872 600	718 150	3 590 750
IS-SLOVENJA	0,22452	898 080	224 520	1 122 600
IS-SLOVAKKJA	0,37616	1 504 640	376 160	1 880 800
IL-FINLANDJA	1,50909	6 036 360	1 509 090	7 545 450
L-IŻVEZJA	2,93911	11 756 440	2 939 110	14 695 550
IR-RENJU UNIT*	14,67862	58 714 480	14 678 620	73 393 100
TOTAL EU-27 U R-RENJU UNIT	100,00	400 000 000	100 000 000	500 000 000

* Abbażi tal-Artikolu 153 tal-Ftehim dwar il-Ħruġ, ir-Renju Unit talab formalment f’Marzu 2023 li l-Kummissjoni tirrimborża s-sehem pendenti tiegħu tar-riżervi tal-10 u tal-11-il FEŻ, billi tpaċi l-kontribuzzjoni pendenti tar-Renju Unit. Din it-tpaċija se tkun riflessa fl-istruzzjonijiet ta’ pagament rispettivi.