IL-KUMMISSJONI EWROPEA
Brussell, 27.5.2024
COM(2024) 215 final
2024/0118(NLE)
Proposta għal
DEĊIŻJONI TAL-KUNSILL
li temenda d-Deċiżjoni tal-Kunsill (UE) 2023/133 li taħtar il-membri tal-bord tal-għażla previst fl-Artikolu 14(3) tar-Regolament (UE) 2017/1939
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Ir-Regolament tal-Kunsill (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) ġie adottat fit-12 ta’ Ottubru 2017 u daħal fis-seħħ fl-20 ta’ Novembru 2017 1 . L-UPPE assuma l-kompiti ta’ investigazzjoni u ta’ prosekuzzjoni mogħtija lilu b’dan ir-Regolament fl-1 ta’ Ġunju 2021. L-UPPE huwa responsabbli għall-investigazzjoni, il-prosekuzzjoni u t-tressiq għall-ġustizzja tal-awturi u l-kompliċi ta’ reati kriminali li jaffettwaw l-interessi finanzjarji tal-Unjoni li huma previsti fid-Direttiva (UE) 2017/1371 2 , kif implimentati fil-liġi nazzjonali u ddeterminati bir-Regolament (UE) 2017/1939.
F’konformità mal-Artikolu 8 tar-Regolament (UE) 2017/1939, l-UPPE huwa organizzat f’livell ċentrali u deċentralizzat. Il-Kap Prosekutur Ewropew u l-Prosekuturi Ewropej — wieħed għal kull Stat Membru li jipparteċipa fil-kooperazzjoni msaħħa dwar l-istabbiliment tal-UPPE — huma parti mil-livell ċentrali tal-UPPE u jifformaw il-Kulleġġ tal-UPPE. Il-Parlament Ewropew u l-Kunsill ħatru bi qbil komuni l-ewwel Kap Prosekutur Ewropew f’Ottubru 2019 3 . Il-Kunsill ħatar l-ewwel 22 Prosekuturi Ewropej tal-UPPE f’Lulju 2020.
Il-mandat tal-Kap Prosekutur Ewropew huwa ta’ 7 snin u ma jiġġeddidx (l-Artikolu 14(1) tar-Regolament (UE) 2017/1939). Il-mandat tal-Prosekuturi Ewropej huwa ta’ 6 snin u l-Kunsill jista’ jiddeċiedi li jestendih għal massimu ta’ 3 snin (l-Artikolu 16(3) tar-Regolament (UE) 2017/1939). L-Artikolu 16(4) tar-Regolament (UE) 2017/1939 jipprevedi li kull 3 snin jenħtieġ li jkun hemm sostituzzjoni parzjali ta’ terz mill-Prosekuturi Ewropej u jirrikjedi li l-Kunsill jadotta regoli tranżizzjonali għall-ħatra tal-Prosekuturi Ewropej għall-ewwel perjodu tal-mandat u matulu. Abbażi ta’ dan, il-Kunsill adotta d-Deċiżjoni ta’ Implimentazzjoni tal-Kunsill (UE) 2019/598 tad-9 ta’ April 2019, li tipprevedi li l-mandat tal-Prosekuturi Ewropej minn tmien Stati Membri, iddeterminat bix-xorti, jenħtieġ li jkun ta’ 3 snin u jenħtieġ li ma jiġġeddidx. Il-mandat ta’ dawn il-Prosekuturi Ewropej għalhekk skada f’Lulju 2023.
L-Artikolu 14(3) tar-Regolament (UE) 2017/1939 jipprevedi li għażla tal-Kap Prosekutur Ewropew jenħtieġ li tkun imsejsa fuq sejħa miftuħa għal kandidati, li għandha tiġi ppubblikata fi Il-Ġurnal Uffiċjali tal-Unjoni Ewropea, li minnha bord tal-għażla jenħtieġ li jħejji lista ristretta ta’ kandidati kwalifikati li għandha tiġi ppreżentata lill-Parlament Ewropew u lill-Kunsill. L-Artikolu 16(2) tar-Regolament (UE) 2017/1939 jipprevedi li jenħtieġ li l-Kunsill jagħżel u jaħtar wieħed mill-kandidati nnominati mill-Istati Membri għall-kariga ta’ Prosekuturi Ewropej wara li jkun irċieva l-opinjoni motivata tal-bord tal-għażla msemmi fl-Artikolu 14(3) tal-istess Regolament.
F’konformità mad-dispożizzjoni tal-aħħar, il-bord tal-għażla jenħtieġ li jkun magħmul minn 12-il persuna, li għandhom jinħatru mill-Kunsill fuq proposta tal-Kummissjoni, magħżula minn fost eks membri tal-Qorti tal-Ġustizzja u tal-Qorti tal-Awdituri, eks membri nazzjonali tal-Eurojust, membri tal-qrati supremi nazzjonali, prosekuturi ta’ livell għoli u avukati ta’ kompetenza rikonoxxuta. Waħda mill-persuni magħżula jenħtieġ li tiġi proposta mill-Parlament Ewropew.
It-12-il membru tal-ewwel bord tal-għażla nħatru mill-Kunsill, fuq proposta mill-Kummissjoni, f’Ottubru 2018 4 , filwaqt li t-12-il membru tal-bord tal-għażla attwali nħatru f’Jannar 2023 għal perjodu ta’ 4 snin mill-20 ta’ Jannar 2023 5 . Is-Sur Marin Mrčela, imħallef tal-Qorti Suprema tar-Repubblika tal-Kroazja, kien wieħed mill-membri tal-bord tal-għażla maħtur f’Jannar 2023. Fit-8 ta’ April 2024, is-Sur Mrčela informa lill-Kummissjoni Ewropea li ma setax jibqa’ jservi bħala membru tal-bord tal-għażla u għalhekk iddeċieda li jirriżenja. Il-Kunsill ġie informat dwar dan.
Sabiex tiġi żgurata l-kontinwità tal-bord tal-għażla, jenħtieġ li s-Sur Mrčela jiġi sostitwit. F’konformità mar-regoli ta’ ħidma tal-bord tal-għażla 6 , jenħtieġ li s-sostitut tiegħu jinħatar għall-bqija tal-mandat tas-Sur Mrčela (jiġifieri, sal-20 ta’ Jannar 2027). B’din il-proposta, il-Kummissjoni għalhekk tipproponi lill-Kunsill biex jaħtar lis-Sur Dražen Jelenić, Viċi Avukat Ġenerali tal-Istat tar-Repubblika tal-Kroazja, bħala membru tal-bord tal-għażla li jissostitwixxi lis-Sur Mrčela. Is-Sur Dražen Jelenić jissodisfa r-rekwiżiti stabbiliti fl-Artikolu 14(3) tar-Regolament (UE) 2017/1939. Meta pproponiet il-ħatra tiegħu, il-Kummissjoni qieset il-ħtieġa li jiġi żgurat bilanċ f’termini ta’ distribuzzjoni ġeografika, ġeneru u għarfien tas-sistemi legali tal-Istati Membri li jipparteċipaw fl-UPPE.
•Konsistenza mad-dispożizzjonijiet eżistenti fil-qasam ta’ politika
L-UPPE ġie stabbilit permezz tar-Regolament (UE) 2017/1939, li ġie adottat abbażi tal-Artikolu 86 TFUE. L-UPPE ilu jeżerċita l-funzjonijiet mogħtija lilu mir-Regolament (UE) 2017/1939 mill-1 ta’ Ġunju 2021. Billi tippreżenta din il-proposta għal Deċiżjoni tal-Kunsill dwar is-sostituzzjoni ta’ wieħed mill-membri attwali tal-bord tal-għażla, il-Kummissjoni qed tikkonforma mal-obbligu tagħha skont l-Artikolu 14(3) tar-Regolament (UE) 2017/1939. Din il-proposta tippermetti s-sostituzzjoni ta’ membru tal-bord tal-għażla attwali, li l-mandat tiegħu għandu jiskadi fl-20 ta’ Jannar 2027. Il-funzjonament sħiħ tal-bord tal-għażla huwa importanti biex tkun tista’ ssir l-finalizzazzjoni ordnata tal-proċeduri biex jintgħażel u jinħatar il-Prosekutur Ewropew mill-Polonja 7 kif ukoll il-Prosekuturi Ewropej li se jkollhom jiġu sostitwiti fl-2026 u l-Kap Prosekutur Ewropew il-ġdid, li se jkollu jinħatar ukoll fl-2026.
•Konsistenza ma’ politiki oħra tal-Unjoni
Din il-proposta hija konsistenti ma’ politiki oħra tal-Unjoni li għandhom l-għan li jsaħħu l-protezzjoni tal-interessi finanzjarji tal-Unjoni.
2.BAŻI LEGALI, SUSSIDJARJETÀ U PROPORZJONALITÀ
•Bażi legali
Il-proposta hija bbażata fuq l-Artikolu 14(3) tar-Regolament (UE) 2017/1939.
•Sussidjarjetà (għall-kompetenza mhux esklużiva)
Il-ħatra ta’ membri tal-bord tal-għażla prevista fl-Artikolu 14(3) tar-Regolament (UE) 2017/1939 tista’ tiġi deċiża biss mill-Kunsill, abbażi ta’ proposta tal-Kummissjoni, u għalhekk hija kompetenza esklużiva min-natura tagħha, li mhijiex soġġetta għall-prinċipju tas-sussidjarjetà.
•Proporzjonalità
Din il-proposta hija limitata għal dak li huwa meħtieġ sabiex jinkisbu l-objettivi proposti u hija għalhekk konformi mal-prinċipju tal-proporzjonalità. Din il-proposta hija essenzjali biex jiġi żgurat li l-Kap Prosekutur Ewropew u l-Prosekuturi Ewropej ikunu jistgħu jiġu sostitwiti fi tmiem il-mandat tagħhom, u li jinħatru l-Prosekuturi Ewropej mill-Istati Membri li ssieħbu reċentement jew li dalwaqt se jissieħbu fil-kooperazzjoni msaħħa dwar l-UPPE, u b’hekk jiġu żgurati l-iskjerament sħiħ u l-kontinwità tal-attivitajiet operazzjonali tal-UPPE.
•Għażla tal-istrument
L-Artikolu 14(3) tar-Regolament (UE) 2017/1939 jipprevedi li l-Kunsill għandu jadotta deċiżjoni li taħtar il-membri tal-bord tal-għażla fuq proposta tal-Kummissjoni. Ir-Regola II tar-regoli ta’ ħidma tal-bord tal-għażla tipprevedi wkoll li persuna li għandha tissostitwixxi membru tal-bord tal-għażla jenħtieġ li tinħatar għall-bqija tal-mandat tal-predeċessur skont l-istess proċedura. L-għażla tal-istrument propost hija għalhekk meħtieġa mil-leġiżlazzjoni eżistenti dwar il-kwistjoni.
3.RIŻULTATI TAL-EVALWAZZJONIJIET EX POST, KONSULTAZZJONIJIET MAL-PARTIJIET IKKONĊERNATI VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Minħabba n-natura teknika ta’ din il-proposta u n-nuqqas ta’ diskrezzjoni fuq il-Kummissjoni, li qed tikkonforma mal-obbligu stabbilit fl-Artikolu 14(3) tar-Regolament (UE) 2017/1939, ma twettqux evalwazzjonijiet ex post, konsultazzjonijiet mal-partijiet ikkonċernati u valutazzjonijiet tal-impatt.
4.IMPLIKAZZJONIJIET BAĠITARJI
Din il-proposta ma għandha l-ebda implikazzjoni baġitarja.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Minħabba n-natura ta’ din il-miżura, ma hemm l-ebda ħtieġa għal pjanijiet ta’ implimentazzjoni u lanqas għal arranġamenti dwar il-monitoraġġ, l-evalwazzjoni u r-rapportar.
•Spjegazzjoni ddettaljata tad-dispożizzjonijiet speċifiċi tal-proposta
L-Artikolu 1 jipprevedi li s-Sur Dražen Jelenićjissostitwixxi lis-Sur Marin MRČELA bħala membru tal-bord tal-għażla previst fl-Artikolu 14(3) tar-Regolament (UE) 2017/1939.
L-Artikolu 2 jipprevedi d-dħul fis-seħħ tad-Deċiżjoni.
2024/0118 (NLE)
Proposta għal
DEĊIŻJONI TAL-KUNSILL
li temenda d-Deċiżjoni tal-Kunsill (UE) 2023/133 li taħtar il-membri tal-bord tal-għażla previst fl-Artikolu 14(3) tar-Regolament (UE) 2017/1939
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra r-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) 8 , u b’mod partikolari l-Artikolu 14(3) tiegħu,
Wara li kkunsidra l-proposta mill-Kummissjoni Ewropea,
Billi:
(1)Il-Kap Prosekutur Ewropew jinħatar bi qbil komuni tal-Parlament Ewropew u tal-Kunsill minn fost lista ristretta ta’ kandidati kwalifikati mħejjija mill-bord tal-għażla previst fl-Artikolu 14(3) tar-Regolament (UE) 2017/1939. Il-Prosekuturi Ewropej jinħatru mill-Kunsill minn fost tliet kandidati kwalifikati nnominati minn kull Stat Membru wara li jkunu rċevew opinjoni motivata minn dak il-bord tal-għażla.
(2)Il-membri attwali tal-bord tal-għażla nħatru għal perjodu ta’ 4 snin mill-20 ta’ Jannar 2023, permezz tad-Deċiżjoni tal-Kunsill (UE) 2023/133 9 .
(3)Is-Sur Marin MRČELA bħalissa huwa membru tal-bord tal-għażla. Fit-8 ta’ April 2024, is-Sur Mrčela informa lill-Kummissjoni li ma setax jibqa’ jservi bħala membru tal-bord tal-għażla u għalhekk iddeċieda li jirriżenja. Il-Kunsill ġie informat dwar dan.
(4)Jenħtieġ li jinħatar membru ġdid tal-bord tal-għażla mill-aktar fis biex jissostitwixxi lis-Sur MRČELA, sabiex tiġi żgurata l-kontinwità tal-attivitajiet tal-bord tal-għażla. Is-Sur Dražen Jelenić, Viċi Avukat Ġenerali tal-Istat tar-Repubblika tal-Kroazja, għalhekk jenħtieġ li jinħatar bħala membru ġdid tal-bord tal-għażla. Meta pproponiet lil din il-persuna, il-Kummissjoni qieset il-ħtieġa għal bilanċ ġeografiku, bilanċ bejn il-ġeneri u rappreżentanza xierqa tas-sistemi legali tal-Istati Membri li jipparteċipaw f’kooperazzjoni msaħħa dwar l-istabbiliment tal-UPPE.
(5)F’konformità mar-Regola II tar-regoli ta’ ħidma tal-bord tal-għażla stabbiliti fl-Anness tad-Deċiżjoni ta’ Implimentazzjoni tal-Kunsill (UE) 2018/1696 10 , jenħtieġ li s-Sur Jelenić jinħatar għall-bqija tal-mandat tal-predeċessur tiegħu.
(6)Għaldaqstant jenħtieġ, li d-Deċiżjoni (UE) 2023/133 tiġi emendata skont dan.
(7)Sabiex jiġi żgurat li s-Sur Jelenić ikun jista’ jassumi l-funzjonijiet tiegħu u jipparteċipa fl-attivitajiet kontinwi tal-bord tal-għażla b’mod immedjat, jenħtieġ li din id-Deċiżjoni tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea,
ADOTTA DIN ID-DEĊIŻJONI:
Artikolu 1
Fl-Artikolu 1 tad-Deċiżjoni (UE) 2023/133, l-isem “is-Sur Marin MRČELA” huwa sostitwit bl-isem “is-Sur Dražen Jelenić”.
Artikolu 2
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell,
Għall-Kunsill
Il-President