31.1.2023 |
MT |
Il-Ġurnal Uffiċjali tal-Unjoni Ewropea |
C 36/47 |
Pubblikazzjoni ta’ applikazzjoni għal emenda tal-Unjoni għall-Ispeċifikazzjoni tal-Prodott għal isem fis-settur tal-inbid skont l-Artikolu 97(3) tar-Regolament (UE) Nru 1308/2013 tal-Parlament Ewropew u tal-Kunsill.
(2023/C 36/05)
Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 98 tar-Regolament (UE) Nru 1308/2013 tal-Parlament Ewropew u tal-Kunsill (1) fi żmien xahrejn mid-data ta’ din il-pubblikazzjoni.
APPLIKAZZJONI GĦAL EMENDA TAL-UNJONI GĦALL-ISPEĊIFIKAZZJONI TAL-PRODOTT
“Monti Lessini”
PDO-IT-A0462-AM02
Data tal-applikazzjoni: 23.9.2021
1. Grupp applikant u interess leġittimu
Consorzio Tutela Vini Lessini Durello
Assoċjazzjoni volontarja għall-produzzjoni tal-inbejjed koperta mid-denominazzjoni ta’ oriġini protetta (DOP).
2. Intestatura fl-Ispeċifikazzjoni tal-Prodott affettwata mill-emenda/i
☐ |
Isem il-prodott |
☒ |
Kategorija tal-prodott tad-dwieli |
☒ |
Rabta |
☐ |
Restrizzjonijiet tal-kummerċjalizzazzjoni |
3. Deskrizzjoni u raġunijiet għall-emenda
3.1. Introduzzjoni tal-kategorija “Inbid frizzanti ta’ kwalità”
L-emenda tikkonċerna l-introduzzjoni tal-kategorija “Inbid frizzanti ta’ kwalità”, inkluż għall-verżjonijiet Riserva u Crémant.
Ir-raġuni għal din l-emenda hija sabiex tippermetti l-produzzjoni ta’ kategorija ta’ prodott tad-dwieli li storikament ġie prodott fiż-żona tad-denominazzjoni Monti Lessini. Bis-saħħa tat-tekniki vitikulturali u tal-vinifikazzjoni moderni, tista’ tiġi prodotta għal standard speċifiku u ta’ kwalità għolja, marbuta mal-oriġini ġeografika tal-inbid.
F’dan il-kuntest għandu jissemma li din il-kategorija ta’ nbid diġà kienet qiegħda ssir fiż-żona koperta mid-denominazzjoni sal-2011, iżda sussegwentement ġiet inkluża taħt id-denominazzjoni Lessini Durello mill-istess żona.
L-emenda bħalissa hija meħtieġa sabiex jiġu ssodisfati domandi produttivi u kummerċjali ġodda, filwaqt li tkompli tiġi rrispettata t-tradizzjoni.
L-għan ewlieni huwa li l-kategorija ta’ “Inbid frizzanti ta’ kwalità” li jkollha d-DOP Monti Lessini tikseb profil ogħla sabiex ikun hemm assoċjazzjoni aktar mill-qrib bejn iż-żona u dan l-inbid frizzanti li jsir mill-għeneb Durella bħala l-varjetà ewlenija. Dan l-għeneb huwa partikolarment xieraq biex isir f’inbid frizzanti, li jesprimi l-potenzjal speċifiku taż-żona tal-produzzjoni ta’ din id-DOP, bil-kundizzjonijiet tal-ħamrija u klimatiċi u t-tekniki tal-vinifikazzjoni uniċi tagħha.
L-emenda tikkonċerna t-taqsimiet li ġejjin tad-Dokument Uniku: “Kategoriji tal-prodotti tad-dwieli, “Deskrizzjoni tal-inbid/inbejjed”, “Prattiki enoloġiċi speċifiċi”, “Rendimenti massimi” u “Rabta maż-żona ġeografika”.
3.2. Inseriment tad-deskrizzjoni tal-varjetajiet ta’ dwieli awtorizzati għall-kategorija “Inbid frizzanti ta’ kwalità”
F’konformità mal-leġiżlazzjoni tal-UE u nazzjonali applikabbli, iddaħħlet id-deskrizzjoni tal-varjetà ta’ dwieli għall-kategorija tad-dielja tal-għeneb il-ġdida “Inbid frizzanti ta’ kwalità”.
B’mod partikolari huwa speċifikat li l-varjetà ewlenija hija d-Durella, li trid tammonta għal mill-inqas 85 % fil-produzzjoni ta’ din il-kategorija. Il-Garganega, il-Pinot Bianco, ix-Chardonnay u l-Pinot Nero jistgħu jintużaw bħala varjetajiet sekondarji iżda ma jridux jammontaw għal aktar minn 15 %.
Din l-emenda ma tinkludix xi bidla fid-Dokument Uniku, peress li l-varjetajiet kienu diġà ġew inklużi fit-Taqsima 7 tiegħu, minħabba li l-medda ta’ varjetajiet awtorizzati hija l-istess bħal dik għall-prodotti tad-dielja tal-għeneb Monti Lessini fil-kategorija “Inbid”.
3.3. Inseriment tar-rendimenti tal-produzzjoni u l-qawwa alkoħolika naturali skont il-volum ta’ għeneb għall-kategorija “Inbid frizzanti ta’ kwalità”
Ir-raġuni għal din l-emenda hija li skont il-leġiżlazzjoni tal-UE u nazzjonali applikabbli, iridu jiġi indikati r-rendimenti massimi ta’ għeneb għal kull ettaru u l-qawwa alkoħolika naturali skont il-volum ta’ għeneb għall-kategorija l-ġdida “Inbid frizzanti ta’ kwalità”.
Din l-emenda tikkonċerna t-taqsima dwar “Rendimenti massimi” fid-Dokument Uniku.
3.4. Inseriment tad-deroga mill-produzzjoni fiż-żona demarkata għall-kategorija “Inbid frizzanti ta’ kwalità”
Din l-emenda tikkonċerna l-inseriment tad-deroga dwar operazzjonijiet ta’ vinifikazzjoni għall-kategorija l-ġdida introdotta “Inbid frizzanti ta’ kwalità”. F’konformità mad-dritt tal-Unjoni, dawn l-operazzjoinijiet jistgħu jsiru fi kwalunkwe parti tat-territorju tal-unitajiet amministrattivi msemmija taħt it-taqsima dwar iż-“Żona ġeografika demarkata”, kif ukoll fiż-żona tal-produzzjoni demarkata madwar il-provinċji ta’ Verona u Vicenza.
Din l-emenda hija meħtieġa sabiex tippermetti li ċerti produtturi jkomplu l-operazzjonijiet tagħhom tal-produzzjoni ta’ nbid frizzanti ta’ kwalità barra ż-żona demarkata, kif spjegat hawn fuq, sabiex ikunu jistgħu jużaw azjendi ta’ partijiet terzi mgħammra bit-teknoloġiji xierqa għall-produzzjoni ta’ dan it-tip ta’ nbid, partikolarment għall-istadju tal-fermentazzjoni sekondarja.
Din l-emenda tikkonċerna t-taqsima 1.9 “Rekwiżiti addizzjonali” tad-Dokument Uniku.
3.5. Inseriment tar-regoli tal-vinifikazzjoni għall-kategorija “Inbid frizzanti ta’ kwalità”
L-emenda tikkonċerna l-inseriment tat-tekniki tal-vinifikazzjoni permessi għall-produzzjoni tal-kategorija ġdida introdotta “Inbid frizzanti ta’ kwalità”, li tinkludi l-verżjonijiet Riserva u Crémant.
Din l-emenda hija meħtieġa sabiex tispeċifika t-tekniki ewlenin tal-vinifikazzjoni involuti fil-kategorija l-ġdida “Inbid frizzanti ta’ kwalità”, inkluż għall-verżjonijiet Riserva u Crémant. Dettalji speċifiċi rigward il-metodu ta’ preparazzjoni, id-durata tal-perjodu ta’ tqaddim fil-flixkun u l-kontenut ta’ zokkor huma stabbiliti għal kull waħda minn dawn il-verżjonijiet.
Din l-emenda tikkonċerna t-taqsima “Prattiki enoloġiċi speċifiċi”.
3.6. Inseriment tad-deskrizzjoni tal-karatteristiċi analitiċi u organolettiċi tal-kategorija “Inbid frizzanti ta’ kwalità”, inkluż għall-verżjonijiet Riserva u Crémant.
L-emenda tikkonċerna l-inseriment tal-karatteristiċi tal-kategorija ġdida introdotta “Inbid frizzanti ta’ kwalità”, inkluż għall-verżjonijiet Riserva u Crémant.
Ir-raġuni għal din l-emenda hija l-ħtieġa li tiġi inkluża informazzjoni dwar il-kategorija “Inbid frizzanti ta’ kwalità” (inkluż għall-verżjonijiet Riserva u Crémant) fl-Ispeċifikazzjoni tal-Prodott, li tindika l-parametri ta’ referenza ewlenin sabiex tiġi rilaxxata għall-konsum.
Din l-emenda tikkonċerna t-taqsima: “Deskrizzjoni tal-inbid/inbejjed”.
3.7. Inseriment tad-deskrizzjoni tar-rabta mal-ambjent ġeografiku għall-kategorija “Inbid frizzanti ta’ kwalità”
L-emenda tikkonċerna l-inseriment tad-deskrizzjoni tar-rabta mal-ambjent ġeografiku għall-kategorija l-ġdida “Inbid frizzanti ta’ kwalità”, li tinkludi l-verżjonijiet Riserva u Crémant.
Ir-raġuni għal din l-emenda hija sabiex jintwera li r-rekwiżiti kwalitattivi u l-karatteristiċi speċifiċi tal-inbejjed frizzanti ta’ kwalità introdotti ġodda huma essenzjali minħabba l-ambjent ġeografiku speċifiku, li tradizzjonalment huwa xieraq għall-vitikultura, inklużi l-fatturi naturali u umani rispettivi. L-inseriment jindika kif it-tip ta’ ħamrija, l-altitudni, l-aspett u r-riżorsi umani (il-prattiki tat-tkabbir, is-sistemi tal-ġestjoni, il-ħsad manwali, is-sistemi tal-ipproċessar) jikkombinaw sabiex jiżguraw li l-prodott li jirriżulta jkun uniku u ma jkunx jista’ jiġi replikat xi mkien ieħor.
Din l-emenda tikkonċerna t-taqsima “Rabta maż-żona ġeografika” tad-Dokument Uniku.
DOKUMENT UNIKU
1. Isem tal-prodott
Monti Lessini
2. Tip ta’ indikazzjoni ġeografika
DOP - Denominazzjoni ta’ Oriġini Protetta
3. Kategoriji tal-prodotti tad-dwieli
1. |
Inbid |
5. |
Inbid frizzanti ta’ kwalità |
4. Deskrizzjoni tal-inbid/inbejjed
1. Monti Lessini Durello
DESKRIZZJONI TESTWALI KONĊIŻA
— |
kulur: isfar lewn it-tiben ta’ intensità li tvarja; |
— |
aroma: ta’ frott ħafifa u distintiva; |
— |
togħma: xott, korpuż, xott medju sa gradi li jvarjaw, b’togħma tradizzjonalment qawwija; |
— |
qawwa alkoħolika totali minima skont il-volum: 10,50 % skont il-volum |
— |
estratt minimu mingħajr zokkor: 15,0 g/l. |
Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
Karatteristiċi analitiċi ġenerali |
|
Qawwa alkoħolika totali massima (f’% tal-volum) |
|
Qawwa alkoħolika totali minima (f’% tal-volum) |
|
Aċidità totali minima |
5,5 grammi għal kull litru espressa bħala aċidu tartariku |
Aċidità volatili massima (f’milliekwivalenti għal kull litru) |
|
Total massimu ta’ diossidu tal-kubrit (f’milligrammi għal kull litru) |
|
2. Monti Lessini Bianco
DESKRIZZJONI TESTWALI KONĊIŻA
— |
kulur: isfar lewn it-tiben ta’ intensità li tvarja; |
— |
aroma: pjaċevoli, distintiva; |
— |
togħma: friska, b’ħafna togħma u armonjuża; |
— |
qawwa alkoħolika totali minima skont il-volum: 11,50 % skont il-volum; |
— |
estratt minimu mingħajr zokkor: 17,0 g/l. |
Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
Karatteristiċi analitiċi ġenerali |
|
Qawwa alkoħolika totali massima (f’% tal-volum) |
|
Qawwa alkoħolika totali minima (f’% tal-volum) |
|
Aċidità totali minima |
4,5 fi grammi għal kull litru espressi bħala aċidu tartariku |
Aċidità volatili massima (f’milliekwivalenti għal kull litru) |
|
Total massimu ta’ diossidu tal-kubrit (f’milligrammi għal kull litru) |
|
3. Monti Lessini Pinot Nero
DESKRIZZJONI TESTWALI KONĊIŻA
— |
kulur: aħmar lewn ir-rubin, possibbilment bi ħjiliet ta’ granata; |
— |
aroma: delikata, pjaċevoli, distintiva; |
— |
togħma: xotta, mimlija, qarsa iżda pjaċevoli; |
— |
qawwa alkoħolika totali minima skont il-volum: 12,5 % skont il-volum; |
— |
estratt minimu mingħajr zokkor: 24,0 g/l. |
Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
Karatteristiċi analitiċi ġenerali |
|
Qawwa alkoħolika totali massima (f’% tal-volum) |
|
Qawwa alkoħolika totali minima (f’% tal-volum) |
|
Aċidità totali minima |
4,5 fi grammi għal kull litru espressi bħala aċidu tartariku |
Aċidità volatili massima (f’milliekwivalenti għal kull litru) |
|
Total massimu ta’ diossidu tal-kubrit (f’milligrammi għal kull litru) |
|
4. Monti Lessini passito
DESKRIZZJONI TESTWALI KONĊIŻA
— |
kulur: isfar lewn id-deheb |
— |
aroma: distintiva, intensa u ta’ frott; |
— |
togħma: ħelwa medja jew ħelwa, ta’ bellus armonjuż, b’palat korpuż; |
— |
qawwa alkoħolika totali minima skont il-volum: 14,50 % skont il-volum; |
— |
estratt minimu mingħajr zokkor: 26,0 g/l. |
Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
Karatteristiċi analitiċi ġenerali |
|
Qawwa alkoħolika totali massima (f’% tal-volum) |
|
Qawwa alkoħolika totali minima (f’% tal-volum) |
11,50 |
Aċidità totali minima |
5,5 grammi għal kull litru espressa bħala aċidu tartariku |
Aċidità volatili massima (f’milliekwivalenti għal kull litru) |
|
Total massimu ta’ diossidu tal-kubrit (f’milligrammi għal kull litru) |
|
5. Inbid frizzanti ta’ kwalità Monti Lessini
DESKRIZZJONI TESTWALI KONĊIŻA
— |
ragħwa: fina u dejjiema; |
— |
kulur: isfar lewn it-tiben ta’ intensità li tvarja; |
— |
aroma: distintiva bi ħjiel delikat tal-ħmira; |
— |
togħma: minn dożaġġ żero jew pas dosé sa extra brut, brut, straxott, xott u xott mezzan; |
— |
qawwa alkoħolika totali minima skont il-volum: 11,5 % skont il-volum; |
— |
estratt minimu mingħajr zokkor: 15-il g/l. |
Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
Karatteristiċi analitiċi ġenerali |
|
Qawwa alkoħolika totali massima (f’% tal-volum) |
|
Qawwa alkoħolika totali minima (f’% tal-volum) |
|
Aċidità totali minima |
5,5 grammi għal kull litru espressa bħala aċidu tartariku |
Aċidità volatili massima (f’milliekwivalenti għal kull litru) |
|
Total massimu ta’ diossidu tal-kubrit (f’milligrammi għal kull litru) |
|
6. Inbid frizzanti ta’ kwalità Monti Lessini - Riserva
DESKRIZZJONI TESTWALI KONĊIŻA
— |
ragħwa: fina, intensa; |
— |
kulur: isfar lewn it-tiben ta’ intensità li tvarja għal isfar lewn id-deheb; |
— |
aroma: kumplessa, noti evoluti tipiċi ta’ perjodu twil ta’ tqaddim fil-flixkun; |
— |
togħma: minn dożaġġ żero jew pas dosé sa extra brut, brut, straxott, xott u xott mezzan; |
— |
estratt minimu mingħajr zokkor: 15,000-il g/l. Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
|
7. Inbid frizzanti ta’ kwalità Monti Lessini - Crémant
DESKRIZZJONI TESTWALI KONĊIŻA
— |
ragħwa: fina, kremuża; |
— |
kulur: isfar lewn it-tiben ta’ intensità li tvarja, kultant bi ħjiliet li jagħtu fir-ram; |
— |
aroma: delikata, fina b’noti li jfakkru fil-fermentazzjoni sekondarja fil-flixkun; |
— |
togħma: minn dożaġġ żero jew pas dosé sa extra brut, brut, straxott, xott u xott mezzan; |
— |
estratt minimu mingħajr zokkor: 15,00 g/l. |
Kull parametru analitiku li ma jidhirx fit-tabella ta’ hawn taħt jikkonforma mal-limiti stabbiliti fil-leġiżlazzjoni nazzjonali u tal-UE.
Karatteristiċi analitiċi |
|
Qawwa alkoħolika totali massima (f’% tal-volum) |
|
Qawwa alkoħolika totali minima (f’% tal-volum) |
11,50 |
Aċidità totali minima |
5,5 grammi għal kull litru espressi bħala aċidu tartariku |
Aċidità volatili massima (f’milliekwivalenti għal kull litru) |
|
Total massimu ta’ diossidu tal-kubrit (f’milligrammi għal kull litru) |
|
5. Prattiki tal-produzzjoni tal-inbid
a. Prattiki enoloġiċi speċifiċi
Metodu klassiku tal-produzzjoni ta’ nbid frizzanti
Prattika enoloġika speċifika
Fermentazzjoni sekondarja naturali fil-flixkun, permezz tal-metodu klassiku, f’konformità mar-regoli fis-seħħ dwar il-produzzjoni tal-inbejjed frizzanti.
b. Rendimenti massimi
1. |
Monti Lessini Durello 16 000 kilogramma ta’ għeneb għal kull ettaru |
2. |
Monti Lessini Bianco 12 000 kilogramma ta’ għeneb għal kull ettaru |
3. |
Monti Lessini Pinot Nero 12 000 kilogramma ta’ għeneb għal kull ettaru |
4. |
Inbid frizzanti ta’ kwalità Monti Lessini 16 000 kilogramma ta’ għeneb għal kull ettaru |
5. |
Inbid frizzanti ta’ kwalità Monti Lessini - Riserva 16 000 kilogramma ta’ għeneb għal kull ettaru |
6. |
Inbid frizzanti ta’ kwalità Monti Lessini - Crémant 16 000 kilogramma ta’ għeneb għal kull ettaru |
6. Żona ġeografika demarkata
Iż-żona tal-produzzjoni tal-inbejjed bid-denominazzjoni ta’ oriġini kontrollata Monti Lessini tinkludi:
a) |
il-provinċja ta’ Verona: it-territorju kollu tal-muniċipalitajiet ta’: Vestenanova, San Giovanni Ilarione u parti mit-territorju tal-muniċipalitajiet ta’: Montecchia di Crosara, Roncà, Cazzano di Tramigna, Tregnago u Badia Calavena. |
b) |
il-provinċja ta’ Vicenza: it-territorju kollu tal-muniniċipalitajiet ta’ Arzignano, Castelgomberto, Chiampo, Brogliano, Gambugliano, Trissino u parti mit-territorju tal-muniċipalitajiet ta’ Cornedo, Costabissara, Gambellara, Isola Vicentina, Malo, Marano Vicentino, Monte di Malo, Montebello Vicentino, Montecchio Maggiore, Montorso Vicentino, Nogarole Vicentino, San Vito di Leguzzano, Schio u Zermeghedo. |
Il-konfini taż-żona huwa kif ġej: fil-Lvant, tibda fil-fruntiera mal-provinċja ta’ Vicenza, fil-lokalità ta’ Calderina f’punt ta’ elevazzjoni ta’ 36 m, issegwi t-triq li twassal għal Roncà, waqt li tgħaddi mil-lokalitajiet ta’ Binello u Momello. Taqsam min-nofs il-villaġġ ta’ Roncà u tkompli tul it-triq li taqsam it-triq provinċjali ta’ Monteforte-Montecchia sal-fruntiera tal-muniċipalità ta’ Montecchia di Crosara. Issegwi l-fruntiera ta’ din il-muniċipalità sal-punt ta’ elevazzjoni ta’ 64 m u mbagħad it-triq li għal darb’oħra twassal għat-triq provinċjali fin-Nofsinhar tal-kooperattiva tal-inbid f’Montecchia di Crosara. Tkompli għal distanza qasira lejn it-Tramuntana tul it-triq provinċjali ta’ Val d’Alpone sal-pont li jaqsam ix-xmara tal-muntanja li ġġib l-istess isem u mbagħad tul it-triq muniċipali li tgħaddi mil-lokalitajiet ta’ Molino, Castello u San Pietro fin-Nofsinhar tal-villaġġ ta’ Montecchia di Corsara. Imbagħad tkompli sax-xmara tal-muntanja Rio Albo (punt ta’ elevazzjoni ta’ 85 m) li tiddelimita ż-żona, sa punt ta’ elevazzjoni ta’ 406 m fin-Nofsinhar ta’ Corgnano u Tolotti, fejn tiltaqa’ mal-fruntiera muniċipali ta’ Cazzano di Tramigna. Imbagħad tgħaddi mit-triq muniċipali lejn Marsiglio u ssegwi l-elevazzjoni ġeodetika sa Rio V. Brà u V. Magragna sal-punt ta’ elevazzjoni ta’ 149 m fil-lokalità ta’ Caliari. Mil-lokalità ta’ Caliari tkompli lejn it-Tramuntana tul it-triq li twassal għal Campiano sal-lokalità ta’ Panizzolo (elevazzjoni ta’ 209 m) fejn tiltaqa’ max-xmara ta’ Tramigna; issegwi t-Tramigna lejn it-Tramuntana sal-fruntiera tal-muniċipalità ta’ Tregnano u tibqa’ għaddejja lejn il-Punent tulha għal distanza qasira, fejn tiltaqa’ mal-lokalità ta’ Rovere (elevazzjoni ta’ 357 m u mbagħad ta’ 284 m). Tgħaddi tul it-triq li twassal għal Tregnano, waqt li tgħaddi qrib il-punt ta’ elevazzjoni ta’ 295 m fejn tidħol fil-villaġġ ta’ Tregnano u taqsmu tul it-triq prinċipali sal-punt ta’ elevazzjoni ta’ 330 m. Minn hemm, tidħol fit-triq muniċipali għal Marcemigo, taqsam dan il-villaġġ u toħroġ mil-lokalità ta’ Morini (elevazzjoni ta’ 481 m), imbagħad issegwi t-triq provinċjali lejn San Mauro di Saline (elevazzjoni ta’ 523 m). Tgħaddi tul it-triq provinċjali lejn San Mauro di Saline (elevazzjoni ta’ 523 m). Issegwi t-triq provinċjali lejn S. Mauro di Saline fid-direzzjoni tat-Tramuntana sal-lokalità ta’ Bettola li tinsab fuq il-fruntiera mal-muniċipalità ta’ Badia Calavena. Mil-lokalità ta’ Bettola, issegwi t-triq muniċipali li tinżel fil-wied, waqt li tgħaddi mil-lokalitajiet ta’ Canovi, Valle, Antonelli, Riva, Fornari u tidħol fit-territorju ta’ Badia Calavena. Mill-punt ta’ elevazzjoni ta’ 451 m issegwi t-triq muniċipali fid-direzzjoni tal-Lvant, waqt li toħroġ mil-lokalità ta’ Colli (elevazzjoni ta’ 734 m) fejn tiltaqa’ mal-fruntiera ta’ Vestenanova (elevazzjoni ta’ 643 m). Dejjem fit-triq muniċipali, tgħaddi mill-villaġġ ta’ Castelvero, u tissokta sa Vestenavecchia sakemm tilħaq iċ-ċentru ta’ Vestenanova. Tkompli sas-Siveri fuq it-triq muniċipali, sakemm tasal sal-lokalità ta’ Alberomato. Minn hemmhekk, tgħaddi mill-villaġġ ta’ Bacchi u tiltaqa’ mal-fruntiera tal-provinċja ta’ Vicenza. Din issegwi l-fruntieri provinċjali fid-direzzjoni tat-Tramuntana sa elevazzjoni ta’ 474 m ’il fuq mil-livell tal-baħar u mbagħad tul il-fruntiera tat-Tramuntana tal-muniċipalità ta’ Chiampo fid-direzzjoni tal-Lvant u mbagħad dik tan-Nofsinhar, sal-intersezzjoni bejn dik il-fruntiera u t-triq provinċjali li tgħaqqad lil Chiampo ma’ Nogarole Vicentino (elevazzjoni ta’ 468 m “il fuq mil-livell tal-baħar). Tkompli tul din it-triq u tgħaddi mill-villaġġ ta’ Nogarole u mbagħad tissokta tul it-triq ta’ Selva di Trissino sa Capitello eżatt wara l-punt ta’ elevazzjoni ta’ 543 m, fejn iddur lejn ix-xellug tul il-mogħdija li twassal għall-akwadott. Tgħaddi tul din il-mogħdija minn ġo Prizzi sakemm, f’elevazzjoni ta’ 530 m, tiltaqa’ mat-triq lejn Cornedo, li hija ssegwi minn ġo Pellizzari u Duello sa salib it-toroq mat-triq muniċipali li tagħti għal Caliari, Stella u Ambrosi, waqt li tgħaddi mill-villaġġ ta’ Grigio qabel ma terġa’ tingħaqad għal darb’oħra mat-triq provinċjali lejn Cornedo. F’Cornedo hija tingħaqad mal-awtostrada statali 246, li hija ssegwi kważi sal-pont ta’ Nori qabel ma ddur lejn il-Lvant fuq it-triq muniċipali li testendi tul Colombara, Bastianci, Muzzolon u Milani (elevazzjoni ta’ 547 m). Minn hemm issegwi t-trejqa fid-direzzjoni tal-Grigal sa Crestani (elevazzjoni ta’ 532 m). Imbagħad tgħaddi tul it-triq muniċipali li twassal għal Mieghi, Milani (elevazzjoni ta’ 626 m), Casare di Sopra, Casare di Sotto u Godeghe sa salib it-toroq mat-triq muniċipali ta’ Monte di Malo-Monte Magrè, li hija ssegwi sa Monte Magrè. Minn hemmhekk hija ssegwi t-triq lejn Magrè sa elevazzjoni ta’ 294 m, tkompli fil-Majjistral għal elevazzjoni ta’ 214 m, testendi tul it-triq ta’ Valfreda sa Raga (elevazzjoni ta’ 414 m), u mbagħad tkompli sal-fruntiera muniċipali bejn Schio u Torrebelvicino, li hija ssegwi sal-punt ta’ elevazzjoni ta’ 216 m. Minn hemm issegwi x-xmara Leogra sal-pont fuq l-awtostrada statali 46, filwaqt li tkompli tul it-triq tax-xmara sal-punt ta’ elevazzjoni ta’ 188 m. Imbagħad issegwi l-awtostrada statali 46 Schio-Vicenza sal-lokalità ta’ Fonte di Castelnovo. Taqsam din il-lokalità u mbagħad issegwi t-triq ta’ Costabissara, waqt li tgħaddi mil-lokalitajiet ta’ Ca” de Tommasi u Pilastro.
Il-fruntiera taż-żona mbagħad issegwi t-triq muniċipali minn Costabissara sa Creazzo, waqt li tgħaddi barra l-lokalità ta’ S. Valentino sakemm tasal sal-fruntiera tan-Nofsinhar tal-muniċipalità ta’ Costabissara. Imbagħad tmur lejn il-Punent sal-fruntiera tan-Nofsinhar tal-muniċipalità ta’ Costabissara, sa salib it-toroq mat-triq minn Gamgubliano fid-direzzjoni ta’ Sovizzo, tul it-triq ta’ Valdiezza. Issegwi t-triq lejn Castelgomberto sakemm tiltaqa’ mat-triq għall-villaġġi ta’ Busa, Pilotto u Vallorona fuq ix-xellug. Fis-sinjal ta’ waqfien, iddur fuq ix-xellug u ddur mat-tieni kantuniera fuq ix-xellug, u tkompli għaddejja minn salib it-toroq għal Monteschiavi. F’salib it-toroq għal Contrà Callorona, Rubbo u Spinati titlaq mit-triq għal dawk il-villaġġi u tkompli dritt sakemm tasal fil-qiegħ ta’ Via Vallorona. Tkompli fuq il-lemin, billi ssegwi l-profil tal-għolja lejn Valdimolino. Tkompli tul it-triq li tmur lejn Sant’Urbano di Montecchio Maggiore (it-triq Cavallara). Imbagħad taqbad it-triq ta’ Bastian sal-intersezzjoni mat-triq minn Castelgomberto. Hija tkompli tul it-triq ta’ Bernuffi, fejn iddur fuq ix-xellug sal-villaġġ ta’ Sant’Urbano. F’salib it-toroq iddur fuq ix-xellug u timxi tul it-triq ta’ Sovizzo Alto sa Casa Cattana, fejn iddur fuq il-lemin tul it-triq Caussa, fejn fit-tarf tagħha ddur għal darb’oħra fuq il-lemin tul it-triq (lejn Carbonara) sakemm tasal Bastia Bassa, fejn tissokta sa Campestrini u mbagħad fl-aħħar tasal fuq il-lemin ta’ Villa Cordellina. Imbagħad iddur fuq il-lemin sal-intersezzjoni mal-awtostrada statali 246, iddur fuq ix-xellug fit-triq Montorsina u tinkludi s-sit tal-kastelli ta’ Romeo u Ġuljetta fiż-żona.
Il-fruntiera mbagħad issegwi t-triq lejn Montecchio Maggiore u Montorso sal-pont li jgħaddi fuq ix-xmara Chiampo. Taqsam ix-xmara u tkompli fid-direzzjoni tan-Nofsinhar sat-triq Zermeghedo waqt li tgħaddi minn ġo Mieli. Mill-ġunzjoni ta’ Mieli tkompli max-xellug lejn Belloccheria, waqt li tgħaddi mid-dawra tal-għolja sal-ġunzjoni mat-triq Perosa fiż-żona demarkata. Minn hemm, tkompli lejn il-villaġġ ta’ Montebello tul via Castelleto sal-intersezzjoni mat-triq ta’ Mira. Minn hemm, tgħaddi tul it-triq ta’ Sevla sal-intersezzjoni ta’ Casa Cavazza u mbagħad tul it-triq ta’ Zermeghedo.
Il-fruntiera ssegwi t-triq ta’ Agugliana u tkompli fid-direzzjoni ta’ La Guarda. Madwar 300 metru ’l bogħod minn dan il-villaġġ, iddur fuq ix-xellug tul trejqa li tgħaqqadha mal-fruntiera ma’ Gambellara, u tkompli lejn it-Tramuntana sal-punt ta’ elevazzjoni ta’ 143 m.
Imbagħad tinżel tul it-triq sekondarja li twassal għal Gambellara, li taqsam fid-direzzjoni tal-Punent tul it-triq minn Gambellara għal Calderina fejn terġa’ tingħaqad mad-demarkazzjoni taż-żona inizjali fil-provinċja ta’ Verona.
7. Varjetà jew varjetajiet tad-dwieli
Chardonnay B
Durella B - Durello
Garganega B - Garganego
Pinot Bianco B - Pinot
Pinot Grigio - Pinot
Pinot Nero N – Pinot
Sauvignon B - Sauvignon blanc
8. Deskrizzjoni tar-rabta/rabtiet
DOP Monti Lessini (Inbid u Nbid Frizzanti ta’ Kwalità)
Dettalji taż-żona ġeografika
Fatturi naturali rilevanti għar-rabta
Iż-żona tal-produzzjoni għall-inbejjed tad-DOP Monti Lessini tifrex tul il-parti bl-għoljiet tal-muntanji fil-Lvant ta’ Lessini li jinsabu madwar il-fruntiera bejn il-provinċji ta’ Verona u Vicenza. Il-ġeoloġija taż-żona hija pjuttost kumplessa u b’diversi aspetti, b’ġebel bażi volkaniku u volkaniku-detritali li jippredomina fiż-żoni li bħalissa huma ddedikati għall-vitikultura. Il-ħamrija li tirriżulta hija rikka fil-minerali u moderatament fonda, b’sawra fina u kontenut ta’ ġebla tal-bażalt li huwa skars fil-wiċċ iżda f’konċentrazzjonijiet ogħla aktar fil-fond fil-ħamrija. Il-profil minerali tal-ħamrija huwa jagħmel il-proċessi tal-fermentazzjoni tal-most magħmul mill-għeneb Durella possibbli, varjetà ta’ dwieli bajda li hija kważi esklużiva għaż-żona.
Iż-żona tad-DOP Monti Lessini tgawdi minn klima ħafifa u moderata bi preċipitazzjoni annwali ta’ madwar 1 000 mm, ikkonċentrata l-aktar fir-rebbiegħa u fil-ħarifa, u temperaturi annwali medji ta’ madwar 13,5 oC.
L-istruttura fiżjoloġika taż-żona, li hija kondiviża mir-reġjun ta’ Lessini kollu kemm hu, hija kkaratterizzata mill-widien twal u xi drabi dojoq li jinsabu l-aktar fid-direzzjoni tal-Majjistral it-Tramuntana u tax-Xlokk in-Nofsinhar, mifruda minn xfar ta’ għoljiet irranġati f’disinn korrispondenti, li jinżlu lejn in-Nofsinhar sakemm jintilfu taħt id-depożiti alluvjali tal-pjan tal-wied ta’ Po. Id-differenza fl-altitudni fiż-żona hija ta’ madwar 800 m, fattur li huwa strumentali għal varjazzjonijiet sinifikanti bejn it-temperaturi ta’ binhar u billejl.
Fatturi storiċi u umani rilevanti għar-rabta
Il-fatt li l-vitikultura fiż-żona ta’ Monti Lessini tmur lura seba’ sekli jsaħħaħ bis-sħiħ l-attenzjoni li biha n-nies ikkultivaw id-dielja f’din iż-żona ta’ għoljiet għoljin madwar il-provinċji ta’ Verona u Vicenza.
Dokumenti storiċi dwar l-agrikoltura fiż-żona ta’ Monti Lessini spiss jenfasizzaw il-frażi “Terra cum vineis”, jiġifieri art kompletament taħt il-vinji. Mis-seklu 19 ’il quddiem, il-vitikultura u l-vinifikazzjoni fil-provinċji taħt id-denominazzjoni wasslu għal żieda sinfikanti fil-produzzjoni u żiedu l-kwalità tal-inbejjed prodotti.
Din iż-żieda kienet segwita mill-ewwel miżuri għall-protezzjoni tal-inbejjed tipiċi u l-istabbiliment sussegwenti tal-assoċjazzjoni sabiex jiġu rrappreżentati l-produtturi. Wara li nħolqot għall-ewwel darba permezz tad-Digriet Ministerjali Nru 25/06/1987 - il-Gazzetta Uffiċjali Nru 6 tad-9 ta’ Jannar 1988, fid-DOP Lessini Durello, fl-2011, l-isem tad-denominazzjoni nbidel għal Monti Lessini fl-istess ħin meta ġiet rikonoxxuta d-DOP Lessini Durello. Il-Konsorzju għall-Protezzjoni tal-Lessini Durello [Consorzio di Tutela del Lessini Durello], li ġie rikonoxxut mill-Ministeru Taljan f’Novembru 2000, huwa ddedikat biex jgħolli l-profil tad-denominazzjonijiet prodotti fiż-żona, kif ukoll il-kudnizzjonijiet produttivi u soċjoekonomiċi fil-widien ta’ Verona u Vicenza fiż-żona koperta mill-Ispeċifikazzjoni tal-Prodott. Il-produtturi tad-denominazzjoni, flimkien mal-Konsorzju, irraffinaw it-teknika li tintuża biex isir l-inbid frizzanti mill-għeneb Durella, u b’hekk jagħtih pożizzjoni prestiġjuża fost l-inbejjed frizzanti prodotti fir-reġjun ta’ Venezja.
L-aħjar għelejjel jiġu prodotti f’ħamrija esposta sew ta’ oriġini volkanika, permezz ta’ tekniki ta’ kultivazzjoni intelliġenti f’konformità mat-tradizzjonijiet lokali. Il-varjetà ta’ Durella tgħix bis-saħħa ta’ esponiment tajjeb għad-dawl tax-xemx iżda fuq kollox teħtieġ fluss ta’ arja tajjeb fil-vinja.
Is-sistemi ta’ tħarriġ tad-dwieli evolvew matul is-snin f’konformità mal-objettivi enoloġiċi mfittxija. Illum il-ġurnata, is-sistemi ideali għal dan it-tip ta’ produzzjoni huma l-pergola u l-metodu ta’ Guyot. Il-pergolas jintużaw fuq ġnub l-għoljiet weqfin fejn id-dwieli jiġu ttrattati l-aktar bl-idejn. Is-sistemi ta’ Espalier jew Guyot jinstabu aktar komuni f’żoni li huma aktar aċċessibbli u fejn l-inklinazzjonijiet ma humiex daqshekk weqfin. Dawn is-sistemi ta’ tħarriġ tad-dwieli jiżguraw li l-għeneb isir sew u jibqa’ tajjeb. Dawn ma humiex biss karatteristika tal-pajsaġġ iżda wkoll tal-kwalità ta’ nbejjed u l-konsistenza tar-rendimenti.
Iż-żona tad-DOP Monti Lessini issa hija famuża għall-eċċellenza enoloġika tagħha, li ġiet rikonoxxuta f’kompetizzjonijiet tal-inbid l-Italja u f’postijiet oħrajn fid-dinja.
DOP Monti Lessini – Kategorija ta’ nbid
Rabta ta’ kawżalità bejn il-kwalità, il-karatteristiċi tal-prodott u l-ambjent ġeografiku, mal-fatturi naturali u umani.
L-inbejjed tad-DOP Monti Lessini - Durello huma lewn it-tiben ta’ intensità li tvarja, b’aroma distintiva u delikata ta’ frott u togħma xotta u korpuża, b’intensitajiet li jvarjaw ta’ togħma, u li tradizzjonalment għandhom tendenza wkoll li jkunu vivaċi. L-aromi ta’ tuffieħ li huma ftit jew wisq ħodor jalternaw ma’ noti aktar qawwija u kumplessi ta’ oriġini ta’ minerali u żnied, inkluż aroma tal-baħar ta’ jodju u kubrit.
L-inbejjed tad-DOP Monti Lessini - Bianco huma ta’ lewn it-tiben ta’ intensità li tvarja, b’aroma karatteristikament pjaċevoli u togħma friska, bnina u armonjuża.
L-inbejjed tad-DOP Monti Lessini - Pinot Nero huma ta’ lewn ir-rubin, xi drabi bi ħjiliet tal-granata, b’aroma delikata, pjaċevoli u distintiva u togħma xotta, korpuża u qarsa pjaċevoli.
L-inbejjed tad-DOP Monti Lessini - Passito huma ta’ lewn dehbi, b’aromi karatteristikament intensi u ta’ frott. F’termini tat-togħma, huma medji għal ħelwin, bellusin, armonjużi u korpużi.
Iż-żona ta’ Monti Lessini hija l-ambjent ideali għall-produzzjoni tal-medda tal-inbejjed koperti mid-DOP Monti Lessini: il-ħamrija karatteristikament vulkanika hija rikka fin-nutrijenti u n-nixxigħat friski li jinżlu mill-Monti Lessini jippermettu li jintlaħaq sajran ottimali filwaqt li tinżamm l-aċidità tal-għeneb li hija meħtieġa. In-noti ta’ minerali huma markaturi speċifiċi għal dawn it-tipi ta’ nbid.
Il-pergola tradizzjonali u s-sistemi ta’ tħarriġ tad-dwieli ta’ espalier, l-għarfien espert tekniku tal-vitikulturi, is-sekli ta’ tradizzjoni u l-investimenti fit-teknoloġija enoloġika kollha jikkombinaw biex jiġu prodotti nbejjed b’aromi kumplessi ferm. Fil-fatt, l-inbejjed tad-DOP Monti Lessini ma humiex uniċi għar-robustezza tal-istruttura tagħhom. Huma l-karatteristiċi olfattorji li jiffurmaw u prattikament jiddefinixxu l-identità tal-prodott.
DOP Monti Lessini – kategorija ta’ Nbid Frizzanti ta’ Kwalità
Rabta ta’ kawżalità bejn il-kwalità, il-karatteristiċi tal-prodott u l-ambjent ġeografiku, mal-fatturi naturali u umani.
L-inbid frizzanti ta’ kwalità tad-DOP Monti Lessini għandu ragħwa fina u persistenti. Għandu kulur isfar lewn it-tiben ta’ intensità li tvarja u aroma distintiva bi ħjiel delikat tal-ħmira. Il-kontenut ta’ zokkor ivarja minn dożaġġ żero għal pas dosé sa demi-sec.
L-inbejjed frizzanti ta’ kwalità tad-DOP Monti Lessini Riserva għandhom bżieżaq intensi u fini. Filwaqt li jvarjaw minn kulur isfar lewn it-tiben ta’ intensità li tvarja għal isfar lewn id-deheb, għandhom aromi kumplessi b’noti żviluppati sew li huma tipiċi ta’ perjodu ta’ tqaddim twil fil-flixkun. Il-kontenut ta’ zokkor ivarja minn dożaġġ żero għal pas dosé sa demi-sec.
L-inbejjed frizzanti ta’ kwalità tad-DOP Monti Lessini Crémant għandhom bżieżaq fini u kremużi. Filwaqt li jvarjaw minn kulur isfar lewn it-tiben ta’ intensità li tvarja għal isfar lewn id-deheb, għandhom aromi kumplessi b’noti żviluppati sew tipiċi ta’ perjodu ta’ tqaddim twil fil-flixkun. Il-kontenut ta’ zokkor ivarja minn dożaġġ żero għal pas dosé sa demi-sec.
Il-klima moderata u l-varjazzjonijiet sinifikanti fit-temperatura bejn binhar u billejl li huma tipiċi fiż-żona tad-DOP Monti Lessini huma strumentali fil-produzzjoni ta’ għadd sinifikanti ta’ prekursuri aromatiċi li jsaħħu l-karatteristiċi organolettiċi u n-noti tipiċi tal-għeneb Durella.
Il-kontenut minerali tal-ħamrija, flimkien mal-aċidità notevoli tal-varjetà Durella, ifisser li l-inbid huwa partikolarment xieraq għall-produzzjoni tal-inbid frizzanti. Din it-teknika tal-aħħar (li sa minn meta ġiet stabbilita għall-ewwel darba d-denominazzjoni, intużat bħala metodu biex jinħarġu l-aqwa karatteristiċi tal-varjetà Durella) turi l-karatteristiċi tipiċi msemmija hawn fuq, skont il-perjodu tat-tqaddim. Jekk il-perjodu tat-tqaddim ikun iqsar, ikun hemm noti u aromi aktar pjaċevoli tat-tuffieħ aħdar u tal-frott taċ-ċitru, mineralità tipika u konsistenza karatteristikament tannika li hija unika fl-inbejjed bojod u tirriżulta fi bżieżaq partikolarment fini. Perjodu ta’ tqaddim itwal (il-verżjonijiet Riserva) itaffi l-abbundanza tal-varjetà, li jwassal għal inbejjed li huma aktar espressivi, b’noti awtolitiċi li għandhom rwol importanti biex joħolqu sensazzjonijiet organolettiċi eleganti. In-noti ta’ baħar tipiċi dejjem jinħassu u, għalkemm l-inbid qatt ma jkun korpuż iżżejjed, is-sens ta’ togħma, imsaħħa minn togħma qarsa ta’ minerali wara l-konsum, jibqa’ jkun pjaċevoli.
9. Rekwiżiti oħra applikabbli (ippakkjar, tikkettar, rekwiżiti oħra)
Produzzjoni ta’ nbejjed frizzanti
Qafas ġuridiku:
Il-leġiżlazzjoni tal-UE
Tip ta’ rekwiżit addizzjonali:
Deroga dwar il-produzzjoni fiż-żona ġeografika demarkata
Deskrizzjoni tar-rekwiżit:
F’konformità mad-deroga prevista fl-Artikolu 5(1)(b) tar-Regolament Delegat tal-Kummissjoni (UE) Nru 2019/33 (2), l-operazzjonijiet tal-vinifikazzjoni għall-inbejjed frizzanti ta’ kwalità jistgħu jsiru fiż-żona tal-produzzjoni demarkata u wkoll fil-provinċji ta’ Verona u Vicenza.
Link għall-ispeċifikazzjoni tal-prodott
https://www.politicheagricole.it/flex/cm/pages/ServeBLOB.php/L/IT/IDPagina/17283